PARIS, 25 korrik /ATSH/- Vendimi i guximshëm i Francës për të njohur shtetin e Palestinës mund të ndihmojë në ndryshimin e diskutimeve rreth të ardhmes së Lindjes së Mesme, edhe nëse nuk ka gjasa të ketë një ndikim të menjëhershëm për banorët në Gazë ose në luftën e Izraelit me Hamasin, sipas AP.

Në një botë ku vendet po përdorin sërish forcën ushtarake për të imponuar vullnetin e tyre mbi të tjerët – veçanërisht Rusia në Ukrainë, dhe SHBA-ja dhe Izraeli me sulmet e tyre të fundit ndaj Iranit dhe objekteve të tij bërthamore – presidenti francez Emmanuel Macron po përpiqet t’i japë një goditje diplomacisë dhe idesë së saj të natyrshme se lufta, në fund të fundit, rrallë sjell paqe.

Të mos veprosh me vendosmëri ndërsa shpaloset një fatkeqësi humanitare në Gaza, mund të jetë një njollë, kur të shkruhen librat e historisë.

Macron ka mjete për të ndikuar në çështjet botërore si udhëheqës i një vendi të armatosur me armë bërthamore, ekonomikisht dhe diplomatikisht të fuqishëm, i cili gjithashtu ulet në tryezën e madhe në Kombet e Bashkuara, si një nga pesë anëtarët e përhershëm të këshillit të tij të sigurisë.

Të qenit anëtari i parë dhe, për momentin, i vetmi anëtar i grupit të vendeve të industrializuara G7 – që ndërmerr këtë hap mbart rreziqe të brendshme.

Duke kryesuar një vend me popullsinë më të madhe hebraike në Evropë dhe popullsinë më të madhe myslimane në Evropën Perëndimore, Macron është në një situatë të tensionuar të opinionit publik.

Fjalët e tij do t’i kënaqin disa votues, por do t’i zemërojnë të tjerët – një fakt i reflektuar nga reagimet politike thellësisht të ndara në Francë ndaj vendimit të tij të shpallur në X të dje në mbrëmje.

Por, pasi mbështeti me vendosmëri të drejtën e Izraelit për t’u mbrojtur kundër Hamasit dhe sulmit të tij të 7 tetorit 2023 që shkaktoi luftën, Macron po sinjalizon se mbështetja e Francës mund të shkojë vetëm deri diku.

Kryeministri izraelit Benjamin Netanyahu dënoi ndryshimin e njërit prej aleatëve më të ngushtë të vendit të tij në Evropë.

“Një veprim i tillë shpërblen terrorin dhe rrezikon të krijojë një tjetër përfaqësues iranian, ashtu siç u bë Gaza”, tha ai në një deklaratë.

“Një shtet palestinez në këto kushte do të ishte një pikënisje për të shkatërruar Izraelin – jo për të jetuar në paqe pranë tij”, shtoi ai.

Një hap, por jo një shkop magjik

Ideja që palestinezët dhe izraelitët mund të jetojnë krah për krah në paqe në shtetet e tyre ndoshta nuk është dukur kurrë më jorealiste – me Gazën në rrënoja dhe Bregun Perëndimor të pushtuar – që përballet me vendbanime në rritje nga izraelitët.

Vetëm fjalët e Macron nuk do ta ndryshojnë këtë. Megjithatë, mesazhi i udhëheqësit francez është se shpresa për një “zgjidhje me dy shtete” të arritur përmes diplomacisë nuk duhet të lejohet të vdesë – sado e paarritshme që mund të duket.

“Kjo zgjidhje është e vetmja rrugë që mund të adresojë aspiratat legjitime si të izraelitëve ashtu edhe të palestinezëve. Tani duhet të arrihet sa më shpejt të jetë e mundur”, tha Macron në një letër drejtuar presidentit palestinez, Mahmoud Abbas, e cila konfirmoi vendimin e tij për të njohur Palestinën si shtet.

“Perspektiva e një zgjidhjeje të negociuar për konfliktin në Lindjen e Mesme duket gjithnjë e më e largët. Nuk mund ta pranoj këtë”, tha ai.

Ndikimet e para ka të ngjarë të mos jenë në Gaza, por në kryeqytetet botërore ku udhëheqësit mund të përballen me presion ose të ndihen të nxitur për të ndjekur shembullin e Francës.

Vëmendja po përqendrohet te vendet e tjera të G7-ës, për shkak të ndikimit të tyre ekonomik dhe diplomatik.

Edhe pse më shumë se 140 vende e njohin Palestinën si shtet, Franca do të jetë më e madhja, më e populluara dhe më e fuqishmja midis atyre në Evropë që e kanë ndërmarrë këtë hap. //a.i/

The post ANALIZË – Si mund të ndryshojë dinamikën e LM-së njohja e shtetit të Palestinës nga Franca appeared first on Agjencia Telegrafike Shqiptare.

LONDËR, 24 korrik /ATSH- DPA/ – Rreth 221 deputetë britanikë nga parti të ndryshme politike janë bashkuar për t’i bërë thirrje qeverisë britanike të njohë shtetin palestinez.

Deputetët i kërkojnë qeverisë të ndërmarrë këtë hap përpara një konference të Organizatës së  Kombeve të Bashkuara që do të mbahet javën e ardhshme në Nju Jork.

Kjo vjen pas njoftimit të Francës  mbrëmë se do të njohë zyrtarisht Palestinën në një samit të OKB-së në shtator.

Në letrën e deputetëve, të koordinuar nga Sarah Champion, kryetare laburiste e Komitetit të Zhvillimit Ndërkombëtar, thuhet se “presim që rezultati i konferencës të jetë që qeveria e Britanisë se Madhe të sqarojë se kur dhe si do ta realizojë angazhimin e saj të kahershëm për zgjidhjen me dy shtete, por dhe se si do të bashkëpunojë me partnerët ndërkombëtarë për ta bërë këtë realitet”.

Letra është nënshkruar nga parlamentarë të Partisë Laburiste, Konservatorëve, Liberal Demokratëve, SNP-së, të Gjelbërve, Plaid Cymru, SDLP-së dhe deputetë të pavarur.

Ndër firmëtarët kryesorë janë kryetarët laburistë të komiteteve të përzgjedhura Liam Byrne, Emily Thornberry dhe Ruth Cadbury, lideri i Lib Dem Sir Ed Davey, si dhe ish-ministri konservator Kit Malthouse.

Deputetja e Rotherham-it (Laburiste), Sarah Champion, pranoi se “njohja e Palestinës nuk do ta përfundojë dhimbjen në Gaza apo zgjerimin e shpejtë të vendbanimeve dhe dhunës së kolonëve në Bregun Perëndimor”.

Por ajo theksoi se kjo do të ishte një “hap i rëndësishëm drejt një zgjidhjeje me dy shtete për t’i dhënë fund luftës”.

“Njohja do të dërgonte një mesazh simbolik të fuqishëm se ne mbështesim të drejtat e popullit palestinez, se ata nuk janë vetëm dhe se duhet të ruajnë shpresën për një rrugë që çon drejt paqes dhe sigurisë së qëndrueshme si për popullin izraelit ashtu edhe për atë palestinez.”, tha ajo.

