VALENCIA, 9 gusht /ATSH/- E pakrahasueshme! Shqipëria, një nga sekretet më të ruajtura të Evropës, është shndërruar në një nga destinacionet më të nxehta të pushimeve verore, shkruan Rosa Campos në të përditshmen spanjolle “Super Deporte”.

Vera është simbol i pushimeve, diellit, plazheve dhe aventurave të paharrueshme.

Çdo vit, turistët kërkojnë destinacione të reja dhe emocionuese për të eksploruar, dhe Shqipëria kohët e fundit është pozicionuar si një nga vendet kryesore turistike dhe të përballueshme për t’u vizituar.

E vendosur në Evropën Juglindore, Shqipëria ofron një ndërthurje të historisë, kulturës dhe peizazheve mahnitëse

Me birra vendase që kushtojnë vetëm 1 euro dhe ushqim shumë të lirë, ky vend ballkanik po bëhet shpejt një parajsë për turistët që kërkojnë të argëtohen pa shpenzuar shumë.

Një destinacion magjepsës

Deri vonë, Shqipëria ishte një nga sekretet më të ruajtura të Evropës.

E izoluar për dekada për shkak të regjimit të saj komunist, kombi është shfaqur vitet e fundit si një destinacion turistik i gjallë dhe i arritshëm.

Bregu i saj bregdetar, i përshkuar nga detet Adriatik dhe Jon, krenohet me plazhe që rivalizojnë ato të Greqisë dhe Italisë, por pa turma vizitorësh dhe çmime të larta.

Historia dhe kultura

Shqipëria ka një histori të pasur që daton mijëra vjet më parë, me ndikime nga qytetërimet ilire, greke, romake dhe osmane.

Qytete si Butrinti, një Vend i Trashëgimisë Botërore të UNESCO-s, u ofrojnë vizitorëve mundësinë të zbulojnë të kaluarën e lashtë të vendit.

Kryeqyteti, Tirana, është një pasqyrim magjepsës i rilindjes së Shqipërisë, me pamjen e saj artistike, ndërtesat shumëngjyrëshe dhe jetën e natës të gjallë.

Natyra dhe aventurat

Për adhuruesit e natyrës, Shqipëria është një parajsë e vërtetë.

Nga malet e Alpeve Shqiptare deri te Liqeni piktoresk i Ohrit, vendi ofron një shumëllojshmëri peizazhesh mahnitëse dhe mundësi për aventura në natyrë.

Ecje në natyrë, çiklizëm, rafting dhe kajak janë vetëm disa nga aktivitetet që mund të shijoni në këtë mjedis natyror të pakrahasueshëm.

Kostoja e udhëtimit: Birrat dhe ushqimet me çmime të pakrahasueshme

Një nga atraksionet më të mëdha të Shqipërisë është përballueshmëria e saj.

Për turistët me buxhet të kufizuar, zbulimi i një destinacioni ku ofrohet ushqim dhe pije të shkëlqyera me çmime të ulëta është një ëndërr e bërë realitet.

Birrë vendase për 1 euro

Në Shqipëri, një birrë vendase mund të kushtojë vetëm 1 euro, një çmim praktikisht i paimagjinueshëm në destinacione të tjera turistike evropiane.

Marka si “Birra Tirana” dhe “Birra Korça” janë të njohura si për vendasit ashtu edhe për vizitorët e huaj.

Këto birra nuk janë vetëm të lira, por edhe me cilësi të shkëlqyer, perfekte për t’u freskuar pas një dite eksplorimi.

Ushqim i shijshëm dhe i përballueshëm

Kuzhina shqiptare është një tjetër atraksion i vendit. I ndikuar nga kuzhina mesdhetare dhe ballkanike, ushqimi shqiptar është i larmishëm dhe i shijshëm.

Pjatat tradicionale si byreku (një lloj brumi i mbushur me djathë, spinaq ose mish) dhe tavë kosi (qengj me kos dhe oriz) janë një domosdoshmëri.

Dhe më e mira nga të gjitha, të ngrënit në Shqipëri është jashtëzakonisht e përballueshme.

Një drekë e plotë në një restorant mund të kushtojë më pak se 5 euro, duke u lejuar turistëve të shijojnë kuzhinën vendase pa u shqetësuar për buxhetin e tyre.

Destinacionet kryesore turistike në Shqipëri:

Tirana

Kryeqyteti i Shqipërisë është një ndërthurje dinamike e së vjetrës dhe modernes.

Tirana është e njohur për arkitekturën e saj shumëngjyrëshe, jetën e gjallë të natës dhe pamjen artistike në zhvillim.

Pikat si Sheshi Skënderbej, Muzeu Historik Kombëtar dhe Piramida e Tiranës janë vende që duhen vizituar me patjetër për të kuptuar historinë dhe kulturën e vendit.

Berati

I njohur si “Qyteti i një mbi një dritareve”, Berati është një nga qytetet më të vjetra dhe më piktoreske në Shqipëri.

Qyteti i tij i vjetër i ruajtur mirë, me shtëpitë osmane dhe kështjellën mesjetare, ofron një pasqyrë unike të së kaluarës historike të vendit.

Është një vend i përsosur për adhuriesit e historisë dhe arkitekturës.

Saranda

E vendosur në Rivierën Shqiptare, Saranda është destinacioni kryesor i plazhit në Shqipëri. Ujërat e saj të kristalta dhe plazhet me rërë të bardhë janë ideale për t’u çlodhur dhe për t’u freskuar.

Saranda është gjithashtu porta hyrëse për në Butrint, një nga vendet arkeologjike më të rëndësishme të vendit.

Gjirokastra

Një tjetër perlë e trashëgimisë shqiptare, Gjirokastra, është e njohur për arkitekturën e saj osmane dhe kështjellën mbresëlënëse.

Qyteti, një Vend i Trashëgimisë Botërore të UNESCO-s, është një labirint rrugicash me kalldrëm dhe shtëpish prej guri.

Elbasani

Edhe pse më pak i njohur, Elbasani është një destinacion magjepsës me një ndërthurje të historisë osmane dhe komuniste.

Kështjella, xhamitë dhe rruga kryesore e zhurmshme ofrojnë një përvojë autentike.

Mikpritja shqiptare

Një nga aspektet më të paharrueshme të vizitës në Shqipëri është mikpritja e popullit të saj.

Shqiptarët janë të njohur për mirësjelljen dhe gatishmërinë e tyre për të ndihmuar vizitorët.

Është e zakonshme që turistët të ftohen në shtëpitë lokale për të ndarë një vakt ose kafe, duke ofruar një mundësi unike për të përjetuar kulturën shqiptare nga afër.

