Gjatë episodit të podcastit “Shëndeti në rend të parë”, e mbështetur nga United Hospital, stomatologia Albanë Krasniqi trajtoi një ndër temat më të rëndësishme për shëndetin oral të fëmijëve: ndikimin e ushqimit në shëndetin e dhëmbëve.

Sipas saj, ushqimet që fëmijët konsumojnë kanë ndikim të drejtpërdrejtë në cilësinë dhe jetëgjatësinë e dhëmbëve të tyre.

“Shëndeti i dhëmbëve varet shumë prej ushqimeve që ne i konsumojmë”, tha Krasniqi.

Ajo theksoi se një ndër arsyet kryesore për prishjen e dhëmbëve te fëmijët janë produktet e pasura me sheqer, siç janë ëmbëlsirat, bonbonet, pijet e gazuara dhe ato të ambalazhuara.

Krasniqi theksoi se një tjetër faktor i dëmshëm është përdorimi i zgjatur i biberonit dhe shishes, veçanërisht gjatë natës.

Sipas stomatologes, këto zakonisht përmbajnë përbërës të ëmbël që ngjiten në sipërfaqen e dhëmbëve, duke krijuar kushte të favorshme për zhvillimin e kariesit.

“Ato përmbajnë sheqerna që ngjiten nëpër sipërfaqe të dhëmbëve dhe vjen deri te prishja e dhëmbëve e parakohshme”, sqaroi stomatologia, Krasniqi.

Për më shumë ndiqeni podcastin “Shëndeti në rend të parë”:

The post Rreziku nga ëmbëlsirat dhe biberonat, stomatologia Krasniqi tregon si t’i mbrojmë dhëmbët e fëmijëve appeared first on Telegrafi.

Gjykata Kushtetuese ka publikuar aktgjykimin e plotë  për çështjen e konstituimit të Kuvendit.

Sipas aktgjykimi thuhet se Gjykata, në mënyrë të përmbledhur rikujton që përmes Aktgjykimit të të 26 qershorit 2025 lidhur me afatin për konstituimin e Kuvendit konstatoi që “Seanca Konstituive e Kuvendit është një akt kushtetues që duhet të përmbushet me sukses brenda 30 ditëve nga data e shpalljes zyrtare të rezultateve të zgjedhjeve, përmes përmbushjes të të gjitha elementeve thelbësore të konstituimit, përfshirë zgjedhjen e Kryetarit dhe nënkryetarëve.

Lexo po ashtu Kushtetuesja: Zgjedhja e Kryetarit të Kuvendit të bëhet me votim të hapur dhe me pjesëmarrjen e të gjithë deputetëve

Në aktgjykimin e Kushtetutës bëhen të ditura “Meritat e kërkesës” që mund t’i lexoni më poshtë:

Gjykata, fillimisht rithekson që në rastin KO124/25 për objekt shqyrtimi të kërkesës së parashtruesve kishte vlerësimin (i) e çështjes ndërlidhur me konstituimin e Kuvendit dhe afatit për konstituimin e tij, si dhe (ii) të pretendimit të parashtruesve të kërkesës për “ndryshimin e rendit të ditës së Seancës Konstituive” dhe propozimin e Kryesuesit për themelimin e “Komisionit për Votim të Fshehtë”.

Gjykata, në mënyrë të përmbledhur rikujton që përmes Aktgjykimit të saj në rastin KO124/25, të 26 qershorit 2025 lidhur me afatin për konstituimin e Kuvendit konstatoi që “Seanca Konstituive e Kuvendit, në kuptim të paragrafit 1 të nenit 66 të Kushtetutës është një akt kushtetues që duhet të përmbushet me sukses brenda 30 (tridhjetë) ditëve nga data e shpalljes zyrtare të rezultateve të zgjedhjeve, përmes përmbushjes të të gjitha elementeve thelbësore të konstituimit, përfshirë zgjedhjen e Kryetarit/es sipas paragrafit 2 të nenit 67 dhe nënkryetarëve sipas paragrafëve 3 dhe 4 të nenit 67 të Kushtetutës.

Çdo interpretim ndryshe do të relativizonte rendin kushtetues, respektivisht Kushtetutën e Republikës së Kosovës dhe do të nënkuptonte tolerim të bllokimit institucional, në kundërshtim me natyrën funksionale të një demokracie të udhëhequr nga parimet e demokracisë dhe të sundimit të ligjit.” (shih, paragrafin 145 të Aktgjykimit). Këtë konstatim, Gjykata e mbështeti ndër tjerash në atë që përcaktimet në paragrafin 1 të nenit 66 të Kushtetutës nënkuptojnë se mbajtja e seancës konstituive brenda afatit 30 (tridhjetë) ditor, nuk është mundësi formale apo orientuese, por detyrim kushtetues që lidhet ngushtë me fillimin e mandatit të legjislaturës së re. Sipas Gjykatës, kërkesa nga paragrafi 1 i nenit 66 të Kushtetutës, që Kuvendi të mbajë Seancën Konstituive brenda 30 (tridhjetë) ditëve nuk do të thotë vetëm që deputetët e zgjedhur duhet të mblidhen fizikisht në sallë po që kuptimi i kësaj norme duhet të jetë substancial dhe funksional, duke nënkuptuar që brenda këtij afati duhet të realizohen të gjitha veprimet kushtetuese që rezultojnë në konstituimin e Kuvendit, të cilat përfshijnë (i) verifikimin e mandateve të deputetëve të zgjedhur, (ii) dhënien e betimit nga ana e tyre dhe (iii) zgjedhjen e Kryetarit të Kuvendit dhe (iv) zgjedhjen e nënkryetarëve të Kuvendit. Thënë këtë, Gjykata ka ritheksuar që pa përfundimin me sukses të këtyre veprimeve kushtetuese, Kuvendi nuk mund të konsiderohet juridikisht i konstituuar dhe, rrjedhimisht, nuk mund të ushtrojë asnjë nga funksionet që Kushtetuta i ka caktuar (shih, paragrafët 131-132 të Aktgjykimit në rastin KO124/25).

Përderisa në kuptimin të vlerësimit të çështjes ndërlidhur me pretendimet për “ndryshimin e rendit të ditës” së seancës konstituive dhe propozimin e Kryesuesit të Seancës Konstituive për themelimin e “Komisionit për Votim të Fshehtë”, Gjykata konkludoi që “marrë për bazë vlerësimin dhe konstatimet si më sipër konsideron që zhvillimi dhe përfundimi i Seancës Konstituive duhet të udhëhiqet në pajtim me përcaktimet kushtetuese për konstituimin e Kuvendit, Kreun IV (Konstituimi i Kuvendit) të Rregullores së Kuvendit dhe praktikat e deritanishme parlamentare për konstituimin e Kuvendit të Republikës së Kosovës.”(shih, paragrafin 187 të Aktgjykimit në rastin KO124/25).

Në vijim të këtyre konstatimeve, Gjykata përmes pikës IItë Aktgjykimit në rastin KO124/25 vendosi që deputetët e zgjedhur të Kuvendit, në zbatim të paragrafit 1 të nenit 66, në ndërlidhje me paragrafët 1, 2, 3 dhe 4 të nenit 67, si dhe nenet 70 dhe 74 të Kushtetutës, në pajtim me Kreun IV të Rregullores së Kuvendit dhe praktikat e deritanishme parlamentare për konstituimin e Kuvendit, si dhe në përputhje me konstatimet e dhëna në këtë Aktgjykim, janë të obliguar që, dhe jo më vonë se 30 (tridhjetë) ditë nga hyrja në fuqi e këtij Aktgjykimi, të përmbushin detyrimin kushtetues për konstituimin e Kuvendit të Republikës së Kosovës përmes zgjedhjes së Kryetarit/es dhe të nënkryetarëve të tij.

