Ulja e popullsisë së vendit përtej të gjithë skenarëve, sidomos pas pandemisë po jep efekte zinxhir në të gjitha fushat, duke përfshirë edhe sistemin publik të pensioneve.

Të dhënat zyrtare nga Instituti i Sigurimeve Shoqërore tregojnë se numri i përgjithshëm i kontribuuesve është rritur me 16,939 persona në vitin 2024 në raport me 2023. Ky ritëm rritjeje është më i ngadaltë krahasuar me periudhat paraardhëse, p.sh., në vitin 2023 kishin 25,623 persona më shumë se me 2022. Gjithsesi nga viti 2020 në vitin 2024 rreth 55,5325 persona u shtuan në skemën e sigurimeve shoqërore, kryesisht nga rritja e numrit të kontribuuesve në zonat rurale.

Në vitin 2024 numri i fermerëve që paguan sigurime arritën në më shumë se 88 mijë, 13,415 persona ose me 17.7 për qind më shumë se në vitin 2023.

Nga ana tjetër të kontribuuesit në sektorin e privat që përfaqësojnë bizneset në zonat urbane u zgjeruan me vetëm 7,944 persona ose vetëm 1.5 për qind. Ky ishte ritmi më i ulët i rritjes së kontribuuesve në sektorin privat pas pandemisë (shiko grafikun e mëposhtëm).

Teksa kontribuuesit nga sektori publik u zgjeruan në të njëjtën periudhe me 1236 persona ose 0.7%.

Kontribuuesit që ndikojnë pozitivisht arkëtimet nga sigurimet janë rritur shumë pak vitin e kaluar, teksa rritja e fermerëve ka ndikim të kufizuar për shkak të vlerës së ulët të kontributit. Psh masa mujore e kontributit për të vetë- punësuarit ishte 9200 lekë në vitin 2024, ndërsa në bujqësi për zonat fushore ishte 3200 lekë në muaj, ndërsa në zonat malore 2450 lekë në muaj. Vitin e kaluar të ardhurat nga kontributet e fermerëve arritën në 3,2 miliardë lekë ose vetëm 2.3 % e të ardhurave të drejtpërdrejta nga kontributet totale.

Edhe pse ka pasur rritje të vetë- punësuarit në bujqësi, shuma e kontributeve që ata paguajnë është shpesh minimale, për shkak të nivelit të ulët të të ardhurave dhe skemave lehtësuese. Kjo rrit numrin e kontribuuesve, por jo qëndrueshmërinë financiare të skemës.

Ngadalësimi i kontribuuesve lidhet me dy faktorë themelore, i pari dhe më i rëndësishmi është reduktimi i popullsisë në moshe pune dhe i dyti informaliteti ende i lartë. Edhe pse numri i kontribuuesve është rritur, informaliteti mbetet i lartë, veçanërisht në sektorë si ndërtimi, tregtia dhe shërbimet.

Shqipëria po përballet me një plakje të popullsisë dhe emigrim të vazhdueshëm të të rinjve, çka e vë në presion skemën aktuale të pensioneve. Në vitin 2025, popullsia në moshe pune ra në 1,504,570, persona që përfaqëson një tkurrje totale prej 38 mijë personash në një vit dhe mbi 444 mijë në krahasim me vitin 2012, më i miri me numrin më të lartë të regjistrua 1,979,908 persona. / B.Hoxha

Burimi: ISSH

Burimi: ISSH

The post Po “shteron” rritja e kontribuuesve në sektorin privat, u shtuan vetëm 17 mijë më 2024 appeared first on Revista Monitor.

Në totalin e pensioneve të pleqërisë më shumë e gjysma e tyre, rreth 52 për qind, morën pagesa të pjesshme në vitin 2024 sipas të dhënave zyrtare më 2024. Kjo përqindje u zgjerua me tej nga niveli 49.7% në vitin 2023. Rritja e personave me pagesa të pjesshme tregon se gjithnjë e më shumë ata […]

The post 52% e pensionistëve nuk morën pension të plotë në 2024-n appeared first on BoldNews.al.

Grupi austriak i sigurimeve, UNIQA, ka finalizuar daljen nga tregjet e Shqipërisë, Kosovës dhe Maqedonisë së Veriut.

Javën e kaluar, u mbyll transferimi i paketës prej 90% të aksioneve të Sigal Uniqa Group Austria te Sigal Business Center, shoqëri në pronësi të Avni Ponarit, aksionar pakice dhe administrator i shoqërisë.

Ponari zotëronte në mënyrë të drejtpërdrejtë edhe pjesën e mbetur prej 10% të aksioneve, ndërsa me blerjen e kuotave të UNIQA bëhet pronar i vetëm i kompanisë.

Palët kanë zgjedhur të mos e bëjnë publik çmimin e shitblerjes as në dokumentacionin e depozituar në Qendrën Kombëtare të Biznesit, për transferimin e aksioneve. Sipas burimeve jozyrtare nga tregu i sigurimeve, besohet se kjo vlerë mund të ketë qenë pranë kufirit të 60 milionë eurove.

Në tregun shqiptar, Sigal Uniqa Group Austria ka pjesëmarrje kontrolluese edhe në shoqërinë e sigurimit të jetës Sigal Life Uniqa Group Austria. Nga ana e saj, Sigal Life Uniqa Group Austria zotëron 51% të aksioneve në shoqërinë Sigal Uniqa Invest (49% e aksioneve zotërohen nga Avni Ponari).

Sigal vepron gjithashtu në tregun kosovar, me dy ndërmarrjet e kontrolluara 100% prej saj, Sigal Uniqa Group Austria dhe Sigal Life Uniqa Group Austria.

Në Maqedoninë e Veriut, kompania vepron nëpërmjet Uniqa AD Skopje, me 99,95% të aksioneve dhe Uniqa Life AD Skopje, me 100% të aksioneve.

Largimi i UNIQA përfaqëson zhvillimin më të rëndësishëm në strukturën e pronësisë së tregut të sigurimeve për më shumë se 15 vjet.

Tashmë, pesha e kapitalit vendas në këtë treg rritet më tej, duke ndjekur një tendencë të ngjashme që ishte përvijuar pas vitit 2015 edhe në sektorin bankar. I vetmi grup i huaj në tregun e sigurimeve ngelet Vienna Insurance Group, që kontrollon kompanitë Sigma dhe Intersig. Në fund të 2024, dy kompanitë e Vienna Insurance Group zotëronin rreth 22% të tregut, sipas primeve të shkruara bruto.

Me shitjen e Sigal nga UNIQA, tashmë pjesa e kompanive me kapitalit vendas ka arritur në afërsisht 78% të tregut.

