TIRANË, 22 korrik/ATSH/ Ambasadori i Bashkimit Europian në Tiranë, Silvio Gonzato vlerësoi sot se programi “EU4Culture” nuk ka të bëjë vetëm me restaurimin e monumenteve, por edhe me kremtimin e jetës së artistëve.

I pranishëm në aktivitetin e organizuar nga organizata “Tek Bunkeri” me artistin Lulzim Beqiri, ambasadori Gonzato u shpreh se “të vësh drejtësi për ata që vuajtën brutalitetin e regjimit komunist ka të bëjë me rikthimin e shpresës, rikthimin e njerëzimit, por edhe me rikthimin e kreativitetit”.

“Kur dy nga pikturat, të cilat ishin konfiskuar, iu rikthyen, Lulzim Beqiri gjeti një frymë të re në jetën e tij artistike. Jam krenar që shoh se EU4Culture nuk ka të bëjë vetëm me restaurimin e monumenteve. Ka të bëjë edhe me kremtimin e jetës së artistëve jashtëzakonisht të guximshëm si Lulzimi”, u shpreh ambasadori i BE-së, Silvio Gonzato.

1 nga 3

/m.m/r.e/

The post Gonzato: Programi “EU4Culture” në mbështetje të artistëve appeared first on Agjencia Telegrafike Shqiptare.

TIRANË, 22 korrik/ATSH/ Drejtori i përgjithshëm i Policisë së Shtetit, Ilir Proda falënderoi sot punonjësit e Patrullës së Përgjithshme në DVP Korçë, të cilët rrezikuan jetën duke u futur mes flakëve dhe shpëtuan një të moshuar që ishte rrethuar nga zjarri dhe rrezikonte të asfiksohej e të digjej, në një lagje periferike të Korçës.

Në një mesazh falënderimi, Proda vlerësoi këtë akt fisnik, që sipas tij, “tregon më së miri se të jesh pjesë e Policisë së Shtetit është shumë më tepër se një detyrë, është një mision i shenjtë në mbrojtje të jetës”.

“Të nderuar kolegë, Laura Leka, Aurel Jesku dhe Klodian Dulellari. Ndihem thellësisht i emocionuar dhe krenar për guximin, sakrificën dhe humanizmin tuaj. Me ndjenjë të lartë përgjegjësie dhe përkushtimi, rrezikuat jetën për të shpëtuar një qytetar të moshuar, i cili ishte rrethuar nga flakët dhe rrezikonte të asfiksohej e të digjej”, u shpreh Proda.

Proda siguroi se “shërbimi ndaj qytetarëve nuk është thjesht një përgjegjësi institucionale, por një thirrje e përditshme për të qenë pranë tyre, sidomos në momentet më të vështira”.

“Ju falënderoj nga zemra për shembullin e jashtëzakonshëm që dhatë dhe për nderin që i bëtë uniformës sonë. Krenar për ju dhe për të gjithë efektivët e Policisë që e nderojnë Policinë e Shtetit me veprime që frymëzojnë dhe rrisin besimin e qytetarëve tek Policia”, tha Proda.

/m.m/r.e/

The post Efektivët në Korçë shpëtojnë të moshuarin nga zjarri, Proda: Misioni i Policisë në mbrojtje të jetës appeared first on Agjencia Telegrafike Shqiptare.

TIRANË, 22 korrik/ATSH/ Ministria e Mbrojtjes ka angazhuar forca shtesë në aksionet për shuarjen e zjarreve në Dibër.

Ministri i Mbrojtjes, Pirro Vengu zhvilloi sot një takim në Prefekturën e qarkut Dibër për të folur mbi situatën e zjarreve.

Vengu theksoi se ndërhyrja nga ajri, nga forcat shqiptare dhe ato italiane, ka mundësuar uljen e intensitetit të vatrave, veçanërisht në Lurë dhe në zonën e Zall-Gjoçajt.

“Fatmirësisht nuk ka rrezik për zonat e banuara, por jemi në terren për të ndjekur hap pas hapi çdo situatë”, u shpreh ministri Vengu.

Vengu bëri të ditur se gjatë pasdites, ndërhyrja e shpejtë e Forcave të Armatosura dhe atyre të bashkisë mundësoi lokalizimin dhe shpëtimin e një bariu dhe bagëtive që u rrezikuan nga përhapja e zjarrit në Gurë-Lurë.

Ministri falenderoi shërbimet Zjarrfikëse, trupën e emergjencave civile dhe Forcat e Armatosura që mbeten në front të parë.

“Rritja e temperaturave, kërkon monitorim të shtuar dhe alertim të menjëhershëm, veçanërisht në zonat malore dhe pyjore të ekspozuara”, u shpreh ai.

/m.m/r.e/

The post Vengu: Ndërhyrje nga ajri për shuarjen e zjarreve në Dibër, shpëtohet bariu në Gurë-Lurë appeared first on Agjencia Telegrafike Shqiptare.

TIRANË, 22 korrik/ATSH/ “Rrënjët e Mia” titullohet Konkursi Kombëtar ku të rinjtë shprehën përmes fotografisë artin e tyre, të cilin e shndërruan në zë për identitetin, komunitetin dhe sfidat e migracionit.️

Ministrja e Shtetit për Rininë dhe Fëmijët, Bora Muzhaqi, ambasadori i Britanisë së Madhe në Tiranë, Nicholas Abbot dhe drejtoresha e IOM Albania, Alma Jani zhvilluan sot një takim me të rinjtë pjesëmarrës në këtë konkurs.

Në fokus të takimit ishin sfidat e migracionit të parregullt dhe rëndësia e krijimit të mundësive për ta zhvilluar të ardhmen pranë vendit.

Përmes fotografisë të rinjtë shprehën lidhjen me identitetin dhe komunitetin, duke reflektuar mbi sfidat e migracionit të parregullt dhe mundësitë për të ndërtuar të ardhmen në vendin e tyre.

