TORINO, 25 korrik /ATSH -ANSA/ – Qindra aktivistë antagonistë kanë sulmuar nga disa drejtime kantierin e linjës hekurudhore Torino-Lion në Chiomonte, në Luginën e Susës (Valle di Susa).

1. Gjatë sulmit, dy furgonë të karabinierëve janë përfshirë nga flakët.

Deri më tani nuk ka informacione të konfirmuara për të plagosur. Protestuesit ishin të veshur me të zeza dhe mbanin helmeta e maska kundër gazit.

Forcat e rendit iu përgjigjën sulmit nga brenda kantierit duke përdorur gaz lotsjellës dhe automjete me ujë me presion, ndërsa protestuesit hodhën gurë, shishe, bomba artizanale dhe fishekzjarre, madje edhe me mortaja të improvizuara.

Një grup prej rreth 100 personash të maskuar u bllokua nga policia, ndërsa një grup tjetër, më i madh, u ndalua në Bruzolo, mes San Didero dhe Bussoleno, për të mos lejuar afrimin e tyre pranë kantierit.

Gjatë përplasjeve u dëmtuan edhe disa barriera mbrojtëse prej betoni (“New Jersey”).

Ndërkohë, kompania koncesionare e autostradës Sitaf njoftoi se, për arsye të sigurisë publike, është mbyllur autostrada A32 Torino–Bardonecchia në segmentin mes daljeve Oulx dhe Susa Est.

Më herët gjatë ditës, qindra aktivistë të krahut më radikal të lëvizjes kishin sulmuar me gurë dhe bomba artizanale forcat e rendit që mbronin kantierin në San Didero.

Policia përdori gaz lotsjellës për t’i shpërndarë, ndërsa përplasjet e para zgjatën rreth 20 minuta. /os/

The post ITALI – Sulm i dhunshëm ndaj kantierit Torino-Lion, digjen dy mjete të karabinierëve appeared first on Agjencia Telegrafike Shqiptare.

ABU DHABI , 25 korrik /ATSH/ – Pse të mjaftohesh me një fundjavë në një spa ose me një javë në një qendër wellness? Mund të bëhet shumë më tepër: të jetosh çdo ditë në mirëqenie. Mjafton të kesh shumë para dhe të jesh i gatshëm të shpërngulesh në Emiratet e Bashkuara Arabe, shkruan repubblica It

Në Gjirin Persik do të ngrihet Fahid Island, një ishull i vogël që synon ta shndërrojë kujdesin për veten në diçka më shumë sesa një pushim të përkohshëm – në një stil të vërtetë jetese.

Hapja e tij është planifikuar për vitin 2029.
Fahid Island në Abu Dhabi do të jetë një kompleks rezidencial me mbi 6.000 banesa, i projektuar për t’u ofruar banorëve mirëqenien më të mirë fizike dhe mendore.

Sipas CNN, projekti ka një vlerë prej 40 miliardë dirhamësh të Emirateve të Bashkuara Arabe (rreth 10,9 miliardë dollarë) dhe drejtohet nga Aldar Development, kompania shtetërore e zhvillimit imobiliar e Abu Dhabit.

Kompania ka bërë të ditur se të gjitha ndërtesat, shërbimet dhe infrastrukturat do të projektohen për të krijuar një “strehë të dedikuar për mirëqenien dhe aktivitetin fizik”.

Programi i certifikimit

I gjithë ishulli do të certifikohet sipas standardit Fitwel, një program për certifikimin e “ndërtesave të shëndetshme”, i zhvilluar nga Qendrat Amerikane për Kontrollin dhe Parandalimin e Sëmundjeve (CDC) dhe General Services Administration (GSA).

Në zemër të Fahid Island do të ndërtohet Berm Park, një park me gjatësi 10 kilometra.

Ky “korridor i fitnesit dhe mirëqenies” do të përfshijë shtigje për vrapim dhe tre pista për biçikleta, duke shërbyer gjithashtu si një barrierë natyrore vizuale dhe akustike mes plazhit dhe pyllit me mangrova.

Përgjatë 11 kilometrave vijë bregdetare do të ndërtohen tre komplekse rezidenciale me apartamente dhe vila luksoze.

Çmimet e apartamenteve do të nisin nga 1,9 milionë dirhamë (rreth 517.000 dollarë) dhe do të arrijnë deri në 7,6 milionë dirhamë (rreth 2 milionë dollarë) për rezidencat më prestigjioze.

Banorët do të kenë në dispozicion një gamë të gjerë shërbimesh, një bulevard tregtar, plazhe të organizuara dhe qendra për sportet ujore, të gjitha të lidhura me një rrjet prej 15 kilometrash shtigjesh.

Mbi 70% e këtyre rrugëve do të jenë të mbuluara me hije, për ta bërë ishullin të përshkueshëm në këmbë edhe gjatë temperaturave të larta.

Arsimimi në ishull

Arsimimi do t’i besohet King’s College School Wimbledon, shkolla private britanike që do të hapë një kampus në ishull në shtator të vitit 2028.

Ajo do të jetë shkolla e parë në botë që do të marrë certifikimin Fitwel.

Emma McCreery Breen, zëvendëspresidente e lartë e Aldar Development, u shpreh: “Jemi siguruar që çdo vendim, si në projektim ashtu edhe në zhvillimin e projektit, të merret gjithmonë duke pasur në qendër mirëqenien e njerëzve.”. /os/

The post SOFT NEWS – Lumturia me adresë të re: Ishulli 11 miliardë dollarësh që hapet në 2029 appeared first on Agjencia Telegrafike Shqiptare.