Sipas pasqyrave të konsoliduara financiare, në fund të vitit 2023 Sigal Uniqa Group Austria zotëronte aktive totale në vlerën e rreth 20.6 miliardë lekëve dhe një kapital aksionar prej 5.4 miliardë lekësh. Në të përfshihen edhe më shumë se tre miliardë lekë fitime të akumuluara dhe të pashpërndara.

Grupi e mbylli vitin 2023 me një fitim neto në vlerën e 768 milionë lekëve, ndërsa e ardhura gjithëpërfshirëse, e rregulluar me efektin negativ të kursit të këmbimit nga kompanitë jashtë Shqipërisë, ishte 558 milionë lekë.

Sigal është prej shumë vitesh kompania kryesuese e tregut të sigurimeve në Shqipëri për nga vlera e primeve të shkruara bruto. Sipas të dhënave nga Autoriteti i Mbikëqyrjes Financiare (AMF), në fund të vitit 2024, Sigal zotëronte 25.5% të primeve të shkruara bruto të sigurimit të Jo-Jetës dhe 39.6% të primeve të shkruara bruto të sigurimit të Jetës.

The post UNIQA largohet zyrtarisht nga Shqipëria, finalizohet shitja te kompania e Avni Ponarit appeared first on Revista Monitor.

Nënat që përfitojnë lejen e lindjes po përballen sërish me vonesa shqetësuese në derdhjen e pagesave mujore. Data shënon 16 dhe akoma nuk është bërë asnjë pagesë për këtë muaj nga Instituti i Sigurimeve Shoqërore i cili drejtohet nga Astrit Hado. Edhe pse pagesa e lejes së lindjes në Shqipëri vijon të jetë ndër më […]

The post Denoncimi/ Sigurimet e Astrit Hados vonojnë pagesat për lejen e lindjes appeared first on BoldNews.al.

Në katër muajt e parë të vitit 2025, shoqëria e sigurimit Albsig Jetë ka shfaqur një rritje të ndjeshme të aktivitetit të saj në tregun e sigurimeve të jetës, duke konsoliduar pozicionin si një nga aktorët më të rëndësishëm të këtij tregu.

Sipas të dhënave zyrtare të publikuara nga Autoriteti i Mbikëqyrjes Financiare për periudhën janar-prill 2025, Albsig Jetë ka dyfishuar primet e shkruara bruto krahasuar me të njëjtën periudhë të vitit të kaluar në sigurimin e jetës së debitorit, që është produkti kryesor i tregut të Jetës. Kështu, primet për 4-mujorin e parë të këtij viti në këtë produkt sigurimi arritën në 231.7 milionë lekë, kundrejt 114.2 milionë lekëve, me një rritje prej rreth 103%.

Kjo rritje e konsiderueshme i ka dhënë mundësi kompanisë të zgjerojë pjesën e saj në këtë segment të tregut nga 22,69% në vitin 2024 në 39,77% në vitin 2025, duke kaluar në vendin e parë për këtë kategori.

Ervin Spahiu, Drejtor i Përgjithshëm i Albsig Jetë, i tha ekofin.al se kjo rritje i atribuohet angazhimit dhe përkushtimit 5-vjeçar të punonjësve të Albsig Jetë.

“Jemi duke përmbushur misionin tonë për ofrimin e produkteve cilësore dhe inovatore, si dhe vizionin e aksionerit, duke e pozicionuar Albsig Jetë si një nga shoqeritë kryesore të sigurimit të jetës, aplikimin e standardeve të larta, me integritet dhe profesonalizëm. Arritjet tona i bashkohen suksesit të Albsig Sh.a., kompani lider në tregun e sigurimeve jo-jetë dhe Grupit Kastrati. Besimit të klienteve dhe partnerëve tanë u takon falenderimi dhe premtimi për të vazhduar punën tonë me përkushtim dhe përgjegjshmëri”.

Njëkohësisht, edhe për sa i përket dëmeve të paguara në sigurimin e jetës së debitorit, Albsig Jetë ka shënuar një rritje të konsiderueshme. Në vitin 2025, kompania ka paguar rreth 24 milionë lekë dëme, nga 11 milionë që kishte paguar në të njëjtën periudhë të një viti më parë, një rritje me 115%, duke reflektuar kështu një angazhim gjithnjë e më të madh në përmbushjen e detyrimeve ndaj klientëve.

Në total, në tregun e sigurimeve të Jetës, Albsig Jetë është ngjitur në vend të dytë, duke konsoliduar pozitat dhe ka një diferencë shumë të vogël në vlerë primesh në raport me Sigal Life që udhëheq tregun prej vitesh. Primet e shkruara bruto për Albsig në këtë treg arritën në afro 240 milionë lekë, kundrejt 245 milionë lekëve të Sigal Life. Kjo tregon për një konkurrencë të ngushtë dhe për një përparim të jashtëzakonshëm të Albsig Jetë, duke e pozicionuar atë si pretendent të fortë për lidership në tregun e sigurimeve të jetës.

Shoqëria e sigurimit të Jetës, Albsig Jetë operon në tregun e sigurimeve prej më pak se 6 vitesh, por ajo është krijuar pas eksperiencës së suksesshme në tregun e Jo-Jetës nga shoqëria Albsig dhe ka mbështetjen e Grupit Kastrati. Në total tregu, primet e shkruara bruto për sigurimin e Jetës arritën në 729.7 milionë lekë, me një rritje prej 10.5% krahasuar me të njëjtën periudhë të një viti më parë. Megjithatë, krahasuar me tregun e Jo-Jetës, sigurimet e Jetës mbeten ende me shumë potencial për t’u zhvilluar më tej.

TIRANË, 6 qershor /ATSH/ Politikat e qeverisë për rritjen e pagave dhe luftën kundër informalitetit kanë sjellë rezultate pozitive në të ardhurat nga kontributet për sigurimet shoqërore dhe shëndetësore.

Sipas të dhënave nga Drejtoria e Përgjithshme e Tatimeve, gjatë periudhës janar–maj 2025, janë mbledhur 71 miliardë lekë nga kontributet, duke shënuar një rritje prej 7.7 miliardë lekësh, krahasuar me të njëjtën periudhë të vitit 2024.

Në total, të ardhurat kontribuese janë rritur me 12.1%, ndërsa vetëm ndaj planit të parashikuar, rritja është 8.2%.

Ky rezultat vjen si pasojë e ndërgjegjësimit të bizneseve, aksionit kundër informalitetit të pagave dhe thirrjeve të vazhdueshme për vetëpërmbushje fiskale.

