Nesër, më 1 shtator fillon viti i ri shkollor 2025/2026 në të gjitha shkollat e Kosovës, por problemet e zakonshme që e kanë përcjellë fillimin e vitit arsimor në vitet e kaluara, rrezikojnë të përsëriten sërish veçanërisht për sa i përket mungesës së teksteve shkollore.

Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, në një deklaratë për Telegrafin, ka shprehur shqetësim të thellë për situatën, duke theksuar se problemi më i madh me të cilin mund të përballen nxënësit dhe mësimdhënësit është mungesa e teksteve shkollore.

“Halli më i madh do të jetë tekst shkollore. Kemi frikë se do të përsëritet gjendja e dy viteve të mëparshme, kur ka pasë vonesa me një muaj e më shumë,” ka deklaruar Jasharaj.

Sipas tij, edhe pse përgatitjet teknike për fillimin e vitit shkollor duket të jenë në vijë, problemet themelore si teksti, infrastruktura dhe dialogu me institucionet mbesin të pazgjidhura.

Jasharaj gjithashtu ka sqaruar se SBASHK-u nuk ka planifikuar ndonjë grevë për fillim të vitit shkollor, për shkak të mosfunksionimit të institucioneve shtetërore, veçanërisht pas zgjedhjeve të fundit dhe mungesës së konstituimit të qeverisë.

Lexo po ashtu Shkollat në prag të grevës, SBASHK vendos ultimatum për dialog me MASHTI-n

“Me 20 gusht e mbajtëm takimin konsultativ me Kryesinë dhe me udhëheqësit sindikalë dhe erdhëm në përfundim se në mungesë të institucioneve, pra pa konstituimin e institucioneve, nuk kemi as me kë të dialogojmë e as të bëjmë veprime sindikale, sepse veprimet sindikale bëhen nëse nuk ka dialog. Tash nuk ka dialog, sepse nuk ka me kë SBASHK-u të zhvillojë dialog,” theksoi ai.

Ai shtoi se SBASHK-u do të kërkojë takim me institucionet posa të konstituohen, dhe nëse edhe atëherë nuk ka vullnet për dialog, mund të ndërmerren veprime sindikale.

“Posa të bëhen këto institucione të Kosovës, ne do të provojmë me ta të ulemi të bisedojmë. E në qoftë se ata vazhdojnë ta injorojnë dialogun, atëherë do të kemi edhe veprime sindikale për të cilat vendos Këshilli i Drejtues i SBASHK-ut,” tha Jasharaj për Telegrafin.

Ndërkohë, Ministria e Arsimit ka njoftuar se nga data 15 gusht, mund të aplikohet për subvencionimin e teksteve dhe materialeve mësimore përmes platformës e-Kosova.
Për vitin shkollor 2025/2026, do të ndahen 80 euro për nxënësit nga klasa e parë deri në klasën e pestë për blerjen e teksteve dhe materialeve mësimore, ndërsa me të njëjtën shumë do të subvencionohen nxënësit nga klasa e gjashtë deri në klasën e nëntë për blerjen e fletoreve të punës dhe materialeve mësimore.

Sipas MAShTI-t, brenda gjashtë ditëve të para të hapjes së aplikimit janë pranuar gjithsej 144,337 aplikime përmes platformës e-Kosova dhe deri më tani nuk është pranuar asnjë ankesë nga prindërit.

Ky është viti i tretë radhazi që Ministria e Arsimit aplikon këtë formë të subvencionimit. /Telegrafi/

The post Nesër nis viti shkollor, SBASHK: Grevë s’ka, por vonesa me tekstet shkollore appeared first on Telegrafi.

Një incident i armatosur ka ndodhur të shtunën në mbrëmje në rrugën “Ismet Jashari” në Prizren, ku një person ka mbetur i plagosur si pasojë e të shtënave me armë zjarri.

Sipas Policisë së Kosovës, rreth orës 18:30 është arrestuar një person mashkull kosovar i dyshuar se ka shtënë me armë zjarri në drejtim të një viktime mashkull, duke i shkaktuar lëndime trupore.

Motivet e incidentit mbeten ende të paqarta, ndërsa viktima është dërguar për trajtim mjekësor në Spitalin Rajonal të Prizrenit, ku sipas mjekëve gjendja e tij është stabile dhe jashtë rrezikut për jetë.

Gjatë ekzaminimit të vendit të ngjarjes, njësitet policore kanë konfiskuar një armë zjarri pistoletë e tipit Zoraki, 8 fishekë dhe një gëzhojë, të cilat do të përdoren si dëshmi materiale në procesin hetimor.

Pas pranimit të ndihmës mjekësore dhe intervistimit nga hetuesit, i dyshuari është dërguar në mbajtje, me vendim të Prokurorit të Shtetit.

Rasti është cilësuar si “Lëndim i rëndë trupor” dhe “Armëmbajtje pa leje”, ndërsa hetimet po vazhdojnë për të sqaruar rrethanat e plota të ngjarjes. /Telegrafi/

The post Të shtëna me armë në Prizren – një i plagosur, arrestohet i dyshuari appeared first on Telegrafi.

46 mijë e 15 shtetas të Kosovës nga 46 shtete të ndryshme të botës, janë regjistruar për të votuar përmes postës në zgjedhjet lokale për kryetarë të komunave dhe për kuvende komunale.

Kjo shifër është bërë e ditur pas përfundimit të afatit për regjistrim nga zëdhënësi i KQZ-së, Valmir Elezi, i cili ka thënë për KosovaPress, se të dhënat përfundimtare do të publikohen në javën e parë të muajit shtator, me rastin e certifikimit të listës së votuesve.

“Nga data 23 korrik dhe deri në përfundim të afatit, më 29 gusht, përmes platformës elektronike të KQZ-së janë pranuar 56,778 aplikime për regjistrim për votim me postë, prej të cilave janë aprovuar 46,015, ndërkaq janë refuzuar 10,094 të tjera”, ka thënë Elezi.

Elezi ka sqaruar se në shumicën e rasteve të refuzuara, aplikuesi nuk kanë paraqitur njërin nga dokumentet që dëshmon adresën e tij jashtë Kosovës, duke kujtuar se “procesi i regjistrimit nuk ka qenë përjashtues, pasi çdo aplikues i refuzuar është njoftuar për arsyet e refuzimit dhe për mundësinë e ri-aplikimit duke paraqitur dokumentet e domosdoshme për regjistrim”.