ROMË, 25 korrik /ATSH -ANSA/  Tërshëra (Avena sativa) është një drith integral që i përket së njëjtës familje me grurin, orizin dhe elbin. Ajo është kultivuar rreth 3.000 vjet më parë në Evropën Qendrore ose Veriore dhe përshtatet shumë mirë me klimën e freskët dhe të lagësht, shkruan mondo sanità.it.

Kokrra e tërshërës përbëhet nga krundet, endosperma dhe embrioni.

Në treg gjendet në forma të ndryshme:
kokrra të plota (më pak të përpunuara),
steel-cut (kokrra të prera),
thekon (të ziera me avull dhe të shtypura),
tërshërë e menjëhershme (instant), e cila tretet më shpejt.

Sa më pak të jetë përpunuar kokrra, aq më ngadalë çlirohen karbohidratet dhe rritet më ngadalë niveli i sheqerit në gjak.
Vlerat ushqyese

100 gramë tërshëre përmbajnë afërsisht:
382 kalori,
69 g karbohidrate,
13,5 g proteina,
10,4 g fibra,
rreth 6 g yndyrna, kryesisht të pangopura.

Një porcion prej 40 gramësh siguron rreth 150 kalori, pa llogaritur qumështin, kosin apo frutat që mund t’i shtohen.

Përveç kësaj, tërshëra është burim i mirë i:
magnezit,
fosforit,
zinkut,
hekurit,
vitaminës B1.

Beta-glukani – fibra më e rëndësishme
Përbërësi më i studiuar i tërshërës është beta-glukani, një fibër e tretshme që:
formon një xhel në zorrë; ndihmon në uljen e kolesterolit LDL (“kolesterolit të keq.

Tërshëra përmban gjithashtu avenantramide, përbërës natyralë me veti antioksiduese dhe anti-inflamatore, të studiuara kryesisht në kërkime laboratorike.

Përfundimi

Përfitimet e tërshërës nuk vijnë nga një “superushqyes” i vetëm, por nga kombinimi i:
fibrave (sidomos beta-glukanit),
strukturës së saj si drith integral,
proteinave,
vitaminave dhe mineraleve.

Konsumimi i rregullt i tërshërës, si pjesë e një diete të shëndetshme dhe të balancuar, mund të ndihmojë në përmirësimin e shëndetit të zorrëve, uljen e kolesterolit dhe kontrollin më të mirë të sheqerit në gjak.

The post FOKUS – Tërshëra, drithi që mbron zemrën dhe përmirëson shëndetin e zorrëve appeared first on Agjencia Telegrafike Shqiptare.

PARIS, 25 korrik /ATSH -ANSA/ – Rreth 250 mijë persona janë evakuuar deri më tani nga jugperëndimi i Francës dhe qendra e Spanjës, ku zjarre të mëdha pyjore vazhdojnë të përhapen në mënyrë të pakontrolluar.

Në Francë, ministri i Brendshëm njoftoi se 167 mijë persona janë evakuuar në rajonin e Gironde, në jugperëndim të vendit.

Këtyre u shtohen edhe 30 mijë të evakuuar në departamentin Landes, që ndodhet pak më në jug.

Nga ana tjetër, Ministria e Brendshme e Spanjës njoftoi se janë kryer edhe 10 mijë evakuime të tjera, duke e çuar numrin e përgjithshëm të të evakuuarve në vend në 45 mijë persona.

Në total, rreth 250 mijë njerëz janë detyruar të lënë shtëpitë e tyre për shkak të zjarreve të mëdha, të cilat vazhdojnë të përhapen me shpejtësi dhe mbeten jashtë kontrollit të autoriteteve.

Ekipet e zjarrfikësve dhe shërbimet e emergjencës janë angazhuar intensivisht për të frenuar flakët dhe për të garantuar sigurinë e banorëve në zonat e rrezikuara.  /os/

The post FOKUS – Zjarret shkatërruese në Francë dhe Spanjë, evakuohen rreth 250 mijë persona appeared first on Agjencia Telegrafike Shqiptare.

BRUKSEL 25 korrik ATSH AA/ – Një grua kanadeze me origjinë kineze, e cila ishte stazhiere në selinë ushtarake të NATO-s në Mons, është arrestuar nën dyshimin për spiunazh.

Agjencia e lajmeve Belga raportoi se prokuroria federale njoftoi se e dyshuara u vendos nën masën e arrestit dje, pasi tërhoqi vëmendjen e shërbimeve të sigurisë së Shtabit Suprem të Forcave Aleate në Evropë (SHAPE).

Megjithëse detajet e sakta të akuzave nuk janë bërë publike, autoritetet thanë se ato lidhen me “spiunazh në favor të një vendi të tretë” dhe “pjesëmarrje në një organizatë kriminale”.

Meqë spiunazhi është në juridiksionin e saj, prokuroria federale mori menjëherë përsipër çështjen. Nuk janë bërë të ditura detaje të tjera ndërsa hetimi vazhdon.  /os/

The post BRUKSEL – Një stazhiste në NATO arrestohet për spiunazh appeared first on Agjencia Telegrafike Shqiptare.

ROMË, 25 korrik /ATSH -AA/ – Austrian Airlines dhe ITA Airways kanë anuluar fluturimet e planifikuara drejt Izraelit për të shtunën për shkak të shqetësimeve të sigurisë.