Ministrat janë përballur me thirrje në rritje për të njohur menjëherë shtetin palestinez, në mes të zemërimit global për popullsinë e uritur në Gaza.

Kryeministri Keir Starmer tha sonte se një veprim i tillë duhet të jetë pjesë e një “rruge” drejt paqes në Lindjen e Mesme, për të cilën ai dhe aleatët e tij po punojnë.

“Kjo rrugë do të përcaktojë hapat konkretë për ta shndërruar armëpushimin e dëshpëruar në një paqe të qëndrueshme,” tha ai.

“Njohja e shtetit palestinez duhet të jetë një nga këto hapa. Jam i qartë për këtë. Por duhet të jetë pjesë e një plani më të gjerë që çon përfundimisht në një zgjidhje me dy shtete dhe siguri të përhershme për palestinezët dhe izraelitët”, shtoi Starmer

Kryeministri tha gjithashtu se pamjet “tronditëse nga Gaza janë të pandërprera.”. “Vazhdimi i mbajtjes së pengjeve, uria dhe mohimi i ndihmës humanitare për popullin palestinez, dhuna në rritje nga grupet ekstreme të kolonëve dhe përshkallëzimi i tepruar ushtarak i Izraelit në Gaza janë të gjitha të pajustifikueshme”.

Në një deklaratë të përbashkët të publikuar sot  me liderët e Francës dhe Gjermanisë, kryeministri i bëri thirrje “të gjitha palëve të ndalojnë konfliktin duke arritur një armëpushim të menjëhershëm”.

Starmer, presidenti francez Emmanuel Macron dhe kancelari gjerman Friedrich Merz gjithashtu i kërkuan Izraelit të ndalojë kufizimin e ndihmave për në Gaza.

Organizatat bamirëse që veprojnë në Gaza kanë paralajmëruar se bllokada izraelite dhe ofensiva e vazhdueshme ushtarake po e çojnë popullsinë drejt urisë ekstreme, duke thënë se edhe punonjësit e tyre dhe palestinezët “po tretën dita-ditës”.

Izraeli thotë se lejon mjaftueshëm ndihma humanitare në territor dhe fajëson agjencitë e OKB-së për dështimet në shpërndarje, të cilat vetë agjencitë i justifikojnë me kufizimet izraelite dhe prishjen e sigurisë.

Teksa u nis sot për në Skoci, presidenti amerikan Donald Trump e minimizoi njoftimin e Macron-it për njohjen e Palestinës, duke thënë se  “ajo që thotë ai nuk ka rëndësi”,  u tha ai gazetarëve në Shtëpinë e Bardhë.

Starmer pritet të takohet me presidentin amerikan gjatë vizitës së tij pesë-ditore private në Skoci.

Bisedimet e paqes të udhëhequra nga SHBA-ja në Katar u ndërprenë dje, pasi i dërguari special i Uashingtonit, Steve Witkoff, akuzoi Hamasin për “mungesë dëshire për të arritur një armëpushim”.

Marrëveshja e diskutuar pritet të përfshijë një armëpushim 60-ditor, gjatë të cilit Hamasi do të lironte 10 pengje  dhe eshtrat e  18 të tjerëve në këmbim të palestinezëve të burgosur nga Izraeli.

Ndihmat humanitare do të shtoheshin, dhe të dy palët do të zhvillonin negociata për një armëpushim të përhershëm.

Lufta e Izraelit në Gaza ka shkaktuar vrasjen e mbi 59 000 palestinezë, sipas Ministrisë së Shëndetësisë në Gaza, e cila nuk bën dallim mes militantëve dhe civilëve. /Ad.Ab./

The post FOKUS – 221 deputetë kërkojnë që Britania të njohë shtetin palestinez appeared first on Agjencia Telegrafike Shqiptare.

PRISHTINË, 25 korrik /ATSH/ Instituti Hidrometeorologjik i Kosovës (IHMK) njoftoi se të premten në Kosovë janë regjistruar temperatura të larta. Në Klinë është regjistruar temperatura rekord prej 42,5 gradë Celcius. Kjo temperaturë, sipas Institutit, u regjistrua në orën 15:00.

“Sipas matjeve nga Rrjeti Shtetëror i Stacioneve Meteorologjike, sot në Kosovë janë shënuar vlera tejet të larta të temperaturave”, tha IHK-ja.

Sipas një harte të publikuar nga ky Institut, bazuar në temperaturat e regjistruara në orën 14:00 të 25 korrikut, edhe qytete kanë regjistruar temperatura të larta mbi 40 gradë Celsius: Hani i Elezit (41,1) Gjakova (40,7), Suhareka (40,4), Prizreni (40,3) dhe Rahoveci (40,2).

Temperatura më e ulët është regjistruar në Brod, përkatësisht 31,9 gradë Celsius, ndërkaq Prishtina është përballur me temperaturë prej 38,4 gradë.

Sikurse edhe pjesë të tjera të rajonit, edhe Kosova ditëve të fundit është përballur me temperatura të larta.

Të shtunën, sipas aplikacioneve të parashikimit të motit, temperaturat pritet të jenë më të larta sesa sot. Temperaturat pritet të bien nga fillimi i javës së ardhshme.

Temperatura më e ulët është regjistruar në Brod, përkatësisht 31,9 gradë Celsius, ndërkaq Prishtina është përballur me temperaturë prej 38,4 gradë.

Sikurse edhe pjesë të tjera të rajonit, edhe Kosova ditëve të fundit është përballur me temperatura të larta.

Të shtunën, sipas aplikacioneve të parashikimit të motit, temperaturat pritet të jenë më të larta sesa sot. Temperaturat pritet të bien nga fillimi i javës së ardhshme. /REL/

The post E premte e nxehtë në Kosovë, Klina regjistron temperaturë rekord 42,5 gradë Celsius appeared first on Agjencia Telegrafike Shqiptare.

TIRANË, 25 korrik /ATSH/ Drejtori i përgjithshëm i Policisë së Shtetit, Ilir Proda, i shoqëruar nga drejtori i Drejtorisë Vendore të Policisë Tiranë, Elton Alushi, vizitoi në repartin e djegieve në QSUT shefin e Komisariatit të Policisë Delvinë, Komisar Agim Troci, i cili pësoi djegie të shumta gjatë përpjekjeve për të shpëtuar disa të moshuar që nuk dilnin dot nga zona e zjarrit në fshatin Vergo të Delvinës.

Proda është interesuar që në momentet e para për gjendjen e tij dhe ka ndjekur nga afër organizimin e transportimit me helikopter drejt Tiranës, menjëherë sapo është njoftuar për ngjarjen.

Gjatë vizitës, drejtori i përgjithshëm është interesuar pranë stafit mjekësor për gjendjen shëndetësore të Shefit të Komisariatit, duke i uruar atij shërim të shpejtë dhe e ka përgëzuar për aktin e tij të guximshëm dhe human.

