TIRANË, 9 gusht/ATSH/ Të gjithë qytetarët që duan të raportojnë rastet e zënies së hapësirave publike tashmë mund ta kryejnë atë përmes platformës “Hapësira ime publike”.

Kryeministri Edi Rama theksoi sot se https://hapesiraimepublike.gov.al do të jetë “dritare e re komunikimi për të bashkuar forcat në mbrojtje të hapësirës publike”.

Në këtë platformë qytetarët mund të denoncojnë rastet e zënies së trotuareve apo hapësirave komunitare, parking privat i paligjshëm, ndërtimet pa leje apo shkelje të lejes, shkelje të tjera në dëm të pronës publike, ndotje fizike apo akustike, zaptim dhe ndotje e anës së rrugës kombëtare, kantier ndërtimi pa rrethim të rregullt, apo me ndotje mjedisore.

Në rast mosreagimi brenda 24 orësh nga institucionet, qytetarët janë të lutur të plotësojnë formularin që ndodhet në këtë platformë.

Deri më tani, nga të dhënat janë denoncuar 19 raste në platformë.

Kjo platformë u hap në kuadër të aksionit të ndërmarrë prej fillimit të korrikut për lirimin e hapësirave publike në të gjithë vendin.

/k.s/

The post Rama publikon platformën e denoncimit: Dritare e re komunikimi në mbrojtje të hapësirës publike appeared first on Agjencia Telegrafike Shqiptare.

TIRANË, 8 gusht/ATSH/ Inspektorati Shtetëror Shëndetësor vijon inspektimin e pishinave dhe kushteve higjieno-sanitare në të gjitha subjektet e vendit, në kuadër të masave të marra për sezonin turistik.

Ministrja e Shëndetësisë dhe Mbrojtjes Sociale, Albana Koçiu deklaroi sot se “nga muaji qershor deri tani janë inspektuar rreth 200 pishina në të gjithë vendin dhe procesi do të vazhdojë deri në fund të sezonit”.

“Gjatë kontrolleve, për pishinat që kanë rezultuar me mangësi janë lënë detyra me afate të përcaktuara për përmirësim dhe janë marrë masa administrative për subjektet përkatëse”, tha Koçiu.

Ministrja Koçiu u shpreh se “ISHSH kryen me përpikmëri inspektimin dhe riinspektimin, duke trajtuar me seriozitet çdo sinjalizim apo ankesë nga institucionet shëndetësore ose qytetarët, për të garantuar sigurinë dhe shëndetin e pushuesve”.

The post Masat për sezonin turistik, Koçiu: Rreth 200 pishina të inspektuara nga ISHSH që nga qershori appeared first on Agjencia Telegrafike Shqiptare.

TIRANË, 8 gusht/ATSH/ Në qytetin e trëndafilave u çel mbrëmjen e sotme festivali “Nona”, festa e gjysheve shqiptare.

Qindra qytetarë, por edhe turistë vendas e të huaj, mbushën sheshin kryesor të Përmetit.

Ky është edicioni i pestë i festivalit “Nona”, një aktivitet unik treditor, që e kthen Përmetin në një sofër të madhe te ngjashme me shtëpinë e gjysheve tona.

Festivali nisi paradite me vizita në shtëpitë e gjysheve përmetare, për të vijuar pasdite me çeljen e panairit “Nga duart e gjysheve”, ku u prezantuan gatime të ndryshme tradicionale.

Në mbrëmje, në festival performuan artistë të njohur si Evgjeni Çulli, Mikel & Ervis Rrapaj,  Luljeta Ilia, Çiljeta Xhilaga, Anxhela Peristeri, G Bani si dhe aktorja e njohur Eva Alikaj.

Festivali “Nona” synon të sjellë dialog midis brezave në vend të hendekut në rritje midis të moshuarve dhe të rinjve në jetën e përditshme urbane.

Festivali do të vazhdojë edhe në datat 9 dhe 10 gusht, ku do të zhvillohen aktivitete të ndryshme kulturore.

/k.s/a.f/

The post Çelet edicioni i 5-të i festivalit “Nona”, atmosferë magjike në Përmet appeared first on Agjencia Telegrafike Shqiptare.

TIRANË, 8 gusht/ATSH/ Dhërmiu, fshati bregdetar i cilësuar si parajsë tropikale po tërheq  çdo vit  mijëra turistë vendas e të huaj.

Kryeministri Edi Rama ndau mbrëmjen sot pamje nga perëndimi i diellit në Dhërmi.

“S’është pikturë, është Dhërmiu live, pa filtra”, shkruan Rama.

Mediet e ndryshme ndërkombëtare pasqyrojnë në reportazhet dhe shkrimet e tyre bukuritë e Dhërmiut, duke tërhequr vëmendjen e turistëve për ta vizituar atë.

Gjatë muajit korrik edhe gazeta prestigjioze amerikane ”New York Times” ka përzgjedhur edhe Dhërmiun ndër destinacionet më të mira turistike globale.

Pak më shumë se një kilometër i gjatë, me shezlongë në dispozicion dhe gjire shkëmbore të izoluara, që shpërndahen në skajin jugor të plazhit, Dhërmiu është një destinacion kryesor edhe për ata që duan të festojnë, pasi në zonë organizohen disa festivale të mëdha muzikore gjatë gjithë verës.

Plazhet e Jonit këtë vit janë frekuentuar nga mijëra pushues, jo vetëm vendas, por edhe shumë të huaj.

/k.s//a.f/

The post Rama: S’është pikturë, është Dhërmiu live pa filtra appeared first on Agjencia Telegrafike Shqiptare.

TIRANË, 8 gusht/ATSH/  Në Tragjas të Vlorës po punohet për shuarjen e zjarrit të rënë pasditen e sotme.

Kryetari i bashkisë së Vlorës, Ermal Dredha informoi sot në rrjetet sociale se “forcat zjarrfikëse janë aktualisht në terren dhe po punojnë intensivisht për shuarjen e zjarrit, në zonën e Tragjasit”.

“Megjithëse në terren të vështirë, po merren të gjitha masat për të izoluar vatrat dhe për të parandaluar përhapjen e mëtejshme të flakëve”, tha Dredha, i cili ndodhet në terren për të inspektuar situatën.

Zjarri ka përfshirë malin e Tragjasit, ku terreni për ndërhyrje është i vështirë.

Ndërkohë që në disa zona te vendit kanë rënë zjarre ditët e fundit. Si pasojë e aktivizimit të Mekanizmit Europian të Mbrojtjes Civile, që nga orët e para të mëngjesit të sotëm, në Shqipëri kanë mbërritur për të ndihmuar në përballimin e situatës së zjarreve dy avionë “Air Tractor Fire Boss” të Forcës Ajrore suedeze dhe një avion “Canadair” i Forcës Ajrore kroate.