Sipas raportit të transmetuesit izraelit Channel 12, të dyja kompanitë ajrore pezulluan shërbimet e tyre ndërsa tensionet në rritje në rajon vazhdojnë të pengojnë udhëtimet ajrore drejt dhe nga Izraeli.

Raporti nuk njoftoi nëse anulimet do të prekin edhe fluturimet pas së shtunës.

Kompani ajrore ndërkombëtare kanë pezulluar dhe rifilluar në mënyrë të përsëritur shërbimet drejt Izraelit që nga fillimi i luftës së Izraelit në Rripin e Gazës në tetor të vitit 2023.

Anulimet e fundit erdhën në një kohë tensionesh në përshkallëzim, të lidhura me përballjen e vazhdueshme mes SHBA-së dhe Iranit dhe frikën për një konflikt më të gjerë rajonal.

Tensionet në rajon janë përshkallëzuar që kur presidenti amerikan, Donald Trump, më 8 korrik njoftoi se armëpushimi i përcaktuar në memorandumin e mirëkuptimit SHBA-Iran të muajit të kaluar nuk ishte më në fuqi.

Që atëherë, SHBA-ja dhe Irani kanë shkëmbyer sulme, duke penguar transportin detar përmes Ngushticës së Hormuzit dhe duke rritur sërish shqetësimet për furnizimet globale me energji.

/os/

The post FOKUS – Linjat ajrore austriake dhe italiane anulojnë fluturimet drejt Izraelit për shkak të shqetësimeve të sigurisë appeared first on Agjencia Telegrafike Shqiptare.

DAMASK,  25 korrik /ATSH AA/ – Të paktën 19 persona kanë humbur jetën dhe 27 të tjerë janë plagosur, pasi dy autobusë pasagjerësh u përplasën në një autostradë në Sirinë qendrore.

Siç raporton televizioni Alikhbaria, përplasja ndodhi në autostradën Damask-Deir ez-Zor midis qyteteve Palmyra dhe Al-Sukhnah dhe bilanci i viktimave dhe të plagosurve është paraprak.  /os/

The post SIRI – 19 të vdekur dhe 27 të plagosur nga një përplasje autobusësh appeared first on Agjencia Telegrafike Shqiptare.

BRUKSEL, 24. /ATSH – AA/ – Bashkimi Evropian (BE) ka vendosur sanksione ndaj pesë gjyqtarëve iranianë, të akuzuar për shkelje të rënda të të drejtave të njeriut, përfshirë përndjekjen e disidentëve politikë dhe pakicave fetare.

Këshilli i BE-së njoftoi se gjyqtarët shërbejnë në Gjykatat Revolucionare rajonale të Iranit dhe kanë drejtuar procese gjyqësore kundër disidentëve, aktivistëve dhe anëtarëve të pakicave fetare, përfshirë fituesen e Çmimit Nobel për Paqe, Narges Mohammadi.

Sipas Këshillitt të BE-së, këto çështje janë bazuar në “akuza të paqarta që lidhen me sigurinë kombëtare dhe fenë”.

Gjyqtarët kanë shqiptuar dënime me vdekje, burgime të gjata, fshikullime, gjoba dhe ndëshkime të tjera ndaj disidentëve politikë dhe aktivistëve të të drejtave të njeriut, përfshirë për shkak të përfshirjes së tyre në protestat e vitit 2022 “Grua, Jetë, Liri”, të cilat shpërthyen pas vdekjes së Mahsa Amini.

“Teksa vëmendja e botës është e përqendruar te lufta në Lindjen e Mesme, nuk duhet të humbasim nga sytë shtypjen që Irani ushtron ndaj popullit të vet”, shkroi shefja e politikës së jashtme të BE-së, Kaja Kallas, në rrjetin social amerikan X.

“Teksa Teherani intensifikon goditjen ndaj kundërshtarëve brenda vendit, BE-ja do të vazhdojë t’i mbajë përgjegjës ata që janë përgjegjës”, shtoi ajo.

Blloku evropian gjithashtu vendosi sanksione ndaj hakerit dhe inxhinierit iranian të kompjuterëve, Nima Salehi, themelues dhe figurë kryesore e grupit kibernetik Ashiyane.

Sipas Këshillit të BE-së, ky grup bashkëpunon ngushtë me policinë Kibernetike iraniane FATA, e cila është tashmë në listën e sanksioneve të BE-së, si dhe me Korpusin e Gardës Revolucionare Islamike (IRGC).

Grupi dyshohet se ka kryer sulme intensive kibernetike kundër kundërshtarëve të regjimit, reformistëve dhe institucioneve të huaja, duke ndihmuar autoritetet iraniane në shtypjen e opozitës.

Me këto masa të reja, regjimi i sanksioneve të BE-së për shkeljet e të drejtave të njeriut në Iran përfshin tashmë 269 individë dhe 53 entitete.  /os/

The post BRUKSEL – BE sanksion gjyqtarët iranianë që përndjekin disidentët dhe pakicat fetare appeared first on Agjencia Telegrafike Shqiptare.

TOKIO, 24 korrik /ATSH – AA/ – Japonia ka identifikuar disa elemente të rralla të kategorisë së mesme dhe të rëndë, të nevojshme për prodhimin e produkteve të teknologjisë së lartë, gjatë një projekti eksplorues në thellësi të detit që synon sigurimin e furnizimeve me minerale kritike.