Gjykata rikujton që parashtruesit e kërkesave në thelb pretendojnë që (i) propozimi i Kryesuesit të Seancës Konstituive për propozimin e anëtarëve për Komisionin për Votim të Fshehtë për zgjedhjen e Kryetarit të Kuvendit, gjatë seancave të 29 qershorit, 1 dhe 3 korrikut 2025 nuk është në përputhje me Aktgjykimin e Gjykatës në rastin KO124/25; dhe (ii) në vijim të kësaj specifikojnë që “Vendimi i Kuvendit për votimin e Komisionit për votim të fshehtë, në kuadër të vazhdimit të seancës konstituive të Legjislaturës IX të Kuvendit, të mbajtur sipas transkriptit të datës 29 qershor 2025.” është nxjerrë në kundërshtim me nenet 65 [Kompetencat e Kuvendit], 67 [Zgjedhja e Kryetarit dhe Nënkryetarëve], 74 [Ushtrimi i Funksionit] dhe 76 [Rregullorja e Punës] të Kushtetutës.

Pretendimet e parashtruesve të kërkesave kundërargumentohen nga deputetja e Lëvizjes Vetëvendosje!, Znj. Saranda Bogujevci, e cila në komentet e dorëzuara në Gjykatë, në emër te Lëvizjes Vetëvendosje!, në thelb, thekson që (i) votimi i fshehtë është i lejueshëm si një kompromis i mundshëm mes deputetëve, me qëllim të konstituimit të Kuvendit; dhe (ii) propozimi i Kryesuesit të Seancës për formimin e komisionit për votim të fshehtë paraqet përpjekje të sinqertë për të gjetur “kompromisin apo konsensusin” e nevojshëm për mënyrën e votimit, me qëllim të konstituimit të Kuvendit; (iii) mos-pjesëmarrja e deputetëve në votimin për formimin e komisionit për votim të fshehtë bllokon shprehjen e vullnetit të shumicës; dhe (iv) të gjithë deputetët e zgjedhur të Kuvendit kanë për obligim gjetjen e një mënyre për të zgjedhur Kryetarin dhe nënkryetarët e Kuvendit. /Telegrafi/

The post Kushtetuesja publikon aktgjykimin e plotë për konstituimin e Kuvendit të Kosovës appeared first on Telegrafi.

Gjatë periudhës janar-qershor 2025, gjithsej 776 çifte në Kosovë kanë përfunduar martesën e tyre, sipas të dhënave të publikuara nga Agjencia e Statistikave të Kosovës (ASK).

Vetëm në muajin qershor janë regjistruar 135 raste shkurorëzimesh, duke shënuar një rritje prej 19 për qind krahasuar me muajin paraprak, majin.

“Numri i shkurorëzimeve të regjistruara në Kosovë për muajin qershor është 135, që përbën një rritje prej 19% krahasuar me muajin maj,” thuhet në njoftimin zyrtar të ASK-së.

Sa i përket shpërndarjes sipas komunave, Peja ka shënuar numrin më të lartë të shkurorëzimeve për muajin qershor, me gjithsej 17 raste. Pas saj renditet Prizreni me 14 raste dhe Ferizaji me 13 raste. /Telegrafi/

The post Kosova me rritje të shkurorëzimeve, Peja në krye të listës appeared first on Telegrafi.

Në Prishtinë sot është hapur edicioni i 43-të i Seminarit Ndërkombëtar të Gjuhës, Letërsisë dhe Kulturës Shqiptare i cili do të vazhdoj deri më 29 gusht. Në këtë seminar do të marr pjesë rreth 200 studiues nga vende të ndryshme.

Kryeministri në detyrë, Albin Kurti tha se ky seminari është një ngjarje më jetëgjate në jetën kulturore të Kosovës.

Kuri tha se entuziazmi për gjuhën, artin dhe kulturën shqiptare duhet të rritet, prandaj shprehu edhe mbështetjen për të gjitha institucionet që kanë këtë detyrë.

“Gjuha nuk është vetëm komunikim i nevojave, por mbi të gjitha komunikim i subjektivitetit, i kujtesës dhe imagjinatës dhe i kulturës, pra është komunikim qenësor. Në kushtet e zhvillimit të shpejt të Inteligjencës Artificiale gjuha është themeli më solid i ruajtjes së inteligjencës dhe imagjinatës njerëzore e natyrore…Sido që të jetë pasuria jonë shoqërore dhe shtetërore entuziazmi ynë për gjuhën shqipe në kulturën, artin dhe shkencat tona duhet vetëm të rritet e si kryeministër shpreh gatitshmërinë time të mbështetjes së institucioneve që janë drejtpërdrejtë të lidhura me këtë qëllim fisnik e detyrë historike”, theksoi Kurti.

Rektori i Universitetit të Prishtinës, Hasan Prishtina, Arben Hajrullahu tha se në edicionin e 43-të të këtij seminari do të marrin pjesë rreth 200 studiues e dashamirës të gjuhës dhe kulturës shqiptare.

Ai theksoi se qëllimi i këtij seminari është të ruhen rrënjët e gjuhës dhe kulturës shqipe.

“Si Universitet i Prishtinës, jemi jashtëzakonisht krenar me faktin që jemi nikoqir të këtij seminari, të kësaj ngjarje kaq të madhe e kaq të rëndësishme. Këtë vit në seminarin e 43-të me radhë pritet të marrin pjesë rreth 200 studiues, dashamirës të gjuhës e letërsisë dhe kulturës shqiptare. Seminari pra, është ngjarja më jetëgjatë që është si organizim i këtillë në Universitetin e Prishtinës dhe mësova që edhe një vit para se të krijohej Akademia e Shkencave, Arteve të Kosovës ka filluar punën…Kur e shohim strukturën dhe shtylla se çfarë e përbënë këtë seminar, ne shohim se vazhdimisht ka pas sjellje të reja shkencore, aktiviteti, promovimi i mësimit të gjuhës shqipe, kultivimi i kulturës së gjuhës shqipe jo vetëm për ne që kemi lindur dhe e flasim si gjuhë amtare, por edhe të gjithë njerëzit e interesuar. Jam shumë i lumtur kur shoh që edhe këtë vit do të organizohen 34 orë të mësimit për gjuhën shqipe në të tri nivelet. Pra, vjen deri tek promovimi, kultivimi si dh e ndërkombëtarizimi i gjuhës shqipe”, tha ai.

Fillim të mbarë për këtë edicionin të seminarit uroi edhe kryetari i Akademisë së Shkencave dhe Arteve të Kosovës, Mehmet Kraja i cili tha se Seminari Ndërkombëtar i Gjuhës, Letërsisë dhe Kulturës Shqiptare ka jetëgjatësinë më të madhe si ngjarje kulturore në gjitha trojet shqiptare.