1 nga 5

/a.f/

The post Dredha: Forcat zjarrfikëse në punë për shuarjen e zjarrit në Tragjas appeared first on Agjencia Telegrafike Shqiptare.

TIRANË, 8 gusht/ATSH/ Qendra Rinore në Korçë është transformuar në një hapësirë ku të rinjtë mund të zhvillojnë talentet e tyre.

Kryeministri Edi Rama ndau në rrjetet sociale pamje nga kjo qendër, e cila ofron të gjitha kushtet e nevojshme që të rinjtë të marrin pjesë në aktivitete kulturore, të argëtohen dhe të mësojnë së bashku.

“Qendra Rinore Korçë, një hapësirë në shërbim të të rinjve të qytetit, të cilët do të mund të kalojnë kohë cilësore duke zhvilluar talentet e tyre dhe marrë pjesë në aktivitete kulturore, duke u argëtuar e mësuar së bashku”, theksoi Rama.

Qendra Rinore në Korçë ka një sallë kinemaje, tavolina ping pongu, bilardoje, ambjentin e podcast-it, salla ku të rinjtë mund të punojnë në grupe për realizimin e projekteve shkollore e jashtëshkollore.

Bashkia e Korçës ofron edhe të tjera ambiente për të rinjtë siç është zona sportive e qytetit e biblioteka, ndërsa janë të shumta edhe aktivitetet e organizuara që kanë në qendër të rinjtë.

1 nga 11

/k.s//a.f/

The post Qendra Rinore në Korçë, Rama: Hapësirë në shërbim të të rinjve appeared first on Agjencia Telegrafike Shqiptare.

TIRANË, 8 gusht/ATSH/ Në kuadër të operacionit policor ndërkombëtar i koduar “The Wanted”, për kapjen dhe ekstradimin e shtetasve të shpallur në kërkim ndërkombëtar falë shkëmbimit në kohë i informacionit mes Interpol Tiranës dhe Interpol Madridit u vu në pranga një shtetas i kërkuar për veprimtari kriminale në fushën e narkotikëve.

Si rezultat i bashkëpunimit shumë të ngushtë të Interpol Tiranës me Interpol Madridin dhe policinë spanjolle, në kuadër të operacionit policor ndërkombëtar të koduar “The Wanted”, u krye arrestimi në Spanjë, me qëllim ekstradimin drejt vendit tonë, i shtetasit shqiptar J. D., 34 vjeç.

Ky shtetas ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar, Tiranë, në prill 2025, i ka caktuar masën e sigurisë “Arrest në burg”, për veprat penale “Trafikim i lëndëve narkotike”, kryer në formën e veçantë të bashkëpunimit, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.

Interpol Tirana, në bashkëpunim me Interpol Madrid/Spanjë, vijon bashkëpunimin për finalizimin e ekstradimit të këtij shtetasi drejt vendit tonë.

/k.s//a.f/

The post I shpallur në kërkim nga GJKKO, kapet në Spanjë 34-vjeçari appeared first on Agjencia Telegrafike Shqiptare.

TIRANË, 7 gusht/ATSH/ Shkolla “Besëlidhja e Malësisë” në Bajram Curri po rikonstruktohet falë një investimi bashkëkohor prej 6.6 milionë lekësh nga Ministria e Arsimit dhe Sportit.

Eduard Shalsi, drejtues politik i Partisë Socialiste në qarkun e Kukësit, inspektoi nga afër punimet që po kryhen në këtë shkollë.

“Kjo shkollë historike po i nënshtrohet rikonstruksionit të plotë, duke hapur një kapitull të ri në jetën arsimore të zonës. Ky projekt shënon një hap të rëndësishëm drejt modernizimit të infrastrukturës shkollore dhe përmirësimit të kushteve të të mësuarit për nxënësit dhe mësuesit. Punimet pritet të përfundojnë brenda afateve të parashikuara, duke garantuar që shkolla të jetë gati për vitin e ri shkollor 2025 – 2026”, theksoi Shalsi.

Shalsi u shpreh se “ky investim vjen vetëm dy vite pas kremtimit të 100-vjetorit të themelimit të shkollës, një moment historik që dëshmon rolin e saj të pazëvendësueshëm në edukimin e brezave të rinj”.

Cilësia në arsim përmes investimeve të qëndrueshme në shkolla, objekte sportive dhe ambiente ndihmëse, duke rritur aksesin, sigurinë dhe funksionalitetin e institucioneve arsimore mbetet prioritet i qeverisë.

/k.s/a.f/

The post Shkolla “Besëlidhja e Malësisë” në Bajram Curri, në shtator me ambiente të rikonstruktuara appeared first on Agjencia Telegrafike Shqiptare.

TIRANË, 8 gusht/ATSH/ Prokuroria e Posaçme kundër Korrupsionit dhe Krimit të Organizuar (Prokuroria e Posaçme), ka kryer hetime kundër një organizate kriminale të nivelit të lartë, të përfshirë në trafikimin e kokainës dhe pastrimin e parave.

Hetimet, të cilat përfshijnë bashkëpunimin intensiv me EUROPOL dhe autoritete nga Belgjika, Franca, Holanda, Gjermania dhe Italia, u bazuan në analizën e të dhënave të komunikimit të enkriptuara të platformës SkyECC.

Nga këto hetime janë zbuluar dërgesa shumëtonëshe kokainë nga Amerika Latine drejt porteve kryesore të BE-së, përfshirë Hamburgun, Anvers etj.

Kjo organizatë kriminale  operonte në një shkallë globale, duke bashkëpunuar me grupe të tjera kriminale për të lehtësuar transportet drejt porteve evropiane dhe investonte fitimet e mëdha në prona dhe biznese në Shqipëri dhe jashtë saj.

Në kontekstin e kësaj organizate kriminale, Prokuroria e Posaçme  ka kryer hetime në kuadër të procedimit penal nr.187/2023 për veprat penale te “Trafikimi i lëndëve narkotike”, “Pastrimi i produkteve të veprës penale”, “Organizata kriminale” dhe “Kryerja e veprave penale nga organizata kriminale dhe grupi i strukturuar kriminal” parashikuar nga nenet 283/a, 287, 333/1 dhe 2 e 334/1 të Kodit Penal.