Po ashtu, ai ka vlerësuar të gjithë punonjësit e Komisariatit të Policisë Delvinë që sot kanë rrezikuar jetën e tyre për të shpëtuar nga flakët shumë banorë pjesa më e madhe të moshuar, në fshatrat e Delvinës, si pasojë e një zjarri të madh të favorizuar nga era, që ka përfshirë shumë zona të banuara.

Nga QSUT, Proda theksoi se, “shefi i Komisariatit Agim Troci është shembulli më i mirë i përkushtimit dhe sakrificës që mishëron një oficer i Policisë së Shtetit. Ai veproi me guxim dhe ndjenjë të lartë përgjegjësie, për të mbrojtur jetën e të tjerëve. Dua të falënderoj të gjithë, përfshirë Nënkomisar Eridionin, i cili ka pësuar asfiksi dhe po merr ndihmë mjekësore në Spitalin e Delvinës, si dhe gjithë punonjësit e Komisariatit të Policisë Delvinë që, nën drejtimin e Komisar Trocit, me përkushtim dhe guxim, mbështetur dhe nga shërbimet e Komisariatit të Policisë Sarandë, kanë shpëtuar dhjetëra jetë qytetarësh, duke bërë të mundur evakuimin nga banesat e tyre deri jashtë zonës së rrezikut. Edhe disa punonjës të tjerë kanë pësuar. Ky akt është një shembull frymëzues i përkushtimit dhe humanizmit të efektivëve në krye të detyrës.”

Në zonën e përfshirë nga zjarri, në fshatrat Senicë, Vergo dhe Kopaçëz, vijon ndërhyrja intensive e shërbimeve të Zjarrfikëses, Emergjencës Civile, Policisë dhe Ushtrisë, për neutralizimin e vatrave dhe garantimin e sigurisë së banorëve.

Policia e Shtetit ndodhet aty, në krah të qytetarëve. Drejtori i Drejtorisë Vendore të Policisë Vlorë, Elidon Çela, ndodhet në zonë për menaxhimin e situatës.

Policia e Shtetit apelon për kujdes të shtuar nga qytetarët, veçanërisht gjatë lëvizjes në zonat me bimësi të dendur dhe në ato të ekspozuara ndaj zjarreve. Çdo veprim i pakujdesshëm, si ndezja e zjarrit në natyrë, hedhja e cigareve apo djegia e mbeturinave, mund të sjellë pasoja të rënda për jetën dhe mjedisin.

Policia po bashkëpunon me banorët dhe gjithë instancat e tjera shtetërore për të identifikuar dhe vënë para përgjegjësisë ligjore autorët e zjarrvënieve në disa rrethe të vendit, ku në disa raste janë identifikuar dhe arrestuar në flagrancë.

/gj.m//r.e/

The post Proda viziton në QSUT efektivin që pësoi djegie gjatë zjarrit në Delvinë appeared first on Agjencia Telegrafike Shqiptare.

LONDËR, 25 korrik /ATSH/ – Kryeministri izraelit, Benjamin Netanyahu dhe presidenti i SHBA-së, Donald Trump duket se i kanë braktisur negociatat e armëpushimit në Gazë me grupin militant palestinez Hamas – një ditë pasi tërhoqën delegacionet e tyre nga bisedimet, sipas “Reuters”.

Netanyahu tha se Izraeli tani po shqyrtonte disa mundësi “alternative” për të arritur qëllimet e tij – për të kthyer pengjet nga Gaza dhe për t’i dhënë fund sundimit të Hamasit në territor.

Dje në mbrëmje, i dërguari i SHBA-së Steve Witkoff, tha se Hamasi ishte fajtor për bllokimin e negociatave të armëpushimit, të ndërmjetësuara nga Katari dhe Egjipti.

Armëpushimi i propozuar do të zgjaste 60 ditë, gjatë të cilave do të lejohej ndihma shtesë në Gazë, dhe disa nga 50 pengjet e mbetura do të liroheshin në këmbim të të burgosurve palestinezë të mbajtur nga Izraeli.

Presidenti i SHBA-së, Donald Trump tha se Hamasi nuk dëshironte një marrëveshje armëpushimi në Gazë dhe se ai beson se udhëheqësit e grupit militant tani do të “ndiqen”.

Deklarata e tij vjen një ditë pasi Steve Witkoff, i dërguari i SHBA-së në Lindjen e Mesme, ndërpreu bisedimet indirekte me grupin militant palestinez, në Doha dhe mes shqetësimeve ndërkombëtare në rritje për krizën humanitare në Gazë.

“Është shumë keq, pasi ka arritur në një pikë ku do të duhet ta përfundojme punën”, tha presidenti i SHBA-së.

“Mendoj se ata do të ndiqen”, tha Trump duke iu referuar udhëheqësve të Hamasit.

Deklarata e Trump lë pak ose aspak hapësirë për rifillimin e negociatave për të ndaluar luftimet, në një kohë kur shqetësimi ndërkombëtar po rritet për shkak të përkeqësimit të urisë në Gazën e shkatërruar nga lufta.

Trump reagoi gjithashtu ndaj njoftimit të presidentit francez, Emmanuel Macron se Franca do të ishte fuqia e parë e madhe perëndimore që do të njihte shtetin e pavarur palestinez.

“Ai është një djalë shumë i mirë, më pëlqen, por kjo deklaratë nuk ka peshë”, tha Trump.

Netanyahu e quajti vendimin një “shpërblim për terrorizmin”.

Vendet perëndimore janë angazhuar për dekada të tëra për një shtet të pavarur palestinez, por prej kohësh kanë thënë se ai duhet të lindë nga një proces paqeje i negociuar.

Dy fuqitë e tjera të mëdha të Evropës, Britania e Madhe dhe Gjermania, e bënë të qartë se nuk kishte plane për të vepruar menjëherë për shtetësinë palestineze. //a.i/

The post KOMENT – A po i braktisin Netanyahu dhe Trump negociatat për armëpushim në Gazë? appeared first on Agjencia Telegrafike Shqiptare.

BRUKSEL, 25 korrik /ATSH – DPA/ – Presidentja e Komisionit Evropian, Ursula von der Leyen, njoftoi se do të takohet të dielën me presidentin amerikan Donald Trump në Skoci.

Takimi do të zhvillohet disa ditë përpara datës 1 gusht, kur Trump ka paralajmëruar se do të vendosë tarifa prej 30% ndaj importeve nga Bashkimi Evropian, për shkak të të ashtuquajturave çekuilibra tregtare.

BE-ja ka qenë duke u përpjekur prej javësh të arrijë një marrëveshje me Uashingtonin për të shmangur rritjen e tarifave.

Von der Leyen dhe Trump yhvilluan sot  një “telefonatë të frytshme” , tha presidentja von der Leyen  në platformën X, përpara se të bien dakord të takohen të dielën “për të diskutuar marrëdhëniet tregtare transatlantike dhe si mund t’i ruajmë ato të forta”.

