TIRANË, 5 gusht /ATSH/ Reshjet e dendura të shiut përfshinë sot qytetin e Vlorës, duke shkaktuar përmbytje në disa rrugë, mes tyre edhe rruga “Albano dhe Romina”, ndërsa nën “pushtetin” e ujit është lagjja historike e Muradies.

Sipas pamjeve nga mediet, niveli i ujit në rrugë është rritur ndjeshëm, duke penguar qarkullimin normal të automjeteve dhe këmbësorëve.

Zonat më të prekura përfshijnë: Lagjen “Skelë” (afër kryqëzimit të madh), zonën pranë bibliotekës publike, përreth Kishës Ortodokse dhe sheshi “Albano & Romina”.

Në disa segmente rrugore, automjetet janë bllokuar për shkak të prurjeve të mëdha të ujit, ndërsa shërbimet e emergjencës kanë nisur punën për pastrimin e pusetave dhe rivendosjen e normalitetit në qarkullim.

/e.i//r.e/

The post Reshje shiu në Vlorë, përmbytje në disa rrugë të qytetit appeared first on Agjencia Telegrafike Shqiptare.

TIRANË, 5 gusht /ATSH/ Mbrojtja e personave që largohen nga diskriminimi, përndjekja dhe konfliktet është detyrim ligjor dhe angazhim ndërkombëtar.

Në kuadër të projektit EU4Migration, u zhvillua sot një takim në Drejtorinë Vendore të Kufirit dhe Migracionit në Gjirokastër, me pjesëmarrjen e drejtoreshës për Politikat e Migracionit, Azil dhe Antitrafikut në Ministrinë e Brendshme Alma Bime, përfaqësuesve të departamentit për Kufirin dhe Migracionin, të Drejtorisë Vendore për Kufirin dhe Migracionin Gjirokastër, UNHCR, dhe International Police Organization – IPO.

Sipas Policisë së Shtetit, takimi u fokusua në forcimin e bashkëpunimit institucional në fushën e azilit, menaxhimit të kufijve dhe identifikimit të rasteve të trafikimit të qenieve njerëzore.

“Shqipëria nuk do të shërbejë si rrugë kalimi apo strehë e sigurt për rrjetet e trafikimit të qenieve njerëzore. Ky është një shembull i vendosmërisë së institucioneve ligjzbatuese për të mbrojtur jetën dhe dinjitetin njerëzor, si dhe për të goditur çdo formë të krimit të organizuar”, njoftoi Policia.

/m.q/r.e/

The post Lufta kundër trafikimit të qenieve njerëzore, Policia e Shtetit: Shqipëria, jo strehë për rrjetet kriminale appeared first on Agjencia Telegrafike Shqiptare.

DYSELDORF, 5 gusht /ATSH-DPA/ – Frank Mill, i cili ishte pjesë e skuadrës fituese të Kupës së Botës në futboll në vitin 1990 të Gjermanisë Perëndimore e që ka fituar dhe një medalje bronzi olimpike në vitin 1988, ka vdekur në moshën 67 vjeç, njoftoi sot ish-klubi i tij Rot-Weiss Essen, duke cituar familjarë të tij.

Essen konfirmoi një raport nga gazeta “Bild”, i cili tha se Mill nuk u shërua kurrë nga një goditje në tru që pësoi në muajin maj në Itali.

Sulmuesi Mill e filloi karrierën e tij profesioniste në vitin 1976 në qytetin e tij të lindjes, Essen, në Rot-Weiss. Me pas kaloi pesë vjet te “Borussia Mönchengladbach” në vitet 1981-1986, më pas  tetë vjet te “Borussia Dortmund” deri në vitin 1994 përpara se ta përfundonte karrierën e tij me dy sezone te “Fortuna Dusseldorf”.

Mill shënoi 41 gola në divizionin e dytë në sezonin e tij të fundit në Essen dhe 123 gola në 387 ndeshje të Bundesligës.

Ai fitoi Kupën e Gjermanisë me Dortmundin në vitin 1989.

“Frank nuk ishte vetëm një nga futbollistët më të mëdhenj që Rot-Weiss Essen ka nxjerrë ndonjëherë, ai ishte gjithashtu një person i shkëlqyer, i thjeshtë, autentik dhe plot energji pozitive”, tha anëtari i bordit të Essen, Alexander Rang.

Ai shtoi se Mill “jo vetëm që karakterizoi klubin tonë dhe zonën e Ruhr-it me sjelljen e tij, por ai ishte gjithashtu një ambasador për futbollin në të gjithë Gjermaninë”. /Ad.Ab./

The post SPORT – Ish – kampioni i Botës, Frank Mill, vdes në moshën 67 vjeç appeared first on Agjencia Telegrafike Shqiptare.

TIRANË, 5 gusht /ATSH/ Projekti Eco Routes i Bashkimit Europian është një iniciativë që synon të promovojë transportin e qëndrueshëm, turizmin e gjelbër, dhe zhvillimin rajonal në përputhje me strategjinë e BE-së për tranzicionin e gjelbër dhe ruajtjen e biodiversitetit.