Prokuroria e Posaçme ka paraqitur kërkesë për caktimin e masës së sigurimit personal ndaj 16 (gjashtëmbëdhjetë) shtetasve shqiptarë, kërkesë e cila është miratuar nga Gjykata e Posaçme e Shkallës së Parë për Korrupsionin dhe Krimin e Organizuar (Gjykata e Posaçme) me vendimin nr.82 akti datë 06.08.2025, duke vendosur masën “arrest në burg”, bazuar në nenin 238 të Kodit të Procedurës Penale për 14 (katërmbëdhjetë) persona dhe për 2 (dy) të tjerëve ka caktuar masën e sigurimit detyrim për tu paraqitur ne policinë gjyqësore.

Drejtoria e Përgjithshme e Policisë së Shtetit në bashkëpunim me Byronë Kombëtare të Hetimit kanë ekzekutuar masat e sigurimit për 9 të hetuar (përfshirë edhe një nga drejtuesit), prej të cilëve 7 me masën“arrest me burg” dhe 2 me masën “detyrim paraqitje”, ndërsa një prej të hetuarve gjendet aktualisht i arrestuar në një vend të BE – së (drejtues i organizatës). Po punohet për ekzekutimin e masave të sigurimit për 6 persona të tjerë.

Masa “arrest me burg” në Shqipëri: E.Ç, A.Ç, P.L, R.M, G.Ç, M.K, El.Ç dhe masa detyrim paraqitje për D.P dhe  K.Gj dhe i arrestuari në një vend të BE-së: F.C.

Për interesat e hetimit,  Prokuroria e Posaçme ka kërkuar dhe marrë miratimin e Gjykatës së Posaçme për kryerjen e kontrolleve në banesa, automjete dhe persona të cilat janë në vijim e sipër.

Sekuestrimet e sasive të kokainës:

Gjatë hetimeve ndërkombëtare, janë identifikuar dhe goditur dy ngarkesa të mëdha kokaine, të transportuara nga Amerika e Jugut drejt Evropës dhe më konkretisht:

• Shtator 2020 – Paraguaj → Belgjikë (Anvers)
  Grupi i drejtuar nga E.Ç. dhe F. G., në bashkëpunim me një shtetas brazilian, organizoi trafikimin e 11.6 ton kokainë, fshehur në kuti sapuni dhe kuti boje metalike me logon “Fox”. Ngarkesa u nis nga porti i Villeta (Paraguaj) dhe mbërriti në Anvers më 04.11.2020.
  Në vijim, gjatë operacioneve të policisë në Roterdam, u sekuestruan 600 kg kokainë dhe 2 milionë euro, si dhe u arrestuan shtetasit shqiptarë M.D. dhe N.B.
• Dhjetor 2020 – Shkurt 2021 – Paraguaj → Gjermani (Hamburg)
  E.Ç. dhe F.G. organizuan dhe financuan trafikimin e 16.4 ton kokainë, fshehur në bombola metalike me bojë/kollë ndërtimi dhe të stampuara me logo (“sy me rrufe të kuqe”, “Puma”, “shenja infinit”), me vlerë tregu prej 1.5 miliard deri 3.5 miliard euro. Ngarkesa, e shpërndarë në disa kontejnerë, mbërriti në Hamburg më 12.02.2021 dhe u sekuestrua nga autoritetet doganore gjermane.

Tipologjia e organizatës kriminale

Hetimet e kryera në bashkëpunim me autoritetet ligjzbatuese partnere dhe analiza e komunikimeve të përgjuara në aplikacionin SkyECC kanë zbuluar një strukturë kriminale të përmasave ndërkombëtare, e udhëhequr nga shtetasit E.Ç. dhe F.G., e cila kontrollonte në mënyrë të plotë zinxhirin e trafikut të kokainës – nga prodhimi, magazinimi dhe përpunimi në laboratorët e Paraguait, transporti ndërkombëtar dhe shpërndarja në tregjet europiane, deri te pastrimi dhe qarkullimi i të ardhurave të fituara.

Ngarkesat e mëdha të kokainës siguroheshin direkt nga prodhuesit nga drejtuesi i organizatës E. Ç. (i cili së bashku me vëllanë e tij A. Ç. ishin vendosur në Paraguai), magazinoheshin dhe bëheshin gati për transport në Paraguai. Lënda narkotike fshihej në mënyrë të sofistikuar në ngarkesa legale – kuti sapuni, bombola boje dhe kollose ndërtimi – të maskuara me marka tregtare si “Fox” apo me shenja të veçanta dalluese si “Puma” ose “sy me rrufe”. Këto ngarkesa transportoheshin me kontejnerë detarë nga portet e Amerikës së Jugut drejt porteve të mëdha evropiane, kryesisht Anvers (Belgjikë) dhe Hamburgu (Gjermani), ku më pas shpërndaheshin përmes rrjeteve të brendshme të tregut të drogës në BE.

Qarkullimi dhe menaxhimi i parave

Hetimi ka treguar se ky grup kishte ngritur një mekanizëm financiar jashtëzakonisht të sofistikuar për të qarkulluar dhe fshehur të ardhurat nga aktiviteti kriminal. Një prej metodave kryesore ka qenë transporti fizik i parave “cash” nga vendet e BE-së drejt Shqipërisë, duke përdorur shoferë autobusësh kryesisht shqiptar të transportit ndërkombëtar të pasagjerëve. Kjo mënyrë kishte disa përparësi për grupin:

• Evitimi i gjurmimit bankar dhe i detyrimit ligjor për deklarimin e burimit të fondeve;
• Shmangia e kontrolleve doganore zyrtare, duke përdorur rrugë të shkurtra dhe pikat kufitare më pak të monitoruara;
• Siguria përmes rrjetit të besuar të shoferëve, numri i të cilëve ishte i kufizuar dhe i përzgjedhur në bazë të një marrëdhënieje të ndërtuar mbi besimin reciprok.

Shoferët, në këmbim të shërbimit dhe rrezikut të marrë përsipër, përfitonin rreth 2% tarifë mbi shumën e transportuar. Këto pagesa bëheshin drejtpërdrejt nga anëtarët e grupit dhe garantoheshin nga personat përgjegjës për menaxhimin e logjistikës financiare.

Koordinimi i pagesave

Figura kyçe si  F.G., E.Ç., si dhe bashkëpunëtorë të tjerë, luanin rol aktiv në organizimin e këtyre transfertave. Pagesat dhe kompensimet e brendshme shpesh maskoheshin përmes transaksioneve të tjera të fshehta, të dizajnuara për të mos lënë gjurmë në sistemin financiar zyrtar.

