Presidenti i Serbisë, Aleksandar Vuçiç e ka përsëritur të hënën thirrjen e tij për dialog me protestuesit, pas nëntë muajve të protestave dhe bllokadave në gjithë vendin.

Në një intervistë dhënë Euronews Serbia, Vuçiq ka thënë se Qeveria në Beograd vazhdon të jetë e përkushtuar për dialog, pavarësisht, siç ka thënë ai, refuzimit të protestuesve për t’i pranuar ofertat e tij për debat publik.

“Kjo nuk është thirrja ime e parë. U kam ofruar atyre debat të hapur televiziv. Kam qenë i gatshëm të diskutoj publikisht, sepse besoj që biseda dhe dialogu nuk kanë alternativë”, ka thënë mes tjerash Vuçiq.

Ai ka shtuar se oferta e tij është valide “derisa ta pranojnë, sepse një ditë do t’iu duhet të flasin me dikënd”.

Disa prej studentëve në bllokadë, që i udhëheqin protestat, e kanë refuzuar paraprakisht ftesën e Vuçiqit, duke thënë se do të bisedojnë me presidentin e Serbisë, kur ai t’i shpallë zgjedhjet dhe t’iu plotësohen të gjitha kërkesat.

Studentët, dhe qytetarët që i mbështesin ata, kërkojnë përgjegjësi politike dhe penale për 16 personat e vdekur si pasojë e rrëzimit të një strehe betoni në stacionin hekurudhor të Novi Sadit në nëntor të vitit të kaluar.

Protestuesit kërkojnë edhe shpalljen e zgjedhjeve të parakohshme, kërkesë e refuzuar nga Qeveria.

Vuçiq i ka thënë Euroneës-it se ka ofruar shpalljen e zgjedhjeve “të paktën tri herë në gjashtë muajt e fundit”, përfshirë referendumin për mandatin e tij presidencial, “por që të gjitha ofertat janë kundërshtuar”.

“Kemi shumë punë, shumë punë për të bërë. Nuk mund të ketë zgjedhje gjithë kohën. Ata tani thonë se gjëja e vetme që duam janë zgjedhjet”.

Ai ka shtuar se do të jetë president edhe për një vit, një vit e gjysmë, dhe që një president i ri do të zgjidhet më pas.

Aksidenti në Novi Sad i ka ngritur dilemat për një sistem shtetëror të korruptuar. Protestuesit pretendojnë se shembja e strehës është rezultat direkt i ndërtimit të dobët.

“Korrupsioni është kthyer në temën kryesore dhe është e lehtë të shprehësh pakënaqësinë, edhe kur nuk është temë”, është shprehur Vuçiq.

Vuçiq ka thënë se e ka prioritet rrugën e Serbisë drejt anëtarësimit të plotë në Bashkimin Evropian.

“Për aq kohë sa të jem udhëheqës shtetëror, Serbia do të ndjekë rrugën evropiane, e përkushtuar dhe e vendosur për t’i kryer reformat e nevojshme”, ka thënë ai.

I pyetur për marrëdhëniet me presidentin rus, Vladimir Putin, Vuçiq ka thënë se ata kanë raport korrekt dhe që presidenti rus është “gati për t’i dhënë fund luftës në Ukrainë me një marrëveshje të paqes”.

Vuçiq ka thënë se do të ishte i kënaqur nëse do të ishte nikoqir i një takimi mes Putinit dhe presidentit ukrainas, Volodymyr Zelenky në Beograd, për ta diskutuar paqen, nëse palët e pëlqejnë këtë ide.

Serbia synon anëtarësimin në BE dhe e ka statusin e vendit kandidat, mirëpo mban edhe raporte të mira me Moskën, për çka është kritikuar disa herë nga Perëndimi./REL/

The post Vuçiç përsërit thirrjen ndaj protestuesve për dialog: Iu kam ofruar atyre debat të hapur appeared first on Albeu.com.

Kujtim Luka 66 vjeç është viktima e aksidentit të mbrëmjes së kësaj të hëne në Vorë. Sipas raportimeve, Luka u përplas nga një automjet që drejtohej nga Jani Tanushi 53 vjeç.

Shkaqet dhe rrethanat e aksidentit janë ende të paqarta ndërsa policia ka shoqëruar në komisariat drejtuesin e automjetit, Jani Tanushi.

Grupi hetimor ndodhet në vendngjarje dhe po punon për sqarimin e rrethanave të aksidentit.

The post EMRAT/ Identifikohet viktima e aksidentit në Vorë, policia shoqëron në komisariat shoferin appeared first on Albeu.com.

Presidentja e Kosovës, Vjosa Osmani së fundi ka zhvilluar një intervistë për televizionin polak “TVP World” ndërsa është pyetur për një sërsh çështjet që nga bota e te politika vendase. Osmani gjatë fjalës së saj ajo u ka bërë thirrje partive politike që të vendosin interesin e vendit para.

Osmani më tej ka kërkuar krijimin e një koalicioni të shumicës për të mos humbur projektet Bashkimit Evropian dhe mundësitë me administratën e re të SHBA-së. Osmani ka folur për afrimin e Kosovës drejt Bashkimit Evropian dhe sfidat politike që e pengojnë këtë proces. Ajo u shpreh se Kosova nuk ka pasur asnjëherë alternativë tjetër përveç BE-së.

Presidentja ka shtuar se Kosova nuk flirton me fuqi të tjera. Sipas saj BE-ja dhe NATO janë i vetmi shteg dhe do të punojnë shumë fort për aq sa na kërkohet për të zënë vendin e duhur në këto dy organizata. Ajo shtoi se Rusia, Kina e Iranit janë një trekëndësh i djallit dhe se shpesh kanë bërë përpjekje për të ndikuar në Ballkanin Perëndimor.

Sipas saj këto shtete kanë disa interesa strategjike për të shtrirë fuqinë e tyre, në një pjesë jashtëzakonisht të rëndësishme të kontinentit evropian. Osmani theksoi se ata besojnë se duke destabilizuar Ballkanin Perëndimor do të destabilizojnë BE-në dhe NATO-n.

Intervista e plotë:

Gazetarja: Mirë se vini në Forumin Evropian Alpbach dhe ju po shikoni TVP ëorld. Është absolutisht kënaqësi të mirëpres në studion tonë këtu në Austri, presidenten e Republikës së Kosovës, znj. Vjosa Osmani. Faleminderit shumë që jeni me ne.

Osmani: Faleminderit për ftesën është kënaqësi për mua.

Gazetarja: Kënaqësi që ju kemi në TVP ëorld. Kosova ka bërë disa përpjekje kur është çështja tek sistemi elektoral, qëndrueshmëria ekonomike e në mbrojtjen e të drejtave themelore, e këto janë fjalë të thëna nga anëtarë të Parlamentit Evropian, që janë sinjal i rëndësishëm, por që megjithatë, ka ende disa sfida kur është fjala për Kosovën siç janë reformat në sistemin e drejtësisë, liria e medies, efikasiteti në sistemin publik administrativ. E gjithashtu kemi prezencë të vazhdueshme të tensioneve midis Kosovës e Serbisë. Këto janë disa nga çështjet për të cilat dëshiroj të bisedojmë. Kështu që afërsisht çfarë mund të thoni se sa afër apo larg është ndoshta Kosova, drejt Bashkimit Evropian. E di që ju jeni një avokuese e përafrimit të Kosovës, por cili është opinion juaj?