“Një nismë frymëzuese për përfshirjen rinore, në kuadër të projektit “Forcimi i Kapaciteteve Institucionale Vendore për Migracionin në Shqipëri”, mbështetur nga Qeveria”, u shpreh ministrja Muzhaqi.

1 nga 10

/m.m/r.e/

The post “Sfidat e migracionit të parregullt”, Muzhaqi dhe ambasadori Abbot takim me të rinjtë appeared first on Agjencia Telegrafike Shqiptare.

TIRANË, 22 korrik/ATSH/ Bukuritë natyrore, pozita gjeografike, mikpritja dhe traditat e bëjnë Korçën një prej destinacioneve më të frekuentuara në Shqipëri.

Për shumë pushues klima është mjaft e përshtatshme për t’i ikur të nxehtit të korrikut.

Parku “Rinia” është një prej alternativave kryesore për të kaluar këto ditë të nxehta vere.

Janë të shumtë ata të cilët mund të pushojnë në park, të shijojnë gjelbërimin, të pedalojnë, ndërsa fëmijët mund të luajnë pa e ndjerë të nxehtin e verës.

Kryeministri Edi Rama ndau sot pamje nga ky park, i mbushur plot me qytetarë. “Pasdite tek Parku Rinia, Korçë”, shkruan Rama krahas fotove.

Parku i Korçës, me një shtrirje prej 100 mijë metrash katrorë, është i veçantë sa i përket shumëllojshmërisë së drurëve dhe bimësisë.

Parku, i ndodhur në veriperëndim të qytetit, është krijuar 60 vjet më parë për të qenë mushkëria e Korçës dhe frekuentohet nga dhjetëra qytetarë të moshave të ndryshme.

Falë investimit për rehabilitimin e tij, kjo pjesë e gjelbër e Korçës u shndërrua në një park model me standarde europiane, me qëllim që të jetë sërish dhe vetëm në funksion të qytetarëve.

1 nga 12

/m.m/r.e/

The post “Parku Rinia” i mbushur me qytetarë, Rama ndan foto nga Korça appeared first on Agjencia Telegrafike Shqiptare.

TIRANË, 22 korrik/ATSH/ Ekspozita lëvizëse “Your Lens. Your Story. Our Europe!” mbërriti sot në Shtëpinë e Europës në Tiranë, pas ndalesave në Beograd, Podgoricë dhe Shkup.

E konceptuar nga programi WeBalkans, i financuar nga BE, ekspozita sjell 18 fotografi nga të rinj të talentuar nga i gjithë rajoni, duke përdorur sportin për të nxjerrë në pah qëndrueshmërinë, përfshirjen dhe vlerat e përbashkëta që lidhin Ballkanin Perëndimor me Bashkimin Evropian.

“Me fotografitë e tyre, të rinjtë nga Shqipëria dhe rajoni tregojnë llojin e Evropës që ata duan, dhe rrëfejnë diçka me të vërtetë të fuqishme: idenë se Evropa nuk është vetëm hapësirë gjeografike, por një bashkësi vlerash”, u shpreh Ambasadori i BE-së, Silvio Gonzato.

Ekspozita është e hapur për publikun për t’u vizituar në Shtëpinë e Europës deri më 29 korrik.

1 nga 13

/m.m/r.e/

The post Ekspozitë fotografike lëvizëse e të rinjve nga rajoni në Tiranë appeared first on Agjencia Telegrafike Shqiptare.

TIRANË, 22 korrik/ATSH/ Inspektori i Lartë i Drejtësisë Artur Metani zhvilloi një takim pune me organizata të shoqërisë civile (OSHC), që kanë në fokus të punës së tyre drejtësinë dhe të drejtat e njeriut për të diskutuar mbi pikat e forta e të dobëta të Zyrës së Inspektorit të Lartë të Drejtësisë dhe prioritetet për të ardhmen.

Përveç organizatave të shoqërisë civile të ftuar në takim ishin edhe partnerë ndërkombëtarë më të cilët ILD bashkëpunon prej vitesh, nga Delegacioni i Bashkimit Evropian, OPDAT, Prezenca e OSBE, Ambasada e Mbretërisë së Holandës dhe misioni EU4 Justice, që mbështeti këtë aktivitet.

Metani bëri një paraqitje grafike të dinamikës së punës së ILD-së gjatë vitit 2024, duke u ndalur tek funksionet kryesore të institucionit, lidhur me administrimin e trajtimin e ankesave, hetimin e procedimin disiplinor dhe inspektimet.

Më tej, Inspektori i Lartë i Drejtësisë paraqiti ecurinë e veprimtarisë së ILD-së ndër vite, me të dhëna konkrete, që prej nisjes së funksionimit, në vitin 2020 dhe synimet për rritjen e efikasitetit të punës, në funksion të transparencës e forcimit të besimit të publikut tek ILD dhe institucionet e drejtësisë.

Metani iu përgjigj interesimit të pjesëmarrësve për aspekte të punës ndër vite të ILD-së, por edhe për zhvillime jashtë institucionit mbi rolin dhe pritshmëritë publike. Duke vlerësuar si shumë të çmuara kontributet e sugjerimet që u përcollën në takim nga organizatat e shoqërisë civile, Inspektori i Lartë i Drejtësisë vlerësoi si të nevojshme edhe raportet monitoruese që bëhen për ILD-në, së fundmi nga Komiteti Shqiptar i Helsinkit.

“Raportet e monitorimit të Shoqërisë Civile ndaj ILD-së janë tregues se ky institucion është i monitorueshëm, pavarësisht nëse biem apo jo dakord me gjetjet e përcjella, sepse në fund të fundit kështu funksionon demokracia. E rëndësishme është që puna e një institucioni monitorohet, analizohet e vlerësohet dhe ky është një mekanizëm demokratik për t’u ushqyer e vlerësuar”, shtoi ai.

