Edhe pse bllokada izraelite u lehtësua për të paktën 10 orë në ditë dhe disa vende po hedhin ndihma nga ajri, kjo nuk është mjaftueshëm për palestinezët që prej muajsh janë përballur me mungesë të theksuar të ushqimeve.

“Associated Press” shpjegon se grupet e ndihmës dhe vetë palestinezët thonë se ndryshimet kanë qenë graduale dhe mbi të gjitha janë shumë pak, për të ndryshuar skenarin më të keq të urisë që po ndodh në territorin e shkatërruar nga lufta.

Masat e reja kanë sjellë një rritje të numrit të kamionëve me ndihma që hyjnë në Gaza, por pothuajse asnjë prej tyre nuk arrin në depot e OKB për shpërndarje.

Pothuajse të gjithë kamionët zbrazen në moment nga turmat që i presin në rrugë, por mes tyre nuk ka vetëm njerëz të uritur, por edhe banda të armatosura që plaçkitin mallrat për t’i shitur më pas.

Pavarësisht se shpërndarja e ndihmave pritej të bëhej në mënyrë më të koordinuar gjatë pauzës taktike të njoftuar nga Izraeli, kjo nuk ka ndodhur. Ende shumë palestinezë vriten ose plagosen në përpjekje për të marrë ushqim. Sipas dëshmitarëve, janë ushtarët izraelitë ata që hapin zjarr rreth kamionëve të ndihmës.

Sistemi alternativ i shpërndarjes së ushqimit i drejtuar nga Fondacioni Humanitar i Gazës i mbështetur nga Izraeli është pikërisht vendi ku rastet fatale janë më të shumta.

Nga ana tjetër grupet e ndihmës përsërisin se ndihmat nga ajri ofrojnë vetëm një pjesë të vogël në krahasim me sasinë që mund të furnizohet nga kamionët. Gjithashtu, shumë pako janë hedhur në zona tani të paarritshme dhe të tjera kanë rënë në det, duke e bërë ushqimin të pakonsumueshëm.

Raportet më të fundit vijnë teksa i dërguari i posaçëm i Shteteve të Bashkuara për Lindjen e Mesme, Steve Witkoff, vizitoi Rripin e Gazës, ku u ndal në një qendër të shërbimit të ndihmave humanitare në qytetin Rafah. Witkoff u ndal në një nga pikat e Fondacionit humanitar të Gazës, megjithatë për disa palestinezë që folën për BBC, ky ishte një teatër i Izraelit

Megjithatë disa civilë palestinezë që folën për BBC, e quajtën këtë një teatër të Izraelit dhe Shteteve të Bashkuara. Sipas tyre Witkoff e vizitoi Rripin e Gazës vetëm për të publikuar disa foto dhe për të thënë se ishte atje.

Gjermania njoftoi se do t’i dërgojë Ukrainës dy sisteme të tjera raketore Patriot, pasi arriti një marrëveshje me Shtetet e Bashkuara që Berlini të jetë i pari në radhë për të marrë sistemet më të reja në këmbim të ndihmës për Kievin.

“Falë angazhimit të SHBA-së, Gjermania mund fillimisht të mbështesë Ukrainën me hedhës raketash dhe më pas me komponentë të tjerë shtesë të sistemit Patriot”, tha ministri gjerman i Mbrojtjes, Boris Pistorius, në një deklaratë.

Ushtria gjermane do të dërgojë fillimisht disa hedhës raketash Patriot në ditët në vijim, ndërsa pjesët e tjera të sistemit do të dorëzohen brenda dy ose tre muajve të ardhshëm.

Presidenti i SHBA-së, Donald Trump ka urdhëruar që dy nëndetëse bërthamore të “pozicionohen në rajonet e duhura”, sipas tij.

