TIRANË, 11 gusht /ATSH/ Ministri i Shtetit për Pushtetin Vendor, Arbjan Mazniku zhvilloi një takim me fermerë në Elbasan për nismën e qeverisë të mbështetjes ekonomike për bujqësinë.

Në takim, ku mori pjesë edhe kryetari i bashkisë së Elbasanit, Gledjan Llatja, u diskutua mbi skemën e investimeve që përfshin 50% grant, mundësi për kredi të butë me interes 2% dhe garanci sovrane deri në 70% të vlerës së kolateralit.

“Nga agroturizmi te ndërtimi i serrave, mbjelljet e reja e sistemet moderne të ujitjes, kjo është një mundësi reale për të rritur prodhimin dhe fitimin për të gjithë fermerët, duke aplikuar pranë AZHBR deri në datën 30 shtator”, theksoi ministri Mazniku.

Për të mbështetur zhvillimin bujqësor, Skema Kombëtare e Investimeve 2025 ofron një fond rekord prej 20 milionë eurosh, të cilat janë të strukturuara në nëntë masa mbështetëse, të cilat mund të përdoren nga fermerët dhe subjektet bujqësore për të zhvilluar plane investimi të personalizuara.

Kredia e butë e nisur prej janarit, me një normë interesi vetëm 2% dhe 70% kolateral nga shteti, gërshetohet me Skemën Kombëtare të Investimeve 2025 me 50% grant, duke krijuar një paketë të plotë financimi për sektorin bujqësor.

Aplikantët mund të përfitojnë nga disa masa mbështetjeje, duke i mundësuar kështu të krijojnë një plan të qëndrueshëm dhe tërësor për zhvillimin e fermave të tyre.

Ky program është i hapur për fermerët individualë, si dhe për shoqëritë me status fizik ose juridik, të cilët mund të aplikojnë për ndihmë financiare nëpërmjet Agropikave ose Agjencive Rajonale të Ekstensionit Bujqësor në zonën e tyre.

Skema Kombëtare e Investimeve 2025 ofron 9 masa mbështetëse: ndërtimin e serrave diellore të reja për prodhimin e perimeve, luleshtrydheve dhe rrushit të tavolinës; mbjellje të reja në pemë frutore, ullinj, agrume dhe vreshta; rrjeta antibreshër për pemët, agrumet dhe vreshtat ekzistuese; sistemet e ujitjes me pika në pemëtore dhe vreshta; ndërtimi i ambienteve për mbarështimin e blegtorisë dhe shpendëtarisë; mekanizimi dhe modernizimi i fermave bujqësore dhe blegtorale; pajisjet për përpunim dhe paketim për perime, fruta, rrush, verë, ullinj dhe vaj ulliri; investime në agroturizëm; koshat dhe rrjetat e peshkimit për akuakulturë.

Aplikimet janë të hapura nga data 30 korrik, deri më 30 shtator, dhe fermerët mund të marrin asistencë nga ekipi i Ministrisë së Bujqësisë dhe Zhvillimit Rural për çdo pyetje ose nevojë për ndihmë.

Skema e Investimeve 2025 ofron mundësi të shkëlqyera për zhvillimin dhe modernizimin e sektorit bujqësor në Shqipëri, duke kontribuar në rritjen e eksporteve dhe përmirësimin e standardeve të prodhimit.

/gj.m/r.e/

The post Mazniku me fermerë në Elbasan: Skema e investimeve, mundësi reale për të rritur prodhimin dhe fitimin appeared first on Agjencia Telegrafike Shqiptare.

TIRANË, 11 gusht/ATSH/ Delegacioni i Bashkimit Evropian ndau sot pamje nga operacionet për shuarjen e zjarreve në vendin tonë, ku krahas zjarrfikësve shqiptarë po punojnë edhe zjarrfikës nga vende të BE-së.

“Zjarret po përhapen në mbarë Shqipërinë, duke shkatërruar natyrën dhe duke rrezikuar jetë. Por solidariteti i BE-së mbetet e fortë”, thekson zyra e BE në Tiranë.

“Krah zjarrfikësve shqiptarë, po punojmë pa u lodhur për të shpëtuar jetë dhe për të mbrojtur komunitetet”, thekson zyra e BE.

Zyra e BE ndau foto nga zjarrfikësit sllovakë dhe ata çekë që janë në veprim në një zjarr në afërsi të Tepelenës.

Hadja Lahbib, Komisionere për Barazinë, Gatishmërinë dhe Menaxhimin e Krizave u shpreh më herët se, BE ka aktivizuar Mekanizmin e Mbrojtjes Civile të BE-së.