Në mbyllje të takimit pjesëmarrësit bashkëndanë qëndrimin se kontaktet profesionale i shërbejnë të kuptuarit të dinamikave të punës, jo vetëm të institucionit, por edhe të nevojave e prioriteteve për t’u përcaktuar e zbatuar.

1 nga 6

/m.m/r.e/

The post ILD dhe organizata të shoqërisë civile diskutojnë prioritetet për drejtësinë appeared first on Agjencia Telegrafike Shqiptare.

TIRANË, 22 korrik/ATSH/ Një ekuipazh ajror i Gardës Kombëtare të Nju-Xhersit (New Jersey) ishte në Shqipëri për të punuar me Forcat Ajrore në mirëmbajtjen e helikopterëve dhe për përgatitje për misione kërkimi dhe shpëtimi.

Ambasada e SHBA-së në Tiranë bëri të ditur sot se në kuadër të këtij bashkëpunimi ishte në Shqipëri oficeri Justin Blistyak, i cili fluturoi me helikopterin Black Hawk Tail Number 690 në operacionet e shpëtimit nga Uragani Sandy dhe misionet ajrore të zjarrfikjes në Nju-Xhersi.

“Forcat Ajrore Shqiptare përdorin të njëjtin model helikopteri për të luftuar zjarret dhe për të shpëtuar jetë në Shqipëri. Shkëmbime si ai i javës së kaluar ndihmojnë në sigurimin e një koordinimi të përsosur midis Aleatëve të NATO-s për mbrojtjen tonë të përbashkët”, thuhet në njoftimin e ambasadës së SHBA-së.

Justin Blistyak, piloti testues i mirëmbajtjes në Gardën Kombëtare të Nju-Xhersit ndodhet në Shqipëri në kuadër të Programit të Partneritetit Shtetëror për të ofruar mbështetje për programin e helikopterëve UH-60.

Blistyak vlerësoi se ky partneritet është një mundësi e shkëlqyer, pasi i lejon të punojnë së bashku dhe të ofrojnë ndihmë praktike dhe trajnim, si në procedurat e mirëmbajtjes, ashtu edhe në aspekte shtesë të përdorimit të pajisjeve të misionit, si pajisjet e shpëtimit.

“Ky helikopter ka pasur një rol të madh në fillimet e karrierës time në Gardën Kombëtare të Nju-Xhersit. Ishte një nga helikoperët e parë me të cilët kam fluturuar deri në momentin kur u shit për përdorim ndërkombëtar në vitin 2019 dhe mbërriti këtu në Shqipëri rreth një vit e gjysmë më parë. Gjatë uraganit Sandy në vitin 2012 kam qenë shef ekuipazhi dhe kemi fluturuar me këtë helikopter për shumë orë në operacione për përballimin e fatkeqëpsive natyrore në zonat që nuk ishin të aksesueshsme me mjete pas stuhisë”, theksoi ai.

Oficeri i Gardës Kombëtare të Nju-Xhersit bëri të ditur se ky helikopter është përdorur gjithashtu disa herë në Nju-Xhersi për misione të shuarjes së zjarreve nga ajri dhe tani po përdoret për të njëjtin qëllim edhe këtu në Shqipëri.

“Ashtu siç bëri për ne atje, po kryen punë të jashtëzkaonshme në përmbushjen e misionit edhe këtu. Gjithashtu nga një këndvështrim i NATO-s ky helikopter i mundëson Forcave Ajrore shqiptare të ecin përpara duke marrë pjesë më me sukses në stërvitjet e NATO-s dhe duke qenë në të njëjtin nivel me shumë mjete të tjera ajrore të NATO-s që përdorin të njëjtin lloj sistem fluturimi”, shtoi ai.

/m.m/r.e/

The post Ekuipazhi ajror i Gardës Kombëtare të Nju-Xhersit trajnon Forcat Ajrore appeared first on Agjencia Telegrafike Shqiptare.

TIRANË, 22 korrik/ATSH/ Prokuroria e Posaçme Kundër Korrupsionit dhe Krimit të Organizuar dërgoi sot për gjykim 29 të pandehur, përfshirë pedagogë, staf akademik dhe biznesmenë, të cilët dyshohen për përfshirje në abuzime me tenderat në Universitetin Bujqësor të Tiranës.

Ndaj të pandehurve rëndojnë akuzat për “shkelje të barazisë në tendera” dhe “shpërdorim detyre”, në kuadër të procedurave të zhvilluara për prokurime publike në këtë institucion arsimor.

Sipas SPAK, hetimet, të nisura më 21 tetor 2022, zbuluan një skemë të mirorganizuar, në të cilën zyrtarë të nivelit të lartë akademik, përfshirë dy zëvendësrektorët Ilir Kapaj e Romina Kotaj, dhe administratori Edmond Tërthorja, në bashkëpunim me biznese manipuluan procesin e prokurimeve publike, duke favorizuar firmat “Krijon” sh.p.k, “Zero Group” sh.p.k dhe “Malvina Visoka PF”.

Në kuadër të këtij procedimi penal janë hetuar 9 procedura prokurimi të zhvilluara në vitin 2022, me një vlerë të fondit limit 90 milionë lekë.

SPAK thotë se hetimet zbuluan se përgatitja e dokumentacionit për fondet limit dhe specifikimet teknike ishin bërë në koordinim të plotë me fituesit e paracaktuar të tenderave, ndërsa nuk bëhet asnjë analizë reale të tregut.

Më poshtë njoftimi i plotë i SPAK:

Prokuroria e Posaçme kundër Korrupsionit dhe Krimit të Organizuar paraqiti sot kërkesën për gjykim të procedimit penal të vitit 2022 (i ndarë nga procedimi penal nr.13 të vitit 2022), në ngarkim të 27 personave, zyrtarë të Universitetit Bujqësor të Tiranës (UBT) dhe dy personave, përfaqësues të operatorit ekonomik “Krijon” sh.p.k.