Sipas të dhënave të KQZ-së, komunat me numrin më të madh të votuesve të regjistruar nga jashtë Kosovës, nga mbi 3 mijë sosh, janë: Suhareka (3,458), Gjakova (3,308) dhe Dragashi (3,066).

Ndërkaq, sipas KQZ-së, Gjermania me 21,500 dhe Zvicra me 11,024 janë shtetet me numrin më të madh të votuesve të regjistruar për votim me postë nga jashtë Kosovës.

Elezi ka sqaruar se procedurat specifike për votim përmes postës do të publikohen shumë shpejt nga KQZ, derisa votimi do të fillojë më 17 shtator dhe do të përmbyllet më 11 tetor.

Për dallim nga proceset e kaluara zgjedhore, në këto zgjedhje votuesit e regjistruar do të pranojnë nga KQZ pakon me nga dy fletëvotime, një për zgjedhjet për kryetar komune dhe një tjetër për zgjedhjet për kuvend komunal. Sipas KQZ-së, detyrë e secilit prej votuesve është që pas plotësimit të fletëvotimeve, pakon me fletëvotime ta dërgojnë në ndonjërën nga kutitë postare të KQZ-së që do të hapen në shtete të ndryshme, adresat e të cilave do të publikohen nga KQZ para fillimit të votimit me postë.

KQZ ka sqaruar se shtetasit e Kosovës që janë regjistruar për të votuar nga jashtë Kosovës do ta gjejnë emrin e tyre vetëm në listën e votuesve jashtë Kosovës, pasi do të largohen nga lista e votuesve brenda Kosovës, e cila shpërndahet në vendvotime, në ditën e zgjedhjeve, pasi kështu kërkohet me Ligjin për Zgjedhjet e Përgjithshme.

Ndërkohë, shtetasit e Kosovës që jetojnë jashtë vendit dhe që nuk janë regjistruar për votim me postë, janë në listën e votuesve brenda Kosovës, e cila shpërndahet në vendvotime në ditën e zgjedhjeve. Të dhënat për adresën e Qendrës së Votimit mund të shikohen këtu: https://qv.kqz-ks.org . /KP/

The post Elezi: Mbi 46 mijë shtetas nga diaspora u regjistruan për votim me postë appeared first on Telegrafi.

Dy incidente të ndara me zjarr janë regjistruar të shtunën në komunat e Kamenicës dhe Shtimes, duke shkaktuar dëme materiale dhe lëndime në njerëz.

Sipas raportit të policisë, rasti i parë është shënuar në Kamenicë rreth orës 11:10, kur një qytetar ka njoftuar se një furgon me mall i parkuar afër një qendre tregtare është përfshirë nga zjarri.

Shkaqet e shpërthimit të zjarrit mbeten të panjohura.

Në vendin e ngjarjes kanë dalë njësitet e zjarrfikësve, të cilët kanë arritur ta lokalizojnë zjarrin dhe të parandalojnë përhapjen e mëtejshme të tij.

Ndërkohë, një incident më i rëndë është raportuar në Shtime rreth orës 14:20.

Si pasojë e zjarrit të shpërthyer në rrethana të panjohura, 10 persona janë asfiksuar prej të cilëve tre kanë vazhduar trajtimin mjekësor në Qendrën Emergjente në Ferizaj.

Përveç dëmeve në shëndet, zjarri ka shkaktuar edhe djegien e dy veturave dhe disa mjeteve pune, të cilat ishin pronë e dy qytetarëve kosovarë.

Dëmet materiale konsiderohen të konsiderueshme.

Lidhur me rastin në Shtime, është informuar prokurori i shtetit, ndërsa hetimet janë në zhvillim për të përcaktuar shkaqet e zjarrit dhe përgjegjësit e mundshëm. /Telegrafi/

The post Zjarre në Kamenicë dhe Shtime – flakët përfshijnë automjete, 10 persona asfiksohen appeared first on Telegrafi.

Ish-kryenegociatorja për dialogun me Serbinë, Edita Tahiri ka reaguar ashpër ndaj zhvillimeve të fundit politike, duke kritikuar kryeministrin në detyrë Albin Kurti dhe partinë në pushtet Lëvizjen Vetëvendosje, për siç thotë ajo shkeljen flagrante të Kushtetutës.

Përmes një postimi në rrjete sociale, Tahiri deklaroi se Kosova është futur në librin e Ginisit si shembull i shkeljes së kushtetutës nga vetë pushteti, duke e konsideruar këtë si një akt të rëndë që do të mbetet në histori.

“Kosovën e dështuan – vet hynë në librin e Ginisit si shkelës të Kushtetutës. Kurti e VV, një ditë do të ndjehen të turpëruar për këtë gabim historik,” ka shkruar ajo.

Deklarata e Tahirit vjen në një kohë kur vendi po përballet me krizë institucionale, pasi seanca konstituive e Kuvendit është ndërprerë pa zgjedhjen e plotë të Kryesisë, gjë që opozita e ka cilësuar si antikushtetuese. /Telegrafi/

The post Tahiri: Kurti dhe VV e futën Kosovën në librin e Guinness – një ditë do të ndjehen të turpëruar për këtë gabim historik appeared first on Telegrafi.

Në episodin e radhës të podcastit për të drejtat pronësore në Telegrafi, me redaktoren Jehona Hulaj, i ftuar ishte Avokati i Popullit, Naim Qelaj, i cili foli për sfidat që lidhen me të drejtat pronësore në Kosovë, duke nisur nga padrejtësitë historike e deri te zvarritjet burokratike e gjyqësore që pengojnë qytetarët në realizimin e të drejtave të tyre themelore.

Qelaj theksoi se Kosova ende nuk e ka përfunduar procesin e rikthimit të pronave dhe shtoi se të gjitha vendet e rajonit e kanë kryer këtë proces, përveç Kosovës.

Ai paralajmëroi se së shpejti do të dalë me një raport të hollësishëm për këtë çështje, si pjesë e hetimeve të nisura nga institucioni që ai drejton.

Sipas tij, privatizimi i tokave pa adresuar të drejtën e pronarëve të mëparshëm ka sjellë pasoja të mëdha.

“Thuaja që të gjitha fondet e tokave janë privatizu pa u kry procesi i kompensimit apo kthimit. Kjo barrë tash bie mbi buxhetin e shtetit”, tha Qelaj, duke e cilësuar këtë si padrejtësi të thellë historike që duhet të adresohet me urgjencë.

Ai shtoi se një tjetër problem i madh është informaliteti në pronësi.