Përveç transportit fizik, rrjeti përdorte edhe sistemin informal të transfertave të njohur si “haëala” ose “token”, ku shumat e mëdha qarkullonin përmes një zinxhiri ndërmjetësish pa asnjë evidencë bankare. Një pjesë e konsiderueshme e fondeve kanalizohej drejt Bolivisë, e cila, për shkak të nivelit të ulët të kontrollit financiar dhe pozicionit të saj strategjik, shërbente si nyje kyçe për përfundimin e transaksioneve ndërkombëtare të parave.

Kombinimi i këtyre metodave, transporti fizik me shoferë të besuar dhe sistemi i transfertave informale, i mundësonte kësaj organizate kriminale qarkullimin e qindra milionë Euro cash, duke reduktuar ndjeshëm riskun e sekuestrimit dhe duke siguruar vazhdimësinë e aktivitetit të tij në shkallë ndërkombëtare.

Prokurorët e çështjes, Altin Dumani dhe Vladimir Mara, theksojnë se:
“Kjo organizatë kriminale mund të konsiderohet si një nga organizatat shqiptare më të fuqishme në trafikun ndërkombëtar të kokainës. Ajo kishte kapacitetin për të ndikuar drejtpërdrejt në çmimin e kokainës në tregjet evropiane dhe për të menaxhuar sasi të mëdha të lëndës narkotike në periudha të shkurtra kohore. Fuqia financiare e lartë e kësaj organizate, strukturimi dhe organizimi i një niveli shumë të lartë si dhe aftësia për të rikuperuar humbjet që vinin nga sekuestrimet e dallojnë atë nga grupet e tjera kriminale të hetuara nga SPAK .”

Pronat e sekuestruara

Me vendimin nr. 543 date 07.08.2025, Gjykata e Posaçme ka vendosur sekuestrimin preventiv për gjithsej 14 pasuri të llojeve të ndryshme me vlera disa miliona eurosh, duke përfshirë resorte, vila, apartamente, trualle, automjete dhe kuota në shoqëri, në emër të personave nën hetim  si më poshtë:

Resorte turistike:

• • “A….. PARK” Resort ku përfshihen hotele, godina shërbimi, restorant dhe ambiente tregtare,  Xhafzotaj, Durrës.

Vila dhe apartamente:

• • Vilë dy katëshe tip “ELYSIAN”, në bregdetin e Dhërmiut, bashkia Himarë (sipërfaqe totale rreth 378.2 m²), me vlerë tregu prej afërsisht 1.000.000 Euro.
  • Vilë e porositur datë 06.11.2024, në Tiranë.

Truall, toka dhe ndërtesa:

• • Pasuri truall dhe ndërtesa në Tiranë, Sharrë.
  • Pasuri (me status regjistrim të përkohshëm).
  • Pasuri nr. 349/45 në bashkëpronësi.
  • Tokë arë me sipërfaqe 5900 m², Sharrë, Tiranë.

Kuota dhe aksione në shoqëri tregtare:

• • Kuotat/aksionet në shoqëri tregtare,  Kavajë.
  • Shoqëri tregtare, Durrës.
  • Shoqëri tregtare, Rrogozhinë.
  • Shoqëri tregtare, Durrës.

Automjete:

• • Tre automjete.

Sekuestrime gjatë ekzekutimit të vendimeve të kontrollit:

• Mbi 111 800 Euro Cash;
• 4000 USD
• 880.000 Lekë

Bashkëpunimi ndërkombëtar

Në këtë hetim të rëndësishëm, SPAK ka pasur një koordinim dhe bashkëpunim të shkëlqyer me EUROPOL, Eurojust, agjencitë ligjzbatuese të vendeve të BE-së. Nga partnerët ndërkombëtarë u angazhuan Policia Federale Gjyqësore e Belgjikës, Policia Kombëtare dhe SIRASCO nga Franca, Zyra Federale e Policisë Kriminale dhe Zyra Shtetërore e Policisë Kriminale Karlsruhe nga Gjermania, Policia e Holandës, si dhe Policia e Shtetit dhe Shërbimi për Bashkëpunim Ndërkombëtar Policor (SCIP) të shtetit italian. Ky bashkëpunim i ngushtë ndërmjet këtyre institucioneve ishte thelbësor për suksesin e operacionit dhe goditjen e kësaj organizate kriminale me ndikim ndërkombëtar.

Një falënderim i veçantë u drejtohet hetuesve të Byrosë Kombëtare të Hetimit (BKH) për punën voluminoze dhe cilësore të kryer si edhe Policisë së Shtetit për mbështetjen në ekzekutimin e masave të sigurisë.

/k.s/a.f/

The post SPAK godet organizatën kriminale shqiptare, 17 tonë kokainë të sekuestruara appeared first on Agjencia Telegrafike Shqiptare.

The post Policia Kufitare i vjen në ndihmë 12-vjeçarit të huaj, të dëmtuar në Gjirin e Gramës appeared first on Agjencia Telegrafike Shqiptare.

TIRANË, 7 gusht /ATSH/ Pas konstatimit të dëmtimeve të rënda në Pasarelën e Beçishtit, shkaktuar nga kalimi i një automjeti të paidentifikuar, Shërbimet Publike të bashkisë Tepelenë kanë ndërhyrë menjëherë për të kryer riparimet e nevojshme dhe për të garantuar sigurinë e kalimtarëve.

“Ky veprim i papërgjegjshëm dhe i paligjshëm, jo vetëm ka vënë në rrezik jetën e qytetarëve, por ka shkaktuar dëmtime serioze në trupin e urës, një vepër me status monument kulture i kategorisë së parë, në shërbim të përditshëm të komunitetit të zonës”, theksoi bashkia Tepelenë, në një postim në rrjetet sociale.

Bashkia Tepelenë dënon me forcë çdo akt të tillë dhe u bën thirrje qytetarëve që në rast konstatimi të veprimeve të ngjashme, të njoftojnë menjëherë organet ligjzbatuese, në mënyrë që autorët të vihen përpara përgjegjësisë ligjore.

Sipas bashkisë, dëmtimi i veprave me status të veçantë mbrojtjeje përbën shkelje të rëndë të ligjit dhe nuk do të tolerohet.

Bashkia Tepelenë mbetet e angazhuar në mbrojtjen e trashëgimisë kulturore dhe sigurinë e infrastrukturës publike.

1 nga 5

/k.s/r.e/

The post Ndërhyrje emergjente në Pasarelën e Beçishtit në Tepelenë, Monument Kulture i Kategorisë I appeared first on Agjencia Telegrafike Shqiptare.

TIRANË, 7 gusht/ATSH/ Universiteti i Tiranës informoi sot se fazat për regjistrimin e studentëve do të kryhen nga data 29 gusht deri më 11 shtator.

