TIRANË, 5 gusht /ATSH/ Partizani ka rikthyer në ekip sulmuesin Victor Da Silva.

Sulmuesi brazilian, i cili fitoi titullin me “demat” dy vite më parë, ka vendosur të rikthehet te kryeqytetasit.

Klubi i Partizanit ka njoftuar se palët kanë firmosur kontratë për një vit, me mundësi rinovimi për një tjetër sezon.

Da Silva është bashkuar menjëherë me ekipin në stërvitje, për të qenë gati për sezonin e ri. Braziliani e njeh mirë kampionatin, pasi përveç Partizanit ka luajtur edhe me Vllazninë e Bylisin.

“FK Partizani ka kënaqësinë të njoftojë rikthimin e Victor Da Silva në familjen e kuqe.

Pas aventurës së suksesshme në sezonin 2022-2023, ku kontribuoi në fitimin e titullit të 17-të kampion të Shqipërisë, sulmuesi brazilian riveshë fanellën e kuqe.

Da Silva ka nënshkruar një kontratë 1+1 dhe sot i është bashkuar grupit në seancën e radhës stërvitore”, thuhet në njoftimin e klubit.

/gj.m//a.f/

The post Partizani përforcon sulmin, rikthen brazilianin Da Silva appeared first on Agjencia Telegrafike Shqiptare.

SHKUP, 5 gusht /ATSH-MIA/ – Nuk është sportive të keqpërdoret fusha e sportit për “trajnim” të fjalisë së urrejtjes, ofendimit dhe satanizimit me fjalë helmuese dhe vrasëse, deklaroi presidentja e Maqedonisë së Veriut, Gordana Siljanovska-Davkova pas brohoritjeve fyese kundër shqiptarëve në ndeshjen e basketbollit mes MV dhe Rumanisë.

”Pas aq humbjeve njerëzore në fushat sportive, duhet të themi qartë dhe zëshëm: Asnjëherë më, kudo që të jemi, me cilindo që garojmë, nuk do të lejojmë që fusha e sportit të shndërrohet në arenë gladiatorësh”, theksoi ajo.

“Për shkak të analfabetizmit tonë sportiv disa tifozë të pandërgjegjshëm kanë  shprehur urrejtje jo vetëm ndaj bashkëqytetarëve tanë shqiptarët, por ndaj të gjithëve, madje ndihemi të turpëruar”, thekson presidentja.

Në postim presidentja Davkova thekson se nuk e kemi nxjerrë mësimin pas ndeshjes midis Shkëndisë dhe kampionit të Uellsit TNS, të luajtur në mes të korrikut.

“Nga mesi i korrikut, në ndeshjen midis Shkëndisë dhe kampionit të Uellsit TNS, me fyerjet raciste ndaj futbollistit Aramide Ote, ne shokuam tërë botën sportive, por edhe më gjerë, e cila me të drejtë pyeti: Si është e mundur që një tifoz i pandërgjegjshëm ta thyejë emocionalisht një lojtar të nivelit të lartë futbolli deri në lot, duke përdorur gjuhë urrejtjeje mbi baza racore? Turpi ra mbi të gjithë, organizatorin, klubin, pjesëmarrësit, qytetin, vendin dhe sportin!, shkroi presidentja në rrjetin social Facebook./ /os/

The post MV – Davkova: Nuk është sportive të keqpërdoret fusha e sportit për urrejtje racore dhe ofendime appeared first on Agjencia Telegrafike Shqiptare.

TIRANË, 5 gusht/ATSH/ Qendrat shëndetësore verore të hapura në zonat turistike të vendit vijojnë të ofrojnë kujdes shëndetësor cilësor për pushuesit dhe turistët.

Një ndër këto qendra është edhe ajo në Tamarë të Shkodrës, ku mjekët dhe infermierët ofrojnë ndihmën e parë dhe këshilla shëndetësore për të gjithë ata që kanë nevojë.

Në një postim në rrjetet sociale Agjencia për Median dhe Informacionin (MIA), bën të ditur se “kjo qendër është e hapur 24/7 për të garantuar kujdesin shëndetësor gjatë gjithë sezonit turistik”.

Stafi mjekësor i qendrës është i pranishëm çdo ditë për të ofruar ndihmën e nevojshme për banorët dhe turistët.

Esmerina Zekaj, infermiere në këtë qendër tha se “rritja e temperaturave ka bërë që fluksi të jetë mjaft i madh, pacientët vijnë për matjen e tensionit arterial, si dhe parametrave vitalë dhe për çdo shërbim që ata kanë nevojë”.

Gjatë sezonit turistik veror janë në funksion të plotë 36 qendra shëndetësore në të gjithë vendin, nga veriu në jug. Ato garantojnë shërbim mjekësor 24 orë në ditë, 7 ditë në javë, për të gjithë pushuesit, vendas apo të huaj.

/k.s//a.f/

The post Qendra Shëndetësore Verore në Tamarë garanton kujdes shëndetësor 24 orë në 7 ditë të javës appeared first on Agjencia Telegrafike Shqiptare.

TIRANË, 5 gusht /ATSH/ Një investim strategjik për modernizimin e infrastrukturës hekurudhore shqiptare po bëhet realitet falë mbështetjes së Banka Evropiane për Rindërtim dhe Zhvillim (BERZH), Bashkimit Evropian (BE) dhe Bankës Evropiane të Investimeve (BEI).

Projekti përfshin rindërtimin dhe elektrifikimin e linjës hekurudhore Durrës–Rrogozhinë, një segment i rëndësishëm i Korridorit VIII Panevropian.

BERZH në një njoftim për shtyp bën të ditur se, ka miratuar një kredi sovrane prej 30 milionë euro për kompaninë shtetërore Hekurudha Shqiptare, duke plotësuar një kredi tjetër prej 30 milionë euro nga BEI dhe 60 milionë euro në formë grantesh dhe asistence teknike nga BE përmes Kornizës së Investimeve në Ballkanin Perëndimor.