Shqipëria është, pa dyshim, një nga destinacionet më emocionuese dhe më të përballueshme verore.

Me peizazhet e saj të bukura, historinë e pasur, ushqimin e shijshëm dhe birrën vendase për vetëm 1 euro, ky vend ofron një përvojë udhëtimi të pakrahasueshme me një kosto të ulët.

Pavarësisht nëse jeni një aventurier që kërkon shtigje të reja ecjeje, një adhurues i historisë apo thjesht kërkoni të relaksoheni në plazhe idilike, Shqipëria ka diçka për të gjithë.

Përgatisni valixhet dhe zbuloni këtë cep të fshehur të Evropës përpara se ta zbulohet dhe mbipopullohet nga pjesa tjetër e botës. Nuk do të zhgënjeheni!  //a.i/

https://www.superdeporte.es/fuera-de-juego/2025/08/02/imbatibles-destino-turistico-arrasa-vacaciones-120293133.html

 

 

 

The post “Super Deporte”: Shqipëria, destinacioni kryesor i pushimeve për spanjollët appeared first on Agjencia Telegrafike Shqiptare.

ROMË, 8 gusht /ATSH/- Astronauti i famshëm i “Apollo 13”, Jim Lovell vdiq sot në moshën 97-vjeçare në Lake Forest, Illinois, njoftoi NASA, sipas “Skytg24”.

“Puna e tij frymëzoi miliona njërëz”, thuhet në deklaratë.

“NASA i shpreh ngushëllimet e saj familjes së Kapiten Jim Lovell, jeta dhe puna e të cilit frymëzuan miliona njërëz gjatë dekadave,” shkroi NASA.

“Karakteri dhe guximi i palëkundur i Jim ndihmuan kombin tonë të arrinte në Hënë dhe transformuan një tragjedi të mundshme në një sukses – nga i cili kemi mësuar kaq shumë. Ne vajtojmë ndarjen e tij nga jeta, por në të njëjtën kohë festojmë për arritjet e tij”, sipas deklaratës.

Në vitin 1968, si pilot i modulit të komandës së “Apollo” 8, Jim Lovell së bashku me Frank Borman dhe William Anders, u bë një nga tre astronautët e parë që fluturuan në Hënë dhe orbituan rreth saj.

Më pas ai komandoi misionin hënor “Apollo 13” në vitin 1970, i cili, pas një dështimi kritik gjatë rrugës, u rrotullua rreth Hënës dhe u kthye shëndoshë e mirë në Tokë.

Lovell u pranua në NASA në shtator të vitit 1962 – si një nga grupi i dytë i astronautëve të nevojshëm për programet “Gemini” dhe “Apollo”.

Përpara “Apollo”, Lovell fluturoi në hapësirë në dy misione “Gemini”, “Gemini” 7 (me Borman) në vitin 1965 dhe “Gemini 12” në vitin 1966.

Ai ishte personi i parë që fluturoi në hapësirë katër herë.

Një nga 24 njerëzit që kishin fluturuar në Hënë, Lovell ishte i pari që fluturoi në hënë dy herë dhe i vetmi njeri që e bëri këtë pa u ulur.

Ai ishte bashkautor i librit të vitit 1994 “Lost Moon”, mbi të cilin u bazua filmi i vitit 1995 “Apollo 13”. Lovell u shfaq në një rol të shkurtër në film. //a.i/

The post Jim Lovell, astronauti i NASA-s që komandoi “Apollo 13” vdes në moshën 97-vjeçare appeared first on Agjencia Telegrafike Shqiptare.

NJU JORK, 8 gusht /ATSH-DPA/- Sekretari i përgjithshëm i OKB-së, Antonio Guterres tha se është i alarmuar nga vendimi i qeverisë izraelite për të marrë kontrollin e Qytetit të Gazës.

“Ky vendim shënon një përshkallëzim të rrezikshëm dhe rrezikon të thellojë pasojat, tashmë katastrofike për miliona palestinezë, dhe mund të rrezikojë më tej jetë të tjera, përfshirë edhe pengjet e mbetura”, tha sot zyra e tij në Nju Jork.

“Sekretari i përgjithshëm paralajmëron se ky përshkallëzim i mëtejshëm do të rezultojë në zhvendosje të detyruara shtesë, vrasje dhe shkatërrim masiv, duke përkeqësuar vuajtjet e paimagjinueshme të popullsisë palestineze në Gazë”, sipas deklaratës.

“Sekretari i përgjithshëm përsërit thirrjen e tij urgjente për një armëpushim të përhershëm, akses të papenguar humanitar në të gjithë Gazën dhe lirimin e menjëhershëm dhe të pakushtëzuar të të gjithë pengjeve”, thuhet në deklaratë.

“Sekretari i përgjithshëm edhe një herë i kërkon Qeverisë së Izraelit të përmbushë detyrimet e saj sipas ligjit ndërkombëtar”, tha zyra e Guterres.

“Nuk do të ketë zgjidhje të qëndrueshme për këtë konflikt pa i dhënë fund këtij pushtimi të paligjshëm dhe pa arritur një zgjidhje të qëndrueshme me dy shtete. Gaza është dhe duhet të mbetet një pjesë integrale e një shteti palestinez”, sipas deklaratës.

Kabineti i Sigurisë në Izrael vendosi të intensifikojë më tej luftimet në rripin bregdetar të izoluar. //a.i/

The post NJU JORK – OKB e alarmuar nga vendimi i Izraelit për të pushtuar Gazën appeared first on Agjencia Telegrafike Shqiptare.

UASHINGTON, 8 gusht /ATSH/- Bisedimet e paqes mes Izraelit dhe Hamasit u prishën ditën kur presidenti francez, Emmanuel Macron tha se Franca do të njihte zyrtarisht shtetin palestinez në shtator, tha sot në një deklaratë sekretari amerikan i Shtetit, Marco Rubio, sipas BBC.

“Këto mesazhe, kryesisht simbolike në mendjet e tyre, në fakt e kanë bërë më të vështirë arritjen e paqes dhe më të vështirë arritjen e një marrëveshjeje me Hamasin”, tha Rubio në një intervistë për emisionin “The World Over” drejtuar nga Raymond Arroyo.

Muajin e kaluar Macron kërkoi t’i jepej fund luftës në Gazë.

“Besnik ndaj angazhimit të saj historik për një paqe të drejtë dhe të qëndrueshme në Lindjen e Mesme, kam vendosur që Franca të njohë Shtetin e Palestinës”, tha Macron në X.