Njërën nga ditët e ‘Reel the Site’, BE bën me dije se është vizituar Ujëvara e Topojanit, aty ku natyra dhe turizmi i qëndrueshëm bashkohen falë projektit Eco Routes, të financuar nga Bashkimi Europian.

Sipas BE-së, konkurrentët eksploruan shtigjet e ecjes të zhvilluara për të lidhur njerëzit me natyrën dhe për të promovuar turizmin ndërkufitar.

“Pjesë e të njëjtit projekt është edhe Parku i Aventurave në Shishtavec, një hapësirë për të gjitha moshat që sjell aktivitete në natyrë dhe e bën zonën edhe më tërheqëse për vizitorët”, thuhet në njoftim.

Projekti Eco Routes synon të promovojë zhvillimin e qëndrueshëm dhe të rrisë vizitat e zonave Kukës dhe Rahovec, duke nxitur bashkëpunimin ndërkufitar dhe duke e kthyer këtë rajon në një destinacion për ekoturizëm.

Eco Routes është një rrjet rrugësh turistike ose trase ekologjike ku përdoren nga biçikleta, ecësit, ose transporti publik; lidhen zona natyrore, parqe kombëtare, monumente kulturore e vende të trashëgimisë; janë të zhvilluara në mënyrë të qëndrueshme, pa ndotje dhe me përfitim për komunitetet lokale dhe promovohet ekoturizmi, produkte vendase dhe bizneset e vogla.

Qëllimi i projektit është reduktimi i ndotjes nga transporti duke nxitur biçikletat dhe ecjen, zhvillimi i turizmit të qëndrueshëm në harmoni me natyrën dhe kulturën, ndërlidhja e rajoneve rurale me qytetet për të ndihmuar zhvillimin ekonomik lokal, ndërgjegjësimi për natyrën dhe trashëgiminë kulturore përmes udhëtimeve edukative dhe ekologjike, etj.

/e.i//r.e/

The post Eco Routes në Ujëvarën e Topojanit, projekt i BE-së për natyrë dhe turizëm të qëndrueshëm appeared first on Agjencia Telegrafike Shqiptare.

LONDËR, 5 gusht /ATSH/- Dy javë pasi rock-eri i “Black Sabbath” ndërroi jetë në moshën 76-vjeçare, është konfirmuar se shkaku zyrtar i vdekjes së tij ishte një atak në zemër – e cituar në certifikatën e vdekjes – të paraqitur nga vajza e tij Aimee Osbourne – si dhe sëmundje e arteries koronare, sipas “New York Times”.

Certifikata thotë se Osbourne vdiq nga “(a) Arrest kardiak jashtë spitalit (b) Infarkt akut miokardi (c) Sëmundje e arteries koronare dhe sëmundje e Parkinsonit me mosfunksionim autonom (Shkaqe të kyçeve).”

Familja e Ozzy-t njoftoi në një deklaratë se legjenda e rock-ut kishte vdekur në mëngjesin e 22 korrikut.

Vetëm disa ditë më parë, vajza e Ozzy-t, Kelly, hodhi poshtë thashethemet se shëndeti i babait të saj po përkeqësohej me shpejtësi dhe se ai dhe nëna e saj Sharon kishin bërë një pakt vetëvrasjeje.

“Ai nuk po vdes”, tha ajo në Instagram më 11 korrik.

“Po, ai vuan nga sëmundja e Parkinsonit dhe lëvizshmëria e tij është krejtësisht e ndryshme nga ç’ishte më parë, por ai nuk po vdes”, shtoi Kelly.

Përveç sëmundjes së Parkinsonit, Ozzy – emri i vërtetë i të cilit është John Michael Osbourne – kishte luftuar me një sërë problemesh shëndetësore gjatë viteve, por muzikanti arriti të ngjitej në skenë me grupin e tij në Birmingham, Angli, vetëm disa javë para se të ndërronte jetë.

Ozzy u rikthyer në skenë edhe një herë – për performancën e tij më 5 korrik me shokët e grupit “Black Sabbath”, Tony Iommi, Bill Ward dhe Geezer Butler.

Përveçse Ozzy bëri bujë në muzikën “heavy metal”, ai ishte i njohur për pjesëmarrjen në një reality show – të transmetuar në MTV – së bashku me familjen e tij ” The Osbournes” – nga viti 2002 deri në vitin 2005. //a.i/

The post Zbulohet shkaku i vdekjes së legjendës së rock-ut, Ozzy Osbourne appeared first on Agjencia Telegrafike Shqiptare.

TIRANË, 5 gusht /ATSH/ Festivali i muzikës elektronike “Lumina Electronic” solli ritëm dhe atmosferë për të gjithë adhuruesit e muzikës elektronike.

Aktiviteti dëshmoi edhe një herë se Korça është jo vetëm një qytet i kulturës dhe historisë, por edhe i rinisë dhe energjisë së jashtëzakonshme.

Kryebashkiaku i Korçës, Sotiraq Filo e konsideroi këtë edicion të dytë të festivalit “Lumina”, si të jashtëzakonshëm.

Filo u shpreh se për dy net me radhë, parku “Rinia” u mbush me ritme elektrizuese, energji pafund dhe qindra të rinj që festuan muzikën moderne në një atmosferë që vetëm “Lumina” di ta krijojë.