Projekti përfshin: Rindërtimi dhe elektrifikimi i rreth 34 kilometrave hekurudhë; Përmirësimi i infrastrukturës së stacioneve; Rritje e efikasitetit dhe sigurisë në transport; dhe Zhvillimin e një lidhjeje të parë hekurudhore të Shqipërisë me Maqedoninë e Veriut

Ky projekt pritet të sjellë përfitime të rëndësishme ekonomike, mjedisore dhe sociale, duke zhvendosur trafikun nga rruga në hekurudhë, duke reduktuar ndjeshëm emetimet e karbonit, dhe duke përmirësuar lëvizshmërinë rajonale dhe ndërkufitare.

Petrit Malaj, ministër i Financave tha se, “Ky projekt shënon një moment historik transformues për infrastrukturën tonë. Ai do të luajë një rol jetësor në integrimin afatgjatë të Shqipërisë në rrjetin evropian të transportit.”

Ndërsa Donald Mishaxhiu, drejtues rajonal i BERZH-it për Ballkanin Perëndimor, deklaroi se, “Ky investim pasqyron mbështetjen tonë të vazhdueshme për transformimin hekurudhor të Shqipërisë. Së bashku me partnerët tanë, ne po ndihmojmë në ndërtimin e një rrjeti modern, të qëndrueshëm dhe të lidhur transporti që do t’u sjellë dobi brezave të ardhshëm”.

Ky projekt vjen në vazhdën e angazhimit të BERZH-it për Shqipërinë, pas investimeve të mëparshme në linjat Tiranë–Durrës dhe Vorë–Hani i Hotit, dhe është plotësisht në përputhje me Planin Ekonomik dhe të Investimeve të BE-së për Ballkanin Perëndimor dhe objektivat e Tranzicionit të Gjelbër të BERZH-it.

/a.f/

The post BERZH 30 milionë euro për modernizimin e linjës hekurudhore Durrës–Rrogozhinë appeared first on Agjencia Telegrafike Shqiptare.

TIRANË, 5 gusht/ATSH/ Më 5 gusht 1943, nisi Lufta e Konispolit, e hyrë në histori si përballja më e gjatë ndaj ushtrisë naziste në Ballkan.

Nga datat 5 gusht deri më 28 shtator 1943 u zhvillua Lufta e Konispolit, një betejë e cila zgjati për 55 ditë dhe ishte luftimi i parë në vendin tonë në kufirin shtetëror me Greqinë kundër batalioneve gjermane. Këto luftime kanë hyrë në histori si luftimet më të gjata në kohë të rezistencës shqiptare.

Komanda gjermane kishte si qëllim të vinte nën kontroll bregdetin Jonian nga Gjiri i Artës deri në Konispol. Rezistenca u udhëhoq nga Batalioni “Çamëria” i ndihmuar edhe nga forca vullnetare të zonës.

Luftime të gjata pati gjatë rrugës automobilistike Skalomë – Konispol dhe në drejtimin Lopës – Qafa e Likojanit.

Në fund të këtyre luftimeve gjermanët arritën të pushtonin Konispolin dhe të lironin rrugët për lëvizjen e lirshme të ushtrisë gjermane në territorin e Ballkanit dhe konkretisht drejt Greqisë.

/a.f/

The post Lufta e Konispolit, beteja më e gjatë në Ballkan kundër pushtuesve nazistë appeared first on Agjencia Telegrafike Shqiptare.

PRISHTINË, 5 gusht/ATSH/ Kryeministri në detyrë, Albin Kurti, u ka uruar mirëseardhje e diasporës në Kosovë.

Përmes një postimi në Facebook Kurti tha se bashkatdhetarët në mërgim vizitojnë vendin si mysafirë dhe si partnerë të zhvillimit të së ardhmes.

“Ne kemi gjithmonë nevojë për bashkatdhetarët tanë, mërgatën tonë, si mysafirë që na vizitojnë për t’u çmallur, e si partnerë të zhvillimit dhe bashkëkrijues të së ardhmes tonë. Nuk flasim më për “trurin që ikën”, por për zemrën që nuk harron: sepse ata që kanë ndërtuar jetë jashtë vendit, ruajnë mallin, mbajnë lidhjet dhe bartin përgjegjësinë ndaj atdheut tonë të përbashkët. Secili mund të jetë përkohësisht jashtë atdheut, por gjithsecili është përjetësisht brenda kombit”, ka shkruar ai.

Në fund Kurti tha se Kosova është me fat që ka mërgimtarët.

/kosovapress/

The post Kurti pret diasporën: Nuk flasim më për “trurin që ikën”, por për zemrën që nuk harron appeared first on Agjencia Telegrafike Shqiptare.

TIRANË, 5 gusht/ATSH/ Si rezultat i shtimit të kontrolleve të territorit me dron, të cilat kanë objektiv parandalimin dhe goditjen e veprimtarisë kriminale të kultivimit të bimëve narkotike, Komisariati i Policisë Gjirokastër evidentoi një rast në fshatin Lazarat.

Për këtë rast u vu në pranga shtetasi Xh. Ç., 55 vjeç, pasi dyshohet se kishte kultivuar disa bimë narkotike Cannabis Sativa, në oborrin e banesës së tij.

Policia sekuestroi me cilësinë e provës materiale një pjesë të vogël të bimëve, ndërsa asgjësoi me djegie pjesën tjetër.

Kontrollet në kuadër të planit operacional “Koordinata” po vijojnë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

/m.m//a.f/

The post Kultivim i lëndëve narkotike, arrestohet 55-vjeçari në Lazarat appeared first on Agjencia Telegrafike Shqiptare.

PRISHTINË, 5 gusht/ATSH/ Ministri në detyrë i Punëve të Brendshme, Xhelal Sveçla ka reaguar pas arrestimit të një zyrtari të lartë të Policisë së Kosovës duke thënë se “nuk ka vend për kriminelë në radhët e Policisë”.

