Izraeli tha të dielën se e ka shënjestruar një zëdhënës të Hamasit në Rripin e Gazës, ndërsa spitalet dhe dëshmitarët në të gjithë enklavën raportuan për dhjetëra palestinezë të vrarë nga bombardimet ajrore dhe të shtënat me armë.

Kryeministri i Izraelit, Benjamin Netanyahu, tha se ushtria izraelite e sulmoi Abu Obeidan, zëdhënësin e kamotshëm të Brigadave al-Qassam të Hamasit, por nuk e dinte nëse ai është vrarë.

“Shpresoj që ai të mos jetë më në mesin tonë, por vërej se askush nga pala e Hamasit nuk po e trajton këtë çështje”, tha Netanyahu para ministrave në mbledhjen javore të kabinetit të tij.

Hamasi është shpallur organizatë terroriste nga Shtetet e Bashkuara dhe Bashkimi Evropian.

Obeida lëshoi deklaratë për herë të fundit të premten. Ai tha se luftëtarët në Qytetin e Gazës ishin të përgatitur, pasi Izraeli e shpalli qytetin zonë lufte dhe nisi fazat e para të ofensivës së tij.

Hamas do të përpiqej t’i mbante pengjet gjallë, tha ai, duke paralajmëruar se përleshje priteshin në zonat ku disa prej tyre po mbahen. Nëse vdekja e tij konfirmohet, ai do të ishte përfaqësuesi më i fundit i Hamasit i shënjestruar dhe i vrarë nga Izraeli, i cili po përpiqet t’i rrënojë kapacitetet ushtarake të grupit dhe ta parandalojë përsëritjen e sulmit të 7 tetorit 2023, kur militantët rrëmbyen 251 njerëz dhe vranë rreth 1.200 të tjerë, shumica civilë, në Izrael.

Hamas ende nuk ka komentuar mbi gjendjen e Obeidas. Si pjesë e fushatës për shkatërrimin e Hamasit, Izraeli ka vrarë shumë nga drejtuesit e tij kryesorë ushtarakë dhe politikë. Të paktën 43 palestinezë janë vrarë që nga e shtuna, shumica në Qytetin e Gazës, sipas spitaleve lokale.

Spitali Shifa – më i madhi në territor – tha se 29 trupa ishin sjellë në morgun e tij, përfshirë 10 persona të vrarë ndërsa kërkonin ndihmë dhe të tjerë të goditur në pjesë të ndryshme të qytetit.

Të dielën në mëngjes, zyrtarët e spitaleve raportuan edhe 11 viktima nga bombardimet dhe të shtënat. Spitali Al-Awda tha se shtatë prej tyre ishin civilë që përpiqeshin të arrinin tek ndihmat.

Dëshmitarët thanë se trupat izraelite hapën zjarr mbi turmat në Korridorin Netzarim, një zonë ushtarake izraelite që përshkon Gazën.

“Po përpiqeshim të merrnim ushqim, por hasëm në plumbat e pushtuesit”, tha Ragheb Abu Lebda, nga Nuseirati, i cili pa të paktën tre persona të gjakosur nga plagët me armë zjarri.

Izraeli prej javësh po operon në periferi të Qytetit të Gazës si dhe në kampin e refugjatëve Xhabalia. Ai gjithashtu ka intensifikuar sulmet ajrore në zonat bregdetare të qytetit.

Të paktën 63.371 palestinezë janë vrarë në Gazë gjatë luftës së Izraelit, sipas Ministrisë së Shëndetësisë në Gazë, e cila është pjesë e qeverisjes së Hamasit dhe e përbërë nga profesionistë mjekësorë.

Mijëra australianë kanë marrë pjesë në tubime kundër emigracionit në qytete të mëdha si Sidnei, Melburn e Adelaide, protesta të cilat qeveria i cilësoi me lidhje të ekstremit të djathtë dhe si “përhapje urrejtjeje”.

Manifestimet, të quajtura “Marshi për Australinë”, u shoqëruan me kundër-protesta dhe përplasje sporadike, ndërsa në disa raste u përfshinë politikanë të opozitës, përfshirë senatoren Pauline Hanson dhe deputetin Bob Katter.

Në Sidnei morën pjesë deri në 8 mijë persona, ndërsa në Melburn protestuesit u përplasën me pjesëmarrës të një mitingu pro-Palestinë.

Në Adelaide, policia raportoi se rreth 15 mijë vetë ishin të pranishëm në të dyja manifestimet, duke shtuar se shumica u treguan të qetë.

Mes organizatorëve dhe folësve u shfaqën edhe figura të njohura të ekstremit të djathtë, si Thomas Sewell, i lidhur me grupimet neo-naziste.

Qeveria australiane reagoi ashpër kundër protestave. Ministri i Brendshëm Tony Burke deklaroi se “nuk ka vend në vendin tonë për ata që duan të përçajnë dhe të minojnë kohezionin social”, ndërsa ministrja e Çështjeve Multikulturore, Anne Aly, tha se ky lloj aktivizmi i ekstremit të djathtë, i bazuar në racizëm dhe etnocentrizëm, “nuk ka vend në Australinë moderne”.

Presidenti i Kinës, Xi Jinping, dhe Kryeministri i Indisë, Narendra Modi, deklaruan se marrëdhëniet mes dy vendeve kanë hyrë në një fazë të re të besimit të ndërsjellë, pas një periudhe të gjatë tensioni, përfshirë edhe mosmarrëveshjet e pazgjidhura kufitare.

Dy udhëheqësit u takuan në kuadër të samitit të Organizatës së Bashkëpunimit të Shangait (SCO), i cili po zhvillohet në qytetin portual të Tianjinit. Ky është viziti i parë i Modi-t në Kinë pas shtatë vitesh. Gjatë takimit, presidenti Xi theksoi se Kina dhe India duhet të jenë partnere dhe jo rivale. Nga ana tjetër, Modi u shpreh se tashmë ekziston një “atmosferë paqeje dhe stabiliteti” mes dy vendeve.

