TIRANË, 12 gusht/ATSH/ Drejtori i Përgjithshëm i Policisë së Shtetit Drejtues Madhor Ilir Proda i dorëzoi inspektor Klajdi Mustaj, Certifikatën për Shërbime të Dalluara.

Në ambientet e Drejtorisë së Përgjithshme të Policisë së Shtetit u zhvillua ceremonia për dorëzimin e certifikatës së akorduar nga Drejtori i Përgjithshëm, punonjësit të Policisë Klajdi Mustaj. Në ceremoni morën pjesë drejtues të lartë të Policisë së Shtetit dhe të DVP Vlorë, ku punonjësi i Policisë është i komanduar për sezonin turistik, si dhe eprorë dhe kolegë të tij.

Gjatë fjalës së tij, Drejtori i Përgjithshëm ka vlerësuar aktin e guximshëm të punonjësit të Policisë, akt që mishëron më së miri misionin e Policisë së Shtetit, të jemi aty ku qytetarët kanë më shumë nevojë për ne.

“Veprimi i Inspektorit Klajdi Mustaj, i cili ndërhyri me profesionalizëm dhe vendosmëri për të shpëtuar tre bashkëqytetarë të përfshirë në një aksident rrugor, është një shembull frymëzues për çdo efektiv policie. Guximi, reagimi i shpejtë dhe zemra e madhe që tregoi, janë vlerat që ne duam të shohim te çdo punonjës i Policisë së Shtetit. Në emrin tim dhe të gjithë trupës sonë policore, i shpreh mirënjohjen më të thellë dhe e përgëzoj për këtë akt të lartë human, për t’u dhënë ndihmën e parë, në kushte të vështira, tre shtetasve që u përfshinë në një aksident rrugor. 15-vjeçari që Klajdi mori në duar mes tymit dhe flakëve, për ta shpëtuar, fatkeqësisht humbi jetën në spital, kështu që gjej rastin t’i shpreh familjes, ngushëllimet e mia të sinqerta”, tha Proda.

Proda bëri të ditur se si Klajdi, do të nderohet çdo punonjës policie që do të demonstrojë këto vlera të larta njerëzore dhe përgjegjshmëri ndaj detyrës. “Çdo punonjës policie që do ta përmbushë me dinjitet, ndershmëri, përkushtim, sakrificë dhe humanizëm detyrën, ka mbështetjen time të plotë”, shtoi ai.

Më tej, punonjësi i Policisë Klajdi Mustaj ka falënderuar Drejtorin e Përgjithshëm, për vlerësimin dhe mbështetjen, dhe ka theksuar se ka bërë detyrën dhe do vijojë ta bëjë sa herë t’i jepet rasti, duke uruar që të tilla raste të mos ndodhin më. Ai ka apeluar për drejtuesit e automjeteve, që të respektojnë rregullat e qarkullimit rrugor dhe të mbrojnë jetën.

“Ky vlerësim nuk është vetëm një motivim personal, por edhe një mesazh inkurajues që tregon se puna, përkushtimi dhe ndershmëria vlerësohen, dhe do të mbetet për mua një nxitje për të vazhduar të jap më të mirën në shërbim të qytetarëve dhe të vendit. Mbështetja juaj ndaj çdo punonjësi policie që përmbush me ndershmëri, përkushtim, sakrificë dhe humanizëm detyrën në shërbim të qytetarëve dhe atdheut, është më shumë se një certifikatë apo vlerë monetare, është një tregues i qartë që puna e sakrifica vlerësohen. Ndjej shumë keqardhje që 15-vjeçari, të cilin u përpoqa me gjithë zemër ta shpëtoja, humbi jetën në spital. Shpirti i tij u prehtë në paqe! Sot, kam një mesazh për të gjithë përdoruesit e rrugës, jeta është thesari ynë, mbrojeni atë duke zbatuar ligjshmërinë”, u shpreh Inspektori Mustaj. /j.p/

The post Certifikatë për Shërbime të Dalluara për Inspektorin Klajdi Mustaj, Proda: Profesionalizëm dhe vendosmëri për të shpëtuar tre bashkëqytetarë appeared first on Agjencia Telegrafike Shqiptare.

TIRANË, 12 gusht/ATSH/ Vetëm pak ditë pas prezantimit nga Kryeministri Edi Rama të aplikacionit më të ri digjital për denoncimin e zënieve të paligjshme të hapësirave publike, qytetarët kanë reaguar në mënyrë të menjëhershme, duke raportuar mbi 3 mijë raste.

Sipas Agjencisë për Media dhe Informim, institucionet përkatëse do të verifikojnë çdo raportim individualisht, me qëllim lirimin e çdo hapësire publike të zaptuar në mënyrë të jashtëligjshme.

Përmes portalit “Hapësira ime publike” qytetarët do të kenë mundësi që të denoncojnë rastet e zënies së trotuareve, ndërtimet pa leje apo shkelje të lejes, zaptime anës rrugëve kombëtare, parkingje private të paligjshme apo shkelje të tjera në dëm të pronës publike.

Ky aplikacion vjen si pjesë e një nisme më të gjerë të qeverisë për mbrojtjen e interesit publik dhe rritjen e transparencës e pjesëmarrjes qytetare në administrimin e hapësirës urbane. /j.p/

The post “Hapësira ime publike”, mbi 3 mijë denoncime nga qytetarët appeared first on Agjencia Telegrafike Shqiptare.

TIRANË, 12 gusht/ATSH/ Promovimi i arsimit dhe formimit profesional si një zgjedhje e qëndrueshme për të rinjtë, mbetet një nga prioritetet kryesore të qeverisë shqiptare. Kjo politikë synon përgatitjen e brezave të rinj për tregun e punës, përmes përmirësimit të vazhdueshëm të standardeve në shkollat profesionale në të gjithë vendin.