“Zjarret po shpërthejnë përsëri në të gjithë Shqipërinë. Kemi mobilizuar aeroplanë nga flota jonë e Mekanizmit të Mbrojtjes Civile të BE-së për të ndihmuar ekipet e para lokale të ndërhyrjes për të vënë nën kontroll zjarret. Një aeroplan nga Kroacia dhe dy aeroplanë nga Suedia po i bashkohen tani reagimit emergjent”, tha Hadja Lahbib, Komisionere për Barazinë, Gatishmërinë dhe Menaxhimin e Krizave.

/gj.m/r.e/

The post BE solidaritet me Shqipërinë për shuarjen e zjarreve appeared first on Agjencia Telegrafike Shqiptare.

TIRANË, 11 gusht /ATSH/ Kryebashkiaku i Gramshit, Besian Ajazi ka reaguar për situatën e zjarreve në pyjet e Gramshit duke e cilësuar atë emergjente.

“Një zjarr i përmasave të mëdha ka përfshirë një sipërfaqe të konsiderueshme pyjore në Mukaj të Sojnikut, njësia administrative Kukur ndërsa tani në mesdrekë është ndezur një vatër e re zjarri më e madhe dhe më agresive mbi fshatin Sojnik i cili është përhapur deri në fshatin Snosëm, duke rrezikuar edhe banesa”, u shpreh Ajazi.

Ai theksoi se, dyshohet se shkaku është veprimtaria kriminale e piromanëve, që me papërgjegjshmëri të tmerrshme po rrezikojnë jetën, natyrën dhe pronën publike.

“Pavarësisht angazhimit maksimal të shërbimit tonë zjarrfikës, shërbimit pyjor, drejtorisë së shërbimeve, vullnetarëve dhe ndihmës së Agjencisë Kombëtare të Mbrojtjes Civile – me 20 efektivë në terren dhe dy helikopterë në operacion – zjarri vijon të jetë aktiv dhe i vështirë për t’u vënë nën kontroll për shkak të terrenit të vështirë, temperaturave të larta dhe erës të cilat favorizojnë përhapjen e flakëve”, shtoi Ajazi.

“Dënojmë me forcë aktet barbare të zjarrvënies së qëllimshme. Autorët do të përballen me ashpërsinë më të madhe të ligjit dhe me zemërimin e një komuniteti që nuk lejon askënd të dëmtojë pasurinë e përbashkët”, nënvizoi Ajazi, në një postim në rrjetet sociale.

“Jemi në monitorim të pandërprerë dhe do të vijojmë betejën për të mbrojtur pyjet dhe banorët tanë”, theksoi kryebashkiaku i Gramshit.

/gj.m/r.e/

The post Kryebashkiaku Ajazi: Situatë emergjente në pyjet e Gramshit appeared first on Agjencia Telegrafike Shqiptare.

TIRANË, 11 gusht/ATSH/ Serxho Ujka realizoi golin e parë në kampionatin belg.

Mesfushori shqiptar ishte protagonist në fitoren 3 – 2 të Zulte Varenhem në fushën e Aderletit të drejtuar nga Besnik Hasi.

Ujka shënoi një gol të bukur me kokë në minutën e 69-të. Ai u vlerësua si më i miri i sfidës nga “Sofaskor” dhe u përfshi në formacionin ideal të javës së tretë.

Serxho Ujka u transferua këtë verë nga Egnatia te Zulte Varenhem.

/gj.m/r.e/

The post Serxho Ujka shënon golin e parë në Belgjikë appeared first on Agjencia Telegrafike Shqiptare.

TIRANË, 11 gusht /ATSH/ Mesfushori shqiptar Kristjan Asllani duket se është në prag largimi nga Interi, pasi nuk bën më pjesë në planet e zikaltërve.

Klubi e ka vendosur në treg, por deri tani 22-vjeçari ka refuzuar ofertat e Sassuolos dhe Betisit, duke preferuar të qëndrojë në Serie A.

Sipas “Gazzetta dello Sport”, Bologna është interesuar në orët e fundit. Dëmtimi i Leuis Ferguson, i cili do të mungojë për një muaj, ka shtyrë kuqeblutë të kërkojnë një zëvendësues të menjëhershëm. Drejtuesit Marco Di Vaio dhe Giovanni Sartori besojnë se Asllani do ta pranonte me kënaqësi kalimin në ekip, duke pasur edhe mundësinë të luajë në Europa League.

Interi kërkon 18 milionë euro për kartonin, shifër që konsiderohet e lartë nga Bologna. Palët nuk përjashtojnë mundësinë e një marrëveshjeje huazimi që mund të konkretizohet në ditët e ardhshme, diçka që do ishte edhe në favor të Interit për të liruar organikën.

/gj.m/r.e/

The post Bologna në garë për Asllanin, Interi kërkon 18 milionë euro appeared first on Agjencia Telegrafike Shqiptare.

TIRANË, 11 gusht /ATSH/ Mbrojtësi i Romës dhe i Kombëtares, Marash Kumbulla mund të kthehet në Spanjë.