Ai ka shkruar në Facebook se e mbështet Inspektoratin që radhët e Policisë, sipas tij, “të pastrohen nga elementë të tillë që njollosin emrin e institucionit më kredibil dhe me besueshmërinë më të madhe në vend”.

“Përgëzoj Inspektoratin Policor të Kosovës për aksionin e djeshëm, ku u arrestuan katër qytetarë, ndër ta edhe një zyrtar i lartë i Policisë së Kosovës. Krimi nuk ka vend në shoqërinë tonë, e posaçërisht nuk ka vend për kriminelë në radhët e Policisë. Mbështes dhe njëkohësisht insistoj në veprime edhe më të vendosura të Inspektoratit, që radhët e Policisë të pastrohen nga elementë të tillë që njollosin emrin e institucionit më kredibil dhe me besueshmërinë më të madhe në vend”, ka shkruar Sveçla.

Prokuroria Themelore në Prizren, në bashkëpunim të ngushtë me Inspektoratin Policor të Kosovës, ka realizuar të hënën një aksion të koordinuar, i cili ka rezultuar me bastisjen e katër lokacioneve dhe arrestimin e katër personave të dyshuar.

Sipas një komunikate të përbashkët të të dy institucioneve, ndër të arrestuarit është edhe një zyrtar i lartë policor me gradën kolonel, ndaj të cilit ekziston dyshimi i arsyeshëm për përfshirje në veprat penale të detyrimit dhe shmangies nga tatimi, sipas dispozitave të Kodit Penal të Republikës së Kosovës.

“Ky aksion është rezultat i një hetimi disa mujor, i zhvilluar me profesionalizëm dhe përkushtim nga hetuesit e IPK-së, në bashkëpunim të plotë me Prokurorinë Themelore në Prizren. Aktualisht, hetuesit e IPK-së, në koordinim me Prokurorinë, janë duke vazhduar me veprime të tjera hetimore në terren, me qëllim të zbardhjes së plotë të çështjes dhe grumbullimit të provave relevante. Në kuadër të procedurës administrative, IPK ka rekomanduar suspendimin e kolonelit policor, deri në përfundimin e hetimeve”, u tha në njoftimin e së hënës.

/Kosovapress/

The post Sveçla: Nuk ka vend për kriminelë në radhët e Policisë së Kosovës appeared first on Agjencia Telegrafike Shqiptare.

AMSTERDAM, 5 gusht /ATSH-DPA/ – Holanda njoftoi se do të bëhej vendi i parë i NATO-s që do të blinte sisteme të mbrojtjes ajrore amerikane për t’i dërguar Ukrainës.

“Ukrainës i duhen më shumë mbrojtje ajrore dhe municione tani”, theksoi ministri holandez i Mbrojtjes, Ruben Brekelmans në një postim në X.

“Si aleate e NATO-s, Holanda do të ofrojë një paketë sistemesh armësh amerikane, duke përfshirë komponentë dhe raketa ‘Patriot’ me vlerë 500 milionë euro. Kjo do ta ndihmojë Ukrainën të mbrojë veten dhe pjesën tjetër të Evropës nga agresioni rus”, shkroi ai.

Në korrik, presidenti i SHBA-së Donald Trump njoftoi se do të autorizonte shitjen e sistemeve të mbrojtjes raketore ”Patriot”, të prodhuara në SHBA, vendeve evropiane të NATO-s, të cilat nga ana tjetër do t’i furnizonin ato Ukrainës.

“Holanda është vendi i parë që ndjek marrëveshjen e armëve NATO-SHBA, e cila përfshin blerjen e sistemeve amerikane të mbrojtjes ajrore për Ukrainën”, shkroi kryeministri Dick Schoof në X.

“Këto armë janë absolutisht të nevojshme. Ukraina vazhdon të luftojë çdo ditë për të mbrojtur veten nga agresioni rus, siç janë sulmet me dronë në shkallë të gjerë. Duke vepruar kështu, Ukraina po lufton gjithashtu për liri dhe siguri në Evropë”, shtoi ai.

Presidenti ukrainas Volodymyr Zelensky, i cili foli në telefon me Schoof  tha se ishte “sinqerisht mirënjohës ndaj Holandës për kontributin e tyre të konsiderueshëm në forcimin e sistemit të mbrojtjes ajrore të Ukrainës”./  /os/

The post AMSTERDAM – Holanda i dorëzon Kievit armatime me vlerë 500 milionë euro appeared first on Agjencia Telegrafike Shqiptare.

TIRANË, 5 gusht/ATSH/ Lumi i Kirit dhe kanionet e Prekalit në Shkodër janë kthyer ndër destinacionet më të vizituara nga turistët vendas e të huaj.

Kryeministri Edi Rama ndau sot në rrjetet sociale pamje nga kanionet e Prekalit dhe Urës së Shtrenjtë, me ftesën për ta vizituar.

“Një copëz magjie në zemër të Shkodrës turistike. Prekal dhe Ura e Shtrenjtë”, shkruan Rama.

Ujë i kristaltë, vaskat, kanioni, pastërtia, qetësia dhe ajri i freskët i maleve përreth është ajo që të ofron Lugina e Kirit.

Çdo fundjavë kur moti është i ngrohtë, qytetarët shkodranë, turistë të huaj dhe banorë të fshatrave rreth rrjedhës së lumit, frekuentojnë këto brigje për banjo dielli, larje në ujërat e freskët, por dhe për sportet ujore.

Ura e Shtrenjtë mbi lumin Kir lidh Shkodrën me Prekalin. Kanionet gëlqerore të formuara nga veprimtaria erozive e lumit të Kirit ofrojnë një pamje magjepsëse për çdo vizitor që zgjedh të vizitojë zonën.

1 nga 5

/m.m//a.f/

The post Kanionet e Prekalit, Rama: Një copëz magjie në zemër të Shkodrës turistike appeared first on Agjencia Telegrafike Shqiptare.