Ministria e Bujqësisë dhe Zhvillimit Rural po punon gjithashtu për të nxitur të rinjtë të ndjekin shkollat e mesme profesionale me profil bujqësor, me qëllim forcimin e këtij sektori jetik për zhvillimin ekonomik të vendit.

Për të arritur këtë objektiv, MBZHR po ndërmerr një sërë hapash konkretë si promovimi efektiv i arsimit profesional, përmirësimi i kurrikulave dhe infrastrukturës mësimore, ofrimi i mundësive tërheqëse për nxënësit dhe bashkëpunimi i ngushtë me industrinë dhe komunitetin lokal.

Ministrja Anila Denaj i ftoi sot të rinjtë të zgjedhin Shkollën Profesionale Kamzë ku ofrohen programe studimi në agrobiznes dhe bujqësi, si një mundësi për të dhënë kontribut konkret në zhvillimin e këtij sektori në përputhje me strategjinë “Bujqësia 2030”.

Shkolla “Kamzë” ofron gjithashtu programe të ndryshme në fushat e hoteleri-turizmit, teknologjisë së informacionit dhe komunikimit (TIK), shërbimeve teknike dhe transportit, shërbimeve sociale dhe shëndetësore, si dhe elektronikës, duke ofruar një gamë të gjerë mundësish për nxënësit.

Procesi i aplikimit për klasën e 10-të kryhet përmes “e-Albania”-s, ku çdo prind mund të aplikojë online dhe më pas merr përgjigjen nga shkolla.

Edhe pse arsimi profesional shpesh është parë si një alternativë e dytë nga prindërit dhe vetë të rinjtë, realiteti i tregut të punës tregon të kundërtën. Sot, kërkesa për punonjës të kualifikuar është e lartë.

Bizneset po kërkojnë vazhdimisht staf të specializuar, sidomos në sektorët e turizmit, bujqësisë dhe teknologjisë.

Statistikat tregojnë se mbi 60% e nxënësve të arsimit profesional punësohen që gjatë vitit të dytë apo të tretë të shkollës, çka e bën këtë formim një rrugë të sigurt drejt një karriere të suksesshme. /j.p/

The post Denaj fton të rinjtë të zgjedhin shkollën profesionale Kamzë appeared first on Agjencia Telegrafike Shqiptare.

TIRANË, 11 gusht/ATSH/ Ministria e Ekonomisë, Kulturës dhe Inovacionit ka nxjerrë për konsultim publik projektligjin “Për shndërrimin, bashkimin dhe ndarjen ndërkufitare të shoqërive tregtare”.

Ky projektligj synon krijimin e një kuadri të plotë ligjor që rregullon kushtet dhe procedurat për shndërrimet, bashkimet dhe ndarjet ndërkufitare ndërmjet shoqërive tregtare shqiptare dhe atyre të vendeve të Bashkimit Evropian.

Përcaktimi i rregullave të unifikuara ka për qëllim sigurimin e transparencës, sigurisë juridike dhe trajtimit të barabartë për të gjitha subjektet e përfshira në këto operacione.

Një objektiv kyç është përafrimi i legjislacionit shqiptar me standardet e BE-së, konkretisht transpozimi i Direktivës (BE) 2019/2121 që ndryshon Direktivën (BE) 2017/1132 për këto operacione, duke siguruar një mjedis ligjor të qëndrueshëm dhe të parashikueshëm për ndërmarrjet dhe investitorët.

Po ashtu, projektligji synon mbrojtjen e interesave të aksionarëve, kreditorëve dhe punëmarrësve të shoqërive të përfshira, përmes mekanizmave mbrojtës si e drejta e aksionarëve të pakicës për t’u tërhequr me kompensim të drejtë, garantimin e të drejtave të kreditorëve dhe përfshirjen e punëmarrësve në procesin e vendimmarrjes.

Ky ligj pritet të kontribuojë në përmirësimin e klimës së biznesit në Shqipëri, rritjen e besimit të investitorëve të huaj dhe integrimin e vendit në tregun e përbashkët evropian, duke rritur konkurrueshmërinë e ekonomisë shqiptare.

Procesi i verifikimit të ligjshmërisë dhe certifikimit paraprak për bashkimet ndërkufitare është disi më i ndërlikuar, pasi përfshin autoritetet e disa vendeve.

Projektligji përcakton që për shoqërinë shqiptare pjesëmarrëse, noteri i autorizuar (si autoritet kompetent) mbledh dhe kontrollon dokumentacionin e secilës shoqëri shqiptare në bashkim, sigurohet që të gjitha të drejtat e aksionarëve, punonjësve e kreditorëve janë respektuar, dhe në fund lëshon certifikatën e parabashkimit për shoqërinë shqiptare.

Kjo certifikatë konfirmon se faza përgatitore e bashkimit është e ligjshme në Shqipëri.
Në mënyrë të ngjashme, autoritetet përkatëse në shtetin tjetër pjesëmarrës (mund të jenë noterë, gjykata apo regjistrat tregtarë atje) lëshojnë certifikatat e tyre për shoqëritë e huaja pjesëmarrëse.

Më pas, autoriteti i vendit të shoqërisë që rezulton (p.sh. nëse shoqëria pas bashkimit do të ketë selinë në Shqipëri, autoriteti është sërish noteri/QKB-ja jonë; nëse do të jetë jashtë, autoriteti përkatës atje) kontrollon certifikatat e parabashkimit të të gjitha shoqërive pjesëmarrëse dhe aktin e bashkimit (marrëveshjen e nënshkruar).

Kur shoqëria e re/pasardhëse është shqiptare, noteri shqiptar pasi verifikon certifikatat e lëshuara nga autoritetet e huaja dhe përmbushjen e procedurave të themelimit të shoqërisë së re (kur ka një të tillë), përgatit aktin përfundimtar noterial të bashkimit dhe njofton QKB-në të regjistrojë bashkimin. Kur shoqëria pasuese është jashtë, atëherë autoriteti i huaj kryen këto veprime përfundimtare dhe QKB-ja, mbi bazën e njoftimit nga autoriteti i huaj, çregjistron shoqërinë shqiptare që u bashkua.