Zyrtarët e Universitetit Bujqësor të Tiranës janë akuzuar për veprën penale “Shkelje e barazisë së pjesëmarrësve në tendera apo ankande publike”, në bashkëpunim, parashikuar nga nenet 258 e 25 të Kodit Penal.

Ndërsa dy përfaqësuesit e operatorit ekonomik “Krijon” sh.p.k, akuzohen për kryerjen e veprës penale “Falsifikim i dokumenteve”, kryer në bashkëpunim, më shumë se një herë, parashikuar nga neni 186/2 i Kodit Penal.

Në kuadër të këtij procedimi penal janë hetuar 9  procedura prokurimi të zhvilluara në vitin 2022, me një vlerë të fondit limit 90.000.000 (nëntëdhjetë milionë) lekë.

Hetimet proaktive janë zhvilluar me metoda speciale, të cilat përfshijnë përgjimin e bisedave telefonike të zyrtarëve të UBT, vëzhgime dhe administrimin e dokumentacionit të procedurave të prokurimit me autoritet kontraktor, UBT.

Gjatë hetimit janë evidentuar shkelje ligjore të personave përgjegjës të stafit akademik në UBT, të pandehurit: Romina Koto dhe Ilir Kapaj në detyrën e zëvendës/rektorit, Bejo Bizhga, me detyrë Përgjegjës i Departamentit të Moduleve Paraklinike, që konsistojnë në ideimin e projekteve dhe sigurimin e fondeve pranë Agjencisë Kombëtare për Kërkimin Shkencor dhe Inovacionin (AKKSHI), si edhe veprime të kundraligjshme të kryera në bashkëpunim me titullarin e autoritetit kontraktor, të pandehurin Edmond Tërthorja, me detyrë Administrator i UBT-së.

Këta persona kanë përgatitur të dhëna fiktive të projekteve, me specifikime të përgatitura nga vetë operatorët ekonomik konkurrues dhe fitues në këto procedura prokurimi. Pas sigurimit të fondeve nga AKKSHI, kanë vijuar veprimet e kundraligjshme të autoritetit kontraktor, në fazën e përgatitjes dhe kryerjes së procedurave të prokurimit. Komisioni që përllogariti fondin limit dhe përgatiti specifikimet teknike ka bashkëpunuar në mënyrë të vazhdueshme dhe të paligjshme me njësinë e prokurimit dhe komisionin e vlerësimit të ofertave.

Gjatë hetimit janë evidentuar shkelje ligjore të anëtarëve të njësisë së prokurimit dhe komisionit të vlerësimit të ofertave nga të pandehurit: Amarildo Lleshi, Mehmet Qoshja, Altin Murto, Enkeleida Sallaku, Klara Jahollari, Agim Sefa, Arjan Buliqi, Serafin Skënderi, Ilir Kusi, Dritan Laçi, Azem Parllaku, Artur Koleci, Radion Dhromi, Blenard Spaho, Tedi Proda, Erjola Kopali, Klea Lekoçaj, Etleva Shore, Mimoza Shehu, Elvira Shtogu, Tone Vukaj, në bashkëpunim me titullarin e autoritetit kontraktor, të pandehurin, Edmond Tërthorja, të cilët kanë krijuar kushte dhe favorizuar shpalljen fitues të operatorëve ekonomikë “Krijon”sh.p.k, “Zero Group” sh.p.k, “Malvina Visoka PF”.

Gjatë hetimit rezultoi se të dhënat e përgatitjes së fondit limit, specifikimet teknike, termat e referencës, si dhe hartimi i dokumenteve standarde të tenderit, janë bërë nga zyrtarët përgjegjës të autoritetit kontraktor, në bashkëpunim me operatorët ekonomikë fitues “Krijon”sh.p.k, “Zero Group”sh.p.k, dhe “Malvina Visoka PF”.

Në të gjitha procedurat e prokurimit të mësipërm, operatorët ekonomikë fitues, “Krijon”sh.p.k, “Zero Group”sh.p.k, dhe “Malvina Visoka PF”, kanë siguruar oferta ekonomike të falsifikuara, në emër të shoqërive tregtare të tjera, që janë përdorur nga autoriteti kontraktor dhe kanë ndikuar në fryrjen e fondit limit, pa kryer asnjë studim tregu.

Janë evidentuar raste të kryerjes së procedurës së prokurimit me operator eknomik të paracaktuar fitues, për pajisje me mallra të tjera, të vëna në dispozicion të autoritetit kontraktor disa muaj para shpalljes së procedurave të prokurimit, (procedura prokurimi të zhvilluara pas administrimit më parë të këtyre paisjeve, për të cilat më pas, janë kryer procedurat fiktive të prokurimit dhe marrje e tyre në dorëzim).

Prokuroria e Posaçme kundër Korrupsionit dhe Krimit të Organizuar po kryen hetime të në kuadër të procedimit penal nr.13 të vitit 2022, për të evidentuar çdo fakt tjetër penal, përgjegjësinë e çdo personi tjetër, që ka vepruar me dokumentacionin e këtyre procedurave të prokurimit, si dhe fakte të tjera penale në kuadër të këtij procedimi penal.

/m.m/r.e/

The post SPAK dërgon për gjykim 29 të pandehur për shkelje me tenderat në Universitetin Bujqësor appeared first on Agjencia Telegrafike Shqiptare.

TIRANË, 22 korrik/ATSH/ Një paketë prej 87,7 milionë eurosh për investime në energjinë e pastër në Shqipëri, Mal të Zi dhe Serbi u miratua nga Bordi Operacional i WBIF (Kuadri i Investimeve të Ballkanit Perëndimor).

Delegacioni i Bashkimit Europian në Tiranë bëri të ditur sot se në kuadër të Planit të Rritjes së BE-së për Ballkanin Perëndimor, këto investime do të ndihmojnë për të forcuar rrjetet e energjisë.

Po ashtu, ato do të ndihmojnë për të përmirësuar hidrocentralet ekzistuese, si dhe për të ofruar zgjidhje diellore për ngrohje.