TIRANË, 5 gusht /ATSH/ Sulmuesi i Kombëtares shqiptare, Mirlind Daku po kalon një formë të shkëlqyer në fillimin e sezonit të ri në kampionatin rus.

Ai ishte protagonist absolut në fitoren e Rubin Kazan ndaj Sochi, duke shënuar dy gola dhe duke i dhënë skuadrës së tij tri pikë të vlefshme.

Ndeshja përfundoi me rezultatin 2-1 në favor të Rubin Kazan, me Dakun që realizoi fillimisht nga pika e bardhë në minutën e 12-të, për të zhbllokuar sfidën me një penallti që u fitua nga vetë ai.

Në pjesën e dytë Daku vulosi fitoren në minutën e 78-të, me një finalizim që është për t’u parë disa herë.

27-vjeçari nga Gjilani kontrolloi bukur një pasim të gjatë dhe me finesë ia hodhi portierit topin me parabol, teksa sfera fundin e udhës e kishte në rrjetë.

Me këtë dopietë, e para e tij për këtë sezon, Daku shkon në kuotën e 4 golave në katër ndeshje dhe është kthyer në një nga emrat më të spikatur të kampionatit në këto javët e para.

E nisëm mirë ndeshjen, por më pas Sochi u përmirësua. Gjatë pushimit, thamë se nuk mund ta humbisnim përqendrimin dhe se duhej të shënonim një gol tjetër. Megjithatë, ata arritën ta ngushtonin diferencën dhe ndeshja ishte e tensionuar deri në fund.

Kur shënova golin e parë, përshëndeta Oleg Ivanovin, tregova se ia dedikoja atij për ditëlindje. Fatkeqësisht, nuk pata kohë të blija një dhuratë, por ndoshta nuk ishte e nevojshme, sepse loja jonë në fakt u bë një dhuratë”, tha Daku pas sfidës.

Jehonë golit të Dakut i ka bërë edhe ministri i Shtetit për Marrëdhëniet me Parlamentin, Taulant Balla i cili ka ndarë videon e golit të sulmuesit shqiptar.

“Shqiponja Mirlind Daku po fluturon lart. Katër gola në tre ndeshje. Ndiqeni çfarë kontrolli topi dhe çfarë realizim”, shkruan Daku.

/gj.m//a.f/

The post Daku shkëlqen në Rusi, 4 gola në 3 ndeshje appeared first on Agjencia Telegrafike Shqiptare.

TIRANË, 5 gusht /ATSH/ Kryeministri Edi Rama ka publikuar sot në rrjetet sociale pamje mahnitëse nga natyra shqiptare, duke sjellë në vëmendje bukuritë e rralla të parqeve kombëtare të vendit.

Në postimin e tij, Rama ndau një kolazh me pamje të kaprojve në habitatin e tyre natyror, të cilat i cilësoi si një “kartolinë pamjesh” nga thesaret natyrore të Shqipërisë.

“Kartolinë pamjesh të kaprojve nga parqet tona kombëtare”, shkruan Rama, duke evidentuar rëndësinë e ruajtjes së biodiversitetit dhe pasurive natyrore që ofrojnë parqet e mbrojtura.

Shqipëria zotëron një rrjet të gjerë parqesh kombëtare, 12 të tilla, tt cilat janë kthyer në destinacione tërheqëse për turistët vendas dhe të huaj, falë natyrës së paprekur dhe faunës së pasur që ato ofrojnë.

/a.f/

The post Rama: Kartolinë pamjesh të kaprojve nga parqet tona kombëtare appeared first on Agjencia Telegrafike Shqiptare.

TIRANË, 5 gusht/ATSH/ Fshati Zogaj, i ndodhur 3-4 km përtej Shirokës këtë sezon turistik veror po vizitohet nga turistë të shumtë.

Ministrja e Turizmit dhe Mjedisit, Mirela Kumbaro ndau sot në rrjetet sociale pamje nga Zogaj, duke e cilësuar një fshat, plot thesare turistike.

Zogaj këtë vit është në listën e 6 fshatrave që përfaqësojnë Shqipërinë në aplikimin për “Fshatrat më të mirë turistikë” të Organizatës Botërore të Turizmit.

Zogaj gjendet 3-4 km përtej Shirokës dhe është i njohur për peshkimin, bimët mjekësore e klimën alpine. Ai kufizohet nga veriu me liqenin e Shkodrës, nga jugu me malin e Taraboshit, nga lindja me lumin Buna dhe nga perëndimi me kufirin shtetëror me Malin e Zi.

Ky fshat kufizohet nga veriu me liqenin e Shkodrës, nga jugu me malin e Taraboshit, nga lindja me lumin Buna dhe nga perëndimi me kufirin shtetëror me Malin e Zi.

Zogaj është i njohur si një fshat i vjetër peshkimi dhe së bashku me Shirokën janë ndër zonat më të bukura të Shqipërisë së Veriut.

/k.s//a.f/

The post Kumbaro: Zogaj, fshati plot thesare turistike appeared first on Agjencia Telegrafike Shqiptare.

TIRANË, 5 gusht /ATSH/ Ministria e Bujqësisë dhe Zhvillimit Rural, nëpërmjet Agjencisë për Zhvillimin Bujqësor dhe Rural (AZHBR), ka hapur aplikimet për Skemën Kombëtare të Investimeve 2025, e cila ofron mbështetje financiare deri në 50% grant për ndërtimin e serrave diellore të reja.

Skema synon të nxisë prodhimin bujqësor të qëndrueshëm dhe të rrisë konkurrueshmërinë në tregun vendas dhe ndërkombëtar. Mbështetja financiare për ndërtimin e serrave varion sipas llojit të kulturës.

Sipas AZHBR-së, Skema Kombëtare e Investimeve 2025, ofron për fermerët deri në 15 milionë lekë/ha për serrat e prodhimit të perimeve; Deri në 8 milionë lekë/ha për prodhimin e rrushit për tavolinë dhe deri në 4 milionë lekë/ha për prodhimin e luleshtrydheve.