Ky vendim u dënua nga SHBA-ja dhe Izraeli në atë kohë. //a.i/

The post SHBA – Rubio: Bisedimet e paqes me Hamasin u prishën ditën kur Macron vendosi të njihte shtetin palestinez appeared first on Agjencia Telegrafike Shqiptare.

MADRID, 8 gusht /ATSH-DPA/- Spanja mund të përjetojë valën më të gjatë të të nxehtit ndër vite, me temperatura deri në 44 gradë Celsius – në disa pjesë të mëdha të vendit.

Ndërsa vala e të nxehtit po afrohet në ditën e 12-të, Shërbimi Kombëtar i Motit “Aemet” tha se ne 14 nga 17 komunitetet autonome të vendit janë lëshuar paralajmërime për alarm.

Temperaturat mund të arrijnë ne 44 gradë Celsius në Spanjën jugperëndimore të martën, ndërsa alarmet e kuqe janë në fuqi për Ishujt Kanarie këtë fundjavë.

Arkipelagu, i cili shtrihet pranë bregut perëndimor të Afrikës, është shumë i populluar me turistë.

Temperaturat në Ishujt Balearik, në Barcelonë dhe Kosta del Sol jugore arritën në rreth 35 gradë Celsius.

Megjithatë, lagështia është shpesh më e lartë pranë detit, gjë që mund ta përkeqësojë nxehtësinë. //a.i/

 

The post METEO – Spanja përfshihet nga temperatura mbi 40 gradë Celsius appeared first on Agjencia Telegrafike Shqiptare.

LONDËR, 8 gusht /ATSH/- Këtë vit, disa vende evropiane kanë vendosur gjoba të rënda për turistët që sillen keq. Por pse tani – dhe a do ta ndryshojë kjo mënyrën se si njerëzit pushojnë?, sipas BBC.

Imagjinoni skenën: Avioni juaj sapo është ulur në Antalia, Turqi, dhe mezi prisni të zbrisni. Ju zgjidhni rripat e sigurimit, lëvizni nga vendi dhe merrni çantën tuaj, të etur për të filluar pushimet.

Por, një asistente fluturimi ju merr mënjanë dhe vendos një gjobë prej 62 eurosh – sepse keni shkelur një rregull të ri: që prej këtij viti, lirimi i rripit të sigurimit ose largimi nga vendi juaj përpara se avioni të ndalojë do të shoqërohet me një gjobë.

Është një fillim i ndëshkueshëm për udhëtimin tuaj.

Këtë verë, Evropa po merr masa të ashpra ndaj pushuesve të padisiplinuar.

Nga veshja e shapkave me gisht gjatë drejtimit të automjetit deri te pirja e duhanit në plazhe – një valë e re gjobash turistike po përfshin kontinentin.

Në qytetin bregdetar të njohur të Portugalisë, Albufeira, veshja e rrobave të banjës jashtë plazhit mund t’ju kushtojë deri në 1 500 euro.

Në Ishujt Balearik të Spanjës – duke përfshirë Majorkën dhe Ibizën – gjobat për pirjen e alkoolit në publik mund të arrijnë në 3 000 euro.

Autoritetet thonë se rregullat synojnë mbrojtjen e banorëve – dhe pushuesve të përgjegjshëm.

“Rregullat, ndërsa mund të duken të ngurta dhe ndëshkuese, kanë të bëjnë me inkurajimin e udhëtimit të përgjegjshëm dhe empatik”, tha Jessica Harvey Taylor, shefe e Shtypit në Zyrën Spanjolle të Turizmit, në Londër.

Në Malaga të Spanjës, një fushatë e re me 10 pika “Përmirëso Qëndrimin Tënd” është shpërndarë në autobusë, tabela reklamash dhe media sociale.

Ajo përfshin veshjen e duhur, shmangien e mbeturinave, zhurmën e tepërt dhe përdorimin e skuterëve elektrikë.  Turistet qe nuk i zbatojnë keto rregulla gjobiten me 750 euro.

Lista e gjobave po rritet. Kompania ajrore “Ryanair” mund t’i gjobisë pasagjerët problematikë me një gjobe prej 500 eurosh ose më shumë.

Ecja me këpucë të papërshtatshme, në “Cinque Terre” të Italisë mund t’i bëjë turistët të paguajnë deri në 2 500 euro gjobë.

Dhe Franca tani i gjobit duhanpirësit 90 euro për pirjen e duhanit në plazhe publike dhe në shesh lojërash.

Mbledhja e guaskave të detit në Greqi mund të kushtojë 1 000 euro; noti në kanalet e Venedikut, 350 euro.

Fushatat për ndryshimin e sjelljes duan kohë që të funksionojnë dhe një sezon i vetëm nuk do t’i transformojë zakonet e vizitorëve.

Por mesazhi është i qartë: dielli, rëra dhe deti janë ende në ofertë, por vetëm për ata që pranojnë t’i shijojnë ato me ndjeshmëri dhe me pak maturi. //a.i/

The post Gjobat e reja turistike pushtojnë Evropën appeared first on Agjencia Telegrafike Shqiptare.

TEL AVIV, 8 gusht /ATSH/- Ministri i mbrojtjes i Izraelit, Israel Katz u është kundërpërgjigjur vendeve që kanë dënuar vendimin e qeverisë izraelite dhe kanë kërcënuar me sanksione – për shkak të planeve të Izraelit për të marrë kontrollin e Qytetit të Gazës, sipas BBC.

Duke shkruar në X, Katz tha se kritikët nuk do ta dobësonin vendosmërinë e Izraelit për të mposhtur Hamasin, duke këmbëngulur se grupi i armatosur palestinez ende përbën një kërcënim për sigurinë e Izraelit.

Katz tha se qeveria është e vendosur të arrijë qëllimet e luftës dhe Forcat Mbrojtëse të Izraelit po përgatiten të zbatojnë planin.

“Kanë ikur ditët kur hebrenjtë nuk mbronin veten. Kjo është koha që lidershipi të marrë vendime”, tha Katz.

“Ne duhet të jemi të denjë për ushtarët tanë heroikë, të rregullt dhe rezervistë, të cilët po luftojnë në tunelet e Gazës kundër përbindëshave të Hamasit, për familjet e të rrëmbyerve që presin të dashurit e tyre, për familjet e martirëve që dhanë jetën e tyre për shenjtërinë e Zotit dhe për të gjithë të plagosurit që luftuan si luanë për të mbrojtur atdheun”, tha ai.