Në samit merr pjesë edhe presidenti rus Vladimir Putin, së bashku me mbi 20 liderë botërorë. Por këtë vit, takimi po zhvillohet nën hijen e tensioneve tregtare me Shtetet e Bashkuara. Presidenti amerikan Donald Trump ka vendosur tarifa të larta ndaj mallrave indiane, si ndëshkim për vazhdimin e blerjeve të naftës ruse nga India. Nga ana tjetër, Putin përballet me kërcënime për sanksione të reja për shkak të vazhdimit të luftës në Ukrainë.

Ndërkohë që marrëdhëniet SHBA-Indi po përballen me sfida të reja, Modi po afrohet më shumë me Kinën. Të dy vendet janë ndër më të populluarat në botë dhe kanë ndër ekonomitë më të mëdha globale. Modi njoftoi gjithashtu se fluturimet mes Indisë dhe Kinës të pezulluara që prej përplasjes vdekjeprurëse mes trupave ushtarake në kufirin Himalaje në vitin 2020 do të rifillojnë, ndonëse nuk dha një afat të saktë.

Xi theksoi se “të dy palët duhet të trajtojnë marrëdhëniet nga një këndvështrim strategjik dhe afatgjatë” dhe se “të qenit miq është zgjedhja e duhur për të dyja palët.”

Edhe pse samiti i SCO-së ka më tepër karakter simbolik, ai u krijon liderëve mundësinë për të shprehur shqetësime të përbashkëta dhe për të diskutuar interesa të përbashkëta. Ngjarja zhvillohet pak ditë para një parade ushtarake madhështore në Pekin, që do të shënojë 80-vjetorin e përfundimit të Luftës së Dytë Botërore.

Organizata ka 10 shtete anëtare përfshirë Rusinë, Pakistanin dhe Iranin si dhe 16 vende vëzhguese dhe partnere në dialog. Putin, aleat i ngushtë i Kinës, mbërriti në Tianjin të dielën, ku u prit me tapet të kuq. SCO është themeluar në vitin 2001 nga Kina, Rusia dhe katër vende të Azisë Qendrore, si një kundërpeshë ndaj ndikimit të aleancave perëndimore si NATO.

Këtë vit, takimi është më i madhi që nga themelimi i organizatës. Në Tianjin, samiti ka marrë përmasat e një ngjarjeje madhore. Banderola dhe postera janë shpërndarë në çdo cep të qytetit verior, ndërsa mijëra qytetarë janë mbledhur çdo mbrëmje në zonën buzë lumit për të ndjekur një shfaqje dritash të projektuar mbi kullat e larta.

Rrugët janë tejmbushur, duke e bërë të vështirë qarkullimin, veçanërisht pranë urës historike Jiefang. Gjatë ditës, këmbësorët shpesh ndalohen përkohësisht për t’i hapur rrugë autokolonave të liderëve të huaj. Në qendër të qytetit janë pezulluar shërbimet e taksive dhe makinave me qira, por kjo nuk ka ndikuar në entuziazmin e qytetarëve, të cilët duan të jenë pjesë e asaj që përshkruhet si një takim historik.

Autoritetet policore kanë këshilluar mbi 13 milionë banorët e Tianjinit të kufizojnë lëvizjet dhe të frekuentojnë vetëm dyqanet pranë banesave për nevojat e përditshme.

Avokati Idajet Beqiri në një intervistë për “ABC News”, akuzoi Partinë Demokratike dhe Lëvizjen Socialiste për Integrim për përfshirje në veprimtari kriminale gjatë fushatave elektorale.

Sipas tij, këto parti kanë përdorur para të pista për financimin e fushatave, përfshirë edhe blerjen e votave të qytetarëve.

Beqiri u shpreh se lobimi në SHBA është bërë me qëllim të heqjes së “non gratës” ndaj Sali Berishës, duke e cilësuar këtë si një krim zgjedhor dhe pastrim parash. Ai kritikoi gjithashtu SPAK-un dhe KQZ-në për mungesë reagimi ligjor dhe kërkoi trajtim të barabartë për të gjithë aktorët politikë, duke theksuar nevojën për ndëshkim konkret në shtator ndaj Berishës dhe familjes së tij.

“Kontratat që PD i ka bërë në fushatë kanë qenë të vjedhura më kusari. Gjithmonë fushatat elektorale i bënë me para të pista dhe këtë gjë e shtynë deri tek LSI. Ku më pas LSI dhe PD u bënë dy organizata kriminale. KQZ nuk ka marrë vendimet ligjore të duhura, për të gjithë paratë që shpërndahen për fushata elektorale, që shpërndaheshin me thasë dhe më pas përfundojnë edhe për të blerë votat e qytetarëve. Lobimi me shumën e madhe u bënë vetëm për të hequr “non gratën” e Berishës.

Ligjërisht ky kjo vetëm që është një krim zgjedhor, Berishën dhe LaCivita-n për ndikimin në zgjedhje, sepse një person nga SHBA nuk ka të drejtë që të bëjë fushatë në Shqipëri. Berisha duhet të japë llogari për ndikimin në zgjedhje dhe për fshehjen e të ardhurave. Kjo është një pastrim i parave që rrjedhin nga krimi. Kjo është një vepër penale. SPAK dhe Gjykata duhet të venë në peshore të drejtën, duhet të kuptojnë që nuk ka standard të dyfishtë.

Duhet që të veprojnë me Berishën njësoj si me Metën. SPAK po përdor dy standard dhe e ka future veten e vet në një llum, pasi po merret me gjëra të vogla dhe kjo të mëdha. Në shtator duhet që të dënohet Berisha dhe familja e tij, në të kundërt SPAK-ut duhen vënë minat”, tha avokati./abcnews.al

Në afërsi të fshatit Xhyherinë në Vlorë, reshjet e dendura të shiut kanë shkaktuar çarjen e kanalit të ujërave të larta, duke rrezikuar përmbytjen e dy banesave dhe një subjekti pularie.

Në vendin e ngjarjes ndodhen shërbimet e policisë dhe ato të zjarrfikëses, ndërsa emergjencat civile kanë dërguar një mjet fadromë për të frenuar përhapjen e ujit. Autoritetet njoftojnë se për të shmangur përmbytjen, është i domosdoshëm përdorimi i një mjeti skrep për pastrimin e inerteve që kanë bllokuar kanalin.