“Një numër i madh i pronave janë ende të regjistruara në emër të personave të vdekur, apo të familjarëve që nuk janë pronarë të vërtetë, duke sjellë paqartësi dhe konflikte të shumta gjyqësore”, u shpreh Avokati i Popullit.

Në lidhje me barazinë gjinore në pronësi, Qelaj tha se sot vetëm rreth 20 për qind e pronave janë të regjistruara në emër të grave, ndërsa 80 për qind në emër të burrave, edhe pse ligji garanton barazi.

Ai shtoi se “si shoqëri vazhdojmë të jemi pak patriarkale në këtë aspekt”, dhe vuri në pah ndikimin e normave zakonore në këto praktika: “Ndikimi që kanë këto norma zakonore shpeshherë është aq i fuqishëm sa ndoshta ia kalon edhe ligjit”.

Avokati i Popullit foli në detaje edhe për problemet në procesin e trashëgimisë, ku shpesh gratë, veçanërisht vajzat, përjashtohen.

“Vetë inicimi i procedurës së trashëgimisë ka nisë me deklaratë të njërit prej trashëgimtarëve dhe dy dëshmitarëve. Kjo ka sjellë shpeshherë përjashtimin e trashëgimtarëve tjerë, zakonisht të vajzave të cilat nuk janë ftuar as të deklarohen për të drejtën e tyre”, tha Qelaj në podcastin për të drejtat pronësore në Telegrafi.

Ai tha se po punohet për ndryshime në Kodin Civil që do të rregullojnë këtë proces, përfshirë mbikëqyrje institucionale dhe sistem elektronik të lidhjeve familjare, për të siguruar se të gjithë trashëgimtarët përfshihen në procedura.

Sa i përket efikasitetit të gjykatave në çështjen pronësore, Qelaj u shpreh i shqetësuar për zvarritjet e zgjidhjes së këtyre çështjeve.

“Në një analizë të mëhershme të Avokatit të Popullit, ka rezultuar se përfundimi i një procesi civil pronësor mund të zgjasë mesatarisht deri në tetë vjet. Kjo është e papranueshme”, tha ai.

Qelaj solli shembuj konkretë nga puna e institucionit, ku ndërhyrja e Avokatit të Popullit ka ndikuar në zgjidhjen e rasteve të zvarritura.

“Ka raste të vitit 2015 që kanë mbi dhjetë vjet pa asnjë veprim procedural, dhe pastaj gjykata shpallet e pa kompetencë. Kjo është e papranueshme”, u shpreh Qelaj.

Një tjetër fushë problematike janë shpronësimet, sidomos në rastet e ndërtimit të infrastrukturës. Avokati i Popullit u shpreh se Ligji për shpronësimet në Kosovë është shumë i qartë, por në shumë raste nuk respektohet.

“Vendimet për shpronësim nuk kanë shpjeguar saktësisht qëllimin legjitim të shpronësimit, dhe kjo ka sjellë pasiguri për qytetarët”, deklaroi Qelaj.

Ai përmendi rastin e shpronësimeve në komunat në veri të vendit, ku qytetarët serbë kanë paraqitur ankesa, duke pohuar se Qeveria nuk ka sqaruar qëllimin e vërtetë të shpronësimeve, të cilat më vonë u tha se ishin për “arsye sigurie”.

Qelaj diskutoi edhe situatat e ndërlikuara pronësore që janë trashëguar nga e kaluara, përfshirë rastet kur banorët kanë ndërtuar me dekada mbi prona publike ose komunale.

“Lagjet tona në Kosovë janë të ndërtuara në prona publike. Banorët kanë dokumente që paguajnë energjinë, tatimin, kanë dëshmitarë. Por mungesa e bazës ligjore e vë gjyqtarin në pozitë që të refuzojë kërkesën për pronësi – edhe pse e di që është e drejtë. Dhe këto janë ato raste kur e drejta dhe drejtësia nuk shkojnë bashkë”, theksoi Qelaj.

Avokati i Popullit përmendi edhe ankesat e qytetarëve nga zonat kufitare me Maqedoninë e Veriut, të cilët pas rishikimit të vijës kufitare, kanë mbetur me prona të ndara mes dy shteteve.

“Ka raste kur gjysma e tokës është në Kosovë dhe gjysma tjetër në Maqedoni. Në sistemin kosovar janë të regjistruar si pronarë të gjithë ngastrës, por kur kërkojnë dokumente në Maqedoni, del që ajo pjesë është shpronësuar dhe ka kaluar në pronësi shtetërore. Kemi kërkuar zgjidhje dhe informim për qytetarët, por ende nuk ka përparim”, shtoi ndër të tjera Qelaj.

Qelaj theksoi se ndonëse institucionet publike përgjigjen në shumicën dërrmuese të rasteve ndaj rekomandimeve të Avokatit të Popullit, zbatimi real brenda një viti mbetet rreth 30%.

“Zbatimi kalon mbi 50% nëse llogaritet përtej një viti. Megjithatë, ne nuk caktojmë afate fikse, sepse çdo rast ka kompleksitetin e vet, por presim që institucionet të fillojnë procedurat dhe të dëshmojnë seriozitet”, tha ai. /Telegrafi/

Ky publikim është prodhuar nga Telegrafi në kuadër të projektit PIAKOS, zbatuar nga ATRC dhe financuar nga Banka Botërore – Fondi për Paqe dhe Shtet-Ndërtim. Përmbajtja e këtij publikimi është përgjegjësi e vetme e ATRC-së dhe nuk pasqyron domosdoshmërisht pikëpamjet e Bankës Botërore, Fondit për Paqe dhe Shtet-Ndërtimin, apo Telegrafit.

The post Avokati i Popullit: 80% e pronave në Kosovë janë në emër të burrave – barazia gjinore mbetet ende sfidë appeared first on Telegrafi.

Deputeti serb, Igor Simiq i shoqëruar nga kolegët e tij ka folur pas përfundimit të seancës së sotme të Kuvendit, ku dështoi të zgjidhet nënkryetari nga komuniteti serb.

Simiq para mediave u shpreh se po shkelet rendi kushtetues dhe të drejtat e serbëve.

“Është ndërprerë seanca siç e dini, arsyeja është se po shkelen të drejtat e popullit serb, ata janë të vetëdijshëm çfarë po bëjnë. Seancën e kaluar e kam informuar kryeparlamentarin për shkeljet Kushtetuese. Shkelja kryesore është se kandidati për nënkryetar duhet ta ketë shumicën e deputetëve serbë, e ky është Slavko Simiq. Po shkelen të drejtat dhe këtë po e bënë partia në pushtet – ajo e Albin Kurtit”, ka thënë Simiq, ndërkaq ka paralajmëruar se Lista Serbe do t’i drejtohet Gjykatës Kushtetuese.