Osmani: Është pyetje e vështirë për të dhënë përgjigje në aspektin kohor të viteve. Por atë që mund të them sa i përket pritjes sonë, shpirtit tonë evropian e dëshirës sonë politike, e dëshirën e popullit tonë për t’iu bashkuar BE-së, jemi 97 për qind gati ose ndoshta 100 për qind sepse ne jemi një shtet që jemi plotësisht në të njëjtën vijë me BE-në. 97 për qind e popullit të Kosovës janë pro BE-së, pro anëtarësimit në BE e në NATO. Sa i përket reformave, qofshin ato në sundimin e ligjit, reformën ekonomike, reformën në të drejtat themelore njerëzore, në Ballkanin Perëndimor jemi shteti që qëndrojmë më së miri. Pra kur jemi tek vlerat, jemi deri diku afër.

Por kur vjen puna tek politika e procedurat e vështira, jemi ende goxha larg sepse ju e dini që pesë vende të BE-së ende nuk e njohin pavarësinë e Kosovës dhe kjo është një vështirësi. Por pastaj ka edhe pengesa të tjera. Pavarësisht se Kosova është plotësisht e qartë, dhe pavarësisht se Kosova si shtet e shikon BE-në si sistem të bazës së vlerave, fatkeqësisht këto duket se nuk kanë arritur t’ia tërheqin vëmendjen e shumë vendeve anëtare dhe pastaj kjo duket tek nëse se edhe pse je në linjë me politikat e BE-së, vendos sanksione kundër Rusisë, sanksione kundër Iranit, apo veprime të tjera të cilat vërtetë të largojnë nga zona e rehatisë, por qëndron në atë çfarë është e drejtë, këto nuk kanë qenë të rëndësishme për BE-në.

Sepse nëse e shikon se si rajoni ynë ka përparuar, Serbia si fqinji ynë, pavarësisht se është vetëm 40 për qind në linjë me BE-në, pavarësisht se nuk ka vendosur sanksione ndaj Rusisë, apo s’ka dëgjuar këshillat e tjera të BE-së, vazhdojnë të ecin përpara drejt anëtarësimit në BE. Kjo pastaj të jep ndjenjën se kriteret dhe vlerat nuk kanë vërtetë rëndësi, së paku për disa vende anëtare. Por ne po përpiqemi që t’i bindim ato e kjo nuk do të thotë se durimi ynë do të zbehët, përkundrazi, ne po punojmë në këtë sepse është proces. Është goxha një proces i gjatë dhe sigurisht se ka shumë njerëz që janë të frustruar.

Por për ne nuk ka pasur asnjëherë alternativë tjetër përveç BE-së. Ne nuk flirtojmë me fuqi të tjera. Ne nuk ngatërrohemi me fuqi malinje dhe është e kundërta për ne, ku i vetmi shteg është BE-ja dhe NATO dhe do të punojmë shumë fort për aq sa na kërkohet për të zënë vendin tonë të duhur në këto dy organizata. Për me e rëndësishmja është se këto janë baza të sistemit të vlerave dhe kjo është arsyeja përse duam t’i bashkohemi.

Gazetarja; E thatë një fjali shumë interesante se nuk flirtoni me fuqi të tjera. Çfarë do të thoshit lidhur me ndërtimin e marrëdhënies në raport me Rusinë, veçanërisht tani kur shohim luftën në Ukrainë, apo fushatat dezinformuese që po ndodhin, lufta hibride, siç edhe Polonia për shembull është në situatë të vështirë. Si mendoni se Rusia po luan pjesën e vet kur vjen çështja tek procesi i anëtarësimit të Kosovës në BE?

Osmani: Shpesh e them se kur shohim forcat e Rusisë, Kinës e Iranit, një trekëndësh i djallit, përpjekjen e tyre për të ndikuar në Ballkanin Perëndimor, këtë nuk e bëjnë për bamirësi. Ata këtë e bëjnë sepse kanë disa interesa strategjike për të shtrirë fuqinë e tyre, në një pjesë jashtëzakonisht të rëndësishme të kontinentit evropian. Ato besojnë se duke destabilizuar Ballkanin Perëndimor, duke përdorur instrumente të ndryshme, dhe kjo më së shumti nga Rusia, është e qartë, duke destabilizuar Ballkanin Perëndimor, ata duan ta destabilizojnë tërësisht bazën e sistemit të vlerave që janë BE-ja e NATO.

Ju e dini ne jemi një lagje, jemi shumë afër njëri me tjetrin. Jemi vetëm katër orë larg vozitje nga Bullgaria apo katër orë larg vozitje nga Hungaria, e disa orë më shumë deri në Poloni. Është e qartë se kur një vend është në konflikt, të tërë janë të destabilizuar ashtu siç mund ta shohim nga agresioni rus ndaj Ukrainës. Prandaj agresioni rus, historikisht ka qenë, por mund të shohim prezencën e tyre më të madhe në vitin 2022 kur u invadua Ukraina. Interesi i Rusisë është destabilizimi i Ballkanit Perëndimor për të pasur një efekt zinxhir e për të pasur një zonë të konflikteve në Evropë, në mënyrë që të tërheq gjithashtu vëmendjen e BE-së nga Ukraina. Mendoj se Polonia e di më së miri se me aktorë sikurse Rusia, asnjëherë nuk mund të llogarisësh në dashamirësi. Është krejt e kundërta se çfarëdo që ata bëjnë, e bëjnë ssikurse që ka ndodhur përgjatë historisë dhe këtë na e tregon historia e nuk kemi nevojë ta zbulojmë rrotën. Ne vetëm kemi nevojë të mësojmë nga historia.

Edhe kur ata ndërmarrin veprime të ndryshme, ata përgatiten le të themi për ndonjë sulm në të ardhmen ndaj ndonjë vendi. Sigurisht se përtej Ukrainës, Polonisë apo vendeve të tjera në atë rajon, ata gjithmonë historikisht kanë treguar interes për ta destabilizuar Ballkanin Perëndimor. Është shumë qenësore që pjesa jonë e Evropës t’i bashkohet Bashkimit Evropian dhe NATO-s sepse mendoj se ajo do të përfundonte këto ëndrra të Rusisë për të destabilizuar Evropën në tërësi dhe të ndalonte Evropën si projekt i tërësishëm i paqes, dhe lirisë që ishte edhe qëllimi i themeluesve të saj. Është qenësore që ne kemi mbështetës dhe aleatë sikurse është Polonia dhe vende të tjera brenda BE-së sepse ju e dini se në çfarë po kalojmë, e dini kur shfaqet rreziku, e dini se çfarë është të kesh një fqinj të çmendur që ka tërësisht ide të tjera për demokracinë. Përtej armatosjes së Serbisë për të sulmuar fqinjët e saj, Rusia ka përdorur siç edhe ju e përmendet me të drejtë, instrumente të tjera e më së shumti përmes fushatave të dezinformimit e propagandës.

Menjëherë pas agresionit rus ndaj Ukrainës, në vitin 2022, ata kanë trefishuar shumën e parave për propagandë në Ballkanin Perëndimor. Ata kanë të ashtuquajturën Qendra Humanitare Ruse në Serbi e cila është jo shumë larg nga kufiri me Kosovën e që sipas Departamentit Amerikan të Mbrojtjes është qendër e spiunazhit rus. Ju e shikoni se sa më shumë kohë kalon, Serbia merr më shumë para, më shumë armë, nga Rusia, Bjellorusia e tani edhe nga Irani që është edhe një rrezik tjetër. E sigurisht edhe me Kinën, është bërë vendi i vetëm në Evropë që ka FK3, sistemin e armatimit. Të gjitha këto tregojnë se ne kemi një aktor destabilizues në rajonin tonë, dhe kemi nevojë për përkrahjen e BE-së dhe NATO-s për ta ndaluar nga ndikimi i tërë rajonit për të mos shkuar në drejtim të gabuar. Në Kosovë nuk lejojmë as zero ndikim rus, kinez apo iranian.