Sipas medieve italiane, mundësia është që nga sezoni i ri ai të ribashkohet me Espanyol, klubin ku ai luajti sezonin e kaluar si i huazuar.

Mbrojtësi i lindur në vitin 2000 ka lënë shije të mirë në Katalonjë dhe Roma nuk e ka kundërshtuar transferimin e tij.

Kumbulla ka qenë i hapur ndaj kësaj mundësie dhe i ka dhënë përparësi opsionit iberik.

Një muaj më parë, drejtori sportiv i klubit spanjoll, Fran Garagarza foli për të ardhmen e Kumbullës.

“Marashi na ka dhënë shumë dhe është me vlerë të madhe si nga perspektiva futbollistike ashtu edhe nga ajo njerëzore. Kthimi i tij nuk është i realizueshëm për momentin. Ndoshta pas disa javësh mund të jetë, ose ndoshta jo, por tani për tani nuk është. Jemi të mbuluar në mbrojtje; kemi katër mbrojtës qendrorë dhe një opsion tjetër. Burimet tona do të përqendrohen në pozicione të tjera, më të ekspozuara”, tha ai.

Diskutimet kanë filluar tashmë dhe lojtari thuhet se nuk ka problem të arrijë një marrëveshje. Tani mbetet për t’u parë nëse Espanyol do të shtyjë përpara dhe do ta bëjë transferimin apo do të vendosë të vonojë, duke pritur kushte më të favorshme se ato aktuale.

Kumbulla ka kontratë me Romën deri në verën e 2027 dhe sërish një huazim do të ishte një mundësi që nuk do t’i thuhej “jo”. Duket se mbrojtësi i Kombëtares nuk e ka bindur trajnerin Gasperini dhe po kërkon një tjetër ekip ku të vijojë karrierën.

/gj.m//r.e/

The post Marash Kumbulla drejt rikthimit në La Liga appeared first on Agjencia Telegrafike Shqiptare.

TIRANË, 9 gusht /ATSH/ Portieri i Kombëtares, Elhan Kastrati është një lojtar i ri i Eintracht Braunschweig.

28-vjeçari firmosi për 2 sezone me ekipin e Bundesliga 2 në Gjermani.

Portieri i Kombëtares u largua pas 5 vitesh nga Cittadella dhe një përvoje akoma më të gjatë në Itali ku numëron 168 ndeshje në Serie B.

Për drejtorin e Eintracht Braunschweig, Benjamin Kessel, Elhan Kastrati është në kulmin e karrierës së tij dhe përveç cilësive sportive atë e dallojnë edhe aspekti piskologjik dhe ambicia.

Edhe vetë Kastrati u shpreh i kënaqur për zgjedhjen e tij, pasi do të luajë në një ekip me traditë.

Eintracht Braunschweig është përforcuar për të qenë në konkurrues, pasi sezonin e kaluar i shpëtoi rënies një kategori më poshtë vetëm në ndeshjet play off.

/gj.m/

The post Portieri i Kombëtares, Elhan Kastrati kalon tek Eintracht Braunschweig appeared first on Agjencia Telegrafike Shqiptare.

TIRANË, 9 gusht /ATSH/ Ministria e Mbrojtjes informoi sot lidhur me situatën në vatrat aktive të zjarreve në vend.

MM bëri të ditur se, në  Finiq, flakët në fshatin Livinë janë vendosur nën kontroll dhe aktualisht nuk paraqesin rrezik për banesat. Operacionet për shuarjen e zjarrit po zhvillohen nga ajri me helikopterin Black Hawk dhe avionin kroat Canadair, ashtu edhe nga toka.

Mjetet zjarrfikëse dhe forcat tokësore janë pozicionuar përreth fshatit, në gatishmëri për të ndërhyrë në çdo moment, thekson MM, teksa shton se, autoritetet mbeten në gatishmëri të plotë për të shmangur çdo rrezik të mundshëm për komunitetin.

Në Mirditë, thekson MM, operacionet për shuarjen e zjarreve vijojnë me mbështetjen e mjeteve ajrore. Deri tani, avioni “Canadair” nga Italia ka realizuar 7 hedhje mbi vatrat e zjarrit, duke lëshuar rreth 50 mijë litra ujë në terren.

MM nënvizon se, ndërhyrja nga ajri po kombinohet me punën e forcave tokësore dhe mjeteve zjarrfikëse, të cilat po operojnë për izolimin dhe shuarjen e plotë të flakëve.

/gj.m/

The post MM: Operacione nga ajri për shuarjen e flakëve në Finiq dhe Mirditë appeared first on Agjencia Telegrafike Shqiptare.