Lexo po ashtu Vetëm 56 vota për Nenad Rashiqin – dështon zgjedhja e nënkryetarit nga komuniteti serb

Ai ka shtuar se deputeti serb Nenad Rashiqi nuk e ka mbështetjen e serbëve, pasi sipas Simiqit ai ka marrë pesë herë më pak vota se Slavko Simiq.

“Për fat të keq nuk po respektohen të drejtat e popullit serb, dhe Lista Serbe do të ankohen sepse janë shkelur të drejtat dhe i bëjë thirrje partive tjera shqiptare dhe atyre jo shqiptare që të mos votojnë”, tha Igor Simiq.

Ai shtoi se kandidati i listës serbe Slavko Simiq është propozuar sipas ligjeve të parapara dhe kryeparlamentari e ka refuzuar. /Telegrafi/

The post Lista Serbe paralajmëron se do t’i drejtohet Kushtetueses, Simiq: Po shkelen të drejtat, Rashiq nuk e ka mbështetjen e serbëve appeared first on Telegrafi.

Antikushtetuese dhe në shpërputhje me aktgjykimin e fundit të këtij institucioni po konsiderohet vendimi që përmes procedurës së ndarë të votimit të zgjidhen nënkryetarët e Kuvendit të Kosovës nga komunitetet jo shumicë.

Avokatë dhe pjesëtarë të shoqërisë civile thonë se deputeti nga komuniteti serb, Nenad Rashiq nuk ka të drejtë dhe nuk mund të propozohet për nënkryetar të legjislativit nëse nuk propozohet nga shumica e deputetëve të komunitetit serb, rrjedhimisht Listës Serbe.

Madje, kërkohet që edhe procesi i votimit të nënkryetares nga komunitetet joserbe, Emilja Rexhepi të përsëritet pasi sipas tyre, votimi i dy nënkryetarëve nga komunitetet joshumicë duhet të bëhet në pako. Në të kundërtën, të njëjtit theksojnë se nëse ky rast dërgohet në Gjykatë Kushtetuese e njëjta do të shpallë se zgjedhja e tyre ka qenë jokushtetuese.

Kuvendi i Kosovës, të martën zgjodhi Dimal Bashën kryeparlamentar si dhe katër nënkryetarë, mirëpo dështoi të zgjedhë nënkryetarin nga komuniteti serb, rrjedhimisht dështoi të zgjidhet kryesia që do të konstituonte legjislaturën e nëntë.

Vendimi i kryetarit të Kuvendit, Dimal Basha që përmes shortit të zgjidhen emrat e deputetëve nga komuniteti serb dhe të hidhen në votim për nënkryetar të Kuvendit vlerësohet se është devijim nga Rregullorja e Kuvendit, pasi Lista Serbe kishte propozim për nënkryetar dhe se i njëjti do të vlente nëse s’ka propozim për nënkryetar.

Avokati, Ardian Bajraktari, thotë për KosovaPress se zgjedhja e nënkryetarëve të Kuvendit të Kosovës nga radhët e komuniteteve joshumicë duhet të bëhet në pako, sikurse ka ndodhur në praktikat e kaluara parlamentare.

Sipas tij, edhe propozimi për nënkryetar nga komuniteti serb në Kuvend duhet të vijë nga shumica e deputetëve që përfaqësojnë atë komunitet, në rastin konkret Lista Serbe.

Prandaj, Bajraktari thotë se deputeti nga komuniteti serb në Kuvend, Nenad Rashiq nuk mund të propozojë vetën, mirëpo një gjë e tillë duhet të vijë nga Lista Serbe.

“Tentativa për të devijuar nga praktika e deritashme është në shpërputhje me aktgjykimin e Gjykatës Kushtetuese, me theks të veçantë aktgjykimin e fundit, sipas të cilit në pikën njëqind e pesëdhjetë e gjashtë obligohen deputetët që sa më parë që të jetë e mundur, por jo më vonë se tridhjetë ditë nga publikimi i aktgjykimit të zgjedhin kryetarin dhe anëtarët e Kryesisë. Ndër të tjera në pajtim me praktikën e deriatëhershme parlamentare, e cila natyrisht që nënkupton që nënkryetarët të zgjidhen në dy pako, fillimisht anëtarët e Kryesisë, përkatësisht nënkryetarët nga radhët e komunitetit shumicë dhe pastaj anëtarët e Kryesisë nga radhët e dyja komuniteteve, përkatësisht komunitetit serb dhe komuniteteve të tjera. Tentativa për të devijuar, përkatësisht për ta ndryshuar krahët e praktikash, është në shpërputhje me aktgjykimin dhe rrjedhimisht edhe në shpërputhje me Kushtetutën.  Për më tepër, synimi i kujtdo qoftë për të propozuar ose për të zgjedhur dikë, i cili nuk përfaqëson shumicën e komunitetit brenda vendit, në bindjen time është në shpërputhje edhe me vetë parimet mbi bazën e të cilave është ndërtuar dhe funksionon vendi ynë sipas parimeve kushtetuese. Për më tepër është edhe në kundërshtim me vetë Rregulloren e punës së Kuvendit për faktin se neni dymbëdhjetë paragrafi gjashtë e përcakton qartazi që përfaqësuesit, përkatësisht anëtari i Kryesisë nga radhët, në këtë rast të komunitetit serb, propozohet nga shumica e deputetëve që e përfaqësojnë komunitetin në fjalë”, thekson ai.

E, Gëzim Shala nga Instituti i Kosovës për Drejtësi, thotë për KosovaPress se votimi i ndarë për zgjedhjen e nënkryetarëve të Kuvendit nga komunitetet joshumicë është shkelje e Kushtetutës, Rregullores së Kuvendit, aktgjykimit të Gjykatës Kushtetuese si dhe praktikave të deritanishme parlamentare.

Ai thekson se nëse Kuvendi voton të enjten Rashiqin për nënkryetar, rasti shumë lehtë mund të shkojë në Gjykatë Kushtetuese dhe e njëjta të konstatojë se zgjedhja e dy nënkryetarëve nga komunitetet joshumicë ka qenë jokushtetuese.