Në një postim në rrjetet sociale, Universiteti i Tiranës u kujton maturantëve afatet kryesore për regjistrimin në Institucionet e Arsimit të Lartë për vitin akademik 2025-2026.

“Më 26 gusht do të kryhet publikimi i renditjes së aplikantëve në U-Albania. Më 27 gusht do të kryhen ankesat mbi renditjen”, theksoi UT.

Ndërsa nga 29 gushti deri më 11 shtator do të kryhet regjistrimi në Institucionet e Arsimit të Lartë, ku renditja do të jetë në kohë reale (në 7 faza brenda 48 orëve).

Sipas UT, më 12-13 shtator do të kryhet çregjistrimi nga raundi i parë.

UT informon maturantët ta ndjekin procesin e renditjes online në portalin U-Albania në “Këndin e Maturantit” me ID-në e tyre.

Universiteti i Tiranës vijon të mbetet institucioni më i madh dhe më i rëndësishëm i arsimit të lartë në vend.

/k.s//r.e/

The post Universiteti i Tiranës: Regjistrimet për vitin e ri akademik, 29 gusht – 11 shtator appeared first on Agjencia Telegrafike Shqiptare.

TIRANË, 7 gusht/ATSH/ Qyteti i Pogradecit vijon të mbetet ndër më preferuarit për mijëra vizitorë vendas e të huaj.

Kryeministri Edi Rama ndau sot pamje nga mbrëmja në Pogradec në këto net vere.

“Hëna si poezi më vete mbi liqen”, shkruan Rama.

Përveç bukurive natyrore që ofron, investimet në infrastrukturë dhe hapësira publike kanë bërë që Pogradeci të jetë një zgjedhje kryesore për turizëm në të gjitha stinët e vitit.

I zgjedhur masivisht për qetësinë dhe freskinë që ofron në ditët e nxehta të verës, Pogradeci mbetet destinacion shumë i kërkuar edhe gjatë stinëve të tjera, ndërsa është rritur edhe numri i turistëve të huaj.

/k.s/r.e/

The post Raman ndan pamje nga Pogradeci: Hëna si poezi më vete mbi liqen appeared first on Agjencia Telegrafike Shqiptare.

TIRANË, 7 gusht/ATSH/ Kryetarja e Kuvendit, Elisa Spiropali tha sot se protesta masive në Prishtinë rikonfirmoi indinjatën e thellë mbarëshqiptare ndaj padrejtësisë historike, si dhe mbështetjen ndaj ish-drejtuesve të UÇK-së.

Në një postim në rrjetet sociale, Spiropali tha se “ish-drejtuesit e UÇK-së në kundërshtim me çdo standard ligjor, ndërkombëtar, moral, logjik e njerëzor, po mbahen të mbyllur në hapsanën e Hagës; një akt kundër të drejtës, kundër lirisë, në abuzim me sovranitetin e një shteti të pavarur e demokratik”.

“Drejtësia nuk mund të përmbyset, viktimat nuk mund të shpallen agresorë dhe agresorët nuk mund të shiten si viktima”, tha Spiropali.

Mijëra qytetarë protestuan sot në Prishtinë “kundër padrejtësisë” nga Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës (UÇK), të cilët po akuzohen për krime lufte dhe krime kundër njerëzimit.

Protestuesit kërkuan që për të akuzuarit nga Gjykata në Hagë të ketë “drejtësi dhe jo padrejtësi”.

/k.s/r.e/

The post Protesta në Prishtinë, Spiropali: Rikonfirmoi indinjatën e thellë mbarëshqiptare ndaj padrejtësisë historike appeared first on Agjencia Telegrafike Shqiptare.

TIRANË, 7 gusht/ATSH/ Në fshatrat Lofkënd, Mallkastër dhe Drenie, Patos, po vijon ndërhyrja nga toka dhe ajri për izolimin dhe shuarjen e flakëve.

Ministri i Mbrojtjes Pirro Vengu inspektoi nga afër situatën e zjarrit që ka përfshirë një sipërfaqe me pisha dhe bimësi të dendur në zonën midis bashkisë Mallakastër dhe bashkisë së Patosit.

Vengu tha se duhet angazhim për mbajtjen në kontroll të vatrës në 24-orëshin e ardhshëm, pasi temperaturat do të rriten dhe duhet të jenë prioritet banesat.

Ministri Vengu vlerësoi profesionalizmin dhe përkushtimin e të gjitha forcave të angazhuara, duke theksuar se mbrojtja e jetës së qytetarëve dhe e mjedisit është prioritet absolut.

Puna për neutralizimin e plotë të flakëve vijon me intensitet dhe koordinim të plotë ndërinstitucional.

Në terren janë angazhuar trupat e Forcave të Armatosura, në bashkëpunim të ngushtë me strukturat e emergjencave civile të qarkut Fier dhe shërbimet zjarrfikëse nga disa bashki dhe institucione.

Në operacion po marrin pjesë 2 automjete zjarrfikëse të FA-së, 3 zjarrfikëse nga bashkia Patos, 1 zjarrfikëse nga bashkia Mallakastër, 1 zjarrfikëse nga bashkia Lushnjë, 1 zjarrfikëse nga bashkia Fier, 2 mjete të kompanisë “Albpetrol” sh.a., 1 mjet zjarrfikës nga Roskoveci.

1 nga 3

/k.s/r.e/

The post Zjarret në Mallakastër dhe Patos, Vengu: Vijon ndërhyrja nga toka dhe ajri appeared first on Agjencia Telegrafike Shqiptare.

TIRANË, 7 gusht/ATSH/ Inspektorati Kombëtar i Mbrojtjes së Territorit Korçë në bashkëpunim me Autoritetin Rrugor Shqiptar ka ngritur grupet e punës për evidentimin e subjekteve që kanë zënë hapësira publike në mënyrë të paligjshme përgjatë akseve rrugore.

Drejtori rajonal i IKMT Korçë, Edi Bitri tha në një prononcim për mediet se, “nga monitorimet e deritanishme në terren janë evidentuar rreth 370 subjekte që kanë zënë hapësira publike në mënyrë të paligjshme, duke rrezikuar sigurinë rrugore dhe kombëtare”.

Sipas tij, bëhet fjalë kryesisht për rrethime banesash, tabela të karburanteve, si dhe biznese të ndryshme që merren me servise apo automjete të çmontuara, të cilat kanë pushtuar pjesë të rrugëve.