Kjo duket se është një përgjigje e komenteve të ish-presidentit rus, Dmitry Medvedev. Në një postim në rrjetet sociale, Trump tha: “Fjalët janë shumë të rëndësishme dhe shpesh mund të çojnë në pasoja të padëshiruara, shpresoj se ky nuk do të jetë një nga këto raste”.

Më herët Medvedev postoi disa deklarata duke kërcënuar SHBA-në, në përgjigje të ultimatumit të Trump ndaj Moskës për të rënë dakord për një armëpushim në Ukrainë, ose do të përballej me sanksione të ashpra.

Ndërsa Trump u shpreh se  “Bazuar në deklaratat tejet provokuese të ish-presidentit të Rusisë, Dmitry Medvedev, i cili tani është nënkryetar i Këshillit të Sigurisë së Federatës Ruse, kam urdhëruar që dy nëndetëse bërthamore të pozicionohen në rajonet e duhura”.

/abcnews.al/

Koha për Vladimir Putin po ecën mbrapsht, por lideri rus e ka bërë të qartë se nuk duhet të ketë pritshmëri të tepërta në lidhje me bisedimet e paqes që mbahen në Stamboll mes Kievit dhe Moskës.

Edhe pse Donald Trump i vendosi afat deri më 8 gusht, për të arritur një marrëveshje, ose ndryshe do të përballet me sanksione, Putin duket i qetë.

Gjatë një takimi informal me homologun bjellorus Aleksandër Lukashenko, Putin tha se çdo zhgënjim vjen nga pritshmëritë e tepërta.

“Sa i përket çdo zhgënjimi nga kushdo, të gjitha zhgënjimet lindin nga pritjet e tepërta. Është e nevojshme të zhvillohen bisedime të plota për të arritur një zgjidhje paqësore, dhe kjo duhet të bëhet me qetësi gjatë procesit të negociatave dhe jo në publik”, ka thënë Putin.

Edhe pse nuk e përmendi Trump me emër, Putin tha se nuk e kupton si dikush mund të mos i shoh bisedimet e Stambollit sit ë vlefshme, kur qindra të burgosur lufte janë kthyer në atdhe.

“Si mund të mos e shohë dikush faktin që qindra njerëz janë kthyer në atdheun e tyre si një gjë pozitive? Është një gjë pozitive. Nga konsiderata humanitare ne dorëzuam mbi 1,000 trupa të ushtarëve të rënë ukrainas dhe, në këmbim, morëm disa dhjetëra nga djemtë tanë që dhanë jetën për atdheun”, thekson Putin.

Presidenti amerikan Donald Trump pak ditë më parë i vendosi një afat deri në 8 gusht Rusisë për të arritur një marrëveshje me Ukrainën. Trump paralajmëroi tarifa dhe sanksione të reja, në rast se Putin nuk i merr seriozisht negociatat e paqes.

/abcnews.al/

Një vendvarrim i lashtë me moshë një mijëvjeçare u zbulua në Peru gjatë gërmimeve nga një kompani. Arkeologët thanë se në varr u gjetën mbetje njerëzore dhe pjese objektesh te lashta prej balte, që dëshmojnë kulturën e vendit të Amerikës Latine. Kryeqyteti i Perusë, Lima është  djep i qytetërimit te lashte ne kontinentin amerikan

Një vendvarrim i lashtë u zbulua në periferitë e Limës, kryeqyteti i Perusë, nga punëtorët e një kompanie gazi. Menjëherë pasi gjetën mbetjet e lashta njerëzore dhe objekte funerali, punëtorët njoftuan autoritetet përkatëse dhe më pas vendi u inspektua dhe u pastrua nga arkeologët.

Varri i lashtë  besohet se i përket kulturës Chancay, e cila banonte në këto kodra bregdetare shkretinore gati një mijëvjeçar më parë. Kultura që mbizotëroi para inkasove u vendos në pjesën veriore të Limës, duke u shtrirë nga Huaura deri në luginat Chillon.