“Në rastin konkret kishim të bëjmë me shkelje të Kushtetutës, Rregullores së Kuvendit, aktgjykimit të Gjykatës Kushtetuese dhe praktikës së tanishme parlamentare. Kjo situatë tani tregon se kemi një skenar të ri për bllokimin e Kuvendit të Kosovës… Procesi i votimit duhet të jetë në pako, meqenëse këto dy aspekte nuk janë përmbushur, në rastin konkret i bie se edhe zgjedhja e zonjës Rexhepi ka qenë në kundërshtim me Kushtetutën dhe kemi të bëjmë me shkelje të dyfishtë të Kushtetutës, si në përzgjedhjen e zonjës Rexhepi nga komuniteti joserb, e po ashtu edhe mohimin e së drejtës së komunitetit serb për t’u përfaqësuar në Kryesinë e Kuvendit… Nëse ky rast shkon në Gjykatën Kushtetuese, bazuar në Kushtetutë dhe praktikën e deritanishme parlamentare ka pritje të arsyeshme se ky vendim dhe kjo mënyrë e zgjedhjes së nënkryetarëve do të konstatohet si kundërkushtetuese nga Gjykata Kushtetuese”, thekson ai.

Kuvendi i Kosovës nesër do të vazhdojë përpjekjen e 59 për konstituim të Kuvendit të Kosovës. Të zgjedhurit e popullit pritet të vazhdojnë seancën konstituive në pikën e zgjedhjes së nënkryetarit nga radhët e komunitetit serb, pasi kryetari i Kuvendit dhe katër nga nënkryetarët janë zgjedhur pas bllokadës gjashtë mujore në Kuvend.

Zhbllokimi i situatës erdhi vetëm pasi disa prej deputetëve të PDK-së dhe AAK-së votuan për zgjedhjen e deputetit të LVV-së, Dimal Basha si kryetar të Kuvendit, pasi i njëjti nuk ishte pjesë e kabinetit qeveritar në detyrë. /KP/

The post ​Kushtetutshmëria në pikëpyetje, propozimi i Rashiq dhe votimi për Rexhepin kontestohen appeared first on Telegrafi.

Një deponi e veturave në Hajvali është përfshirë nga zjarri.

Rasti ka ndodhur rreth orës 11:30, dhe si pasojë e zjarrit janë dëmtuar disa vetura.

Lajmin për Telegrafin e ka konfirmuar zëdhënësja e policisë për rajonin e Prishtinës, Flora Ahmeti.

“Rreth orës 11:30, është raportuar për një incident zjarri në Hajvali, ku në një autoservis janë përfshirë nga zjarri disa vetura. Policia menjëherë ka dalë në vendin e ngjarjes, po ashtu janë ftuar edhe zjarrfikësit të cilët kanë arritur lokalizimin e zjarrit”, ka thënë Ahmeti.

Ajo ka shtuar se nuk raportohet për persona të lënduar.

“Aktualisht po vijon puna hetimore për sqarimin e plotë të rrethanave që karakterizojnë ngjarjen”, tha Ahmeti.

Ndërkaq drejtori i zjarrfikësve, Malë Gashi tha se ata informatën e pranuan rreth orës 11:45 dhe se fillimisht u ishte thënë se janë duke u djegur mbeturina dhe se dyshohej për një veturë të përfshirë nga zjarri.

“Ekipet menjëherë kanë dalë në vendin e ngjarjes, dhe kanë parë që ishte përfshirë nga zjarri deponi e veturave dhe materialeve të ndryshme (vetura, hekrari dhe material të ndryshme). Zjarri është lokalizuar”, tha Gashi.

E Drejtoria për Siguri dhe Emergjenca ka njoftuar se falë reagimit të shpejtë dhe koordimit të mirë mes ekipeve në terren, flakët janë lokalizuar dhe është parandaluar përhapja e mëtejshme e zjarrit në zonat përreth.

“Deri më tani nuk raportohet për të lënduar, ndërsa dëmet materiale janë të konsiderueshme. Autoritetet kanë nisur hetimet për të zbuluar shkakun e zjarrit, ndërsa banorët pranë zonës janë këshilluar të shmangin lëvizjen në afërsi për shkak të tymit të dendur dhe rrezikut të mbetjeve të djegura”, thuhet në njoftim. /Telegrafi/

The post Zjarr në Hajvali – përfshihet nga flakët një deponi e veturave, s’raportohet për të lënduar appeared first on Telegrafi.

“Nuk do të lëmë gur të shtratit ligjor të kësaj republike për të vendosur përpara përgjegjësisë publike dhe institucionale çdo prokuror apo gjykatës që do të sulmojë haptazi shtetin dhe interesin publik në proces me zjarrvënës, zaptues apo gllabërues të të mirave dhe pasurive publike të këtij vendi”.

Këtë paralajmërim lëshoi kryeministri Edi Rama në fjalën e tij gjatë ceremonisë së Mirënjohjes Kombëtare, ku do të jepen medalje dhe shpërblime për të gjitha forcat e angazhuara në operacionet ndaj zjarreve që prekën vendin.

Në fjalën e tij kreu i qeverisë tha se i ka kërkuar ministrit të Drejtësisë, Ulsi Manja që të përcjellë pranë organeve drejtuese të gjyqësorit ankesat që ai ka shprehur për gjyqtarët e përmendur së fundmi.

“Kronika e zjarreve të kësaj vere do vazhdojë të rrëfehet gjatë, rreth mijë forca mbeten të gatshme kundër përbindëshit të flakëve që rriten çdo vit, duke ushqyer rreth e rrotull Mesdheut me temperatura në kapërcime të vazhdueshme historike që po që mbijnë nga duart e mendjeve kriminale, që fatkeqësisht gjejnë rrallë aleat në radhët e gjykatësve të këtij vendi. Teksa mijëra njerëz me uniformë derdhin pa kursim energjitë e tyre në një përkushtim që shkon deri në vetëmohim, në një luftë sfilitëse me zjarret. Dhe mijëra hektarë përpiqen nga goja e flakëve, disa personave që nuk iu dihen emrat e nuk iu njihet fytyra me ndjeshmëri njerëzore zero, dhe integritet moral zero me xhufkë, në ajër të kondicionuar mbuluar me tyrbën e zezë të gjykatësit përqeshin sakrificat dhe shkelin me të 4 këmbët interesat e vendit, duke dhënë vendime të ububushme jo në mbrojte të republikës, por në favor të zjarrvënësve. I kam kërkuar ministrit të Drejtësisë t’i përcjellë organet e qeverisjes së gjyqësorit rastet e mësipërme. Nuk janë shumë por mjaft për të vënë duar në kokë. Nuk do të lëmë gur të shtratit ligjor të kësaj republike për të vendosur përpara përgjegjësisë publike dhe institucionale çdo prokuror apo gjykatës që do të sulmojë haptazi shtetin dhe interesin publik në proces me zjarrvënës, zaptues apo gllabërues të të mirave dhe pasurive publike të këtij vendi. Nuk do të kursejmë çdo mbështetje institucionale për prokurorët e gjykatësit që i shërbejnë misionit kombëtar të Shqipërisë në BE, duke luftuar korrupsionin dhe krimin e organizuar dhe duke qëndruar në mbrojtje të interesit publik“, tha Rama.