Megjithatë, kur ke vende fqinje që vazhdimisht janë pjesë e atyre ndikimeve malinje, duke u përpjekur ta destabilizojnë Kosovën, Bosnje e Hercegovinën e të tjerat, krijohet vështirësi ashtu siç e thatë edhe ju. Por kjo nuk do të thotë se Kosova nuk është vend i sigurt. Madje është krejtësisht e kundërta. Në mënyrë të suksesshme kemi ndaluar çdo përpjekje nga Serbia, me mbështetjen edhe të aleatëve tanë nga NATO që janë në Kosovë, përfshirë edhe ushtarët e shkëlqyer nga Polonia, që kanë dhënë një kontribut të veçantë për paqe e siguri, për të gjithë qytetarët tanë, por në tërësi e kanë bërë tërë Ballkanin Perëndimor më të sigurt.

Gazetarja: Të ndalemi pak tek situata me Serbinë sepse atje tani ka një konflikt të madh që po vazhdon nga shoqëria civile. Patëm gjatë ditës një mysafir nga Serbia nga shoqëria civile i cili tha se Serbia është thuajse në prag të një revolucioni. Si mendoni se zhvillimet e fundit në Serbi mund të ndikojnë tek Kosova në këtë kohë?

Osmani: Mendoj se ajo çfarë po ndodhë në Serbi tani do të ndikojë në një rajon më të gjerë. Nuk do të thosha në mënyrë të veçantë vetëm Kosovë, por një rajon më të gjerë. Ashtu sikurse çfarë ndodhë me Rusinë që ndikojnë në një rajon më të gjerë apo mund të ndikojnë në tërë kontinentin evropian. Kur ke një vend që drejtohet nga një autokrat që nuk beson në vlerat e të drejtave të njeriut, në vlerat e rendit e ligjit, të shoqërisë civile, e lirisë së shprehjes, është e dukshme që gjithkund ka efekt negativ.

Regjimi i Vuçiçit ka përdorur propagandën si instrumentin kryesor për dekada, e ndoshta vetëm sa për t’iu rikujtuar shikuesve tuaj, kur Millosheviqi ndizte e bënte luftëra në Kroaci, Bosnje e Kosovë, ai kishte zgjedhur një person për të qenë ministër i Propagandës. E ai ishte Vuçiç. Nga e gjithë ish-Jugosllavia, ai kishte zgjedhur një person për të qenë ministër i Propagandës, gjatë luftës. E ai ishte Aleksandar Vuçiç, njeriu që sot është president. Prandaj, ai këtë e bën më si miri, që është propaganda. Fatkeqësisht e ka përdorur në mënyrën që shumë i ka bindur në perëndim që mund të qëndrojë në dy karrige, të jetë mes Rusisë dhe Perëndimit, por ai nuk qëndron në mes. Ai qëndron në një karrige. E ajo është karrigia ruse. Tjetra pjesë është aktrim i pastër, bazuar në përvojën e tij i të qenit ministër i Propagandës në kohën e Millosheviqit. Pra propaganda është ajo që tani ai përdor kundrejt edhe popullit të tij.

Gazetarja: Ndjesë që po iu ndërpres, por së fundi ishte edhe adresimi i tij i fundit televiziv për qytetarët që protestonin duke pretenduar se po përpiqen të gjejë një mënyrë për të pasur bisedime për atë se çfarë po ndodhë në Serbi.

Osmani: Po, ai këtë e thotë për kohë të gjatë, por edhe një herë, nuk dua të hyj në punët e brendshme të Serbisë, por sa për sqarim për shikuesit tuaj, qytetarët atje po protestojnë për rend e ligj, kundër korrupsionit dhe mendoj se kjo është një vlerë shumë e rëndësishme për secilën shoqëri, për të kërkuar për më shumë rend e ligj, apo për të protestuar kundër korrupsionit e për të kërkuar më shumë të drejta të njeriut dhe liri. Kjo është qenësore do të thosha, se do të kishte efekte pozitive në tërë rajonin sepse një ditë Serbia do të drejtohet nga njerëz që besojnë në këto vlera fondamentale, ashtu si edhe në rend e ligj e që do të thoshte edhe marrëdhënie më të mira me fqinjët.

Gazetarja: Mendoni se ajo që po ndodhë në Serbi tani mund të tërheq vëmendjen nga shkaktimi i telasheve në raportet kur është çështja tek Kosova?

Osmani: Në fakt Vuçiçi e ka bërë gjithmonë të kundërtën. Sa herë që ka telashe brenda vendit të tij, ai përpiqet të shkaktojë problem në Bosnje e Hercegovinë, në Kosovë apo në tërë rajonin. Kjo është taktika e tij e zakonshme. Ai përdor kartën e tij nacionaliste duke thënë shikoni se çfarë po bëj, po shpëtoj njerëz, pra një propagandë e zakonshme. E në këtë drejtim, nuk mendoj se ai përqendrohet më shumë tek protestuesit. Është e kundërta. Ai mundohet të çojë vëmendjen diku tjetër. Ai e ka bërë këtë edhe më parë, por sigurisht se jemi të gatshëm ta mbrojmë shtetin tonë e ta zmbrapsim çdo agresion që mund ta ketë në mendje.

Gazetarja: Një nga çështjet që raportojmë në RTV ëorld është edhe çështja e parlamentit, diçka që më duhet ta përmend sepse raportohet në lajme. Në kohën që po flasim, nuk po arrihet që të konstituohet Parlamenti duke zgjedhur kryetarin e Parlamentit të Kosovës. Si mendoni, ky paralizim e pengon Kosovën në realizimin e qëllimit për anëtarësim në BE?

Osmani: Derisa po flasim ka edhe një përpjekje në Parlament për tu konstituuar dhe fatkeqësisht qytetarët ende nuk kanë Parlamentin për të cilin kanë votuar. E gjithashtu edhe vullneti i qytetarëve i dalë nga zgjedhjet nuk është materializuar. Ashtu siç me të drejtë ju e përmendet në fillim të kësaj interviste, Kosova ka demokracinë më të fortë zgjedhore në rajonin tonë dhe gjithmonë kemi pasur bartje të lehtë të pushtetit dhe një demokraci shumë të fortë, sikurse gjatë zgjedhjeve, por edhe pas tyre.

Në këto momente, do të quaja se asgjë s’po ndodhë më shumë sesa që po ndodhë diçka. Pra çështja është se tani nuk ka marrëveshje politike mes partive për të formuar një koalicion të shumicës sepse partitë politike nuk duan të punojnë me njëra-tjetrën. Ka mungesë besimi dhe goxha polarizim do të thosha e që është fatkeqësi sepse Kosova po humbë shumë. Sa më shumë kalon koha pa Parlament e pa Qeveri që duhet të votohet nga Parlamenti, më shumë po humbim projekte të BE-së, dritare të reja të mundësive tani me administratën e re amerikane me të cilët kam punuar në takimet e mija me ta atje. Pra si Presidente e shtetit, si kreu i shtetit dhe përgjegjëse për politikë të jashtme, bëj shumë, por shumica e atyre marrëveshjeve që arrij, duhet të shkojnë në Parlament për ratifikim apo tek Qeveria për zbatim.