Pavarësisht përpjekjeve për një zgjidhje të negociuar, vendet e BE-së miratuan një propozim të komisionit për të vendosur potencialisht tarifa ndaj importeve të mallrave me një volum tregtar total prej 93 miliardë eurosh (109 miliardë dollarë) nëse bisedimet me Shtetet e Bashkuara të Ameerikës dështojnë. /Ad.Ab./

The post BRUKSEL – Von der Leyen dhe Trump do të takohen në Skoci appeared first on Agjencia Telegrafike Shqiptare.

TIRANË, 25 korrik /ATSH/ Kryeministri Edi Rama ndau sot foto nga plazhi i Zvërnecit në Vlorë.

Zvërneci është një nga destinacionet natyrore që tërheq gjithnjë e më shumë vizitorë me bukuritë e tij unike.

Pas investimeve të fundit dhe ndërtimit të urës, turistë të shumtë zgjedhin të kalojnë në çdo stinë ditët me diell në ishullin e bukur, brenda Lagunës së Nartës.

Përveç bukurisë natyrore që Zvërneci ka, interes të veçantë paraqet për vizitorët Manastiri i Shën Mërisë, i cili ndodhet në ishullin e Zvërnecit dhe ku mund të shkohet me një urë të ngushtë këmbësorësh prej druri. Manastiri është një ndërtim tipik bizantin i ndërtuar në shek. X pas Krishtit. Ndërtimi i tij, historia, gojëdhënat e bëjnë këtë resurs tërheqës në çdo stinë të vitit.

/gj.m//r.e/

The post “Shqipëria e bukur”, Rama ndan foto nga plazhi i Zvërnecit appeared first on Agjencia Telegrafike Shqiptare.

UASHINGTON, 25 korrik /ATSH/-  Presidenti i SHBA-së, Donald Trump tha se Hamasi nuk dëshironte një marrëveshje armëpushimi në Gazë dhe se ai besonte se udhëheqësit e grupit militant tani do të “ndiqeshin”, sipas “abc news”.

Deklarata e tij vjen një ditë pasi Steve Witkoff, i dërguari i SHBA-së në Lindjen e Mesme, ndërpreu bisedimet indirekte me grupin militant palestinez, në Doha dhe mes shqetësimeve në rritje ndërkombëtar për krizën humanitare në Gazë.

Ndërkohë, kryeministri i Izraelit, Benjamin Netanyahu tha se Izraeli dhe aleatët e tij do të ndjekin “opsione alternative” për të kthyer pengjet e mbetura të 7 tetorit dhe për t’i dhënë fund sundimit të Hamasit në territor, duke shkaktuar shqetësimin se SHBA-ja dhe Izraeli kanë braktisur bisedimet për armëpushim.

“Është shumë keq, pasi ka arritur në një pikë ku do të duhet të përfundojmë punën”, tha presidenti i SHBA-së.

“Mendoj se ata do të ndiqen”, tha Trump duke iu referuar udhëheqësve të Hamasit.

Deklarata e Trump lë pak ose aspak hapësirë për rifillimin e negociatave për të ndaluar luftimet, në një kohë kur shqetësimi ndërkombëtar po rritet për shkak të përkeqësimit të urisë në Gazën e shkatërruar nga lufta.

Trump reagoi gjithashtu ndaj njoftimit të presidentit francez Emmanuel Macron se Franca do të ishte fuqia e parë e madhe perëndimore që do të njihte shtetin e pavarur palestinez.

“Ai është një djalë shumë i mirë, më pëlqen, por kjo deklaratë nuk ka peshë”, tha Trump.

Netanyahu e quajti vendimin një “shpërblim për terrorizmin”.

Vendet perëndimore janë angazhuar për dekada të tëra për një shtet të pavarur palestinez, por prej kohësh kanë thënë se ai duhet të lindë nga një proces paqeje i negociuar.

Dy fuqitë e tjera të mëdha të Evropës, Britania e Madhe dhe Gjermania, e bënë të qartë se nuk kishte plane për të vepruar menjëherë për shtetësinë palestineze. //a.i/

The post SHBA – Trump: Hamasi nuk dëshiron marrëveshje armëpushimi në Gazë appeared first on Agjencia Telegrafike Shqiptare.

BRUKSEL, 25 korrik /ATSH-DPA/- Bashkimi Evropian dhe Kina festuan 50 vjet marrëdhënie dypalëshe diplomatike në një samit të profilit të lartë në Pekin. Por shumë çështje të debatueshme zbehën atmosferën festive.

Presidentja e Komisionit Europian, Ursula von der Leyen, dhe Presidenti i Këshillit Europian, António Costa, mbërritën në kryeqytetin kinez dje në mëngjes, të shoqëruar nga shefja e diplomacisë së BE-së, Kaja Kallas.

Megjithëse janë partnerë të dytë më të mëdhenj tregtarë të njëri-tjetrit, marrëdhëniet BE-Kinë janë bërë gjithnjë e më të tensionuara. Brukseli është i alarmuar nga një deficit tregtar rekord prej mbi 300 miliardë euro (351.9 miliardë dollarë) vitin e kaluar dhe nga kontrollet kineze të eksporteve për mineralet e rralla të domosdoshme për motorët elektrikë dhe sensorët.

Para samitit, presidenti kinez Xi Jinping tha se Kina dhe BE-ja duhet të thellojnë besimin ndaj njëra-tjetrës në një botë të trazuara, por drejtuesit e bllokut kërkuan “zgjidhje reale” për të kapërcyer një “pikë kthese”.

BE-ja u zotua të përballet me ndarjet e thella rreth tregtisë, përfshirë frikën se mallrat kineze të lira dhe të subvencionuara mund të pushtojnë tregjet europiane, si dhe mbështetjen e heshtur të Pekinit ndaj luftës së Rusisë në Ukrainë.

Mbështetja e Kinës për Rusinë në luftën e saj ndaj Ukrainës ka qenë një shqetësim i vazhdueshëm për BE-në. Costa dhe von der Leyen i kërkuan Pekinit të “përdorë ndikimin e tij” ndaj Rusisë për të ndihmuar në përfundimin e “luftës së agresionit” nga Moska.

Pas samitit, presidentja e Komisionit tha se “mënyra se si Kina vazhdon të ndërveprojë me presidentin rus Vladimir Putin dhe luftën e tij do të jetë një faktor vendimtar për marrëdhëniet tona në të ardhmen”.

Costa tha se Kina, “si anëtare e përhershme e Këshillit të Sigurimit të Kombeve të Bashkuara, ka një përgjegjësi të veçantë për të ndikuar Rusinë që të ndalë këtë luftë, të pranojë një armëpushim pa kushte dhe të hyjë në një negociatë të drejtë me Ukrainën”.

Bashkëpunimi për klimën

Brukseli ka theksuar gjithashtu çështjet klimatike ku dëshiron që Kina të bëjë më shumë. Megjithatë, këtu bashkëpunimi shihet si më i mundshëm.

Dy drejtuesit europianë theksuan se Kina dhe BE-ja ranë dakord që të dyja “duhet të respektojnë Marrëveshjen e Parisit”. E miratuar në vitin 2015, kjo marrëveshje ishte e para me karakter universal dhe juridikisht detyruese për të kufizuar ngrohjen globale nën 2 gradë Celsius mbi nivelet paraindustriale.