Arkeologët gjetën dy varre të ndërtuara me tulla balte, njëri prej të cilëve ishte bosh, ndërsa tjetri kishte mbetje njerëzore dhe katër enë balte dhe tre kupa uji. Kupat dhe vazot ishin lyer me ngjyra të kuqe, të bardha dhe të zeza, të cilat  ishin të zakonshme në mesin e Chancay.

Lima ishte një nga djepat e qytetërimeve të lashta në Amerikë, disa prej të cilave kanë banuar në zonë për më shumë se 3,000 vjet.

Pothuajse të gjitha gërmimet përbëjnë një zbulim që është gjithmonë mbresëlënës dhe një burim krenarie për banorët./abcnews.al/

Gjykata e Drejtësisë së Bashkimit Europian vendosi kundër qeverisë italiane në lidhje me dërgimin e emigrantëve në qendrën e pritjes në Gjadër.

Në vendimin e saj Gjykata tha se janë gjykatat ato që kanë të drejtë të thonë fjalën e fundit në lidhje me përcaktimin e një vendi si vend i sigurt origjine apo jo. Vendimi erdhi pasi gjyqtarët nga disa gjykata italiane ishin drejtuar organit të drejtësisë së unionit me dy pyetje.

E para kishte të bënte me përcaktimin e një vendi të sigurt dhe në rastet kur ka kategori njerëzish ose zona në rrezik.

Pyetja e dytë kishte të bënte me përfshirjen në listë të vendeve ku evidentohen shkelje të të drejtave themelore, të garantuara nga Konventa Europiane për të Drejtat e Njeriut, ndaj një ose më shumë kategorive të njerëzve.

Gjykata Europiane tha në vendimin e saj se një shtet nuk mund të përfshijë në listën e vendeve të sigurta të origjinës vende që nuk ofrojnë mbrojtje të mjaftueshme për të gjithë popullsinë e tyre. Më tej gjykata përcakton se teksa qeveritë janë ato që mund të hartojnë listat, ato duhet te vlerësohen dhe nga gjykatat dhe duhet të jenë në përputhje me të gjitha kriteret e të drejtave të njeriut të përcaktuara nga BE.

Ky  vendim u jep të drejtë gjyqtarëve italianë që anuluan ndalimet e disa emigrantëve nga vende që qeveria italiane i kishte vendosur në listën e sigurt.

Megjithatë gjykata specifikon se ky vendim është i vlefshëm deri në hyrjen në fuqi të rregullores së re të BE që pritet të gjejë zbatim nga viti i ardhshëm.

/abcnews.al/

Anija kozmike Dragon e SpaceX, në të cilën ishte një ekuipazh ndërkombëtar prej dy astronautësh amerikanë, një kozmonauti rus dhe një astronaut japonez, u nis sot nga Florida, me destinacion Stacionin Ndërkombëtar Hapësinor.

Pjesë kjo e misionit rutinë Crew-11 të NASA-s.

Anija kozmike Dragon e SpaceX, e cila u transportua në hapësirë nga një raketë Falcon 9 do të mbërrijë në Stacionin Ndërkombëtar Hapësinor të shtunën. Lëshimi i anijes kozmike u transmetua drejtpërdrejt nga agjencia amerikane e hapësirës.

/abcnews.al/

Moti  i keq me stuhi dhe reshje të forta ka goditur bregun lindor amerikan. Në New York pati përmbytje, që bllokuan dhe rruge e hekurudha. Edhe në Filadelfia për shkak të stuhive pati vonesa të gjata dhe anulime të fluturimeve.

Bregu Lindor i Shteteve të Bashkuara po përballet me mot të keq që ka shkaktuar kaos në të gjithë rajonin.

Në Nju Jork dhe Nju Xhersi, autoritetet shpallën gjendje të jashtëzakonshme për shkak të reshjeve të shiut, përmbytjeve dhe ndërprerjeve të transportit dhe fluturimeve.

