Pushimet përfunduan dhe nisi puna. Disa nga futbollistët e njohur të kombëtares shqiptare u paraqitën në skuadrat e tyre në fillimin e fazës përgatitore për sezonin e ardhshëm, e padyshim që kjo pjesë e verës do të jetë e vështirë.

Berat Gjimshiti po vazhdon për momentin tek Atalanta, tashmë me trajnerin e ri Ivan Juriç, që ka zëvendësuar Xhampiero Gasperinin tashmë tek Roma.

Kapiteni I kombëtares shqiptare, dhe njëri nga kapitenët e skuadrës bergamaske, është në formë mjaft të mirë, siç e tregoi edhe edicionin e kaluar duke qenë një nga më të mirët për ekipin që siguroi Championsin dhe pretendoi edhe për titull.

Ende nuk dihet nëse Gjimshiti do të mbetet tek Atalanta, apo do të shkojë diku tjetër, ndërsa ka pasur zëra për një kalim tek Al Ain në Emiratet e Bashkuara Arabe.

Në krye të detyrës, veçse me fanelë tjetër, Ardian Ismajli. Mbrojtësi tjetër i kombëtares është tashmë pjesë e Torinos, me të cilën ka nisur seancat stërvitore.

Klubi piemontez vendosi të përgatitjet të ishin të hapura për tifozët, të cilët vërshuan për të parë skuadrën e zemrës.

Mes atyre që firmosi autografe apo bëri fotografi me publikun ishte edhe Ismajli. Së fundmi, Adrion Pajaziti, jo vetëm ka nisur stërvitjen me Hajdukun në Kroaci, por edhe është aktivizuar në një ndeshje përgatitore.

Futbollisti I kombëtares luajti që nga minuta e 66-të në miqësoren që skuadra nga Spliti e fitoi 1-0 ndaj rivalit modest Posushje./abcnews.al

Frika ekzistonte, por nuk donim ta besonim. Gjithsesi, e keqja ndodhi dhe Egnatia u eliminua nga Championsi që në raundin e parë, dhe pasi pësoi një humbje të rëndë 5-0 në Islandë.

Kampionia e Shqipërisë, që pati shpresë për kualifikim pas suksesit 1-0 në ndeshjen e parë, u dorëzua plotësisht që në 45 minutat e para, kur pësoi 4 gola nga skuadra vendase, Breidablik.

Goli I parë u shënua që në minutën e 15-të nga Torsteinson, dhe Egnatia nuk e mori veten deri në pushim, ndërsa pësoi sërish gol në pjesën e dytë.

Rrjetat e tjera ishin nga Torsteinson në 27’, Einarson në 23’ e 38’ dhe Omarson në 69’.

U duk e pashpjegueshme mënyra sesi luajti skuadra nga Rrogozhina, e cila në fushën e saj tregoi një fytyrë krejt tjetër duke e dominuar plotësisht kundërshtarin.

Duhet thënë se ekipi ynë pati dy mungesa të rëndësishme si Ndrecën e dëmtuar dhe Lushkjen e pezulluar, por padyshim kjo nuk mund të vlejë si argument për një humbje të tillë pa bërë as rezistencën më të vogël.

Tashmë, kampionia e Shqipërisë do të vazhdojë në turin e dytë të Ligës së Konferencës në datat 24 e 31 korrik, e do të ndeshet me humbësen e çiftit të Championsit, Dinamo Minsk-Ludogorec.

Kontratën e rinovoi dhe idetë i ka tepër të qarta.

Kristiano Ronaldo nuk ka ndërmend të dorëzohet as tani në moshën 40-vjeçare, dhe objektivat mund të realizohen sidomos me një trajner të zotin në krye të ekipit të tij, Al Nasr.

Klubi saudit njoftoi se ka arritur marrëveshje me teknikun portugez, Zhorge Zhezus, I cili është vërtet një veteran I profesionit, por e njehj mirë futbollin dhe Arabinë.

Mbi të gjitha, njihet mirë dhe pëlqehet nga Ronaldo, I cili duket se ka nxitur Al Nasrin për ta caktuar në detyrë.

Akordi mes tyre është njëvjeçar, pra deri në verën e vitit të ardhshëm, por padyshim me mundësi për t’u rinovuar.

Zhezus ka fituar shumë në karrierë, ndonëse nuk është se ka punuar me CR7-ën.

Me Benfikën u shpall tri herë kampion I Portugalisë si dhe fitoi kupa e Superkupa, me Bragën mori Kupën Intertoto, tek Sportingu fitoi Superkupën e Portugalisë dhe Kupën e Ligës, me Flamengon fitoi Kampionatin Brazilian dhe Kupën Libertadores, ndërsa në Arabinë Saudite u shpall kampion në 2024 me Al Hilalin, duke fituar edhe Kupën e Mbretit si dhe tri herë Superkupën e vendit.

Ronaldo ende nuk ka fituar ndonjë trofe të rëndësishëm dhe zyrtar tek Al Nasr, edhe pse ka shënuar gola pa fund.

Superylli portugez e synon titullin kampion si dhe Championsin e Azisë, si dhe që të arrijë nivelin mitik të 1000 rrjetave si futbollist profesionist./abcnews.al

Ka marrë edhe më shumë para, por jo vetëm për një muaj.