Situata vijon të jetë nën monitorim nga autoritetet./abcnews/al

“Nëse kërcënohemi, nuk do të hezitojmë të përgjigjemi”. Kështu ka deklaruar ministri i Jashtëm turk, Hakan Fidan, në një intervistë televizive, duke folur për kërcënimin që, sipas Ankarasë, vjen nga “çmenduria e Hitlerit” që ka prekur qeverinë e shtetit të Izraelit, politikat e së cilit rrezikojnë stabilitetin e të gjithë rajonit.

“Nuk kemi ndërmend të sulmojmë askënd, përveç nëse do të kërcënohemi. Në atë rast nuk do të tërhiqemi dhe përgjigja jonë nuk do të vonojë”, tha Fidan. “Mesazhi ynë është i qartë dhe i drejtohet të gjithëve: mos u tregoni armiqësorë ndaj nesh dhe ne nuk do të jemi armiqësorë ndaj jush. Por nëse dikush guxon të na kërcënojë, do të përballet me pasojat”, theksoi ministri i Jashtëm turk.

Reagimi vjen një ditë pasi Fidan njoftoi se Ankaraja ka ndërprerë të gjitha lidhjet tregtare me Izraelin, ka ndaluar anijet turke të ankorohen në portet izraelite dhe ka mbyllur hapësirën ajrore për avionët izraelitë.

Ministri i Jashtëm turk e bëri këtë deklaratë gjatë një seance të jashtëzakonshme të parlamentit turk të thirrur për situatën në Gaza.

“Turqia ka ndërprerë çdo formë tregtie me Izraelin, anijet tona nuk do të ndalen më në portet izraelite dhe asnjë avion izraelit nuk do të mund të përdorë hapësirën ajrore turke”, tha Fidan, duke ritheksuar se vendimi vinte si përgjigje ndaj ofensivës së Izraelit në Rripin e Gazës.

Ky është një hap tjetër i ashpër në marrëdhëniet mes dy vendeve, pas vendimeve të mëparshme të qeverisë turke për të kufizuar lidhjet diplomatike e ekonomike me Izraelin.

Kujtojmë se në maj 2024, Turqia ndërpreu të gjitha lidhjet tregtare me Izraelin, duke ndaluar eksportet dhe importet, përfshirë produkte kyçe si çelik, çimento dhe aviacion. Ky hap erdhi pas refuzimit të Izraelit për të lejuar Turqinë të dërgojë ndihma humanitare në Gaza. Presidenti turk, Recep Tayyip Erdoğan, e akuzoi Izraelin për “krime kundër njerëzimit”.

Tanimë, Turqia ndodhet në një pozicion kritik në Lindjen e Mesme, pasi po përballet edhe me sfida të tjera rajonale, përfshirë tensionet me Iranin dhe përpjekjet për të ndërmjetësuar në konflikte të tjera.

Ndërsa presidenti amerikan është shprehur me rezerva lidhur me mundësinë e mbajtjes së një takimi mes Ukrainës dhe Rusisë, presidenti ukrainas Volodymyr Zelensky ka bërë të ditur pesë vendet që, sipas tij, mund të shërbejnë si vendtakime të mundshme për zhvillimin e bisedimeve, raporton Sky News.

Pas samitit të fundit në Uashington, Ukraina dhe aleatët e saj kanë shtuar përpjekjet për të organizuar një takim me Rusinë, por Moska vazhdon të kundërshtojë.

Në mes të spekulimeve të shumta për vendndodhjen e mundshme të takimit, duke pasur parasysh se ndaj presidentit rus Vladimir Putin është lëshuar një urdhër-arrest ndërkombëtar Zelensky, në fjalimin e tij të përditshëm, ka përmendur pesë vende si opsione të mundshme: Turqinë, Emiratet e Bashkuara Arabe, Arabinë Saudite, Katarin dhe Zvicrën.

Zelensky shtoi gjithashtu se këshilltari i tij i lartë, Andrii Yermak, ndodhet aktualisht në Shtetet e Bashkuara ku po zhvillon takime me të dërguarin special amerikan, Steve Witkoff. Ndërkohë, vetë presidenti ukrainas ka planifikuar të udhëtojë drejt Evropës gjatë javës për takime të tjera diplomatike./abcnews.al

Udhëheqësi i Koresë së Veriut, Kim Jong Un, është takuar me familjet e ushtarëve koreano-veriorë të vrarë gjatë luftimeve në mbështetje të Rusisë në luftën kundër Ukrainës, duke u shprehur “ngushëllimet më të thella”, njoftoi media shtetërore koreano-veriore.

Ceremonia e veçantë u zhvillua të premten, ku Kim u pa duke ngushëlluar familjet e të rënëve dhe duke iu dhuruar portrete të të afërmve të tyre të vdekur, të mbështjella me flamurin kombëtar.

Sipas autoriteteve të Koresë së Jugut, Koreja e Veriut ka dërguar rreth 15 mijë trupa për të mbështetur Rusinë në pushtimin e saj ndaj Ukrainës, së bashku me raketa dhe armë me rreze të gjatë veprimi. Në këmbim, Pheniani dyshohet të ketë marrë ndihma në ushqim, para dhe mbështetje teknike.

Vetëm në muajin prill, Koreja e Veriut e pranoi zyrtarisht përfshirjen në konfliktin e huaj, duke konfirmuar se disa nga ushtarët e saj ishin vrarë. Zyrtarë perëndimorë i thanë BBC-së në janar se besohej që të paktën 1,000 ushtarë koreano-veriorë ishin vrarë brenda tre muajve të parë të dërgimit, me disa mijëra të tjerë të plagosur. Megjithatë, vlerësimet më të fundit flasin për rreth 600 të vrarë.

Ceremonia e së premtes ishte e dyta e këtij lloji brenda një jave. Gjatë fjalës së tij, Kim u shpreh se ishte i mbushur me “trishtim” që nuk kishte arritur t’i sillte ushtarët gjallë në atdhe, duke premtuar ndërtimin e një monumenti në nder të tyre si dhe përkujdesje për fëmijët e të rënëve.