“Ky edicion e forcoi më tej identitetin e festivalit si një nga eventet më të rëndësishme verore në Korçë, duke tërhequr vizitorë dhe adhurues të muzikës elektronike nga e gjithë Shqipëria dhe rajoni”, tha Filo, në një postim në rrjetet sociale.

Të rinj vendas dhe turistë të huaj u entuziazmuan, në një atmosferë që vështirë të përshkruhet me fjalë.

Lumina Electronic Festival është tashmë një traditë që do të vazhdojë çdo vit, me synimin për të rritur edhe më shumë ndikimin kulturor dhe turistik të Korçës, si një destinacion festash bashkëkohore dhe përjetimesh unike.

/e.i//r.e/

The post Festivali “Lumina”, atmosferë elektrizuese për adhuruesit e muzikës elektronike appeared first on Agjencia Telegrafike Shqiptare.

UASHINGTON, 5 gusht /ATSH-DPA/ – Presidenti amerikan Donald Trump e ka quajtur investimin prej 600 miliardë dollarësh, si pjesë e marrëveshjes për tarifat me Bashkimin Evropian, si një “dhuratë”.

“Ata na dhanë 600 miliardë dollarë që mund t’i investojmë ku të duam”, tha Trump në një intervistë për “CNBC”, duke iu referuar një pjese kyçe të marrëveshjes tregtare të shpallur në fund të korrikut.

Trump e përshkroi shumën si “një dhuratë” që nuk është hua dhe për rrjedhojë nuk ka nevojë të kthehet pas tre vitesh.

Kjo bie ndesh me deklaratat e mëparshme të Komisionit Evropian, sipas të cilit kompanitë nga BE-ja kanë shprehur interes për të investuar 600 miliardë dollarë në Shtetet e Bashkuara gjatë viteve të ardhshme.

Sipas Komisionit, deri tani bëhet fjalë vetëm për shprehje interesi nga ana e kompanive, pa ndonjë angazhim konkret.

I pyetur se çfarë do të ndodhte nëse BE-ja nuk e përmbush këtë premtim investimi, Trump kërcënoi se do të vendosë tarifa 35%. Megjithatë, mbeti e paqartë se kur do të konsiderohej shkelje e marrëveshjes, pasi investimet janë planifikuar të ndodhin për një periudhë disa-vjeçare.

Një zyrtar i Komisionit Evropian sqaroi së fundmi se investimet janë në dorën e kompanive private dhe se Komisioni, si institucion publik, nuk mund t’i garantojë ato.

Marrëveshja mes Trump dhe presidentes së Komisionit Evropian, Ursula von der Leyen, parashikon një tarifë prej 15% për shumicën e importeve nga BE-ja në SHBA. Data e re e hyrjes në fuqi është 7 gusht.

Përveç shumës prej 600 miliardë dollarësh, BE-ja i ka premtuar Trump-it se deri në fund të mandatit të tij do të blejë energji amerikane në vlerë prej 750 miliardë dollarësh. /Ad.Ab./

The post SHBA – Trump e quan “dhuratë” investimin prej 600 miliardë dollarësh nga BE-ja appeared first on Agjencia Telegrafike Shqiptare.

NJU JORK, 5 gusht /ATSH/- Albumi i fundit i Lady Gaga “Mayhem” ka kryesuar me 12 nominime në çmimet “MTV Video Music Awards 2025”.

Gaga është nominuar për bashkëpunimin më të mirë, muzikën më të mirë pop, regjinë më të mirë, drejtimin më të mirë artistik, kinematografinë më të mirë, montazhin më të mirë, koreografinë më të mirë, efektet më të mira vizuale, si dhe këngën më të mirë, videon më të mirë, albumin më të mirë dhe artistin më të mirë të vitit.

Të nominuarit e kategorisë “Artisti i Vitit”, përfshijnë Bad Bunny, Kendrick Lamar, Morgan Wallen, The Weeknd, Beyoncé dhe Taylor Swift.

Beyoncé dhe Swift janë kryesisht dy figura të rëndësishme pasi secila prej tyre kanë marrë respektivisht, 32 dhe 30 çmime Grammy, duke u shpallur artistet më të vlerësuara në historinë e çmimeve “Grammy Awards”.

Te dyja janë të nominuara vetëm në kategorinë e “Artistit të Vitit” në “Video Music Awards” (VMA) në shtator, kështu që nëse njëra prej tyre fiton, do të bëhet muzikantja më e vlerësuar në historinë e VMA-së.

Gaga ndiqet nga Bruno Mars me 11 nominime; Lamar 10; Sabrina Carpenter dhe “Blackpink” me tetë; Ariana Grande dhe The Weeknd me shtatë; Billie Eilish me gjashtë; Charli xcx me pesë; Bad Bunny, Doechii, Ed Sheeran, Jelly Roll, Miley Cyrus dhe Tate McRae me nga katër secili.

Shfaqja treorëshe do të transmetohet drejtpërdrejt të dielën në CBS, më 7 shtator, në orën 20:00 të mbrëmjes.

Do të transmetohet gjithashtu njëkohësisht në MTV dhe do të jetë e disponueshme për transmetim në Paramount+.