TIRANË, 9 gusht  /ATSH/ Ministrja e Turizmit dhe Mjedisit, Mirela Kumbaro ndau sot pamje nga plazhi i Livadhit në Himarë, një nga perlat e turizmit në jug të vendit.

Ky plazh ndodhet poshtë Kalasë së Himarës, duke ofruar një kombinim të mrekullueshëm të historisë dhe natyrës.

Plazhi i Livadhit është i njohur për ujin e tij të kristaltë dhe shkëmbinjtë e lartë që e rrethojnë dhe ka një shtrirje prej rreth 1.2 kilometra dhe një gjerësi prej 100 metrash, me rërë të pastër dhe të mineralizuar..

Ujërat e tij të kthjelltë ofrojnë mundësi të shkëlqyera për notim dhe zhytje, ndërsa shkëmbinjtë e lartë janë perfekt për ata që duan të provojnë hedhjet nga lartësitë.

Infrastrukturat moderne dhe shërbimet e ofruara e bëjnë plazhin e Livadhit një vend të përshtatshëm për familje, çifte dhe udhëtarë të vetëm.

Rruga për në plazhin e Livadhit ofron pamje spektakolare të bregdetit dhe peizazhit natyror përreth ku pushuesit dhe vizitorët mund të vëzhgojnë grykën e Vishës, burimet e ndërtuara të ujit dhe disa kisha mesjetare ortodokse shqiptare, që e bëjnë udhëtimin edhe më të veçantë dhe të pasur me histori.

Qetësia dhe bukuria që të ofron plazhi i Livadhit, a kanë kthyer në një destinacion të preferuar për shumë turistë që kërkojnë një përvojë autentike në bregdetin shqiptar.

1 nga 3

/gj.m/

The post Plazhi i Livadhit në Himarë, një nga perlat e bregdetit të jugut appeared first on Agjencia Telegrafike Shqiptare.

TIRANË, 9 gusht  /ATSH/  Vllaznia vazhdon me përforcimet në merkato. Klubi shkodran prezantoi këtë të premte afrimin e Sherif Kallakut, i cili ka firmosur për dy sezone.

Mesfushori rikthehet në Superiore, si një dëshirë e madhe e trajnerit Edi Martini i cili e ka drejtuar edhe në të kaluarën.

Kallaku e njeh mirë kampionatin pasi në të kaluarën ka shkëlqyer me Teutën, ndërsa ka luajtur edhe për Tiranën dhe Partizanin.

“KF Vllaznia ka kënaqësinë të njoftojë arritjen e marrëveshjes me futbollistin Sherif Kallaku për të qenë pjesë e skuadrës tonë deri në vitin 2027. Lojtari ndërkohë pasditen e sotme ka zhvilluar edhe seancën e parë stërvitore me ekipin duke u vënë menjëherë në dispozicion të stafit teknik. Mirë se erdhe në familjen kuqeblu Sherif”, shkruan klubi shkodran.

1 nga 5

/gj.m/

The post Vllaznia zyrtarizon Sherif Kallakun appeared first on Agjencia Telegrafike Shqiptare.

TIRANË, 9 gusht  /ATSH/  Armando Broja është sulmuesi më i ri i Burnley në Premier League.

Futbollisti i Kombëtares la Chelsean pas 16 vitesh në atë klub, kur u bashkua si një fëmijë, për të firmosur një kontratë pesë vjeçare me Burnley.

Pas firmës në kontratë dhe prezantimit, 23-vjeçari Broja foli për faqen zyrtare të klubit.

Ai tha se e sheh këtë si një mundësi të mirë për të treguar aftësitë e tij, për vetë objektivat e Burnleyt dhe për të mbajtur peshën e sulmit në një ekip ku do ketë minuta në fushë.

I pyetur sesi ndjehet që sapo ka firmosur një kontratë 5-vjeçare, Broja shprehet se, “është ndjesi fantastike. Jam padyshim shumë, shumë i lumtur që ndodhem këtu. Mezi pres të filloj, t’i takoj të gjithë lojtarët, të gjithë, ambientet stërvitore janë të pabesueshme. Pra, mezi pres të jem në fushë dhe para tifozëve”.

Broja dha edhe një mesazh për tifozët e tij të rinj, të cilët janë entuziazmuar nga mbërritja e tij.

“Unë thjesht dua t’i falënderoj të gjithë tifozët për mbështetjen, jam i entuziazmuar që ndodhem këtu. Pres me padurim t’i entuziazmoj edhe unë”, tha Broja.

/gj.m/

The post Broja firmos për 5 vite me Burnley në Premier League: Ndjesi fantastike appeared first on Agjencia Telegrafike Shqiptare.

TIRANË, 9 gusht  /ATSH/  Ministri i Mbrojtjes, Pirro Vengu, ishte sot në Vlorë, ku së bashku me kryebashkiakun, Ermal Dredha inspektuan punimet ku puna vazhdon për rehabilitimin e plotë të rrjetit të kanalizimeve të qytetit me forcat xheniere, të cilat janë kudo në mbështetje të bashkive dhe në shërbim të komuniteteve.

