Komiteti për Punët e Jashtme i Parlamentit Evropian miratoi një raport të ri për Shqipërinë, në 4 Qershor 2025 me 57 vota pro, 11 kundër dhe 6 abstenime duke rikonfirmuar statusin e saj si një nga vendet e Ballkanit Perëndimor me mbështetjen më të lartë për anëtarësimin në BE, dhe me një mesazh të qartë: ka ende shumë për të bërë.

Raporti në një anë përshëndet përputhshmërinë e Shqipërisë me politikën e jashtme dhe të sigurisë së BE-së dhe synimin ambicioz për të përmbyllur negociatat e anëtarësimit deri në vitin 2027.

Kryetarja e Kuvendit, Elisa Spiropali e quajti raportin si një konfirmim të qartë që “Shqipëria mbetet një histori suksesi” dhe “një vend pararojë për anëtarësimin në BE”.

“Raporti nënvizon qartësisht angazhimin e qëndrueshëm të Shqipërisë ndaj reformave kyçe, përfshirë forcimin e shtetit të së drejtës, funksionimin e institucioneve të drejtësisë të dala nga reforma, mbrojtjen e të drejtave themelore dhe të pakicave si dhe përparimin në luftën kundër korrupsionit dhe krimit të organizuar.” – tha Spiropali nga Kryesia e Kuvendit.

Si duhet kuptuar rezoluta

Në thelb, kjo rezolutë përmblodhi të gjitha problematikat që ka Shqipëria, shpjegon studiuesi Afrim Krasniqi – si nevojën për forcimin e institucioneve të pavarura dhe institucioneve të drejtësisë, nevojën për akte ndaj korrupsionit, për reforma të thella, dialog politik dhe për një lloj qasje europiane të shoqërisë dhe jo vetëm përdorim politik të konceptit të europës dhe integrimit europian.

Për Gledis Gjipalin, njohës i politikave europiane dhe drejtues ekzekutiv i “Lëvizjes Europiane Shqiptare”, duke e lexuar në vijimësi të raporteve e deklaratave të mëparshme të Komisionit apo Parlamentit Europian, kjo rezolutë nuk ka asgjë të re.

“Mënyra sesi reaguan institucionet shqiptare mendoj që është e gabuar nga të gjitha palët politike. Secila palë përfitoi nga fakti që anetarë të komisionit janë përfaqësues të partive politike dhe në deklarimet e tyre theksuan afrimitetin që ata kanë me subjete të caktuara në Shqipëri.” – argumenton Afrim Krasniqi .

Në përfundim, rezoluta sipas Krasniqit i përshtatet prioriteteve të shoqërisë shqiptare dhe  duhet përdorur si një planimetri për të projektuar rrugën drejt integrimit europian dhe jo në funksion të axhendave personale dhe afatshkurtra politike.

Çfarë shkruhet në rezolutë

Komiteti për Punët e Jashtme të Parlamentit Europian mirëpiti “përparimin e bërë në reformën në drejtësi dhe në hetimin e korrupsionit të lartë”, por e sheh ende si sfidë ndërhyrjen politike, duke kërkuar përpjekje të vazhdueshme për ruajtjen e pavarësisë së gjyqësorit.

Komiteti shprehu “nevojën urgjente” për të përmirësuar pavarësinë e gjyqësorit, për të luftuar krimin e organizuar dhe për të mbrojtur të drejtat themelore. Pluralizmi mediatik dhe transparenca institucionale u veçuan në raport si thelbësore.

Ndërhyrjet e huaja, veçanërisht ato të lidhura me Kremlinin, kërcënojnë proceset demokratike dhe ambicien europiane të Shqipërisë – shkruan rezoluta. Në lidhje me procesin zgjedhor, raporti përshkruan zgjedhjet parlamentare të vitit 2025 si “garuese”, por të zhvilluara në një klimë të tensionuar politike, me shqetësime për përdorimin e burimeve të administratës. Eurodeputetët kërkojnë reforma të thella në përputhje me rekomandimet e OSBE/ODIHR dhe Komisionit të Venecias.

Më 25 maj, ministrja e Turizmit dhe Mjedisit, Mirela Kumbaro, bëri të ditur aplikimin për të përfshirë luginën e Vjosës në listën e Organizatës për Edukim, Shkencë dhe Kulturë të Kombeve të Bashkuara (UNESCO) si pjesë e Rrjetit të Rezervave të Biosferës. Megjithatë, vendimi përfundimtar do të merret në shtator 2025, gjatë sesionit të 37-të […]

The post “Vjosa gati për UNESCO”, por sfidat mbeten appeared first on BoldNews.al.

Përtej flamujve dhe sloganeve kombëtare, qëndron një rrjet interesash ekonomikë të lidhur me Grupin Kastrati, një koncesion pa garë dhe një kompani ajrore që nuk ekziston realisht. Gjatë ceremonisë për nisjen e fluturimeve në Aeroportin Ndërkombëtar të Vlorës, Kryeministri Edi Rama deklaroi se në Aeroportin e Kukësit do të fillojë operimin një kompani ajrore e re me […]

The post Mashtrimi/ “Air Kosova” dhe një iluzion fluturues i propagandës dhe i interesave të fshehura appeared first on BoldNews.al.

Dy media ndërkombëtare, Fox News dhe Politico, kanë hedhur vështrimin mbi arenën politike shqiptare në prag të zgjedhjeve parlamentare, duke e interpretuar përplasjen Rama-Berisha si reflektim të tensioneve gjeopolitike që tejkalojnë kufijtë kombëtarë. Fox News paraqet përballjen si një luftë me tone ideologjike mes ish-Presidentit amerikan Donald Trump dhe filantropit George Soros, ndërsa Politico e sheh situatën si një pasqyrim të fërkimeve strategjike mes Bashkimit Europian dhe Shteteve të Bashkuara, me ndikim të mundshëm në rrugën europiane të Shqipërisë.

Por ekspertët, të intervistuar nga Faktoje, e konsiderojnë këtë krahasim të nxitur më shumë nga taktikat elektorale sesa nga realitetet politike, dhe vlerësojnë se ai nuk përbën kërcënim real për integrimin europian të vendit.

Një Përballje “Trump vs Soros” në versionin shqiptar?

Fox News njihet për një linjë editoriale konservatore, duke mbështetur shpesh politikanë dhe politika të Partisë Republikane. Kjo media ka qenë veçanërisht mbështetëse ndaj Donald Trump gjatë presidencës së tij dhe kritike ndaj Partisë Demokratike dhe mediave liberale.

Në analizën e Fox News për zgjedhjet në Shqipëri, autorja Beth Bailey sugjeron se gara politike në Shqipëri është kthyer në një përfaqësim indirekt të përplasjes mes Donald Trump dhe George Soros. Ajo thekson praninë e Chris LaCivitas, strategut të fushatës së Trump, në ekipin e Sali Berishës, ndërsa rikujton lidhjet e njohura mes kryeministrit Edi Rama dhe familjes Soros.

LaCivitas e përforcoi këtë narrativë, duke deklaruar për Fox News se Berisha është “një mik i vërtetë i Shteteve të Bashkuara dhe… do të bashkëpunonte me sukses me Presidentin Trump dhe Shtetet e Bashkuara”, duke e cilësuar Ramën si “kukull të George Soros”.