Makina elektrike dhe konjaku

Në një konferencë shtypi në Pekin, Costa tha se BE-ja dhe Kina “kanë një interes të përbashkët për të ndjekur një marrëdhënie konstruktive, të qëndrueshme, të balancuar dhe të dobishme për të dyja palët”.

“Evropa e mirëpret konkurrencën. Ne e pëlqejmë konkurrencën. Por konkurrenca duhet të jetë e ndershme”, tha Von der Leyen.

Tensionet tregtare janë veçanërisht të forta në disa sektorë.

Në një përballje vitin e kaluar, BE-ja vendosi tarifa shtesë deri në 35,3% për makinat elektrike të prodhuara në Kinë, duke pretenduar se subvencionet në shkallë të gjerë u japin prodhuesve kinezë një avantazh të padrejtë. Po ashtu, ka filluar një hetim ndaj furnitorëve kinezë të turbinave me erë.

Ky vendim nuk u mirëprit në mënyrë unanime në Evropë. Sllovenia ishte një nga vendet që nuk e mbështeti vendosjen e tarifave.

Në qershor, ministri slloven i Ekonomisë, Matjaz Han, u takua me përfaqësues të prodhuesit kinez të makinave elektrike “Nio” në Mynih për të diskutuar mundësinë e prodhimit të makinave në Slloveni në një fabrikë në pronësi të kompanisë austriake Magna Steyr.

Kina i ka hedhur poshtë pretendimet e Brukselit mbi konkurrencën e pandershme të automjeteve elektrike dhe ka njoftuar hetime hakmarrëse për produktet europiane si derri, konjaku dhe bulmeti.

Pothuajse i gjithë konjaku i BE-së është prodhim francez, eksporti i të cilit në Kinë vlerësohet në 1,4 miliardë euro në vit.

Shenja të kujdesshme zbutjeje në mosmarrëveshjen për këtë pije të çmuar u shfaqën ndërsa ministri i Jashtëm kinez Wang Yi, presidenti francez Emmanuel Macron dhe ministri francez  Europën dhe pun[t e Jashtme Jean-Noel Barrot u takuan në fillim të këtij muaji në Paris.

Megjithatë, Kina vendosi tarifa antidumping deri në 34,9% mbi konjakun, duke detyruar eksportuesit europianë të rrisin çmimet për të shmangur këto taksa.

Sanksionet ndaj Rusisë zbehën festimet e samitit

Vetëm disa ditë para bisedimeve në Pekin, BE miratoi një paketë të re sanksionesh kundër Rusisë për shkak të luftës në Ukrainë, përfshirë dy banka kineze. Ministri kinez i Tregtisë i dërgoi homologut të tij europian një mesazh zyrtar proteste,  të njohur si “përfaqësim solemn” në gjuhën diplomatike.

“Ne e dimë që kompanitë kineze furnizojnë rreth 80% të mallrave me përdorim të dyfishtë për luftën”, tha Costa, duke iu referuar mallrave me përdorim civil, por që mund të përdoren edhe për qëllime ushtarake. “Nuk jemi naivë. Nuk po i kërkojmë Kinës të ndërpresë marrëdhëniet, por të përforcojë kontrollet doganore dhe financiare”, shtoi ai.

Brukseli thotë se marrëdhëniet politike dhe ekonomike të Kinës me Rusinë që nga pushtimi i vitit 2022 përfaqësojnë mbështetje të heshtur ndaj Moskës, gjë që e ka ndihmuar ekonominë ruse të përballojë sanksionet perëndimore.

Kina i mohon këto pretendime dhe Pekini deklaroi të hënën se sanksionet “do të kenë një ndikim negativ serioz në marrëdhëniet ekonomike dhe tregtare Kinë-BE”.

Paketa e 18-të e masave ekonomike nga Europa kundër Rusisë që nga pushtimi i vitit 2022 vjen në një kohë kur aleatët shpresojnë që presidenti amerikan Donald Trump të përmbushë kërcënimin për të ndëshkuar Moskën për bllokimin e përpjekjeve për paqe.

BE-ja i kërkon Pekinit veprim për klimën

Pavarësisht tensioneve mbi tregtinë dhe luftën në Ukrainë, BE-ja shpreson për bashkëpunim me Kinën në luftën kundër ndryshimeve klimatike dhe në uljen e emetimeve të gazeve serë.

Ngrohja globale ka qenë historikisht një fushë bashkëpunimi mes Brukselit dhe Pekinit, me të dyja palët që kanë sinjalizuar gatishmëri për të bashkëpunuar në këtë drejtim.

Sipas një deklarate për shtyp, zyrtarët kinezë dhe të BE-së ranë dakord në samit “se forcimi i bashkëpunimit Kinë-BE për ndryshimet klimatike është në të mirë të popujve të të dy palëve dhe ka rëndësi të madhe dhe të veçantë për mbrojtjen e multilateralizmit dhe avancimin e qeverisjes globale të klimës”.

Deklarata theksonte gjithashtu se “ngjyra e gjelbër është ngjyra përfaqësuese e bashkëpunimit Kinë-BE dhe se dy palët kanë një bazë të fortë dhe hapësirë të gjerë për bashkëpunim në fushën e tranzicionit të gjelbër”.

Gjatë një vizite në Pekin këtë muaj, zv/presidentja e Komisioni Evropian Teresa Ribera paralajmëroi se “mungesa e mundshme e ambicies nga ndotësit kryesorë është një shqetësim për komunitetin ndërkombëtar dhe qytetarët tanë”, duke kërkuar veprim më të madh.

Zëvendëskryeministri kinez Ding Xuexiang, nga ana tjetër, vlerësoi “pjesëmarrjen e Kinës në qeverisjen globale për mjedisin”.

E pyetur nëse masat e BE-së ndaj kompanive kineze të energjisë së gjelbër mund të dëmtojnë tranzicionin global drejt energjive të rinovueshme, Ribera u përgjigj se, ndonëse BE-ja “mund të përfitojë në afat të shkurtër” nga importet më të lira, “mund të dëmtojë mundësinë” për investime afatgjata në të ardhmen e bllokut.

BE-ja synon të bëhet neutrale ndaj karbonit deri në vitin 2050. Kina, ndotësi më i madh në botë ,  ka premtuar ta arrijë këtë qëllim deri në vitin 2060.  /Ad.Ab./

The post ANALIZË – BE-Kinë, 50 vjet marrëdhënie diplomatike mes tensioneve tregtare appeared first on Agjencia Telegrafike Shqiptare.

TIRANË, 25 korrik /ATSH/ Autoriteti Rrugor Shqiptar njoftoi sot se, ura auto-hekurudhore e Milotit, me një gjatësi prej 788 metrash, paraqet një rrezik serioz për qëndrueshmërinë dhe sigurinë e kalimit, si pasojë e dëmtimeve të konsiderueshme në themelet mbështetëse, erozionit të theksuar në bazament, për shkak të shfrytëzimit të pakontrolluar të zhavorrit të lumit, dhe gërryerjeve në të gjithë shtratin lumor.