Përshkallëzimi i konfliktit është kritikuar nga OKB-ja dhe disa udhëheqës botërorë, duke përfshirë Britaninë e Madhe dhe Gjermaninë – kjo e fundit ka pezulluar eksportet ushtarake drejt Izraelit.

Ndërkohë, Hamasi është zotuar për rezistencë të ashpër.

Në Gazë, palestinezët kanë frikë nga shkatërrimet e mëtejshme dhe zhvendosjet – shumë prej tyre janë të zemëruar jo vetëm me Izraelin, por edhe me Hamasin. //a.i/

 

The post IZRAEL – Katz: Kritikat ndaj planit për të marrë kontrollin e Qytetit të Gazës, nuk do ta dobësojnë vendosmërinë tonë appeared first on Agjencia Telegrafike Shqiptare.

VARSHAVË, 8 gusht /ATSH/- Një pauzë në konfliktin në Ukrainë mund të jetë afër, tha sot kryeministri polak Donald Tusk pas një bisede telefonike me presidentin e Ukrainës Volodymyr Zelensky, sipas “Reuters”.

Vladimir Putin dhe Donald Trump do të takohen në ditët në vijim, tha dje Kremlini, ndërsa presidenti amerikan kërkon progres në negociata për t’i dhënë fund luftës në Ukrainë, tani në vitin e saj të katërt.

Trump shprehu zhgënjim me homologun e tij rus duke e kërcënuar atë me sanksione të reja.

“Ka sinjale të caktuara, dhe ne gjithashtu kemi një intuitë, se ndoshta një ngrirje e konfliktit – nuk dua të them fundi, por një ngrirje e konfliktit është e afërt”, tha ai në një konferencë për shtyp.

“Ka shpresa për këtë”, shtoi ai.

Tusk tha se Zelensky ishte shumë i kujdesshëm, por optimist dhe se Ukraina ishte e etur që Polonia dhe vendet e tjera evropiane të luanin një rol – në planifikimin e një armëpushimi dhe një zgjidhjeje përfundimtare për paqen.

Anëtarja e NATO-s, Polonia, ka qenë një mbështetëse e fortë e fqinjit të saj lindor, Ukrainës – që kur Putini dërgoi dhjetëra mijëra trupa në vend në shkurt të vitit 2022, duke përmendur kërcënime ndaj sigurisë ruse dhe duke i zhytur marrëdhëniet e Moskës me Perëndimin në një krizë të thellë.

Kievi dhe aleatët e tij perëndimorë thonë se Rusia është e angazhuar në një grabitje tokash në stilin imperial.

Në një postim në X, Zelensky tha se kishte folur me Tusk rreth opsioneve diplomatike të disponueshme dhe kishte rënë dakord të koordinoheshin dhe të punonin së bashku për interesat e tyre të përbashkëta evropiane.

Ai gjithashtu e kishte informuar kryeministrin polak rreth bisedave të tij me Trump dhe udhëheqësit e tjerë evropianë në fillim të kësaj jave. //a.i/

 

The post POLONI – Tusk: Pauza në luftën në Ukrainë mund të jetë afër appeared first on Agjencia Telegrafike Shqiptare.

ROMË, 8 gusht /ATSH/- Përfitimet e jodit dhe ujit të kripur për shpirtin, mendjen dhe trupin janë të njohura… Por a e dinit se deti shëron 16 sëmundje? Le të zbulojmë të gjitha fuqitë e këtij ilaçi natyral, sipas “Donna Glamour”.

Deti është një vend i dashur për të gjithë! Ai shëron shpirtin duke ngjallur gëzim.. Po mirëqenia fizike? Asgjë nuk i lihet rastësisë, fuqia e tij shëruese përfshin mendjen, trupin dhe shpirtin, duke mposhtur 16 sëmundje të ndryshme.

Nga osteoartriti te anemia, nga psoriaza te çrregullimet reumatike dhe të kockave. Le të zbulojmë të gjitha përfitimet shëndetësore të detit!

Përfitimet e detit: Ai shëron deri në 16 sëmundje!

Të shkosh në det është e dobishme për arsye të panumërta… Ajri i detit pastron dhe përmirëson frymëmarrjen, ecja zbathur në rërë përmirëson qëndrimin.

Fuqia e tij shëruese arrin të mposhtë deri në 16 lloje sëmundjesh krejtësisht në mënyrë të natyrshme!

Përbërësit e tij të dobishëm përfshijnë jodin, ujin e kripur dhe të ashtuquajturin ajër me jod të kripur, të cilat janë të gjitha jashtëzakonisht të dobishme për njerëzit.

Para së gjithash, frymëmarrja pranë bregdetit është e dobishme, pasi ndihmon në thithjen e një sasie të madhe të kripërave minerale.

Këto çlirohen nga spërkatja e valëve që përplasen në breg dhe mbahen nga era.
Përmirësimet do të jenë të dukshme në sistemin e frymëmarrjes, duke mposhtur astmën, sulmet e panikut dhe ankthin.

Uji i detit gjithashtu i bën mirë zorrëve dhe veshkave, duke ndihmuar në pastrimin e trupit dhe në rivendosjen e ekuilibrit.

Për më tepër, është një ilaç i vërtetë për sëmundjet kardiovaskulare, artritike, reumatike dhe depresive.

Lufton psoriazën dhe, për të rinjtë, aknet në fytyrë.

Gjithashtu ndihmon njerëzit anemikë me përthithjen e duhur të hekurit.

Së fundmi, përfitimet ndihen në mendje dhe shpirt, duke i bërë më të relaksuar nga stresi i përditshëm.

Deti shëron të gjitha plagët: jo vetëm ato të trupit, por edhe ato të mendjes dhe shpirtit.

Shkoni në det pa u menduar dy herë… dhe mirëqenia do të jete me ju! //a.i/

The post Të gjithë në plazh… a e dinit se deti shëron deri në 16 sëmundje? appeared first on Agjencia Telegrafike Shqiptare.

HELSINKI, 8 gusht /ATSH/- Presidenti i SHBA-së, Donald Trump duhet të ecë përpara me vendosjen e më shumë sanksioneve ndaj Rusisë, pasi kjo do të ndihmonte për t’i dhënë fund luftës në Ukrainë, tha sot ministrja e Jashtme e Finlandës, Elina Valtonen në një intervistë për “Reuters”.

Trump e caktoi të premten si afatin e fundit deri për Rusinë – e cila duhej të binte dakord për paqe në Ukrainë ose blerësit e saj të naftës do të përballeshin me tarifa dytësore.