Marrëdhënia e Ramës me Soros është e dokumentuar dhe publike. Kryeministri e ka theksuar shpesh afërsinë e tij me George Soros dhe veçanërisht me të birin, Alex Soros, me të cilin është fotografuar në mënyrë të përsëritur gjatë viteve të fundit.

Megjithatë, për analistët politikë shqiptarë, ky paralelizëm është artificial. Sipas Adrian Shtunit, ekspert i politikës ndërkombëtare dhe botues, qëllimi i Berishës për t’u pozicionuar në të njëjtën linjë me Trump është i qartë dhe i qëllimshëm: “Ai huazon slogane dhe mesazhe politike pothuajse identike,” thotë Shtuni, duke nënvizuar tri arsye kyçe pas kësaj strategjie.

Së pari, sipas tij, është dëshira për të replikuar në Shqipëri fitoren e Trump në SHBA: “Nëse ka funksionuar për republikanët në SHBA, duhet të funksionojë edhe në Shqipëri për të djathtën.” Në fakt, në zgjedhjet presidenciale të vitit 2024 në SHBA, Trump arriti të mposhtë Kamala Harris me mbi 2 milionë vota diferencë.

Edhe pse në Shqipëri sondazhet nuk pasqyrojnë të njëjtën prirje, të dhënat nga Barometri i Euronews Albania tregojnë se Berisha ka shënuar rritje të   pëlqyeshmërisë së figurës së tij nga janari në prill.

Së dyti, sipas Shtunit, është përpjekja për të paraqitur konfliktin lokal si pjesë të një përplasjeje ideologjike më të gjerë midis së djathtës anti-globaliste dhe së majtës globaliste.

Kjo, sipas tij, çon edhe një mesazh të drejtpërdrejtë ndaj elektoratit: “partneri jonë ideologjik fitoi në SHBA; ne jemi me fituesin; votoni ata që janë me fituesin”, shpjegon Shtuni.

Së treti, dhe më personalja: “Kjo është një përpjekje e Berishës për të sinjalizuar afërsi ideologjike me Trump dhe për të kërkuar rishikimin e shpalljes non grata nga Departamenti Amerikan i Shtetit,” sipas Shtunit.

“Në fund të fundit imitimi është forma më e lartë e komplimentit dhe mendoj se z.Berisha dhe poli i tij politik po mundohen të pozicionohen strategjikisht sa më sipër, duke shfrytëzuar edhe këshillat, përvojën dhe lidhjet që ofron z.LaCivitas”, argumenton ai.

Edhe Ledion Krisafi, njohës i politikës ndërkombëtare, bie dakord me këtë vlerësim, duke vënë në dukje se Berisha në të kaluarën ka pasur lidhje me rrjetin e Soros dhe se distancimi i tij i tanishëm është strategjik: “Berisha është bërë anti-sorosian i kohëve të fundit vetëm me qëllim për t’i bërë përshtypje Trumpit që t’i heqë non gratën,” thekson Krisafi.

Për Krisafin, huazimi i ideve të Trump-it nga Berisha është thjesht një kalkulim personal: “Shumica e këtyre ideve nuk kanë asnjë lidhje me realitetin politik dhe social në Shqipëri. Është vetëm për të bërë përshtypje” Megjithatë, ai e konsideron fakt pozitiv për Berishën që një media si Fox News i ka dhënë vëmendje këtij krahasimi.

Politico dhe tensionet BE–SHBA: Një Shqipëri në mes

Politico në anën tjetër një burim profesional dhe relativisht i balancuar, shpesh mund të përceptohet si më afër qëndrimeve liberale apo të qendrës së majtë në spektrin politik amerikan Artikulli i Politico ofron një tjetër interpretim të dinamikës elektorale në Shqipëri. Gara mes Ramës dhe Berishës shihet si pasqyrë e mundshme mes tensioneve mes BE-së dhe SHBA-së në kuadër të “luftës tregtare” transatlantike, duke sugjeruar se rreshtimi i Shqipërisë me politikat ekonomike të Brukselit mund të sjellë sfida në marrëdhëniet me Uashingtonin.

Geron Kamberi, studiues i marrëdhënieve ndërkombëtare shpjegon se edhe pse “krisja” e marrëdhënieve mes SHBA dhe BE është aty, ajo nuk sjell ndonjë pasojë për Shqipërinë pasi kjo e fundit nuk ka rol në rikonfigurimin e ri të marrëdhënieve transatlantike.

Sipas Adrian Shtunit situata nuk përbën një kërcënim real: “Unë nuk parashoh që përplasja mbi tarifat mes BE-së dhe SHBA-së do të ketë ndikim negativ në marrëdhëniet SHBA–Shqipëri. Edhe vetë vendet e BE-së nuk kanë një qëndrim të unifikuar mbi këtë çështje, prandaj nuk mendoj se do të kërkonin me ngulm një pozicion të caktuar nga Shqipëria”

Sipas tij, palët do të arrijnë një marrëveshje pragmatiste që do të rikthejë ekuilibrin tregtar. Këtë pikëpamje e ndan edhe Krisafi: “Lufta tregtare nuk do zgjasë shumë. Efektet e saj tashmë janë të dukshme në bursa dhe tregti. SHBA nuk po përfiton realisht, ndaj mendoj se një marrëveshje do të arrihet shpejt, pa e vendosur Shqipërinë në pozitën e zgjedhjes mes dy aleatëve”

Një tjetër garant, sipas Geron Kamberit, është edhe “objektivi strategjik i Shqipërisë për anëtarësim në BE, që ka qenë i palëkundur në të gjitha partitë politike në vend ndërkohë që dy partitë kryesore (PS dhe PD) shpesh i kanë shndërruar fushatat elektorale në “pista të Formula Uno” se kush kishte “makinën më të shpejtë të premtimeve” për ta anëtarësuar Shqipërinë me BE.

The post Zgjedhjet në Shqipëri marrin nuanca ndërkombëtare: Trump, Soros dhe një strateg i ri në Tiranë appeared first on Faktoje.al.

Të dhënat e monitorimit të mediave audiovizive të analizuara nga BIRN, tregojnë se gjatë gjysmës së parë të fushatës zgjedhore, televizionet e kanë fokusuar lenten te dy liderët kryesorë politikë, Edi Rama dhe Sali Berisha. Në më pak se dy javë, 3.7 milionë qytetarë shqiptarë brenda dhe jashtë vendit, do të kenë mundësinë që t’i […]

The post Mediat televizive kthehen në “zgjatim” të propagandës partiake gjatë fushatës appeared first on BoldNews.al.

Se si do të arrihet rezultati i 11 Majit, mjafton të bisedosh me një punonjës të thjeshtë të administratës për shantazhin sistematik mbi vendin e punës, mjafton të shohësh si përsëriten shabllon transmetimet e fushatës në edicionet e lajmeve apo të lexosh përgjimet e SKY ECC për organizatën kriminale të Elbasanit, përgjimet e dosjes “Çyrbja” […]

The post Katër sondazhet/ Si përdoren shifrat për propagandën e 11 Majit appeared first on BoldNews.al.

Komisioni Qendror i Zgjedhjeve i cilësoi të mërkurën si me karakter informues postimet me pamje propagandistike të Ministrisë së Energjisë dhe Infrastrukturës, Belinda Balluku – duke miratuar ripostimin e tyre nga institucionet dhe kompanitë publike. “Nga verifikimet e kryera, rezulton se postimet e publikuara nga shoqëria Albgaz sh.a janë të natyrës informuese dhe përmbajnë aktivitete që lidhen […]

The post KQZ i shkel syrin ‘propagandës’ së institucioneve publike për Belinda Ballukun appeared first on BoldNews.al.