Bazuar në ekspertizën teknike dhe duke marrë parasysh trafikun e rënduar, veçanërisht gjatë sezonit veror, ARRSH bën të ditur se, është marrë vendimi për mbylljen e plotë të urës dhe ndërprerjen e qarkullimit, deri në përfundim të projektndërhyrjes emergjente që po hartohet nga Autoriteti Rrugor Shqiptar, në bashkëpunim me Universitetin Politeknik të Tiranës. Kjo ndërhyrje do të zbatohet menjëherë në ditët në vijim.

Ndërkohë, ndërtimi i urës krejtësisht të re është parashikuar nga ARRSH si pjesë e programit “100 Ura”, i cili realizohet me mbështetjen e Bankës Botërore.

Gjatë periudhës së ndërhyrjes, ARRSH rekomandon përdorimin e rrugëve alternative: Rruga kryesore Lezhë – Milot dhe Rruga e Kombit.

ARRSH thekson se, kjo ndërhyrje është thelbësore për të garantuar sigurinë e të gjithë komunitetit.

Duke u ndërgjegjësuar për vështirësitë dhe shqetësimet që mund të shkaktojë mbyllja e përkohshme e urës, ARRSH shton se, kjo masë është e domosdoshme për të shmangur rreziqe më të mëdha dhe për të siguruar një infrastrukturë të qëndrueshme dhe të sigurt në të ardhmen.

/gj.m//r.e/

The post ARRSH ndërhyrje në urën e Milotit, ndërpritet qarkullimi appeared first on Agjencia Telegrafike Shqiptare.

PEKIN, 25 korrik /ATSH/- Kina po përjeton një shpërthim të infeksionit “Chikungunya” që përhapet nga mushkonjat, me mijëra raste të raportuara në jug të vendit, sipas AP.

“Rastet e etheve “Chikungunya” janë rritur në 4 014, duke regjistruar një rritje të shpejtë të rasteve që kur autoritetet filluan të gjurmojnë infeksionet dy javë më parë”, sipas Departamenteve Shëndetësore.

Guangdong, në provincën jugore të Kinës, është prekur rëndë nga rritja e infeksioneve.

Infeksioni “Chikungunya” përhapet tek njerëzit nga pickimet e mushkonjave të infektuara.

“Ai shkakton ethe dhe dhimbje të forta të kyçeve, por vdekjet janë të rralla”, sipas Organizatës Botërore të Shëndetësisë.

Raportet e medieve lokale thanë se autoritetet lokale pothuajse kishin dyfishuar numrin e shtretërve të izolimit të papërshkueshëm nga mushkonjat në 7 220 për të përmbushur kërkesat në rritje.

Kina regjistroi rritjen e parë të rasteve me “Chikungunya” në vitin 2010 – ku u raportuan 253 raste në Donguan.

“Rasti i parë në vend u importua në vitin 1987”, sipas të dhënave kërkimore dhe raporteve të medias. //a.i/

The post Kina Jugore goditet nga shpërthimi i infeksionit të transmetuar nga mushkonjat, “Chikungunya” appeared first on Agjencia Telegrafike Shqiptare.

UASHIGTON, 25 korrik /ATSH-DPA/- Në mosmarrëveshjen për tarifat me Bashkimin Evropian, presidenti i SHBA-së Donald Trump aktualisht i sheh shanset për të arritur një marrëveshje në rreth 50%.

“Do të thosha që kemi një shans 50 me 50, ndoshta edhe më pak, për të arritur një marrëveshje me BE-në. Nëse arrihet, ajo do të duhet të përfshijë uljen e tarifave nga ana e tyre, të cilat aktualisht janë 30%. Ata do të duhet t’i ulin – ndoshta. Ose mund të vendosin t’i lënë siç janë. Por ata duan shumë të bëjnë një marrëveshje”, u tha Trump gazetarëve para se të nisej për një vizitë pesëditore në Skoci.

Të mërkurën, Trump la të kuptohej mundësia e uljes së tarifave për importet e produkteve evropiane – nëse Bashkimi Evropian do te hapte tregun e tij më shumë për Shtetet e Bashkuara të Amerikës.

Trump sapo ka arritur një marrëveshje me Japoninë për tarifat prej 15% – që është dukshëm më pak se sa ishte planifikuar, fillimisht.

SHBA-ja ka negociuar një marrëveshje tregtare me BE-në për javë të tëra, e cila synon të parandalojë hyrjen në fuqi më 1 gusht – të tarifave prej 30% – të shpallura më herët nga Trump. //a.i/

The post SHBA – Trump: Shanset 50 me 50 për një marrëveshje tregtare me BE-në appeared first on Agjencia Telegrafike Shqiptare.

STAMBOLL, 25 korrik  /ATSH-DPA/  – Bisedimet për programin bërthamor midis Iranit dhe vendeve të njohura si E3, Gjermania, Franca dhe Britania e Madhe që u mbajtën sot në Stamboll, përfunduan pa ndonjë rezultat konkret, sipas burimeve iraniane.

“Patëm një diskutim serioz, të sinqertë dhe të detajuar”, shkroi në platformën X, Kasem Gharibabadi, zëvendësministri i Jashtëm Iranian për Çështje Ligjore dhe Ndërkombëtare.

“Sidoqoftë, u ra dakord që konsultimet të vazhdojnë,” shtoi ai.

Ky ishte takimi i parë mes zëvendësministrave të jashtëm të katër vendeve që prej sulmit të Izraelit kundër  Iranit muajin e kaluar.

Irani pret vizitë nga IAEA, por nuk lejon inspektime

Zëdhënësi i ministrisë së Jashtme iraniane, Esmaeil Baghaei, deklaroi se brenda “javëve të ardhshme” është planifikuar një vizitë e zëvendësdrejtorit të përgjithshëm të Agjencisë Ndërkombëtare për Energji Atomike (IAEA) në Teheran, për të diskutuar kuadrin e bashkëpunimit mes palëve.

“Inspektimi i objekteve bërthamore të dëmtuara gjatë luftës nuk është i planifikuar”, shtoi ai.

BE e shqetësuar, marrëveshja e Vjenës drejt skadimit

Diplomatët evropianë po përpiqen të rrisin presionin ndaj Teheranit që të angazhohet seriozisht në bisedime bërthamore.

Marrëveshja bërthamore e Vjenës e vitit 2015, e cila ka mbetur kryesisht joaktive, skadon zyrtarisht në mes të tetorit.

“Koha po mbaron,” paralajmëroi një diplomat para takimit, duke thënë se në mungesë të përparimit, vendet E3 mund të aktivizojnë mekanizmin e “snapback”, që do të rikthente automatikisht sanksionet e OKB-së ndaj Iranit. /Ad.Ab./

The post Turqi – Irani: Bisedimet bërthamore me fuqitë evropiane përfunduan pa rezultate appeared first on Agjencia Telegrafike Shqiptare.