Këto grante përfshijnë gjithashtu investime në sisteme moderne ujitjeje, duke synuar efikasitet më të lartë në përdorimin e ujit dhe prodhim më cilësor.

Përveç grantit, aplikantët mund të përfitojnë edhe nga Kredia e Butë, me interes vetëm 2%, si dhe me garanci sovrane deri në 70% të kolateralit, duke mundësuar kështu financim të plotë për investimin.

Aplikimet janë të hapura deri më 30 shtator 2025 dhe përfshijnë gjithsej 9 masa mbështetëse për sektorin bujqësor.

/a.f/

The post Skema Investimeve, 50% grant për ndërtimin e serrave diellore të reja appeared first on Agjencia Telegrafike Shqiptare.

NJU JORK, 5 gusht /ATSH/ – Pas dekadash mosveprimi dhe negociatash të ngrira, çështja e një shteti të pavarur palestinez që jeton në paqe me Izraelin u rikthye në qendër të vëmendjes në një konferencë të nivelit të lartë të OKB-së, ndërkohë që Franca dhe Arabia Saudite, të cilat udhëhoqën përpjekjet, janë të vendosura të ruajnë vrullin, sipas AP.

Por, pengesat për një zgjidhje me dy shtete që do ta shihte Izraelin të jetonte krah për krah me një Palestinë të pavarur janë shumë të larta.

Lufta në Gaza, pjesë thelbësore e një shteti palestinez, vazhdon me dhunë në rritje në Bregun Perëndimor. Kryeministri i Izraelit, Benjamin Netanyahu dhe qeveria e tij e krahut të djathtë kundërshtojnë me forcë një shtet të pavarur palestinez, të cilin udhëheqësi izraelit thotë se do të ishte një shpërblim për terrorizmin, pas sulmeve të Hamasit më 7 tetor 2023 kundër vendit të tij.

Megjithatë, pas tetë dekadash konflikti midis Izraelit dhe palestinezëve, presioni po rritet për një zgjidhje me dy shtete, siç demonstroi konferenca e nivelit të lartë të OKB-së javën e kaluar, e bashkëkryesuar nga Franca dhe Arabia Saudite, edhe pse u bojkotua nga Izraeli dhe aleati i tij i ngushtë, SHBA.

Konferenca ilustroi se shumë veta besojnë se një zgjidhje politike është e mundur.

Ambasadori francez në OKB, Jerome Bonnafont, pranoi në një intervistë për ”Associated Press” se pa një armëpushim në Gaza dhe ndihmë humanitare masive për mbi dy milionë palestinezë që po shkojnë drejt urisë, “do të jetë jashtëzakonisht e vështirë të ecet përpara për të përcaktuar një mënyrë të re të administrimit të Gazës si pjesë e Palestinës”.

Por, konferenca tregoi se shumica e 193 vendeve anëtare të OKB-së janë “të bindura se ekziston mundësia e një zgjidhjeje politike”, tha ai, dhe kjo është “ajo që ndjekja e saj do të vazhdojë të promovojë”.

Nga 160 vende që morën pjesë, 125 folën në mbështetje të një zgjidhjeje me dy shtete.

Një shtet i pavarur i Palestinës njihet nga mbi 145 vende dhe nga takimi dolën premtime të reja njohjeje nga tre nga shtatë anëtarët e G7-s, Franca, Mbretëria e Bashkuar dhe Kanadaja.

Një deklaratë nga shtatë vende të tjera, përfshirë Australinë, Zelandën e Re, Finlandën dhe Portugalinë, shprehu “konsideratë pozitive” për të ndjekur shembullin.

Ministri i Jashtëm francez Jean-Noel Barrot dhe ministri i Jashtëm saudit Princi Faisal bin Farham janë të vendosur të mos e lënë vëmendjen të zbehet.

Ata po planifikojnë “një ngjarje” gjatë takimit vjetor të liderëve botërorë në Asamblenë e Përgjithshme, e cila fillon më 23 shtator, kur premtimet e reja pritet të shpallen zyrtarisht.

Konferenca prodhoi edhe të ashtuquajturën “Deklarata e Nju Jorkut” me shtatë faqe.

Ministrat e Jashtëm francezë dhe sauditë ia dërguan deklaratën, me një aneks të gjatë rekomandimesh nga grupet e punës, të 193 anëtarëve të OKB-së dhe u kërkuan atyre ta miratonin atë deri në fillim të shtatorit, para mbledhjes së liderëve botërorë.

Deklarata, e cila u miratua gjithashtu nga Bashkimi Evropian dhe Liga Arabe, i kërkon Izraelit të angazhohet për një shtet palestinez dhe kërkon njohje të mëtejshme si “një komponent thelbësor dhe i domosdoshëm i arritjes së zgjidhjes me dy shtete”.

Për herë të parë, 22 vendet anëtare të Ligës Arabe dënuan “sulmet e kryera nga Hamasi kundër civilëve” në Izraelin jugor më 7 tetor dhe ranë dakord që “Hamasi duhet t’i japë fund sundimit të tij në Gaza dhe t’ia dorëzojë armët e tij Autoritetit Palestinez”.

Takimi u dha shteteve me peshë, përfshirë Francën, BM dhe Kanadanë, mundësinë “për të sinjalizuar pakënaqësinë e tyre me politikën izraelite./  a.jor.

The post KOMENT – Parisi dhe Riadi mbajnë premtimin për zgjidhjen me dy shtete të konfliktit Izrael-Palestinë appeared first on Agjencia Telegrafike Shqiptare.

TIRANË, 5 gusht/ATSH/ Procesi i punësimit nëpërmjet portaleve “Mjekë për Shqipërinë” dhe “Infermierë për Shqipërinë” vijojnë të garantojnë transparencë dhe meritokraci, duke forcuar çdo ditë sistemin shëndetësor me profesionistë të rinj dhe të përkushtuar.