Pra ne kemi nevojë, qytetarët e Kosovës kanë nevojë për një Qeveri me fuqi të plotë e gjithashtu edhe një parlament efektiv që mund të shikojë punën e Qeverisë sepse siç thash, jemi një demokraci e fortë me tri nivele të qeverisjes që kanë funksionuar shumë deri më tani. Shpresoj dhe dua të shfrytëzoj mundësinë që edhe një herë të thërras të gjitha partitë politike që të vendosin interesin e shtetit në radhë të parë, e të lënë dallimet anash, për tu munduar të krijojnë një koalicion, një koalicion parlamentar që të mund të ecë përpara sepse bota nuk na pret, sepse dritaret e mundësive për vende si ne janë vetëm pak të hapura, prandaj mendoj se kapja e momentumit është çelësi.

Bota është shumë në lëvizje dhe nuk mund të pretendojmë se jemi prioritet i askujt në tavolinë për kohë të gjatë. Prandaj, kapja e këtij momentumi kërkon lidership dhe shpresoj se shumë shpejt ky lidership do të shfaqet tek liderët e partive politike e do të kemi parlament. Mendoj se kemi njerëz që thonë, shikoni kemi rastin e Belgjikës, kemi raste në Evropë, kemi Austrinë pa Qeveri që gjashtë muaj. E kuptoj këtë, por ne nuk e kemi atë luks për të pritur kaq gjatë sepse si vend që ka nevojë të ecë përpara, me kërkesën për shumë reforma, për anëtarësime në organizata ndërkombëtare, kemi nevojë të lëvizim më shpejt, sesa vendet që tashmë janë pjesë e këtyre organizatave e nuk përballen me vështirësitë me të cilat përballemi ne.

Gazetarja: Situata aktuale, mendoni se aktorët si Rusia, Kina, Irani, si interefrojnë ato në proceset politike që janë aktualisht në Kosovë e ndoshta përpiqen të influencojnë rajonin e Ballkanit?

Osmani: Parlamenti Evropian e misioni i vëzhguesve evropianë kanë ardhur në përfundim se Serbia e sigurisht edhe ndikimi rus atje, kanë pasur ndikim në zgjedhjet në Kosovë, përmes partisë politike serbe në Kosovë. Ka gjithmonë ndikime të tilla ilegale nga Serbia të projektuara e montuara nga Rusia. Nuk kemi parë ndikime nga Irani e Kina në aspektin politik sepse është e qartë se mënyra e tyre e ndikimit është tërësisht tjetër që është ekonomike e të tjera. Por ndikime të tilla nuk kemi lejuar që të kalojnë. Sfida më e madhe siç e thashë është se Serbia vazhdon t’i shohë shtetet përreth sikurse shtete të përkohshme.

Është e njëjtë një mendje imperialiste e hegjemoniste që ka Rusia. Përmes kësaj ata përpiqen të ndikojnë në proceset elektorale në Kosovë, Bosnje e Hercegovinë e në tërë rajonin dhe kanë vazhduar ta bëjnë këtë për një kohë të gjatë të ndihmuara nga Rusia. Tani nuk do të thosha se ka ndonjë ndikim tek ndonjë nga partitë e mëdha politike në Kosovë në atë se si sillen drejt krijimit të një Qeverie të re, apo si veprojnë drejt krijimit të një Parlamenti të ri. Më e shumta është në besimin personal që partitë politike kanë në atë se me kë duan e me kë nuk duan të punojnë. Nuk ka ndikim rus, serb apo ndonjë ndikim tjetër, pra është çështje lokale.

Gazetarja: Si përfaqësuese e shtetit tuaj, dhe qytetarëve tuaj, është e kuptueshme se jeni e fokusuar në planin e rritjes dhe anëtarësimin në BE sepse rritja është një faktor shumë i rëndësishëm. Cilat janë hapat që Kosova do të ndërmarrë për të bërë që kjo rritje të ndodhë për të lëvizur drejt anëtarësimit në BE?

Osmani: Qartësisht nuk kemi ndaluar asnjëherë së bëri detyrat tona të shtëpisë, qofshin ato reformat ekonomike, rendi e ligji apo reformat për ta bërë sistemin tonë e demokracinë tonë më të fortë. Edhe në këtë kohë kur ende nuk e kemi Parlamentin të konstituuar, Qeveria jonë vazhdon të punojë në atë drejtim. Për ne është thelbësore që hapat tonë drejt BE-së të mos ndalojnë asnjëherë. Nganjëherë janë hapa më të vegjël, nganjëherë janë të ngadalshëm, por asnjëherë nuk ka hapa prapa. Kjo është qenësore. Po punojmë fort me disa shtete nga BE-ja për t’ia dhënë Kosovës statusin e vendit kandidat sepse Kosova është vendi i vetëm në Ballkanin Perëndimor që nuk e ka ende statusin e vendit kandidat.

Është një proces shumë sfidues politik, por po punojmë në të. Mendoj se është interes strategjik i BE-së për t’i lejuar të gjitha vendet e Ballkanit Perëndimor për të lëvizur drejt anëtarësimit në BE, e ato janë gjashtë vende të këtij rajoni. Pesë prej tyre e kanë statusin e vendit kandidat e Kosova nuk e ka, qartësisht për shkaqe politike të brendshme që kanë disa vende. Nuk është se ato kanë diçka saktësisht kundër Kosovës, por kanë problemet e tyre të brendshme. Po mundohemi të gjejnë një rrugëdalje që të lëvizin përpara në atë proces në mënyrë që të hapim kapitujt e negociatave e pastaj i gjithë procesi do të shndërrohej në diçka shumë konkrete sepse ka detyra konkrete. Pra kjo është një fushë në të cilën po punojmë.

Sa i përket çështjeve ekonomike, kemi ende shumë për të bërë. Kosova ka vërtetë potencial, duke pasur popullatën më të re në Evropë, të cilët janë të jashtëzakonshëm, flasin shumë gjuhë, e që mund të udhëtojnë në botë, të marrin shumë përvojë, e vërtetë të kontribuojnë për Evropën në tërësi e jo vetëm në Kosovë në aspektin e rritjes ekonomike. Siç thash edhe dje duke folur me student këtu në Alpbach, është vetëm çështje kohe kur rajoni ynë do të shikohet si potencial e jo si barrë për BE-në. Potencial për më shumë siguri, rritje ekonomike, më shumë teknologji, rini e do të thosha edhe për më shumë shpirt evropian.

Pra një vend ku 97 për qind e tyre, vërtetë besojnë në Evropë e vlerat e saj, e që ishte besim i njëjtë sikurse themeluesit e saj. Jo Evropë e interesave apo Evropë e një makinerie parash. Evropë që qëndron mbi demokracinë, të drejtat e njeriut dhe rend e ligj. E kjo është ajo që gjithmonë e ka përkufizuar Evropën ndryshe, nga këto ato aktorët malinj që folëm pak më parë. Kjo është ajo përse duam t’i bashkohemi. Pra jo vetëm për rritjen ekonomike, ajo është e rëndësishme, por ne duam të fitojmë, ta fitojmë të jemi vërtetë evropianë e t’i kontribuojmë vlerave mbi të cilat qëndron BE-ja.

Gazetarja: Çfarë deklarate. E gjitha bazohet në një raport të barabartë këmbimi. Jep diçka e merr diçka e të pasurit një bashkëpunim të shëndetshëm. Faleminderit shumë zonja president. Ishte kënaqësi që ju patëm në RTP ëorld.