Çmimet e VMA-së të këtij viti paraqesin 33 të nominuar për herë të parë, të cilët përfshijnë Alex Warren, Blake Shelton, Brent Faiyaz, Gigi Perez, Katseye dhe Lainey Wilson.

Mac Miller u bë gjithashtu artisti i parë që mori nominimin e tij të parë në VMA pas vdekjes.

Këtë vit ka edhe dy kategori të reja, “Artisti më i mirë Country” dhe “Artisti më i mirë Pop”.

Votimi i fansave filloi online sot në 19 kategori dhe përfundon më 5 shtator në orën 18:00.

Votimi në kategorinë e “Artistit më të mirë të ri” do të mbetet aktiv gjatë shfaqjes. //a.i/

The post Lady Gaga kryeson me 12 nominime në çmimet “MTV Video Music Awards 2025” appeared first on Agjencia Telegrafike Shqiptare.

BERLIN, 5 gusht /ATSH- DPA/ – Një anëtare e lartë e Partisë Socialdemokrate të Gjermanisë (SPD) u bashkua sot me thirrjet që Berlini të strehojë përkohësisht fëmijë të plagosur nga Rripi i Gazës.

“Po shohim që disa nga vendet partnere evropiane kanë ndërmarrë nisma për të evakuuar fëmijë dhe për t’u kujdesur për ata që janë të plagosur rëndë”,  tha sekretarja e SPD-së, Derya Türk-Nachbaur, për transmetuesin “RTL/ntv”.

Ajo përmendi Norvegjinë dhe Italinë si shembuj. “Ka edhe shumë vende të tjera që i janë bashkuar kësaj nisme”, shtoi ajo, duke i bërë thirrje qeverisë gjermane të veprojë në të njëjtën mënyrë dhe të pranojë fëmijë nga Gaza.

Türk-Nachbaur kujtoi se Gjermania ka pranuar fëmijë ukrainas gjatë pushtimit të vazhdueshëm nga Rusia, duke argumentuar se vendi është tashmë i përgatitur për të ofruar kujdes mjekësor.

Thirrjet ndaj Berlinit për veprim më vendimtar janë shtuar në mes të zemërimit ndërkombëtar për situatën humanitare në Rripin e Gazës, që sipas ekspertëve ndodhet në prag të urisë pas gati 22 muajsh të fushatës ushtarake izraelite, e nisur pas sulmeve të 7 tetorit 2023.

Tre qytete gjermane, Hanoveri, Dyseldorfi dhe Boni,  njoftuan se planifikojnë të strehojnënë fëmijë nga Gaza dhe Izraeli që janë veçanërisht të traumatizuar apo të pambrojtur.

Por, Turk-Nachbaur pranoi se disa çështje duhet të zgjidhen me Izraelin përpara se të bëhet evakuimi i fëmijëve nga Gaza.

“Na duhen korridore të sigurta, duhet të organizojmë transportin me autoambulanca dhe na nevojitet fillimisht miratimi nga pala izraelite”, theksoi ajo. /Ad.Ab./

The post GJERMANI – SPD kërkon strehimin e fëmijëve nga Gaza appeared first on Agjencia Telegrafike Shqiptare.

Republikanët e Teksasit kanë votuar për arrestimin e dhjetëra ligjvënësve demokratë që ikën nga shteti me qëllim për të mos votuar një plan që rivizaton kufijtë zgjedhore.

Guvernatori republikan Greg Abbott urdhëroi policinë e shtetit që t’i gjejë, arrestojë dhe ti kthejë në dhomën locale te përfaqësuesve, anëtarët që kanë braktisur detyrën ndaj qytetarëve të Teksasit.

Harta e rivizatuar e kongresit do të krijonte pesë vende të tjera me prirje republikane në Dhomën e Përfaqësuesve në Uashington, ku republikanët mbajnë një shumicë të vogël.

Të paktën dy të tretat e organit legjislativ shtetëror prej 150 anëtarësh në Teksas duhet të jenë të pranishëm për të votuar dhe kuorumi u bë i paarritshëm pasi më shumë se 50 ligjvënës demokratë u larguan nga shteti.

Shumica e demokratëve ikën në Illinois ku Guvernatori i shtetit tha se do të bënte gjithçka që mundej për të mbrojtur secilin prej tyre mes kërcënimeve për arrestim.

Demokratët thanë se planifikonin të qëndronin larg Teksasit për dy javë deri në fund të një sesioni të posaçëm legjislativ.

Megjithatë vota për arrestimin e tyre është kryesisht simbolike, pasi ata nuk janë duke shkelur ligjet e shtetit dhe kjo do e bënte thuajse të pamundur për republikanët që të kërkojnë bashkëpunimin e autoriteteve ligjvënëse për ekstradimin e tyre. Ndër të tjera policia e shtetit nuk ka autoritetin për të bërë arrestime jashtë Teksasit, por mund t’i shoqërojë ligjvënësit për në dhomën locale të përfaqësuesve nëse i gjen brenda kufijëve.

