Gjykata Supreme përmes vendimit të 30 dhjetorit 2024, ka hudhur poshtë si të palejuar ankesën e Lëvizjes Vetëvendosje të paraqitur kundër vendimit të Panelit Zgjedhor për Ankesa dhe Parashtresa (PZAP) për zgjedhjet parlamentare.
Paneli Zgjedhor për Ankesa dhe Parashtresa (PZAP) më 25 dhjetor 2024 kishte aprovuar ankesën e Listës Serbe dhe kishte anuluar vendimin e Komisionit Qendror të Zgjedhjeve (KQZ), për mosceritfikimin e këtij subjekti politik për zgjedhjet parlamentare të 9 shkurtit 2025.
PZAP-ja kishte urdhëruar KQZ-në që ta certifikojë Listën Serbe dhe kandidatët e këtij subjekti politik.
Kundër vendimit të PZAP-së, Lëvizja Vetëvendosje kishte paraqitur ankesë në Gjykatën Supreme, me të cilën ka kontestuar ligjshmërinë e atij vendimi. LVV-ja kishte propozuar që të anulohet vendimi i PZAP-së dhe të miratohet ai i KQZ-së për moscertifikimin e Listës Serbe për zgjedhjet parlamentare të 9 shkurtit 2025.
Kurse, përgjigje në ankesë kishte parashtruar PZAP-ja, me të cilën ka kundërshtuar pretendimet ankimore dhe propozoi që ankesa e LVV-së të hudhet apo të refuzohet si e pabazuar.
Andaj, Supremja pasi vlerësoi ligjshmërinë e vendimit të kontestuar në kuptim të pretendimeve ankimore dhe përgjigjes në ankesë, dhe pas shqyrtimit të shkresave të lëndës gjeti se ankesa e Vetëvendosjes është e palejuar.
Sipas Supremes, nga shkresat e lëndës rezulton se Lista Serbe me kandidatët e saj për deputetë ka aplikuar për certifikim si subjekt politik, përfshirë edhe listën e kandidatëve në Zyrën për Regjistrimin, Certifikimin dhe Kontrollin Financiar të subjekteve politike në KQZ.
Aty thuhet se zyra e lartpërmendur kishte rekomanduar që Lista Serbe së bashku me kandidatët e saj i ka plotësuar kushtet ligjore për certifikim dhe për pjesëmarrje në zgjedhje. Kurse, KQZ-ja në mbledhjen e mbajtur më 23 dhjetor 2024, nuk e ka miratuar rekomandimin e Zyrës për certifikimin e subjektit në fjalë.
Në këtë rast, shkalla e tretë thekson se KQZ-ja nuk ka nxjerrë vendim lidhur me refuzimin për certifikimin Listës Serbe, por ka lëshuar njoftim, mirëpo PZAP e ka pranuar të vlerësojë ankesën në meritat e saj dhe nuk është fokusuar në emërtimin e aktit, por në përmbajtjen dhe efektin e tij.
Gjithnjë sipas vendimit, thuhet se është pranuar se njoftimi ka prodhuar efekt juridik dhe ka krijuar pasoja të drejtpërdrejta për subjektin politik në fjalë, duke mos e certifikuar për zgjedhje në Kuvendin e Kosovës.
“Një praktikë të tillë të vlerësimit të akteve sipas përmbajtjes dhe efektit ka ndërtuar edhe Gjykata Kushtetuese e Republikës së Kosovës në rastet Nr.KO 159/21 datë 03.07.2023”, thuhet në vendim.
Më tej, thuhet se PZAP-ja pas shqyrtimit të shkresave të lëndës, qëndrimit dhe përfundimit të KQZ-së, nuk e ka pranuar si të drejtë dhe të ligjshëm një qëndrim të tillë, me arsyetimin se është në kundërshtiim me Ligjin për Zgjedhjet e Përgjithshme, konkretisht nenit 16 të këtij Ligji, i cili përcakton kushtet për certifikimin e subjekteve politike të cilat subjekte politike, duhet të plotësojnë në mënyrë që të marrin pjesë në zgjedhje.