Projektligji parashikon gjithashtu skenarë të veçantë, si bashkimin e shoqërisë mëmë me një shoqëri bijë dhe përfaqësimin e punëmarrësve në organet e shoqërisë pasuese, në përputhje me legjislacionin evropian për përfshirjen e punonjësve në shoqëritë evropiane.

/a.f/

The post Kuadër i ri ligjor për bashkimet dhe ndarjet ndërkufitare të shoqërive tregtare Shqipëri-BE appeared first on Agjencia Telegrafike Shqiptare.

TIRANË, 11 gusht/ATSH/ Ministri i Financave, Petrit Malaj së bashku me drejtorin e përgjithshëm të Doganave, Genti Gazheli, zhvilluan një vizitë inspektuese pranë skanerit të Portit të Durrësit, ku gjatë tre muajve të fundit, falë masave të marra është shënuar një ulje e ndjeshme e numrit të skanimeve.

Ky zhvillim ka sjellë lehtësim të dukshëm të procesit për operatorët ekonomikë dhe është mirëpritur nga shoqëritë e transportit, të cilat kanë vlerësuar reduktimin e kohës së pritjes dhe trajtimin më efikas të fluksit.

Drejtor i Përgjithshëm i “S2 Albania”, Agron Jaku bëri të ditur se masat shtesë e kanë lehtësuar dhe përshpejtuar procesin e transportit si për turizmin, ashtu edhe për mjetet e tjera.

“Aktualisht kemi rreth 200 skanime në ditë dhe i gjithë procesi, nga hyrja në dalje, zgjat vetëm 3 minuta”, theksoi ai.

Drejtori i Përgjithshëm i Doganave, Genti Gazheli, vuri në dukje se rritja e volumeve të mallrave ka sjellë edhe rritje të ritmit të zhdoganimeve.

“Në çdo vit, Porti i Durrësit përpunon rreth 15% të volumit total të import–eksporteve, duke qenë pika më e rëndësishme kufitare në këtë drejtim. Kemi arritur të ulim kohën e përpunimit dhe qëndrimit në port, si dhe të reduktojmë me mbi 10% kohën e skanimit për subjektet që e përdorin si pikë hyrëse dhe dalëse”, tha ai.

Nga ana e tij, ministri i Financave, Petrit Malaj, nënvizoi se këto masa të domosdoshme shkojnë drejt modernizimit të administratës doganore dhe përputhjes së proceseve të punës me standardet e Bashkimit Europian.

“Një doganë e shpejtë, transparente dhe e besueshme është thelbësore për të arritur objektivat tona dhe për t’u afruar më shpejt me standardet e BE-së”, shtoi Malaj.

Ky përmirësim është rezultat i marrëveshjes së firmosur në muajin prill, e cila garanton një qasje të koordinuar mes Doganës dhe Policisë së Shtetit, me kontrolle të targetuara vetëm mbi bazën e riskut.

Në kuadër të këtij bashkëpunimi, po punohet për të reduktuar edhe më tej numrin e skanimeve, duke siguruar balancën e duhur mes sigurisë dhe lehtësive për biznesin.

1 nga 4

/a.f/

The post Malaj dhe Gazheli në skanerin e Portit të Durrësit, reduktim i ndjeshëm i kohës së pritjes për operatorët ekonomikë appeared first on Agjencia Telegrafike Shqiptare.

TIRANË, 10 gusht/ ATSH/ Strukturat e grupeve të emergjencës së Operatori i Sistemit të Transmetimit (OST) dhe Operatori i Shpërndarjes së Energjisë Elektrike (OSSH) janë në gatishmëri të plotë dhe po punojnë intensivisht në terren për të garantuar furnizimin me energji elektrike në zonat e prekura nga zjarret.

Zëvendëskryeministrja dhe njëherësh ministre e Infrastrukturës dhe Energjisë, Belinda Balluku, bëri të ditur sot se ekipet e specializuara janë angazhuar maksimalisht për të ndjekur nga afër situatën dhe për të ndërhyrë aty ku nevojitet, sidomos në ato zona ku për shkak të flakëve është rrezikuar infrastruktura energjetike.

“Kemi ndërhyrë për të zgjidhur problemet në rrjet në zonat e Bistricës, Livadhjas dhe Konispolit, ku prania e zjarreve ka ndikuar në funksionimin normal të linjave të transmetimit”, tha Balluku.

Sipas saj, vëmendje e shtuar po i kushtohet veçanërisht objekteve dhe linjave 110/35 kV, të cilat për shkak të afërsisë me vatrat e zjarrit, kërkojnë ndërhyrje të kujdesshme dhe të koordinuar nga ekipet e elektricistëve në terren.

“Gatishmëria është rritur edhe në pjesë të tjera të vendit, si në Çorovodë dhe Ballaj (Divjakë), ku ekipet tona janë të vendosura dhe të përgatitura për të reaguar në çdo moment”, shtoi Balluku.

Ndërkohë që strukturat e zjarrfikësve vijojnë përpjekjet për shuarjen e zjarreve në disa zona të vendit, elektricistët e OSSH dhe OST ndodhen në gatishmëri të plotë për të ndërhyrë sa më shpejtë në rikthimin e energjisë elektrike pasi qetësohet situata me zjarret.

1 nga 9

/r.e/

The post Balluku: OST dhe OSSH në terren për garantimin e furnizimit me energji në zonat e prekura nga zjarret appeared first on Agjencia Telegrafike Shqiptare.

TIRANË, 10 gusht/ATSH/ Inspektorati Kombëtar i Mbrojtjes së Territorit (IKMT) njofton se nesër, më datë 11 gusht 2025, në orën 07:30 të mëngjesit, do të kryhet demolimi me shpërthim të kontrolluar i një objekti trekatësh, ndodhur pranë aksit rrugor Vlorë – Orikum.