Autoritetet tatimore theksojnë se do të vijojnë monitorimin dhe mbështetjen për të garantuar zbatim të drejtë dhe të plotë të detyrimeve ligjore nga çdo subjekt. /a.gj/

The post Të ardhurat nga kontributet për sigurimet shoqërore dhe shëndetësore rriten me 12.1% appeared first on Agjencia Telegrafike Shqiptare.

Tregu i pensioneve private vullnetare u rrit më tej në tremujorin e parë të këtij viti.

Të dhënat e nga Autoriteti i Mbikëqyrjes Financiare (AMF) tregojnë se tregu iu afrua kufirit të 46 mijë anëtarëve. Gjatë tremujorit të parë të vitit, numri i anëtarëve të fondeve arriti në 46 337 anëtarë, në rritje me 3.3% që nga fillimi i këtij viti dhe me 16.3% krahasuar me të njëjtën periudhë të vitit të kaluar.

Numri i individëve pjesëmarrës në fondet private të pensioneve po rritet me ritme të qëndrueshme dhe është në nivelet më të larta historike. Megjithatë, depërtimi i këtyre skemave në shoqëri ngelet ende shumë modest. Numri i individëve që kontribuojnë për një pension privat ngelet në afërsisht 3% të numrit të përgjithshëm të të punësuarve në vend, çka tregon një nivel ende shumë të ulët të mbulimit me fonde private të pensioneve.

Vlera e aseteve neto të fondeve të pensionit në fund të muajit mars arriti në 13.36 miliardë lekë, në rritje me 3.8% që nga fillimi i vitit dhe me 88.4% krahasuar me të njëjtën periudhë të vitit të kaluar. Asetet e fondeve të pensioneve janë të investuara kryesisht në obligacione të qeverisë shqiptare. Tregu i fondeve private ngelet ende segmenti më i vogël i tregut financiar në Shqipëri.

Në fund të tremujorit të parë, në treg ishin aktive gjashtë fonde të pensioneve private, që administrohen nga katër shoqëri administruese.

Sipas numrit të anëtarëve, aktori më i madh në treg është Credins Pension, me rreth 42.13% të numrit të përgjithshëm të anëtarëve, i ndjekur nga Sigal Pension me 34.84%, Raiffeisen Pension me 10.35%, Albsig Pension me 10%, Smart Pension, me 1.4% dhe Sigal Pro, me 1.27%.

Për nga vlera e aseteve neto, fondi më i madh është Sigal Pension me 38.54% të totalit, i ndjekur nga Credins Pension, me 30.71%, Raiffeisen Pension, me 20.49%, Albsig Pension me 8.88%, Smart Pension, me 0.97% dhe Sigal Pro, me 0.4%.

Ligji i ri “Për fondet e pensionit privat” ka sjellë rritje të ndjeshme të incentivave fiskale për kontributet në fondet private të pensioneve.

Kufiri maksimal mujor i përjashtimit tatimor do të rritet deri në nivelin e pagës minimale të miratuar, që aktualisht ka arritur në 40 mijë lekë në muaj. Me nivelin aktual të pagës minimale, shuma e kontributeve e përjashtuar nga tatimet do të arrinte sot në 480 mijë lekë në vit ose 140% më shumë krahasuar me pragun aktual prej 200 mijë lekësh. Edhe kontributet e pensionet privat të derdhura nga punëdhënësi në favor të punëmarrësit do të përjashtohen nga tatimi në të njëjtën masë.

Ligji gjithashtu parashikon që pensionet të mos tatohen në përfitim për pjesën e kontributeve, por vetëm për kthimin nga investimi, me kusht që tërheqja të bëhet me pagesa mujore të shtrira në të paktën dy vite dhe jo në mënyrë të menjëhershme, pas përmbushjes së kushteve ligjore për përfitimin e pensionit privat.

Burimi: AMF

The post 46 mijë shqiptarë kontribuojnë për pension privat appeared first on Revista Monitor.

Në nëntor të vitit të kaluar, Autoriteti i Konkurrencës hapi një hetim paraprak në tregun e sigurimit të jetës për kredinë.

Hetimi nisi pas një kërkese të shoqërisë Sicred, me qëllim fillimin e procedurave hetimore për të shmangur pengimet, kufizimet, shtrembërimet e konkurrencës në tregun e sigurimeve të jetës për kredi.

Të dhënat e Autoritetit të Mbikëqyrjes Financiare (AMF) tregojnë se ndarja e tregut të sigurimit të jetës së debitorit këtë vit ka pësuar ndryshime të ndjeshme.

Në fund të 4-mujorit, tregu kryesohej nga Albsig Jeta, me 39.77% të primeve të shkruara bruto, e ndjekur nga Sigal Life Uniqa Group Austria, me 35.92%, Insig Jeta, me 15.12%, Sicred, me 9.18% dhe Vienna Life Insurance, me 0.02%.

Ndarja e tregut ka lëvizur dukshëm krahasuar me një vit më parë, kur tregu dominohej nga Sigal Life Uniqa Group Austria, me 45.61% të primeve të shkruara bruto, e ndjekur nga Albsig Jeta, me 22.69%, Insig Jetë, me 22.59% dhe Sicred, me 9.12%.

Në fakt, sigurimi i jetës së debitorit ngelet baza kryesore e tregut të sigurimit të jetës në Shqipëri. Në fund të vitit 2024, primet nga ky produkt përbënin më shumë se 79% të primeve të shkruara bruto të sigurimit të jetës, ndërsa për katër muajt e parë të këtij viti pesha e këtij produkti ka arritur në pothuajse 80%.

Shumica e bankave kërkojnë sigurim jete për kontratat e kredisë bankare afatgjata dhe në shuma të mëdha. Zakonisht, këto kontrata sigurimi kërkohen në kreditë me qëllim blerjen e pasurive të paluajtshme. Megjithatë, ka banka të veçanta që mund të kërkojnë sigurim jete edhe për kreditë konsumatore, për shuma apo maturitete të caktuara. Sigurimi i jetës rinovohet çdo vit, për të gjithë kohëzgjatjen e kredisë.

Madje, në vitet e fundit, sigurimi i jetës për kreditë ofrohet madje edhe nga kompanitë e mikorfinancës konsumatore, nëpërmjet subjekteve të lidhura me to. Institucionet financiare kanë përfitime në formën e komisionit të shitjes për policat e shitura prej tyre.

Ecuria e mirë e kreditimit në vitet e fundit, por edhe forcimi i kanaleve dhe mekanizmave të shtijes nga shoqëritë e sigurimit të jetës ka dhënë një ndikim pozitiv në ecurinë e këtij produkti.