Nga ky fond Shqipëria do të përfitojë për investime në sistemin e transmetimit të energjisë elektrike, konkretisht për digjitalizimin e nënstacioneve, për rritjen e kapaciteteve dhe uljen e humbjeve të energjisë.

Po ashtu fondet do të përdoren në HEC-in e Fierzës për përmirësimin e pajisjeve dhe sistemeve për sigurimin e funksionimit afatgjatë.

Gjithashtu do të investohet edhe në linjën ajrore të transmetimit Rrashbull-Unaza e Tiranës, në kuadër të zgjerimit për plotësimin e kërkesës dhe përmirësimin e sigurisë energjetike.

“Pas lajmit të mirë nga Belshi, vjen edhe një tjetër zhvillim pozitiv për rajonin tonë”, thuhet në njoftimin e Delegacionit të BE-së në Tiranë.

1 nga 5

/m.m/r.e/

The post Shqipëria, përfituese nga paketa 87,7 milionë euro e BE-së për investime në energji appeared first on Agjencia Telegrafike Shqiptare.

TIRANË, 22 korrik/ATSH/ Pas aksionit për prishjen e ndërtimeve pa leje në Theth, vijoi me përparësi pastrimi i territorit nga inertet, me synim rikthimin e hapësirave në gjendjen e mëparshme dhe ruajtjen e imazhit karakteristik të Thethit, qendër e Parkut Kombëtar të Alpeve.

Kryeministri Edi Rama ndau sot pamje nga Thethi pas “operacionit nga kanceri i paligjshmërisë”.

IKMT prishi mbi 100 struktura pa leje të ndërtuara nga 40 subjekte në Theth.

Pas aksionit të Inspektoratit Kombëtar të Mbrojtjes së Territorit për shembjen e ndërtimeve pa leje në këtë zonë, strukturat e bashkisë Shkodër, të ndihmuara edhe nga forcat e xhenjos, nisën pastrimin e inerteve.

I ndodhur 70 km larg Shkodrës, Thethi është një nga destinacionet më të preferuar të turistëve në të gjitha stinët, por veçanërisht gjatë sezonit të verës.

Pasuritë natyrore të kësaj zone janë të lidhura së bashku edhe me trashëgiminë kulturore dhe historike të banorëve vendas, duke formuar kështu, bazat më të rëndësishme për zhvillimin e turizmit.

/m.m/r.e/

The post Rama: Thethi pas operacionit nga kanceri i paligjshmërisë appeared first on Agjencia Telegrafike Shqiptare.

TIRANË, 22 korrik/ATSH/ Drejtoria Vendore e Policisë Durrës po vijon kontrollet në vijën bregdetare, në vijim të operacionit policor të koduar “Plazhi i lirë”, me qëllim lirimin e hapësirave publike.

Në kuadër të këtij operacioni u liruan hapësira të tjera në plazhin e Gjirit të Lalëzit, që ishin zënë në mënyrë të paligjshme.

Policia procedoi penalisht dy shtetas si dhe hoqi dhe sekuestroi 78 komplete me çadra dhe shezlongë.

Në vijim të veprimeve, u referuan materialet në Prokurori ku nisi procedimi në gjendje të lirë për shtetasit Ll. M., 66 vjeç dhe E. P., 36 të dy banues në Ishëm, Durrës.

Shërbimet e Policisë do të vijojnë kontrollet përgjatë gjithë vijës bregdetare, me qëllim lirimin e hapësirave publike, për pushuesit, dhe verifikimin e aktiviteteve që kryejnë subjektet, gjatë sezonit veror.

/m.m//r.e/

The post Lirohen hapësirat publike në plazhin e Gjirit të Lalëzit, procedohen dy shtetas appeared first on Agjencia Telegrafike Shqiptare.

TIRANË, 21 korrik/ATSH/ Kryetari i Partisë Demokratike, Sali Berisha komentoi sot deklaratat e kryebashkiakut të Kavajës, Fisnik Qosja, i cili u shpreh në një intervistë se “PD ka nevojë për riorganizim nga degët deri tek Kryesia pas humbjes së zgjedhjeve”.

Në një konferencë për shtyp, Berisha theksoi se PD është parti e hapur dhe transparente, por sipas tij, “gjatë kësaj periudhe është e fokusuar në paraqitjen e të vërtetave të mëdha të farsës elektorale”.

Berisha siguroi se “PD do të bëjë analizën më të plotë të këtij procesi në raport me strukturat e veta dhe funksionin e saj”.

“PD është parti e hapur, transparente dhe e gatshme të analizojë të gjithë veprimtarinë  e saj në dritën e së vërtetës. Por në këtë periudhë PD po paraqet të vërteta të mëdha të farsës elektorale. Dhe po paraqet me dokumente zyrtare, të pakundërshtueshme, të gjitha këto nuk do të pengojnë PD të bëjë analizën më të plotë të këtij procesi në raport me strukturat e veta dhe funksionin e saj”, theksoi ai.

Berisha denoncoi po ashtu edhe një video, ku sipas tij, “duket një komisioner, i cili del nga qendra e votimit me fletën e votimit me vete, të cilën ia jep kryetarit dhe më pas e hedh në kutinë e votimit”.

“Denoncimi i farsës elektorale kërkon që të bëhet publik mundësisht çdo fakt, çdo dokument i dhunimit”, shtoi ai.

/m.m/j.p/

The post Berisha: PD, analizë të plotë për rezultatin zgjedhor appeared first on Agjencia Telegrafike Shqiptare.

TIRANË, 21 korrik/ATSH Drejtoria Vendore e Policisë Lezhë proceduan sot penalisht 2 autorët e dyshuar të zjarrvënieve në fshatrat Kalivaç dhe Gjormë.

Si rezultat i veprimeve të shpejta hetimore për identifikimin e autorëve të zjarrvënieve, u identifikuan shtetasit S. P. dhe B. Gj., të cilët dje, dyshohet se kanë ndezur zjarre që u përhapën në sipërfaqe të tjera toke.