Sipas IKMT-së, objekti në fjalë është ndërtim pa leje dhe ndërhyrja vjen në kuadër të zbatimit të ligjit dhe çlirimit të hapësirave publike.

Aksioni do të zhvillohet në bashkëpunim me Ministrinë e Mbrojtjes, Forcat Xheniere të Ushtrisë, Policinë e Shtetit dhe institucionet e tjera përgjegjëse.

Për realizimin e operacionit janë kryer përgatitjet teknike, si hapja e 410 furnelave, shtrirja e 1100 metrave linearë fitil detonant, si dhe vendosja e 32 kilogramëve lëndë plasëse.

Për të garantuar sigurinë dhe për të minimizuar ndikimet në zonën përreth, shpërthimi do të kryhet herët në mëngjes.

Si masë paraprake do të bllokohet përkohësisht aksi rrugor Vlorë – Orikum, si dhe do të ndërpritet përkohësisht furnizimi me energji elektrike, 15 minuta përpara shpërthimit.

Gjithashtu, do të jenë të pranishme mjetet zjarrfikëse, ambulanca dhe personeli përkatës për të menaxhuar çdo situatë emergjente. Të gjithë pronarët e objekteve pranë perimetrit të sigurisë janë njoftuar dhe informuar për masat mbrojtëse që duhet të ndërmarrin.

/r.e/

The post Bllokohet të hënën përkohësisht aksi Vlorë-Orikum, IKMT kryen një shpërthim të kontrolluar appeared first on Agjencia Telegrafike Shqiptare.

TIRANË, 10 gusht/ATSH/ Vendi po përballet me një situatë të rënduar zjarresh, ndërsa autoritetet janë angazhuar maksimalisht në terren për të mbrojtur zonat e banuara dhe për të krijuar perimetër sigurie rreth vatrave më problematike.

Që nga mëngjesi i sotëm janë evidentuar gjithsej 21 vatra zjarri, nga të cilat 7 janë shuar dhe 14 vijojnë të jenë aktive.

Ministri i Mbrojtjes, Pirro Vengu bëri të ditur se Forcat e Armatosura, shërbimet zjarrfikëse dhe forcat e Policisë po punojnë në mënyrë të koordinuar për të siguruar kontrollin e plotë dhe parandalimin e përhapjes së flakëve.

“Mbështetja nga ajri ka qenë vendimtare, me avionin Canadair të ardhur nga Kroacia që ka operuar në zonat më të prekura si Krane e Finiqit dhe Lukovë e Himarës, ndërsa ekuipazhet e Bazës Ajrore Farkë kanë ndërhyrë në Ballaj dhe Zhabjak të Rrogozhinës, si dhe aktualisht në Poliçan, ku flakët nuk përbëjnë rrezik për ish-Kombinatin Mekanik”, u shpreh Vengu.

Ndërhyrjet ajrore dhe operacionet nga toka, theksoi ai, kanë ulur ndjeshëm rrezikun për banorët dhe pasuritë e tyre, por situata vijon të jetë dinamike për shkak të erërave të forta dhe temperaturave të larta që mbeten të pranishme në mbarë vendin.

Për të përforcuar kapacitetet në terren, ministri Vengu theksoi se gjatë orëve në vijim pritet t’u bashkohen forcave operacionale edhe dy helikopterë të Forcës Ajrore të Emirateve të Bashkuara Arabe, një avion “Canadair” nga Greqia dhe dy helikopterë të mekanizmit evropian të mbrojtjes civile nga Çekia dhe Sllovakia, të cilët do të dislokohen që sonte në Rinas dhe Bazën Ajrore të Kuçovës.

Paralelisht, Komiteti Shtetëror i Emergjencave Civile ka urdhëruar rritjen e gatishmërisë së bashkive në nivel maksimal në të gjithë territorin, ndërsa forcat operacionale janë të pranishme në çdo vatër që paraqet rrezik dhe po vijojnë përpjekjet për të mbajtur situatën nën kontroll.

1 nga 12

/r.e/

The post Vengu: Pesë mjete ajrore pritet të mbërrijnë për të ndihmuar në shuarjen e zjarreve appeared first on Agjencia Telegrafike Shqiptare.

TIRANË, 10 gusht /ATSH/ Në vijim të deklaratës publike lidhur me pasuritë shtetërore pranë ish-Uzinës së Pjesëve të Këmbimit të Automjeteve dhe në përgjigje të interesit për sqarimin e dallimit mes pronave të shoqërisë Kayo sh.a. dhe pasurisë nr. 10/304, të pretenduar nga shoqëria Panaroma Group sh.a., Ministria e Ekonomisë, Kulturës dhe Inovacionit (MEKI) bën të ditur sot se këto pasuri nuk kanë asnjë lidhje juridike apo faktike mes tyre.

MEKI bën të ditur se pasuria me nr. kadastral 10/304 (në administrim të Ndërmarrjes Industriale Nr. 1) është çështje e veçantë, e ndryshme dhe pa asnjë lidhje juridike apo faktike me pasuritë e kaluara shoqërisë Kayo sh.a. me VKM nr. 158, datë 12.3.2025.

Për pasurinë 10/304, me sipërfaqe 13,922 m2, subjekti qiramarrës ka mosshlyerje të detyrimeve prej muajit shkurt 2017. Sipas akteve financiare të dosjes administrative, detyrimi i pashlyer i faturuar deri në shtator 2021 arrin në shumën 88,305,280 lekë (qira) dhe 2,562,310 lekë (kamatëvonesa).

Meqenëse pagesat nuk kanë vijuar pas kësaj date, detyrimet vijojnë të rriten dhe aktualisht përllogariten mbi 2 milionë euro.

MEKI thekson se shuma përfundimtare do të formalizohet pas rifreskimit të llogaritjeve.

Që në vitin 2021, sipas MEKI-t, palës i është njoftuar zyrtarisht ndërprerja e kontratës për shkak të këtyre detyrimeve të papaguara.