Osmani: Është gjithmonë kënaqësi të jem me ju.

The post “Nuk ka alternativë tjetër përveç BE-së”, Osmani: Ne nuk flirtojmë me fuqi të tjera! Rusia, Kina e Irani po përpiqen të destabilizojnë Ballkanin Perëndimor appeared first on Albeu.com.

UASHINGTON, 25 gusht /ATSH-AA/ – Presidenti i SHBA-së, Donald Trump tha se po mendon që emrin e Departamentit të Mbrojtjes të SHBA-së ta ndryshojë në “Departamenti i Luftës”.

Presidenti Trump iu përgjigj pyetjeve të mediave në lidhje me ngjarjet aktuale gjatë një takimi me presidentin e Koresë së Jugut, Lee Jae Myung në Zyrën Ovale.

“Ne e quajmë Departamenti i Mbrojtjes, por ndoshta do ta ndryshojmë emrin e tij. Do t’ju njoftojmë për këtë së shpejti. Gjatë Luftës së Parë Botërore dhe Luftës së Dytë Botërore quhej Departamenti i Luftës. Mendoj se pikërisht kështu është. Një ndjenjë brenda meje më thotë se do ta ndryshojmë emrin e këtij departamenti”, tha Trump.

Ai vuri në dukje se ka biseduar me personat përkatës për këtë çështje dhe shtoi se brenda disa javësh mund të njoftojë vendimin nëse do të riemërtohet apo jo Departamenti i Mbrojtjes.

Në deklaratat e mëparshme, Trump theksoi se do të preferonte të përdorte termin “Departamenti i Luftës” në vend të “Departamenti i Mbrojtjes”.   /os/

The post SHBA – Trump: Departamenti i Mbrojtjes mund të riemërtohet “Departamenti i Luftës” appeared first on Agjencia Telegrafike Shqiptare.

TIRANË, 25 gusht /ATSH/ Numri i të huajve me leje qëndrimi në Shqipëri ka arritur në 21.940 në fund të vitit 2024, duke shënuar një rritje prej 2,2% krahasuar me vitin 2023. Të dhënat e publikuara nga Instituti i Statistikave (INSTAT) pasqyrojnë një tendencë në rritje të interesit të të huajve për të jetuar dhe punuar në Shqipëri.

Sipas statistikave, meshkujt përbëjnë shumicën e të huajve me leje qëndrimi me 61,9%, ndërsa femrat zënë 38,1%. Grup-mosha më e përfaqësuar është ajo nga 30 deri në 39 vjeç, që përbën 24,6% të të huajve gjithsej.

Po sipas shifrave të INSTAT, numri i aplikimeve për leje qëndrimi në Shqipëri, në vitin 2024 shënoi rritje prej 6,0%, krahasuar me vitin 2023. Shtetasit nga Italia dhe India përbëjnë 28,8% të aplikimeve.

Të huajt me origjinë nga Kosova, Italia dhe Turqia përbëjnë numrin më madh të të huajve me leje qëndrimi në Shqipëri.

Shumica e të huajve kanë ardhur për qëllime punësimi, duke përbërë 54,3% të lejeve të qëndrimit, ndjekur nga bashkimi familjar me 24,5%, arsye të tjera me 16,3%, studimet me 4%, dhe qëllimet humanitare me 0,9%.

Në 2024 u identifikuan 1540 të huaj të parregullt në territorin e Shqipërisë, duke shënuar një rënie të konsiderueshme, krahasuar me 6630 në vitin 2023.

Të huajt në Shqipëri sipas vendit të origjinës

Në vitin 2024, të huajt me origjinë nga Kosova janë 4592 banorë, duke shënuar një rritje me 23,7%, krahasuar me 2023, ndërsa të huajt me leje qëndrimi në Shqipëri me origjinë nga Italia janë 3763 banorë, duke shënuar një rritje me 11,5%, krahasuar me 2023.

Sipas të dhënave, Evropa zë pjesën më të madhe me 65,5% (14.367 persona me leje qëndrimi), duke shënuar një rënie prej 5,6%, krahasuar me 2023; Azia ka shënuar rritje të ndjeshme me 20,1% (4545 persona); Amerika, Afrika dhe Oqeania rritje me 23,4% (3028 persona).

Të dhëna mbi të huajt me leje qëndrimi në Shqipëri si dhe të huajt e parregullt sigurohen nga Departamenti për Kufirin dhe Migracionin.

/m.q//r.e/

The post INSTAT: Numri i të huajve me leje qëndrimi në Shqipëri u rrit me 2,2% gjatë 2024-ës appeared first on Agjencia Telegrafike Shqiptare.

PENSILVANI, 25 gusht /ATSH-ANSA/ – Mbipesha dhe obeziteti shoqërohen me plakjen e përshpejtuar të trurit dhe atrofi celebrale veçanërisht tek burrat, sipas në studimi që përfshin mbi 46 000 njerëz në 15 projekte kërkimore.

“Të dhënat tregojnë se pesha e tepërt e trupit shoqërohet me plakjen e përshpejtuar të trurit dhe atrofi më të madhe të trurit, krahasuar me ato të një peshe normale. Këto ndryshime në tru mund të ngjajnë me ato të vërejtura në fazat e hershme të sëmundjes së Alzheimerit”, shpjegon Filippos Anagnostakis, autori i studimit.

“Kjo është veçanërisht e vërtetë për burrat: burrat mbipeshë treguan tru që dukeshin rreth tetë muaj më të vjetër, ndërsa ata me obezitet përjetuan rreth dy vjet më shumë plakje të trurit sesa bashkëmoshatarët e tyre me peshë normale”, shton ai.

Situata është e ndryshme për gratë. Çuditërisht, studimi zbuloi se gratë me peshë normale treguan më shumë shenja të plakjes së trurit dhe atrofisë së ngjashme me Alzheimerin sesa gratë mbipeshë dhe madje edhe sesa burrat me peshë normale.

“Ne e dimë që ndryshimet gjinore ndikojnë në rrezikun e zhvillimit të demencës ndryshe, por rrugët që shkaktojnë këto pabarazi mbeten të paqarta”, komenton Anagnostakis.

Një faktor tjetër kyç është mosha. Ndikimi i peshës trupore në plakjen e trurit u gjet të ishte më i theksuar tek subjektet më të reja, ndërsa tentonte të zvogëlohej me moshën.

“Rezultatet që morëm na ftojnë të rimendojmë ndikimin e obezitetit jo vetëm nga një perspektivë estetike, por edhe në lidhje me shëndetin e trurit”, përfundon studiuesi. /os/

The post FOKUS – Mbipesha dhe obeziteti përshpejtojnë plakjen e trurit appeared first on Agjencia Telegrafike Shqiptare.

LIMA, 25 gusht /ATSH-ANSA/ – Marina dhe Policia e Ekuadorit, në koordinim me Rojën Bregdetare të SHBA-së, sekuestruan 10,3 tonë kokainë, me vlerë të vlerësuar mbi 60 milionë dollarë, gjatë një serie operacionesh në det, dhe arrestuan 18 persona.

Ministria e Brendshme specifikoi se, gjatë operacioneve të përbashkëta, përveç drogës, u shkatërruan gjashtë anije të përdorura nga rrjetet kriminale për të transportuar kokainë.

Sipas hetuesve, ”ajo ishte menduar të përdorej nga grupet e armatosura për të kryer akte terroriste në Kolumbi”.