Ai vlerësoi punën e forcave zjarrfikëse që u përballën me zjarret në vend dhe përmendi komisarin Agim Troci që u plagos duke luftuar me flakët në Delvinë më 25 korrik. Sipas tij situata me zjarret ishte një kronike e gjatë ethesh dhe dramatike, ndërsa shtoi se heroizmi që treguan zjarrfikësit nderuan shtetin dhe republikën. /A2CNN/

The post Rama: Nuk do të lëmë pa vënë para përgjegjësisë gjyqtarët që sulmojnë shtetin appeared first on Telegrafi.

Komisioni Qendror i Zgjedhjeve në mbledhjen e sotme mori disa vendime për decertifikim të kandidatëve që më herët ishin certifikuar nga KQZ dhe zëvendësimin e tyre me kandidatë të tjerë, raporton KosovaPress.

Partitë që kishin rekomanduar në KQZ, decertifikim të subjekteve politike ishin Lëvizja Vetëvendosje, Lidhja Demokratike e Kosovës, Alternativa, Lista Guxo, Bashkimi Demokratik, Kosovski Savez dhe Koalicioni Vakat.

Valmira Selmani nga Zyra për Regjistrim, Certifikim dhe Kontrollim Financiar të Subjekteve Politike tha se kanë shqyrtuar të gjitha dokumentacionet e kandidatëve dhe ka hapur mundësinë për rirenditje të listave.

“Pas pranimit të kërkesave, Zyra ka shqyrtuar dokumentacionin e tyre dhe ka hapur mundësinë për rirenditje të listave, po ashtu edhe zëvendësimin e kandidatëve nga partitë politike të cilat kanë pasur për rirenditje të kandidatëve të subjekteve politike. Andaj duke u bazuar në nenin 29 të zgjedhjeve të përgjithshme Zyra po rekomandon certifikimin e kandidatëve të partive politike. Nga partia politike Lëvizje Vetëvendosje në komunat: Hani i Elezit, Novobërdë, ndërsa në Mitrovicë të Veriut është kandidati për certifikim… Partia e radhës është Lidhja Demokratike e Kosovës, në komunë Mitrovicë e Jugut dhe Prizrenit”, tha ai.

Në këtë mbledhje kryesuesi i Komisionit Qendror të Zgjedhjeve, Kreshnik Radoniqi njoftoi se KQZ ka pranuar dy ftesa për pjesëmarrje.

Njëra në punëtorinë rajonale të ODIHR me temën “Ruajtja e Integritetit Zgjedhor në Ballkanin Perëndimor – Forcimi i Mbikëqyrjes dhe Rritja e Besueshmërisë e cila do të mbahet në Varshavë, nga 16 deri më 17 shtator 2025), si dhe u miratua pjesëmarrja e KQZ-së në Programin e Vizitorëve për Zgjedhjet e Këshillave të Qeverisjes Lokale 2025 në Tallinn, Estoni, 17–20 tetor 2025. /KP/

The post ​KQZ decertifikoi dhe certifikoi disa kandidatë për asamble komunale appeared first on Telegrafi.

Deputeti i Kuvendit të Kosovës nga radhët e Partia Guxo, Haxhi Avdyli ka thënë se është akt puro sabotimi i integritetit dhe sovranitetit të vendit, barazimi i deputetit serb Nenad Rashiq me Slavko Simiq nga Lista Serbe.

Avdyli në një postim në Facebook, ka shkruar se Rashiq njeh Kosovën si shtet ndërkaq Simiq jo.

“Tentimi i turpshëm i barazimit të Rashiqit me Simiqin e Srspkës, është një akt puro sabotimi që i bëhet integritetit, sovranitetit dhe ligjshmërisë në vendin tonë. Po, dytë janë Serb, me emër e mbiemër. Por njëri njeh Kosovën shtet , dhe ka punuar qe 20 vite si çdo pjesëtar i pakicës në institucionet tona dhe për shtetin tonë. E ata tjerët, a i njihni? Ju eksponent të opozitës, që po barazoni këta dy, ku keni jetuar deri tash pash zotin?”, ka shkruar Avdyli.

Deputeti tutje është shprehur se përse duhet të përkrahet Simiq që është masha e Vuçiqit.

“Po, pse kaq pak e doni vendin tuaj? Pse ia keni marr inati vendit tuaj? Çka ju ka bë Kosova keq, përveç që ju dha bukë, e shtëpi e ju rriti? Pse duhet të përkrahni Simiqin, mashën e Vuçiqit, lider i terroristëve të veshur me petkun e politikanit. A mbani mend barrikadat? A mbani mend dëbimin e shqiptarëve nga veriu? A mbani mend kontrabandistët, e bandat terrorizuese? A mbani mend sa Kosovë e sa Serbi ishte veriu? Kush i udhëhoqi krejt trazirat, e krejt këqijat që ndodhën këtij vendi?”, ka pyetur deputeti Avdyli.

Ai shtoi se fajtor i krejt këtyre ishte Lista Serbe dhe tutorët e tyre në Beograd.

“Nëse ju ka rrok amnezia po ju tregoj ishte SRPSKA dhe tutorët e tyre në Beograd. Nesër, kur të paloheni si LDK e të abstenoni si PDK, mendoni edhe për Enver Zymberin e Afrim Bunjakun. Mendoni pak edhe për jetimët, fëmijët e heronjve, që mbetën jetimë, vetëm nga veprimet e Simiqave e Radojqiqave. Nesër me heshtjen tuaj do ia zgjatni jetën sponsorëve të vrasësve, dhe krahut politik të terroristeve në veri….Ose do kaloni në anën e shtetit tuaj. Ndoshta”, ka shkruar Avdyli. /Telegrafi/

The post “Mendoni për Enver Zymberin e Afrim Bunjakun”, Avdyli thotë se barazimi i Rashiqit me Simiqin është rrezik për sovranitetin appeared first on Telegrafi.

Kuvendi i Kosovës nuk ka arritur të konstituohet krejtësisht, pasi që ngërçi vazhdoi me zgjedhjen e nënkryetarit nga komuniteti serb.