“Me nenin 16 paragrati 5 të LZP-së, përcaktohet se: KQZ-ja e certifikon subjektin politik me të drejtë pjesëmarrjeje nëse i njëjti e dorëzon aplikimin e plotësuar, në formën e përshkruar dhe në datën e vendosur nga rregullat e KQZ-së“, thuhet në vendim.
PZAP-ja ka vërtetuar se Lista Serbe ka dorëzuar aplikimin e kompletuar, në përputhshmëri me nenet 16 dhe 17 të LZP-së dhe se KQZ-ja është e obliguar që ta certifikojë çdo subjekt politik i cili i plotëson kushtet e parapara ligjore, sikurse subjekti në fjalë, për çka ishte rekomanduar certifikimi edhe nga Zyra për Regjistrimin, Certifikimin dhe Kontrollin Financiar të Subjekteve Politike në KQZ.
PZAP-ja thuhet se vendosi bazuar në Ligjin për Procedurën e Përgjithshme Administrative, pasi vlerësoi se nga dispozitat e këtij ligji rezulton se njoftimi i atakuar është në kundërshtim me dispozitat ligjore në fuqi, për çka vendosi si në dispozitiv të vendimit të kontestuar dhe urdhëroi KQZ-në ta zbatojë vendimin.
Kështu që Supremja në këtë çështje juridike fillimisht vlerësoi lejueshmërinë e ankesës së paraqitur nga Vetëvendosja dhe konstatoi se e njëjta është e palejueshme.
Sipas Supremes, nëse i referohemi nenit 118, paragrafi 4 të Ligjit për Zgjedhjet e Përgjithshme dhe provave që u janë bashkëngjitur shkresave të lëndës, rezulton se parashtruesit të ankesës, me njoftimin e KQZ-së që ka të bëjë me moscertifikimin e Listës Serbe dhe kandidatëve të këtij subjekti, si dhe vendimin e Panelit Zgjedhor për Ankesa dhe Parashtresa, nuk i është cenuar apo prekur një e drejtë themeores, andaj konstaton se ankesa e LVV-së është e palejuar.
Me Ligjin për Zgjedhjet e Përgjithshme, është përcaktuar se PZAP-ja si organ i përhershëm për vendosjen lidhur me ankesat e lejuara, përcakton dhe përkufizon në mënyrë të qartë se në cilat raste vendimet e KQZ-së i nënshtrohen procedurës së ankesës, ndërsa neni 63, paragrafi 3 i këtij Ligji, përcakton se “Vendimi i Komisionit nuk i nënshtrohet ankesës, përveç nëse nuk parashihet qartë me ligj“.
“Në këtë kontekst nga përmbajtja e kësaj dispozite ligjore rezulton se me njoftimin e Komisionit Qendror të Zgjedhjeve, të datës 23.12.2024, që ka të bëjë me mos certifikimin e subjektit politik Lista Serbska dhe kandidatëve të këtij subjekti politik, si dhe vendimin e Panelit Zgjedhor për Ankesa dhe Parashtresa (PZAP) Anr.12/2024, të datës 25.12.2024, nuk është vendosur lidhur me çështjet për të cilat është përcaktuar mundësia e paraqitjes së ankesës nga ana e palës ankuese në këtë rast”, thuhet në vendim.
Në fund, thuhet se Ligji për Zgjedhjet e Përgjithshme i ka përcaktuar autoritet të plotë KQZ-së në nxjerrjen e legjislacionit plotësues përmes vendimeve, udhëzimeve dhe rregulloreve, me qëllim të mbarëvajtjes së procesit zgjedhor, andaj edhe vendimi i atakuar si i tillë nuk prek ndonjë të drejtë themelore të ankuesit.
The post Vendimi i Supremes me të cilin u refuzua ankesa e Vetëvendosjes ndaj PZAP-së për certifikimin e Listës Serbe appeared first on Telegrafi.
Login