Kolumbia po përjeton krizën e saj më të keqe të dhunshme në një dekadë. Të enjten, dy sulme nga grupet rebele lanë 19 të vdekur dhe mbi 60 të plagosur, përfshirë civilë dhe personel ushtarak. /os/

The post LIMA – Ekuador-SHBA sekuestrojnë 10,3 tonë kokainë appeared first on Agjencia Telegrafike Shqiptare.

PRISHTINË, 25 gusht /ATSH/ Presidentja e Kosovës, Vjosa Osmani është takuar sot me presidentin e Austrisë, Alexander Van der Bellen, si dhe Zonjën e Parë, Doris Schmidauer, në Alpbach.

Osmani ka shkruar në Facebook se me presidentin austriak ka diskutuar mbi forcimin e marrëdhënieve mes dy vendeve, teksa ka thënë se Austria është një nga aleatët më të fortë të Kosovës.

“Me Presidentin e Austrisë, Alexander Van der Bellen, si dhe Zonjën e Parë, Doris Schmidauer, në Alpbach-un e bukur. Diskutime miqësore mbi forcimin e marrëdhënieve me Austrinë, një nga aleatët më të fortë të popullit tonë”, ka shkruar Osmani në Facebook.

Vjosa Osmani, gjatë qëndrimit të saj në Forumin Evropian Alpbach, u takua edhe me gjeneratën e të rinjve shqiptarë në Austri.

Osmani në një postim në Facebook ka shkruar se këta të rinj kanë një të përbashkët: dashurinë për vendin dhe vendosmërinë për ta bërë Kosovën më të mirë. /KosovaPress/

The post Osmani takon presidentin austriak: Austria, një nga aleatët tanë më të fortë appeared first on Agjencia Telegrafike Shqiptare.

TIRANË, 25 gusht /ATSH/ Akademia e Shkencave kujtoi sot arkeologun Hasan Ceka, në 125-vjetorin e lindjes. Ai njëkohësisht njihet edhe si njeriu që vuri themelet e arkeologjisë shqiptare.

Hasan Ceka studioi në Vjenë dhe pas kthimit në Shqipëri, në vitin 1930, punoi në Bibliotekën Kombëtare. Ai krijoi një koleksion arkeologjik, të cilin edhe sot e trashëgon Biblioteka e Institutit të Arkeologjisë. Në të njëjtën kohë përfaqësoj Shqipërinë pranë misioneve të huaja në Apoloni e Butrint.

Në vitin 1947 drejtoi ekspeditën e parë arkeologjike në Apoloni si dhe punën për krijimin e Muzeut Arkeologjik Etnografik në Tiranë. Në 1956-të rikthehet në Apoloni dhe do t’i kushtonte qytetit antik tërë veprimtarinë e tij kërkimore e studimore. Prof. Cekës i takon në të njëjtën kohë edhe merita e zbulimit të një kompleksi arkitektonik në afërsi të ndërtesës së Agonoteteve, gjithashu edhen nimfeut të qytetit dhe e shumë monumenteve të tjera.

Krahas gërmimeve në Apoloni prof. H. Ceka tregoi një kujdes të veçantë për grumbullimin dhe ruajtjen e trashëgimisë sonë monetare antike e mesjetare. Ai ishte një specialist i studimit të monedhave antike, dhe këto studime ai i kurorëzoi me botimin e veprës së njohur “Probleme të numizmatikës ilire” të botuar më 1965 si dhe gjithashtu ai përgatiti edhe veprën “Monetat e Dyrrahut dhe Apollonisë”.

Prof. H. Ceka ishte njohës i mirë i greqishtes së vjetër dhe latinishtes duke u bërë kështu një nga bashkautorët kryesorë në përkthimin dhe përgatitjen në shqip të vëllimit “Ilirët dhe Iliria tek autorët antikë”.

Ai është autor i shumë artikujve, studimeve e kumtesave të botuara në revistat shkencore brenda e jashtë vendit. Këto studime janë përmbledhur e botuar në vëllimin “Në kërkim të historisë ilire”.

Prof. Hasan Ceka u nda nga jeta më 2 nëntor 1998.

Hasan Ceka themeluesi i arkeologjise shqiptare

1 nga 2

The post Përkujtohet Hasan Ceka, themeluesi i arkeologjisë shqiptare appeared first on Agjencia Telegrafike Shqiptare.

TIRANË, 25 gusht /ATSH/ Në përfundim të ekspozimit në Muzeun e Historisë Natyrore në Vjenë, objekti muzeor arkeologjik “Kalorësi i Babunjës” ka arritur të shihet nga 219.397 vizitorë gjatë tre muajve.

Lajmin për numrin e vizitorëve e ka deklaruar drejtoresha e këtij muzeu, prof. Katrin Vohland.

Kalorësi i Babunjës, vepër arti me vlera unike, është pjesë e fondeve arkeologjike të Akademisë së Shkencave të Shqipërisë.

Ekspozimi u mundësua nga marrëveshja e nënëshkruar mes Institutit të Arkeologjisë, pjesë e ASHSH, dhe Muzeut të Historisë Natyrore të Vjenës. Krahas ekspozimit të Kalorësit të Babunjës, u organizua edhe një konferencë shkencore e përbashkët me palën austriake me fokus këtë zbulim unik 2600-vjeçar të arkeologjisë, ku morën pjesë mbi 120 studiues nga mbarë bota. Shqipëria u përfaqësua nga akad. Adem Bunguri, prof. Neritan Ceka, prof. Bashkim Lahi dhe prof. asoc. Eduard Shehi.

Objekti qëndroi i ekspozuar në “Sallën e Artë” të Muzeut të Historisë Natyrore në Vjenë nga data 13 maj deri më 31 korrik 2025.

Pas suksesit të ekspozitës, “Kalorësi i Babunjës” është rikthyer në Tiranë më 4 gusht 2025 dhe do të vendoset për ekspozim të përhershëm në Muzeun Arkeologjik, pjesë e Institutit të Arkeologjisë pranë ASHSH.

Kaloresi i Babunjes ne ekspoziten e Vjenes

1 nga 8

The post “Kalorësi i Babunjës”, numër rekord vizitorësh në Vjenë appeared first on Agjencia Telegrafike Shqiptare.

UASHINGTON, 25 gusht /ATSH-ANSA/ – Kina duhet t’i furnizojë Shtetet e Bashkuara me magnet (lëndë e parë që përdoret në industri), përndryshe do të na duhet të vendosim tarifa prej 200% ose diçka të tillë, deklaroi presidenti amerikan Donald Trump.

Deklarat e Trump u bë ndërsa priti në Zyrën Ovale presidentin e Koresë së Jugut, Lee Jae Myung.

“Miliarda dollarë, kryesisht nga vendet që kanë përfituar me padurim nga Shtetet e Bashkuara, do të fillojnë të rrjedhin në SHBA”, deklaroi Trump në Truth Social.

Këto tarifa zëvendësojnë, për ekonomitë e prekura, tarifat prej 10% të aplikuara që nga prilli praktikisht në të gjitha produktet që hyjnë në Shtetet e Bashkuara.

Sipas presidentit amerikan, qëllimi është të ribalancohet tregtia midis SHBA-së dhe partnerëve të saj, të cilët, thotë ai, “përfitojnë” nga fuqia kryesore ekonomike në botë. /os/

The post SHBA – Trump: Kina të na japë lëndën e magnetit, përndryshe tarifa 200% appeared first on Agjencia Telegrafike Shqiptare.

Kompanitë e miliarderit amerikan Elon Musk, X dhe xAI, kanë ngritur padi kundër Apple dhe OpenAI, duke i akuzuar ato për pengimin e konkurrencës në fushën e inteligjencës artificiale.