TIRANË, 25 korrik /ATSH/ Këtë javë, 12 specialistë nga SPAK dhe Policia e Shtetit morën pjesë në kursin “Praktikat më të Mira Mjekoligjore në Macintosh”, njoftoi sot Ambasada e Shteteve të Bashkuara të Amerikës në Shqipëri.

Trajnimi u zhvillua nga Zyra e Ndihmës për Antiterrorizmin të Departamentit të Shtetit përmes Zyrës Rajonale të Sigurisë së Ambasadës.

Specialistët mësuan hollësitë e sistemit operues Mac dhe praktikuan aftësi praktike për të gjetur dhe analizuar të dhëna kritike në mbështetje të hetimeve kibernetike.

Ekspertiza dhe udhëheqja amerikane në teknologji është thelbësore për mbrojtjen e Shteteve të Bashkuara dhe aleatëve tanë nga kërcënimet kibernetike.

1 nga 6

/gj.m//r.e/

The post Ambasada e SHBA: 12 specialistë nga SPAK dhe Policia e Shtetit marrin pjesë në kursin e DASH appeared first on Agjencia Telegrafike Shqiptare.

TIRANË, 25 korrik /ATSH/ Kryeministri Edi Rama ndau sot pamje nga lirimi i plazheve publike në Kepin e Rodonit përgjatë bregdetit të Durrësit.

“Rikthejmë hapësirat publike për qytetarët dhe pushuesit, duke garantuar akses të barabartë dhe kushte dinjitoze për të gjithë”, shkroi Rama.

Prej datës 15 qershor ka nisur operacioni “Plazhe të pastra”, përmes të cilit Agjencia Kombëtare e Bregdetit mbështet 8 bashki bregdetare në pastrimin e plazheve, midis të cilave edhe Durrësin.

Nisur nga fakti se Durrësi ka një vijë bregdetare mjaft të gjatë këtë vit plazhet publike janë konceptuar të ndërprera me ato private, me qëllim që pushuesit të kenë mundësi t’i aksesojnë në segmente të ndryshme.

Po ashtu Bashkia ka pajisur të gjitha këto hapësira me sinjalistikën e duhur në terren.

Kepi i Rodonit është një tjetër perlë e Adriatikut që fton të gjithë pushuesit për të shijuar jo vetëm plazhin e mrekullueshëm, por edhe historinë që mbart ky vend.

Kepi i Rodonit ka formën e një trekëndëshi midis gjirit të Rodonit e atij të Lalëzit, formon një rrip toke në formë gadishulli që futet në brendësi të Detit Adriatik.

Ky xhevahir i natyrës është një vend jashtëzakonisht interesant mbi të gjitha për vendndodhjen e tij piktoreske: një kep shkëmbor që shtrihet drejt detit, formuar nga shkëmbinjtë e rrethuar me bimësi mesdhetare dhe lule aromatike.

Në këtë vend çdo vizitor gjen të ndërthurur më së miri historinë, me natyrën dhe detin. Në pjesën verilindore të Kepit ndodhet një ndër objektet më të rëndësishme të trashëgimisë kulturore, Kalaja e Skënderbeut.

/gj.m//r.e/

The post Lirimi i plazheve publike në Kepin e Rodonit, Rama: Rikthejmë hapësirat publike për qytetarët dhe pushuesit appeared first on Agjencia Telegrafike Shqiptare.

UASHINGTON, 25 korrik /ATSH/- Presidenti i SHBA-së, Donald Trump hodhi poshtë planin e Presidentit francez, Emmanuel Macron për të njohur shtetin palestinez në Asamblenë e Përgjithshme të Kombeve të Bashkuara, në shtator, sipas “Reuters”.

“Ajo që thotë ai nuk ka rëndësi”, u tha Trump gazetarëve në Shtëpinë e Bardhë.

“Ai është një djalë shumë i mirë. Më pëlqen, por kjo deklaratë nuk ka peshë”, theksoi Trump.

Macron i dërgoi një letër presidentit palestinez, Mahmoud Abbas duke e njoftuar për vendimin e tij.

Kjo vjen në përgjigje të një letre që Abbas i dërgoi Macron disa javë më parë, ku kërkohej dënimi i sulmit të Hamasit më 7 tetor, lirimi i menjëhershëm i pengjeve, mbështetje për çarmatosjen e Hamasit dhe theksohej angazhimi i Autoritetit Palestinez për t’ju nënshtruar reformave – për t’i lejuar atij – të qeverisë plotësisht Bregun Perëndimor dhe Gazën dhe të zhvillojë zgjedhje presidenciale deri në vitin 2026.

Presidenti francez, Macron e bëri njoftimin përpara një konference ndërkombëtare mbi zgjidhjen me dy shtete të organizuar nga Franca dhe Arabia Saudite që do të zhvillohet javën e ardhshme në selinë e OKB-së, në Nju Jork.

Zyrtarët sauditë thanë publikisht se shpresojnë që konferenca të nxisë më shumë vende për të njohur Palestinën.

“Franca do të vazhdojë me njohjen e plotë të Palestinës si shtet – kur unë të marr pjesë në Asamblenë e Përgjithshme të Kombeve të Bashkuara këtë shtator. Duke vepruar kështu, Franca synon të japë një kontribut vendimtar për paqen në Lindjen e Mesme dhe të mobilizojë të gjithë partnerët e saj ndërkombëtarë që dëshirojnë të marrin pjesë”, tha Macron.

“Ky qëndrim pasqyron angazhimin e Francës ndaj ligjit ndërkombëtar dhe mbështetjen e saj për të drejtat e popullit palestinez për vetëvendosje dhe krijimin e shtetit tonë të pavarur”, shkroi zëvendëspresidenti palestinez Hussein al-Sheikh në X.

Por, zyrtarë të shumtë izraelitë e dënuan njoftimin e Macron.

“Një shtet palestinez në këto kushte do të ishte një pikë nisjeje për të shkatërruar Izraelin – jo për të jetuar në paqe pranë tij”, tha kryeministri izraelit Benjamin Netanyahu në një deklaratë.

Ministri ultranacionalist i Financave, Bezalel Smotrich tha se Izraeli duhet t’i përgjigjet vendimit të Francës duke aneksuar zyrtarisht Bregun Perëndimor. Disa ministra të tjerë të qeverisë iu bashkuan thirrjes së tij.

Ministri izraelit i Mbrojtjes, Israel Katz tha se vendimi i Macron ishte një çmim për vrasësit dhe përdhunuesit e Hamasit që kryen masakrën më të keqe të hebrenjve që nga Holokausti. //a.i/

The post SHBA – Trump hedh poshtë planin e Macron për të njohur shtetin palestinez appeared first on Agjencia Telegrafike Shqiptare.

TEL AVIV, 25 korrik /ATSH-DPA/ – Kryeministri izraelit Benjamin Netanyahu e cilësoi grupin palestinez “Hamas” si një “pengesë” për arritjen e një marrëveshjeje, pas një dështimi të ri në negociatat indirekte për armëpushim në luftën në Gaza.

Një marrëveshje armëpushimi do të përfshinte gjithashtu lirimin e pengjeve që mbahen ende nga “Hamas”.