Pas kësaj kryetari i LDK-së, Lumir Abdixhiku pati kritika për PDK-në dhe AAK-në që votuan për zgjedhjen e Dimal Bashës në krye të Kuvendit.

“Është shumë e qartë dallimi vleror që kemi ne me ta edhe sa i përket respektimit të Kushtetutës dhe përmbajtës së njerëzve që ne besojmë që duhet tu prijnë institucioneve të Kosovës. Ky dallim kristal i qartë sot u kurorëzua me triumf të injorancës, zërit përqarës e ndarës. Shpresoj që votuesit e partisë së parë sot ndjehen të përfaqësuar. E ndjej si gabim trashanik votën e dy partive tjera të ish opozitës PDK e AAK që institucioneve të Kosovës të u japin një emër të tillë. Megjithatë ky është vullnet 73 deputetëve shumicës, LDK e respekton këtë vullnet sepse është parti institucionaliste por s’mund të jetë e lumtur me kualitetin e njerëzve që përfaqësojnë këto institucione”, tha Abdixhiku.

Lexo po ashtu Pas gjashtë muajve të ngërçit politik, Dimal Basha në krye të Kuvendit të Kosovës

Sa i përket moszgjedhjes së nënkryetarit nga komuniteti serb, Abdixhiku u shpreh se po futemi në një krizë tjetër.

“Besoj se do të futemi në një krizë tjetër të interpretimit të Gjykatës Kushtetuese sa i përket vendeve të pakicave në Republikën e Kosovës, në radhë të parë pakicës serbe e cila duhet të ketë qartësi sa i përket të drejtë për propozim. Ajo çka është fatkeq është që Kosova me institucionet e saj të mos mbetet peng i vullnetit të Beogradit. Ne s’marrim pjesë në votime në procedura që s’i konsiderojmë si Kushtetuese në radhë të parë dhe për këtë arsye mbajmë qëndrim parimor”, tha Abdixhiku. /Telegrafi/

The post Abdixhiku: Vota për Bashën nga PDK e AAK, gabim trashanik – Kosova po hyn në krizë tjetër appeared first on Telegrafi.

I propozuari i Listës Serbe për nënkryetar, Slavko Simiq nuk ka arritur të zgjidhet.

Për Simiqin votuan vetëm 10 deputetë, 55 ishin kundër dhe 23 abstenime.

Deputetët e LVV-së votuan kundër, kurse deputetët e PDK-së abstenuan.

LDK dhe AAK nuk morën fare pjesë në votim.

Lista Serbe propozoi sërish deputetin Simiq për nënkryetar. Edhe në raundin e dytë të votimit ai nuk mori votat e duhura.

Ai mori sërish vetëm 10 vota për, 56 kundër dhe 21 abstenime.

Ndërkaq Emilija Rexhepi nga komunitetet joshumicë jo serbe, arriti të zgjidhet duke marrë 73 vota për, 1 kundër dhe 23 abstenime. /Telegrafi/

The post Slavko Simiq nga Lista Serbe nuk arrin të zgjidhet nënkryetar i Kuvendit appeared first on Telegrafi.

Kuvendi i Kosovës i është kthyer normalitetit pas gati shtatë muajsh ngërç politik. Në seancën e 58-të të mbajtur sot (e martë) Kuvendi zgjodhi si kryetar deputetin Dimal Basha.

Pas zgjedhjes së Bashës, Kuvendi zgjodhi edhe tre nënkryetarë nga radhët e partive kryesore. Nga LVV u zgjodh Albulena Hahxhiu, nga PDK Vlora Çitaku dhe nga LDK, Kujtim Shala.

Lexo po ashtu LVV, PDK dhe LDK propozojnë nënkryetarët për Kuvend të Kosovës

Pas kësaj radha ishte për zgjedhjen e nënkryetarëve nga komunitetet.

Elbert Krasniqi nga komunitetet pakicë propozoi tre emra me rotacion për pozitën e nënkryetarit.

“Propozojmë Emilja Rexhepi nga data 26.8.25 deri 26.12.26, Fidan Jilta 26.12.26 deri 26.06.27 dhe Artan Asllani nga 26.06.27 deri në përfundim të mandatit”, tha Krasniqi.

Krasniqi kërkoi që votimi për nënkryetarin nga komunitetet jo shumicë, në këtë rast serbët të bëhet ndaras.

Mirëpo Lista Serbe nuk e pranoj një gjë të tillë. Deputeti Igor Simiq kërkoi që edhe votimi për nënkryetarët nga komunitetet të bëhet në pako.

Ata propozuan emrin e Sllavko Simiq për nënkryetar.

Megjithatë në foltore ka marrë fjalën edhe deputeti i vetëm serb që nuk i takoj këtij grupi, Nenad Rashiq që e propozoi emrin e vet për nënkryetar.

Ndërkaq kryetari i Kuvendit, Dimal Basha kërkoi që votimi të bëhet veç e veç. /Telegrafi/

The post Votim jo në pako për nënkryetarët nga komunitetet jo-shumicë, Lista Serbe kundërshton appeared first on Telegrafi.

Deputetja e Partisë Demokratike të Kosovës (PDK), Ganimete Musliu, ka sqaruar arsyet pse ka refuzuar të japë votën e saj për Dimal Bashën si kryetar të Kuvendit të Kosovës.

Në një reagim publik, Musliu është shprehur qartë se zgjedhja e Bashës është e papranueshme për të, duke e cilësuar atë si figurë përçarëse.

“I thashë JO Dimal Bashës. Nuk mund të votoj për Kryetar të Kuvendit një person që karrierën politike e ka ndërtuar, jo mbi vizionin e unitetin, por mbi urrejtje dhe përçarje,” ka shkruar Musliu.

Ajo theksoi se refuzimi i saj nuk ishte personal por i bazuar në parim, duke e konsideruar Bashën si një figurë që ka treguar përçmim ndaj vlerave që ajo përfaqëson.

“Si qytetare dhe si deputete, nuk mund të pranoj që në një nga pozitat më të larta shtetërore të ulet dikush që hapur ka treguar përçmim ndaj Ushtrisë Çlirimtare, ndaj Drenicës, ndaj PDK-së dhe ndaj figurës së Hashim Thaçit,” ka theksuar ajo.

Lexo po ashtu Dimal Basha zgjidhet kryetar i Kuvendit, mori vota edhe nga PDK

Musliu shtoi se një votë për Bashën do të ishte tradhti ndaj votuesve të saj, të cilët i kanë dhënë besim që prej më shumë se një dekade e gjysmë.