Nga Sebi Alla Pas një procesi të gjatë, shpesh me shumë probleme teknike dhe vështirësi në plotësimin e dokumentacionit, rreth 246 000 emigrantë shqiptarë u regjistruan si votues për zgjedhjet e përgjithshme parlamentare të 11 majit. Të gjithë subjektet politike, përfshi edhe partitë e reja, kanë zhvilluar disa takime në diasporë, veçanërisht në Greqi, Itali dhe Gjermani, tre nga shtetet që regjistrojnë numrin më të madh të emigrantëve.

PS

Kryeministri Edi Rama ka zhvilluar disa takime në diasporë, duke e shtrirë narrativën e tij kryesisht në funksion të fushatës me moton se me PS dhe Ramën shtetasit shqiptarë që jetojnë dhe punojnë jashtë vendit kanë rritur prestigjin. Në takimet e javëve të fundit në diasporë, Rama është munduar që të sigurojë pjesëmarrje të madhe, krijim entuziazmi dhe nxitje për të votuar. Në fjalimet e kryeministrit përballë emigrantëve, hapësirën kryesore e zë “motoja kryesore” e fushatës së ngritur mbi premtimin e “pasaportës europiane”, një ligjërim i vazhdueshëm politik dhe thelbi i fushatës elektorale të PS-së. “Kijeni parasysh që pasaporta shqiptare e BE është njësoj si pasaporta greke e BE. Me pasaportën shqiptare të BE ju mund të qëndroni këtu, mund të punoni, mund ta transferoni këtu çdo të ardhur nga pensioni atje dhe ndërkohë shteti këtu duhet dhe ju njeh që në momentin që merrni pasaportën, pensionin për punën që keni bërë këtu”, tha Rama, në një takim të mbajtur me shqiptarë që punojnë dhe jetojnë në Kretë të Greqisë. Duke përdorur “pasaportë europiane” , Rama synon të lidhë një simbol të fortë për shqiptarët në emigracion, që lidhet jo vetëm me identitetin në këtë rast, por edhe përfitimet konkrete që ata mund të marrin. Duke i mëshuar optimizmit, Rama siguron gjithashtu edhe mbështetje emocionale, jo vetëm racionale. Premtimin mund ta konsiderojmë edhe një teknikë të zakonshme propagandistike sa kohë që (deri tani) askush nuk jep garanci që kjo do të realizohet në vitin 2030 (siç ka premtuar rëndom kryeministri) edhe pse gjatë atij takimi Rama nuk preku afate apo plan konkret.

PD

Nëse fushata e PS-së është përqendruar në simbolikën dhe premtimin për “pasaportën europiane” por pa data dhe shpjegim konkret sesi do të arrihet, PD dhe Berisha kanë një tjetër qasje me diasporën. Në qëndrimet e tij Berisha bën përgjegjës Ramën për largimin masiv të shqiptarëve. “11 maji është dita e tyre dhe fundi yt. Më 11 maj do vërshojnë nga deti dhe toka e ajri në Shqipëri. Shqiptarët i lindin nënat për të luftuar për liri, për t’i dalë zot Shqipërisë. Prite diasporën Edi Rama, nuk ke vend mbi tokë”, tha Berisha, në një takim të mbajtur me shqiptarët e diasporës në Napoli të Italisë. Në ligjërimin e Berishës, Rama paraqitet si shkaktari i drejtpërdrejtë i largimit masiv të shqiptarëve. Me fraza të tipit si “11 maji është dita e tyre dhe fundi yt” dhe “prit diasporën… nuk ke vend mbi tokë”, Berisha synon ta trajtojë pjesëmarrjen në votim si një betejë “për jetë a vdekje politike”

Lista

Partia Demokratike përzgjodhi shtatë kandidatë për deputetë si përfaqësues të diasporës, por që të gjithë në listat e hapura, çka ua vështirëson mundësinë që të sigurojnë një vend në Kuvend. Edhe Partia Socialiste nuk e pa të arsyeshme për të pasur në listat e saj disa përfaqësues të diasporës, duke u mjaftuar vetëm dy, një në listën e mbyllur dhe një tjetër në listën e hapur.  Pavarësisht numrit të prej 246 000 votuesish nga diaspora, vota e tyre do ndahet në 12 qarqe të vendit.

Programet e përcipta PS-PD

Në platformën programore, mbi realizimet dhe atë që premton në katër vitet e ardhshme, Partia Socialiste nuk ka program specifik për diasporën, duke përfshirë në tërësi të platformës disa fraza, me thirrjen që emigrantët të investojnë në Shqipëri, kryesisht në agroturizëm. Ndërsa si arritje në qeverisjen e saj të mëparshme, PS përmend njohjen e patentave në disa shtete dhe marrëveshjet për pensionet, e realizuar vetëm me Italinë. “Kemi sjellë 52 shërbime online për diasporën, kemi hapur dyert e 126 vendeve pa viza për shqiptarët dhe kemi nënshkruar marrëveshje që patentat shqiptare të njihen në 11 shtete, për t’ua bërë jetën më të lehtë bashkëkombësve tanë kudo që janë”, thuhet në programin e PS-së. Ndërsa si premtime për katër vitet e ardhshme, PS përmend diasporën në disa sektorë, por jo specifikisht si nëndarje programore. “Transformojmë përmes digjitalizimit shërbimet e punësimit, me një sistem të zgjuar për orientimin e karrierës dhe një platformë të veçantë për emigrantët që duan të rikthehen e të punojnë në Shqipëri”- citohet në program. Një tjetër pikë, por pa të dhëna konkrete mbi mënyrën e realizimit përfshihet edhe fjalia: “Intensifikojmë marrëdhëniet me diasporën, duke e shndërruar atë në një forcë zhvillimi për Shqipërinë”.

Pikat

Partia Demokratike dhe koalicioni “Shqipëria Madhështore”, prej dhjetë ditësh ka paraqitur një program më konkret e ndarë në pesë pika kyçe. Edhe në këtë program tre pika cilësohen si të prekshme, ndërsa dy të tjera janë derivate të përgjithshme. “Zero taksa për 5 vite për çdo emigrant që kthehet dhe investon në Shqipëri”-është premtimi i parë në program, ndërsa si pikë të dytë citohet: “Strehim i lehtësuar për familjet që kthehen dhe vendosen në Shqipëri” dhe “Njohje dhe lehtësime të diplomave dhe përvojës profesionale të fituar jashtë vendit”.

Të tria pikat programore cilësohen premtime konkrete, ndërsa dy frazat e tjera si: “Paga dinjitoze dhe mundësi punësimi për të garantuar jetë të qëndrueshme dhe shpresë për të ardhmen; dhe “Rikthimi i emigrantëve si prioritet qeveritar dhe pjesë e planit për ripopullimin e vendit”- nuk shoqërohen me projekte specifike sesi do të realizohet qëllimi për paga dinjitoze dhe ripopullimi i vendit.