Anëtarët e Dhomës së Përfaqësuesve të Teksasit paguajnë një gjobë prej 500 dollarësh për çdo ditë që nuk paraqiten./abcnews.al

Qyteti i El-Fasherit në Sudan, ku jetojnë rreth 300 mijë banorë, po përballet me një krizë të thellë humanitare dhe urie për shkak të bllokadave që i kanë vendosur forcat paramilitare të Forcave për Mbështetje të Shpejtë (RSF).

Për më shumë se një vit, organizata e Kombeve të Bashkuara për Ushqimin (WFP) nuk ka mundur të dërgojë ndihma ushqimore në qytet për shkak të pengesave në rrugë dhe situatës së sigurisë. Konflikti mes ushtrisë sudaneze dhe RSF, që ka nisur në prill të vitit 2023, ka shndërruar Darfurin në një nga krizat më të mëdha humanitare në botë.

Situata është alarmante, me mungesë të theksuar ushqimesh, rritje të çmimeve dhe raporte që tregojnë se njerëzit po hanë ushqim për kafshë dhe mbetje për të mbijetuar. UNICEF paralajmëron se kequshqyerja është përhapur në të gjithë vendin, sidomos tek fëmijët nën moshën pesë vjeç, ku 38% në kampet për të zhvendosurit vuajnë nga kequshqyerja akute.

Megjithëse WFP ka kamionë të gatshëm për dërgim dhe ka marrë leje nga qeveria sudaneze, pritet ende miratimi nga RSF për të ndërprerë përkohësisht luftime dhe për të lejuar hyrjen e ndihmave. Përpjekjet për një armëpushim humanitar që do të zgjaste një javë janë bllokuar, pasi RSF ka refuzuar nismën, duke pretenduar se ajo do të përdorej për të furnizuar ushtrinë sudaneze.

Mbi një milion persona janë larguar nga El-Fasher që nga fillimi i konfliktit, përfshirë shumë nga kampi i zhvendosurve Zamzam, që u mor nën kontroll nga RSF në prill. Situata po përkeqësohet edhe nga kufizimet financiare në ndihmat ndërkombëtare, sidomos pas uljes drastike të ndihmave nga Shtetet e Bashkuara gjatë administratës Trump. / abcnews.al

“Asi” i Guangzhou FC, Jasir Asani, njoftoi transferimin e tij në Iran në mes të sezonit. Klubi Esteghlal njoftoi përmes faqes zyrtare se: “Ne kemi nënshkruar një kontratë 18- mujore me Asanin.”

Kontrata e Asanit me klubin e tij aktual, Guangzhou FC, skadon në janar të vitit të ardhshëm. Megjithatë, Esteghlal shtoi se po punojnë me Guangzhou FC për të siguruar që Asani t’i bashkohet ekipit sa më shpejt të jetë e mundur. Esteghlal është një klub prestigjioz, me nëntë tituj kampion dhe shtatë kupa në historinë e tij. Gjithashtu, ai ka bërë vazhdimisht paraqitje të mira në Ligën e Kampionëve të Konfederatës Aziatike të Futbollit (AFC).

Asani iu bashkua Guangzhou FC përpara sezonit 2023 dhe tërhoqi shpejt vëmendjen e tifozëve me goditjet e tij karakteristike me të majtën dhe depërtimet e shpejta. Ai ishte veçanërisht kërcënues nga distanca dhe në goditjet standarde, duke i dhënë gjallëri sulmit të Guangzhou FC-së. Në Ligën e Kampionëve AFC Elite (ACLE) 2024–25, të mbajtur në mars, ai luajti në dhjetë ndeshje, duke shënuar nëntë gola dhe duke dhënë një pasim për gol, çka e çoi skuadrën në çerekfinale.

Asani bëri transferimin duke përfituar nga rregulli “Bosman”, i cili u lejon lojtarëve të negociojnë lirisht me klube të tjera gjashtë muaj para skadimit të kontratës së tyre. Për shkak të situatës financiare të Guangzhou FC, pritej që Asani të transferohej te Yokohama F. Marinos në Japoni këtë verë, por ai zgjodhi të qëndrojë. Lajmi i papritur i transferimit, së bashku me mundësinë e largimit të tij të parakohshëm gjatë sezonit, ishte një tronditje për tifozët e Guangzhou FC-së.

Në Korenë e Jugut, disa e panë vendimin si zhgënjyes. “Asi” i skuadrës, Asani, sipas tyre, i zhgënjeu tifozët duke shpallur transferimin e tij ndërkohë që kontrata e tij ishte ende e vlefshme. Një burim i brendshëm i klubit korean tha: “Situata midis Esteghlalit dhe Asanit është e rrallë në futboll. Kur një lojtar transferohet, të dy klubet zakonisht bien dakord ta njoftojnë njëkohësisht në një moment të caktuar. Ose, zakonisht është klubi ‘mëmë’ që e bën njoftimin. Ky njoftim nga Esteghlal për transferimin e Asanit tregon mungesë respekti për Guangzhou FC-në.”