Tregu i sigurimi të jetës vitin e kaluar u rrit me 11.4%, nga 6.7% që ishte rritja në segmentin më të madh, të sigurimit të Jo-Jetës. Sigurimi i jetës së debitorit dha kontributin kryesor, me një rritje të primeve me 23.4%.

Një tendencë e ngjashme po vazhdon edhe në pjesën e parë të këtij viti. Për 4-mujorin, primet e shkruara bruto në sigurimin e Jetës u rritën me 10.6%, ndërsa sigurimi i jetës së debitorit në veçanti me 15.7%./ E.Shehu

Burimi: AMF

The post Sigurimi i jetës së debitorit, lëviz ndarja e tregut appeared first on Revista Monitor.

Kompanitë e sigurimeve kanë paguar më pak dëme në muajt e parë të këtij viti.

Sipas statistikave nga Autoriteti i Mbikëqyrjes Financiare (AMF), për 4-mujorin janar-prill 2025, vlera e dëmeve të paguara bruto nga industria e sigurimeve zbriti në 2.67 miliardë lekë, 4.3% më pak krahasuar me të njëjtën periudhë të një viti më parë.

Efektin kryesor në uljen e dëmeve të paguara e ka dhënë tregu i jo-jetës dhe fondi i kompensimit i Byrosë Shqiptare të Sigurimeve. Ndërkohë, dëmet janë rritur vetëm për kompanitë e sigurimit të jetës, me 23% më shumë krahasuar me një vit më parë. Megjithatë, pesha e tregut të jetës në strukturën e dëmeve ngelet modeste, me 5% të totalit, duke patur një ndikim të vogël në ecurinë e përgjithshme të dëmeve të paguara nga tregu i sigurimeve në vend.

Në tregun e jo-jetës, struktura e dëmeve vazhdon të dominohet nga sigurimet e detyrueshme motorike, me pothuajse 69% të dëmeve të paguara bruto. Dëmet në sigurimin e brendshëm motorik janë rritur me më shumë se 9% krahasuar me një vit më parë, por ndërkohë një efekt balancues ka luajtur rënie me më shumë se 50% e dëmeve të paguara për Kartonin Jeshil.

Mes sigurimeve vullnetare, në rënie të ndjeshme janë dëmet nga sigurimi nga zjarri dhe forcat e natyrës, ndërsa në rritje janë dëmet e lidhura me sigurimin Kasko të mjeteve dhe sigurimin e shëndetit.

Nga ana tjetër, dëmet pezull këtë vit janë në rritje. Për shoqëritë e sigurimit të Jetës, dëmet pezull janë rritur me 18% krahasuar me një vit më parë, ndërsa për kompanitë e sigurimit të jetës dëmet pezull janë rritur me 8%.

Në krahun e primeve, tregu i sigurimeve vazhdon të shfaqë një ecuri modeste edhe këtë vit. Për katër muajt e parë të vitit, primet e shkruara bruto u rritën me 8.1% krahasuar me të njëjtën periudhë të një viti më parë.

Tregu i sigurimit të jetës edhe këtë vit po shënon ritme më të larta rritjeje, me 10.6%, ndërsa tregu i jo-jetës paraqitet në rritje me 7.9%.

Në tregun e Jetës, rritja vazhdon të vijë kryesisht nga produkti dominues, sigurimi i jetës së debitorit, që tashmë sjell afërsisht 80% të primeve të këtij tregu.

Në tregun e jo-jetës, rritja po vjen kryesisht nga sigurimet e detyrueshme motorike. Primet nga këto sigurime për katër muajt e parë të vitit janë rritur me 14.3%. Ato sjellin më shumë se 67% të primeve të shkruara bruto në sigurimet e jo-jetës.

Produkti kryesor i sigurimit vullnetar, sigurimi i pronës nga zjarri dhe forcat e natyrës, paraqitet në rënie me 10% krahasuar me të njëjtën periudhë të vitit të kaluar./ E.Shehu

Burimi: AMF

The post Kompanitë e sigurimeve paguan më pak dëme për katër muajt e parë të vitit appeared first on Revista Monitor.

TIRANË, 9 maj/ATSH/ Primet e shkruara bruto nga sigurimi i detyrueshëm motorik në Shqipëri arritën 3,38 miliardë lekë për tremujorin e parë të vitit 2025, duke shënuar një rritje prej 12,8% krahasuar me të njëjtën periudhë të një viti më parë.

Të dhënat e publikuara nga Autoriteti i Mbikëqyrjes Financiare (AMF), që konfirmojnë trendin pozitiv në tregun e sigurimeve motorike.

Produkti më i rëndësishëm në këtë kategori, sigurimi i detyrueshëm i automjetit për përgjegjësi ndaj palëve të treta (MTPL e brendshme), regjistroi një rritje prej 12,94% të vëllimit të primeve të shkruara bruto gjatë periudhës janar-mars 2025, ndërsa numri i kontratave u rrit me 6,17%, krahasuar me tremujorin e parë të vitit 2024.

Rritje ka shënuar edhe sigurimi “Karton jeshil”, i cili blihet kur automjetet shqiptare udhëtojnë jashtë vendit. Vëllimi i primeve të shkruara bruto për këtë produkt arriti në 464,7 milionë lekë, me një rritje vjetore prej 9,23%, ndërkohë që numri i kontratave u rrit me 19,79%. Rritja e interesit lidhet edhe me uljen e çmimeve për destinacione të caktuara, pasi nga 1 shkurti 2025 nisi zbatimi i zbritjes për udhëtimet drejt Malit të Zi, dhe nga 1 prilli për Maqedoninë e Veriut.

Në të kundërt, sigurimi kufitar, që mbulon automjetet me targa të huaja që qarkullojnë në Shqipëri, ka pësuar një ngadalësim. Ndonëse vëllimi i primeve të shkruara bruto ka shënuar një rritje modeste prej 0,1%, numri i kontratave ra me 1,1% në krahasim me tremujorin e parë të vitit të kaluar.

Këtë vit ka hyrë në fuqi edhe skema e re e sigurimit motorik, e cila ndryshon mënyrën e llogaritjes së primit të sigurimit.

Sipas AMF-së, çmimi i sigurimit tashmë përcaktohet mbi bazën e historikut të dëmeve, përfshirë rastet kur shkaktari i aksidentit nuk figuron në policën e sigurimit, si dhe faktorë të tjerë si fuqia motorike e automjetit, mosha e të siguruarit, përvoja në drejtim, vjetërsia dhe qarku i regjistrimit të automjetit, si dhe statusi i përdoruesit (subjekt apo individ).

Ky zhvillim pritet të sjellë një personalizim më të madh të primit të sigurimit, duke stimuluar drejtuesit me histori pozitive dhe duke përmirësuar disiplinën në tregun e sigurimeve.