“Ngjarja kryesore dhe kulturore me jetëgjatësinë më të madhe jo vetëm në Kosovë, por në mbarë hapësirën shqiptare. Ka këtu akoma dëshmitarë siç jam unë dhe të tjerë si unë të atij fillimi të lartë të vitit 1974 kur Qendra e Studimeve për të huaj e mori emrin e seminarit, emër që e ka edhe sot…ne jemi të vetëdijshëm që edhe në punë të organizimit të seminarit, të mësimdhënies, dhe ligjërimit do të jetë e nevojshme të bëhen ndryshime strukturore siç do të jetë e nevojshme që dijet albanologjike përfshirë studimet gjuhësore dhe letrare të braktisin pozitivizmin dhe të zhvillojnë mendimin kritik, por në anën tjetër kam besim se edhe kësaj radhe si çdo herë tjetër deri tani do të merrni me vete përshtypjet më të mira për mikpritjen dhe miqësinë“, theksoi Kraja.

E dekani i Fakultetit të Filologjisë, Abdullah Rexhepi tha se ky seminar edhe këtë vit organizohet në përputhje me standardet më të larta akademike dhe kulturore.

“Duke qenë të vetëdijshëm për idealet e larta të themeluesve të seminarit, ne sot vazhdojmë të ndjejmë detyrimin që organizimi të jetë në përputhje me standardet më të larta akademike si dhe kulturore. Por edhe të jetë edhe me nevojat infrastrukturore të kohës…gjatë këtyre dy javëve krahas kurseve të gjuhës shqipe për pjesëmarrësit e ardhur nga vendet e ndryshme të botës do të zhvillohen edhe 11 ligjërata nga albanolog të shquar vendor dhe të jashtë, 84 referime nga fusha të ndryshme të albanologjisë si dhe 50 kumtesa shkencore në kuadër të temave bosht të këtij seminari”, deklaroi Rexhepi.

Ambasadori i Shqipërisë në Kosovë, Petrit Malaj tha se ky seminar nuk është thjesht aktivitet akademik, por platformës ku mësohet gjuha shqipe si gjuha më e vjetër në Evropës.

“Një traditë e vyer akademike e cila prej viti 1974 e ka shndërruar Prishtinën në një qendër ndërkombëtare për ekspertizën dhe bashkëpunimin shkencor në fushën e albanologjisë. Historia e këtij seminari është në vetvete një rrëfim mbi qëndrueshëmërinë e dijes përballë sfidave. Në vitet e izolimit të Shqipërisë ky seminar në Prishtinë ishte dritarja nga e cila studiues të huaj mund të njiheshin nga afër me gjuhën dhe kulturën tonë“, u shpreh ambasadori shqiptar në Kosovë.

Drejtoresha e Seminarit Ndërkombëtar për Gjuhë, Letërsi dhe Kulturën Shqiptare , Lindita Sejdiu tha se Seminari është koncepti më i fortë i ndërkombëtarizimit të albanologjisë në botë.

“Institucioni i seminarit është koncepti më i fortë i ndërkombëtarizimit të albanologjisë në botë, është prezantimi më me vlerë i shkencës vendore vështruar nga një këndë global, por edhe prezantimi i shkencës globale për albanologjinë brenda një medium të përbashkët….Seminari janë Prishtina dhe Tirana bashkë në hartën shkencore ndërkombëtare”, u shpreh drejtoresha Sejdiu.

I pranishëm në hapjen e edicionit të 43-të të këtij seminari ishte edhe bashkëdrejtori i seminarit në Tiranë, Shezair Rrokaj.

Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 në Fakultetin e Filologjisë (atëherë: Fakulteti Filozofik) të Universitetit të Prishtinës. Ky Seminar organizohet për studente/ë e studiuese/studiues që merren me çështje të gjuhës, të letërsisë e të kulturës shqiptare, por edhe me albanologjinë përgjithësisht. Deri më tani, seminari ka zhvilluar gjithsej 42 sesione.

The post Hapet edicioni i 43-të i Seminarit të Gjuhës, pjesëmarrës rreth 200 studiues appeared first on Telegrafi.

Prokuroria Themelore në Prizren, departamenti i Krimeve të Rënda, ka ngritur aktakuzë kundër P.B., dhe E.Th., për shkak të dyshimit të bazuar mirë se në bashkëkryerje kanë kryer veprën penale “Keqpërdorimi i pozitës apo autoritetit zyrtar”.

Sipas një njoftimi për media bëhet e ditur se sipas aktakuzës, të pandehurit P.B. dhe E.Th., në cilësitë e tyre zyrtare në Komunën e Prizrenit, duke tejkaluar kompetencat dhe duke mos i përmbushur detyrat ligjore, kanë lejuar rrënimin e objektit të mbrojtur kulturor “Saraji i vjetër” dhe ndërtimin e një kompleksi banesor, duke shkaktuar dëm të pariparueshëm trashëgimisë kulturore në vlerë prej mbi 15 milionë euro.

“Sipas aktakuzës, në periudhën kohore prej datës 05.01.2024 deri më 04.04.2024 në Prizren, i pandehuri i parë P.B., në cilësinë e personit zyrtar – drejtor i drejtorisë për urbanizëm në Komunën e Prizrenit, ndërsa e pandehura e dytë E.Th., në cilësinë e bashkëpunëtores profesionale në DUPH në komunën e Prizrenit, duke shfrytëzuar detyrën apo autoritetin zyrtar i tejkalojnë kompetencat e tyre dhe nuk i përmbushin detyrat me qëllim të shkaktimit të dëmit Ministrisë së Kulturës (MKRS), duke mundësuar përfitim të dobisë pasurore për investitorin A.Xh., në atë mënyrë që i pandehuri P.B., në cilësinë e drejtorit të DUPH edhe pse ka pas njohuri se kompleksi “Saraji i vjetër” në Prizren është në kuadër të mbrojtjes së përhershme të monumenteve kulturore, nuk e parandalon rrënimin e tij, ndërsa e pandehura E.Th., më datë 05.01.2024 pas kërkesës së investitorit A.Xh., fillimisht lëshon kushtet ndërtimore, dhe vazhdon  më datë 15.01.2024 ku e lëshon vendimin për rrënimin e objekteve ekzistuese, dhe më datë 04.04.2024 lëshon lejen e ndërtimit investitorit A.Xh., për të ndërtuar kompleks banesor në objektin e trashëgimisë kulturore “Saraji i vjetër” në Prizren, krejt kjo në kundërshtim me Ligjin për ndërtim dhe Ligjin për trashëgiminë kulturore dhe listën e aseteve të trashëgimisë kulturore në mbrojtje të përhershme, ashtu që me dashje tejkalojnë dhe nuk i përmbushin detyrat e tyre të cila janë të përcaktuara me ligj në drejtimin të moslejimit të rrënimit të objektit “Saraji i vjetër” dhe ndërtimit mbi gërmadhat e saj të kompleksit banesor, me ç’rast shkaktohet një dëm i pariparueshëm i trashëgimisë kulturore në shumë rreth 15.961.832.70 € (pesëmbëdhjetë milionë, e nëntëqind e gjashtëdhjetë e një mijë e tetëqind e tridhjetë e dy euro, e shtatë dhjetë cent)”, thuhet në njoftim.

Po ashtu siç thuhet në njoftim me këto veprime, të pandehurit e lartëcekur në bashkëkryerje kanë kryer veprën penale “Keqpërdorimi i pozitës apo autoritetit zyrtar” sipas KPRK-së.

Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprën penale për të cilën akuzohen të shpallen fajtorë dhe të dënohen sipas ligjit. /Telegrafi/

The post Aktakuzë ndaj dy personave nën dyshimin se lejuan rrënimin e “Sarajit të vjetër” në Prizren , shkaktuan dëm në vlerë mbi 15 milionë euro appeared first on Telegrafi.

Një person është arrestuar pasi që i njëjti është vërejtur përmes video incizimeve duke ndezur zjarr në afërsi të varrezave.

Sipas raportit 24 orësh të Policisë së Kosovës bëhet e ditur se rasti ka ndodhur të dielën rreth orës 09:53, në Viti.

Tutje bëhet e ditur se në vendin e ngjarjes kanë dal njësia e zjarrëfiksve të cilët kanë arritur ta lokalizojnë zjarrin.

“Është arrestuar i dyshuari mashkull kosovar pasi që i njëjti është vërejtur përmes video incizimeve duke ndezur zjarr në afërsi të varrezave. Në vendin e ngjarjes kanë dal njësia e zjarrfikësve të cilët kanë arritur ta lokalizojnë zjarrin”, thuhet në raport.

Ndërkaq, siç bëhet e ditur në raport i dyshuari pas intervistimit me vendim të prokurorit është liruar në procedurë të rregullt. /Telegrafi/

The post Ndezi zjarr në afërsi të varrezave në Viti, arrestohet një person appeared first on Telegrafi.

Një aksident rrugor është regjistruar mëngjesin e sotëm në Vlorë ku një makinë ka humbur kontrollin dhe është përplasur me rrethimin e vilës qeveritare në zonën e Ujit të Ftohtë.

Sipas informacioneve paraprake, drejtuesi i mjetit ka humbur kontrollin mbi automjetin për shkaqe ende të paqarta, duke përfunduar në rrethimin e godinës.

Në vendngjarje ka ndërhyrë menjëherë policia, e cila ka nisur hetimet për të zbuluar shkaqet e aksidentit. Fatmirësisht, nga ngjarja nuk ka persona të lënduar, por janë shkaktuar dëme materiale. (A2 Televizion)

The post Aksident buzë detit në Vlorë, makina hyn në rrethimin e vilës qeveritare appeared first on Telegrafi.

Kryeministri i Shqipërisë, Edi Rama ka vijuar me traditën e tij të promovimit të bukurive natyrore të vendit përmes rrjeteve sociale.

Këtë herë, përmes një postimi në rrjetin social në Facebook ai ka zgjedhur një nga perlëzat e jugut — Gjirin e Gramës, i ndodhur në zonën e Orikumit.

Në një postim të publikuar mëngjesin e sotëm, Rama ka shpërndarë pamje spektakolare nga bregdeti shqiptar, duke shfaqur ujërat e kristalta dhe relievin e egër të këtij gjiri të veçantë.

“Mirëmëngjes, dhe me energjinë verore nga Gjiri i Gramës, ju uroj një javë të mbarë”, ka shkruar ai, duke shoqëruar mesazhin me imazhe që theksojnë potencialin turistik të zonës. /Telegrafi/

The post Edi Rama ndan pamje mahnitëse nga Gjiri i Gramës: Mirëmëngjes me energjinë verore appeared first on Telegrafi.

Një grua e moshës 32 vjeçare dyshohet se është keqtrajtuar fizikisht nga vjehrri i saj 62 vjeçar dhe kunata e moshës 20 vjeçare.

Sipas një njoftimi për media nga Policia e Kosovës për rajonin e Ferizajt bëhet e ditur se ngjarja ka ndodhur të dielën në Ferizaj.

Tutje në raport thuhet se si pasojë, viktimës i janë shkaktuar lëndime të lehta trupore dhe ajo ka pranuar tretman mjekësor.

“Lëndimi i lehtë trupor dhe  ‘Mbajtja në pronësi, kontroll ose posedim të paautorizuar të armëve’ në Ferizaj. Më datën 17.08.2025, në stacionin policor në Ferizaj është raportuar për një rast të ‘Lëndimit të lehtë trupor’. Pala e dëmtuar, një femër 32-vjeçare, ka deklaruar se në shtëpinë e saj ishte keqtrajtuar fizikisht nga vjehrri 62-vjeçar dhe vajza e tij 20-vjeçare, pas një mosmarrëveshjeje lidhur me pronësinë e një veture. Si pasojë, viktimës i janë shkaktuar lëndime të lehta trupore dhe ajo ka pranuar tretman mjekësor”, thuhet në njoftim.

Po ashtu në njoftim bëhet e ditur se njësiti i hetimeve ka dalë në vendin e ngjarjes dhe gjatë kontrollit në shtëpinë e tyre është gjetur dhe sekuestruar një armë zjarri – pushkë automatike me dy karikatorë.

“Dy të dyshuarit janë shoqëruar në stacionin policor dhe janë intervistuar nga hetuesit policorë. Me vendim të prokurorit të shtetit, ndaj tyre është iniciuar rast për veprat penale: ‘Lëndimi i lehtë trupor’ dhe ‘Mbajtja në pronësi, kontroll ose posedim të paautorizuar të armëve’. Të dyshuarit janë liruar në procedurë të rregullt”, thuhet ndër të tjera në njoftim. /Telegrafi/

The post Nusja raporton se është rrahur nga vjehrri dhe kunata në Ferizaj, mosmarrëveshje për pronësinë e një veture appeared first on Telegrafi.

Tash e dy javë punëtorët e Radio Televizionit të Kosovës (RTK) kanë mbetur pa i marrë pagat për muajin korrik.

E ministri i Financave, Hekuran Murati ka thënë se buxheti i RTK-së alokohet sipas vendimit të Komisionit për Buxhet, Punë dhe Transfere e Thesari vetëm bën ekzekutimin, sipas vendimit të Komisionit parlamentar.

Murati përmes një postimi në rrjetin social në Facebook ka thënë se Komisioni për Buxhet që do duhej me i nda mjetet, nuk ekziston aktualisht sepse partitë opozitare po e mbajnë të bllokuar konstituimin e Kuvendit duke mos marrë pjesë në votim tash e disa muaj.

Lexo po ashtu Dy javë pa paga, stafi i RTK-së paralajmëron protesta të reja nëse pagat nuk ekzekutohen sot

“Të njejtit që po e mbajnë Kuvendin të bllokuar duke mos votuar, tani po mundohen që mungesën e alokimit të buxhetit të RTK-së t’ia faturojnë Qeverisë. Po të mos e kishin bllokuar opozita konstituimin e Kuvendit, çështja e buxhetit të RTK-së as që do të ishte temë, sepse buxheti alokohet me automatizëm, sapo të ketë vendim nga Komisioni për Buxhet”, ka shkruar Murati.

Sipas tij, bllokuesit e Kuvendit, tani po na tregojnë qysh ata e kanë shkelur ligjin duke miratuar në Qeveri alokimin e buxhetit për RTK për 3 muaj në vitin 2021, dhe po kërkojnë që edhe Qeveria jonë të bëjë të njejtën shkelje.

“Në fakt, pikërisht për të evituar një situatë të tillë Komisioni për Buxhet nën kryesimin e deputetit Armend Muja kishte miratuar qysh në dhjetor të vitit të kaluar pagesën e këstit, jo për 3 muaj siç bëhet zakonsiht, por për 6 muaj (janar-qershor 2025). Kjo ishte bërë duke llogaritur në ndonjë vonesë eventuale deri në formimin e institucioneve pas muajit mars”, ka thënë Murati.