“Vota për një përçarës si Dimal Basha do të quhej tradhti ndaj besimit të mbi 31.000 votuesve të cilët i kanë besuar fjalës time për më shumë se 16-të vjet,” shkroi ajo.

Musliu tha se vendi ka nevojë për udhëheqës që bashkojnë dhe respektojnë historinë.

“Ne kemi nevojë për udhëheqës që bashkojnë, jo që përçajnë e përçmojnë. Ne kemi nevojë për liderë që respektojnë historinë, jo që e shkelin atë për interesa personale apo politike. Ne kemi nevojë për dinjitet! Ky nuk është inat – ËSHTË PARIM”, ka shkruar deputetja Musliu.

Zgjedhja e Dimal Bashës për kryetar të Kuvendit u bë me 73 vota për, përfshirë edhe disa deputetë nga PDK e AAK. /Telegrafi/

The post Ganimete Musliu: I thashë JO Dimal Bashës, nuk mund të votoj për një përçarës appeared first on Telegrafi.

Deputeti i PDK-së, Jakup Nura ka thënë se është fyerje për votuesit në Kosovë që Dimal Basha të jetë në krye të Kuvendit.

Ai tha se propozimi i Bashës nga VV në seancën e kaluar ishte befasi.

“Sa i përket propozimit të VV-së vërtetë është me të ardh keq që VV vendos me qit një propozim që i ka befasu edhe vetë ata. Një njeri që besoj që edhe votat e VV-së nuk do të shkonin për Dimal Bashën”, tha Nura.

Nura tha se edhe për PDK-në ka qenë befasi dhe se kërkuan të marrim një pauzë dhe të njoftohen se a është vërtetë vullneti dhe qëndrimi i tyre që Dimal Basha të jetë në krye të Kuvendit.

“Në ushtri e kemi një term që thotë më mirë është një luan me ju pri 100 magarëve, se një magar me ju pri 100 luanëve. Tash Dimal Basha me qenë në krye të Kuvendit është fyerje për votuesit e VV-së dhe fyerje për votuesit e tërë Kosovës”, tha Nura. /Telegrafi/

The post “Një magar nuk mund t’u prijë 100 luanëve” – deputeti Nura godet Dimal Bashën appeared first on Telegrafi.

Mbrojtja e ish-presidentit Hashim Thaçi, ka dorëzuar më 18 gusht 2025 një kërkesë ndaj vendimit të Gjykatës Speciale lidhur me kompetencën për të shqyrtuar Rastin 12, që lidhet me akuzën për pengim të drejtësisë.

Në këtë kërkesë, mbrojtja e Thaçit kërkon nga paneli i Apelit që të anulojë vendimin e Gjykatës dhe të deklarojë se gjykatësi paraprak nuk ka qenë kompetent për të nxjerrë aktakuzën për Rastin 12.

Mbrojtja argumenton se Prokuroria Speciale ka filluar procedurat në mënyrë të njëanshme para një gjykatësi të vetëm, duke anashkaluar kompetencat ekskluzive të Panelit të Gjyqtarëve që duhet të mbikëqyrë çështjet që lidhen me gjykimin e drejtë të zotit Thaçi.

Ekipi mbrojtës argumenton se trajtimi i të njëjtave fakte në dy procese të ndryshme rrezikon vendime kontradiktore dhe cenon prezumimin e pafajësisë së ish-presidentit.

Gjykatësi më 19 qershor 2025, kishte refuzuar plotësisht kërkesën e mbrojtjes për moskompetencë, por më pas mbrojtja ka kërkuar leje për kërkesë duke identifikuar katër çështje për shqyrtim dhe certifikim, nga të cilat tri janë miratuar më 23 korrik 2025.

Avokatja Sophie Menegon, që e përfaqëson Thaçin ka kërkuar që të hiqet aktakuza e Rastit 12 dhe të shpallë se gjyqtari i procedurës paraprake nuk kishte kompetent për të lëshuar aktakuzën mbi këtë rast. /Telegrafi/

The post Mbrojtja e Thaçit kërkon heqjen e aktakuzës për pengim të drejtësisë appeared first on Telegrafi.

Në fshatrat Rezine, Doblibare dhe Berdosane kanë nisur punimet për rikonstruksionin e rrugëve rurale, një hap i rëndësishëm për lidhjen më të mirë të komuniteteve në këtë rajon.

Kryetari i Gjakovës, Ardian Gjini në njoftimin e tij tha se në Rezine, Doblibare dhe Berdosane sot u ndezën motorët e makinerive për një tjetër kapitull të rëndësishëm në infrastrukturën rurale të Gjakovës.

Ai bëri me dije se janë planifikuar të përfundojnë 8 akse rrugore me gjatësi prej 1.7 kilometrash, që do të lidhen për të përmirësuar qasjen mes shtëpive dhe fshatrave për banorët.

Gjini theksoi edhe rëndësinë e këtij investimi, duke thënë se “me një investim prej 150,000 €, po sjellim standardin e rrugëve të denja për këta banorë që vazhdojnë të mbajnë gjallë jetën në fshat.”

Ai përmbylli mesazhin me optimizëm për zhvillimin e mëtejshëm të zonës. “Gjakova po ecën përpara, gur për gur, rrugë pas rruge”. /Telegrafi/

The post Fillojnë punimet për përmirësimin e rrugëve rurale në Gjakovë appeared first on Telegrafi.

Asfaltimi i segmentit të “Rrugës A” që e lidh atë me “Rrugën B”, ka nxitur tensione.

Si rezultat i situatës së krijuar në vendin e punimeve është dashur të ndërhyjë edhe Policia e Kosovës.

Lexo po ashtu Asfaltohet lidhja mes “Rrugës B” dhe “Rrugës A”

Zëdhënësi i policisë për rajonin e Prishtinës, Enis Pllana tha për Telegrafin se dy persona janë shoqëruar në stacionin policor pasi që kanë penguar punimet në “Rrugën A”.

“Sot rreth orës 08:00, dy persona janë shoqëruar për në stacion policor, pasi që të njëjtit kanë penguar punimet që kanë qenë duke u bërë në rrugën “A”. Në koordinim me prokurorin, të njëjtit janë intervistuar dhe u janë shqiptuar gjoba për “Prishje të rendit dhe qetësisë publike”, tha ai. /Telegrafi/

The post Asfaltimi në “Rrugën A” ndez tensione, dy persona shoqërohen nga policia appeared first on Telegrafi.