Vetë Guangzhou FC deklaroi: “Asani premtoi të qëndronte me ekipin nëse nuk do të transferohej deri në periudhën shtesë të regjistrimit të lojtarëve (24 korrik), por ai e tradhtoi besimin. Ne konfirmuam përmes rrjeteve sociale se Esteghlal dëshironte që ai të bashkohej më herët, por asgjë nuk është vendosur ende.” Një zyrtar i klubit korean përmblodhi situatën: “Nuk ka pasur ende kontakt me Esteghlalin. Nëse ata dëshirojnë që Asani të transferohet para kohe, do të duhet të zhvillohen negociata për një tarifë transferimi. Por përpara kësaj, vendimi i trajnerit është thelbësor. Ne do të vendosim nëse Asani do të luajë pjesën e mbetur të sezonit apo jo. Lojtarët aktualisht janë me pushime. Do të takohemi me trajnerin për të shqyrtuar situatën aktuale.”

The post Firmosi në Iran, Jasir Asani rrezikon të përfundojë në tribunë appeared first on Albeu.com.

Princ Leka dhe Blerta Celibashi po shijojnë disa ditë pushimi së bashku, larg zhurmës së jetës publike. Çifti së fundmi ka pushuar nën shoqërinë e njëri-tjetrit ne mës të detit, në një jaht luksoz.

Blerta ka ndarë një fotografi të veçantë, ku vëmendjen e marrin qindra trëndafila që e rrethojnë.

Një gjest romantik nga ana e Princit, që duket se ka zgjedhur t’i shprehë dashurinë në mënyrën më të ëmbël.

Me këtë gjest, Princ Leka konfirmon edhe një herë se lidhja e tij me Blertën është e fortë dhe plot ndjenja të sinqerta.

The post FOTO/ Romancë mbretërore në det! Princ Leka nuk kursehet për Blertën, i mbulon jahtin luksoz me trëndafila appeared first on Albeu.com.

Ndërsa sezoni i ri i “Wenna” po fillon dhe Jenna Ortega vazhdon të ndriçojë Hollywood-in, tani thuhet se ajo do të ketë një pasuri prej 5 milionë dollarësh deri në vitin 2025.

Vetëm 22 vjeç, kjo yll i ri ka parë pasurinë e saj të rritet ndjeshëm falë rolit të saj kryesor në serialin e njohur të Netflix, koncerteve të mëdha në filma dhe marrëveshjeve me marka të njohura.

Ortega e pa për herë të parë kur ishte fëmijë në serialin “Jane the Virgin” dhe “Stuck in the Middle” të Disney-t . Por suksesi i saj i madh erdhi me serialin “Wenday” të Netflix-it. Interpretimi i saj i serialit të famshëm ” Wenday” të Addams-it bëri që seriali të fitonte vëmendjen e fansave dhe kritikëve, duke e çuar atë në listat më të larta të shikueshmërisë në platformë.

Raportet nga Celebrity Net Worth tregojnë se Ortega fitoi rreth 250,000 dollarë për secilin serial në sezonin e parë, duke arritur në mbi 2 milionë dollarë. Deri në vitin 2025, të ardhurat e saj nga seriali duket se do të rriten ndjeshëm , ndërsa ajo do të bëhet producente ekzekutive për sezonin e dytë të “Wednesday”.

Fluksi i parave të Jenna Ortega-s nuk vjen vetëm nga televizioni. Ajo ka luajtur në një sërë filmash të suksesshëm si Scream VI, X, The Fallout dhe Beetlejuice. Këto role me shumë gjasa sjellin fitime të mëdha, duke i dhënë asaj një rritje të konsiderueshme të pasurisë neto.

Përtej aktrimit, Ortega ka arritur marrëveshje me marka të mëdha si Neutrogena, Adidas dhe Prada, duke e bërë atë një përcaktuese trendesh dhe një emër të madh në publicitet dhe reklama. Ajo madje shkroi një libër të quajtur “It’s All Love” në vitin 2021, duke zgjeruar burimet e saj të të ardhurave.

The post Pasuria neto e Jenna Ortega në vitin 2025: Cila është pasuria e yllit të ‘Wensday’? appeared first on Albeu.com.

Kolegji Zgjedhor do të shqyrtojë më 13 gusht, në orën 10:00, ankimimin e Shqipëria Bëhet. Kjo forcë politike ka ankimuar vendimin e Komisionit të Ankimeve dhe Sanksioneve, që i dha mandatin e deputetes, kandidates së parë në listën e mbyllur, Ana Dajko. Shqipëria Bëhet kërkon nga Kolegji Zgjedhor që të njihen dorëheqjet e kandidatëve të listës së mbyllur dhe mandati t’i kalojë kandidatit më të votuar në listën e hapur, Adriatik Lapaj, njëkohësisht drejtuesit të kësaj force politike.

Më 30 korrik, Komisioni i Ankesave dhe Sanksioneve rrëzoi kërkesën e subjektit “Shqipëria Bëhet” që të njihte dorëheqjet e listës së mbyllur nga kandidimi. Në këtë mënyre mandati do t’i kalonte Adriatik Lapajt si më i votuari në listën e hapur. KAS është shprehur në shpalljen e vendimit se akti i dorëheqjeve të kandidatëve nga lista e mbyllur është një akt i pavlefshëm nga ana ligjore dhe nuk mund të merret në konsideratë. Ndërkohë KAS njoftoi se mandati i deputetit të “Nisma Shqipëria Bëhet” në qarkun e Tiranës, do t’i kalojë kandidatës, Ana Dajko.