Realiteti

Por si qëndron realiteti i deritashëm përballë premtimeve? Ndërsa palët shpresojnë që diaspora të bëjë ndryshimin, premtimet dhe programet politike për ta mungojnë, ose janë sipërfaqësore dhe nuk prekin thelbin e shqetësimeve që kanë shtetasit tanë që jetojnë jashtë vendit. Gjithashtu përfaqësimi i tyre në Parlamentin e ardhshëm do të jetë minimal. Në takime të ndryshme dhe qëndrime publike nga shoqata dhe organizata që përfaqësojnë diasporën shqiptare, si çështje shqetësuese ngrenë mungesën e shkollave shqipe. Fëmijët e emigrantëve po harrojnë gjuhën dhe ky mbetet fenomen shqetësues. Pika tjetër është largësia e Ambasadave dhe Konsullatave. Ata kërkojnë hapjen e disa konsullatave sidomos në qytete ku komuniteti shqiptar është në numër të lartë. Ankesa të shumta vijnë edhe për Ambasadorë, konsuj dhe përfaqësues të tjerë të ambasadave shqiptare në botë të cilët i konsiderojnë si të shkëputur nga problemet e emigrantëve shqiptarë. Pajisja me dokumentacione të ndryshme për rinovimin e lejeve të qëndrimit cilësohet gjithashtu shqetësim serioz, pasi nuk mundin të marrin në kohë shërbimin e duhur sidomos në konsullata, duke u rrezikuar ripërtëritjen e dokumentave të leje-qëndrimit të emigrantëve shqiptarë në vende të ndryshme të Europës.

Projeksionet

Ndërkohë, referuar shifrave të përpunuara më herët nga Faktoje, PS-ja mund të sigurojë mandate shtesë në Elbasan, Dibër dhe Tiranë, ndërsa PD-ja mund të përfitojë në Shkodër, Berat, Gjirokastër dhe  Vlorë. Deri më tani, sipas përllogaritjeve paraprake mund të flasim vetëm për tre mandate të sigurta që mund të ofrojë vota e diasporës edhe pse rregjistrimi për të votuar është i konsiderueshëm   

The post Fushata për diasporën, premtime të përcipta dhe patriotizëm emocional   appeared first on Faktoje.al.

Në nisje të fushatës për mandatin e katërt, Kryeministri Edi Rama mbajti një fjalim ku dominuan lëvdatat për arritjet e pretenduara të qeverisë dhe disa premtime për katër vitet e ardhshme. Një analizë e thjeshtë e këtij fjalimi ngre pyetje mbi prioritetet e kësaj fushate dhe lidhjen e saj me realitetin e qytetarëve.

Një gjë që bie në sy prej fillimit është se fjalimi nuk është hartuar për të adresuar çështjet e zakonshme dhe “të mërzitshme” të përditshmërisë, si uji i pijshëm apo çmimet, por për të projektuar një horizont më të gjerë, atë të daljes përtej kufijve të vendit, ndoshta edhe si mënyrë për të shmangur diskutimet brenda tyre.

Faktoje vendosi të analizojë fjalimin e kryeministrit duke identifikuar fjalët, që ai përdori më shpesh dhe ato që ai përdori më rrallë në prezantimin e programit për mandatin e 4-t qeverisës.

Fjalët që u dëgjuan më shpesh gjatë thuajse 2 orëve fjalim ishin “Europiane/ë” (65 herë) dhe “Pasaporta” (34 herë), të cilat formojnë thelbin e sloganit të ri politik të socialistëve. Ky vizion për integrimin evropian u paraqit si suksesi i ardhshëm historik që pritet të finalizohet në mandatin e katërt.

Një joshje kjo për shqiptarët, ironikisht edhe për mundësinë e largimit nga Shqipëria drejt vendeve të BE-së, vëren politologu Ermal Hasimja për Faktoje.  E përpos kësaj, “Shqipëria 2023 në BE” ka edhe një përllogaritje tjetër elektorale, sipas tij.

Edhe pedagogu i gazetarisë Lufti Dervishi e sheh “pasaportën europiane” si element propagandistik, përkundër një komunikimi llogaridhënës që i takon një programi elektoral.

“Përdorimi i tepruar i fjalëve si ‘europianë’, ‘pasaportë’, apo ‘mandati i katërt’ nuk ka si synim informimin e qytetarëve, por mobilizimin emocional dhe politik të elektoratit.”  Lutfi Dervishi, pedagog.

Po aq e theksuar ishte edhe fraza “kur morëm detyrën” (29 herë) një kujtesë që rikthimi në kohën para 2013-s është ende pjesë e manualit elektoral. Fill pas saj shfaqet edhe gjuha denigruese. Termin “këneta” kryeministri e përdori 20 herë në fjalim.

Megjithatë, fjalët që prekin jetën e përditshme të qytetarëve dhe standardet bazë të të qënit vërtetë europian, si “ujë” (një herë), “çmime”, “siguri ushqimore”, apo “subvencione” dhe “fermer” u përmendën fare pak ose aspak.

Ky, sipas Dervishit, është tregues i neglizhencës ndaj politikave thelbësore të zhvillimit afatgjatë të vendit.

Pengesë për premtimet konkrete të qeverisë, Ermal Hasimja sheh vetë rezultatet e 3 qeverive të mëparshme.

“Nuk mund të bëjë premtime konkrete për një pjesë të mirë të kushteve bazë të jetesës si uji, shëndetësia apo arsimi, sepse do të ishte përsëritje e premtimeve të pambajtura”, argumenton Ermal Hasimja.

Për qytetarin, ky fjalim nuk është një manual për katër vitet e ardhshme, por një broshurë marketingu për një produkt ende në zhvillim, ose siç e quajti gazetari Lutfi Dervishi “një pasqyrë e asaj që dëshiron të dëgjojë elektorati më shumë sesa një reflektim real mbi problemet që kërkojnë zgjidhje”

The post Fjalimi që synon pasaportën europiane, por jo ujin e pijshëm appeared first on Faktoje.al.

Publikimi i bisedave të përgjuara të Veliajt në burg, na tregoi përpos të tjerave, se SPAK, poashtu si partitë politike, apo edhe vetë kryebashkiaku në detyrë i Tiranës, ka në dispozicion një makineri të fortë mediatike. Po të kthejmë pak filmin pas, në ditët kur Erion Veliaj do dilte para gjykatës së apelit për të vlerësuar masën e arrestit me burg ndaj tij, në publik shpërtheu një fortunë e vërtetë. Thelbi i saj konsistonte në ato që u quajtën provat e reja, të cilat do e gozhdonin në burg të arrestuarin më të famshëm të politikës shqiptare. Nga kangjellat e SPAK-ut shfaqeshin reporterë që transmetonin live tmerret e këtyre përgjimeve. Në titujt e televizioneve dhe gazetave kjo fabul u mor si e mirqenë duke iu kushtuar një hapsirë përtej normales. Në një farë mënyre, viktima të kësaj atmosfere të përgjithshme ramë edhe ne tek Lapsi.al, duke folur për këto fakte të reja që mund ta linin Veliajn në burg, ndonëse nuk kishim parë, prekur apo lexuar asnjërin prej tyre. 

Sot kur bisedat e “Lalit” me gruan dhe të vëllain po zbardhen njëra pas tjetrës e vërteta po rezulton ndryshe nga ç’u shit në 11, 12 apo 13 mars. Në komunikimet e bëra publike vërtet shihet një tendencë për të ushtruar presion politik dhe mediatik mbi gjykatësit apo prokurorët, por aty përpos vizatimit të karakterit perverso-qesharak të stërnjohur të Veliajt, nuk vërehet ndonjë provë flagrante. Edhe më e fortë bëhet kjo bindje po të qëmtosh me kujdes dialogjet. Aty edhe vetë i burgosuri edhe familjarët e tij që gjenden jashtë, tregojnë që janë në djeni të faktit se ndodhen në përgjim. Pra ata nuk do i falnin me duart e tyre as SPAK-ut, as GJKKO dhuratën që do i zgjaste arrestin.