Megjithatë, bën të ditur MEKI, në vend që të përmbushte detyrimet dhe të dorëzonte pasurinë, subjekti ka ndërmarrë masa sigurimi dhe padi me qëllim pengimin e ekzekutimit të detyrimeve të kontratës, duke vijuar të përdorë prej vitesh pa kundërshpërblim një pasuri publike.

Kjo sjellje, thekson MEKI, është e padrejtë dhe e paligjshme, duke cënuar parimin e trajtimit të barabartë dhe duke ngarkuar barrë të padrejtë mbi taksapaguesit, po ashtu edhe mbi punonjësit që përgjigjen para ligjit për ndjekjen, monitorimin dhe respektimin e kontratave.

“MEKI vepron me kujdes institucional dhe respekt të plotë për lirinë e medias dhe të shprehjes. Por këto të drejta nuk mund të përdoren si justifikim ose si mekanizëm për të gëzuar padrejtësisht pronën publike dhe për të shmangur shlyerjen e detyrimeve kontraktuale. Trajtimi i barabartë i të gjitha subjekteve ekonomike, qofshin këto edhe media, është parim themelor: është e padrejtë ndaj çdo aktiviteti të njëjtë që paguan taksa dhe qira në kohë, që disa të tjera të përfitojnë nga kontrata publike të dhëna në mirëbesim pa shlyer dhe pa respektuar detyrimet”, thuhet në deklaratën e MEKI-t.

MEKI siguron se do të vijojë verifikimet proceduriale dhe do të ndërmarrë masat administrative dhe ligjore sipas kuadrit ligjor në fuqi për zbatimin e obligimeve të detyrueshme të menaxhimit financiar dhe garantimit të administrimit efektiv të pasurisë shtetërore në fjalë dhe arkëtimin e plotë të detyrimeve në interes të qytetarëve dhe taksapaguesve.

/r.e/

The post MEKI: Asnjë lidhje me pasuritë e shoqërisë KAYO sh.a., detyrime të pashlyera mbi 2 milionë euro appeared first on Agjencia Telegrafike Shqiptare.

TIRANË, 10 gusht/ATSH/ Gjatë orëve të fundit janë evidentuar gjithsej 21 vatra zjarri në të gjithë vendin. Nga këto, 7 vatra janë shuar plotësisht, ndërsa 14 vatra mbeten ende aktive dhe po vijon puna për shuarjen e tyre.

Ndërhyrjet po zhvillohen në mënyrë intensive dhe të koordinuar dhe në operacione janë angazhuar shërbimet zjarrfikëse, Forcat e Armatosura, Policia e Shtetit, autoritetet vendore si dhe forca vullnetare, duke bashkëpunuar ngushtë për vënien nën kontroll të flakëve dhe parandalimin e përhapjes së mëtejshme të zjarreve.

Në qarkun e Vlorës, situata më e rënduar paraqitet në bashkinë Finiq, ku flakët kanë përfshirë zonën e fshatit Krane në njësinë administrative Mesopotam. Në terren po punojnë dhjetëra efektivë zjarrfikës nga disa bashki të jugut, forca të policisë, ushtria, forca vullnetare, si dhe mbështetje ajrore me avionin kanadez të llojit “Canadair”.

Po ashtu, një vatër tjetër aktive ndodhet në vendin e quajtur Rrëzomë, pranë tunelit të Skërficës, ku për shkak të terrenit të thyer ndërhyrja është bërë vetëm me forcat e AdZM.

Në fshatin Bolenë të bashkisë Himarë, zjarri është vendosur nën kontroll falë përpjekjeve të përbashkëta të zjarrfikësve, ushtrisë dhe banorëve. Një tjetër vatër aktive është edhe në fshatin Lukovë, ku forcat vendore vijojnë përpjekjet për shuarjen e flakëve.

Në qarkun e Lezhës, në fshatin Malaj i Epërm të bashkisë Mirditë, zjarri është izoluar dhe ndodhet nën kontroll, ndërsa punimet për shuarjen e plotë vijojnë me intensitet.

Në Dibër, zjarri pranë fshatit Plani Bardhë në malin e Allushit po monitorohet nga zjarrfikësit dhe konsiderohet i kontrolluar.

Ndërkohë, në qarkun Berat janë disa vatra aktive. Në bashkinë Poliçan, jashtë Uzinës Mekanike, flakët përfshijnë një sipërfaqe me shkurre dhe ullishte, ku ndërhyrja mbetet e vështirë. Në fshatin Kozare të bashkisë Kuçovë dhe në fshatin Goriçan të bashkisë Dimal, zjarret vijojnë të jenë aktivë dhe në terren janë angazhuar njësi të MZSH me mjete zjarrfikëse dhe efektivë të specializuar.

Në qarkun Shkodër, fshati Zagore i bashkisë Malësi e Madhe po përballet me flakët në një terren të vështirë dhe të paaksesueshëm, ku forcat zjarrfikëse po punojnë me pompa shpine. Në qarkun Tiranë, në malin e Bërzhitës, si dhe në fshatrat Ballaj dhe Zhabjak të bashkisë Rrogozhinë, ndërhyrja është e vazhdueshme, pavarësisht vështirësive që sjell era e fortë.

Në ndihmë janë angazhuar edhe helikopterë të FA dhe trupa ushtarake për të shmangur përhapjen e zjarrit drejt banesave. Në qarkun Durrës, një vatër aktive ndodhet në malin e Krujës, sipër fabrikës së çimentos, ku ndërhyrja e forcave operacionale vijon.

Në qarkun Gjirokastër, zjarri në fshatin Turan të bashkisë Tepelenë është gjithashtu objekt ndërhyrjeje nga shërbimet emergjente.

Sipas Ministrisë së Mbrojtjes, në të gjitha rastet, ndërhyrjet për shuarjen e flakëve janë të vështira për shkak të terreneve të thepisura, erës dhe temperaturave të larta, por strukturat përkatëse po punojnë me përkushtim për të parandaluar përhapjen dhe pasojat e mundshme ndaj jetës dhe pronës së qytetarëve.