Megjithatë, Putin dhe Trump pritet të takohen javën e ardhshme – pas bisedimeve midis udhëheqësit rus dhe të dërguarit special të SHBA-së, Steve Witkoff të mërkurën, në Moskë – duke ngritur mundësinë që sanksionet e reja të vonohen ose të anulohen.

Një zyrtar i Shtëpisë së Bardhë tha të mërkurën se sanksionet dytësore ndaj vendeve që bëjnë biznes me Rusinë – pritet të zbatohen duke nisur nga e premtja.

“Unë shpresoj shumë që presidenti Trump t’i zbatojë këto sanksione”, tha Elina Valtonen, duke iu referuar sanksioneve dytësore që mund të ndikojnë veçanërisht në Kinë dhe Indi, blerësit më të mëdhenj të naftës ruse.

Presidenti i Finlandës, Alexander Stubb, ishte midis disa udhëheqësve evropianë që iu bashkua telefonatës me Trump të mërkurën, e cila synonte të koordinonte përpjekjet perëndimore për t’i dhënë fund luftës në Ukrainë.

Valtonen tha se furnizimet e vazhdueshme të armëve perëndimore për Kievin luanin një rol jetësor për të ushtruar presioni ndaj Putinit për t’i dhënë fund luftës, e cila filloi në shkurt 2022 me pushtimin e plotë të Ukrainës nga Rusia.

Finlanda, së bashku me vendet e tjera nordike dhe tre shtetet baltike, ka qenë midis mbështetësve më të vendosur të Ukrainës. //a.i/

 

The post HELSINKI – Finlanda: SHBA-ja të vendosë më shumë sanksione ndaj Rusisë appeared first on Agjencia Telegrafike Shqiptare.

STAMBOLL, 8 gusht /ATSH-DPA/- Një zjarr i madh që po përhapet me shpejtësi në Turqinë veriperëndimore çoi në evakuime dhe mbylljen përkohësisht të Ngushticëse së Dardaneleve për anijet, ndërsa avionët dhe ekipet tokësore u angazhuan për të vënë zjarrin nën kontroll, thanë sot autoritetet lokale.

“Zjarri shpërtheu në tokë bujqësore pranë fshatit Saricaeli në Provincën Çanakale dhe u përhap në pyllin aty pranë për shkak të erërave të forta”, thanë autoritetet.

“Tetë avionë, katër helikopterë, dhjetëra kamionë zjarrfikës dhe makineri të rënda u vendosën në punë”, shkroi guvernatori i Çanakalesë Omer Toraman në X.

“Dardanelet – një rrugë ujore kyçe që lidh detin Egje me detin Marmara – u mbyllën në të dy drejtimet për të lejuar avionët e zjarrfikësve të vepronin pa pengesa”, tha transmetuesi shtetëror TRT.

“Autoritetet evakuuan 52 banorë nga një strukturë private kujdesi dhe dy persona nga një kullë transmetimi”, tha zyra e guvernatorit.

Një kampus universitar lokal u evakuua gjithashtu.

Turqia ka luftuar me zjarre në të gjithë vendin për javë të tëra mes kushteve të nxehta, të thata dhe me erë. //a.i/

The post TURQI – Zjarret çojnë në evakuime masive për shkak të nxehtësisë ekstreme appeared first on Agjencia Telegrafike Shqiptare.

LONDËR, 7 gusht /ATSH/- E bekuar me një klimë mesdhetare dhe temperatura të ngrohta që arrijnë deri në 30 gradë Celsius, Shqipëria është një parajsë për adhuruesit e diellit, shkruan Milo Boyd në një artikull të botuar në të përditshmen britanike “Mirror”.

Kompania ajrore “Wizz Air” ka lançuar një itinerar të ri, duke lidhur Britaninë e Madhe me destinacionin e ri evropian të lirë dhe me diell.

Shqipëria është quajtur “Maldivet e Evropës” falë brigjeve të saj të pacënuara me rërë të bardhë dhe ujërave të kristalta që zbukurojnë Rivierën e saj spektakolare.

Me një numër në rritje të pushuesve që zbulojnë rajonin – kjo perlë ende ofron vlera të jashtëzakonshme krahasuar me vendet e tjera evropiane.

Vizitorët mund të kënaqen me akomodime luksoze pa shtrënguar buxhetin e tyre, me apartamente buzë detit të disponueshme për vetëm 20 paund në natë.

Ushqimi është i shijshëm dhe një vakt i bollshëm me pije, zakonisht kushton rreth 15 paund.

Falë një mori videosh në TikTok që shfaqin ujërat e saj të kristalta dhe rërën e bardhë të pastër, Shqipëria është bërë një pikë e nxehtë për pushuesit që kërkojnë një përvojë të ngjashme me ato në Maldive.

E bekuar me një klimë mesdhetare dhe temperatura verore që arrijnë deri në 30 gradë Celsius, Shqipëria është një parajsë për adhuruesit e diellit.

Linja e re e “Wizz Air” lidh Aeroportin Gatwick të Londrës me Tiranën, kryeqytetin e Shqipërisë. Biletat më të lira kushtojnë vetëm 19,99 paund.

Nëse nuk jeni afër Aeroportin Gatwick të Londrës, atëherë “Ryanair” ofron gjithashtu fluturime për në Tiranë nga Birmingham, Bristol, Mançester, Edinburgu dhe Aeroporti Stansted i Londrës.

Shqipëria krenohet me koston e ulët të jetesës në Evropë, me dhoma hoteli në qendër të Tiranës që kushtojnë më pak se 30 paund, përfshirë mëngjesin.

Apartamentet buzë detit përgjatë bregdetit Adriatik janë edhe më të përballueshme.

Një tjetër rrugë e përballueshme për në bregdetin e shkëlqyer të Shqipërisë është të fluturosh për në Korfuz dhe pastaj të hipësh në një traget për afërsisht 15 paund në çdo drejtim.

Ju mund të ngrini një kamping në Dhërmi, dhe të eksploroni një plazh të ri çdo ditë. Një drekë e këndshme buzë detit në zonë do të kushtojë vetëm rreth 10 paund për person.

Ekspertja e udhëtimeve, Laura Hewson, e cila eksploroi Shqipërinë vjeshtën e kaluar, ndau përvojën e saj.

“Në atë kohë, se bashku me shoqen time, Farrell Modd po planifikonim të shkonim në Kroaci. Por, një nga miqtë tanë që kishte qenë në Shqipëri tha se duhej të shkonim me patjetër. Ai tha se ishte si Greqia dhe Kroacia, por më e lirë dhe shumë më e bukur pasi nuk kishte dyndje turistësh”, tha Laura Hewson.