Kompanitë X dhe xAI ngritën padi në gjykatën federale, duke pretenduar se vendimi i Apple për të integruar OpenAI në sistemin operativ të telefonave inteligjentë të iPhone “dëmton konkurrencën dhe i privon konsumatorët nga e drejta për të zgjedhur”.

Në padinë e ngritur në Teksas, pretendohet se Apple dhe OpenAI kanë bllokuar tregun për të ruajtur monopolet e tyre dhe për të parandaluar kompani inovative si X dhe xAI të konkurrojnë.

Sipas padisë, Apple dhe OpenAI kërkojnë të “ndalojnë skemat e tyre antikonkurruese” dhe “të rikuperojnë miliarda dollarë dëmshpërblim”.

Gjithashtu pretendohet se Apple në dyqanin e saj të aplikacioneve është përmbajtur nga paraqitja në pah e aplikacionit X dhe chatbot-it të inteligjencës artificiale Grok të zhvilluar nga xAI për shkak të një marrëveshjeje të veçantë me OpenAI.

Një zëdhënës i OpenAI në një deklaratë lidhur me çështjen tha se padia është “në përputhje me tendencën e vazhdueshëm të ngacmimit të Musk-ut”.

Edhe zëdhënësi i Apple  mbrojti idenë se App Store është projektuar në mënyrën për të qenë “i drejtë dhe i paanshëm” dhe se ai “duke përdorur kritere objektive i ofron aplikacionet përmes listave, rekomandimeve algoritmike dhe renditjeve për përzgjedhura nga ekspertët”.

Këtë muaj, Musk përmes një postimi në llogarinë e kompanisë X me bazë në SHBA tha se “Apple paraqet një sjellje që e bën të pamundur për çdo kompani të IA-së përveç OpenAI të arrijë vendin e parë në App Store. Kjo është shkelje e qartë e antitrustit”.

Ai tha se xAI do të ndërmmarrë veprime ligjore.

Muaji shtator shënon nisjen zyrtare të legjislaturës së re parlamentare në Shqipëri, pas zgjedhjeve të përgjithshme të mbajtura më 11 maj 2025. Me një përbërje të re prej 140 deputetësh, nga të cilët 72 janë për herë të parë në parlament, sesioni i ri pritet të hapet brenda 20 shtatorit, duke shënuar një moment kyç për jetën politike dhe institucionale të vendit.

Rezultatet e zgjedhjeve sollën një shumicë të re parlamentare, me Partinë Socialiste që siguroi 83 mandate, Partinë Demokratike me 50 mandate dhe pjesën tjetër të ndarë mes partive më të vogla si Partia Socialdemokrate, Partia Mundësia, Lëvizja Bashkë dhe Nisma “Shqipëria Bëhet”.

Me mbylljen e mandatit të Kuvendit aktual më 9 shtator, parlamenti i ri do të hapë dyert pasi Presidenti i Republikës të përcaktojë datën me një dekret, që sipas Kushtetutës, nuk mund të vonohet më shumë se 10 ditë. Seanca hapëse do të jetë vetëm konstituive, pa agjendë dhe pa debate. Rregullorja e Kuvendit përcakton që drejtimin e seancës së parë e merr deputeti më i vjetër në moshë. Edhe në këtë legjislaturë, radha i takon Sali Berishës.
Në rast refuzimi, stafetën e marrin Tritan Shehu ose Vasil Llajo, deputeti socialist i listës së Vlorës. Menjëherë pas hapjes, Kuvendi nis verifikimin e mandateve dhe më pas 140 deputetët e rinj do të bëjnë betimin.

Për socialistët fitues, sfida e parë mbetet formimi i qeverisë së re. Brenda 10 ditëve nga nisja e legjislaturës, Kryeministri Edi Rama do të dorëzojë në Kuvend programin qeverisës dhe përbërjen e Këshillit të Ministrave. Zyrtarizimi kërkon të paktën 71 vota. Pas votëbesimit, Kushtetuta kërkon që qeveria të bëjë betimin përpara Presidentit të Republikës. Tradita politike e së majtës e paraprin këtë proces me Asamblenë Kombëtare, e cila këtë vit është planifikuar në ditët e fundit të muajit gusht. Në këtë forum priten njoftimet për kabinetin “Rama 4”, ndryshimet në parti dhe në grupin parlamentar.

The post Parlamenti i ri gati për nisje/ Data e seancës së parë dhe tre emrat e mundshëm të drejtuesit appeared first on Albeu.com.

Prindërit dhe gjyshi i vajzës 4-vjeçares shqiptare që u mbyt në pishinën e një vile në Paxos janë liruar me kusht. Prokurori kishte ngritur padi penale kundër tre të afërmve të vajzës për ekspozimin e një të mituri në rrezik, pasi nëna, babai dhe gjyshi ishin në shtëpi kur 4-vjeçarja u zhduk.

Ata u liruan me kushtin kufizues të ndalimit të daljes nga vendi. Funerali i vajzës pritet të zhvillohet të martën më 26 gusht në Loggos, Paxos. Nga informacionet aktuale dyshohen dy skenarë të mundshëm: ose të gjithë anëtarët e familjes po flinin në kohën kur vajza e vogël doli nga shtëpia, ose vetëm babai po pushonte ndërsa nëna po bënte punët e shtëpisë, duke rezultuar në humbjen e vogëlushes.

Fëmija, i cili dyshohet se fillimisht po luante në dhomën e ndenjes, duket se ka dalë në lagje vetëm dhe ka ecur drejt vilës, ku më vonë u gjet në pishinë. Pyetjet thelbësore që po hetohen kanë të bëjnë me kohën kur vajza e vogël doli nga shtëpia dhe çfarë ndodhi në periudhën afërsisht 50-minutëshe – nga ora 16:00, kur familja kuptoi se ajo ishte zhdukur, deri në orën 16:50, kur u gjet e vdekur.

“Jam vërtet e shkatërruar. Policia mori burrin tim, fëmijën tim dhe dhëndrin tim për të shkuar në prokurori. Jam në shok, jam vetëm, jam gati të vdes”, tha gjyshja e 4-vjeçares për mediat greke.

The post 4-vjeçarja u mb*t në pishinë në Greqi, lirohen me kusht prindërit dhe gjyshi i të miturës shqiptare, nesër përcillet në banesën e fundit appeared first on Albeu.com.

Aktorja shumë e dashur për publikun shqiptar dhe turk, Selin Demiratar, e njohur për rolin e saj si Nermini në serialin e famshëm “Jetë e Hidhur”, vazhdon të mbetet në qendër të vëmendjes.

Në llogarinë e saj aktorja ndan shpesh momente nga jeta e përditshme, duke e prezantuar veten në mënyra të ndryshme dhe larg imazhit të saj klasik nga seriali.

Edhe pse kanë kaluar vite që nga koha kur ajo interpretoi rolin që e bëri të njohur, Selin vazhdon të shkëlqejë me pamjen e saj e bukur, elegante dhe në super formë.

The post FOTO/ E mbani mend? Ja sa paska ndryshuar Nermini appeared first on Albeu.com.

Një aksident i rëndë është regjistruar mbrëmjen e sotme në Vorë. Mësohet se rreth orës 20:30 në dalje të Vorës është përplasur për vdekje një këmbësor. Viktima është përplasur nga një makinë dhe si pasojë e plagëve nuk ka mbijetuar.