“Së bashku me aleatët tanë amerikanë, po shqyrtojmë opsione alternative për të kthyer pengjet në shtëpi, për të shkatërruar sundimin terrorist të “Hamasit” dhe për të siguruar paqe të qëndrueshme për Izraelin dhe rajonin tonë”,  shkroi sot Netanyahu  në platformën X.

Sipas burimeve izraelite, në Rripin e Gazës ndodhen ende rreth 50 pengje, dhe mendohet se të paktën 20 prej tyre janë ende gjallë.

Negociatat në Doha në ngërç

Bisedimet për armëpushim në Doha, të ndërmjetësuara nga SHBA-ja, Egjipti dhe Katari, u bllokuan sërish dje.

Sipas burimeve izraelite dhe amerikane, Hamas ka penguar bisedimet duke paraqitur kërkesa të tepruara. Nga ana tjetër, Hamasi shprehu habinë e tij, duke thënë se kishte bërë lëshime së fundmi ndaj Izraelit.

Delegacionet amerikane dhe izraelite janë thirrur në kryeqytetet e tyre për konsultime, sipas raporteve. Megjithatë, nuk dihet nëse dhe kur do të rinisin bisedimet.

Çfarë nënkuptojnë “opsionet alternative”?

Nuk është ende e qartë se çfarë ka nënkuptuar Netanyahu me “opsione alternative”. Asnjëra palë nuk e ka deklaruar zyrtarisht përfundimin e negociatave në Doha, por deklarata e tij mund të jetë një sinjal në atë drejtim.

Gjithashtu, kërcënimi për ndërprerjen e procesit diplomatik dhe për masa më të ashpra ushtarake në Gaza mund të jetë një strategji për të detyruar Hamasin të tërhiqet nga kërkesat e tij. /Ad.Ab./

The post IZRAEL – Netanyahu po shqyrton “opsione alternative” për lirimin e pengjeve në Gaza appeared first on Agjencia Telegrafike Shqiptare.

TIRANË, 25 korrik /ATSH/ Ministria e Mbrojtjes njoftoi sot se vijon ndërhyrja për shuarjen e flakëve në zonën e fshatit Vergo në Delvinë, një nga tre fshatrat e përfshirë nga zjarri në bashkinë Delvinë.

Në terren ndodhen katër mjete zjarrfikëse, 60 efektivë të Forcave të Armatosura dhe dy helikopterë “Cougar” që po punojnë për izolimin e flakëve dhe mbrojtjen e banesave.

Banorëve të fshatrave Vergo, Palavli dhe Kopaçëz u bëhet thirrje të ndjekin udhëzimet e emergjencave civile dhe të bashkëpunojnë me autoritetet lokale dhe forcat e sigurisë.

Gjithashtu 62 efektivë të Repartit Gjirokastër, pjesë e Regjimentit të Këmbësorisë së Jugut, Forca Tokësore, janë angazhuar në operacionet për emergjencat civile për shuarjen e zjarreve në fshatin Palavli, Bashkia Delvinë.

1 nga 6

/gj.m//r.e/

The post MM: Vijon ndërhyrja për shuarjen e flakëve në zonën e fshatit Vergo në Delvinë appeared first on Agjencia Telegrafike Shqiptare.

TIRANË, 25 korrik /ATSH/ Edicioni i nëntë i Zâ Fest nisi midis artit, historisë dhe muzikës.

Zâ Fest është një festival që prej vitesh bashkon zërat më të veçantë të rajonit në një dialog të gjallë mes traditës dhe modernes.

Me mbështetjen e Bashkimit Evropian, për të nëntin vit radhazi, ky festival mbetet një shembull i diplomacisë kulturore, ku kultura bëhet ura që lidh komunitetet, nxit përfshirjen dhe forcon identitetin evropian të Shqipërisë.

Pikërisht në këtë frymë, një nga pikat kulmore të mbrëmjes së parë ishte hapja e ekspozitës “Me rrojt pa ik?” një koleksion nomad me 15 piktura nga artistë të rinj të rajonit adriatiko-jonian, që trajtojnë sfidat dhe ëndrrat e rinisë sot.

Një prej tyre, Ema Bregu nga Shqipëria, solli një qasje të guximshme mbi trashëgiminë kulturore shqiptare.

Pas një nate të mbushur me tregime, dokumentarë dhe muzikë, festa vazhdon.

Dy netë të bukura presin qytetarët sot dhe nesër në Kalanë e Shkodrës, me muzikë e atmosferë që vetëm Zâ Fest mund t’i sjellë.

Edhe kryeparlamentarja, Elisa Spiropali ftoi qytetarët që ta ndjekin këtë festival.

“Mos e humbisni Zâ Fest sot dhe nesër, në Kalanë e mrekullueshme të Shkodrës”, shkroi Spiropali në rrjetet sociale.

1 nga 15

/gj.m//r.e/

The post Zâ Fest, një natë magjike në zemër të Shkodrës appeared first on Agjencia Telegrafike Shqiptare.

MOSKË, 25 korrik /ATSH/- Kremlini tha sot se një takim midis presidentit rus Vladimir Putin dhe homologut të tij ukrainas Volodymyr Zelenskiy mund të ndodhë vetëm si një hap i fundit për të nënshkruar një marrëveshje paqeje, sipas “Reuters”.

Zëdhënësi i Kremlinit, Dmitry Peskov tha se ishte e pamundur që një takim i tillë të mund të ndodhte deri në fund të gushtit, siç ka propozuar Ukraina.

“Takimi mund dhe duhet të vendosë pikën përfundimtare mbi një zgjidhje dhe të çimentojë modalitetet dhe marrëveshjet e përpunuara nga ekspertët. Është e pamundur ta bëjmë anasjelltas”, u tha Peskov gazetarëve.

“A është e mundur të kalohet nëpër një proces kaq kompleks brenda 30 ditësh? Epo, natyrisht, është e pamundur”, shtoi ai.

Ukraina tha se një takim i udhëheqësve ishte i nevojshëm për të arritur një progres në procesin që po ecën ngadalë, gjatë të cilit janë zhvilluar tre seanca të shkurtra bisedimesh paqeje në Turqi që nga mesi i majit.

Zelenskiy u tha gazetarëve se Rusia kishte filluar të angazhohej për mundësinë e një takimi të tillë.

“Ata kanë filluar ta diskutojnë atë. Ky është një progres drejt një formati të tillë takimi,” tha ai.

Një delegat ukrainas tha pas raundit të fundit të bisedimeve të paqes të mërkurën, të cilat zgjatën vetëm 40 minuta, se Kievi kishte propozuar një takim midis Putinit dhe Zelensky-t në gusht – pasi kjo përkonte me afatin 50-ditor që presidenti i SHBA-së Donald Trump kishte vendosur javën e kaluar për një marrëveshje. //a.i/

The post MOSKË – Kremlini: Takimi Putin-Zelensky vetëm në pikën përfundimtare të marrëveshjes së paqes appeared first on Agjencia Telegrafike Shqiptare.