Komplot apo zhgënjim/ Çfarë tregojnë përgjimet e Veliajt në burg?

Tani kur situata është më e qartë dhe ne jemi njohur pak a shumë me përmbajtjen e bisedave të përgjuara, natyrshëm mund të ngrejmë pyetjen: pse u fry dhe u zmadhua pesha e tyre? Si ndodhi që u pranua të flitet për “prova gozhduese”, pa i lexuar ato? Cilët qenë ata reporterë që raportuan nga parvazi i SPAK ‘faktet tronditësë”, që nuk paskan qenë aspak të tilla? 

Të tëra këto pikpyetje të shpien tek konkluzioni që u tha që në fjalinë e parë të këtij shkrimi: atë të ekzistencës së një makinerie të fuqishme propagandistike që përdoret nga SPAK. 

Ky organizëm ka reporterët e vet që kanë ekzkluzivitetin e të vërtetave, por që pranojnë edhe të hedhin në treg “fake news-e” në favor të tij. Ai ka së dyti, armatën e opinionbërësve që komentojnë dhe fryjnë në studiot televizive “faktet” e raportuara nga të parët. Po ti shtosh këtyre edhe mbështetësit e partive politike që përkrahin, pa kaluar në filtrin e dyshimit, ç’do lloj akuze që qarkullon për rivalët e tyre, mekanizmi manipulativ bëhet i plotë. Pak a shumë me të njëjtat karakteristika si në rastin e Veliajt, ai është vënë në veprim për çdo goditje të rangut të lartë. Po njësoj ka ndodhur kur duhej arsyetuar izolimi i dyshimtë i Sali Berishës. E njëjta teknologji ka vepruar për të përligjur arrestimin e Ilir Metës. 

Por efikasiteti më pervers i kësaj makinerie oruelliane shkelqeu me tërë kapacitetin e vet në rastin goditjes së kryebashkiakut të zgjedhur të Himarës, Fredi Beleri. Kur dikush ngrinte pikëpyetjen për mungesën e provave, dilte gjithmonë një tjetër që i përgjigjej që të mos nxitohej se më pas do të dilnin gjëma të papara. Kur të parët flisnin për urdhër politik ndaj SPAK-ut, të dytët përgjigjeshin menjëherë me klishenë e antishqiptarit që kish përdhosur flamurin me shqiponjë dhe donte ti jepte Vorio Epirin Greqisë. 

Në të gjitha rastet motoja ka qenë e njëjtë: duhet mbarsur opinioni se SPAK ka të drejtë, duhet luajtur me emocionet për të heshtur zërat e atyre që kanë dyshime mbi thellësinë dhe saktësinë e provave të siguruara nga prokurorët e posaçëm.

Përgjimet në burg/ Kush e tradhëtoi Erion Veliajn?

Në këto kushte, kur tashmë është provuar se SPAK ka nxjerrë në fushën e lojës armatën e propagandistëve dhe manipulatorëve të vet, ngrihet pyetja se sa legjitime është kjo dhe çfarë pasojash afatgjata prodhon. 

Një mendim i atypëratyshëm të çon të arsyetosh se SPAK është në të drejtën e tij. Se në një fushë loje, ku pothuajse mungojnë krejtësisht zërat e ftohtë, të pavarur dhe të arsyeshëm, pra në këtë arenë që dominohet nga manipulatorët dhe zëdhënësit faktikë të partive të mëdha edhe Prokurorisë Speciale do ti duhej të hidhte në betejë ushtarët e saj. Përndryshe, pa këtë lojë perverse atë do ta masakronin publikisht. Pra kur i duhet të përballet me berishistët që kërkojnë ta ruajnë të pacënuar imazhin e liderit të tyre, apo me rilindasit që nuk i pranojnë mëkatet e Tahirit, Beqes, apo Veliajt, edhe SPAK duhet të përdorë të njëjtat armë si ata. Në vendet perendimore nuk janë tabu betejat që prokurorët e çështjeve të mëdha kanë bërë edhe në skenën mediatike përveçse në sallën e gjyqit. E shpesh kjo i ka ndihmuar ti fitonin çështjet. Pak a shumë këtë ka bërë edhe SPAk këtu tek ne e kjo është një nga arsyet që e mban atë lart në sondazhet e besueshmërisë, sado të dyshimta të jenë ato.

Veliaj në kurthin e gjuhës/ Çfarë rrezikon nga kërcënimet për prokurorët

Por, kjo lloj strategjie kur shndërrohet në normë prodhon një problem. Sepse ndryshe nga partitë politike që kanë në dispozicion taborët e tyre të protagonistëve, synimi i drejtësisë nuk matet me votat apo pëlqyeshmërinë, por me aftësinë për të zbuluar fakte dhe për ti shkuar të vërtetës deri në fund. Pra SPAK nuk është ngritur për ti përkundur njerëzit me iluzione, por për të prodhuar, prova dhe rezultate në të mirë të tyre. Duke e vënë theksin më shumë tek e para, në dëm të së dytës, duket se SPAK po prekeket nga “Lalëi-zimi”. Ai po i përshtatet devizës të viktimës të tij më spektakolare, se rëndësi nuk ka puna që bën, por mënyra se si e shet atë në sytë e njerëzve. Dhe mbështetja tek kjo mendësi përmban riskun e prokurorëve gjithnjë e më të dobët profesionalisht: sa më të pafaktuara dosjet, aq më të forta ulërimat e llapaqenëve që ulërasin nëpër studio, për provat e rënda që gjenden në to, sa me e pabazuar akuza, aq me fortë zhurma mediatike.

Pikërisht kjo fabul duket se është përsëritur edhe me “skandalin” e përgjimeve të Lalit, që para procesit të tij në apel, u shit për atë që nuk ishte. Prandaj dhe kjo po i dha mundësinë mbështetësve të rekrutuar prej tij të përforcojnë alibinë se atë po e mbajnë brenda pa prova.          

©Lapsi.al

       

 

The post Si po LALI-zohet propaganda e SPAK  appeared first on Lapsi.al.

Shqipëria përfitoi 64,5 milionë euro nga BE në kuadër të Planit të Rritjes për Ballkanin Perëndimor, por vetëm 18,5 milionë janë grante – pjesa tjetër janë kredi të buta. Ky detaj u anashkalua nga kryeministri Edi Rama, i cili po e përdor integrimin si kartë elektorale për zgjedhjet e 11 majit.

Esmeralda Topi

Kryeministri Edi Rama ka nisur ‘de facto’ fushatën elektorale duke përdorur integrimin në BE si kartë kryesore elektorale. Me premtimin e “pasaportës europiane” dhe përfundimin e negociatave në 2027, Rama u kërkon qytetarëve votën për Partinë Socialiste më 11 maj pas 12 vitesh pushtet.

Për të përforcuar narrativën e tij elektorale, Rama shfrytëzoi edhe fondet e përfituara nga BE në kuadër të Planit të Rritjes për Ballkanin Perëndimor.