Tutje ministri në detyrë i Financave ka thënë se askush se ka menduar që PDK, LDK, dhe AAK do ta mbajnë të bllokuar kuvendin për kaq gjatë, vetëm e vetëm se janë kundër që Albulena Haxhiu të zgjidhet Kryetare e Kuvendit.

“Kapaciteti destruktiv i tyre tejkalon çdo imagjinatë. PS. Çuditërisht, asnjëherë nuk janë deklaruar në raport me kërkesën tonë që pozita e nënkryetarit t’i takojë dikujt që nuk vjen nga Lista Serbe. Pra, për opozitën bën Lista Serbe për nënkryetar, por nuk bën Albulena Haxhiu për Kryetare”, ka shkruar ndër të tjera Murati. /Telegrafi/

The post Buxheti i RTK-së, çfarë thotë ministri Murati appeared first on Telegrafi.

Lidhja Demokratike e Kosovës (LDK) në Junik ka publikuar zyrtarisht listën me 17 kandidatë për Asamblenë Komunale, në kuadër të zgjedhjeve lokale që do të mbahen më 12 tetor.

Kjo listë udhëhiqet nga kryetari aktual i komunës, Ruzhdi Shehu, i cili njëherësh është edhe kandidat për një mandat të ri.

Shehu synon të vazhdojë punën dhe projektet e nisura në këtë qytet të vogël të Dukagjinit, i njohur për potencialin e tij turistik.

Në mandatin e kaluar, Shehu ka realizuar projektet e premtuara në fushën e turizmit, duke investuar në infrastrukturë dhe hapjen e rrugëve të reja drejt zonave malore dhe atraksioneve natyrore që ofron Juniku. Këto ndërhyrje, sipas tij, kanë për qëllim promovimin e turizmit malor dhe zhvillimin ekonomik të zonës. /Telegrafi/

The post LDK në Junik prezanton listën e kandidatëve për Asamblenë Komunale – Shehu synon edhe një mandat appeared first on Telegrafi.

Autori i vrasjes së bashkëmoshatarit 14-vjeçar përpara sherrit në lokal publikonte foto me armë zjarri në rrjete sociale.

Tashmë janë bërë publike dy foto të të miturit, i cili po ashtu kishte një tatuazh me armë zjarri në dorë.

Përveç pozave me armë zjarri dhe cigare, i mituri me iniciale E. G., i shoqëronte me shkrime kërcënuese.

“Por shfaqem kur ty s’ta pret mendja”, shkruan në një foto teksa konsumon cigare.

“Mos më kërko un nuk vi”, shkruan në foton tjetër ku në dorë mban një armë zjarri tip pushkë.

Një ngjarje e rëndë ka ndodhur pasditen e sotme në fshatin Pirg të Maliqit. I mituri 14-vjeçar është vrarë nga bashkëmoshatari i tij gjatë një sherri në një lokal. Ai nuk ka mundur t’i mbijetojë plagëve të marra nga thika, për pasojë ndërroi jetë në spital.

Lexo po ashtu Debatet që çuan në tragjedi, si u vra 14 vjeçari në Maliq

Të miturit kanë qenë duke folur fillimisht e më pas kanë nisur të debatojnë, duke vijuar më tej me përdorimin e armëve të ftohta, përkatësisht thikë.

Autori ende nuk ka dhënë asnjë dëshmi për ngjarjen, teksa enigmë mbeten shkaqet që kanë sjellë agravimin e situatës.

Të dy të miturit nuk janë nga fshati Pirg, por nga zona afërsi të tij.

Lexo po ashtu Tragjedi në Maliq të Shqipërisë, vdes 14-vjeçari pas konfliktit me thika

Korrespondentja e Top Channel, Dhorjela Çule bën me dije se sipas policisë autori dhe viktima kanë pasur konflikt më herët mes tyre, por ende mbetet e paqartë arsyeja.

Sipas të dhënave ditën e sotme ngjarja ka ndodhur në ambientet e jashtme të lokalit në fshatin Pirg. Dy adoleshentët janë takuar për tu sqaruar por kanë debatuar mes tyre dhe më pas janë konfrontuar fizikisht.

Viktima me iniciale E. XH., ka humbur jetën si pasojë e goditjeve të marra me thikë. Sakaq mësohet se autori me iniciale E. G., ka dëmtime, por jo me thikë.

Grupi hetimor nën drejtimin e Prokurorisë po punon për zbardhjen e rrethanave të ngjarjes. /Telegrafi/

The post “Shfaqem kur s’ta pret mendja”, foto me armë dhe mesazhe kërcënuese – çfarë postonte në rrjete sociale autori i vrasjes së 14-vjeçarit në Maliq appeared first on Telegrafi.

Situata nga zjarret në bashkinë e Gramshit vijon të jetë e tensionuar, me vatra të reja që janë shfaqur gjatë ditës dhe riaktivizime të zjarreve ekzistuese në disa zona malore dhe pyjore të njësive administrative të bashkisë.

Që në orët e para të mëngjesit, forcat zjarrfikëse kanë nisur punën për shuarjen e flakëve në fshatin Kullollas, Njësia Administrative Skënderbegas, ku një sipërfaqe e madhe pyjore është përfshirë nga zjarri.

Aktualisht, zjarre aktive raportohen në fshatrat Sojnik, Mukaj dhe Snosëm, duke e mbajtur situatën në nivel alerti. Forcat operacionale në terren janë të shumta: 30 zjarrfikës me 11 automjete nga MZSH-të e Gramshit, Elbasanit, Cërrikut dhe Librazhdit; 60 punonjës të bashkisë; 80 vullnetarë dhe 70 efektivë të Forcave të Armatosura me 2 mjete zjarrfikëse. Në operacion janë përfshirë gjithashtu dy helikopterë – një çek dhe një sllovak – të cilët po ndihmojnë nga ajri në zonat më të vështira.

Një tjetër vatër e përmasave të mëdha është regjistruar në zonën e Kodovjatit, pranë fshatit Posnovisht, ku pas ndërhyrjes së shpejtë të ekipeve në terren, zjarri është izoluar dhe po monitorohet gjatë natës.

Ndërkohë, në fshatrat Mukaj dhe Sojnik, në Njësinë Administrative Kukur, vazhdon djegia e një sipërfaqeje me shkurre dhe ferra. Fatmirësisht, nuk raportohet rrezik për banesat.

Sot janë regjistruar gjithashtu vatra të reja zjarri përballë fshatit Snosëm, mbi fshatin Sarasel dhe në zonën e Teqes së Dushkut, ku ndërhyrja është duke u zhvilluar me mbështetjen e Forcave të Armatosura.

Sipas autoriteteve, pavarësisht përhapjes së flakëve, aktualisht nuk ka rrezik të drejtpërdrejtë për jetën e banorëve, ndërsa operacionet tokësore dhe ajrore pritet të vijojnë me intensitet gjatë gjithë ditës për të vënë nën kontroll të gjitha vatrat aktive. /Euronews.al/

The post Situatë e rënduar në Gramsh, riaktivizime dhe vatra të reja zjarri appeared first on Telegrafi.