“Jemi në zonën e kanalit të ujërave të larta të Skiavit që ndërlidh zonën e ish-fabrikës së çimentos me zonën e Lungomares. Prej disa ditësh kemi një ndërhyrje rehabilituese në këtë kanal. Të angazhuara në terren janë forcat e bashkisë së Vlorës, xhenio, reparti i Forcave të Armatosura që është gjithmonë në mbështetje me logjistikën përkatëse dhe patjetër dhe ujësjellës-kanalizimet e Vlorës që do të mbeten të angazhuara deri sa të kemi një pastrim të plotë të këtij kanali që nga pikënisja e tij dhe deri poshtë”, tha Vengu.

Ndërkohë, shtoi ministri, “po realizojmë një projekt të ri rehabilitues në bashkëpunim me Agjencinë e Zhvillimit të Territorit në mënyrë që nga njëra anë të kemi infrastrukturë të re më cilësore, të sigurojmë pastërtinë e ujërave, sepse ky është një kanal që duhet të ketë ujëra të bardha, ujëra shiu, që mund të filtrohen dhe cilësia e tyre duhet kontrolluar dhe jo të kemi derdhje inertesh, apo bllokime. Ndaj dhe do vijojmë këto ditë që ta pastrojmë infrastrukturën”.

Kryebashkiaku Dredha tha se, “është bërë një punë shumë e mirë. Me ndërhyrjen që bëmë, qoftë edhe me ndihmën që kanë dhënë kompani private, patjetër nga diskutimi dhe nga kërkesa që ka ardhur dhe nga Agjencia e Zhvillimit të Territorit, në bashkëpunim me Ministrinë e Mbrojtjes, drejtorinë e Ujësjellës Kanalizime dhe bashkinë Vlorë”.

Dredha theksoi se, “është bërë një punë shumë e kënaqshme, por siҫ e shohim edhe vetë ka akoma disa pjesë që ne duhet të ndërhyjmë. Ka mbulesa betoni monolite që normalisht ka një angazhim tjetër sa i përket edhe mjeteve që duhet të përdorim. Dhe them se shumë shpejt  duke i hequr të gjitha këto pengesa do të bëhet një pastrim i përgjithshëm për të kalaur tek projekti që thatë pak më parë”.

“Kemi projektues të huaj që ka ardhur dhe e ka parë dhe merret posaҫërisht me pjesën e kanalizimeve dhe kanaleve për ta ridimensionuar dhe për ta rregulluar gjithë këtë pjesë. Dhe shpresojmë të bëhet sa më shpejt që të vijë në funksion të gjithë territorit këtu, pra komunitetit, edhe për ta rimodeluar edhe pjesën anësore të të dyja anëve të kanalit duke pasur parasysh edhe objektet që janë këtu që janë ndërtuar ndër vite, që mund të jenë patjetër pa leje, disa kanë qenë në proces legalizimi apo janë legalizuar. Por aty ku cenohet ky projekt do të bëjmë maksimumin që t’i zhbëjmë sepse në fund të ditës nuk duhet të merremi me një apo dy banorë që posedojnë një objekt, por me gjithë komunitetin që është shumicë”, theksoi Dredha.

Ministri Vengu shtoi se “gushti patjetër duhet të na gjejë me finalizimin e ndërhyrjes këtu”.

“Së bashku me kryetarin kemi biseduar për ta vijuar në 3 akset e rëndësishme në Vlorë. Ta vazhdojmë tek kanali i Naumkës dhe ta vazhdojmë dhe ke kanali tjetër që ҫon direkt në hidrovor, duke ditur që bashkia aktualisht ka edhe mundësinë që të financojë në rehabilitimin tërësor të hidrovorit të Vlorës, një hidrovor tejet i amortizuar, prej më shumë se 60 vitesh tashmë. Ndërkohë kemi një zonë që është në zhvillim e sipër dhe ka aktivitet turistik gjithëvjetor dhe duhet që kjo pjesë e infrastrukturës fundore t’i përgjigjet këtij realiteti të ri”, deklaroi Vengu.

/gj.m/

The post Vengu dhe Dredha: Punime intensive për rehabilitimin e rrjetit të kanalizimeve në Vlorë, finalizimi brenda gushtit appeared first on Agjencia Telegrafike Shqiptare.

TIRANË, 8 gusht /ATSH/ Në Finiq dhe Mallakastër është intensifikuar puna nga toka dhe ajri për të frenuar përhapjen e vatrave të zjarrit dhe në mbrojtje të zonave të banuara.

Ministri i Mbrojtjes, Pirro Vengu ndau sot pamje nga operacioni për shuarjen e flakëve në këto dy vatra.