1 nga 5

/r.e/

The post Situata e zjarreve: 14 vatra aktive, operacione në terren appeared first on Agjencia Telegrafike Shqiptare.

TIRANË, 10 gusht/ATSH/ Gjatë orëve të fundit është vërejtur një fluks i shtuar hyrjesh në territorin shqiptar përmes Pikës së Kalimit Kufitar (PKK) në Kakavijë.

Sipas të dhënave nga Policia e Shtetit, ky fluks ka sjellë ngarkesë të përkohshme në përpunimin e udhëtarëve, por situata po menaxhohet në bashkëpunim të ngushtë me autoritetet greke, të cilat kanë shtuar numrin e sporteleve për përpunimin e dokumentacionit në drejtim të Shqipërisë.

Aktualisht, në hyrje të Republikës së Shqipërisë po operohet me 5 sportele dhe në dalje me 2 sportele, ndërkohë që pala greke ka vendosur në funksion 3 sportele për hyrje dhe 2 për dalje.

Nga ora 08:00 deri në orën 16:00 të ditës së sotme, përmes kësaj pike kufitare kanë hyrë dhe dalë gjithsej 5482 shtetas dhe 2090 automjete.

“Pika e Kalimit Kufitar e Kakavijës mbetet në kontakt të vazhdueshëm me autoritetet homologe greke për të garantuar një menaxhim efikas të lëvizjes dhe për të shmangur krijimin e radhëve të gjata”, bën të ditur Policia e Shtetit.

/r.e/

The post Fluks i shtuar në Pikën Kufitare të Kakavijës, rriten kapacitetet për përpunimin e udhëtarëve appeared first on Agjencia Telegrafike Shqiptare.

TIRANË, 10 gusht/ATSH/ Brigjet e detit Adriatik në Durrës janë mbushur plot në këtë fundjavë gushti.

Qyteti bregdetar vazhdon të mbetet një nga destinacionet më të preferuara për pushuesit vendas dhe të huaj.

Pamje nga plazhet e mbushura u ndanë sot edhe nga kryeministri Edi Rama, i cili përmes një videoje në rrjetet sociale, solli atmosferën e gjallë të fundjavës në Durrës.

Turistë nga vende të ndryshme të rajonit dhe Europës kanë zgjedhur Durrësin për të kaluar pushimet.

Autoritetet vendore dhe strukturat pritëse janë angazhuar për të garantuar siguri, pastërti dhe standard të lartë shërbimi, duke e bërë qytetin jo vetëm një destinacion pushimesh, por edhe një model të suksesshëm të turizmit bregdetar në Shqipëri.

/r.e/

The post Fundjava në Durrës, Rama ndan pamje appeared first on Agjencia Telegrafike Shqiptare.

TIRANË, 10 gusht/ATSH/ Qyteti i Elbasanit ka hapur dyert e kujtesës kolektive përmes një ekspozite unike fotografike që pasqyron 100 vite histori, zhvillim dhe transformim.

E vendosur në ambientet e Kalasë së qytetit, ekspozita sjell një retrospektivë të gjallë të çdo dekade, duke dokumentuar jetën urbane, momentet historike dhe përditshmërinë e qytetarëve elbasanas ndër vite.

Imazhet e ekspozuara, të kuruara me kujdes, i ofrojnë vizitorëve një udhëtim emocional dhe vizual në kohë, ndërsa ndërthurin kujtesën kolektive me artin fotografik.

Ceremonia e hapjes u shoqërua me një mesazh nga kryetari i bashkisë së Elbasanit, Gledian Llatja, i cili theksoi rëndësinë e njohjes së rrënjëve dhe trashëgimisë historike për të ndërtuar një të ardhme më të ndërgjegjshme dhe të qëndrueshme.

Ekspozita është pjesë e një kalendari të pasur aktivitetesh kulturore që bashkia e Elbasanit ka organizuar gjatë muajit gusht, në bashkëpunim me institucionet vendore.

Ngjarja ka tërhequr edhe shumë vizitorë dhe turistë, të cilët po e zbulojnë Elbasanin si një destinacion të pasur në histori, kulturë dhe mikpritje.

1 nga 9

/r.e/

The post Elbasani, një shekull histori në celuloid appeared first on Agjencia Telegrafike Shqiptare.

TIRANË, 10 gusht/ATSH/ Policia e Shtetit bëri të ditur sot se po vijon operacioni “Siguria Detare”, me kontrolle të shtuara nga Ksamili, në Velipojë dhe në gjithë hapësirat ujore të vendit.

Si rezultat, janë bllokuar 34 mjete lundruese, nga të cilat 15 për shkelje të perimetrit të sigurisë, duke rrezikuar jetën e pushuesve.

Sipas Policisë, drejtuesit janë ndëshkuar me masa administrative deri në 100 mijë lekë.

Përgjatë një jave janë kontrolluar gjithsej 473 mjete. Në 8 raste Policia Kufitare ka ndërhyrë për të shpëtuar 19 shtetas, shqiptarë dhe të huaj, në rrezik për shkak të dallgëve apo defekteve në mjete.

Po ashtu, në bashkëpunim me autoritetet greke, është bllokuar një gomone e vjedhur në Kanalin e Vivarit, pranë Butrintit, duke vijuar hetimet për autorët.

Policia apelon për respektimin e rregullave të sigurisë detare dhe fton qytetarët të denoncojnë çdo shkelje në numrin 112.

/r.e/

The post Operacioni “Siguria Detare”, 34 mjete lundruese të bllokuara dhe 19 persona të shpëtuar appeared first on Agjencia Telegrafike Shqiptare.

TIRANË, 8 gusht /ATSH/ Gjatë orëve të fundit, në vend janë evidentuar gjithsej 13 vatra zjarri, prej të cilave 6 janë shuar plotësisht, ndërsa 7 vijojnë të jenë aktive.