Ministrja e Shëndetësisë dhe Mbrojtjes Sociale, Albana Koçiu tha sot se “nga janari deri në qershor, përmes portaleve “Mjekë për Shqipërinë” dhe “Infermierë për Shqipërinë”, janë rekrutuar: 643 teknikë të shkencave mjekësore, 167 mjekë dhe 8 psikologë”.

“Punësimi me meritë është garancia më e mirë për shërbime cilësore dhe besim më të madh te sistemi ynë shëndetësor publik”, tha Koçiu në një postim në rrjetet sociale.

Portali “Mjekë për Shqipërinë” dhe “Infermierë për Shqipërinë janë një hap i rëndësishëm për përmirësimin e shërbimeve shëndetësore në vend, duke garantuar që profesionistët e kualifikuar të kontribuojnë në kujdesin për pacientët.

Këto platforma garantojnë një proces rekrutimi të udhëhequr nga parimet e transparencës, meritës, profesionalizmit dhe barazisë në funksion të ofrimit të një shërbimi cilësor infermieror në të tre nivelet e kujdesit shëndetësor.

Procesi i testimit të kandidatëve është transparent në të gjitha fazat e tij, që nga regjistrimi, testimi, procesi i ankimimit, deri në shpalljen e listës përfundimtare të fituesve dhe përzgjedhjes së vendeve të reja të punës me bazë merite, në bazë të pikëve të marra nga secili kandidat nga të gjitha fazat e konkurrimit.

/k.s//a.f/

The post Koçiu: 643 teknikë të shkencave mjekësor dhe 167 mjekë u punësuan në janar-qershor appeared first on Agjencia Telegrafike Shqiptare.

TIRANË, 5 gusht/ATSH/ Të rinjtë shqiptarë kanë mundësinë të ndjekin arsim profesional me standarde ndërkombëtare përmes programit “VET by EHL”, një iniciativë që realizohet në partneritet me shkollën prestigjioze zvicerane EHL (Ecole hôtelière de Lausanne).

Programi ofron formim profesional në fushën e hoteleri-turizmit, me mësim të zhvilluar në gjuhën angleze dhe me fokus në përgatitjen praktike, sipas modelit zviceran të arsimit dual.

Studentët pajisen me aftësi të kërkuara nga tregu i punës, duke përfituar mundësi të shumta punësimi brenda dhe jashtë vendit.

Ministri i Ekonomisë, Kulturës dhe Inovacionit, Blendi Gonxhja bëri të ditur sot se të gjithë të interesuarit mund të regjistrohen dhe të bëhen pjesë e këtij programi që sjell një qasje moderne dhe të integruar në arsimin profesional në Shqipëri.

“Regjistrohu në arsim profesional në programin VET by EHL, në partneritet me shkollën zvicerane – EHL. Fito një profesion në hoteleri-turizëm me standarde ndërkombëtare, mësim në anglisht dhe plot mundësi punësimi”, theksoi ministri.

Mbi 60% e nxënësve të arsimit profesional punësohen në bankat e shkollave, qoftë gjatë vitit të tretë të studimeve apo brenda 6 muajve pas përfundimit të tyre, sipas të dhënave nga studimet dhe anketimet e realizuara nga Agjencia Kombëtare e Punësimit dhe Aftësive. Në degë të veçanta si hoteleri-turizmi, ky tregues arrin deri në 80%.

Për të mbështetur nxënësit, veçanërisht ata nga familjet me të ardhura të ulëta, ofrohen mbi 2500 bursa sociale deri në 7320 lekë në muaj.

Procesi i aplikimit për klasën e 10-të kryhet përmes “e-Albania”-s, ku çdo prind mund të aplikojë online dhe më pas merr përgjigjen nga shkolla.

Arsimi i mesëm profesional u ofron nxënësve mundësi kualifikimi dy, tre dhe katërvjeçar, dhe i përgatit ata për profesione specifike, nëpërmjet zhvillimit të aftësive praktike dhe njohurive të aplikueshme.

Arsimi i mesëm profesional u ofron të rinjve mundësi kualifikimi në nivelet II, III dhe IV të Kornizës Shqiptare të Kualifikimeve, duke i përgatitur si punonjës të kualifikuar dhe teknikë të mesëm në fusha të ndryshme.

Aktualisht, sistemi publik i arsimit profesional përfshin 41 institucione (31 shkolla dhe 10 qendra formimi), që ofrojnë 26 drejtime dhe 93 profile studimi, nga të cilat 5 janë profile duale.

Ky sistem fokusohet në zhvillimin e aftësive praktike dhe profesionale, të përshtatura me kërkesat e tregut të punës, duke kontribuar në rritjen e punësimit dhe zhvillimin ekonomik të vendit.

Pas përfundimit të studimeve, nxënësit pajisen me diplomë ose certifikatë profesionale, që u mundëson punësim të menjëhershëm ose vijimin e studimeve në nivele më të larta.

/a.f/

The post Gonxhja: Programi zviceran “VET by EHL”, rrugë e re për profesionistët e sektorit të turizmit appeared first on Agjencia Telegrafike Shqiptare.

TIRANË, 5 gusht/ATSH/ Gjatë kontrolleve të imtësishme, të kryera në bazë të analizës së riskut, ndaj shtetasve dhe mjeteve me të cilat ata lëvizin, shërbimet e Drejtorisë Vendore për Kufirin dhe Migracionin Korçë konstatuan në hyrje të Republikës së Shqipërisë, dy raste të paligjshmërive në kufi.

Konkretisht në Pikën Kufitare Qafë Thanë, gjatë kontrollit në kamionin që drejtonte shtetasi V. T., 30 vjeç, banues në Maqedoninë e Veriut, u gjet i fshehur nën rimorkio, 1 shtetas maroken.

Në përfundim të veprimeve procedurale për rastin, nisi procedimi në gjendje të lirë për 30-vjeçarin, për veprën penale “Ndihma për kalim të paligjshëm të kufijve”.