“Mendova shumë për familjet e dëshmorëve që nuk ishin të pranishme në ceremoninë e kaluar… Kështu që vendosa të organizoj këtë takim për të ngushëlluar familjet e të gjithë heronjve dhe për të lehtësuar sadopak dhimbjen dhe pikëllimin e tyre,” citoi agjencia shtetërore KCNA fjalët e Kim Jong Un.

Javën e ardhshme, Kim pritet të takohet me presidentin rus Vladimir Putin në Kinë, gjatë një vizite që përkon me paradën ushtarake për përkujtimin e dorëzimit të Japonisë në fund të Luftës së Dytë Botërore.

Kjo do të jetë takimi i tretë mes Kim dhe Putin brenda dy viteve, në një periudhë kur marrëdhëniet mes dy vendeve po thellohen gjithnjë e më shumë.

Në tetor të vitit të kaluar, Kim i dërgoi Putinit një mesazh urimi për ditëlindje, duke e përshkruar atë si “shokun më të ngushtë”. Po atë muaj, Putin prezantoi një projekt-ligj për ratifikimin e një marrëveshjeje ushtarake të arritur me Kimin, e cila parashikon ndihmë të ndërsjellë në rast të ndonjë “agresioni” ndaj njërës prej palëve. Koreja e Veriut ka rreth 1.28 milionë ushtarë aktivë, por përpara përfshirjes në Ukrainë, ushtria e saj nuk kishte përvojë të fundit në operacione luftarake jashtë vendit./abcnews.al

Read More...

Zyra e presidentit palestinez Mahmoud Abbas i kërkoi të shtunën Shteteve të Bashkuara që të rishikojnë dhe të tërheqin vendimin për anulimin e vizës së tij, vendim ky që vjen pak javë para pjesëmarrjes së parashikuar të Abbasit në Asamblenë e Përgjithshme të OKB-së dhe në një konferencë ndërkombëtare për shtetësinë palestineze.

Departamenti Amerikan i Shtetit njoftoi të premten se sekretari i Shtetit, Marco Rubio, ka anuluar vizat për Abbasin dhe rreth 80 zyrtarë të tjerë palestinezë, në prag të mbledhjes vjetore të nivelit të lartë në Kombet e Bashkuara, e planifikuar për muajin e ardhshëm.

Abbas, që prej vitesh ka mbajtur fjalime në Asamblenë e Përgjithshme, zakonisht udhëheq delegacionin palestinez në këtë forum global.

“Ne i bëjmë thirrje administratës amerikane që të ndryshojë këtë vendim, i cili vetëm sa e përshkallëzon tensionin dhe rrit ndasitë”, deklaroi zëdhënësi presidencial Nabil Abu Rudeineh për agjencinë Associated Press nga Ramallahu.

Sipas tij, autoritetet palestineze kanë nisur kontakte të menjëhershme me vende arabe dhe ndërkombëtare, përfshirë ato më të përfshirat në këtë çështje. “Kjo përpjekje do të vazhdojë pa ndërprerje”, theksoi Abu Rudeineh.

Ai gjithashtu u bëri thirrje shteteve të tjera që të ushtrojnë presion ndaj administratës amerikane për të anuluar vendimin, veçanërisht ndaj atyre që do të organizojnë më 22 shtator një konferencë ndërkombëtare të nivelit të lartë mbi zgjidhjen me dy shtete në Lindjen e Mesme. Konferenca pritet të mbahet nën bashkëorganizimin e Francës dhe Arabisë Saudite.

Në këtë kontekst, ministri i Jashtëm francez, Jean-Nowl Barrot, shprehu shqetësim për kufizimet në hyrjen në selinë e Kombeve të Bashkuara dhe paralajmëroi se kjo çështje do të diskutohet me homologët e tij në Bashkimin Evropian.

“Selia e OKB-së është territor neutral, një vend i kushtuar paqes dhe zgjidhjes së konflikteve”, u shpreh Barrot të shtunën.

Ndërkohë, zëdhënësi palestinez Abu Rudeineh përsëriti thirrjen për ndërprerjen e ofensivës ushtarake izraelite në Rripin e Gazës dhe për të ndalur përshkallëzimin e dhunës në Bregun Perëndimor, duke theksuar se “asnjë nga këto veprime nuk ndihmon në gjetjen e një zgjidhjeje”.

Izraeli ka shpallur qytetin e Gazës si një zonë lufte, duke deklaruar se ky mbetet një bastion i fortë i Hamasit.

Administrata Trump ka ndjekur një linjë të ashpër ndaj autoriteteve palestineze, duke vendosur masa të ndryshme kufizuese, përfshirë edhe anulimin e vizave.

“Është në interesin tonë të sigurisë kombëtare që OÇP dhe Autoriteti Palestinez të mbahen përgjegjës për shkeljen e angazhimeve të tyre dhe për përpjekjet që dëmtojnë perspektivën për paqe”, thuhet në deklaratën e Departamentit të Shtetit.

Në reagim, Autoriteti Palestinez ka dënuar vendimin si një shkelje të rolit të SHBA-ve si vend mikpritës i OKB-së dhe si pengesë ndaj dialogut ndërkombëtar për paqen./abcnews.al

Një tren pasagjerësh doli nga shinat në Egjiptin perëndimor, duke vrarë të paktën tre persona dhe duke plagosur 94 të tjerë, thanë autoritetet.

Ky ishte i fundit në një seri aksidentesh hekurudhore në vend në vitet e fundit.

Treni doli nga shinat ndërsa udhëtonte për në Kajro nga provinca perëndimore mesdhetare e Matrouh, në bregdetin verior të vendit, raporton AP.

Shtatë nga vagonët e tij dolën nga shinat, me dy prej tyre që u përmbysën.

Ministria e Shëndetësisë lëshoi ​​një deklaratë të veçantë ku detajonte numrin e viktimave, duke shtuar se 30 ambulanca u dërguan për të transferuar të plagosurit në spitale.