Si rezultat i ndërhyrjeve intensive nga toka dhe ajri, është bërë i mundur izolimi i plotë dhe shuarja e gjashtë vatrave, ndërkohë që për pjesën tjetër po vijon puna me intensitet për neutralizimin e tyre.

Në qarkun e Vlorës, situata paraqitet më e rënduar. Në fshatin Navaricë, zjarri është spostuar në drejtim të malit mbi fshat. Në Leshnicë të Poshtme, pas ndërhyrjeve tokësore dhe ajrore, është shmangur rreziku për banesat.

Në ndihmë të forcave në terren kanë ndërhyrë helikopteri i Forcës Ajrore dhe dy avionët Fireboss të ardhur nga Suedia, të cilët kanë realizuar gjithsej 44 hedhje uji nga ajri.

Po në këtë qark, në fshatin Tragjas, një tjetër vatër zjarri është aktive në një sipërfaqe me shkurre dhe bimësi të ulët. Në këtë zonë po operojnë 17 efektivë të MZSH Vlorë dhe 3 punonjës të Shërbimit Pyjor. Deri më tani nuk raportohet rrezik për banesat.

Edhe në qarkun e Fierit, konkretisht në fshatin Lofkënd, njësia administrative Qendër Dukas, bashkia Mallakastër, situata vijon të jetë nën vëzhgim.

Megjithë izolimin e pjesës më të madhe të vatrës, zjarri mbetet aktiv në dy pika, në pjesën jugore dhe veriperëndimore, ku për shkak të terrenit të vështirë është e pamundur ndërhyrja nga toka. Aktualisht, në këtë zonë po vijon ndërhyrja nga ajri me avionin kroat të tipit Canadair.

Në qarkun e Lezhës, një vatër tjetër zjarri është aktive në fshatin Malaj Epërm, njësia administrative Rrëshen, bashkia Mirditë. Zjarri ka përfshirë një sipërfaqe pyjore me pishë, lis, shkurre dhe bimësi të dendur, në një terren të vështirë që nuk lejon përdorimin e mjeteve ujëhedhëse. Në terren janë angazhuar 33 forca operacionale të strukturave vendore, të cilat po punojnë për krijimin e brezave ndarës në mënyrë që të pengohet përhapja e mëtejshme e flakëve. Sipërfaqja e përfshirë nga zjarri vlerësohet paraprakisht në 10 hektarë, ndërkohë që aktualisht nuk ka rrezik për zonat e banuara.

Në qarkun e Dibrës, në vendin e quajtur “Mali i Allushit” në fshatin Plan i Bardhë, bashkia Klos, është riaktivizuar një vatër e shuar disa ditë më parë. Megjithatë, falë reagimit të shpejtë, zjarri është vënë nën kontroll dhe nuk përbën rrezik për përhapje apo për banesat.

Në qarkun e Elbasanit, në fshatin Lleshaj, njësia administrative Poroçan, bashkia Gramsh, zjarri është shfaqur në një zonë pyjore me dushqe në një terren të vështirë dhe të largët, në kufi me bashkinë Përrenjas. Pas ndërhyrjeve të vazhdueshme gjatë ditës, vatra është izoluar plotësisht dhe aktualisht mbahet nën monitorim nga punonjës të Shërbimit Pyjor për të shmangur riaktivizimet e mundshme.

Ndërkohë, edhe në qarkun e Tiranës, konkretisht në malin e Bërzhitës, në njësinë administrative Bërzhitë, bashkia Tiranë, një vatër zjarri është aktive në një sipërfaqe me bimësi të dendur. Në terren janë angazhuar 15 forca të MZSH Tiranë, të cilët po punojnë për shuarjen e flakëve. Edhe në këtë zonë nuk raportohet rrezik për banesat.

Autoritetet po vijojnë monitorimin e situatës në gjithë territorin, ndërkohë që ndërhyrjet ajrore dhe tokësore po kryhen me kapacitet të plotë për të vënë nën kontroll të gjitha vatrat e mbetura aktive.

/a.f/

The post MM: 7 vatra zjarri ende aktive, ndërhyrje nga toka dhe ajri appeared first on Agjencia Telegrafike Shqiptare.

TIRANË, 8 gusht/ATSH/ Gjatë periudhës janar-qershor 2025, të ardhurat nga tatimi mbi të ardhurat personale kanë tejkaluar si nivelin e planifikuar, ashtu edhe performancën e regjistruar në të njëjtën periudhë të vitit 2024, duke reflektuar një rritje të konsiderueshme.

Sipas të dhënave të publikuara nga Ministria e Financave, ky tatim ka sjellë në buxhetin e shtetit 40,8 miliardë lekë, që përfaqëson një rritje prej 8,6 miliardë lekësh ose 26,6% më shumë se gjashtëmujori i parë i vitit 2024.

Kjo shumë është gjithashtu 5,4 miliardë lekë më e lartë sesa ishte parashikuar në planin fillestar të të ardhurave për këtë periudhë, duke reflektuar një realizim prej 15,4% mbi objektivin.

Kjo performancë pozitive është rezultat i një sërë faktorësh të ndërlidhur. Së pari, ndikim të drejtpërdrejtë ka pasur rritja e punësimit formal dhe përmirësimi i deklarimit të pagave në sektorin privat, ku ndërmarrjet janë nxitur nga kontrolli më i shtuar tatimor dhe nga përdorimi i teknologjive të reja për raportim dhe deklarim.

Gjatë gjashtëmujorit të parë të vitit, sipas të dhënave të raportuara nga Administrata Tatimore, rezultojnë 10 523 punonjës të rinj më shumë në krahasim me të njëjtën periudhë të vitit të kaluar.

Njëkohësisht, rritja e pagave në sektorin publik dhe në disa sektorë strategjikë të ekonomisë, si teknologjia, ndërtimi dhe shërbimet financiare, ka çuar në një rritje të bazës së tatueshme.