/a.f/r.e/

The post Sigurimi i detyrueshëm motorik, primet rritje me 12,8% appeared first on Agjencia Telegrafike Shqiptare.

TIRANË, 7 maj /ATSH/ Gjatë tre muajve të parë të vitit 2025, sigurimet vullnetare sollën rreth 2,2 miliardë lekë të ardhura, pak më shumë se në të njëjtën periudhë të vitit 2024.

Ndërkohë, numri i kontratave të sigurimeve u rrit me rreth 16%, që do të thotë se më shumë njerëz dhe biznese po marrin masa për t’u mbrojtur nga rreziqe të ndryshme.

Në portofolat e pronës, përgjegjësive, garancive u siguruan mbi 860 milionë lekë të ardhura në total.

Sigurimi i pronës nga zjarri dhe dëmtimet e tjera ishte më i përdoruri, duke sjellë mbi gjysmën e të ardhurave.

Sigurimi për dëme që mund t’u shkaktohen të tjerëve, si për shembull në punë apo në rrugë, ishte i dyti për nga përdorimi.

Edhe pse të ardhurat nga sigurimi për zjarre dhe fatkeqësi natyrore ranë, numri i njerëzve që e zgjodhën këtë sigurim u rrit.

Sigurimet për aksidente dhe shëndet sollën rreth 387 milionë lekë, pak më shumë se vitin e kaluar.

Ndërkohë, sigurimet e jetës shënuan një rritje më të lartë, me 531 milionë lekë të ardhura, ose 13,67% më shumë se në janar-mars 2024. /j.p/

The post Më shumë njerëz dhe biznese po zgjedhin të sigurohen appeared first on Agjencia Telegrafike Shqiptare.

TIRANË, 30 prill/ATSH/ Të ardhurat nga primet e shkruara bruto të sigurimit për periudhën janar-mars 2025 arritën në 5,598 milionë lekë, duke shënuar një rritje prej 7,09% krahasuar me të njëjtën periudhë të vitit 2024.

Gjatë tremujorit, numri i kontratave të sigurimit të lidhura arriti në 347,838, duke shënuar një rritje prej 11,90% krahasuar me vitin e kaluar.

Tregu i sigurimeve mbetet i orientuar kryesisht tek sigurimet e Jo-Jetës, të cilat përbënë 90,45% të vëllimit të përgjithshëm të primeve, ndërsa sigurimet e Jetës përbëjnë 9,48% dhe risigurimi vetëm 0,071%.

Në aspektin e ndarjes së tregut sipas llojit të sigurimit, i detyrueshëm dhe vullnetar, primet e shkruara bruto për sigurimet vullnetarë zënë 39,56% të totalit, ndërsa primet e shkruara bruto për sigurimet e detyrueshme zënë 60,44%.

Sa i përket dëmeve të paguara bruto në tregun e sigurimeve, ato arritën në rreth 1,921 milionë lekë gjatë janar-mars 2025, duke shënuar një rënie prej 3,77% krahasuar me të njëjtën periudhë të vitit të kaluar.

Në sigurimin motorik, dëmet e paguara bruto për periudhën janar-mars 2025 arritën në 1,203 milionë lekë, duke pësuar një rritje prej 5,34% krahasuar me vitin 2024. /j.p/

The post Të ardhurat nga primet e shkruara bruto të sigurimit, rritje prej 7% appeared first on Agjencia Telegrafike Shqiptare.

Procedimet për veprat penale të mashtrimit me kreditë dhe mashtrimit në sigurime u rritën vitin e kaluar. Sipas informacionit nga Prokuroria e Përgjithshme, në vitin 2024 numri i procedimeve për veprën penale të mashtrimit në kredi arriti në 29 raste, nga 13 raste që ishin regjistruar në vitin 2023. Pas kishin rënë për dy vite radhazi, procedimet për këtë vepër penale erdhën përsëri në rritje vitin e kaluar.

Pesha specifike që zë kjo vepër penale në grupin e veprave penale kundër mashtrimit për vitin 2024 ishte 4.96%, ndërsa në vitin 2023 kishte qenë 2.25%. Për këtë vepër penale, vitin e kaluar u dënuan nga gjykatat nëntë individë, numër ky i njëjtë me vitin 2023.

Neni 146 i Kodit Penal e përkufizon mashtrimin në kredi si “mashtrimi në dokumentet e paraqitura, duke përfituar padrejtësisht kredi, duke regjistruar në mënyrë fiktive në hipotekë objekte që nuk ekzistojnë, ose tej vlerës së tyre reale, ose në pronësi të një tjetri, të bëra me qëllim për të mos kthyer më kredinë e marrë”. Sipas Kodit Penal, kjo vepër dënohet me gjobë ose me burgim deri në shtatë vjet.

Forma më e përhapur e këtij mashtrimi në vitet e fundit ka qenë marrja e kredive bankare me dokumente të falsifikuara ose duke përdorur mjete identifikimi të personave të tjerë. Këto vepra penale janë bërë shqetësim për disa institucione financiare, duke i ekspozuar edhe ndaj dëmit reputacional.

Gjithmonë sipas Prokurorisë së Përgjithshme, vitin e kaluar u regjistruan 20 procedime për veprën penale të “mashtrimit në sigurime”, nga 13 që kishin qenë në vitin 2023.

Pesha specifike që zë kjo vepër penale në grupin e veprave penale “Mashtrimet” ishte 3.42%, ndërkohë që në vitin 2023 kishte qenë 2.25%. Shtatë individë u dënuan nga gjykata për këtë vepër penale, nga gjashtë individë që ishin dënuar gjatë vitit 2023.

Neni 145 i Kodit Penal e përkufizon mashtrimin në sigurime si “paraqitja e rrethanave të rreme në lidhje me objektin që sigurohet, ose krijimi i rrethanave të rreme dhe paraqitja e tyre në dokumentet duke përfituar padrejtësisht sigurime”. Kjo vepër penale dënohet me gjobë ose me burgim deri në pesë vjet.

Mashtrimi në sigurime lidhet kryesisht me inskenimin e ngjarjeve të sigurimit ose falsifikimin e rrethanave të tyre, me qëllim përfitimin e dëmshpërblimit nga kompanitë e sigurimeve./ Monitor

The post Procedimet penale për mashtrimet në kredi dhe në sigurime u rritën vitin e kaluar appeared first on Lapsi.al.

Rritja e tregut të sigurimeve u ngadalësua ndjeshëm në muajin shkurt. Sipas të dhënave nga Autoriteti i Mbikëqyrjes Financiare (AMF), primet e shkruara bruto për dy muajt e parë të vitit kishin vlerën e 3.8 miliardë lekëve.