‘Bëhet fjalë për 64. 5 milionë euro që vijnë drejtpërdrejtë nga BE për Shqipërinë, 30 milionë euro janë për buxhetin e shtetit si mbështetje e axhendës për reformat dhe 34 kalojnë përmes Fondit të investimeve të Ballkanit Perëndimor për infrastrukturën’, deklaroi kryeministri, ndërsa anashkaloi faktin se shumica e kësaj shume janë kredi.

Fakt

Shqipëria përfitoi 64,5 milionë euro nga Bashkimi Evropian si pjesë e Planit të Rritjes për Ballkanin Perëndimor. Por nga kjo shumë, vetëm 18,5 milionë euro janë grante– pjesa tjetër janë kredi të buta për të mbështetur reformat dhe investimet në infrastrukturë.

Me konkretisht me këtë parafinancim, Shqipëria ka marrë 30 milionë euro kredi koncesionare për buxhetin e shtetit, si mbështetje për zbatimin e reformave në kuadër të Axhendës së Reformës së vendit.

Dhe pjesa e mbetur prej 34.5 milionë euro, do t’i injektohet drejtpërdrejt Fondit të Investimeve për Ballkanin Perëndimor (WBIF-it) në formë grantesh dhe huash, për investimet në infrastrukturë në Shqipëri.

Mungesën e transparencës mbi natyrën e mbështetjes financiare që Shqipëria po merr nga BE ekspertët e shohin si të qëllimshme.

“Rama me kast nuk e thotë. BE e thotë qartë, Shqipëria mori 30 milionë euro kredi koncesionare për buxhetin e shtetit, si mbështetje për zbatimin e reformave në kuadër të Axhendës së Reformës së vendit”, shpjegon ekspertja për ekonominë dhe financat Irena Beqiraj.

Nuk ka asgjë për tu mburrur veç propagandës – thekson Beqiraj.

“BE njoftoi se kishte bërë pagesën e parë prej 7% të shumës për Maqedoninë e Veriut. 7% ka marrë sot edhe Shqipëria. Së shpejti pagesa do t’i bëhet edhe Serbisë. Kosova nuk e ka ratifikuar ‘marrëveshjen e huasë’ me BE-në në Parlament dhe derisa ta bëjë këtë nuk mund të marrë pagesën e parë”

Prapavijë

Deri në vitin 2027, Shqipëria ka mundësinë të marrë deri në 922.1 milionë euro në total nga Fondi i Reformës dhe Rritjes për Ballkanin Perëndimor, në këmbim të reformave në sundimin e ligjit dhe të drejtat themelore, energjinë e rinovueshme, ekonominë dixhitale, kapitalin njerëzor dhe zhvillimin e sektorit privat.

Pagesat e ardhshme në kuadër të Facilitetit do të bëhen me përfundimin e hapave të reformave të rënë dakord ndërmjet Komisionit dhe Qeverisë Shqiptare në Axhendën e Reformës. Ndërsa Shqipëria përparon në zbatimin e Axhendës së Reformës, BE do të zhbllokojë pagesat.

Plani i Rritjes së Ballkanit Perëndimor ofron një udhërrëfyes për t’i afruar ekonomitë e Ballkanit Perëndimor me Bashkimin Evropian. Po ashtu, ky plan lehtëson qasjen graduale në tregun unik, mbështet integrimin e mëtejshëm ekonomik rajonal si dhe u mundëson qytetarëve të Ballkanit Perëndimor të korrin disa përfitime të hershme nga integrimi në BE.

The post Propaganda e Ramës me paratë e Bashkimit Evropian appeared first on Faktoje.al.

Nga Gjergj Erebara Në vitin 29 p.e.s., poeti romak Virgjili, i njohur sot më së shumti për epikën në vargje Eneida, botoi një poemë tjetër, e cila quhet Gjeorgjika, ose Bujqësia, sepse rastësisht qëllon që emri i autorit të këtij shkrimi në greqishten e vjetër do të thotë bujk. Eneida është e njohur për shqiptarët […]

The post Bagëti e propagandë appeared first on BoldNews.al.

“Ne do të garantojmë më në fund, më në fund 100% ujë të pijshëm 24 orë në zonat urbane të 61 bashkive të vendit dhe uji i pijshëm nuk do të jetë më temë fushatash elektorale dhe përballjesh politike në fushatë”, premtoi kryeministri Edi Rama në mars 2021, i vetëm, përballë një kamere në stilin  “One Men Show”.

Në fakt nuk është ashtu. Sërish ai, me të njëjtin stil, por me formë të ndryshuar në rubrikën “Sy me sy” me ndjekësit, Rama, në periudhë zgjedhjesh e ka përmendur (jo një) por tre herë këtë çështje gjatë muajt Shkurt.

Një herë duke deklaruar se kur erdhi PS-ja në pushtet nuk kishte asnjë zonë me 24 orë ujë të pijshëm, një herë tjetër duke përgënjeshtruar veten se gjetën vetëm katër zona me ujë të pijshëm dhe të tretën herë se si sot Tirana ka 67% të territorit me ujë të pijshëm.

Rama i vitit 2013

“Unë nuk kam folur shumë për ujin e pijshëm e dini pse nuk kam folur? Sepse më vjen turp. Më vjen turp me një histori 20 vjet sa herë ka fushatë do ju japim ujë 24 orë. Pas 20 vitesh prapë ujë nuk ka dhe tetë vjet në pushtet të isha në vendin e tij (Berishës) do kisha ikur, do kisha thënë me falni nuk arrita dot, bëra sa munda po meqë nuk ju solla dot ujë unë nuk e meritoj…”, tha Edi Rama kur kërkonte votat për tu zgjedhur kryeministër për herë të parë.

Në fakt Rama, ndryshe nga sa këshilloi paraardhësin, qëndroi mbi dhjetë vjet në pushtet me premtimin e njëjtë për ujë 24 orë.   

Rama i vitit 2021

Katër vite më parë, kur kërkonte votat për një mandat të tretë Rama përshkruante se kishte gjetur një histori të gjatë të dokumenteve strategjike për sektorin e ujit, duke theksuar se, megjithëse ishin krijuar 23 strategji kombëtare dhe 78 dokumente strategjike (deri në vitin 2013), sistemi i furnizimit me ujë të pijshëm kishte qenë në kolaps. Rama kritikonte korrupsionin dhe falimentimin e ndërmarrjeve ujësjellësi, duke përmendur gjithashtu se si sistemi i vjetër nuk mund të përballonte kërkesat e një popullsie të përqendruar në qendrat urbane. “Por gjatë kësaj periudhe janë realizuar 320 projekte teknike dhe mbi 200 kantiere për ujësjellës dhe kanalizime në nivel kombëtar, me qëllim sigurimin e furnizimit 24 orë me ujë për komunitetet urbane që kanë vuajtur për dekada…”, tha Rama në 2021

Rama i vitit 2025

“Dëgjo tani, më hape një temë që më pëlqen shumë. Në vitin 2025 ne flasim për shumë gjëra dhe nëse ty nuk të pëlqen, që ne flasim për ujin, unë po të kujtoj që kjo nuk është e lidhur me ne, dakord. Sepse Shqipëria ujë 24 orë në 2013 ku kemi marrë detyrën ka pasur vetëm në 4 zona. Në 4 zona 24 orë ujë. Sot ka në 43 zona urbane dhe në 98 zona rurale 24 orë ujë. Natyrisht që ka akoma zona të tjera ku duhet shtuar furnizimi”, iu drejtua së fundmi Rama një ndjekësi në rrjetet sociale.