Ajo shtoi se në Shqipëri, mund të përballonin një hotel me katër yje – me mëngjesin e përfshirë – me të njëjtin çmim që kishin paguar për qëndrimet në hostele në Itali dhe Spanjë.

Farrell Modd, zbuloi se rrjetet sociale kishin luajtur një rol në zgjedhjen e Shqipërisë si destinacionin e tyre – duke shtuar se ajo ishte mahnitur nga videot ku shfaqeshin peizazhe magjepsëse nga vendi.

Farrell ishte e entuziazmuar kur zbuloi se vendi i vogël mesdhetar ofronte ujëra të pastra kristal dhe vendpushime të shumta për not – të gjitha me çmime miqësore me buxhetin për turistët. //a.i/

https://www.mirror.co.uk/travel/europe/wizz-air-launches-budget-20-35682479

The post “Mirror”: Shqipëria, destinacioni i bekuar me klimë mesdhetare dhe peizazhe magjepsëse appeared first on Agjencia Telegrafike Shqiptare.

PARIS, 7 gusht /ATSH/- Presidenti francez, Emmanuel Macron rikonfirmoi sot mbështetjen e plotë të Francës për një armëpushim në Ukrainë dhe nisjen e bisedimeve që synojnë arritjen e një paqeje të qëndrueshme, sipas “Reuters”.

Deklarata e tij erdhi pas një “diskutimi të gjatë” me presidentin ukrainas Volodymyr Zelenskiy dhe udhëheqës të tjerë evropianë.

“I përsërita presidentit ukrainas mbështetjen e plotë të Francës për vendosjen e një armëpushimi dhe nisjen e diskutimeve drejt një zgjidhjeje solide dhe të qëndrueshme që ruan të drejtat legjitime të Ukrainës dhe garanton sigurinë e saj dhe të evropianëve”, tha ai në platformën e mediave sociale X. //a.i/

The post PARIS – Macron rikonfirmon mbështetjen për armëpushimin në Ukrainë appeared first on Agjencia Telegrafike Shqiptare.

TEL AVIV, 7 gusht /ATSH-DPA/- Në të gjithë Izraelin u zhvilluan sot protesta kundër zgjerimit të planifikuar të luftimeve në Rripin e Gazës nga qeveria, ndërsa Kabineti i Sigurisë i vendit mblidhet për të vendosur mbi hapat e mëtejshëm në konfliktin 22-mujor.

Në Jerusalem, demonstruesit u mblodhën para rezidencës zyrtare të kryeministrit Benjamin Netanyahu.

Ata kërkuan një marrëveshje për lirimin e pengjeve që mbahen ende në Gazë.

Sipas një raporti nga agjencia e lajmeve “ynet”, nëna e një pengu tha: “Qeveria duhet të diskutojë në tryezë një marrëveshje gjithëpërfshirëse që do t’i sillte të 50 pengjet në shtëpi – në mënyrë që t’i jepet fund luftës”.

Një tjetër demonstrues tha: “Zgjerimi i luftimeve është një rrezik vdekjeprurës”.

Njerëz të shumtë u mblodhën gjithashtu në metropolin bregdetar të Tel Avivit.

Demonstruesit ndezën një zjarr të madh para selisë së partisë “Likud” të Netanyahut, duke bërë thirrje për lirimin e menjëhershëm të të gjithë pengjeve në Gazë.

Rreth 50 pengje mbahen nga grupi militant palestinez “Hamas” në Gazë – nga të cilët besohet se rreth 20 janë ende gjallë.//a.i/

The post FOKUS – Protesta në të gjithë Izraelin kundër zgjerimit të luftimeve në Gazë appeared first on Agjencia Telegrafike Shqiptare.

UASHINGTON, 7 gusht /ATSH-DPA/-Presidenti i SHBA-së, Donald Trump ka planifikon të dëbojë personat që jetojnë në Shtetet e Bashkuara të Amerikës pa leje qëndrimi të ligjshme nga numërimi i regjistrimit të popullsisë (censusit) – një masë që mund të bëjë që shtetet me numër të lartë emigrantësh pa dokumente – të humbasin si ndikimin politik ashtu edhe fondet.

“Unë kam udhëzuar Departamentin Amerikan të Tregtisë të fillojë menjëherë punën për një CENSUS të ri dhe shumë të saktë,” shkroi sot presidenti në platformën e tij “Truth Social”.

“Njerëzit që janë në vendin tonë ilegalisht nuk do të numërohen në regjistrin e popullsisë”, shtoi ai.

Trump nuk dha detaje mbi kornizën ligjore, zbatimin ose afatin kohor të masës, por njoftimi i tij vjen ndërsa republikanët po punojnë për të miratuar kufijtë e rinj të zonave zgjedhore para zgjedhjeve të Kongresit të vitit 2026.

Regjistrimi mbarëkombëtar i popullsisë kryhet çdo 10 vjet në SHBA, me anketën e ardhshme të planifikuar për vitin 2030.

Rezultatet e regjistrimit kanë pasoja të gjera, duke përfshirë formimin e bazës për shpërndarjen e fondeve federale në shtete, qytete dhe bashki.

Ato gjithashtu shërbejnë si bazë për shpërndarjen proporcionale të vendeve në Dhomën e Përfaqësuesve dhe hartimin e kufijve të zonave zgjedhore për zgjedhjet e Kongresit.

Sipas ligjit aktual, një regjistrim numëron të gjithë ata që jetojnë në një shtet, pavarësisht nga statusi i tyre i banimit ose shtetësia. //a.i/

The post SHBA – Trump kërkon regjistrim të ri të popullsisë që përjashton emigrantët pa dokumente appeared first on Agjencia Telegrafike Shqiptare.

ROMË, 7 gusht /ATSH/- Gianni Berengo Gardin, një nga fotografët më të mëdhenj italianë të shekullit XX, ka vdekur sot në moshën 94-vjeçare në Gjenova, sipas “Adnkronos”.

Vështrimi i tij përshkoi shtatë dekada të historisë, duke fotografuar bardh e zi kujtime vizuale të vendit.

I lindur në Santa Margherita Ligure më 10 tetor 1930, ai e konsideronte Venedikun – qytetin e tij të vërtetë të lindjes – ku studioi dhe ndërmori hapat e tij të parë me një aparat fotografik – që nuk do ta lëshonte më kurrë.

Me mbi dy milionë filma negativë, më shumë se 260 libra të botuar, mbi 360 ekspozita personale në të gjithë botën dhe një karrierë të njohur me çmime ndërkombëtare, Berengo Gardin ishte më tepër sesa thjesht një fotograf.