Po ashtu në Pikën Kufitare Goricë, gjatë kontrollit në automjetin që drejtonte shtetasi T. A., 63 vjeç, banues në fshatin Zaroshkë, u gjetën produkte ushqimore dhe medikamente, të papajisura me fatura blerjeje.

Në përfundim të veprimeve procedurale për rastin, nisi procedimi në gjendje të lirë për 63-vjeçarin, për veprat penale “Kontrabanda me mallra të tjera” dhe “Tregtimi dhe transportimi i mallrave që janë kontrabandë”. Gjithashtu, mallrat u sekuestruan me cilësinë e provës materiale.

Kontrollet kundër paligjshmërive në kufi dhe tentativave për të lëvizur ilegalisht, vijojnë, krahas punës për menaxhimin e fluksit dhe ofrimin e një shërbimi policor të shpejtë dhe me etikë për qytetarët.

Materialet procedurale iu referuan Prokurorisë së Korçës, për veprime të mëtejshme.

/m.m//a.f/

The post Korçë, goditen dy raste të paligjshmërive në kufi appeared first on Agjencia Telegrafike Shqiptare.

PRISHTINË, 5 gusht/ATSH/Federata Ndërkombëtare e Basketbollit tha për Radion Evropa e Lirë të hënën se e ka nisur një hetim lidhur me thirrjet antishqiptare që shpërthyen gjatë një ndeshjeje basketbolli mes Maqedonisë së Veriut dhe Rumanisë gjatë fundjavës.

“Në këtë fazë, jemi duke mbledhur raportet dhe deklaratat përkatëse, duke punuar në përputhje të ngushtë me federatat kombëtare të përfshira, si dhe me autoritetet lokale dhe forcat e rendit”, tha FIBA për REL.

Sipas politikanëve shqiptarë në Maqedoninë e Veriut, në turmën e tifozëve në ndeshjen e fazës së dytë parakualifikuese për Kupën e Botës që do të mbahet në Katar më 2027, janë dëgjuar thirrje si “Shqiptari i mirë është shqiptari i vdekur”, “Dhoma gazi për shqiptarët” dhe “Maqedoni e pastër”.

FIBA tha se e dënon pa rezerva dhe me vendosmëri gjuhën e urrejtjes dhe çdo formë diskriminimi apo gjuhe raciste.

“Ne promovojmë në mënyrë aktive krijimin e një mjedisi gjithëpërfshirës dhe me respekt për të gjithë lojtarët, ekipet dhe tifozët, si një përparësi kryesore në sport”, tha ajo.

Zyrtarë të lartë të Qeverisë së Maqedonisë së Veriut – ku shqiptarët përbëjnë gati një të katërtën e popullsisë prej 1.8 milionë banorësh – ndodheshin në sallë gjatë ndeshjes.

Incidenti ka shkaktuar gjithashtu reagime të ashpra në Kosovë dhe Shqipëri, vende me popullsi kryesisht shqiptare.

Kryeministri i Maqedonisë së Veriut, Hristijan Mickoski, një nga zyrtarët që morën pjesë në ndeshje, dënoi “thirrjet nacionaliste dhe ksenofobike” në një deklaratë më 4 gusht, dy ditë pas ndeshjes.

Ai tha se, ndonëse ishte i pranishëm në arenë, “nuk i kishte vënë re” thirrjet e tifozëve, duke pretenduar se ato ishin bërë nga “një grup i vogël njerëzish”.

“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë – së pari për atë që ndodhi gjatë ndeshjes së basketbollit ndërmjet Maqedonisë [së Veriut] dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë”, tha Mickoski.

Partia shqiptare në opozitë në Maqedoni të Veriut, Bashkimi Demokratik për Integrim (BDI), tha se në këtë ngjarje “u dëgjuan kore antishqiptare, thirrje raciste dhe gjuhë e pastër e urrejtjes etnike ndaj shqiptarëve”.

Ministri i Sportit i Maqedonisë së Veriut, Borko Ristovski, tha se kjo Ministri nuk mund të reagojë konkretisht ndaj kësaj ngjarjeje, “sepse nuk vjen nga ndonjë subjekt sportiv – vjen nga tifozë në tribunë – dhe nuk kemi asnjë kompetencë për të reaguar kur bëhet fjalë për tifozët”.

“Megjithatë, le ta shfrytëzoj këtë rast për të bërë një apel: në Maqedoni nuk ka nevojë për brohoritje të tilla, as nga njëra anë, as nga tjetra, nga askush, nga cilado anë që të vijë”.

Kodi Penal i Maqedonisë së Veriut parasheh dënime për thirrjet raciste dhe gjuhën e urrejtjes në disa nene, ndërsa më i rëndësishmi është neni 319, i cili parashikon se kushdo që nxit ose përhap publikisht urrejtje, përçarje apo jotolerancë mbi baza racore, fetare, etnike apo kombëtare, dënohet me burgim nga një deri në pesë vjet.

Të hënën, presidentja e Kosovës, Vjosa Osmani, tha se thirrjet antishqiptare të dëgjuara në Kumanovë janë të papranueshme dhe “cenojnë frymën e bashkëjetesës dhe respektit të ndërsjellë”.

“Shqiptarët janë popull autokton në trojet e tyre si dhe meritojnë të trajtohen me dinjitet dhe barazi, ashtu si çdo komunitet tjetër”, tha Osmani.

Komiteti Olimpik i Kosovës i dënoi thirrjet antishqiptare gjatë ndeshjes në Kumanovë në një reagim në Facebook të hënën, duke thënë se “veprimet e tilla janë të papranueshme dhe bien ndesh me vlerat themelore të lëvizjes olimpike, të cilat promovojnë respektin, barazinë dhe solidaritetin mes popujve”.

“KOK u bën thirrje institucioneve përgjegjëse, që të ndërmarrin masa konkrete ndaj gjuhës së urrejtjes dhe autorëve të këtyre sjelljeve të dënueshme, që nuk kanë vend në ngjarjet sportive”, thuhet në reagim.