Deklarata e autoriteteve hekurudhore tha se u hap një hetim për të përcaktuar shkakun e daljes nga shinat.

Ndryshe, daljet nga shinat dhe aksidentet e trenave janë të zakonshme në Egjipt, ku një sistem hekurudhor i vjetër është prekur gjithashtu nga keqmenaxhimi./abcnews.al

Tre vëllezër nga Skocia kanë vendosur një rekord botëror duke përfunduar më shpejt se kushdo tjetër lundrimin e plotë, pa anije mbështetëse mbështetëse, përmes Oqeanit Paqësor.

Jamie, Ewan dhe Lachlan Maclean përfunduan udhëtimin e tyre  pas 139 ditësh, duke mbërritur të shtunën në Cairns të Australisë. Ata lundruan në një distance prej më shumë se 14.4 mijë kilometrash detare, duke u nisur nga Peruja dhe u bënë ekipi i parë që arrin të kryejë kalimin e plotë nga Amerika e Jugut deri në Australi.

Tre vëllezërit nga Edinburgu përballuan stuhi të forta, sëmundje te ndryshme , dëmtime dhe madje një moment dramatik kur Lachlan u mor nga dallgët e detit. Gjatë kësaj aventure ata arritën të mbledhin mbi rreth 946 mijë dollarë si pjesë e synimit të tyre për të grumbulluar 1 milionë paundë në ndihmë të një projekti për ujëra të paster.

Në mbërritjen e tyre në Australi , vëllezërit valëvitën flamurin skocez, australian dhe britanik, ndërsa u pritën nga mbi 50 anëtarë  të familjejes së tyre përfshirë nënën e tyre por edhe mbështetës të tyre.

Pak orë para mbërritjes, vëllai më i madh, Ewan, publikoi një video ku i drejtohej marinës Australiane duke i pyetur : “Keni pica dhe birra? Përsëris, keni pica dhe birra?  Po mbaroj.”

Eëan, 33 vjeç, tha se kjo ishte përvoja më e vështirë e jetës së tij, një sfidë që nuk do ta kishte menduar kurrë të përballonte pa vëllezërit. Ndërsa Jamie, 31 vjeç, pranoi se në fund të udhëtimit gjithçka dukej si një dëshpërim që merrte në fund.

Sipas tyre, kjo aventurë u dha një këndvështrim të ri për jetën dhe ata planifikojnë të vazhdojnë mbledhjen e fondeve përmes fondacionit të tyre, Maclean Foundation, me synimin për të financuar projekte që do të sigurojnë ujë të pastër për rreth 40 mijë banorë në Madagaskar. Rekordi i mëparshëm mbahej nga rremtari rus Fyodor Konyukhov, i cili në vitin 2014 kishte kaluar Paqësorin i vetëm për 160 ditë./abcnews.al

E nisi në Champions dhe nuk mundi ta vazhdonte aty, por gjithsesi një sukses e arriti. Vllaznia siguroi vazhdimësinë në futbollin kontinental për femra me fitoren 3-1 ndaj një rivali nga Luksemburgu.

Rasing Union u mund 3-1 në stadiumin “Loro Boriçi” dhe ky sukses ishte një reagim pas humbjes së pak ditëve më parë, gjithashtu në Shkodër ndaj Dinamos së Minskut. Bajraktari, Doçi dhe Deda ishin autoret e golave, dhe shkodranet do të vazhdojnë tashmë në Kupën e Europës, pasi u eliminuan nga Championsi.

Shorti për raundin e parë eliminator hidhet këtë të diel, ndërsa ndeshjet do të luhen në 10 e 11 shtator, si dhe në 17 e 18 shtator. Trajneri Nikolin Leka dhe sulmuesja kryesore, Megi Doçi e komentuan kështu kualifikimin.

Futbolli shqiptar i femrave do të përfaqësohet në këtë konkurrim edhe nga Partizani. Dy ekipet shqiptare do të synojnë të kalojnë dy raunde eliminatore, për t’u kualifikuar për në të tetat e finaleve./abcnews.al

Të paktë janë ata yje futbolli me një ritëm të tillë të çmendur. Mirlind Daku dha një tjetër provë se është në formë të madhe, dhe se ky mund të jetë sezoni i tij, ndërsa realizoi edhe dy herë të tjera në Premier Ligën e Rusisë.

Sulmuesi i kombëtares shqiptare e bëri heroizmin e fundit në ndeshjen e kampionatit, që skuadra e tij Rubin, e barazoi 2-2 në fushën e Orenburgut.

Ai goditi saktë në minutat 16 e 34, duke I thënë ekipit nga Tatarstani epërsinë 2-0, por që nuk u arrit të ruhej. Vendasit barazuan në 20 minuta në pjesën e dytë, duke i dhënë një goditje të rëndë pretendimeve të Rubinit për të luftuar për Europën këtë sezon, apo edhe për titullin, ndërsa ekipi nga Kazani ka 12 pikë, duke zbritur në vendin e gjashtë.

Gjithsesi, Daku është plotësisht brenda parashikimeve dhe objektivave personalë. Sulmuesi kuqezi ka shënuar deri tani 6 gola në 7 ndeshje në Premier Ligën ruse, si dhe ka shërbyer një asist.

Ai po përjeton edicionin më pozitiv që kur erdhi tek Rubini, madje më të mirin në karrierën, dhe është vetëm një gol prapa kryesuesit të renditjes së Këpucës së Artë, Aleksei Batrakov të Lokomotivës moskovite.

Në total në Rusi ka luajtur 72 ndeshje, duke shënuar 32 gola e shërbyer 12 asistë, duke qenë më i miri për ekipin e tij, dhe një nga më të mirët në kampionat./abcnews.al

Reshjet e shiut dhe stuhitë të shtunën përfshinë të gjithë vendin duke shkaktuar probleme në shumë qytete. Në Tiranë era e fortë rrëzoi çadra të lokaleve dhe  pemë. Në disa zona  rrëzimi i tyre dëmtoi automjete.