Viktima është një 66-vjeçari i identifikuar me inicialet K.L. Shoferi i mjetit, një 53-vjeçar është shoqëruar nga policia. Grupi hetimor ndodhet në vendngjarje dhe po punon për sqarimin e rrethanave të aksidentit.

“Vorë/Informacion paraprak. Me datë 25.08.2025, rreth orës 20:30, në dalje të Vorës, automjeti me drejtues shtetasin J. T., rreth 53 vjeç, ka përplasur këmbësorin shtetasin K. L., rreth 66 vjeç, i cili për pasojë ka humbur jetën.

Drejtuesi i automjetit është shoqëruar në Komisariat për veprime të metejshme. Grupi hetimor ndodhet në vendngjarje dhe po punon për sqarimin e rrethanave të aksidentit,” thuhet në njoftimin e policisë.

The post Aksident i rëndë në Vorë, makina përplas për vdekje 66-vjeçarin appeared first on Albeu.com.

“Një vit burg kush djeg flamurin amerikan’’ – ky është urdhëri që ka propozuar presidenti amerikan Donald Trump.

Trump ka nënshkruar sot një urdhër ekzekutiv që ngarkon Departamentin e Drejtësisë të hetojë rastet e djegies së flamurit amerikan, duke propozuar që autorët të akuzohen për nxitje të trazirave dhe të dënohen me një vit burg pa lirim të parakohshëm.

Sipas këshilltarëve të tij, ky veprim nuk bie ndesh me Amendamentin e Parë, megjithëse Gjykata Supreme në vitin 1989 e cilësoi djegien e flamurit si “fjalim simbolik” të mbrojtur nga kushtetuta.

Trump është shprehur prej kohësh pro ndalimit të kësaj praktike. Sondazhet tregojnë se shumë amerikanë mbështesin ndalimin e djegies së flamurit, me 59% që e konsiderojnë atë të papranueshme edhe gjatë protestave.

The post Trump propozon urdhër të ri ekzekutiv: Burg kush djeg flamurin e SHBA appeared first on Albeu.com.

Konrad Harder do të jetë lojtari më i ri i Milanit, ndërsa është arritur marrëveshja për blerjen e tij nga Sportingu i Lisbonës. Përfaqësuesit e lojtarit janë takuar sot me drejtuesit e kuqezinjve dhe mbetet vetëm mbërritja e Harder në Milano.

Do të jetë transferim përfundimtar dhe jo huazim siç raportohej fillimisht. Milani duhet të paguajë 24 milionë euro bashkë me bonuset, që mund të shkojnë deri në 3 milionë euro.

20-vjeçari mund të quhet edhe basti i madh i Igli Tares dhe drejtuesve të tjerë. Besimi është i madh që do bëjë mirë në Seria A, teksa kontrata e firmosur prej tij do të jetë 5-vjeçare me pagë 2 milionë euro në sezon.

Harder laergohet me 12 gola të shënuar dhe 7 të tjerë të asistuar te Sportingu. Milani po kërkonte prej kohësh për një futbollist për qendrën e sulmit, dhe kështu e ka realizuar objektivin me sukses. Më parë Viktor Bonifejs dhe Rasmus Hojlund qëndronin po ashtu si alternativa.

The post Basti i madh i Tares, Milani blen sulmuesin e ri për 24 milionë euro appeared first on Albeu.com.

TIRANË, 25 gusht /ATSH/ Rruga Shëngjin-Velipojë është kthyer tashmë një nga akset më panoramike të vendit, me potencial për zhvillimin e turizmit.

Përmes rubrikës “Beautiful Albania”, Kryeministri Edi Rama ndau sot në rrjetet sociale pamje panoramike me perëndimin e diellit nga rruga e re, e cila lidh dy zonat bregdetare, Shëngjinin dhe Velipojën.

Nga porti i Shëngjinit rruga i ngjitet shpatit me një lartësi 100-120 metra mbi nivelin e detit dhe ruan të paprekur plazhin e Shëngjinit, Ranën e Hedhun dhe plazhet e tjera të zonës. Më pas lidhet me infrastrukturën e Velipojës. Kjo rrugë lidh dy qendrat kryesore turistike bregdetare.

Përmirësimi i infrastrukturës rrugore ekzistuese si dhe ndërtimi i rrugëve të reja, që lidhin më shpejt qytetet me zonat turistike bregdetare, janë prioritete të punës së qeverisë.

/e.i//r.e/

The post Rama ndan pamje të rrugës panoramike Shëngjin-Velipojë appeared first on Agjencia Telegrafike Shqiptare.

TIRANË, 25 gusht /ATSH/ Ministria e Mbrojtjes informoi mbrëmjen e sotme për situatën e zjarreve në vend.

Sipas Qendrës Kombëtare Operacionale e Emergjencave Civile (QKOEC) në AKMC, prej orës 09:00, deri në orën 16:30, datë 25.08.2025, janë raportuar 10 vatra zjarri nga të cilat 6 janë shuar dhe 4 të tjera janë aktive.

Në Pishë-Poro të Vlorës, zjarri i rënë në një terren ranor në fshatin Delisuf të njësisë administrative Novoselë është favorizuar nga era dhe ka marrë një shtrirje të madhe në drejtim të fshatit Pishë-Poro.

Terreni ranor nuk mundëson operimin me mjete zjarrfikëse edhe pse 3 automjete zjarrfikëse me 12 efektivë, 4 forca AdZM dhe 10 forca bashkiake ndodhen në zonë.

Në mbështetje të forcave në terren kanë fluturuar nga Baza e Kuçovës katër helikopterë, dy të Forcës Ajrore shqiptare dhe dy të Emirateve të Bashkuara Arabe.

Vatrat e tjera aktive janë ato në Parkun Natyror Gërmenj, njësia administrative Leskovik të bashkisë Kolonjë, ku zjarri është riaktivizuar ditën e sotme në afërsi të piramidës 15. Në terren janë të angazhuar forcat zjarrfikëse nga MZSH Kolonjë.

Në fshatin Pezë-Helmës, njësia administrative Pezë, bashkia Tiranë, vazhdon të jetë aktiv zjarri në disa vatra në një terren pa rrugëkalime dhe me bimësi të dendur që nuk mundëson ndërhyrjen e forcave zjarrfikëse. Në terren ndodhen në gatishmëri të pandërprerë 24 orë zjarrfikësit lokalë, kryesisht pranë disa banesave që ndodhen më afër zonës, por larg vetë vatrës së zjarrit.

Në fshatin Bogovë, njësia administrative Bogovë, bashkia Skrapar, është aktivizuar një vatër zjarri në një hangar ku më pas është shpërndarë në një sipërfaqe pyjore me pishë. Në vendngjarje po operojnë 3 grupe shërbimi nga MZSH Skrapar. Situata raportohet nën kontroll dhe nuk paraqet rrezik për banesat.

Vatrat e izoluara plotësisht raportohen: Në fshatin Krenze, njësia administrative Shtiqën, bashkia Kukës; Në fshatin Reç, njësia administrative Shkrel, bashkia Malësi e Madhe; Në fshatin Bisht-Kamëz, njësia administrative Katund i Ri, bashkia Durrës; Në fshatin Ishull-Shëngjin, njësia administrative Shëngjin, bashkia Lezhë; Në Lagjen 18, Rajoni Nr. 1, bashkia Korçë; Në zonën e Shkozës, njësia administrative Nr. 1, bashkia Tiranë.

/e.i//r.e/

The post MM: 6 vatra zjarri të shuara dhe 4 të tjera aktive appeared first on Agjencia Telegrafike Shqiptare.