Dje?

“Mandatin e tretë qeverisës do të garantoj në disa faza furnizimin me ujë 24 orë në Tiranë ku është edhe problemi më i madh pasi ka ndodhur edhe përqendrimi më i madh si rezultat i një lëvizje masive të popullsisë në vite që ka sjellë edhe nevojën masive për investime në furnizimin e sistemit me ujë dhe kur them në Tiranë 24 orë ujë brenda mandatit të tretë përfshi Kamzën dhe Vorën, por e njëjta gjë do të ndodhë me Vlorën me Shkodrën, me Durrësin kur s’ka pasur ujë 24 orë kurrë dhe kur sot ka një përmirësim të ndjeshëm të furnizimit me ujë përfshi Elbasanin, Kukësin dhe vijën turistike të Shqipërisë”, deklaronte Rama në 2021

Sot?

“Tirana, i dashur, ka 24 orë ujë në 67% të territorit dhe 17 orë ujë mesatarisht në pjesën tjetër, ndërkohë që vazhdojnë investimet këtu në Tiranë dhe vazhdojnë në tërë Shqipërinë ku, të merremi vesh, nuk ka pasur 24 orë ujë kurrë, asnjëherë, as në kohën e komunizmit dhe ku sot shtohen në vijimësi zonat me 24 orë ujë…”, tha Rama në rubrikën ‘Sy me Sy’ më 23 shkurt.

Duke bërë një krahasim më të kaluarën, kryeministri Rama, me të njëjtën strategji si katër vite më parë, synon të sjellë përceptimin se si sfidat në këtë rast janë duke u adresuar edhe pse premtimi i përsëritshëm për 24 orë mbetet i paplotësuar.

Në tre herë brenda një muaji, kryeministri është përpjekur ta paraqesë këtë progres si sukses të madh (nga 4 zona me ujë në 43 zona urbane dhe 98 zona rurale) pavarësisht se premtimi për furnizim 24 orë me ujë ende nuk është realizuar në gjithë territorin e vendit, edhe pse çmimi është rritur. Ndërkohë, Enti Rregullator i Ujit të fundit raport të publikuar në faqen zyrtare të saj ka bilancin vjetor për vitin 2023

Fushatë e re, propagandë e vjetër

Rama nuk është i vetmi. Ai i ka mëshuar fort Tiranës për ujë 24 orë aty ku është edhe hambari më i madh i votave. Faktoje.al ka nxjerrë disa deklarata të Erion Veliajt ndër vite se si prej vitit 2015 në kohë dhe vite të ndryshme edhe kryebashkiaku i Tiranës ka premtuar 24 orë ujë në Tiranë.

Analiza

“Në lidhje me deklaratat e Ramës, ai ka premtuar ujë 24 orë në tre mandatet deri tani, duke filluar nga 2013. Në 2017 dhe 2021 premtoi ujë 24 orë në ditë për të 61 bashkitë. Sot nxjerr shifra fiktive sikur 67% e Tiranës ka ujë të pijshëm dhe 24 orë, ku as njëra, as tjetra nuk është e vërtetë. E njëjta gjë për deklaratat e Veliajt në të dy mandatet. ‘Sy më sy’ duket si një formë e re propagande në vend të ballafaqimit me faktet dhe llogaridhënies për realizimin e premtimeve përgjatë 3 mandateve deri tani”, thotë për Faktoje.al  politologu Ilir Kalemaj.

Kryeministri Edi Rama për ujin 2013-2015

Rama, 2013

“Unë nuk kam folur shumë për ujin e pijshëm e dini pse nuk kam folur sepse me vjen turp me vjen turp me një histori 20 vjet sa herë ka fushatë do ju japim ujë 24 orë. Pas 20 vjtesh prape ujë nuk ka dhe tetë vjet në pushtet të isha në vendin e tij (Berishes) do kisha ikur do kisha thënë me falni nuk arrita dot, bëra sa munda po meqë nuk ju solla dot ujë unë nuk e meritoj. Do të angazhohemi me mish e me shpirt që ditë- natë çdo shtëpi e këtij vendi të ketë ujë për të pirë dhe për tu larë se kjo e ndan qytetërimin tonë nga Mesjeta nga koha e para Luftes kur nuk kishte as shtet, asgjë, kjo e ndan qytetërimin me shtet nga popull pa shtet që oburra ku të kapim ndonjë curril që të lagim buzët…”

Rama, 2021  

“Me rritjen e buxhetit për ujin me 40% falë jo vetëm buxhetit të shtetit, por edhe mbështetjes që kemi siguruar për këtë sektor jetik nga qeveria gjermane ajo franceze dhe ajo zviceriane ne do të garantojmë më në fund, më në fund 100 përqind ujë të pijshëm 24 orë në zonat urbane të 61 bashkive të vendit dhe uji i pijshëm nuk do të jetë më temë fushatash elektorale dhe përballjesh politike në fushatë”  

Rama, 2025

“Dëgjo tani, më hape një temë që më pëlqen shumë. Në vitin 2025 ne flasim për shumë gjëra dhe nëse ty nuk të pëlqen që ne flasim për ujin, unë po të kujtoj që kjo nuk është e lidhur me ne, dakord. Sepse Shqipëria ujë 24 orë në 2013 ku kemi marrë detyrën ka patur vetëm në 4 zona. Në 4 zona 24 orë ujë. Sot ka në 43 zona urbane dhe në 98 zona rurale 24 orë ujë. Natyrisht që ka akoma zona të tjera ku duhet shtuar furnizimi…”

Deklaratat e Erion Veliajt në vite

• Veliaj, 2015

Është viti 2015 dhe zona të Tiranës është pa ujë. Çfarë bëri kryetari i komunës kur iku përveçse volli për vete, pse nuk i solli ujë Komunës?!. Tirana pa ujë, Bërzhita pa ujë…

• Veliaj, 2017

Pas investimeve që nuk është bërë prej 20 e ca vitesh unë besoj se brenda 5 vitesh ne do të kemi ujë 24 orë në Tiranë  

• Veliaj, 2017

Nëse sikush është i shqetësuar për atë 20 lekëshin mjafton vetëm 10 sekonda që të mbyllë çezmën, sikur 10 sekonda të kursejë ujë në dite as nuk e ndjen fare në faturë të gjithë diferencën e çmimit ama me çmimin sikur të ishim në Bathore do të kemi ujë sikur të ishim në Korcë  

• Veliaj, 2018 

Ambicia jonë është që për pesë vite nga fillimi i këtyre investimeve ne të kemi ujë 24 orë në Tiranë

• Veliaj, 2018

Brenda 5 viteve ne të kemi ujë 24 orë në Tiranë jo me fjalë, por me të gjitha këto investime.