Vengu u shpreh se, në Finiq, ku intensiteti i erës ndikoi në riaktivizim dhe përhapje të vatrave gjatë natës, 120 forcave operacionale në terren u janë bashkuar që prej orëve të mëngjesit dy avionët suedezë të siguruar nga Mekanizmi Europian i Mbrojtjes Civile dhe një helikopter i Forcës Ajrore.

Falë ndërhyrjes së kombinuar nga toka dhe ajri janë mbrojtur banesat dhe është krijuar perimetër sigurie në Dhivër dhe Janicat.

Të gjitha përpjekjet tashmë të angazhuara në frenimin e vatrave dhe mbrojtjen e banesave në perimetrin Navaricë – Memoraq dhe Rumanxë, dhe vigjilencë të shtuar në zonën e Leshnicës, thekson Vengu.

Në Mallakastër, ku situata është përmirësuar gjatë orëve të fundit, momentalisht po veprojnë 25 forca nga Forcat e Armatosura të Shqipërisë, 25 forca nga MZSH dhe 24 forca nga bashkitë Mallakastër dhe Patos.

Në këtë zonë po vepron aktualisht dhe në avion “Canadair” i Forcës Ajrore kroate.

Ndërkohë, shton ministri, në lartësitë e Bërzhitës, ku dyshohet për zjarrëvënie të qëllimshme, forcat e MZSH Tiranë ndodhen në terren dhe momentalisht nuk ka asnjë rrezik për banesat.

Vengu nënvizon se, situata në rang vendi mbetet dinamike ndërkohë që presim rritje të temperaturave në ditët në vijim.

Ministri i Mbrojtjes u bën thirrje banorëve të zbatojnë udhëzimet e autoriteteve në terren.

“Ligji do të veprojë me forcën maksimale ndaj çdo zjarrvënësi”, thekson ai.

/gj.m/r.e/

The post Vengu: Në Finiq dhe Mallakastër intensifikohet puna për shuarjen e vatrave të zjarrit appeared first on Agjencia Telegrafike Shqiptare.

TIRANË, 8 gusht /ATSH/ Punimet për ndërtimin e dy fushave të reja të futbollit në qytetin e Përrenjasit, sipas marrëveshjes ndërmjet FSHF dhe Bashkisë Prrenjas, po vazhdojnë me ritme të shpejta.

FSHF bën të ditur se, aktualisht, është përfunduar instalimi i sistemit të drenazhimit dhe në ditët në vijim do të nisë shtrimi i tapetit artificial.

Me ndërtimin e dy fushave të reja në qytetin e Përrenjasit, një fushë me përmasa olimpike dhe një minifushë, fëmijët do të kenë mundësi të stërviten dhe të luajnë futboll në kushte të përshtatshme.

1 nga 2

/gj.m/r.e/

The post Fushat e reja të futbollit në Përrenjas, përfundon sistemi i drenazhimit, gati shtrimi i tapetit appeared first on Agjencia Telegrafike Shqiptare.

TIRANË, 8 gusht /ATSH/ Pas miqësoreve të ekipit kombëtar U-19 kundër Italisë, tashmë është radha e kuqezinjve U-17 të përballen me bashkëmoshatarët axurrë.

Trajneri Fatjon Tafaj do të debutojë në pankinën e kombëtares U-17 me dy ndeshjet miqësore që do të zhvillohen në Coverciano të Italisë, më 11 dhe 13 gusht. Për këto sfida, tekniku shqiptar ka grumbulluar 22 lojtarë, 3 prej të cilëve portierë, 9 mbrojtës, 5 mesfushorë dhe 5 sulmues.

Skuadra është rinovuar me emra të rinj, ndryshe nga kualifikueset dhe finalet e fundit të Europianit për këtë grup-moshë.

Të gjithë lojtarët janë të vitlindjes 2009 dhe vijnë si nga klubet shqiptare, ashtu edhe nga akademitë e klubeve të njohura europiane si Inter, Tottenham, Fiorentina, Bologna, Empoli etj.

Kuqezinjtë do të nisin grumbullimin nesër direkt në Itali, ku do të zhvillojnë edhe përgatitjet për dy sfidat kundër Italisë.

Sfidat kundër axurrëve janë një test i mirë në kuadër të përgatitjeve për kualifikueset e ardhshme të Kampionatit Europian për këtë grupmoshë, ku Shqipëria bën pjesë në Grupin 8, së bashku me Kroacinë, Holandën dhe Kazakistanin.

/gj.m/r.e/

The post Shqipëria U-17 kundër Italisë, trajneri Tafaj fton 22 futbollistë për dy miqësoret appeared first on Agjencia Telegrafike Shqiptare.