Një tjetër faktor që ka ndikuar është përmirësimi i administrimit tatimor, ku përmes sistemeve të digjitalizuara, si e-filing dhe fiskalizimi në kohë reale, është rritur ndjeshëm transparenca dhe efikasiteti i mbledhjes së të ardhurave.

Përveç pagave, një kontribut të rëndësishëm në rritjen e të ardhurave ka dhënë edhe tatimi mbi burimet e tjera personale të të ardhurave, përfshirë qiratë, dividentët, të ardhurat nga vetëpunësimi dhe fitimet kapitale.

Rritja e aktivitetit në tregun e pasurive të paluajtshme dhe rritja e interesit për investime individuale mund të ketë çuar në një zgjerim të kësaj baze tatimore.

/a.f/

The post Tatimi mbi të ardhurat personale sjell 40.8 miliardë lekë në buxhet në 6-mujorin e parë appeared first on Agjencia Telegrafike Shqiptare.

TIRANË, 8 gusht/ATSH/ Si pasojë e aktivizimit të Mekanizmit Europian të Mbrojtjes Civile, që nga orët e para të mëngjesit të sotëm, në Shqipëri kanë mbërritur për të ndihmuar në përballimin e situatës së zjarreve dy avionë “Air Tractor Fire Boss” të Forcës Ajrore suedeze dhe një avion “Canadair” i Forcës Ajrore kroate.

Mjetet ajrore operojnë nga Baza Ajrore e Kuçovës dhe janë vënë në dispozicion për të mbështetur nga ajri operacionet e shuarjes së zjarreve në Mallakastër dhe Finiq.

Ekuipazhet ndërkombëtare asistojnë në terren strukturat vendore zjarrfikëse, emergjencat civile dhe trupat e Forcave të Armatosura, të cilat, nën koordinimin e Agjencisë Kombëtare të Mbrojtjes Civile (AKMC), vazhdojnë monitorimin dhe kontrollin e disa vatrave aktive zjarri.

Autoritetet shqiptare kanë vlerësuar ndihmën ndërkombëtare si të rëndësishme në përballimin e situatës së krijuar nga përhapja e flakëve në disa zona të vendit. /a.f/

The post Avionë nga Suedia dhe Kroacia ndihmojnë në shuarjen e zjarreve në Mallakastër dhe Finiq appeared first on Agjencia Telegrafike Shqiptare.

TIRANË, 8 gusht/ATSH/ Ambasada e Shteteve të Bashkuara në Tiranë ka njoftuar një ndryshim të rëndësishëm në procedurat për aplikimet për viza jo-emigruese.

Duke filluar nga data 2 shtator 2025, të gjithë aplikantët për viza jo-emigruese në shumicën e kategorive, përfshirë edhe ata që po bëjnë rinovimin e vizës, do të jenë të detyruar të paraqiten për një intervistë me një zyrtar konsullor.

/a.f/

The post SHBA ndryshon procedurat për vizat jo-emigruese appeared first on Agjencia Telegrafike Shqiptare.

TIRANË, 7 gusht/ATSH/ Egnatia barazoi me rezultatin e bardhë 0-0 sfidën e parë ndaj Olimpijas, e luajtur mbrëmjen e sotme në stadiumin “Stocize”, e vlefshme për raundin e tretë kualifikues të UEFA Conference League.

Trajneri Edlir Tetova e nisi ndeshjen me këtë formacion titullar: Dajsinani (GK), Zliyev, Xhemajli, Sota, Fangaj, Medeiros, Aleksi, Lushkja, Gruda, Bakayoko, Selmani.

Pjesa e parë ishte e ekuilibruar për të dyja skuadrat, që tentuan disa herë portat përkatëse, por nuk finalizuan dot. Edhe në pjesën e dytë, portat qëndruan të paprekura si nga rrogozhinasit, ashtu edhe nga Olimpija. Sllovenët humbën edhe një penallti në minutën e 68-të, me Tam qe gaboi dhe e çoi topin jashtë.

Egnatia e mbylli ndeshjen me 10 lojtarë, pas ndëshkimit me karton të kuq të Fangaj.

Takimi Olimpija-Egnatia u mbyll me rezultatin 0-0. Ndeshja e dytë mes dy ekipeve do të luhet më 14 gusht në “Arena Egnatia”.

/r.e/

The post UEFA Conference League, Egnatia barazon 0-0 me Olimpijan në transfertë appeared first on Agjencia Telegrafike Shqiptare.

TIRANË, 7 gusht/ATSH/ Në tremujorin e dytë të këtij viti, numri i mjeteve rrugore në qarkullim arriti në 1.002.582.

Autoveturat përbëjnë pjesën më të madhe të kësaj shifre me 80,8%, ndërsa mjetet për transport të përzier dhe motorët zënë nga 5,9% secili.

Qarku i Tiranës mban peshën më të madhe me 34,8% të mjeteve në qarkullim, i ndjekur nga Durrësi me 13,6%.

Ndërkohë, qarku i Gjirokastrës dhe ai i Kukësit regjistrojnë përqindjen më të ulët të mjeteve në qarkullim, përkatësisht me 2,1% dhe 2,4%.

Gjatë këtij tremujori janë regjistruar për herë të parë 26.976 mjete, nga të cilat 80,9% ishin autovetura.

Edhe për regjistrimet e reja, Tirana zë vendin e parë me 44,2% të totalit. Krahasuar me të njëjtin tremujor të vitit 2024, numri total i mjeteve rrugore është rritur me 9,6%, ndërsa regjistrimet e reja kanë pësuar një rënie prej 7,3%.

Sa i përket markave më të preferuara për regjistrimet e para, “Volkswagen” mban vendin e parë me 20,1%, e ndjekur nga “Mercedes Benz” me 15,8%.

/r.e/

The post Mbi 1 milion mjete rrugore në qarkullim në Shqipëri në tremujorin e dytë appeared first on Agjencia Telegrafike Shqiptare.