• Veliaj, 2019

Kemi hyrë në vitin 2019 që është viti i parë i planit tonë 5 vjecar për ujë 24 orë në Tiranë kështu që në vitin 2024 duhet të kemi ujë 24 orë

• Veliaj, 2019  

Nis kronometri për premtimin tonë Tirana ujë 24 orë

• Veliaj, 2019

Kemi një udhëzim për heqjen e depozitave të ujit nga tarracat një peshë e jashtëzakonshme mbi tarraca… Ne nuk duhet te jemi ata që nuk mësojnë nga historia por ata që mësojnë nga historia 

• Veliaj, 2021

Lajmi i mirë për qytetarët është se fillojmë investimin e fundit të madh, që jo vetëm 70% e Tiranës të ketë furnizim 24 orë, por 100% e Tiranës të furnizohet me ujë

• Veliaj, 2023

Me afrimin e fushatës, rritet edhe niveli i populizmit. Të gjithë ishim duke pritur ide serioze, si mund të shkojnë punët e qytetit më mirë. E kuptoj që shumë prej tyre nuk ballafaqohen dot me Tiranën që kishte vetëm 10 % ujë, kur ishte vetëm 1/29 e territorit. Sigurisht, nuk krahasohesh dot me Tiranën që ka sot 65 % ujë 24 orë dhe është 29 herë më e madhe.

The post Premtimi i Ramës që (s) mban ujë: 24 orë furnizim… appeared first on Faktoje.al.

Kryetari i Bashkisë së Matit, Agron Malaj, dikur gardist e më pas “elektricist” në OSHEE, ka hapur një tender për të blerë televizionet lokale.

Procedura vjen disa muaj para zgjedhjeve të përgjithshme, ku Malaj kërkon që shërbimi të vijojë për 12 muaj me radhë. Ai kërkon që media të pasqyrojë çdo aktivitet, t’i bëjë reklamë gjithë vitin dhe të marrë nga media kaseta të gatshme.

Duket se, synimi i Malajt është edhe pregatitja e çdo kronike të mundshme, me “sukseset” e detyrës, në çdo aktivitet të bashkisë.

Ai kërkon që media lokale të flasë mirë për të, për drejtorët apo për të gjithë punonjësit.

Por, a nuk është “blerje” e medias? Duke i dhënë tender ai mundëson që të mos kritikohet apo të ketë kronika hulumtuese.

Një veprim kurajoz, duke qenë se ai vjen edhe nga fusha e biznesit, pasi familja e tij drejton një firmë të madhe, që fiton tendera nga kolegët e Malajt.

 

Sipas dokumenteve që disponon VoxNews, Bashkia e Matit, ka hapur tenderin me objekt “shërbim publikimi dhe pasqyrimi i veprimtarive të Bashkisë Mat në media lokale”.

Tenderi është bërë në datën 12 shkurt, teksa ende nuk ka një njoftim për fituesin. Por duke qenë se mediat apo televizionet në Mat janë të pakta, dihet edhe fituesi!

 

 

Malaj kërkon që kjo “reklamë” të vijojë në 12 muajt e vitit, teksa ka edhe kërkesa të veçanta, që as kryeministri i vendit s’do të guxonte t’i bënte.

“Në lidhje me shërbimin media lokale, njoftime të ndryshme për periudhën 12 muaj. Pasqyrimi i investimeve, aktiviteteve, takimeve zyrtare dhe reklamimeve nga ana e Bashkisë Mat dhe transmetim në TV”, thuhet në këtë dokument.

Por jo vetëm kaq, pasi Malaj kërkon që edhe gazetari përfaqësues i Medias Lokale, duhet të mbajë kontakte të vazhdueshme me përfaqësuesit e zyrës së shtypit në Bashkinë Mat.

“Ofruesit të shërbimit do t’i duhet të mbajë kontakte të vazhdueshme me përfaqësuesen e zyrës së marrëdhënieve me publikun për çdo nevojë të ndonjë njoftimi, prononcimi reklamimi sipas nevojave të institucionit, shërbimi i këtyre pasqyrimeve duhet të ofrohet në të gjithë territorin e Bashkisë Mat”, shkruhet në dokument.

Më tej vijon se, sipas nevojës së institucionit të Bashkisë Mat, të mundësohet rikthimi i ndonjë kronike të pasqyruar në media lokale gjatë vitit në CD, apo USB, si investime, aktivitete, takimeve sipas rasteve që mund të kemi duke ju referuar kontratës së lidhur midis palëve.

“Shërbim fotografie, video dhe video editim profesional si dhe montazhi i tyre për gjatë vitit kalendarik 2025” është një tjetër kërkesë. Sipas dokumenteve që hulumtoi VoxNews, tenderi u bë në datë 12 shkurt, teksa televizioni fitues duhet të veprojë “brenda 24 orësh nga momenti i publikimit të njoftimit të fituesit”.

 

The post Agron Malaj i Matit tender për të blerë televizionet lokale, kërkon reklama dhe propagandë (DOKUMENTET) appeared first on Albeu.com.

Ministria e Infrastrukturës dhe Energjisë lajmëroi të martën hapjen e një thirrjeje të dytë për ofruesit e shërbimit në kuadër të programit të subvencionimit për sistemet e ngrohjes së ujit me panelet diellore, program nga i cili pritet të përfitojnë 2 mijë familje në prag të zgjedhjeve parlamentare të 11 majit. “…në datë 24 shkurt, […]

The post Panele diellore dhe propagandë: Shqetësime për përdorimin e burimeve publike në zgjedhje appeared first on BoldNews.al.

Ministria e Infrastrukturës dhe Energjisë lajmëroi të martën hapjen e një thirrjeje të dytë për ofruesit e shërbimit në kuadër të programit të subvencionimit për sistemet e ngrohjes së ujit me panelet diellore, program nga i cili pritet të përfitojnë 2 mijë familje në prag të zgjedhjeve parlamentare të 11 majit. “…në datë 24 shkurt,

Deputetja e Partisë Demokratike, Jorida Tabaku ka akuzuar qeverinë për manipulim të opinionit publik përmes propagandës lidhur me çmimet e energjisë elektrike në Shqipëri. Në një postim në rrjetet sociale, Tabaku hedh poshtë  pretendimet e qeverisë për ulje të çmimit, duke theksuar se faktet tregojnë të kundërtën. “Sipas të dhënave, çmimi i energjisë elektrike në

Nga Lutfi Dervishi Enti Rregullator i Energjisë ka dhënë lajmin që shqiptarët prisnin prej shekujsh: çmimi i energjisë për konsumatorët që konsumojnë më pak se 700 kWh do të jetë 8.5 lekë për kilovat, dhe jo 9.5 lekë. Një ulje madhështore prej plot 1 lek për kilovat! Për plot 11 muaj! Deri më 31 dhjetor […]

The post 1 shkurt, ditë pushimi appeared first on BoldNews.al.

Sektori i turizmit është përfshirë në zhvillime të vrullshme prej rritjes së numrit të vizitorëve dhe zgjerimit të strukturave akomoduese, por të dhënat administrative mbi punësimin (punonjësit e deklaruar në tatime me sigurime) tregojnë se në sektorin privat numri i të punësuarve u zgjerua me bazë vjetore vetëm 1.8 për qind në 3-mujorin tretë të […]

The post Bumi i turizmit nuk ndikon në punësim, rritje anemike në korrik -shtator appeared first on BoldNews.al.

Dy vite më parë, qeveria, e vënë në “sedër” nga diferencat e mëdha të pagave me rajonin, premtoi që t’i rriste ato, duke i çuar mesatarisht në 900 euro. Fillimisht u la të nënkuptohej që bëhej fjalë për pagën mesatare në ekonomi, por më pas u sqarua se premtimi ishte vetëm për administratën, për të […]

The post Bie propaganda e Ramës për “rritjen” e pagës mesatare, Shqipëria e fundit në rajon appeared first on BoldNews.al.