Gjykata Themelore në Prishtinë i ka caktuar 30 ditë paraburgim Ramadan Morinës – i dyshuar për krime lufte kundër popullatës civile.

Ai ka dalë sot, më 14 gusht, para gjykatës pasi ditë më parë është arrestuar nga Policia e Kosovës.

Ai akuzohet se në periudhën 29-31 mars 1999, në bashkëpunim me forca policore dhe ushtarake serbe, ka marrë pjesë në një masakër ku humbën jetën 34 civilë shqiptarë në fshatin Burim të Komunës së Malishevës.

Lexo po ashtu I dyshuari për krime lufte del para Gjykatës Themelore në Prishtinë

“Gjatë hetimeve janë siguruar prova materiale, përfshirë dëshmi të dëshmitarëve okularë dhe të mbijetuarve”, tha më herët Prokuroria.

Seanca dëgjimore për masën e sigurisë u mbajt e mbyllur për media dhe pas saj nuk pati deklarime para gazetarëve as nga prokurori special e as avokati i të pandehurit. /Kp/

The post Ramadan Morinës, të dyshuarit për krime lufte i caktohet 30 ditë paraburgim appeared first on Telegrafi.

Me afrimin e datës 1 shtator, e cila shënon fillimin e vitit të ri akademik 2025-2026, shumë prindër dhe familje janë në pritje për hapjen e aplikimit për subvencionet e teksteve shkollore për fëmijët e tyre.

Edhe pse ky është një moment kur zakonisht prindërit fillojnë përgatitjet për blerjen e librave dhe materialeve të nevojshme për fëmijët e tyre, deri më tani ende nuk është hapur aplikimi zyrtar nga Ministria e Arsimit.

Lexo po ashtu Subvencionimi i teksteve shkollore, MASHTI ekzekuton mbi 81 mijë pagesat e para

Telegrafi ka dërguar pyetje zyrtare në Ministrinë e Arsimit duke kërkuar sqarime lidhur me datën për hapjen e aplikimit për subvencionet që ndihmojnë familjet të përballojnë shpenzimet për tekstet shkollore.

Lexo po ashtu Kthejeni sistemin e vjetër, hulumtimi nga UBO Consulting: 55.7 për qind e prindërve të anketuar preferojnë që librat të shpërndahen përmes shkollave

Megjithatë, deri në momentin e publikimit të këtij artikulli, Telegrafi ende nuk ka marrë një përgjigje zyrtare.

Ndryshe, vitin e kaluar prindërit janë subvencionuar për blerjen e teksteve shkollore ku për nxënësit nga klasa e 1-5 vlera e subvencionimit ishte 80 euro, ndërsa për ata nga klasa 6-9 vlera ishte 110 euro, ndërsa vite më parë është praktikuar opsioni ku librat shpërndaheshin direkt përmes shkollave. /Telegrafi/

The post Dy javë nga fillimi i ri i vitit shkollor, aplikimi për subvencionet e teksteve shkollore ende nuk është hapur, Ministria hesht appeared first on Telegrafi.

Ministria e Mbrojtjes në Shqipëri ka bërë të ditur se gjatë 24 orëve të fundit janë evidentuar 64 vatra zjarri, nga të cilat 24 vatra zjarri janë ende aktive.

Sipas një njoftimi në rrjetin social në Facebook bëhet e ditur se mbi 10 mijë forca të emergjencave, nën koordinimin e Agjencisë së Mbrojtjes Civile ndodhen në terren dhe situata po shkon drejt stabilizimit.

“Operacioni i gjerë kundër zjarreve ka vijuar pa ndërprerje gjatë gjithë natës, duke synuar kufizimin e perimetrit të flakëve pranë zonave të banuara dhe parqeve kombëtare në të gjithë vendin. Nga ajri po operojnë edhe tre helikopterë në Gramsh dhe dy të tjerë në Delvinë.

Po ashtu në postimi thuhet se sipas të dhënave meteorologjike, vendi pritet të përballet me temperatura të larta dhe erëra të forta në orët e mesditës, çka rrit rrezikun për riaktivizimin dhe përhapjen e vatrave ekzistuese, si dhe krijimin e zjarreve të reja.

Autoritetet u bëjnë thirrje qytetarëve të shmangin çdo veprim që mund të shkaktojë zjarr dhe të raportojnë menjëherë çdo vatër të re.

Më poshtë lexoni situata në vatrat më problematike:

Qarku Vlorë – Bashkia Delvinë & Finiq

Në Delvinë, zjarri i depërtuar nga Syri i Kaltër ka përfshirë fshatrat Pecë, Sirakat dhe Kardhikaq, duke arritur deri pranë kurorës së bashkisë. Flakët u shtrinë nga Vllahati drejt Kakodhiqit, duke shkaktuar djegien e 5 shtëpive, prej të cilave 4 të pabanuara. Në operacione janë angazhuar 36 efektivë zjarrfikës me 5 mjete, 120 trupa të FA, forca të FNSH, Delta, Shqiponjat, policia vendore dhe bashkiake, si dhe 7 autobote uji. Zjarri është zhvendosur mbi fshatin Vllahat, ku po ndërhyhet nga ajri me helikopterë çek dhe sllovak.

Në Finiq, vazhdon aktive vatra që ka prekur zonën nga Syri i Kaltër deri në pllajën e malit të Gjerë dhe Sopotit. Në Bistricë, vatra po mbahet nën monitorim. Në Parkun e Rëzomës, mbi tunelin e Skërficës, zjarri vijon, por terreni i vështirë nuk lejon ndërhyrje.

Qarku Elbasan – Bashkia Gramsh

Në Kullollas dhe njësinë Skënderbegas, zjarri ka marrë përmasa të mëdha, duke përfshirë disa fshatra dhe shkaktuar një viktimë. Janë raportuar dëme në banesa. Situata mbetet e rëndë dhe po ndërhyhet nga ajri. Në Mukaj e Sojnik, zjarri vijon në sipërfaqe me shkurre dhe ferra, me forcat vendore dhe FA në terren.

Qarku Gjirokastër – Bashkia Tepelenë

Në Hormovë, rreziku për banesat është shmangur, por puna për shuarjen vazhdon. Në Turan, flakët janë përhapur drejt Lekelit dhe Koderit, duke djegur dy stalla dhe kafshë. Në terren kanë operuar forca zjarrfikëse, policore, bashkiake, vullnetare dhe ushtarake, si dhe helikopterë çek e sllovak.

Qarku Shkodër – Bashkia Fushë Arrëz

Në Xeth, vatra po digjet në një zonë me pisha. Janë angazhuar forca të shumta nga FA, MZSH, policia dhe shërbimi pyjor. Situata paraqitet më e qetë, por puna vijon për izolimin e plotë.

Qarku Tiranë

Në malin e Bërzhitës dhe fshatin Durishtë, zjarri është mbajtur nën kontroll me ndërhyrje nga ajri dhe toka. Në zonën Arbanë (Damjan e Isufaj), flakët morën përmasa të mëdha dhe u ndërhy me helikopter kroat. Në Ferraj dhe Zall-Herr, vatrat po mbahen nën monitorim, ndërsa në Kryevidh të Rrogozhinës janë djegur rreth 100 ha dhe dy shtëpi të pabanuara.

Qarku Dibër

Në malin me Gropa, Biz të Martaneshit, zjarri vazhdon në zonë të mbrojtur, larg banesave. Në Ternovë, operacioni vazhdon me forca vendore dhe të FA.