Sendet e rëna nga pallatet  për shkak të erës së fortë lënduan  23 persona të cilët kërkuan ndihmë  mjekësore në spitalin e Traumës. Në aeroportin “Nënë Tereza”, për rreth 30 minuta ne mesditë, u pezulluan operacionet në pistë.

Dy fluturime drejt Italisë dhe Gjermanisë u anuluan. Nisjet në shumë prej destinacioneve të tjera u vonuan.

Në Durrës plazhet u boshatisën ndërsa shumë rrugë u mbushën me ujë. Uji mbuloi dhe disa rrugë në Lezhë duke vështirësuar qarkullimin e automjeteve.

Për shkak të erës, në Vlorë stuhia e rërës mbuloi qytetin ndërsa peshkarexhat nuk dolën në det. Më pas reshjet e shiut larguan pluhurin, por përmbytën rrugët.

Lëvizja e automjeteve u vështirësua ndërsa hyrja e qytetit u bllokua për kalimin e automjeteve. Uji u fut dhe në oborret e 15 banesave. Në Zvërnec pemët e rrëzuara zunë rrugën kryesore, duke lënë të bllokuar në automjete për pak kohë disa turistë.

Në Qarkun e Fierit stuhia dëmtoi linja të furnizimit me energji elektrike në Mallakastër, Cakran, Frakull dhe vijën bregdetare Darëzezë –Seman duke lënë pa drita disa zona. Dëmet u riparuan dhe energjia u rikthye.

Vërshimi i ujit bllokoi përkohësisht lëvizjen e makinave në rrugët Fier-Patos, Fier-Lushnje në afërsi të Mbrostarit dhe segmentin Fier-Rroskovec.

Në Lushnje dhe përgjatë autostradës Levan-Tepelenë u rrëzuan disa pemë, por nuk shkaktuan dëme. Në Pogradec stuhia e fortë dhe dallgezimi ne det  detyroi një traget turistesh që po udhëtonte nga Shen Naumi drejt  Ohrit, të kalojë për pak minuta  nga ujërat territorial të  Maqedonisë së Veriut në ato të Shqipërisë.

Deri të dielën meteorologët parashikojnë reshje mesatare deri intensive në shumë prej zonave të vendit dhe temperatura që pritet të mos i kalojnë 26 gradë Celcius.

Policia e Shtetit i ka bërë thirrje drejtuesve të automjeteve të ngadalësojnë shpejtësinë dhe të respektojnë rregullat e qarkullimit rrugor ndërsa këmbësorëve  të bëjnë kujdes nga sende që mund të bien nga lartësitë për shkak të erës që herë pas herë fryn me intensitet./abcnews.al

Sinoptikania Anira Gjoni në një intervistë për ABC News ka dhënë një parashikim të detajuar për stuhinë që Shqipërinë këtë të shtunë. Sipas saj, stuhia do të arrijë kulmin gjatë natës, nga ora 22:00 deri në orën 3:00 të mëngjesit, dhe reshjet do të jenë më të forta në disa zona të vendit.

Anira Gjoni tha se reshjet do të intensifikohen gjatë natës dhe do të vazhdojnë deri të nesërmen, ndërkohë që pasditja e ditës së diel do të sjellë një pushim të përkohshëm.

Ajo sqaroi se reshjet e shiut pritet të vazhdojnë deri të mërkurën e ardhshme, por me një intensitet më të ulët pas ditës së martë.

Për shkak të reshjeve të shumta, sinoptikania ka paralajmëruar se në zonat malore të të gjitha qarqeve mund të ketë probleme serioze, si rrëshqitje dherash dhe mundësi për përmbytje të vogla. Po ashtu, qytetet e mëdha si Lezha, Durrësi dhe Tirana pritet të përjetojnë një përkeqësim të ndjeshëm të motit, me erë të fortë dhe reshje intensive, të cilat do të ndikojnë në trafikun dhe jetën e përditshme.

“Në zonat malore në të gjitha qarqet shfaqen problematika, të rrëshqitjeve të dherave. Kurse në qytetet si Lezha, Durrësi dhe Tirana pritet që të kenë një përkeqësim të motit. Presim që të kemi pushimin e reshjeve gjatë paradites së ditës së nesërme. Stuhia do të jetë nga ora 22:00 e darkë deri rreth orës 3:00 të mëngjesit. Por, kjo varet në zona të ndryshme, me orë të ndryshme. Reshjet pritet që të vazhdojnë gjatë natës, dhe deri mëngjesin e ditës së nesërme. Në ditën e hënë dhe të martë pritet që të ketë reshje shiu, deri nga dita e mërkurë, por kjo me intensitet të ulët”, tha meteorologia./abcnews.al

Ushtria izraelite filloi një ofensivë të planifikuar që ka tërhequr dënim ndërkombëtar, duke e shpallur qytetin më të madh të Gazës një zonë luftimi.

Ndërsa ushtria njoftoi rifillimin e luftimeve, zyrtarët e shëndetësisë thanë se numri i të vdekurve në Gaza është rritur në 63,025, me 59 vdekje të raportuara nga spitalet gjatë 24 orëve të fundit.

Grupet e ndihmës dhe një kishë që strehon njerëz thanë se do të qëndronin në Qytetin e Gazës, duke refuzuar të braktisnin të uriturit dhe të zhvendosurit.

Ndryshimi vjen disa javë pasi Izraeli njoftoi për herë të parë planet për të zgjeruar ofensivën e tij në qytet, ku qindra mijëra njerëz po strehohen dhe po vuajnë nga uria.

Autoritetet izraelite pretendojnë se qyteti i Gazës është një fortesë e Hamasit me një rrjet tunelesh që mbetet në përdorim pavarësisht disa bastisjeve të mëparshme në shkallë të gjerë në zonë gjatë gati 23 muajve të luftës.

Sipas kryeministrit Benjamin Netanyahu, Izraeli duhet të shkatërrojë aftësitë e Hamasit në qytet për të parandaluar përsëritjen e incidentit që filloi konfliktin më 7 tetor 2023.

Edhe pse organizatat e ndihmës dhe agjencitë e OKB-së e denoncuan ofensivën, banorët e Gazës u ankuan se dënimi kishte bërë pak për të dekurajuar vendosmërinë e Izraelit.