Ai ishte një dëshmitar etik, një poet i realitetit, një vëzhgues diskret por i palodhur i kohërave në ndryshim të Italisë.

Ai preferonte ta përkufizonte veten si zejtar, jo si artist. “Puna ime nuk është artistike, por sociale dhe civile. Nuk dua të interpretoj, dua të tregoj”, tha ai më herët.

Berengo Gardin ishte fotografi italian më i njohur dhe më i vlerësuar ndërkombëtarisht, dhe fotografitë e tij mbahen në muzetë dhe institucionet kulturore më prestigjioze në botë: Muzeu i Artit Modern i Nju Jorkut; Qendra për Studime të Komunikimit dhe Arkivat e Universitetit të Parmës; Biblioteka Kombëtare e Francës në Paris; Selia e OKB-së në Nju Jork; “Photokina” Këln; Muzeu Guggenheim në Nju Jork; Galeria Kombëtare e Artit dhe Estetikës në Pekin; Shtëpia Evropiane e Fotografisë në Paris; Reina Sofía në Madrid; MAXXI -Muzeu Kombëtar i Arteve të Shekullit XXI, në Romë; dhe Instituti Qendror për Grafikën në Romë.

Berengo Gardin fotografoi puthje të vjedhura, varreza, trena të mbushur me njerëz, punonjës, gra, arkitekturë, fëmijë dhe të moshuar.

Gjithmonë me një vështrim të qëndrueshëm, empatik dhe ironik, kurrë cinik.

Shumë kritikë, e kanë krahasuar atë me Henri Cartier-Bresson – një fotograf francez humanist, por ai vetë preferonte një përkufizim tjetër: “Unë jam Willy Ronis italian. Por me krenari ruaj një dedikim nga Cartier-Bresson: “Për Gianni Berengo Gardin me simpati dhe admirim”.

“Të kesh admirimin e tij do të thotë që dikush mund të vdesë në paqe”, tha ai më herët. //a.i/

The post Gianni Berengo Gardin, mjeshtri i fotografisë bardh e zi të shekullit XX, vdes në moshën 94-vjeçare appeared first on Agjencia Telegrafike Shqiptare.

TIRANË, 7 gusht /ATSH/- Presidenti ukrainas, Volodymyr Zelensky zhvilloi sot një bisedë telefonike me kryeministrin Edi Rama në lidhje me situatën në vijën e frontit dhe angazhimet diplomatike.

“Zhvillova një bisedë të këndshme me kryeministrin e Shqipërisë, Edi Rama. E informova shkurtimisht mbi situatën në vijën e frontit dhe çështjet diplomatike”, tha presidenti ukrainas, Volodymyr Zelensky në platformën X.

“Jemi duke punuar me të gjithë partnerët tanë për t’i dhënë fund kësaj lufte dhe për të ndaluar vrasjet sa më shpejt të jetë e mundur”, shtoi Zelensky.

“Gjithashtu, me kryeministrin Rama diskutuam përgatitjet për takime në vende të mëdha ndërkombëtare. Këto takime do të jenë formate të veçanta angazhimi me partnerët. Do të bëjmë gjithçka për të mbrojtur popullin tonë”, tha presidenti ukrainas.

“Faleminderit, Edi, faleminderit Shqipëri, për mbështetjen tuaj të palëkundur për Ukrainën”, përfundoi presidenti Zelensky. //a.i/

The post Zelensky bisedë telefonike me Ramën: Po punojmë për t’i dhënë fund kësaj lufte appeared first on Agjencia Telegrafike Shqiptare.

UASHINGTON, 7 gusht /ATSH-DPA/- Tarifat e presidentit të SHBA-së, Donald Trump ndaj importeve nga rreth 70 vende dhe Bashkimi Evropian hynë në fuqi sot, duke përfshirë një shifër marramendëse prej 50% ndaj importeve braziliane, 39% ndaj Zvicrës dhe 35% ndaj Kanadasë.

Trump ka mbrojtur qëndrimin e tij agresiv tregtar duke përmendur deficitet e vazhdueshme, të cilat ai pretendon se përbëjnë një kërcënim për sigurinë kombëtare.

Duke e paraqitur çështjen si një emergjencë, ai argumentoi se tarifat do të mbrojnë bizneset amerikane dhe do të ringjallin prodhimin vendas. Aktualisht, masat po kundërshtohen në gjykatat amerikane.

Që nga fillimi i mandatit të tij të dytë, Trump ka synuar pothuajse çdo vend duke kërcënuar me tarifa më të larta, përfshirë aleatët e ngushtë.

Tarifat shpesh janë rishikuar, vonuar ose hequr tërësisht, dhe janë përdorur si levë për të nxitur vendet të lidhin marrëveshje dypalëshe me Uashingtonin.

Gjithashtu midis vendeve më të goditura nga tarifat amerikane janë, Afrika e Jugut (30%), Laosi dhe Mianmari (40%) dhe Siria e shkatërruar nga lufta (41%).

Njëzet e shtatë vendet anëtare të Bashkimit Evropian tani duhet të paguajnë një taksë prej 15%, nga 30% që Trump paralajmëroi fillimisht – pas një marrëveshjeje të minutës së fundit me Komisionin Evropian.

Kritikët e marrëveshjes thanë se komisioni kishte rënë dakord për një kompromis që, ndonëse më pak i rëndë se sa kërcënoi fillimisht, prapëseprapë favorizon qartë SHBA-në.

Përveç 15%, BE-ja i premtoi Trump se do të blinte energji amerikane me vlerë 750 miliardë dollarë deri në fund të mandatit të tij.

Sipas presidentes së Komisionit Evropian Ursula von der Leyen, gazi natyror i lëngshëm (LNG), nafta dhe lëndët djegëse bërthamore të SHBA-së do të mbushin boshllëqet e krijuara nga heqja e plotë e gazit dhe naftës ruse.

Komisioni njoftoi gjithashtu se 600 miliardë dollarë investime evropiane pritet të rrjedhin në SHBA, duke përmendur interesin e sektorit privat.

Vende të tjera, përfshirë Britaninë e Madhe dhe Japoninë, kohët e fundit arritën marrëveshje të veçanta tregtare me SHBA-në për të shmangur penalitetet e ashpra.

Vëmendja tani kthehet te Uashingtoni dhe Pekini, pasi dy ekonomitë më të mëdha në botë janë pranë përfundimit të afatit të pezullimit 90-ditor të tarifave.

Të dyja palët kanë kërcënuar se do të vendosin tarifa importi mbi 100% ndaj njëra-tjetrës nëse bisedimet dështojnë.