TIRANË, 8 gusht /ATSH/ Gjatë orëve të fundit janë evidentuar 19 vatra zjarri, nga të cilat 3 mbeten ende aktive.

Agjencia Kombëtare e Mbrojtjes Civile bëri të ditur sot se sa i përket vatrave aktive, në malin mbi fshatin Dhivër, bashkia Finiq vazhdon zjarri në një sipërfaqe pyjore në lartësi, ndërsa në terren po operojnë 10 mjete të shërbimit zjarrfikës të Finiqit, Sarandës, Delvinës, Konispolit, Gjirokastrës, Himarës dhe rreth 120 forca operacionale të mbështetura nga ajri si dhe nga efektivë të Forcave të Armatosura.

Në fshatin Lofkënd, bashkia Mallakastër, zjarri ka përfshirë një sipërfaqe me pisha, ndërsa në terren janë dislokuar 11 automjete zjarrfikëse, ndër të cilat 2 të FA si dhe 130 forca nga të gjitha strukturat operacionale, me mbështetje edhe nga ajri, të cilët po punojnë edhe sot për izolimin e plotë të tij.

Në fshatin Vjollcë, bashkia Mirditë, ka rënë zjarr në një sipërfaqe pyjore me pyll pishe dhe shkurre. Është punuar deri në orët e vona nga shërbimi vendor i MZSH, shërbimi pyjor dhe vullnetarë të zonës, pa mundur ta izolojnë vatrën. Rrezik për banesat nuk ka.

Në operacionet për shuarjen e zjarreve janë angazhuar: 48 automjete zjarrfikëse dhe 445 forca operacionale, 9 automjete të rënda, të ndihmuar nga FA me 73 forca ushtarake, 8 automjete zjarrfikëse me ekuipazh dhe mbështetje nga ajri, si dhe dy avionë suedezë të aktivizuar në kuadër të Mekanizmit Evropian të Mbrojtjes Civile.

Agjencia Kombëtare e Mbrojtjes Civile bën të ditur se mbetet në gatishmëri të plotë për koordinimin e mëtejshëm të forcave në terren dhe mbështetjen e çdo strukture me qëllim mbrojtjen e qytetarëve dhe pasurisë së përbashkët. AKMC u drejtohet sërish banorëve që të tregojnë kujdes të shtuar dhe të raportojnë çdo vatër të mundshme.

1 nga 5

/gj.m/r.e/

The post AKMC: 19 vatra zjarri të evidentuara, 3 ende aktive appeared first on Agjencia Telegrafike Shqiptare.

TIRANË, 7 gusht /ATSH/ “Drita” nuk arriti ta mbrojë avantazhin e dy golave në sfidën e parë të raundit të tretë të Europa League kundër FCSB-së në Bukuresht, duke u mposhtur me rezultatin 3-2, në një ndeshje dramatike që ndryshoi krejtësisht rrjedhë në pjesën e dytë.

Skuadra nga Gjilani e nisi shkëlqyeshëm takimin, duke befasuar vendasit me dy gola të shpejtë nga Veton Tusha dhe Arb Manaj, që i dhanë një epërsi të madhe dhe entuziazëm për një rezultat historik.

Megjithatë, FCSB reagoi pas pushimit, duke shënuar tre gola dhe përmbysur gjithçka në favor të tyre para tifozëve të vet.

Pavarësisht humbjes, shpresat e Dritës për një kualifikim historik në fazën ‘play-off’ të Europa League mbeten të hapura.

Gjilanasit do të kërkojnë përmbysjen e madhe në ndeshjen e kthimit, që do të zhvillohet javën e ardhshme në stadiumin ‘Fadil Vokrri’ në Prishtinë.

/gj.m/r.e/

The post Europa League, “Drita” përmbyset 3-2 nga FCSB në Bukuresht appeared first on Agjencia Telegrafike Shqiptare.

TIRANË, 7 gusht /ATSH/ “Ballkani” ka hedhur një hap të rëndësishëm drejt fazës ‘play-off’ të Conference League, duke mposhtur të enjten “Shamrock Rovers” me rezultatin minimal 1-0, në ndeshjen e parë të zhvilluar në stadiumin ‘Fadil Vokrri’ në Prishtinë.

Skuadra e drejtuar nga Orges Shehi dominoi takimin nga minuta e parë, duke krijuar disa raste të rrezikshme.

Arbër Potoku provoi të zhbllokonte rezultatin në minutën e 15-të, por portieri mik ndërhyri në kohë. Tre minuta më pas, ishte radha e Sunday Adetunjit të rrezikonte, por sërish portieri irlandez reagoi me sukses.

Presioni i Ballkanit nuk u ndal as në pjesën e dytë. Në minutën e 54-t, Adetunji gjeti rrjetën me një lëvizje inteligjente në zonë, duke shënuar golin që në fund rezultoi vendimtar.