Qarku Korçë – Bashkia Kolonjë

Në Gërmenj, zjarri në pyjet me pisha zhvillohet në terren të vështirë, me shpërthime municionesh në perimetrin e flakëve. Ndërhyrja e drejtpërdrejtë është e vështirë dhe po mbahet nën mbikëqyrje.

Puna po vijon ndërkohë edhe në vatrat, ku nuk ka rrezik për banesa apo gjënë e gjallë.

Parashikimi i motit dhe rrezikshmëria për zjarre

Sipas të dhënave meteorologjike, vendi pritet të përballet me temperatura të larta dhe erëra të forta në orët e mesditës, çka rrit rrezikun për riaktivizimin dhe përhapjen e vatrave ekzistuese, si dhe krijimin e zjarreve të reja. Autoritetet u bëjnë thirrje qytetarëve të shmangin çdo veprim që mund të shkaktojë zjarr dhe të raportojnë menjëherë çdo vatër të re. /Telegrafi/

The post Situata me zjarret në Shqipëri, Ministria iu bën thirrje qytetarëve të shmangin çdo veprim që mund të shkaktojë zjarr appeared first on Telegrafi.

Një person është gjetur pa shenja jete në breg të detit, në zonën e Plazhit të Vjetër në Vlorë.

Ngjarja është konstatuar nga pushuesit, të cilët kanë njoftuar menjëherë policinë.

Efektivët kanë mbërritur në vendngjarje dhe po punojnë për identifikimin e viktimës, si dhe për zbardhjen e rrethanave të vdekjes. /Euronews.al/

The post Gjendet një person pa shenja jete në plazhin e Vlorës appeared first on Telegrafi.

Cheryl Orlov, një 55-vjeçare nga Los Angeles u zhvendos në Shqipëri në vitin 2023.

Bussines Insider i ka kushtuar Cheryl Orlov një artikull bazuar në një bisedë me të.

Kalova 23 vjet duke jetuar në zonën e Los Angeles, ku shtëpia ime ishte dy milje larg Redondo Beach. Zotërova një kompani mobiljesh për 32 vjet, e ndërtova nga themelet dhe punova shumë për të krijuar një stil jetese të rehatshëm për veten time.

Kam pasur një jetë të plotë në Los Angeles. Ndërtova një komunitet të mirë miqsh dhe isha shumë aktive, veçanërisht në sportet e qëndrueshmërisë. Jam një adhuruese e udhëtimeve dhe përjetimit të kulturave të ndryshme, dhe gjithmonë kam thënë se qyteti është një vend i shkëlqyer për të jetuar nëse nuk mund të udhëtosh në të gjithë botën.

Ndërsa isha i lumtur duke jetuar në Los Angeles, ende kisha një dëshirë të madhe për të udhëtuar.

Udhëtoja jashtë vendit një ose dy herë në vit dhe isha e kënaqur për një kohë. Por në vitin 2016, shkova në Afrikë për një udhëtim bamirësie. Vizitova Ugandën, Marokun dhe Afrikën e Jugut, dhe gjatë vizitës sime, diçka brenda meje ndryshoi: Isha gati të largohesha jashtë vendit, thjesht duhej të gjeja mënyrën.

Disa gjëra më penguan. Zotëroja disa prona dhe kisha një biznes me kohë të plotë. Por, ndërsa vitet kalonin – më duheshin rreth shtatë – fillova të shpërdoroja pronat e mia. Zvogëlova shtëpinë time dhe madje fillova ta shpërbëja biznesin tim, të gjitha për ëndrrën e largimit nga SHBA-ja.

Mësova për Shqipërinë në një podcast.

Në prill 2022, po dëgjoja një podcast për emigrantët, dhe një bloger që po intervistohej tha të vizitoja Shqipërinë. Kam qenë në të shtatë kontinentet dhe pothuajse 50 vende, dhe Shqipëria nuk ishte as në radarin tim në atë kohë.

Fillova të bëja shumë kërkime. Pashë video në YouTube dhe madje intervistova udhëtare femra solo rreth përvojave të tyre në Shqipëri. Dhe në shtator 2022, unë dhe shoqja ime bëmë një udhëtim vëzhgimi atje.

Gjatë udhëtimit tim vëzhgimi, punësova një shofer që na çoi nga një qytet në tjetrin. Përfundimisht mbërritëm në Tiranë, kryeqytetin e Shqipërisë. Fillimisht, nuk doja të jetoja atje bazuar në atë që kisha lexuar në internet, por kur isha fizikisht atje, e dija menjëherë se ky ishte vendi im.

Kultura dhe historia e Shqipërisë janë kaq të pasura — është mahnitëse. Historikisht, ajo ka ndikime të forta nga Perandoria Osmane. Vendi u çlirua nga komunizmi në vitet 1990 dhe është ende në zhvillim.

Shqipëria është shumë e ngjashme me Kaliforninë nga ana topografike. Edhe pse është një vend i vogël, ajo përmban Alpet Shqiptare dhe vijat bregdetare përgjatë deteve Adriatik dhe Jon.

I dua njerëzit e Shqipërisë; mikpritja e tyre është e pakrahasueshme. Të bëjnë të ndihesh sikur je në shtëpi dhe si familja jote.

Ndihem e sigurt dhe rehat aty ku jetoj

Pas udhëtimit të zbulimit, u ktheva në SHBA dhe fillova të bëja rregullime për t’u zhvendosur. Shita pothuajse gjithçka që kisha dhe vazhdova ta shpërbëja biznesin tim.

Nuk kisha nevojë të aplikoja për vizë për të vizituar Shqipërinë sepse amerikanëve u lejohet të qëndrojnë deri në një vit pa të. Pas kësaj, nëse largohemi nga vendi për 90 ditë, periudha njëvjeçare rivendoset kur kthehemi.

Gjeta një apartament në Tiranë, kryeqytetin, gojë më gojë në një grup në Facebook. Një amerikan kishte folur me entuziazëm për pronarin, i cili kishte jetuar në Amerikë për gjashtë vjet.

Po zhvendosesha gjithë jetën time në një vend të panjohur, kështu që ishte e rëndësishme të isha në një zonë të mirë dhe të sigurt, në një ndërtesë ku njerëzit flisnin anglisht dhe ku më pëlqente pronari.

Në shtator 2023, u zhvendosa në Tiranë. Jetoj në qytet, por në një lagje të qetë ku jetojnë shumë shqiptarë – dhe emigrantët kanë tendencë të jetojnë më afër qendrës së qytetit.

Ndërtesa ku jetoj është një vilë me pesë njësi ku çdo kat ka apartamentin e vet. Unë jetoj në katin përdhes dhe kam një apartament me dy dhoma gjumi dhe një banjo. Kam një marrëdhënie të mirë me pronarin tim dhe nuk do të thoja se kjo është normë këtu, por paguaj 400 euro (466 dollarë) në muaj.

Faturat e tjera të mia janë gjithashtu mjaft të përballueshme. Zakonisht shpenzoj 20 deri në 30 euro (23-35 dollarë) në javë për ushqim në tregun lokal dhe të dalësh për darkë zakonisht kushton midis 15 dhe 20 euro (17-23 dollarë). Udhëtimi me autobus kushton rreth 0.50 dollarë dhe taksitë zakonisht kushtojnë rreth 5 euro.