India, e cila tashmë u godit me një taksë prej 25%, po përgatitet që kjo normë të dyfishohet deri në fund të muajit. //a.i/

The post KOMENT – Si do të ndikojnë tarifat gjithëpërfshirëse të Trump ndaj dhjetëra vendeve? appeared first on Agjencia Telegrafike Shqiptare.

BRUKSEL, 7 gusht /ATSH/- Bota përjetoi korrikun e tretë më të ngrohtë të regjistruar ndonjëherë këtë vit, tha sot agjencia e Bashkimit Evropian që monitoron ngrohjen globale, sipas AP.

Pavarësisht temperaturës mesatare globale pak më të ulët, shkencëtarët thanë se nxehtësia ekstreme dhe përmbytjet vdekjeprurëse vazhduan gjatë muajit korrik.

“Dy vjet pas korrikut më të nxehtë të regjistruar ndonjëherë, seria e fundit e rekordeve të temperaturës globale ka mbaruar – për momentin. Por, kjo nuk do të thotë që ndryshimi i klimës ka ndaluar”, tha Carlo Buontempo, drejtor i Shërbimit të Ndryshimeve Klimatike të Kopernikut.

“Këto janë efekte të një bote që po ngrohet”, tha ai.

Agjencia e monitorimit të BE-së tha se priten rekorde të reja të temperaturave ekstreme nëse përqendrimet e gazrave serrë në atmosferë nuk ulen.

Më 25 korrik, Turqia perjetoi temperaturën më të lartë të regjistruar ndonjëherë prej 50,5 gradë Celsius ndërsa luftonte me zjarret.

Edhe pse jo aq i nxehtë sa korriku i vitit 2023 ose korriku i vitit 2024, i dyti më i nxehtë i regjistruar ndonjëherë, raporti i Shërbimit të Ndryshimeve Klimatike të Kopernikut tha se temperatura mesatare e sipërfaqes së planetit muajin e kaluar ishte ende 1,25 gradë Celsius mbi periudhën para-industriale 1850-1900, përpara se njerëzit të fillonin djegien e  lëndëve djegëse fosile si nafta, gazi dhe qymyri.

Gazrat serrë të lëshuara nga djegia e lëndëve djegëse fosile janë nxitësi kryesor i ndryshimeve klimatike. Shpyllëzimi, zjarret dhe shumë lloje fabrikash lëshojnë gjithashtu gazra që bllokojnë nxehtësinë në atmosferë.

Pavarësisht një korriku disi më të freskët, periudha 12-mujore midis gushtit 2024 dhe korrikut 2025 ishte 1,53 gradë Celsius mbi nivelet para-industriale, duke tejkaluar pragun e vendosur në vitin 2015 – për të kufizuar ngrohjen e shkaktuar nga njeriu në 1,5 gradë Celsius.

“Globalisht, viti 2024 ishte viti më i nxehtë në historinë e regjistruar. Evropa po ngrohet më shpejt se çdo kontinent tjetër, me temperatura që rriten dy herë më shpejt se mesatarja globale që nga vitet 1980”, sipas raportit.

Vitin e kaluar, planeti e tejkaloi përkohësisht objektivin e ngrohjes të vendosur në Paktin e Klimës së Parisit të vitit 2015.

Por ky objektiv, i kufizimit të ngrohjes brenda 1,5 gradë Celsius të niveleve para-industriale, përcaktohet si një mesatare 20-vjeçare dhe bota ende nuk e ka shkelur atë prag.

Raporti i BE-së bazohet në mbledhjen e të dhënave satelitore dhe në Tokë. //a.i/

The post Shkencëtarët e BE-së: Bota përjetoi korrikun e tretë më të ngrohtë të regjistruar ndonjëherë në Tokë appeared first on Agjencia Telegrafike Shqiptare.

PARIS, 7 gusht /ATSH/ E përditshmja franceze “Le Figaro” e ka renditur Shqipërinë mes pesë destinacioneve kulturore më të mira për të vizituar në një udhëtim të organizuar.

Nga kryeqyteti i Shteteve të Bashkuara të Amerikës te thesaret e Rilindjes Italiane, duke përfshirë Vendet e Trashëgimisë Botërore të UNESCO-s në Shqipëri, këto destinacione ofrojnë një ndërthurje të peizazhit dhe kulturës.

Cilat janë destinacionet më të mira kulturore për udhëtime të organizuara?

1-Shqipëria dhe Thesaret e UNESCO-s

2-Një shëtitje në zemër të Uashington DC, Merilendit dhe Virxhinias

3-Salzburg: Mozarti dhe Shkëlqimet e Salzkammergut

4-Madhështitë e Saksonisë: Dresden dhe Leipzig, dy qytete të artit dhe historisë

5-Firence, toka e mjeshtrave: Ekspozita “Fra Angelico” dhe Thesaret e Rilindjes

Shqipëria dhe thesaret e UNESCO-s

Zbuloni këtë udhëtim në Shqipëri

Shqipëria, një perlë e vërtetë e fshehur e Ballkanit, joshëse me pasurinë e historisë së saj dhe diversitetin e peizazheve të saj.

Nga Tirana në Gjirokastër, nëpërmjet Beratit dhe Butrintit, ky udhëtim ju çon në gjurmët e qytetërimeve që kanë lënë gjurmë në këto toka: ilirët, grekët, romakët dhe osmanët.

Një vizitë në një vend ku autenticiteti kombinohet me shkëlqimin e vendeve të Trashëgimisë Botërore të UNESCO-s.

Shqipërinë nuk do ta zbuloni vetëm përmes monumenteve të saj.

Ajo jeton në mikpritjen e popullit të saj, pasurinë e traditave të saj dhe shijet e gastronomisë së saj.

Shijoni një byrek krokant, dëgjoni polifonitë shqiptare të listuara në UNESCO dhe eksploroni tregjet e gjalla – ku ndërthuren aromat mesdhetare dhe ndikimet orientale.

Këto janë vetëm disa nga përvojat që e bëjnë këtë udhëtim të paharrueshëm.

Shëtitja nëpër rrugët e ngushta të Krujës, një performancë vallesh popullore apo zbulimi i vreshtave lokale janë të gjitha momente që dëshmojnë autenticitetin dhe ngrohtësinë e kësaj toke mikpritëse. //a.i/

https://www.lefigaro.fr/voyages/selection/5-destinations-culturelles-a-decouvrir-en-voyage-organise-20250802

 

 

 

The post “Le Figaro”: Shqipëria mes destinacioneve më të mira kulturore për të udhëtuar appeared first on Agjencia Telegrafike Shqiptare.