Disa shoferë u shpëtuan në autostradat kryesore nga Filadelfia në Nju Jork, teksa hekurudhat u mbuluan nga uji, duke bllokuar trenat dhe pasagjerët.

Në Nju Xhersi, më shumë se 14,000 qytetarë mbetën pa energji elektrike për më shumë se 24 orë.

Për shkak të motit të keq, Qyteti i Nju Jorkut paralajmëroi banorët se reshjet mund të shkaktojnë përmbytje në rrugë, bodrume dhe sistemin e metrosë, dhe u bëri thirrje atyre që jetojnë ndërtesa të ulëta, të lëvizin në vende më të larta.

Aeroportet në New York, New Jersey dhe Filadelfia raportuan të gjitha dhjetëra vonesa dhe anulime fluturimesh.

Shërbimi meteorologjik paralajmëroi super stuhi të forta dhe reshje të dendura kryesisht në Filadelfia dhe Nju Jork e gjithashtu në pjesën jugore të rajonit.

Strong rain storms lashed the U.S. East Coast Thursday, delaying flights throughout the region and prompting emergency rescues of motorists trapped in deep water on busy highways from the Philadelphia area to New York City. pic.twitter.com/aY302E5Vwl

— The Associated Press (@AP) August 1, 2025

Nominimi i radhës për çmimin Nobel për Paqe për Donald Trump erdhi nga Kamboxhia.

Zëvendëskryeministri i Kamboxhias, Sun Chanthol, i pyetur nga gazetarët me anë të një mesazhi për të konfirmuar planin e Kamboxhias për ta nominuar Trumpin, u përgjigj thjesht “po”.

Ai shpjegoi se arsyeja e nominimit ishte ndërhyrja e drejtpërdrejtë e presidentit amerikan që çoi në përfundimin e konfliktit më të fundit me Tajlandën, për mosmarrëveshjet kufitare.

Chanthol e falënderoi kreun e shtëpisë së Bardhë për arritjen e paqes dhe theksoi se ai e meriton nominimin.

Një telefonatë e Trump javën e kaluar uli dy vendet në tryezën e bisedimeve për të arritur një marrëveshje dhe shtrëngim duarsh në Malajzi, me synimin për t’i dhënë fund një konflikti që ka filluar rreth një shekull më parë.

Të paktën 43 persona u vranë në përplasjet e fundit, të cilat zgjatën pesë ditë dhe zhvendosën më shumë se 300,000 njerëz në të dyja anët e kufirit.

Pakistani tha në qershor se do ta nominonte Trumpin për Çmimin Nobel për Paqen për shkak të përpjekjeve të tij për të zgjidhur konfliktin me Indinë. Kryeministri izraelit Benjamin Netanyahu tha gjithashtu në korrik se e kishte nominuar Trumpin për çmimin.

Vetë republikani nuk i ka fshehur ambiciet e tij për t’u nderuar me Nobel për Paqen, por ka deklaruar disa herë se edhe pse e meriton, komiteti që vendos për fituesin, nuk do ia japë atij çmimin.

LEZHË- Polumbarët e Njësisë Speciale RENEA kanë bërë të mundur gjetjen dhe nxjerrjen nga uji të trupit të pajetë të 68-vjeçarit.

68-vjeçari peshkatar  humbi jetën pasi u mbyt në ujërat e lumit Mat. Sipas policisë, Ded Qoku 68-vjeç  ka qenë duke peshkuar dhe në një moment kur është futur në ujë për të hedhur rrjetat e peshkimit nuk ka dalë më. Menjëherë janë lajmëruar autoritetet në lidhje me rastin nga personi tjetër që ndodhej me të dhe pas disa orësh kërkime është nxjerrë trupi i pajetë.

/abcnews.al/

Insistimit të presidentes së Kosovës, Vjosa Osmani muaj më parë për të hequr tarifat ndaj produkteve amerikane që futen në vend, si një sinjal që i dërgohet SHBA-ve dhe administratës Trump për bashkëpunim, më në fund i është përgjigjur kryeministri në detyrë, Albin Kurti.