Specialistët e Seksionit për Hetimin e Krimeve të Komisariatit të Policisë Lezhë arrestuan në flagrancë shtetasin S. P., 59 vjeç, banues në Ishull Lezhë, pasi dje, dyshohet se ka ndezur zjarr në fshatin Kalivaç, dhe nga përhapja e flakëve është djegur një sipërfaqe toke me pemë dhe bar të thatë.

Po ashtu në Kurbin nisi procedimi penal për shtetasen B. Gj., banuese në Laç, pasi dje, dyshohet se ka ndezur zjarr në fshatin Gjormë, dhe nga përhapja e flakëve është djegur një sipërfaqe toke me barishte.

/m.m/j.p/

The post Arrestohen për zjarrvënie dy shtetas në Lezhë appeared first on Agjencia Telegrafike Shqiptare.

TIRANË, 21 korrik/ATSH/ Kryetari i Partisë Demokratike, Sali Berisha akuzoi sot institucionet e drejtësisë për abuzim dhe për ndjekje të urdhrave politikë.

Në një prononcim për mediet pas paraqitjes në SPAK, në kuadër të zbatimit të masës së sigurisë “detyrim paraqitje”, Berisha hodhi sërish akuza ndaj kreut të SPAK, Altin Dumani, i cili sipas tij, “ka hapur çështje penale pa emër”.

Berisha e lidh dosjen me gjyqtaren e GJKKO-së, Irena Gjoka.

Sipas tij, “njerëzit e sistemit të ri të drejtësisë nuk kanë asnjë moral ligjor, nuk zbatojnë asnjë kriter, asnjë standard”.

“Altin Troplini hapi dosjen për Irenën me 5 mbiemra pa emër. E kuptoni, ka hapur çështje penale pa emër. Ky është një krim, ky është një abuzim i madh me drejtësinë. Altin Troplini nuk guxon të hapë padinë me emër, por që ta mbajë nja dy-tre vjet se do vërtetoj këtë apo atë, paçka se vula apostile tregon se Irena është dënuar me burg 3 muaj dhe këtë nuk e ka deklaruar në dokumentet e vetingut dhe deklarimit të pasurisë”, tha Berisha.

Berisha tha se “Irena Gjoka ka marrë avokat dhe ka firmosur prokurë për ta përfaqësuar para drejtësisë greke në një kohë kur deklaron pafytyrësisht se nuk është dënuar kurrë”.

“Dhe pikërisht mbi këtë bazë, Altin Troplini hap çështje penale, por jo me emër për Irena Gjokën, se po të hapej me emër, Irena Gjoka nuk mund të rrinte asnjë ditë të vetme në sistemin e drejtësisë. Ajo ka kryer një seri veprash, ka mashtruar, është përzënë dhe është e dënuar me burg”, tha Berisha.

Berisha u paraqit sot në SPAK në zbatim të masës së sigurisë “Detyrim paraqitje” të caktuar ndaj tij nga Apeli i GJKKO-së për dosjen e ish-klubit sportiv “Partizani”.

SPAK e akuzon Berishën se, gjatë kohës që ishte kryeministër, ka përdorur funksionin e tij për të favorizuar dhëndrin Jamarbër Malltezi, në procesin e privatizimit të ish-kompleksit “Partizani”.

Sipas SPAK, ky privatizim është bërë në mënyrë të parregullt dhe me ndikim të paligjshëm nga Berisha, duke sjellë përfitime të padrejta për Malltezin dhe dëm ekonomik për shtetin. Berisha i ka cilësuar akuzat si politike.

/m.m/j.p/

The post Berisha: Sistemin e ri të drejtësisë e përfaqësojnë njerëz pa moral ligjor appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama u ndal sot te problematikat e evidentuara në raportin e Bordit Ndërkombëtar të Akreditimit të Institucioneve të Arsimit të Lartë, ndërsa kërkoi adresimin e tyre.

“Unë besoj se nuk është faji i pasqyrës kur pasqyra na thotë ca të vërteta. Rekomandimet janë të gjitha të vërteta dhe mbeten piketa për mënyrën se si ne duhet ta shikojmë të nesërmen dhe ku duhet të ecim”, tha Rama pas prezantimit të raportit.

Duke folur për numrin e pedagogëve part time në sistem, Rama tha se “të pasurit 50% e stafit akademik part time është problem”.

Po ashtu ai theksoi se duhet të shtohen kapacitetet e diasporës në botën tonë akademike.

“Shtimi i universiteteve tona me ta në radhët e akademikëve tanë është domosdoshmëri. Nuk është e paarsyeshme të vendoset target edhe në këtë pikë dhe të vendosim dhe kushte që t’i vëmë universitetet në pozitën që ta kërkojnë këtë gjë për të përmbushur kushtin. Kjo duhet kthyer në një gjë uniforme”, shtoi Rama.

Një tjetër problem, sipas kryeministrit mbetet edhe numri i madh i universiteteve.

“Ne kemi një numër universitetesh për metër katror më të madh se sa Sllovenia, Anglia dhe plot vende të tjera. Kemi pasur edhe më shumë, kemi shkurtuar por kemi shumë. Ky është fakti. Është kaq e vërtetë kjo sa në mendësinë e shumëkujt është bërë e udhës që sa herë ka fushatë zgjedhjesh të thonë ‘premtoji një universitet se e duan afër te shtëpia’. Ndërkohë që Shqipëria është krejt e vogël, distancat janë krejt të shkurtra dhe burimet njerëzore të Shqipërisë nuk janë sa të Kinës”, tha Rama.

Kryeministri theksoi se Shqipëria ka 41 universitete që në një masë të madhe kanë programe gjeneraliste, ndërkohë që Sllovenia ka 17 universitete.

Kryeministri theksoi se është folur edhe më parë për racionalizimin e universiteteve por nuk është bërë asnjëherë.