“Masakrat nuk u ndalën kurrë, madje as gjatë pauzave humanitare”, tha banori Mohamed Aboul Hadi.

“Na hedhin në rrugë, çfarë do të thoja? Si qen? Ne nuk jemi qen”, tha Mohammed Maarouf.

Ndryshe, më shumë se 63 mijë palestinezë janë vrarë që nga fillimi i luftës, njoftoi Ministria e Shëndetësisë e Gazës./abcnews.al

Avokatët që mbrojnë të drejtat e njeriut në Argjentinë kanë dorëzuar një ankesë penale në gjykatat federale të vendit, duke kërkuar që kryeministri izraelit, Benjamin Netanyahu, të arrestohet nëse viziton territorin argjentinas.

Kjo kërkesë vjen pas spekulimeve për një mundësi vizite të Netanyahu-t në shtator, e cila ende nuk është konfirmuar nga qeveria izraelite.

Në dokumentin e ankesës, të cilin e ka shqyrtuar agjencia Reuters, Netanyahu, bashkë me autoritetet politike dhe ushtarake të Izraelit, janë nën hetim për një ngjarje të ndodhur më 23 mars 2025. Gjatë këtij incidenti, 15 persona u ekzekutuan, përfshirë disa punonjës të ndihmës që po asistonin viktimat e një shpërthimi.

Avokatët argjentinas të të drejtave të njeriut, Rodolfo Yanzon dhe Raji Sourani, drejtor i Qendrës Palestineze për të Drejtat e Njeriut, e kanë akuzuar Netanyahu-n për përgjegjësi penale, duke e cilësuar atë të përfshirë në krime lufte dhe për shkaktimin e vdekjes nga uria. Po ashtu, ata kanë ngritur akuza për krime kundër njerëzimit, përfshirë vrasje, përndjekje dhe veprime të tjera çnjerëzore.

Kjo nuk është hera e parë që kërkohet arrestimi i Netanyahu-t në Argjentinë. Një kërkesë e ngjashme ishte dorëzuar edhe në fillim të gushtit nga Shoqata e Punonjësve Shtetërorë (ATE) dhe organizata e të drejtave të njeriut HIJOS.

Kryeministri izraelit ndodhet nën një presion të madh ndërkombëtar për shkak të ofensivës ushtarake të Izraelit në Gaza, që ka shkaktuar mijëra viktima palestineze dhe ka detyruar zhvendosjen masive të popullsisë.

Në të njëjtën kohë, akuzat për gjenocid dhe krime lufte janë nën shqyrtim nga Gjykata Ndërkombëtare dhe Gjykata e Lartë Botërore, por Izraeli dhe Netanyahu vazhdojnë t’i mohojnë ato./abcnews.al

Mbrëmjen e së premtes, 29 gusht, shtatë ushtarë izraelitë u plagosën pas një shpërthimi që goditi një automjet ushtarak në qytetin e Gazës, ku forcat izraelite po zhvillonin operacione në lagjen Zeitoun, një zonë me aktivitet të lartë ushtarak. Raportet e mediave arabe sugjeruan një tentativë rrëmbimi nga Hamas, por ushtria izraelite e quajti këtë informacion të pavërtetë.

Izraeli shpalli qytetin e Gazës si zonë të rrezikshme lufte dhe përfundoi ndërprerjet humanitare që kishin për qëllim të lehtësonin urinë. Gaza është aktualisht në një situatë të rëndë humane, me mungesë ushqimi dhe strehimi, ndërsa bombardimet izraelite janë intensifikuar. Kombet e Bashkuara raportuan se mbi 23 mijë banorë të qytetit janë larguar nga shtëpitë e tyre.

Shpërthimet dhe ofensiva izraelite kanë shkaktuar qindra viktima palestineze, ndërsa Organizata Botërore e Shëndetësisë paralajmëron për përkeqësimin e krizës. Ndërkohë, bllokada e ndihmave dhe plani për të pushtuar qytetin e Gazës ka tërhequr reagime të forta nga komuniteti ndërkombëtar, duke përfshirë BE-në dhe SHBA-në, të cilat po debatojnë për sanksionet ndaj Izraelit./abcnews.al

Një Gjykatë Federale e Apelit ka shpallur se shumica e tarifave të Donald Trump janë një tejkalim i përdorimit të pushteteve emergjente nga ana e tij si president.

Tarifat e quajtura reciproke të vendosura ndaj pothuajse çdo shteti me të cilin SHBA ka tregti, janë të paligjshme, ka thënë Gjykata e Apelit e SHBA-ve të premten.

Ky vendim mbështet një vendim të muajit maj nga Gjykata e Tregtisë Ndërkombëtare, e cila gjithashtu hodhi poshtë argumentin e Trump se tarifat e tij globale ishin të lejuara sipas një ligji për fuqitë emergjente ekonomike.

Shumica e tarifave që do të preken nga ky vendim janë të lidhura me një njoftim të bëri Trump në prill për një normë të sheshtë prej 10% mbi importet nga të gjitha vendet, që ai tha se do të balanconte marrëdhëniet tregtare “të padrejta” me SHBA-në.

Gjykata nuk e ndaloi zbatimin e tarifave, por tha se ato do të mbeten në fuqi deri në mes të tetorit, duke hapur mundësinë për një sfidë të mëtejshme në Gjykatën e Lartë të SHBA. Ka ende shumë pasiguri, por këtu është çfarë dimë deri tani rreth këtij vendimi dhe çfarë mund të ndikojë tek politika kryesore e presidentit amerikan.

Çfarë tha gjykata e apelit?

Në një vendim 7-4, Gjykata e Apelit mbështeti gjetjen e një gjykate më të ulët, që Trump nuk kishte autoritetin për të vendosur tarifa globale.

Ky ishte kryesisht një rezultat i ligjit që Trump përdori për të justifikuar politikat e tij, Akti për Fuqitë Emergjente Ekonomike Ndërkombëtare (IEEPA), të cilin gjyqtarët e quajtën të pamjaftueshëm për t’i dhënë presidentit “pushtetin për të vendosur tarifa, taksa, ose çfarëdo ngjashme me to”.