Duke hequr në këtë mënyrë tarifat për mallrat që hyjnë nga SHBA. Ish-ministri i Financave, Haki Shatri në një intervistë në emisionin “Balkan Update” në ABC News tha se është një vendim i shumëpritur dhe se do të duhej të ishte marrë më herët.

Gjatë intervistës, nënvizoi se veprime të tilla ndikojnë në përmirësimin e raporteve të Kosovës me Shtetet e Bashkuara të Amerikës.

“Është një vendim i mirëpritur edhe pse është mjaft i diskutueshëm. Për të gjitha vendimet është në diskutime se sa janë të qëndrueshme apo të ligjshme, jo vetëm kjo e tarifave. Megjithatë është një veprim i mirë që duhet të ishte bërë më herët. Mund të them që efekti në ekonomi edhe në buxhet është shumë simbolik. Pra është një ndikim simbolik në ekonomi e buxhet, por është një vendim shumë i mirëpritur për shkak të raportit me aleatët”, tha Shatri.

Më tej gjatë intervistës, theksoi se sipas tij e sheh si një vendim të marrë nën presion.

“Këtë vendim mund të them që e ka marrë shumë vonë dhe nën presionin e opinionit. U prit shumë gjatë pasi është dashur shumë më herët. Dhe të gjitha veprimet me aleatin tonë kryesor duhet të harmonizohen sepse gjithmonë kanë qenë në funksion të stabilizimit të vendit”, u shpreh më tej ai.

Ndër të tjera u shpreh kritik ndaj qeverisjes së Kurtit duke thënë se ka ideologji marksiste dhe se vendimet e marra nga vetë ai kanë treguar që kanë qenë në dëm të Kosovës.

“Nuk ka avancuar raportet me aleatët dhe të gjitha veprimet i ka bërë në dëm të Kosovës”, shtoi ai.

/abcnews.al/

SHKODËR- Një aksident ka ndodhur rreth orës 15:50, në aksin rrugor “Vau i Dejës–Bushat”.

Një shtetas duke drejtuar automjetin e tij, dyshohet se ka humbur kontrollin mbi drejtimin e automjetit dhe si pasojë, është përplasur me një automjet tjetër.

Nga aksidenti ka mbetur i dëmtuar një person cili ndodhet nën kujdesin e mjekëve, jashtë rrezikut për jetën. Grupi hetimor po punon për zbardhjen e rrethanave të aksidentit.

/abcnews.al/

Spanja dhe Gjermania kanë dërguar ndihma në Rripin e Gazës, ndërsa vendi po përballet me krizë humanitare dhe mediat ndërkombëtare raportojnë edhe humbje jete nga kequshqyerja.

Spanja shpërndau 12 ton ushqime ndërsa Gjermania 14 tonë ushqime dhe furnizime mjekësore. Operacioni po koordinohet nga Jordania, ndërsa vendi bën thirrje që të ketë një mbështetje më të madhe nga ana e ndërkombëtarëve.

“Spanja po merr pjesë në misionin e ndihmës humanitare nga ajri duke përdorur një avion ushtarak të Forcave Ajror”, u shpreh ministri i Jashtëm spanjoll Jose Manuel Alvarez.

Por Gaza

@AECID_es @MAECgob @Defensagob pic.twitter.com/Gam8ImqyDt

— José Manuel Albares (@jmalbares) August 1, 2025

Një avion i Delta Air Lines i nisur nga Salt Lake City për në Amsterdam u godit nga turbulenca të forta, duke u detyruar të devijonte në Aeroportin Ndërkombëtar të Minneapolis-St. Paul.

Si pasojë e turbulencave 25 pasagjerë pësuan lëndime dhe u dërguan në spital. Aeroplani Airbus A330-900, mund të mbajë mbi 250 persona. Departamenti i zjarrfikësve të aeroportit dhe ndihmësit mjekësorë pritën mbërritjen e avionit për të trajtuar pasagjerët e lënduar.