Nuk jam ndjerë kurrë më shumë si vetvetja.

Të mësosh shqip është e vështirë, por një nga sfidat më të mëdha për të jetuar këtu është sa shpesh vijnë dhe shkojnë emigrantët. Kam vënë re se njerëzit zakonisht qëndrojnë për një ose dy vjet, pastaj largohen.

Përkohshmëria është e vështirë për mua – është thjesht e vështirë të vazhdosh të thuash lamtumirë. Kur isha në Kaliforni, nuk më duhej të shqetësohesha aq shumë për këtë. Pra, është diçka me të cilën më është dashur të përshtatem.

Nuk e di nëse Shqipëria do të jetë vendi im i përjetshëm, por prapëseprapë, jam vërtet e lumtur këtu. Nuk e kuptova sa i stresuar isha në Amerikë derisa u transferova në Tiranë.

Ndërsa jetoj këtu, udhëtoj më shumë. Nga Shqipëria, mund të fluturoj lehtësisht kudo në Evropë, Afrikë ose Azi – tani jam në Malajzi. Kam përjetuar kaq shumë kultura të ndryshme, dhe ndërsa kjo nuk është për të gjithë, ndihem si një person më i plotë.

Në fillim të këtij viti, përfundova shpërbërjen e biznesit. Nuk shqetësohem për të qenë i papunë jashtë vendit, sepse kam kursyer dhe kam ndërtuar pensionin tim që nga të 30-at. Ndërsa nuk dua të dal në pension, jam financiarisht në gjendje ta bëj këtë nëse zgjedh.

Unë kthehem në SHBA herë pas here për të vizituar miqtë dhe familjen time – marrëdhëniet e mia janë vërtet të rëndësishme për mua – por nuk e shoh veten të kthehem ndonjëherë me kohë të plotë.

Patjetër që doja të largohesha nga SHBA-ja më herët, por besoj se çdo gjë ndodh për një arsye. Nuk do të bëja asgjë ndryshe. Besoj se nuk është kurrë vonë për të filluar udhëtimet ose për t’u zhvendosur në një vend të ri. /Tch/

The post “Mbylla biznesin tim dhe u transferova në Shqipëri”, historia e 55-vjeçares që la Los Anxhelosin për Tiranën appeared first on Telegrafi.

Qindra emigrantë shqiptarë që u nisën për pushime në atdhe, mbetën të bllokuar për orë të tëra në aksin që lidh Artën me Janinën në vendin e quajtur Filipiadha.

Situata ishte e rrezikshme pasi autobusë dhe autovetura u detyruan të ecin mbrapsht në krah të kundërt për më shumë se 1 kilometër në autostradë për të mos rrezikuar jetën e udhëtarëve nga zjarri.

U desh ndërhyrja e zjarrëfikësve të cilët vunë nën kontroll flakët për të bërë të mundur kalimin e sigurtë të autobusëve me udhëtarëve.

Ndërsa situata në zonën e Ahajias në afërsi të patrës mbetet dramatike.

Disa shtëpi janë djegur ndërsa mbetet i bllokuar prej disa orësh aksi që lidh Patrën me Pirgosin. /Tch/

The post  Zjarret në Greqi, qindra emigrantë shqiptarë mbeten të bllokuar në aksin që lidh Artën me Janinën appeared first on Telegrafi.

Deputeti i Partisë Demokratike të Kosovës, Abelard Tahiri ka thënë se rastet tronditëse të pesë vrasjeve të rënda në 48 orët e fundit, pas një serie tjetër të vrasjeve që ndodhën nëpër komuna të ndryshme të Kosovës, janë pasqyra më e qartë e dështimit të plotë të shtetit për të mbrojtur jetën e qytetarëve.

Tahiri, në një konferencë për media, theksoi se Kosova po kalon nëpër një gjendje alarmante të sigurisë, ku po mbretërojnë bandat kriminale të inkurajuara dhe mbrojtura nga pushteti.

“Bandat kriminale, narkotrafikantët, fajdexhitë, janë bërë të guximshëma dhe kanë lidhje të drejtpërdrejta me pushtetin, duke u bërë pjesë e një zinxhiri të rrezikshëm që tashmë ka lidhur krimin me politikën dhe institucione të tjera ligjzbatuese. Partia Demokratike e Kosovës ju shpreh ngushëllime më të thella familjeve që kanë humbur më të dashurit e tyre nga këto vrasje. Në të njëjtën kohë, shprehim shqetësimin e madh, për dështimin e organeve ligjzbatuese për të vendosur rend, rregull dhe të garantojnë sigurinë e qytetarëve tanë”, tha ai.

Tahiri, duke theksuar tri nga rastet që faktojnë lidhjen e bandave kriminale me eksponentë të pushtetit, tha se kjo situatë është një thirrje alarmi për të gjithë.

“15 gusht 2023 – Besnik Mujeci, asamblist i Vetëvendosjes në Prishtinë, arrestohet në Shqipëri për trafikim dhe shitje të narkotikëve. U kap me 11,300 tableta ekstazi MDMA, peshë mbi 5 kilogramë, vlerë rreth 400 mijë euro. 3 qershor 2025 – Një operacion i gjerë antidrogë çon në arrestimin e 22 personave. Mes tyre, Shemsi Bahtiri, anëtar aktiv i Vetëvendosjes në Qendrën e Prishtinës, një nga figurat kyçe të një rrjeti të trafikut të drogës ku u sekuestruan qindra mijëra euro para të gatshme e të falsifikuara, armë, llogari bankare, automjete luksoze dhe lëndë narkotike. 10 gusht 2025 – Gjilani tronditet nga një vrasje e trefishtë. Autori, Mefail Shkodra, i njohur për veprat e shumta penale, shihet i pranishëm në ahengjet e partisë në pushtet”, shtoi deputeti i PDK-së.

Sipas Tahirit, vetëm një qeveri e re, e vendosur, mund ta çkapë shtetin nga krimi, t’i çojë para drejtësisë të gjithë ata që kanë gjak në duar e pasuri nga droga dhe korrupsioni, dhe do ta rikthejë rendin, sigurinë dhe ligjin mbi të gjithë.

“Duhet të jetë misioni i secilit prej nesh, çkapja e shtetit nga bandat kriminale që sot po terrorizojnë shoqërinë tonë. Rritja e numrit  të armëve pa leje në duart e qytetarëve tanë, është e frikshme. Sot, aktualisht kemi rreth 250 mijë armë janë pa leje në vendin tonë.  Si PDK, në legjislaturën e re, pas konsolidimit të institucioneve dhe qeverisë së re, do të iniciojë ndryshimin e Kodit Penal dhe legjislacionit përkatës për të ashpërsuar dënimet për armëmbajtjen pa leje. Kushdo që posedon apo përdorë armë ilegalisht, duhet të përballet me burg, pa përjashtim. Kosova nuk mund të jetë një vend ku jeta njerëzore humb vlerën. Dhe, jo, kjo nuk është vetëm një betejë politike. Është një betejë për jetën, për paqen, për fëmijët tanë dhe për të ardhmen e vendit”, përfundoi Tahiri. /Telegrafi/

The post Tahiri: 5 vrasje në 48 orë – Kosova në krizë sigurie, bandat kriminale të lidhura me pushtetin e kanë kapur shtetin appeared first on Telegrafi.