Ky mandat deputeti është bërë shkak dhe për përplasjet mes koalicionit zgjedhor “Nisma Shqipëria Bëhet”. Dy partitë “Shqipëria Bëhet” dhe “Nisma Thurje” kishin rënë dakord që deputet do të bëhej kandidat ai që merrte më shumë vota nga lista e hapur. Ndërsa ata që ishin në listën e mbyllur do të jepnin dorëheqjen. Ndërkohë, mosmarrëveshjet shpërthyen pasi kandidati i Nismës Thurje në listën e mbyllur në Tiranë, Zeqir Kordhoni tha se nuk do të tërhiqej nga mandati.

Pas disa ditësh akuzash të ndërsjella mes Lapajt dhe Endri Shabanit, daja i këtij të fundit u tërhoq nga mandati dhe kështu KQZ i dha Kleana Xhuvelit. Disa ditë para se të bëhej ndarja e mandanteve, Xhuveli vendosi “të tërhiqte dorëheqjen” e saj të mëparshme. Përmes një letre zyrtare drejtuar KQZ, ajo thoshte se ky vendim vjen pas një rishqyrtimi të plotë të rrethanave dhe një konsultimi të gjerë me mbështetësit, familjen dhe strukturat e angazhimit politik.

The post “Mandati t’i kalojë Lapajt”, Kolegji Zgjedhor shqyrton më 13 gusht ankimimin e Shqipëria Bëhet për vendimin e KAS appeared first on Albeu.com.

Qyteti bregdetar i Vlorës është përballur pasditen e kësaj të mërkure me stuhi dhe reshje te forta shiu, të cilat kanë nisur papritur dhe kanë zënë në befasi pushuesit që kanë zgjedhur jugun.

Siç shihet dhe nga kjo foto, rrugët janë bërë gati të pakalueshme për shkak të intensitetit të lartë të reshjeve dhe sasisë së madhe të ujit që ka përfunduar në rrugë, ndërsa edhe fushëpamja është e kufizuar.

Pamje nga zona historike e Vlores
Problematike situata ka qenë në lagjet “Pavarësia”, “Skelë” dhe “Transballkanike”, ka pasur vështirësi në qarkullimin e mjeteve për shkak të prezencës së ujit në rrugë, por edhe trafikut të rënduar nga lëvizja e menjëhershme e pushuesve dhe banorëve vendas.

Rruga “Albano Romina” është përmbytur dhe niveli i ujit nga stuhia e fuqishme ka shkuar deri ne 30 centimetra. Kjo është një nga zonat më problematike, e cila përmbytet sapo nisin reshjet e shiut.

The post Stuhi me reshje të forta shiu në Vlorë, pushuesit “ia mbathin” nga plazhi, rrugët bëhen “gjol” appeared first on Albeu.com.

MOSKË, 5 gusht /ATSH/- Rusia tha sot se nuk do të vendoste më kufizime se ku do të dislokohen raketat me rreze të mesme veprimi që mund të mbajnë koka bërthamore, sipas “Reuters”.

Një ditë pasi Rusia tha se po hiqte atë që e quajti – një moratorium të njëanshëm për vendosjen e raketave me rreze të mesme veprimi – zëdhënësi i Kremlinit, Dmitry Peskov tha se kjo ishte një përgjigje e detyruar ndaj lëvizjeve të SHBA-së dhe aleatëve të saj.

“Rusia nuk ka më kufizime për këtë çështje, Rusia nuk e konsideron më veten të kufizuar nga asgjë”, tha Peskov.

“Rusia e konsideron veten të drejtë, nëse është e nevojshme, të marrë masa të përshtatshme, të ndërmarrë hapa të përshtatshëm”, shtoi ai.

Analistët perëndimorë të sigurisë thanë se “moratoriumi”, në fakt, kishte vdekur prej kohësh – nëse kishte ekzistuar ndonjëherë – por njoftimi rus ishte menduar si një sinjal agresiv ndaj Perëndimit – në një kohë tensioni të lartë për shkak të luftës në Ukrainë.

“Kjo i dërgon një mesazh Evropës: mos harroni se i kemi këto raketa”, tha Nikolai Sokov, një ish-negociator sovjetik dhe rus për kontrollin e armëve.

“E gjithë ideja është që evropianët të mendojnë më shumë për atë që po planifikojnë të bëjnë, ose t’i qetësojmë paksa”, shtoi ai.

Sokov tha se njoftimi i Rusisë ishte një formalitet duke pasur parasysh vendosjen e një rakete të re hipersonike me rreze të mesme veprimi të quajtur “Oreshnik”, të cilën e testoi në Ukrainë nëntorin e kaluar.

Presidenti Vladimir Putin tha javën e kaluar se “Oreshnik” kishte hyrë në prodhim dhe ishte dorëzuar në forcat e armatosura.

Putin tha gjithashtu, se “Oreshnik” do te dislokohej edhe në Bjellorusi, një aleat i Rusisë që kufizohet me tre vende të NATO-s.