Siç raporton agjencia japoneze e lajmeve Kyodo, Agjencia Japoneze për Shkencën dhe Teknologjinë Detare-Tokësore (JAMSTEC) bëri të ditur se elementet e rralla të nxjerra nga mostrat e baltës së shtratit të detit përbëheshin rreth 54 për qind nga elemente të rralla të mesme dhe të rënda, përfshirë itriumin, gadoliniumin dhe disproziumin.

Ndërkaq, 46 për qind e mbetur përbëhej nga elemente të rralla të lehta, përfshirë neodimiumin.

JAMSTEC nuk bëri të ditur sasinë totale të elementeve të rralla të nxjerra nga mostrat.

Gjetjet do të hapin rrugën për një test të nxjerrjes në shkallë të plotë në të njëjtën zonë, i cili do të zgjasë rreth një muaj dhe do të nisë në shkurt të vitit 2027. Qeveria synon të vlerësojë kostot dhe realizueshmërinë e prodhimit komercial deri në mars të vitit 2028.

Më pas, autoritetet do të vlerësojnë kostot dhe përfitimet e zhvillimit industrial të projektit deri në mars të vitit 2028.

“Është jashtëzakonisht e vlefshme për ne të shohim veçanërisht itriumin, pasi vlera e tij është rritur me shpejtësi në tregun global”, tha Shoichi Ishii, drejtuesi i projektit nga zyra e kabinetit japonez.

Japonia ka kërkuar të diversifikojë furnizimet me elemente të rralla, pasi shumica e importeve të saj vijnë nga Kina. Marrëdhëniet mes dy vendeve u përkeqësuan vitin e kaluar pasi komentet e kryeministres Sanae Takaichi mbi mënyrën se si Japonia mund të reagojë në rast të një krize që përfshin Tajvanin nxitën Pekinin të kufizojë eksportet e mallrave me përdorim të dyfishtë, përfshirë edhe elementet e rralla.

Elementet e rralla përdoren në një gamë të gjerë produktesh, nga pajisjet elektronike dhe sistemet e mbrojtjes deri te teknologjitë e energjisë së rinovueshme dhe automjetet elektrike.

Anija kërkimore Chikyu e JAMSTEC-it mblodhi rreth 50 tonë baltë nga fundi i detit në një thellësi prej rreth 5.600 metrash, pranë ishullit Minamitori, rreth 1.900 kilometra në juglindje të Tokios, gjatë muajve janar dhe shkurt, si pjesë e një projekti të Zyrës së Kabinetit të nisur në vitin fiskal 2018.  /os/

The post TOKIO – Japonia zbulon elemente të rralla me vlerë të lartë në thellësi të detit appeared first on Agjencia Telegrafike Shqiptare.

PARIS, 24 korrik /ATSH -AA/ – Pas një sondazhi me 2.000 të rritur në Francë, Gjermani, Itali dhe Mbretërinë e Bashkuar, Spanja rezultoi destinacioni më i preferuar për ata që ëndërrojnë të nisin një jetë të re jashtë vendit, shkruan euronews.com.

Pothuajse gjysma e njerëzve që jetojnë në Francë, Gjermani, Itali dhe Mbretërinë e Bashkuar presin të shpërngulen në një vend tjetër në të ardhmen, sipas një sondazhi të ri.

Sondazhi, i porositur nga kompania e sigurimeve dixhitale Feather, tregon se kriza e kostos së jetesës është arsyeja kryesore që i shtyn njerëzit të mendojnë për një jetë jashtë vendit. Këtë e përmendën:

53% e britanikëve,
48% e francezëve,
43% e gjermanëve,
dhe 32% e italianëve.

Vetëm një në dhjetë evropianë, në secilin nga vendet e analizuara, deklaroi se me siguri nuk do të transferohet kurrë jashtë vendit.

Në secilin treg u intervistuan nga 500 të rritur.
Megjithëse destinacioni i preferuar ndryshon nga një vend në tjetrin, Spanja është fituesja absolute.

Si britanikët ashtu edhe italianët e zgjodhën Spanjën si destinacionin e parë, përkatësisht me 24% dhe 20% të preferencave, ndërsa vendi renditet në vendin e dytë në Francë dhe Itali, me përkatësisht 16% dhe 12% të të anketuarve që e konsiderojnë si zgjedhjen kryesore.

Për francezët, destinacioni më i dëshiruar është Kanadaja, e zgjedhur nga 17% si vendi ku do të donin të jetonin në të ardhmen, e ndjekur nga Italia, e cila u zgjodh nga 14% e të anketuarve.

Gjermanët, nga ana tjetër, nuk duket se duan të largohen shumë nga shtëpia: 17% do të dëshironin të transferoheshin në Austri, e ndjekur nga Spanja dhe Zvicra, të dyja me nga 12%.

Britanikët, përkundrazi, janë të gatshëm të shpërngulen në vende shumë të largëta: 19% do të zgjidhnin Australinë, 15% Kanadanë dhe 10% Zelandën e Re.

Dubai përmendet shpesh si një nga destinacionet kryesore për emigrantët, por vetëm 3% e britanikëve thanë se do ta merrnin në konsideratë.

Megjithatë, sondazhi u zhvillua në fund të qershorit, ndaj përgjigjet u ndikuan në mënyrë të pashmangshme nga sulmet e Iranit ndaj Emirateve të Bashkuara Arabe gjatë muajve të fundit.  /os/

The post FOKUS – Gati gjysma e evropianëve mendojnë të shpërngulen jashtë vendit appeared first on Agjencia Telegrafike Shqiptare.