“Këtu nuk bëhet fjalë për të mbyllur, por për të ndryshuar strukturë dhe qasje. Jo për të mbyllur vatra që i shërbejnë dijes, por për të ndryshuar. Pastaj kemi programet që bëhen për të pasur studentë dhe jo për të prodhuar ekonomi dhe dije dhe ky është fakt”, tha Rama.

Nga ana tjetër, Rama tha se është folur për ndërkombëtarizimin e universiteteve por jemi ende larg.

“Nuk do ecim dot më shpejt përpara nëse nuk pranohet problemin. Që ky është atdheu u plagjiaturës këtë e dimë shumë mirë. U bë gjithë ajo lëvizje e madhe ‘Pakti për universitetin’ dhe i vetmi element që mbeti i paadresuar fare është plagjiatura”, tha Rama, ndërsa shtoi se “problematika e plagjiaturës nuk është e adresuar si duhet”.

Rama kërkoi që puna të fokusohet për të bërë një transformim të mëtejshëm dhe shumë domethënës në këtë periudhë që përkon me periudhën e anëtarësimit të Shqipërisë në BE.

“Ne duhet të vendosim stekën shumë më lartë. Progresi i deritanishëm na jep të gjitha arsyet që të besojmë se është e mundur të shkojmë shumë më larg”, shtoi Rama. /j.p/

The post Rama: Problematika e plagjiaturës nuk është e adresuar si duhet appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama u shpreh sot se falë bashkëpunimit me Universitetin “BOKU” të Vjenës, Universiteti Bujqësor i Tiranës do të bëhet pikë referimi në gjithë rajonin për studimet e ekselencës.

Rama ishte i pranishëm sot në prezantimin e raportit të Bordit të Akreditimit të Institucioneve të Arsimit të Lartë, ku u ndal te domosdoshmëria e transformimit të arsimit të lartë për t’iu përgjigjur sfidave të epokës digjitale.

Kryeministri vlerësoi bashkëpunimin e vendosur mes Universitetit Bujqësor të Tiranës dhe Universitetit “BOKU” në Vjenë.

“Rektori i universitetit së bashku me ekipin e tij, patjetër edhe me mbështetjen tonë ka angazhuar trupën në një proces transformimi rrënjësor. Faktikisht universiteti nga pikëpamja e reformës ka hapur një proces reformimi të panjohur më parë në botën akademike shqiptare”, tha Rama.

Kryeministri shtoi se ky proces reformimi vjen si rezultat i ndërveprimit intensiv me universitetin “BOKU” të Vjenës dhe i përafrimit të plotë të programeve me atë universitet.

“Kjo për t’i dhënë mundësi sinergjisë mes dy universiteteve që të shkojë përtej ushtrimit të bashkëpunimeve të cilat ne i kemi njohur deri më sot, që janë bashkëpunime pozitive, por që mbeten bashkëpunime si midis shtetesh të ndryshme”, tha Rama.

Ndërkohë, kryeministri shtoi se bashkëpunimi mes Universitetit Bujqësor të Tiranës dhe universitetit “BOKU” të Vjenës bënë të mundur që në Shqipërinë 2030 diplomat e Universitetit Bujqësor të Tiranës të jenë të barazvlefshme me diplomat e universitetit “BOKU” të Vjenës.

Rama theksoi se me këtë Universiteti Bujqësor i Tiranës bëhet një pikë referimi në gjithë rajonin tonë për studimet e ekselencës në fusha të ndryshme.

“Nga sa mund të mendohej deri një dekadë më parë, këto fusha janë bërë e po bëhen gjithmonë e më prioritare në jetën e përditshme të njerëzve dhe lidhen me sfida të jashtëzakonshme që kanë të bëjnë me zhvillimin e qëndrueshëm dhe me mbrojtjen e mjedisit. Lidhen me të gjitha qasjet e reja për shfrytëzimin e burimeve natyrore me ushqimin e sigurt e kështu me radhë”, tha Rama.

Rama shprehu besimin se ky transformim i universitetit do të rrisë edhe kërkesën e vajzave dhe djemve që mbarojnë shkollën e mesme për të ndjekur studimet në këtë universitet.

“Pajisja me diplomat e këtij universiteti do të jetë një garanci për t’u vënë në shërbim të institucioneve apo sipërmarrjes me një kohë kur sfidat e produkteve me të cilat lidhet jeta e Universitetit Bujqësor të Tiranës bëhen gjithmonë e më shumë strategjike”, tha Rama.

Kryeministri theksoi se kjo tregon se procesi i integrimit në një universitet ndër më të kërkuarit e botës kërkon një ndryshim dhe të sistemit tonë të organizimit, një ndryshim përmbajtësor në ligjin e arsimit të lartë dhe kërkon një ndryshim edhe në qasjen menaxheriale të universitetit. /j.p/

The post Rama: Universiteti Bujqësor i Tiranës do të bëhet pikë referimi në rajon për studimet e ekselencës appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama u shpreh sot se mandati i katërt do të jetë mandati i Rilindjes Urbane 2.0.

Kjo, sipas kryeministrit, do të thotë më shumë hapësira publike të rikualifikuara me përfshirjen e arkitektëve të huaj.

Duke iu përgjigjur pyetjeve dhe komenteve të adresuara nga qytetarët në platformat sociale, Rama theksoi se “fatmirësisht kemi një rrjet arkitektësh të huaj si pakkush në këtë botë me një numër të konsiderueshëm edhe arkitektësh shqiptarë.

“Janë 60 arkitektë lokalë që janë angazhuar në Tiranë në 8 grupe pune, që po merren ndërkohë me projektet, sepse nuk është thjesht të heqim gjërat, por të krijojmë situata të reja të kualifikuara nga pikëpamja urbane në territoret e komuniteteve”, nënvizoi Rama.

Kryeministri siguroi se kjo gjë do të ndodhi në të gjithë perimetrin e Tiranës hap pas hapi.