“Të gjitha subjektet janë paralajmëruar të marrin masa për çmontimin vullnetar të strukturave që kanë zënë hapësirat, dhe është vënë re një ndërgjegjësim në rritje nga ana e qytetarëve dhe bizneseve për të respektuar ligjin. Sipas direktivave të qeverisë, atyre u është lënë një afat deri më 31 korrik për të realizuar çmontimin vullnetar”, tha Bitri.

Ai shtoi se subjekteve u është lënë afat sipas direktivave të lëna nga qeveria për të liruar këto hapësira.

Prej fillimit të gushtit, ekipet e inspektimit kanë rifilluar monitorimet për të verifikuar nëse është nisur procesi i çmontimit.

“Në rastet kur nuk janë marrë masa, IKMT do të vijojë me penalitete, përfshirë gjoba dhe prishje me forcë të ndërtimeve apo strukturave të paligjshme”, tha Bitri.

Drejtori i IKMT Korçë informoi se deri tani nuk është vendosur asnjë masë administrative, pasi ekipet janë ende në terren dhe po monitorojnë situatën.

“Mungesa e fuqisë punëtore për ndërhyrjet ka sjellë vonesa të mundshme, por në rastet kur nuk është nisur asnjë veprim, do të merren masa sipas ligjit”, tha ai.

Bitri tha se “kryesisht janë rrethime të banesave, por edhe tabela karburantesh, servise të makinave që kanë edhe makina të çmontuara që kanë zënë rrugën, si dhe pika të përpunimit të mermereve, por këto të fundit janë të pakta”.

/k.s/r.e/

The post Drejtori i IKMT Korçë: Rreth 370 subjekte cenojnë sigurinë kombëtare në akset rrugore të qarkut appeared first on Agjencia Telegrafike Shqiptare.

TIRANË, 7 gusht/ATSH/ Në vijim të takimeve rajonale të Grupit të Punës, i ngritur me urdhër të Ministrit të Brendshëm dhe drejtuesit të Drejtorisë së Përgjithshme të Mbrojtjes nga Zjarri dhe Shpëtimi, sot u zhvillua në Lezhë takimi i tretë me strukturat vendore të këtij qarku.

Në takim morën pjesë Prefekti i Qarkut, drejtues vendor të Policisë së Shtetit, shërbimeve zjarrfikëse të bashkive, njësive të emergjencave civile dhe përfaqësues të pushtetit vendor.

Në qendër të diskutimeve ishin vlerësimi i situatës aktuale në territor, përmirësimi i bashkëpunimit ndërinstitucional, rritja e gatishmërisë për muajin gusht dhe nevojat për logjistikë dhe kapacitete më të mëdha në terren.

Ashtu si në Gjirokastër dhe Delvinë, u theksua rëndësia e ndërhyrjes së shpejtë, koordinimit të afërt mes nivelit qendror dhe atij vendor, si dhe rritjes së ndërgjegjësimit qytetar për të parandaluar zjarrvëniet e qëllimshme apo nga pakujdesia.

Nga ana tjetër, u vlerësua puna e gjithë atyre që janë çdo ditë në vijën e parë të përballjes me flakët, nga zjarrfikësit, policët, emergjencat civile, Forcat e Armatosura, deri te vetë banorët e zonave të prekura.

Përpjekja e përbashkët është çelësi për ta kaluar me sa më pak pasoja këtë sfidë sezonale.

1 nga 7

/k.s/r.e/

The post Situata e zjarreve, takim i strukturave të mbrojtjes civile në Lezhë appeared first on Agjencia Telegrafike Shqiptare.

TIRANË, 7 gusht/ATSH/ Në të gjithë vendin ka nisur edhe çlirimi i buzërrugëve kombëtare, duke përcaktuar një kufi tërheqjeje të subjekteve.

Kryeministri Edi Rama ndau sot në rrjetet sociale pamje nga aksioni që po kryhet për lirimin e këtyre hapësirave në akset kombëtare në qarkun e Durrësit.

Rama tha se “subjektet duhet të sigurohen se asnjë rraqe nuk do të jetë më nën qiell të hapur”.

“Njëkohësisht, sipas kritereve të programit të ri të Rilindja Urbane 2.0 do të kontribuojnë me një sasi gjelbërimi, bashkërisht me qeverinë, duke e trajtuar hapësirën buzë e përballë akseve kombëtare si pjesë të shtëpisë sonë të përbashkët dhe jo si tokë të askujt”, theksoi Rama.

Ky aksion vjen paralelisht me atë për lirimin e hapësirave publike në qytete të ndryshme të vendit që ka nisur në fillim të muajit korrik.

Lirimi i hapësirave publike është i domosdoshëm për rritjen e cilësisë së shërbimeve, por edhe funksionalitetit të çdo biznesi dhe sipërmarrjeje në përputhje me standardet kombëtare të mikpritjes dhe shërbimit jo vetëm në zonat turistike, por në çdo cep të Shqipërisë.

/k.s/r.e/

The post Rama: Nis çlirimi i buzërrugëve kombëtare, asnjë rraqe nuk do të jetë më nën qiell të hapur appeared first on Agjencia Telegrafike Shqiptare.

TIRANË, 6 gusht/ATSH/ Tirana po tërheq gjithnjë e më shumë vizitorë të huaj. Gazetarja e Deutsche Welle Travel, Gönna Ketels, ka realizuar një reportazh në kryeqytetin e Shqipërisë, ku prezanton të gjitha vendet që duhet të vizitohen për një ditë në Tiranë, së bashku me këshilla për ta bërë udhëtimin më të paharrueshëm.

Reportazhi i plotë i DW Travel:

Mirë se vini në Tiranë, kryeqytetin e Shqipërisë. Është një qytet me kontraste midis të kaluarës komuniste dhe modernizmit, betonit dhe hapësirës së gjelbër, traditës dhe modës. Vetëm pak vite më parë, konsiderohej një destinacion për vizitorët vendas në Ballkan.

Tani është një nga destinacionet kryesore të Evropës. Jam këtu për t’u zhytur në historinë e Tiranës, përfshirë disa nga vendet e saj më të errëta dhe të fshehura. Dhe dua të zbuloj pse udhëtarët e duan qytetin. Dhe çfarë duhet të bëni patjetër vetëm në një ditë.

Ku ndodhet Tirana?

Shqipëria ndodhet në Evropën Juglindore, në brigjet e Adriatikut dhe Jonit. Tirana në qendër ka rreth 400 000 banorë.