Një pasagjer tha se njerëzit që nuk kishin vënë rripa sigurie u përplasën nëpër kabinë e më pas u rrëzuan. Kjo u përsërit disa herë dhe ishte vërtet e frikshme, treguan pasagjerët.

Lëndimet serioze nga turbulencat gjatë fluturimit janë të rralla, por ekspertët thonë se ato mund të jenë duke u bërë më të zakonshme, pasi ndryshimi i klimës ndryshon rrjedhën e avionëve.

/abcnews.al/

Ka filluar numërimi mbrapsht para se të hyjë në fuqi afati i fundit i Donald Trump për rritje të tarifave ndaj thuajse çdo vendi në botë, në rast se një marrëveshje e minutave të fundit nuk arrihet para mesnatës.

Presidenti i Shteteve të Bashkuara ka njoftuar tashmë tarifa të larta tregtare për shumë nga partnerët më të mëdhenj tregtarë të vendit.

Afati i 1 gushtit vjen më shumë se 120 ditë pasi administrata e Presidentit Trump njoftoi për herë të parë një stuhi tarifash ndaj botës, në të ashtuquajturën “Dita e Çlirimit”.

Pavarësisht disa vonesave në vendosjen e tarifave që kur Trump mori detyrën në janar të këtij viti, administrata e tij duket se do të vendosë taksa të reja për ato vende që nuk arrijnë të arrijnë një marrëveshje tregtare deri në fund të ditës së enjte.

Por cilat vende kanë arritur tashmë një marrëveshje?

Bashkimi Europian ka rënë dakord për një tarifë prej 15 përqind për shumicën e eksporteve të saj në SHBA, duke përfshirë makinat dhe produktet farmaceutike, në këmbim të tarifave zero për eksportet e caktuara amerikane dhe angazhimeve për të blerë gaz amerikan dhe për të rritur investimet. Fillimisht, Trump kishte kërcënuar me një tarifë prej 30 përqind.

Japonia ka siguruar një tarifë reciproke prej 15 përqind për mallrat e saj të eksportuara në SHBA. Japonia gjithashtu premtoi të investojë 550 miliardë dollarë në ekonominë amerikane.

Mbretëria e Bashkuar ra dakord për një tarifë prej 10 përqind për eksportet e saj në SHBA. Ajo gjithashtu mori një tarifë sektoriale prej 25 përqind për çelikun dhe aluminin, pra sa gjysma e tarifës që është vendosur ndaj shteteve të tjera.

Një tarifë më e ulët prej 15 përqind do të zbatohet për importet e Koresë së Jugut në SHBA, ndërsa Indonezia negocioi një tarifë 19 %.

Vietnami ka rënë dakord për një tarifë prej 20 përqind për shumicën e eksporteve në SHBA, ndërsa Filipinet arritën marrëveshje për një tarifë prej 19 përqind. Pakistani rriti një marrëveshje për të zhvilluar së bashku rezervat e naftës me SHBA, por normat specifike të tarifave për mallrat mbeten të paqarta.

Ndërkohë afati është shtyrë me 90 ditë për të arritur një marrëveshje tregtare me Meksikën dhe tarifat do të mbeten në nivelet aktuale prej 25%.

Ndërsa minutat kalojnë deri më në 1 gusht, vendosja e një raundi të konsiderueshëm tarifash reciproke nga SHBA për importet nga vende të ndryshme shënon një moment vendimtar në dinamikën e tregtisë globale.

Trump është i bindur se nuk do ta zgjasë këtë afat, prandaj, në mesnatë sipas kohës lokale në SHBA, Dogana dhe Mbrojtja Kufitare amerikane do të fillojnë zbatimin e këtyre detyrimeve të reja, të cilat do të variojnë nga 15 përqind në 50 përqind, ose edhe më të larta në disa raste, në varësi të partnerit tregtar, natyrës së mallrave që tregtohen dhe nëse partneri tregtar dhe SHBA-ja kanë marrëveshje specifike në fuqi.