PARIS , 24/ATSH – AA/ – Rreth një e katërta e lumenjve të vegjël në Francë janë tharë tashmë, ndërsa vendi po përballet me atë që mund të shndërrohet në një thatësirë më të rëndë se ajo rekord e verës së vitit 2022, paralajmëroi sot një hidrologe e Qendrës Kombëtare Franceze për Kërkime Shkencore (CNRS).

“Njëzet e pesë për qind e lumenjve të vegjël në Francë janë të tharë për momentin. Ky është një nivel që tejkalon ndjeshëm ecurinë e zakonshme të thatësirave”, tha për “France Inter” hidrologia dhe studiuesja e CNRS-së, Agnes Ducharne.

Ducharne tha se me përjashtim të rezervave të ujërave nëntokësore, të gjithë treguesit e thatësirës janë tashmë më të rëndë sesa ishin në të njëjtën periudhë të vitit 2022. “Të gjithë treguesit tregojnë për një thatësirë të jashtëzakonshme”, tha Ducharne duke shtuar se situata aktuale “me shumë gjasa do të jetë edhe më e rëndë deri në fund të sezonit”.

Ajo shpjegoi se gjendja e ujërave nëntokësore mbetet më pak kritike se në vitin 2022 falë reshjeve të shumta gjatë dimrit, por shtoi se treguesit e thatësirës sipërfaqësore janë përkeqësuar shumë më shpejt këtë vit.

Ducharne kritikoi ligjin e sapomiratuar të Francës për emergjencën në bujqësi, i cili synon të dyfishojë kapacitetin e depozitimit të ujit për bujqësinë deri në vitin 2035. Ajo e përshkroi krijimin e rezervuarëve të mëdhenj të ujit si “një fantazi”, duke shtuar se kjo është “shumë më e vështirë për t’u realizuar sesa mendojnë njerëzit”.

Në vend të kësaj, ajo argumentoi se Franca duhet t’i japë përparësi uljes së konsumit të ujit dhe reduktimit të emetimeve të gazeve serrë për të kufizuar shpeshtësinë dhe ashpërsinë e thatësirave në të ardhmen.  /os/

The post FRANCË – 1/4 e lumenjve janë tharë për shkak të mungesës së reshjeve dhe të nxehtit ekstrem appeared first on Agjencia Telegrafike Shqiptare.

KIEV, 24 korrik /ATSH -DPA/ – Të paktën 11 persona humbën jetën si pasojë e sulmeve ruse me raketa dhe bomba ndaj disa qyteteve të Ukrainës, njoftuan autoritetet ukrainase.

Sipas presidentit ukrainas Volodymyr Zelensky, gjashtë persona u vranë dhe dhjetëra të tjerë u plagosën nga sulmet me raketa gjatë ditës në zonën përreth Kievit.

Ndërkohë, në qytetin Sloviansk, pranë vijës së frontit në rajonin lindor të Donetskut, të paktën pesë persona humbën jetën pas sulmeve me bomba rrëshqitëse (glide bombs).

Autoritetet shpallën alarm për raketa në kryeqytet pak para mesditës.

Sipas agjencisë shtetërore ukrainase UNIAN, Rusia lëshoi të paktën 10 raketa balistike, si edhe raketa të drejtuara të tipit Zircon drejt Kievit.

Në qytet u dëgjuan disa shpërthime, ndërsa kryebashkiaku Vitali Klitschko bëri të ditur se ambulancat u dërguan menjëherë në zonat e goditura.

Sipas Zelenskyt, periferia e Kievit u godit edhe më rëndë, ku ekipet e shpëtimit dhe emergjencave vazhdojnë operacionet për kërkim dhe nxjerrjen e të mbijetuarve nga rrënojat.

Presidenti publikoi edhe fotografi të blloqeve të banimit të shkatërruara.

Rusia ka shtuar ndjeshëm sulmet me raketa ndaj Kievit javët e fundit, duke shkaktuar vazhdimisht viktima dhe dëme mes popullsisë civile.  /os/

The post FOKUS – Sulme ruse ndaj qyteteve ukrainase, të paktën 11 të vrarë appeared first on Agjencia Telegrafike Shqiptare.

PEKIN, 24 korrik /ATSH -DPA/ – Kina ka vendosur kontrolle të reja eksporti ndaj 14 kompanive nga Gjermania dhe vende të tjera evropiane, si kundërpërgjigje ndaj paketës së 21-të të sanksioneve të Bashkimit Evropian kundër Rusisë.

Ministria kineze e Tregtisë njoftoi se vendimi erdhi pasi BE-ja përfshiu në listën e saj të sanksioneve 14 kompani nga Kina dhe Hong Kongu.

Sipas autoriteteve kineze, masat synojnë të mbrojnë sigurinë kombëtare dhe interesat e vendit.

Me hyrjen në fuqi të rregullave të reja, eksportuesit nuk do të lejohen më të furnizojnë kompanitë e prekura me produkte me përdorim të dyfishtë, pra mallra që mund të përdoren si për qëllime civile, ashtu edhe ushtarake.

Gjithashtu, individët dhe organizatat e huaja nuk do të mund t’u ofrojnë këtyre kompanive produkte të tilla me origjinë nga Kina.

Mes kompanive të prekura është edhe prodhuesi gjerman i armëve Rheinmetall, ndërsa në listë janë përfshirë edhe kompani nga Italia, Franca, Polonia, Holanda dhe vende të tjera evropiane. Masat hynë në fuqi menjëherë.