Sheshi Skënderbej

Unë filloj nga sheshi Skënderbej. Është shumë mirë herët në mëngjes, pa turma. Këtë e quaj shesh unë! Princi Skënderbeu është një hero kombëtar dhe një simbol i pavarësisë së Shqipërisë. Ai udhëhoqi një rezistencë kundër osmanëve në shekullin XV. Ka shumë gjëra për të parë pranë sheshit. Por, një nga më të rëndësishmet, Muzeu Historik Kombëtar, është i mbyllur deri në vitin 2028. Tirana është më mirë të eksplorohet në këmbë. Shumica e gjërave për të parë janë në qendër.

Tregu i Pazarit të Ri

Destinacioni im i radhës është tregu i ri i Pazarit të Ri. Këtu mund të blini suvenire tipike, nga tradicionalet deri tek të veçantat: si magnete me ish-diktatorin e Shqipërisë, Enver Hoxha. Vendasit gjithashtu blejnë këtu. Unë zgjedh një suvenir të ëmbël: mjaltë shqiptar. Ky është vërtet i mirë. Më vjen keq. Ka shumë kafene dhe restorante përreth tregut. Provoj një specialitet shqiptar: byrek, brumë filo krokante me mbushje të ndryshme. Po ha kombinimin klasik të spinaqit dhe djathit. Ky është ushqimi më i mirë shqiptar që shërbehet në rrugë. Kushton 80 lekë, pak më pak se një euro.

Muzeu Bunk’art

Dua të mësoj më shumë rreth historisë së Shqipërisë. Vendi ishte nën sundimin komunist nga viti 1947 deri në vitin 1991, i udhëhequr nga diktatori Enver Hoxha deri në vdekjen e tij në vitin 1985. Vizitoj një muze në një ish-bunker bërthamor në periferi të qytetit. Enver Hoxha ndërtoi shumë e shumë nga këto bunkerë në komunizëm. Dhe deri më sot Shqipëria është vendi me më shumë bunkerë në botë. Ky ka 106 dhoma, kështu që kam kureshtje ta shoh. Dyert e hyrjes janë bërë prej katër tonësh betoni të përforcuar dhe janë projektuar për t’i bërë ballë sulmeve të rënda. Kompleksi ishte selia nëntokësore e Shtabit të Përgjithshëm të Shqipërisë gjatë Luftës së Ftohtë. Muzeu i ҁon vizitorët nëpër dhomat origjinale, përfshirë atë të Hoxhës, me ekspozita historike dhe instalime multimediale. Paranojak për sulmet nga Blloku Perëndimor dhe Lindor, diktatori shpesh e izolonte Shqipërinë. Muzeu sjell atmosferën shtypëse të epokës.

Teleferiku Dajti Ekspres

Pas bunkerit të errët, kam nevojë për pak ajër të pastër dhe një ndryshim peizazhi. Stacioni i teleferikut ishte vetëm pesë minuta larg në këmbë. Tani le të shohim se çfarë lloj pamjesh mund të kemi. Dajti Ekspres ju çon në mbi 1 000 metra në 15 minuta. Një udhëtim vajtje-ardhje kushton 1 500 lekë. Kjo është rreth 15 euro.

Mali Dajti

Mali Dajti është një park kombëtar. Mund të ngjiteni në këmbë deri në majë ose thjesht të shijoni pamjen. Pak e mjegullt, por a nuk është romantike?
Shtëpia e Gjetheve

Pas pushimit tim, kthehem në qendër, në “Shtëpinë e Gjetheve”, ish-selinë e Shërbimit Sekret komunist.

Drejtoresha Etleva Demollari ndihmoi në ngritjen e muzeut. Tregohet se si regjimi i shtypte dhe monitoronte njerëzit. Ata hynin në shtëpitë e njerëzve. Për shembull, ata shihnin që kishe një lloj sendi në shtëpinë tënde. Ata vinin kur nuk ishe në shtëpi. Dhe e shkëmbenin me një tjetër me “ҁimkë” (përgjues). Dhe ktheheshin pas tre ditësh, sepse bateria zgjaste tre ditë. Kështu, që ata vinin pas tre ditësh dhe e merrnin përsëri.

“Ҁimkat” janë pajisje të vogla dëgjimi të fshehura mirë. Ato ishin futur në mure, telefona ose mobilie për të regjistruar biseda fshehurazi.

Janë disa dhoma në të cilat janë instaluar “çimka” përgjimi. Është po ashtu një dhomë e veçantë, ajo me numër 27. Nëse kishte vizitorë, përmes çimkave përgjoheshin se çfarë ata flisnin. Dhe, nëse shkojmë në dhomën me numër 27, mund të dëgjojmë se çfarë po thonë vizitorët e tjerë.

Ekspozita përmban informacion lidhur me persekutimin dhe burgosjen e mijëra njerëzve gjatë diktaturës komuniste. Koleksioni i pajisjeve dhe dokumenteve të saj pasqyrojnë mënyrën se policia sekrete “Sigurimi” punonte dhe funksiononte në zyrat e saj.

Ajo që më bën vërtet përshtypje është se këtu mund të shikoni të gjitha aspektet e përgjimit dhe si kanë funksionuar. Për shembull, kjo dhomë është vendi ku mblidhej dhe kontrollohej posta. Ata përdornin pajisje me avull për hapjen fshehtas të zarfave dhe pastaj përdornin ndriçim me rreze ultraviolet për të kontrolluar nëse njerëzit kishin përdorur bojë sekrete për mesazhe të fshehta.

Kjo ekspozitë e bën represionin e epokës komuniste vërtet të prekshëm. Është e frikshme të shikosh se sa pak privatësi gëzonin njerëzit dhe sa i përhapur ishte përgjimi ndaj tyre.
Është koha për të parë Tiranën moderne. Për këtë bëhem pjesë e një turi të shoqëruar me udhërrëfyes.

“Mirë se vini në Tiranë. Unë jam Erindi. Jam rritur në këtë qytet dhe, të themi, unë do të jem udhërrëfyesi juaj për sot. Bashkë do të zbulojmë disa prej atraksioneve kryesore të Tiranës, skenën e artit të rrugës dhe arkitekturën moderne të qytetit.

Ndërtesa të reja futuriste janë ngritur gjatë viteve të fundit. Kjo godinë mbresëlënëse në sheshin “Skënderbej” është frymëzuar nga heroi kombëtar, Skënderbeu.