Skuadrat shqiptare kanë arritur një sukses të madh në kupat e Europës këtë të enjte. Dy prej tyre, Egnatia dhe Dinamo janë kualifikuar për në turin e tretë të Ligës së Konferencës, ndërsa Vllaznia u detyrua të luante kohët shtesë.

Kampionia e vendit ia doli ndaj një rivali me më shumë emër si Dinamo e Minskut nga Bjellorusia, madje duke i fituar të dyja ndeshjet.

Pas suksesit 2-0 në sfidën e parë, ekipi shqiptar triumfoi 1-0 edhe në Rrogozhinë me golin e shënuar nga Selmani në minutën e 77-të. Blutë e kryeqytetit e patën më të vështirë, edhe pse kundërshtari i tyre ishte më modest, Atletik Eskaldes nga Andorra.

Në “Elbasan Arenë” dueli përfundoi në barazim 1-1, dhe skuadra shqiptare u kualifikua falë fitores 2-1 jashtë fushe. Sulmuesi Baton Zabërgja ishte autor I golit për ekipin e trajnerit Ilir Daja. Vllaznia eliminohet nga Liga e Konferencës pas humbjes 4-2 ne kohen shtesë.

/abcnews.al/

Ngjarja e ndodhur në Republikën Demokratike të Kongos është tragjike. Të paktën 49 të krishterë u vranë teksa po faleshin në një kishë dhe përgjegjësia për sulmin është marrë nga nga grupi i Forcave Demokratike Aleate Islamike, grup që ka lidhje me Shtetin Islamit.

Në një dëshmi për Fox News, të mbijetuarit treguan tmerrin që përjetuan, teksa mes lotëve familjarët përcollën për në banesën e fundit të afërmit që u vranë. Ata thanë se nëntë fëmijëve iu prenë kokat, ndërsa disa fëmijë të tjerë u rrëmbyen.

Besimtarët kishin ardhur nga fshatrat përreth për të festuar Jubileun e Argjendtë të kishës dhe për t’u lutur për siguri dhe paqe. Dëshmitarët thanë se shumë nga ata që u përpoqën të shpëtonin, u vranë në oborrin e Kishës, ose të tjerë që ikën pak më larg, u kapën dhe u vranë gjithashtu.

Për sulmin pati edhe një reagim nga Departamenti Amerikan i Shtetit. Një zëdhënës i tha Fox News të enjten SHBA dënon sulmin dhe theksoi se liria fetare është një e drejtë themelore.

Vendasit thanë për mediat amerikane panë sulmuesit islamistë të tërhiqeshin në një pikë disa kilometra larg. Një burim tha se nuk janë bërë arrestime, teksa banorët janë të frikësuar se një sulm tjetër mund të ndodhë në çdo kohë.

/abcnews.al/

Xixëllonjat ndriçojnë ende në oborret e shtëpive dhe nëpër parqet e qyteteve, por dita kur mund të mos t’i shohë sërish ndoshta nuk është e largët.

Në qytetet amerikane, kryesisht në Nju Jork gjatë mbrëmjeve të verës, ato japin një shfaqje dritash dhe pranvera e lagësht mund të ketë ndihmuar që ky insekt të jetë i madh në numër tani për tani.

Ka mbi 2,000 specie të njohura në të gjithë globin. Ato përdorin shkëndijat e tyre karakteristike për të komunikuar dhe për të gjetur partnerin e përsosur.

Në qytetin e Nju Jorkut, xixëllonjat janë jashtë në pesë lagje, duke ndriçuar sapo perëndon dielli. Muajt qershor dhe korrik janë idealë për t’i dalluar, pasi ato fillojnë të pakësohen gjatë muajit gusht.