Kryetarja e Kuvendit në Shqipëri, Elisa Spiropali, i cilësoi si të papranueshme thirrjet fyese ndaj shqiptarëve.

“Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit”, tha ajo. /REL/

The post FIBA nis hetim pas thirrjeve antishqiptare në ndeshjen e basketbollit në Kumanovë appeared first on Agjencia Telegrafike Shqiptare.

ROMË, 5 gusht /ATSH/- Vitet e fundit, Shqipëria është bërë një nga destinacionet më të njohura për italianët, dhe në vitin 2025, trendi është më i fortë se kurrë, shkruan Andrea Casamassima në të përditshmen italiana “alanews.it”.

Me fluturime direkte që fillojnë nga 15-20 euro, hotele të përballueshme dhe një ofertë turistike që përfshin vendet kulturore, natyrën dhe detin e kristaltë – Toka e Shqiponjave ka hyrë zyrtarisht në radarin e vizitorëve me buxhet të kufizuar.

Tirana është porta perfekte për të eksploruar Rivierën Shqiptare, shtëpia e disa prej plazheve më të bukura të Evropës, ende e paprekur nga turizmi masiv që ka përfshirë destinacionet e njohura.

Dhe e gjithë kjo mund të kushtojë më pak se një darkë në një qytet italian: për më pak se 100 euro, mund të organizoni një fundjavë ose mini-pushim me histori, shije autentike dhe det të kristaltë.

Fluturime me kosto të ulët dhe akomodime të përballueshme: kombinimi perfekt për ata që udhëtojnë nga Italia

Fluturime direkte për në Tiranë nisen çdo ditë nga Roma, Milano, Bari, Venecia dhe Bolonja, nga linja ajrore si “Ryanair”, “WizzAir” dhe “Albawings”.

Çmimet, veçanërisht nëse rezervohen disa javë më parë, variojnë nga 15 deri në 30 euro për vajtje.

Aeroporti Nënë Tereza i Tiranës është rreth 30 minuta larg nga qendra e qytetit me autobusë dhe taksi me kosto të ulët.

Sapo të mbërrini, Tirana ofron akomodime për të gjitha buxhetet, por ofertat më të mira gjenden në bujtina ose apartamente Airbnb.

Fjetja në qendër të qytetit mund të kushtojë vetëm 20 euro për natë për person, shpesh me mëngjes të përfshirë.

Shumë turistë italianë zgjedhin të kalojnë një natë në kryeqytet për të vizituar vende ikonike si Sheshi Skënderbej, Bunk’Art 2 apo lagjen e Bllokut, një ish-zonë e ndaluar gjatë regjimit komunist, tani e mbushur me kafene, bare koktejesh dhe art rruge.

Nga Tirana në Rivierë: det i kristaltë, rërë e bardhë dhe pak turistë

Megjithatë, surpriza e vërtetë vjen sapo të largoheni nga Tirana. Një udhëtim treorësh me makinë ose autobus ju çon në bregdetin jugor të Shqipërisë, ku shpaloset një peizazh perfekt si në kartolinë.

Ksamili, me ujërat e tij bruz dhe ishujt e arritshëm me not ose me varkë, është një nga destinacionet më të njohura.

Plazhet ofrojnë shërbime me çmime të përballueshme: një shezlong dhe një ombrellë mund të kushtojnë 5-8 euro në ditë.

Qytete të tjera si Dhërmiu, Himara dhe Gjipeja ofrojnë plazhe me guralecë të bardhë, ujëra të pastra të ngjashme me ato të Sardenjës dhe një klimë të ngrohtë, edhe në gusht.

Këtu, akomodimi është i përballueshëm: për 25-30 euro nata, mund të flini në banesa të pastra, shpesh me pamje nga deti.

Për ata që udhëtojnë me dy ose më shumë persona, është e lehtë të ndajnë shpenzimet dhe të kursejnë.

Sa kushtojnë realisht pushimet në Shqipëri, duke filluar nga Tirana?

Ja një shembull konkret i shpenzimeve ditore për ata që nisen nga Italia dhe duan të eksplorojnë detin dhe qytetet:

Fluturimi vajtje-ardhje Itali-Tiranë: 30–40 euro
Akomodimi (2 netë në një bujtinë): 40–50 euro
Transporti Tiranë-Rivierë (autobus ose makinë e përbashkët): 5–10 euro
Ushqimi tipik shqiptar (pjata lokale + kafe dhe mëngjes): 10–15 euro në ditë
Totali i vlerësuar për 2–3 ditë: 90–100 euro për person

Turistët që qëndrojnë më gjatë do të gjejnë çmime edhe më të favorshme: për më pak se 300 euro, mund të kaloni një javë të tërë midis Tiranës dhe jugut, duke shijuar një udhëtim që ndërthur kulturën, natyrën dhe relaksin.

Deti më i pastër vetem dy orë larg Italisë: Pse Shqipëria është destinacioni i ri italian i verës?

Përtej çmimit, ajo që e bën përvojën në Shqipëri unike është atmosfera. Njerëzit janë mikpritës, kuzhina është e shijshme, dhe plazhet janë ende autentike dhe të pakomplikuara.

Ndryshe nga shumë vendpushime verore evropiane, këtu nuk ndihesh sikur je në një destinacion të ndërtuar për turistët, por në një vend që i përjeton verat në mënyrë spontane.

Kjo është edhe arsyeja pse italianët kthehen vit pas viti. Tirana nuk është më një ndalesë, por pika ideale e nisjes për një aventurë që kombinon çmimin e përballueshëm, bukurinë dhe autenticitetin. //a.i/

https://www.alanews.it/lifestyle/sempre-piu-italiani-scelgono-lalbania-per-le-vacanze-estive-da-tirana-al-mare-turchese-con-meno-di-100-euro-a-testa/

The post “Alanews”: Gjithnjë e më shumë italianë po zgjedhin Shqipërinë për pushime verore appeared first on Agjencia Telegrafike Shqiptare.