Pak ditë më parë, vendet anëtare të BE-së miratuan paketën e 21-të të sanksioneve ndaj Rusisë për shkak të luftës në Ukrainë, duke shtuar 51 subjekte në listën e kufizimeve të eksportit për teknologji dhe mallra me përdorim të dyfishtë, pasi dyshohet se kanë mbështetur industrinë ushtarake dhe të mbrojtjes së Rusisë.

Një zëdhënëse e Komisionit Evropian deklaroi se Brukseli po analizon masat e shpallura nga Kina dhe do të bashkëpunojë me shtetet anëtare dhe kompanitë e prekura për të vlerësuar ndikimin e tyre.

Ajo shtoi se BE-ja do të kërkojë sqarime nga autoritetet kineze për të kuptuar plotësisht përmbajtjen dhe pasojat e këtyre masave. /os/

The post FOKUS – Kina i përgjigjet sanksioneve të BE-së ndaj Rusisë me kufizime të reja eksporti appeared first on Agjencia Telegrafike Shqiptare.

KAJRO, 23 korrik /ATSH -AA/ –  Egjipti i ka bërë thirrje SHBA-së të përshpejtojë vendosjen e Forcës Ndërkombëtare të Stabilizimit (ISF) në Rripin e Gazës, të sigurojë dërgimin e plotë të ndihmës humanitare dhe të përmbushë angazhimet e mbetura të fazës së parë të planit të Gazës të presidentit amerikan, Donald Trump.

Thirrja u bë gjatë një takimi mes ministrit egjiptian të Punëve të Jashtme, Badr Abdelatty dhe sekretarit amerikan të Shtetit, Marco Rubio, në margjinat e Takimit të Ministrave të Jashtëm të Shoqatës së Kombeve të Azisë Juglindore (ASEAN) në Manila të Filipineve.

Ministria e Punëve të Jashtme e Egjiptit njoftoi se Abdelatty theksoi nevojën për nisjen sa më të shpejtë të komitetit palestinez të ngarkuar me administrimin e Gazës dhe për ndalimin e shkeljeve izraelite në Bregun Perëndimor të pushtuar, me qëllim uljen e tensioneve dhe rikthimin e stabilitetit rajonal.

Takimi u zhvillua në të njëjtën kohë kur transmetuesi publik izraelit KAN raportoi se rreth 30 oficerë marokenë kishin zhvilluar një vizitë në terren në Gaza, në kuadër të përgatitjeve për pjesëmarrjen e Marokut në ISF.

Më 15 korrik, Maroku njoftoi se do të kontribuojë me oficerë, policë dhe pjesëtarë të xhandarmërisë, si dhe do të ngrejë një spital fushor në enklavën palestineze.

Këshilli i Sigurimit i OKB-së miratoi forcën e përkohshme ndërkombëtare në nëntor të vitit 2025 përmes Rezolutës 2803, duke mbështetur planin e Trumpit për t’i dhënë fund luftës izraelite, e cila ka shkaktuar vdekjen e më shumë se 73.000 personave, si dhe për administrimin e periudhës kalimtare në Gaza.

Megjithatë, sipas KAN, Izraeli ende nuk ka dhënë miratimin përfundimtar për vendosjen e kësaj force.  /os/

The post FOKUS – Egjipti i kërkon SHBA-së të përshpejtojë vendosjen e forcës stabilizuese në Gaza appeared first on Agjencia Telegrafike Shqiptare.

TORINO, 23 korrik /ATSH -AA/ – Aktorja e njohur italiane Ornella Muti dhe vajza e saj Naike Rivelli kanë nisur procedurat për të marrë nënshtetësinë ruse. Lajmin e bëri të ditur vetë Naike, e cila tha se ky është një vendim i lidhur me origjinën e tyre familjare.

Sipas saj, gjyshja e Ornella Mutit ishte nga Shën Petersburgu, ndërsa familja u shpërngul më pas në Estoni, ku lindi nëna e aktores.

“Kemi rrënjë ruse dhe nuk mund të mohojmë origjinën, familjen dhe miqtë tanë”, u shpreh Naike.

Ornella Muti kishte deklaruar edhe më parë se dëshironte të forconte lidhjet me Rusinë dhe kishte vizituar vendin për të hulumtuar historinë e familjes së saj.

Në të kaluarën, afërsia e saj me Rusinë dhe presidentin Vladimir Putin ka shkaktuar polemika në Itali.  /os/

The post ITALI – Ornella Muti dhe Naike Rivelli drejt nënshtetësisë ruse appeared first on Agjencia Telegrafike Shqiptare.

BRUKSEL, 23 korrik /ATSH – AA/ – Komisioni Evropian e gjobiti Google me 890 milionë euro (1,02 miliard dollarë) për shkelje të Aktit të Bashkimit Evropian për Tregjet Digjitale (DMA), përmes favorizimit të shërbimeve të veta në rezultatet e kërkimit dhe kufizimeve të vendosura ndaj zhvilluesve të aplikacioneve.

Komisioni vendosi një gjobë prej 460 milionë eurosh (rreth 525 milionë dollarë), pasi konstatoi se Google favorizonte shërbimet e veta të blerjeve, hoteleve, transportit dhe sportit ndaj shërbimeve konkurruese në rezultatet e kërkimit.

Sipas Komisionit, Google i paraqiste shërbimet e veta në mënyrë më të dukshme, përfshirë në krye të faqeve të rezultateve dhe përmes elementeve vizuale të përmirësuara dhe filtrave, ndërsa shërbimeve të krahasueshme të palëve të treta nuk u jepej e njëjta dukshmëri.