Ndërsa netët më të ndritshme këtë verë, insektet janë ende në rënie dhe po pakësohen me një ritëm më të shpejtë se kurrë më parë.

Humbja e habitatit, përdorimi i pesticideve dhe ndotja nga drita janë përgjegjëse për një rënie të popullatës. Në qytete, dritat verbuese nga tabelat reklamuese, makinat dhe vitrinat e dyqaneve mund të mbytin shkëlqimin e insekteve, duke e bërë më të vështirë për to të gjejnë të afërmit e tyre dhe t’ua kalojnë gjenet e tyre brezave të ardhshëm.

Për t’u kujdesur për xixëllonjat, merrni në konsideratë fikjen e dritave natën dhe shmangni spërkatjen e oborreve me insekticide.

/abcnews.al/

I dërguari i posaçëm i Shteteve të Bashkuara, Steve Witkoff, do të vizitojë Rripin e Gazës më 1 gusht, për të inspektuar qendrat për shpërndarjen e ndihmës, tha Shtëpia e Bardhë.

Witkoff dhe ambasadori amerikan në Izrael, Mike Huckabee, do të përpiqen “të sigurojnë një plan për dërgimin e më shumë ushqimeve dhe do të takohen me banorë vendas të Gazës për të dëgjuar nga ta për këtë situatë të rëndë në terren”, tha zëdhënësja e Shtëpisë së Bardhë, Karoline Leavitt, më 31 korrik.

Më herët gjatë së enjtes, Witkoff u takua me kryeministrin izraelit, Benjamin Netanyahu.

Mediat izraelite kanë raportuar se biseda e tyre është përqendruar në situatën humanitare në Rripin e Gazës, pengjet që po mbahen nga Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – si dhe për çështjen e Iranit.

Vizita e Witkoffit në Izrael u zhvillua në kohën kur janë intensifikuar kritikat ndërkombëtare ndaj Izraelit, pas raportimeve për uri të thellë në Gazë dhe në kohën kur janë bllokuar bisedimet në Doha për një armëpushim mes Izraelit dhe Hamasit.

Portali Ynet raportoi se Witkoff gjatë vizitës në Gazë, personalisht do të shikojë punën që bën Fondacioni Humanitar për Gazën (GHF).

GHF-ja mbështetet nga Izraeli dhe SHBA-ja dhe puna e këtij fondacioni është përballur me kritika nga agjencitë e Kombeve të Bashkuara dhe organizata të tjera.

Të hënën, presidenti amerikan, Donald Trump, tha se në Gazë ka “uri të vërtetë”.

Një ditë më vonë, Klasifikimi i Integruar i Sigurisë Ushqimore (IPC), autoriteti kryesor ndërkombëtar për kriza ushqimore, paralajmëroi se “skenari më i keq i urisë aktualisht është duke ndodhur në Gazë”. Në mes të rritjes së kritikave ndërkombëtare dhe raportimeve për vdekje të lidhura me urinë, Izraeli që nga fundjava po zbaton një pauzë 10-orëshe në ditë të luftimeve në disa zona të Gazës, për të lejuar që ndihma të arrijë te më shumë njerëz.

Lufta në Gazë ka nisur më 7 tetor 2023, kur radikalët e Hamasit sulmuan jugun e Izraelit, duke vrarë afër 1.200 persona dhe duke rrëmbyer afër 250 të tjerë. Afër 50 persona besohet se ende mbahen në Gazë, ndërsa të tjerët janë liruar në marrëveshjet paraprake të armëpushimit.

Si pasojë e ofensivës izraelite, në Gazë që nga nisja e luftës janë vrarë më shumë se 60.000 persona, ka thënë Ministria e Shëndetësisë, e cila vlerëson se shumica nga viktimat ishin gra dhe fëmijë. Megjithatë, kjo ministri në shifrat që publikon për viktimat nuk bën ndarjen mes viktimave civile dhe luftëtarëve të Hamasit.

Read More...