Pas golit, ekipi nga Kosova kërkoi edhe një të dytë. Almir Kryeziu dhe sërish Adetunji patën raste për të thelluar epërsinë, por portieri i Shamrock Rovers mbajti gjallë shpresat e skuadrës së tij për ndeshjen e kthimit.

Me këtë rezultat, Ballkani siguron një avantazh të rëndësishëm para sfidës së kthimit javën e ardhshme në Irlandë, ku do të kërkojë të mbyllë me sukses një tjetër kapitull evropian.

/gj.m/r.e/

The post Conference League – “Ballkani” i Orges Shehit fiton 1-0 kundër “Shamrock Rovers” appeared first on Agjencia Telegrafike Shqiptare.

TIRANË, 7 gusht /ATSH/ Akademia e Forcave të Armatosura po tërheq çdo vit e më shumë të rinj e të reja.

Ministri i Mbrojtjes, Pirro Vengu bëri të ditur sot se janë 1634 aplikime deri më tani për programet Bachelor për vitin akademik 2025-2026, shifra më e lartë ndonjëherë.

Vengu thekson se, regjistrimet hapen më 8, 11 dhe 12 gusht, pranë ambienteve të Akademisë së Forcave të Armatosura

“Akademia e Forcave të Armatosura po tërheq çdo vit e më shumë të rinj e të reja të përkushtuar për t’i shërbyer vendit me dije, disiplinë dhe ndershmëri. 1634 aplikime deri më tani për programet Bachelor për vitin akademik 2025-2026 – shifra më e lartë ndonjëherë! Regjistrimet hapen më 8, 11 dhe 12 Gusht, pranë ambienteve të Akademisë së Forcave të Armatosura. Nise sot rrugëtimin tënd drejt së ardhmes”, shkruan Vengu në rrjetet sociale.

/gj.m//a.f/

The post Vengu: 1634 aplikime për programet bachelor në AFA, shifra më e lartë ndonjëherë appeared first on Agjencia Telegrafike Shqiptare.

TIRANË, 7 gusht /ATSH/ Shqipëria, Belgjika, Danimarka, Gjermania, Finlanda, Franca, Kanadaja, Holanda, Austria, Suedia, Spanja, Çekia, Mbretëria e Bashkuar dhe Shtetet e Bashkuara kanë dhënë një deklaratë të përbashkët mbi kërcënimet shtetërore nga shërbimet e inteligjencës iraniane.

Ambasada e Shteteve të Bashkuara të Amerikës në Tiranë ndau sot deklaratën e përbashkët duke cituar edhe zëdhënësen e Departamentit Amerikan të Shtetit, Tammy Bruce.

“Jemi të bashkuar me partnerët tanë europianë në kundërshtim të përpjekjeve të shërbimeve të inteligjencës iraniane për të vrarë, rrëmbyer dhe shqetësuar njerëzit në Europë dhe Amerikën e Veriut, në shkelje të qartë të sovranitetit tonë. Ne e dënojmë numrin në rritje të kërcënimeve ndaj shteteve dhe jemi të përkushtuar të punojmë së bashku për të parandaluar që këto veprime të ndodhin”, thekson zëdhënësja e Departamentit, Tammy Bruce.

“Shqipëria, Austria, Belgjika, Kanadaja, Republika Çeke, Danimarka, Finlanda, Franca, Gjermania, Holanda, Spanja, Suedia, Mbretëria e Bashkuar dhe SHBA-të dënojnë numrin në rritje të kërcënimeve shtetërore nga shërbimet sekrete iraniane në territoret tona përkatëse.

Ne jemi të bashkuar në kundërshtimin tonë ndaj përpjekjeve të shërbimeve sekrete iraniane për të vrarë, rrëmbyer dhe intimiduar njerëz në Evropë dhe Amerikën e Veriut, në shkelje të qartë të sovranitetit tonë. Këto shërbime po bashkëpunojnë gjithnjë e më shumë me organizatat kriminale ndërkombëtare duke synuar gazetarët, disidentët, qytetarët hebrenj dhe zyrtarët aktualë dhe të mëparshëm në Evropë dhe Amerikën e Veriut. Kjo është e papranueshme.

Ne i konsiderojmë këto lloje sulmesh, pavarësisht nga objektivi, si shkelje të sovranitetit tonë. Ne jemi të përkushtuar të punojmë së bashku për të parandaluar që këto veprime të ndodhin dhe u bëjmë thirrje autoriteteve iraniane që menjëherë t’u japin fund aktiviteteve të tilla të paligjshme në territoret tona përkatëse”, thuhet në deklaratë.

/gj.m//a.f/

The post Ambasada e SHBA ndan deklaratën, Shqipëria dhe aleatët perëndimorë kundër kërcënimeve të Iranit appeared first on Agjencia Telegrafike Shqiptare.