“Është një projekt abstrakt me disa detaje që e bëjnë të ketë pamjen e një busti, apo koke. Mund të shikoni me sytë tuaj formën e hundës së dalë nga fasada e ndërtesës. Janë plot katër kate të saj që formojnë hundën, veshët në të dyja anët dhe pjesën e fytyrës. Gjysma e fytyrës është e harkuar në anën e djathtë, ndërsa gjysma tjetër është e sheshtë. Por do të thosha që është vërtet mbresëlënëse që njerëzit mund të mos dallojnë një fytyrë, mund të mos shohin një njeri aty, por mund të thuhet se gjithësesi dallohet forma e një koke”.
Që prej viteve 2000, arti i rrugës është në zhvillim të vazhdueshëm. Erindi na prezanton disa pikturave murale, që shpesh janë pasqyrim i ndryshimeve shoqërore dhe i banorëve të qytetit. Gjendet po ashtu sinjalistikë rrugore e riprojektuar në mënyrë krijuese, që është diçka e pamendueshme në disa vende të tjera.

A s’është problem kjo gjë me sinjalistikën? Pyes sepse nëse kjo do të ndodhte në Gjermani, bashkia s’do të pranonte kishte imazhe të tilla në tabelat e sinjalistikës rrugore?

-Nuk do të pranonte? Sigurisht, këto imazhe janë krijuar me një lejë përkatëse. Do të thosha se kjo është po ashtu gjithçka që ata mund të kenë nevojë të ndryshojnë që ne të bëhemi anëtarë të Bashkimit Evropian. Nuk e di. Do ta shohim këtë.

Shqipëria është vend kandidat për t’u anëtarësuar në BE që prej vitit 2014. Tani do të shkojmë në lagjen trendi të Tiranën.

“Tani gjendem te Blloku. Dikur ishte lagjja vetëm për elitën e regjimit diktatorial, por ku sot mund të shkojë kushdo dhe është një nga pjesët më të gjalla të Tiranës”.

Stomaku ka filluar të më gërryejë. Në “Bllok” gjen një koleksion të gjerë restorantesh. Por m’u desh pak kohë të gjeja një restorant me kuzhinë shqiptare.

“Po provoj një nga gatimet më të famshme shqiptare; fërgesa. Është gatim tradicional i Tiranës, i përgatitur me domate, speca të kuq, salcë kosi dhe, nganjëherë, me mish, por mund të jetë edhe gatim tërësisht vegjetarian”.
Kremoze dhe paksa djegëse. Më pëlqen.

Pikën kulmore të vizitës në Tiranë e kisha lënë për perëndimin e diellit: Piramida e Tiranës. E ndërtuar në vitin 1988 si muze për diktatorin Enver Hoxha, sot Piramida është qendër e inovacionit dhe kreativitetit. Pamja nga këtu pasqyron harmoninë mes të kaluarës dhe së tashmes së Tiranës.

Mendoj se Tirana është mjaftueshëm e madhe për t’u vizituar brenda një dite. Në këtë program ju kam treguar disa prej aspekteve të saj kryesore, nga historia e pasur te pjesa e saj moderne. Si gjithmonë, ka edhe shumë gjëra të tjera për t’u parë. Po ju? A do të dëshironit ta eksploronit vetë Tiranën?

/u.sh/p.s/k.s/a.f/

The post DW Travel reportazh: Tirana, nga reliket komuniste në një nga destinacionet kryesore të Evropës appeared first on Agjencia Telegrafike Shqiptare.

TIRANË, 6 gusht/ATSH/ Në kantierin e Ujërave Termale të Bënjës në Përmet vijojnë punimet për përmirësimin e shërbimeve, peizazhit turistik dhe ndërhyrjeve rikualifikuese për të krijuar një atraksion të zhvillimit të qëndrueshëm.

Ministrja e Turizmit dhe Mjedisit Mirela Kumbaro, inspektoi nga afër punimet shoqëruar nga përfaqësues të Fondit Shqiptar të Zhvillimit, kryetarët e bashkive Përmet e Këlcyrë, drejtuesja e Agjencisë Kombëtare të Zonave të Mbrojtura, Daniel Pirushi dhe ajo e Zyrës së Administrimit të Parkut Kombëtar Lumi Vjosa.

“Me Fondin Shqiptar të Zhvillimit kemi nisur investimin e një kantieri rikualifikimi të të gjithë zonës si nevojë për të ndërhyrë në radhë të parë për të orientuar flukset, si të makinave që grumbullohen në hyrje të kësaj zone natyrore dhe turistike si dhe për të organizuar gjithë hapësirën, duke ofruar dhe shërbime. Këtu kemi mungesë totale të ujit dhe energjisë elektrike. Me këtë investim të qeverisë shqiptare, do ta kthejmë në një atraksion të zhvillimit të qëndrueshëm, sepse jemi në zonë të mbrojtur dhe duhet të jemi shumë të kujdesshëm që të mos kemi ndërhyrje të rënda”, tha Kumbaro.

Ky projekt është i ndarë në disa zona të cilat përfshijnë hapësirën e parkimit, atë të kamperave, hapësira për piknik, një zonë dedikuar shitjes së produkteve lokale dhe artizanale, zona e vaskave, një amfiteatër i konceptuar për aktivitete, si dhe një zonë shërbimesh ku do të ketë edhe dushe e dhoma zhveshjeje.

Kumbaro kërkoi një bashkëpunim të ngushtë mes bashkisë Përmet dhe Agjencisë Kombëtare të Zonave të Mbrojtura për një menaxhim të suksesshëm të këtij atraksioni.

“Na duhet bashkëpunim me bashkinë për të gjetur një model të mirë të menaxhimit, me qëllim që të ruhet standardi, pastërtia dhe gjithë ky investim të mos degjenerohet. Kjo është arsyeja pse jemi të gjithë sot, bashkë me zyrën e administrimit të Parkut Kombëtar të Vjosës, Agjencinë Kombëtare të Zonave të Mbrojtura dhe bashkitë Këlcyrë e Përmet që në hartën e tyre turistike e kanë një ndër stacionet më të preferuara këtë zonë”, tha Kumbaro.

Ky investim parashikohet të përfundojë në muajin mars të vitit 2026.

Ujërat Termale të Bënjës në Përmet konsiderohen si më të mirat në Evropë. Burimet e ujërave termale të Bënjës, apo siç quhen ndryshe Banjat e Bënjës, gjenden 14 kilometra larg qytetit jugor të Përmetit në komunën Petran, vetëm 3 kilometra larg nga vendi ku lumi Vjosa bashkohet me përroin e Lëngaricës. E veçanta e tyre është se këto janë burime të hapura në natyrë. Temperatura e këtyre ujërave është, 26- 32°C.

Ky vend i rrethuar nga një natyrë e paprekur, paraqet një përzierje unike midis historisë aventurës dhe natyrës.

1 nga 3

/k.s//a.f/

The post Kumbaro: Rikualifikimi i Ujërave Termale të Bënjës, duke ruajtur rregullat e një zone të mbrojtur appeared first on Agjencia Telegrafike Shqiptare.