“Tirana ka nevojë të ngjitet në një nivel tjetër të hapësirave publike, të kulturës urbane, cilësisë së shërbimeve dhe estetikës së shërbimeve sepse ky është momenti ku ne mund ta humbasim bastin e madh të Shqipërisë kampione e Ballkanit në turizëm, nëse nuk i japim cilësi estetike shërbimeve tona”, tha Rama.

Sipas tij, “ky është momenti edhe për transformimin e disa shërbimeve jetike nga shërbimi me ujë, tek shërbimi i pastrimit, të cilat do t’i reformojmë rrënjësisht.

“Ashtu sikundër edhe te kontrolli mbi territorin dhe kontrolli i sigurisë ushqimore. Këto janë piketa kyçe të mandatit të katërt dhe që lidhen drejtpërdrejt edhe me anëtarësimin e Shqipërisë në BE”, tha Rama. /j.p/

The post Rama: Mandati i katërt për Rilindjen Urbane 2.0, transformim i shërbimeve jetike appeared first on Agjencia Telegrafike Shqiptare.

TIRANË, 2 korrik/ATSH/ Kryeministri Edi Rama bëri të ditur sot se për ndërtimin e segmentit rrugor “Milot-Balldre” duhet konkurrencë dhe një partner i besueshëm ndaj edhe procedura e koncesionit është anuluar.

Rama iu përgjigjet pyetjeve dhe komenteve të adresuara nga qytetarët në platformat sociale, ku veçoi pyetjen e një komentuesi se kur do të ndërtohet ky segment rrugor.

“E kemi shpjeguar dhe rishpjeguar. Është në proces, ne i kemi të gjitha gati, por na duhet transprencë, na duhet konkurrencë dhe një partner i besueshëm. Për këtë arsye edhe procesi është anuluar dy herë në mos gabohem, apo tre herë”, tha Rama.

Kryeministri bëri të ditur se sapo të kemi kontratën e lidhur në mënyrë të rregullt dhe të plotë do të fillojmë edhe këtë segment.

Ministria e Infrastrukturës dhe Energjisë ka anuluar në 14 korrik procedurën e koncesionit për ndërtimin e segmentit rrugor “Milot-Balldre” me vlerë 364.7 milionë euro dhe kohëzgjatje 35 vjet.

Arsyeja e anulimit është pasi asnjë nga ofertat e paraqitura nuk përmbushi kërkesat e procedurës konkurruese.

Gjurma e propozuar e rrugës “Milot-Balldre” fillon në nyjen e Milotit, ku do të lidhet me segmentet e tjera rrugore Milot-Thumanë-Kashar-Lekaj dhe me Rrugën e Kombit, dhe do të përfundojë në rrugën ekzistuese Tiranë –Shkodër, në Balldre.

Autostrada e re Milot-Balldre parashikohet të jetë një autostradë e kategorisë A, cilësia më e lartë e rrugëve të standardit europian.

Kjo autostradë do të ketë një gjatësi prej 17 km, dhe do të jetë tërësisht e mbyllur në të dy krahët. Gjerësia e saj do të jetë nga tre korsi në të dy krahët e lëvizjes dhe do të mundësojë ecjen me një shpejtësi prej 120 km/orë.

/m.m/j.p/

The post Rruga Milot-Balldre, Rama: Sapo të kemi kontratën e rregullt do të fillojmë edhe këtë segment appeared first on Agjencia Telegrafike Shqiptare.

TIRANË, 21 korrik/ATSH-Maela Marini/ Kryeministri Edi Rama bëri të ditur sot se po punohet për të nisur monitorimin teknologjik të strukturuar të territorit përmes dronëve.

Rama iu përgjigj drejtpërdrejt pyetjeve dhe komenteve të adresuara nga qytetarët në platformat sociale lidhur me aksionin e ndërmarrë së fundi në territor për lirimin e hapësirave publike.

“Ka lloj-lloj qasjesh dhe unë dua të prek një pikë që e shoh të rishfaqet shpesh: ‘përse gjithmonë kështu?’. Jo, nuk është gjithmonë kështu. Ka një problematikë me territorin por është ku e ku në krahasim me më parë. Ne na duhet të rikthehemi herë pas here sepse ka ende për të bërë, por jo sepse gjërat janë në pikën ku ishin më parë”, shtoi Rama.

Kryeministri theksoi se “patjetër që ka nevojë për riorganizim të mëtejshëm”.

“Kjo nuk është një çështje thjesht dhe vetëm inspektorësh dhe inspektimesh, por e vendosjes në një nivel tjetër të kontrollit përmes teknologjisë”, theksoi ai.

Kryeministri bëri të ditur se “jemi shumë afër edhe në këtë aspekt ndërkohë që kemi nisur punën me monitorimin teknologjik të rrugëve”.

“Kemi Qendrën e Monitorimit të Trafikut, kemi pjesë të këtij plani pune edhe monitorimin e shkollave, por ndërkohë jemi në një proces për të nisur edhe monitorimin teknologjik të strukturuar të territorit ku do të mund të ndjekim gjithçka ndodh në territor përmes dronëve”, theksoi ai.

Ndërkohë, sipas kryeministrit, informacioni i marrë nga dronët do të bëjë që puna e inspektorëve në terren të ballafaqohet me vëzhgimin e teknologjisë.

“Kjo do të na çojë komplet në një nivel tjetër dhe do të jemi shumë më të sigurt për mos prapakthimin e asnjë progresi në këtë drejtim. Duhet të jemi shumë të qartë se ky nuk është proces që nuk merr parasysh se këtu duhet të krijojmë harmoni dhe bashkëjetesë në harmoni mes interesit të qytetarëve, atyre që kanë nevojë për hapësirat e tyre, qoftë për të kaluar në këmbë lirisht apo për të qëndruar lirisht në hapësirat komunitare dhe biznesit” shtoi Rama. /j.p/

The post Rama: Monitorim teknologjik i territorit përmes dronëve appeared first on Agjencia Telegrafike Shqiptare.