Dymujori janar-shkurt u mbyll me një rritje të primeve të shkruara bruto prej 6.9%, nga 11.4% që kishte qenë rritja e tregut për janarin.

Shifrat e shkurtit tregojnë një rënie me spektër pak a shumë të gjerë në tregun e sigurimeve të detyrueshme, ndërsa tregu është gjithmonë e më shumë i varur nga sigurimet e detyrueshme motorike.

Të dhënat e AMF-së tregojnë se, ndërsa tregu i Jo-Jetës u rrit me vetëm 6% për 2-mujorin, primet e shkruara bruto për sigurimet e detyrueshme motorike u rritën me 12.2% krahasuar me një vit më parë. Sigurimet e detyrueshme motorike sollën 66.5% të primeve të shkruara bruto të tregut të Jo-Jetës, nga 62.8% një vit më parë.

Efektin kryesor në rritje vazhdon të japë shtrenjtimi i çmimit mesatar të sigurimit të brendshëm TPL, pas hyrjes në fuqi të rregullores së re, që parashikon prime të diferencuara mbështetur në disa faktorë rreziku. Primet nga sigurimi TPL u rritën me 12.5% krahasuar me një vit më parë, ndërsa rritje të përafërt shënoi edhe Kartoni Jeshil, me 11.2%.

Pesha e sigurimeve vullnetare në dy muajt e parë të vitit paraqitet në rënie të ndjeshme, duke filluar nga produkti kryesor, sigurimi nga zjarri dhe forcat e natyrës. Primet e shkruara bruto për këtë produkt ranë me 22.3% krahasuar me një vit më parë.

Pesha e këtij sigurimi në treg zbriti në 7.7% të primeve të Jo-Jetës (nga 10.5% një vit më parë), pothuajse në të njëjtën masë me sigurimin Kasko të automjeteve. Por, edhe sigurimi Kasko e ka ngadalësuar rritjen dhe për dy muajt e parë të vitit u rrit me 5.6%. Ky produkt në vitet e fundit ka marrë shtysë sidomos nga biznesi i makinave me qira, për shkak të kërkesës në rritje nga turistët e huaj.

Tregu i sigurimit të Jetës edhe këtë vit po shfaq ritme më të mira rritjeje krahasuar me segmentin e Jo-Jetës. Primet e sigurimit të Jetës për dy muajt e parë të vitit u rritën me 15.5%. Megjithatë, pesha e segmentit të jetës në treg ngelet e ulët, me 9.4% të primeve të shkruara bruto.

Edhe tregu i sigurimit të Jetës është thellësisht i varur nga produkti faktikisht i detyrueshëm i sigurimit të Jetës së Debitorit, që sjell më shumë se 75% të primeve të shkruara bruto. Ky produkt është kusht i bankave dhe institucioneve financiare të huadhënies. Rritja e kredisë, sidomos asaj për shtëpi, në vitet e fundit ka ndikuar në mënyrë direkte edhe në rritjen e primeve të sigurimit të Jetës së Debitorit.

Gjatë muajit shkurt, tregu ka ulur ndjeshëm edhe vlerën e dëmeve të paguara. Ndërsa për janarin dëmet e paguara bruto ishin në rritje me 13%, për periudhën janar-shkurt ato rezultuan në rënie vjetore me 1.3%. Efektin kryesor e dha ulja e ndjeshme e dëmeve të paguara nga shoqëritë e sigurimit të Jo-Jetës, me 2% më pak krahasuar me 2-mujorin e parë 2024. / E.Shehu

Burimi: AMF

The post Sigurimet vullnetare përsëri në rënie, tregu “i kapur” pas sigurimeve të detyrueshme motorike appeared first on Revista Monitor.

Teksa numri i përfituesve po rritet me shpejtësi nga dalja në pension e brezit të bumit të lindjeve, nga ana tjetër kontribuuesit po rriten me ritme të ngadalta.

Sipas të dhënave zyrtare të INSTAT që referojnë të punësuarit nga listë-pagesat e tatimeve numri i kontribuuesve arriti vitin e kaluar arriti në 746,162 persona ose 1.5 për qind më shumë se më 2023.

Skemës së kontribuuesve ju shtuan edhe 11,553 persona, por numri pensionistëve që shtohen rishtas në skemë ishte me shumë se 16 mijë.

Numri i kontribuuesve që po rritet më pak se numri i përfituesve tregon për vështirësi në skemën publike të pensioneve në të ardhmen.

Në sektorin privat i shtuan me 10,7 mijë persona me 2024 në raport me 2023, ndërsa në shtet me 785 persona.

Sipas të dhënave në tre mujorin e fundit të vitit 2024 është intensifikuar punësimi në sektorin publik, duke arritur në 184,278 të punësuar me rritje 1,5 për qind ose 2,835 punonjës me shumë se në tremujorin e katërt 2023. Ndërsa në sektorin privat rezultuan 10,768 punonjës më shumë, me rritje 1.9 % ë krahasim tetor-dhjetor 2024.

Treguesit e punësimit janë përmirësuar vitet e fundit, por struktura sipas grup-moshës e të punësuarve tregon se, ka një tkurrje të forte të rinjve dhe një rritje të punësimit tek personat në moshë pensioni mbi 64 -vjeç raporton INSTAT.

Për vitin 2024 INSTAT ende nuk ka raportuar ecurinë e punësimit dhe papunësisë në numra sipas grup-moshave, por gjatë vitit 2023 ishin të punësuar 21 mijë më persona më pak se më 2022 në moshën 15-29. Punësimi në këtë kategori ra me -7.7%.

Rënia e punësimit në moshat e reja u shoqërua me rritje jo të zakonte të punësimit të pensionistëve (grup-mosha mbi 64 vjeç). Sipas INSTAT punësimi në këtë grup pati një zgjerim vjetor me gati 50% në tremujorin e fundit të vitit 2023. Gati 82 mijë persona mbi 64 vjeç ishin në punë në tetor-dhjetor 2023 nga 54,5 mijë që ishin në të njëjtën periudhe të vitit 2022. Të dhënat tregojnë se, ishin punësuar mbi 27 mijë pensionistë më shumë se në 3 mujorin e fundit të vitit 2022.

Ka një tendencë vitet e fundit se kur bie punësimi i të rinjve ka më shumë të punësuar mes pensionistëve. Punësimi i të rinjve po has në vështirësi vitet e fundit duke reflektuar një rikthim të papunësisë edhe pse tregu i punës ka shfaqur kërkesë të fortë sidomos pas pandemisë./ B.Hoxha

Burimi: INSTAT

The post Punonjësit me sigurime u rritën me vetëm 1.5% më 2024 appeared first on Revista Monitor.