Një gjobë e veçantë prej 430 milionë eurosh (rreth 491 milionë dollarë) lidhej me praktikat e Google për kufizimin e orientimit të përdoruesve (“anti-steering”) në Play Store.

Komisioni tha se Google i pengonte zhvilluesit e aplikacioneve të informonin lirisht përdoruesit për oferta alternative dhe potencialisht më të lira ose t’i drejtonin ata të kryenin blerje përmes faqeve të internetit dhe dyqaneve të aplikacioneve të palëve të treta.

Ai gjithashtu konstatoi se tarifat e lidhura me orientimin e përdoruesve dhe periudha gjatë së cilës ato zbatoheshin tejkalonin atë që lejohet sipas DMA-së.

Google u urdhërua t’i japë fund të dyja shkeljeve dhe të respektojë vendimet brenda 60 ditëve. Nëse nuk vepron kështu, kompania mund të përballet me gjoba periodike deri në 5 për qind të xhiros së saj totale globale.

“Produktet më të mira duhet të kenë sukses sepse janë më të mira, jo sepse janë në pronësi të kompanisë që administron motorin e kërkimit”, tha nënkryetarja ekzekutive e Komisionit Evropian, Teresa Ribera.

Komisioni tha se Google ka nisur testimin e ndryshimeve në rezultatet e kërkimit dhe rregullat për orientimin e përdoruesve. Ai po ashtu po vlerëson propozimet e kompanisë lidhur me AI Overviews dhe AI Mode.  /os/

The post FOKUS – KE gjobit Google me 1,02 miliard dollarë për shkelje të Aktit për Tregjet Digjitale appeared first on Agjencia Telegrafike Shqiptare.

LONDËR, 23korrik /ATSH-DPA/ – Vala e të nxehtit që goditi Mbretërinë e Bashkuar në qershor shkaktoi humbjen e rreth 24 milionë orëve pune dhe i kushtoi ekonomisë britanike rreth 1.15 miliardë paund (afërsisht 1.53 miliardë dollarë), sipas një studimi të publikuar së fundmi.

Gjatë javës që nisi më 22 qershor, kur temperaturat thyen rekordin historik për muajin qershor, shumë punonjës në të gjithë vendin u detyruan të mungonin në punë ose të reduktonin orët e tyre të punës për shkak të vapës ekstreme.

Kjo ishte vala e dytë e të nxehtit nga tre që kanë goditur Evropën Perëndimore vetëm në tre muajt e parë të këtij viti, duke sjellë pasoja gjithnjë e më të rënda për shëndetin e njerëzve, infrastrukturën, burimet ujore, bujqësinë dhe jetën e egër.

Sipas analizës së realizuar nga Instituti Grantham për Ndryshimet Klimatike dhe Mjedisin në Shkollën Ekonomike të Londrës (LSE), në bashkëpunim me Qendrën Euro-Mesdhetare për Ndryshimet Klimatike (CMCC), çdo punonjës në Mbretërinë e Bashkuar humbi mesatarisht 0.47 orë pune gjatë javës së fundit të qershorit.

Për studimin, i publikuar të enjten, studiuesit anketuan një kampion përfaqësues në nivel kombëtar prej 1,950 të rriturish britanikë, duke i pyetur se si vala e të nxehtit ndikoi në orët e tyre të punës, cilësinë e gjumit dhe ndryshimet që u detyruan të bënin në rutinën e tyre të punës gjatë asaj jave.  /os/

The post KLIMË – Vala e të nxehtit të qershorit i kushtoi ekonomisë britanike mbi 1 miliard paund appeared first on Agjencia Telegrafike Shqiptare.

UASHINGTON, 23 korrik / /ATSH – AA/ – OpenAI njoftoi se gjatë një vlerësimi të sigurisë, disa nga modelet e saj të inteligjencës artificiale u sollën në mënyrë të papritur dhe kryen një sulm kibernetik që depërtoi në sistemet e startup-it të inteligjencës artificiale Hugging Face .

Në një deklaratë, kompania tha se po vlerësonte aftësitë e disa prej modeleve të saj më të avancuara të inteligjencës artificiale në një mjedis të kontrolluar. Megjithatë, sipas raportimeve, modelet dolën nga mjedisi i testimit, hynë në internet dhe depërtuan në infrastrukturën e Hugging Face në përpjekje për të përmbushur objektivin që u ishte caktuar.

Në deklaratë thuhet se arratisja ishte “një incident kibernetik i paprecedentë, që përfshinte kapacitete kibernetike të teknologjisë më të avancuar” dhe se kompania po forconte masat e saj mbrojtëse.

“Po ndajmë gjetjet paraprake në këtë fazë për të ndihmuar mbrojtësit të kuptojnë se çfarë ndodhi dhe për të ndihmuar në vlerësimin e aftësive që modelet kanë tashmë”, shtohet në deklaratë.

Hugging Face, një platformë e përdorur për të pritur modele të mëdha gjuhësore me kod të hapur dhe grupe të dhënash, shkaktoi reagime në komunitetin e sigurisë kibernetike kur javën e kaluar tha në një deklaratë se kishte qenë objektiv i një sulmi hakerash që “ishte ndryshe nga çdo gjë me të cilën ishim përballur më parë”, pasi “u drejtua nga fillimi deri në fund nga një sistem autonom agjentësh të inteligjencës artificiale”.