Analistët ushtarakë thanë se mund të qëllohet me koka luftarake konvencionale ose bërthamore. //a.i/

The post MOSKË – Peskov: Rusia nuk do t’i përmbahet më moratoriumit për raketat me rreze të mesme veprimi appeared first on Agjencia Telegrafike Shqiptare.

KIEV, 5 gusht /ATSH/- Presidenti ukrainas Volodymyr Zelensky tha sot se ka zhvilluar një bisedë telefonike me homologun e tij amerikan, Donald Trump, sipas “Reuters”.

Zelensky tha se biseda e tyre u fokusua në sanksionet ndaj Rusisë dhe finalizimin e një marrëveshjeje SHBA-Ukrainë për dronët.

“Draft-marrëveshja për dronët është përgatitur tashmë nga pala ukrainase, ne jemi të gatshëm ta diskutojmë në detaje dhe ta finalizojmë atë”, shkroi ai në X.

Biseda e tyre vjen ndërsa autoritetet ukrainase thanë se sulmet ruse vranë gjashtë persona në lindje te vendit, dhe plagosën të paktën 12 persona.

Rusia ka përshkallëzuar sulmet ajrore përpara afatit të së premtes të vendosur nga presidenti i SHBA-së, Donald Trump për të negociuar një marrëveshje drejt paqes ose në të kundërt Moska do të perballet me sanksione masive.

Presidenti Zelensky tha se Rusia kishte lëshuar më shumë se 25 dronë “Shahed” të projektuar nga Irani në qytet, duke goditur infrastrukturën civile.

“Hekurudha u dëmtua, përfshirë një depo dhe një stacion”, tha ai në mediat sociale, duke shtuar se të paktën 10 persona ishin plagosur në sulm.

Afati i fundit i presidentit Trump po afrohet pas tre raundesh bisedimesh për paqe në Stamboll dështuan të bënin përparim në një armëpushim të mundshëm, me të dyja palët që mbeten larg njëra-tjetrës.

Afati i fundit i presidentit Trump po afron pasi tre raunde bisedimesh për paqe në Stamboll dështuan në arritjen e një armëpushimi të mundshëm.

Ushtria ruse ka përshkallëzuar sulmet dhe ka përshpejtuar avancimin e saj në terren për të pushtuar më shumë territor ukrainas.

I dërguari amerikan, Steve Witkoff do të vizitojë Rusinë këtë javë, dhe pritet të takohet me presidentin Vladimir Putin, përpara afatit të sanksioneve të së premtes. //a.i/

The post KIEV – Zelensky dhe Trump diskutojnë finalizimin e marrëveshjes SHBA-Ukrainë për dronët appeared first on Agjencia Telegrafike Shqiptare.

TIRANË, 5 gusht /ATSH/ Në Tiranë vijon aksioni për të siguruar qarkullim të lirë dhe të sigurt të makinave në rrugët e kryeqytetit.

Policia bashkiake e Tiranës njoftoi sot se në bashkëpunim me Policinë e Shtetit vijoi aksionin për rregullimin e trafikut, lirimin e korsive të autobusit dhe largimin e mjeteve të parkuara në mënyrë të paligjshme.

Ky është një operacion i ndërmarrë nga Policia e Shtetit dhe Policia Bashkiake për të siguruar qarkullim të lirë dhe të sigurt.

“Shkeljet e rregullave të qarkullimit rrugor do të ndëshkohen sipas ligjit”, theksoi Policia Bashkiake.

/m.q//r.e/

The post Rregullimi i trafikut në Tiranë, vijon aksioni nga Policia e Shtetit dhe ajo bashkiake appeared first on Agjencia Telegrafike Shqiptare.

TIRANË, 5 gusht /ATSH/ Fermerët shqiptarë që synojnë të investojnë në mbjellje të reja pemësh frutore, agrumesh, ullishtesh dhe vreshtash do të përfitojnë 50% grant nga Skema Kombëtare e Investimeve 2025, e cila është hapur për aplikime deri më 30 shtator.

Ministrja e Bujqësisë dhe Zhvillimit Rural, Anila Denaj zhvilloi sot një takim me fermerë të qarkut të Beratit, me qëllim sqarimin e kritereve të aplikimit.

Ministrja Denaj u shpreh se “pjesëmarrësit patën mundësi të merrnin përgjigje të detajuara për çdo pyetje konkrete që kishin lidhur me aplikimin”.

Sipas Denajt, “Skema Kombëtare e Investimeve 2025 ofron 50% grant për investime në sektorin bujqësor dhe mund të kombinohet me Kredinë e Butë me normë interesi deri në 2% dhe Garancinë Sovrane me mbulim kolaterali deri në 70%”.

Aplikimet kryhen pranë zyrave qendrore të AZHBR-së, ndërsa skema përfshin gjithsej 9 masa mbështetëse për sektorin bujqësor.

Ky është një hap i rëndësishëm drejt forcimit të bujqësisë shqiptare dhe përmirësimit të kapaciteteve prodhuese në përputhje me objektivat e Bujqësisë 2030.

/e.i//r.e/

The post Mbështetje fermerëve, Denaj: 50% grant për investime në sektorin bujqësor appeared first on Agjencia Telegrafike Shqiptare.