Depozitat bankare dominuan strukturën e investimeve financiare të kompanive të sigurimit edhe vitin e kaluar. Sipas të dhënave nga Autoriteti i Mbikëqyrjes Financiare (AMF), depozitat bankare të shoqërive të sigurimit në fund të 2024 arritën vlerën e 18.7 miliardë lekëve, në rritje me më shumë se 16% krahasuar me një vit më parë.

Depozitat në monedhën vendase dominojnë strukturën e depozitave të shoqërive të sigurimit, me 63.3% të totalit ose rreth 11.8 miliardë lekë. Depozitat në valutë arritën në 6.9 miliardë lekë dhe përbënin rreth 36.7% e vlerës totale të depozitave.

Në depozitat në valutë të huaj, peshën kryesore e zënë depozitat e investuara në Euro, të cilat zënë rreth 88.8% të depozitave totale në valutë dhe 32.6% të depozitave totale (lekë + valutë), pjesa tjetër e depozitave janë të investuara në dollarë amerikanë.

Kundrejt fundit të vitit 2023, depozitat në valutë kanë pësuar rënie në vlerë prej afërsisht 1%, kryesisht si rezultat i efektit negativ të kursit të këmbimit. Kjo ka bërë që shkalla e euroizimit të depozitave bankare të shoqërive të sigurimit të pësojë rënie të mëtejshme në 2024.

Për sa i takon investimeve të tjera të kompanive të sigurimit, ato dominohen nga obligacionet.

Në fund të vitit të kaluar, shoqëritë e sigurimit zotëronin obligacione në vlerën e 4.7 miliardë lekëve, në rritje me 6.6% krahasuar me një vit më parë. Pothuajse 75% e obligacioneve u takojnë shoqërive të sigurimit të jo-jetës, ndërsa rreth 25% atyre të jetës.

Gjithashtu, shoqëritë e tregut të sigurimeve kanë investuar dhe në obligacione në Euro, në vlerën 17.6 milionë euro, në rritje me 10% krahasuar me një vit më parë.

Përveç obligacioneve të qeverisë shqiptare, disa kompani sigurimi kanë investuar edhe në obligacione në euro të shoqërive tregtare, kryesisht të emetuara nga bankat vendase.

Ndërkohë, Bonot e Thesarit në Lekë vazhdojnë të kenë një peshë shumë të vogël në portofolin e investimeve të kompanive të sigurimit. Në fund të 2024, ato kishin vlerën e 57 milionë lekëve, në rënie me pothuajse 45% krahasuar me një vit më parë.

Shoqëritë e sigurimeve raportojnë gjithashtu kuota në fonde investimesh në Lekë, në vlerën e 148 milionë lekëve. Vlera e investimit në kuota të fondeve ka ngelur afërsisht e njëjtë me një vit më parë. Investimet u takojnë kryesisht fondeve të administruara nga palë të lidhura me shoqëritë e sigurimit (shoqëri administruese të fondeve të investimit), siç është rasti i investimeve të shoqërisë Albsig në fondin e investimit Albsig Standard.

Në total, investimet financiare në fund të 2024 kishin një vlerë prej afërsisht 6.6 miliardë lekësh, vlera kjo sa 35% e fondeve të mbajtura në depozita bankare. / E.Shehu

Burimi: AMF

The post Depozitat e siguruesve u rritën me 16% në 2024, kompanitë kishin rreth 190 milionë euro në banka appeared first on Revista Monitor.

Hysni Eshja nga Elbasani tregon për emisionin “Stop” se prej 20 vitesh është invalid i grupit të parë, por ai nuk përfiton rimbursimin e naftës duke qenë se ka marrë një makinë. Prej vitesh shprehet se është sorollatur nga Sigurimet Shoqërore. Sipas sektorit të financës nga Sigurimet Shoqërore Elbasan, nuk ka më një ligj për […]

The post Invalid prej 20 vjetësh, me lot në sy kërkon rimbursimin e naftës appeared first on BoldNews.al.

Tregu i sigurimeve e nisi me rritje dyshifrore vitin 2025. Sipas të dhënave nga Autoriteti i Mbikëqyrjes Financiare (AMF), për janarin primet e shkruara bruto arritën vlerën e 1.98 miliardë lekëve, në rritje me 11.4% krahasuar me janarin e vitit të kaluar.

Rritja e tregut këtë vit është më e mirë krahasuar me atë të janarit të vitit të kaluar (3.6%) dhe në përgjithësi më e lartë se rritja mesatare prej 7% e gjithë vitit 2024.

Rritja paraqitet më e lartë në segmentin më të madh të tregut, atë të sigurimeve të Jo-Jetës, në nivelin 11.4%, ndërsa tregu i sigurimit të jetës është rritur me 10.5% krahasuar me një vit më parë.

Sipas produkteve, rritja e tregut është mbështetur në pjesën kryesore te sigurimet e detyrueshme motorike. Sipas AMF-së, sigurimet e detyrueshme motorike u rritën me 14.6% krahasuar me janarin e vitit të kaluar. Brenda produkteve të sigurimit të detyrueshëm, kontributin kryesor në rritje e ka dhënë sigurimi të brendshëm motorik për përgjegjësitë ndaj palëve të treta (MTPL), me një rritje prej 15.1% më shumë krahasuar me një vit më parë.

Rritja e primeve të sigurimit TPL ka ardhur pjesërisht nga shtimi i numrit të kontratave dhe pjesërisht nga rritja e çmimit mesatar që solli metodologjia e re, për përcaktimin e çmimeve bazuar në disa faktorë rreziku.

Kjo ka bërë që pesha e sigurimeve të detyrueshme motorike të arrijë në 67% të primeve të shkruara bruto në sigurimin e jo-jetës, ndërsa veçmas sigurimi i brendshëm TPL përbënte 57.2% të tyre.

Një tendencë më pozitive për janarin ka shfaqur edhe Kartoni Jeshil, me një rritje prej 12.8% krahasuar me janarin e vitit të kaluar.

Nga ana tjetër, sigurimet vullnetare për muajin janar në përgjithësi kanë shfaqur rritje më të ulët krahasuar me sigurimet e detyrueshme motorike dhe me rritjen mesatare të tregut. Madje, produkti kryesor i sigurimit vullnetar, sigurimi nga zjarri dhe forcat e natyrës, pësoi një rënie të primeve të shkruara bruto me 8.3% më pak krahasuar me një vit më parë.