Në një postim në rrjetin social amerikan X, bashkëthemeluesi i Hugging Face, Clement Delangue tha se kompania dyshonte se sulmi haker mund të kishte ardhur “nga një laborator i nivelit më të lartë, duke pasur parasysh sofistikimin e agjentit. Doli se vërtet ishte!” Ai shtoi: “Është vërtet marramendëse që e gjithë kjo ndodhi në mënyrë autonome!”.  /os/

The post FOKUS – OpenAI: Modelet e IA-së dolën jashtë kontrollit gjatë testimeve dhe kryen sulm kibernetik appeared first on Agjencia Telegrafike Shqiptare.

TEHERAN, 23 korrik /ATSH – ANSA/ –  Komanda më e lartë ushtarake e Iranit ka kërcënuar se do të bllokojë plotësisht kalimin e naftës nëpër Ngushticën e Hormuzit nëse Shtetet e Bashkuara ndërmarrin sulme ndaj infrastrukturës së Republikës Islamike.

Sipas mediave iraniane, gjeneral brigade Seyyed Majid Mousavi deklaroi se “nuk do të kalojë as edhe një pikë naftë”.

Mousavi paralajmëroi se çdo sulm amerikan ndaj urave, centraleve elektrike ose infrastrukturës tjetër iraniane do të marrë një përgjigje të menjëhershme.

Ai akuzoi presidentin amerikan se po kërcënon sërish Iranin dhe tha se forcat e armatosura iraniane janë të gatshme të reagojnë.

Sipas deklaratës, Ngushtica e Hormuzit do të mbetet e mbyllur dhe, nëse SHBA zbaton kërcënimet e saj, Irani nuk do të lejojë eksportimin e “as edhe një pike të vetme nafte”.

Gjithashtu, Teherani kërcënoi se do të godasë infrastrukturën e naftës, gazit, energjisë elektrike dhe objektiva të tjera ekonomike në rajon.  /os/

The post FOKUS – Teherani: Asnjë pikë naftë nuk do të kalojë në Hormuz nëse SHBA na sulmon appeared first on Agjencia Telegrafike Shqiptare.

BERLIN, 22 korrik /ATSH -AA/ Autoritetet gjermane kanë miratuar një projekt të diskutueshëm që i lejon një filial të kompanisë franceze të energjisë bërthamore Framatome të prodhojë karburant bërthamor të projektuar nga Rusia në bashkëpunim me kompaninë shtetërore ruse Rosatom.

Ministria e Mjedisit e shtetit veriperëndimor të Saksonisë së Ulët, sipas transmetuesit francez BFMTV, autorizoi kompaninë Advanced Nuclear Fuels (ANF) të zgjerojë prodhimin në fabrikën e saj në Lingen.

Projekti synon furnizimin me karburant të centraleve bërthamore të projektuara nga Bashkimi Sovjetik dhe Rusia që vazhdojnë të funksionojnë në Evropën Qendrore dhe Lindore, ndërsa sipas raportit do të përfshijë pajisje dhe ekspertë rusë.

Ministria tha se autorizimi mund të rishikohet “nëse identifikohen rreziqe të reja”, veçanërisht në lidhje me sigurinë kombëtare.

Ajo tha se ka shprehur vazhdimisht “rezerva” për projektin për shkak të luftës së Rusisë në Ukrainë.

Ministria e përshkroi rastin si “unik”, pasi “shteti rus po zhvillon një luftë agresioni në Evropë, në kundërshtim me të drejtën ndërkombëtare dhe e konsideron Bashkimin Evropian, veçanërisht Gjermaninë, si kundërshtarë”.

Megjithatë, ministria tha se nuk kishte baza ligjore për ta bllokuar projektin, duke argumentuar se një veprim i tillë do të kërkonte sanksione në nivel të BE-së që përfshijnë sektorin bërthamor civil të Rusisë.

ANF-ja e dorëzoi kërkesën e saj në mars të vitit 2022, menjëherë pas fillimit të luftës së Rusisë kundër Ukrainës.

Propozimi u përball me kundërshtime të forta politike, veçanërisht nga të Gjelbrit e Gjermanisë.

Sipas raportit, një vlerësim i ri i sigurisë, i fokusuar në përfshirjen ruse, luajti rol vendimtar në finalizimin e autorizimit.

Sipas Politico, presidenti francez, Emmanuel Macron, gjithashtu e diskutoi çështjen me kancelarin gjerman, Friedrich Merz.

Ministria Federale e Mjedisit e Gjermanisë tha se autoritetet ishin të detyruara ligjërisht të lëshonin lejen kur plotësoheshin të gjitha kushtet e nevojshme dhe rreziqet e identifikuara mund të kontrolloheshin në mënyrë të mjaftueshme.

BE-ja ka vendosur sanksione të gjera ndaj naftës dhe gazit rus, por vendet anëtare kanë vazhduar bashkëpunimin me Moskën në energjinë bërthamore civile për shkak të alternativave të kufizuara.

Disa vende të Evropës Qendrore dhe Lindore, së bashku me Finlandën, vazhdojnë të operojnë reaktorë të projektuar nga Bashkimi Sovjetik që kërkojnë karburant të përshtatshëm.

Rusia gjithashtu mban një pozitë të rëndësishme në zinxhirin global të furnizimit me uranium përmes rezervave të saj dhe interesave në vendet prodhuese të uraniumit, përfshirë Kazakistanin.  /os/

The post BERLIN – Gjermania miraton projektin franko-rus për karburantin bërthamor pavarësisht shqetësimeve të sigurisë appeared first on Agjencia Telegrafike Shqiptare.