Gjykata e Apelit e SHBA hodhi poshtë argumentin e Trump se tarifat ishin të lejuara sipas pushteteve emergjente ekonomike, duke i quajtur ato “të pavlefshme pasi janë në kundërshtim me ligjin”.

Trump e kritikoi menjëherë këtë vendim, duke e quajtur gjykatën e apelit “thellësisht të politizuar” dhe vendimin një “katastrofë” për vendin.

Çfarë është IEEPA?

Ky akt ligjor, i miratuar dekada më parë, është përdorur shpesh nga Trump gjatë të dyja periudhave të tij në detyrë dhe i jep presidentit të SHBA-së autoritet të konsiderueshëm për të reaguar ndaj një emergjence kombëtare ose një kërcënimi të madh nga jashtë.

Ligji i vitit 1977 thotë se presidenti mund të përdorë një sërë masash ekonomike “për të trajtuar kërcënime të pazakonta dhe të jashtëzakonshme, që kanë burimin kryesisht jashtë Shteteve të Bashkuara, për sigurinë kombëtare, politikën e jashtme ose ekonominë”.

Ky ligj është përdorur nga presidentët Barack Obama dhe Joe Biden, që e kanë invokuar për të vendosur sanksione ndaj Rusisë pas aneksimit të paligjshëm të Krimesë në vitin 2014, dhe më pas, pas pushtimit të Ukrainës tetë vjet më vonë.

Por, gjykata e apelit tha se ky ligj “nuk e jep presidentin pushtetin e gjerë për të vendosur tarifa”.

IEEPA “nuk përmend tarifat (ose sinonimet e tyre), dhe as ka mbrojtje procedurale që të caktojnë kufij të qartë për pushtetin e presidentit për të vendosur tarifa”, theksuan gjyqtarët.

Trump argumentoi kur shpalli tarifat globale se një mospërputhje tregtare dëmtonte sigurinë kombëtare të SHBA-së, dhe për këtë arsye ishte një emergjencë kombëtare.

Por gjykata e vendosi se vendosja e tarifave nuk është brenda mandatit të presidentit dhe se “pushteti i arkës (përfshirë mundësinë për të taksuar) i përket Kongresit”.

Pse është kjo e rëndësishme?

Përveçse është një humbje e rëndësishme për një nga politikat kryesore të Trump, vendimi i gjykatës federale mund të ketë ndikim të menjëhershëm në ekonominë amerikane, me efekte që mund të ndihen edhe në tregjet globale.

Tarifat janë taksa që kompanitë duhet të paguajnë për importimin e produkteve nga shtetet e huaja – dhe ato mund të ndikojnë në shitjet dhe marzhet e fitimit.

“Bizneset do të përballen me pasiguri,” tha Dr. Linda Yueh, ekonomiste në Universitetin e Oksfordit dhe Shkollën e Biznesit në Londër, për BBC Radio 4.

Tarifat synojnë të pengojnë firmat vendase që të blejnë produkte të huaja, duke ndikuar kështu në tregtinë ndërkombëtare.

Siç po presin shtetet të shohin nëse Gjykata e Lartë e SHBA do të marrë çështjen (dhe kjo duket se është e mundshme), ato mund të vendosin të presin para se të vazhdojnë të bëjnë biznes me SHBA-në.

Nëse ndodh kjo, tha Dr. Yueh, mund të “ngadalësohet aktiviteti ekonomik”.

Gjithashtu, mund të ketë pasoja të mëdha në fushën politike.

Për shembull, nëse Gjykata e Lartë përmbys vendimin e gjykatës federale dhe e mbështet administratën Trump, kjo mund të krijonte një precedent që e inkurajon presidentin të përdorë IEEPA më agresivisht sesa ka bërë deri tani.

Çfarë ndodh?

Çështja do të shkojë tani në Gjykatën e Lartë të SHBA, një sfidë që Trump e lajmëroi në Truth Social.

“Tarifat u lejuan të përdoren kundër nesh nga politikanët tanë të pakujdesshëm dhe të pavëmendshëm,” shkroi Trump. “Tani, me ndihmën e Gjykatës së Lartë të SHBA-së, do t’i përdorim ato për dobinë e Kombit tonë dhe do ta bëjmë Amerikën të pasur, të fortë dhe të fuqishme përsëri!”

Me shumicën konservatore në Gjykatën e Lartë, mundësia që ky organ të mbështesë pikëpamjen e presidentit është më e lartë.

Gjashtë nga nëntë gjyqtarët janë emëruar nga presidentët republikanë, përfshirë tre që Trump i zgjodhi gjatë mandatit të tij.

Por Gjykata ka qenë gjithashtu kritike ndaj presidentëve kur ata duken se po kalojnë kufijtë e pushtetit të tyre në politikat që nuk janë miratuar drejtpërdrejt nga Kongresi.

Çfarë ndodh nëse tarifat shpallen të paligjshme?

Gjykata federale e apelit u nda 7-4 në vendimin e saj për të shpallur tarifat e Trump të paligjshme. Ajo i ka dhënë administratës amerikane deri në mes të tetorit për të apeluar në Gjykatën e Lartë të SHBA për një çështje që ka pasoja për ekonominë e SHBA dhe marrëdhëniet e saj tregtare me pjesën tjetër të botës.

Nëse Gjykata e Lartë e mbështet këtë vendim, mund të shkaktojë pasiguri në tregjet financiare. Do të ngrihen pyetje mbi nëse SHBA do të duhet të paguajë miliarda dollarë që janë mbledhur nga taksat doganore.

Po ashtu, mund të vihet në dyshim nëse ekonomitë kryesore, përfshirë MB-në, Japoninë dhe Korenë e Jugut, janë të lidhura me marrëveshjet tregtare që ata siguruan me SHBA para afatit të gushtit. Marrëveshjet e tjera që janë duke u negociuar gjithashtu mund të përballen me kaos.

Nëse vendimi i Gjykatës Federale qëndron, do të ishte një goditje e madhe për autoritetin dhe reputacionin politik të Trump si një negociator i suksesshëm.