Tregu i sigurimit të jetës edhe për janarin ka vazhduar të dominohet nga produkti i sigurimit të jetës së debitorit, i lidhur kryesisht me kreditë bankare. Primet e shkruara bruto në këtë produkt përbënin 65% të primeve të shkruara bruto në tregun e jetës, në rritje të mëtejshme nga niveli prej 63.8% i një viti më parë.

Nga ana tjetër, dëmet e paguara bruto për muajin janar janë rritur me afërsisht 13% krahasuar me janarin e vitit 2024. Rritja më e fortë është regjistruar në tregun e jetës, me 136%, kryesisht për shkak të rritjes së dëmeve në produktet e sigurimit të jetës së debitorit dhe jetës në grup.

ndërsa në tregun e jo-jetës rritja ishte 12.1%. Një rënie të fortë për janarin pësuan dëmet e paguara ka kompanitë si sigurues të drejtpërdrejtë (për produktin TPL) dhe për ato të fondit të kompensimit.

Sipas produkteve të jo-jetës, në muajin janar rritje të fortë shënuan dëmet e paguara për sigurimet e detyrueshme motorike, me 30.3% më shumë krahasuar me vitin e kaluar, ndërsa për shumicën e produkteve të tjera dëmet pësuan rënie./ E.Shehu

Burimi: AMF

The post Sigurimet e detyrueshme e ngritën tregun në rritje dyshifrore për janarin appeared first on Revista Monitor.

Çmimi mesatar i sigurimit të detyrueshëm të mjeteve u rrit me afërsisht 7% në muajin janar të këtij viti.

Statistikat e Autoritetit të Mbikëqyrjes Financiare (AMF) tregojnë se për muajin janar të këtij vitit primi i shkruar bruto mesatar për një kontratë sigurimi TPL arriti në afërsisht 19,500 lekë (plus taksën 10% mbi primin).

Primi mesatar i sigurimit të makinës shënoi kështu një rritje krahasuar me primin mesatar prej më pak se 18,300 lekësh të janarit të vitit të kaluar dhe në përgjithësi me nivelin mesatar vjetor prej 18,100 lekësh, të raportuara gjatë vitit 2024.

Këto shifra tregojnë qartë se nisja e aplikimit të sistemit të ri për përcaktimin e primeve të sigurimit të detyrueshëm të mjeteve ka sjellë një rritje të çmimeve për përdoruesit, në terma mesatarë.

Rregullorja “Për përcaktimin e faktorëve të riskut që përfshihen në përllogaritjen e primit për produktet e sigurimit të detyrueshëm në sektorin e transportit” hyri në fuqi në fillim të këtij viti dhe parashikon se në përllogaritjen e primit të sigurimit, kompanitë duhet të zbatojnë disa faktorë kryesorë risku, si historiku i dëmeve, përfshirë edhe rastet kur shkaktari i aksidentit nuk është i shënuar në policën e sigurimit; fuqia motorike e mjetit; mosha e të siguruarit; eksperienca në drejtimin e mjetit motorik; përdorimi i mjetit nga një subjekt apo nga një individ; qarku i regjistrimit të mjetit; vjetërsia e mjetit. Përveç faktorëve të mësipërm, rregullorja parashikon që shoqëritë e sigurimit mund të zbatojnë edhe faktorë të tjerë risku, të përcaktuara prej tyre.

Megjithatë, sistemi aktualisht në përdorim nuk ka një nivel shumë të detajuar diferencimi në disa prej faktorëve të parashikuar në rregullore.

Për shembull, sistemi përcakton çmime më të larta për drejtuesit e mjeteve në moshën 18-21 vjeç, ndërsa nuk parashikon diferencime të mëtejshme për drejtuesit në moshë më të madhe. Gjithashtu, sistemi nuk merr parasysh eksperiencën e drejtuesve të mjetit, që nga viti i marrjes së lejes së drejtimit.

Gjithashtu, diferencimi sipas qarqeve konsiston vetëm në aplikimin e një koeficienti më të ulët për qarqet Berat, Dibër e Kukës, ndërsa për të gjitha qarqet e tjera të vendit koeficienti përkatës është i njëjtë.

Një faktor tjetër që do të përcaktojë primet është edhe sistemi bonus-malus ose historiku i dëmeve. Megjithatë, ky element do të fillojë të zbatohet duke filluar nga viti 2026, bazuar në historikun e dëmeve të vitit 2025.

Pasi mediat raportuan rritjen e çmimit të sigurimit të detyrueshëm të mjeteve në muajin janar, Kuvendit Komisioni Kuvendor i Ekonomisë vendosi të thërrasë në një seancë të posaçme Bordin e Autoritetit të Mbikëqyrjes Financiare, për të raportuar nëse zbatimi i kërkesave të rregullores së re është bërë në mënyrë korrekte nga kompanitë e sigurimit.

Sipas ligjit, shoqëritë e sigurimit i përcaktojnë vetë tarifat e primit të sigurimit TPL, por janë të detyruara të njoftojnë AMF-në të paktën 30 ditë kalendarike përpara aplikimit të tarifave të reja të primit.

Së bashku me njoftimin për aplikimin e tarifave të reja të primit, shoqëritë e sigurimit duhet të depozitojnë pranë Autoritetit bazën teknike të të dhënave, faktorët e riskut dhe vlerësimet aktuariale të përdorura për llogaritjen e primeve të sigurimit, të shoqëruara me opinionin e aktuarit të autorizuar të shoqërisë, të paraqitur në formën e një raporti me shkrim.

Autoriteti, në funksion të mbikëqyrjes së veprimtarisë së shoqërisë së sigurimit, mund të urdhërojë rishikimin e tarifave të reja të primeve, nëse konstaton se baza e të dhënave për hartimin e tabelave të primit të sigurimit nuk është e saktë, ose shoqëria e sigurimit nuk ka vepruar në përputhje me parimet aktuariale dhe metodologjinë e përdorur për përfshirjen e faktorëve të riskut të përcaktuar me këtë rregullore./ E.Shehu

Burimi: AMF

The post Çmimi mesatar i sigurimit të detyrueshëm të makinave u rrit me 7% për janarin appeared first on Revista Monitor.

Kontrolli i Lartë i Shtetit (KLSH) vlerëson se ndërmarrjet e ujësjellës kanalizimeve mbeten në një situatë të vështirë financiare dhe subvencionet që merren nga qeveria kanë shkuar ndër të tjera për paga dhe sigurime shoqërore të punonjësve. Në një raport të Agjencisë Kombëtare të Ujësjellës Kanalizimeve (AKUK) detajohen llojet e subvencioneve që ndërmarrjet kanë marrë […]

The post Ujësjellësi, KLSH: Subvencionet janë përdorur për paga dhe sigurime appeared first on BoldNews.al.