Çelsi është një skuadër angleze, në një Premier Ligë ku kampionia fiton plot 175 milionë paundë në sezon, por gjithsesi, paratë që u futën në xhep në Kupën e Botës për Klubet nuk janë aspak për t’u hedhur poshtë.

Përkundrazi.

Blutë e Londrës, që fituan për herë të parë këtë trofe pas finales ndaj Paris SG në stadiumin “Metlajf” të Nju Xhersit, arkëtuan një shifër prej afërsisht 100 milionë eurosh.

BBC britanike e jep përfitimin në 84 milionë paundë, apo rreth 114 milionë USD, ndërsa televizioni amerikan CBS, shkruan se përfitimet ishin 103.5 milionë euro apo 121 milionë USD.

Në çdo rast janë shumë, aq më tepër për vetëm një muaj punë.

Për më tepër, sipas televizionit të mësipërm amerikan, Çelsi ka fituar në total nga aventura amerikane plot 154 milionë USD, duke përfshirë edhe të ardhura që nuk lidhen vetëm me pjesëmarrjen.

Të mos harrojmë se Blutë e Londrës morën 164 milionë paundë për vendin e katërt në Premier Ligë, që do të thotë 220 milionë USD.

Trajneri Enzo Mareska pritet të bëjë blerje të fuqishme, që skuadra e tij të pretendojë tituj të mëdhenj edicionin e ardhshëm, pse jo kampionatin anglez dhe Championsin.

Përse të mos I synojë një ekip që mundi Paris SG 3-0 në finalen e Botërorit të Klubeve duke merituar gjithçka?

Pritshmëritë kanë qenë gjithmonë të mëdha, por asnjëherë nuk janë shpërblyer. Të tilla janë edhe në këtë sesion të merkatos së verës për Armando Brojën, që duhet të bëjë një zgjedhje të rëndësishme, ndoshta atë të karrierës.

Sulmuesi kuqezi do të largohet nga Chelsea. Për këtë nuk ka asnjë dyshim. Një tjetër gjë e sigurtë është se nuk do të ketë më huazim, ndërsa për t’u mësuar mbetet skuadra e ardhshme e Brojës.

Si gjithmonë në këtë periudhë, lajmet janë të shumta, por pista që është forcuar shumë gjatë ditëve të fundit është ajo e Bundesligës.

“The Athletic” në Angli ka zbuluar së fundmi për një interes të shtuar të dy klubeve të mëdhenj të kampionatit gjerman, Lajpcig dhe Stuttgart.

I pari ishte folur prej kohësh, ndërsa në garë është futur edhe një tjetër skuadër, që kërkon shërbimet e sulmuesin 24 vjeçar.

Bundesliga mund të jetë skena e duhur për Armando Brojën, pas sezoneve të fundit zhgënjyes, për shkak të dëmtimeve të rëndë.

Huazimi te Everton në edicionin e fundit të Premier League nuk shkoi si duhet për futbollistin shqiptar, që qëndroi për muaj të tërë jashtë fushe, ndërsa edhe pas rikuperimit i kishte minutat me pikatore.

Për këtë arsye, ashtu si Chelsea edhe vetë Broja kërkon një sistemim të përhershëm.

Këtë mision ia lehtësojnë kampionët e rinj të botës, që kanë vendosur të ulin ndjeshëm pretendimet financiare për kartonin e tij. Vlerësimi i parë është 20 milion euro, por Blutë e Londrës mund të zbresin më poshtë nëse iu vjen një ofertë serioze për sulmuesin shqiptar./abcnews.al

Jasir Asani mund të jetë futbollisti më i mirë i muajit në ligën e Koresë së Jugut.

Ylli kuqezi është përzgjedhur për çmimin, ndërsa ende ka mundësi të transferohet në Japoni.

Momenti i madh erdhi. Adrion Pajaziti u prezantua si lojtar i Hajdukut, vetëm një ditë pasi u dha njoftimi zyrtar për arritjen e marrëveshjes.

Futbollisti I kombëtares shqiptare doli në konferencë shtypi përpara gazetarëvë në stadiumin “Poljud” në Split, në krah të drejtorit sportiv, Goran Vuçeviç, dhe të lojtarit tjetër të ri, Fran Karaçiç.

Drejtori I Hajdukut fillimisht u uroi mirëseardhjen dhe deklaroi se pret që ata ta justifikojnë besimin e dhënë nga klubi.

Vetë Pajaziti foli I dyti dhe nuk tha shumë fjalë.

“Jam shumë i lumtur dhe krenar. Unë dhe gjithë familja ime. Ky është një klub shumë I madh dhe mezi po pres që të filloj. Një ditë më parë pata stërvitjen e parë me ekipin dhe dua që të shkoj përpara dhe që të kem një sezon sa më të mirë”.

Pajaziti luajti sezonin e kaluar te Gorica në Ligën e Parë të Kroacisë, duke qenë një nga zbulimet më të mëdha, me 3 gola e sidomos me ndikim të madh në lojë.

Disa klube si Hajduku, Olimpija e Ljubljanës apo Rijeka, kampionia e re kroate, patën konkurrenëcë për 23-vjeçarin shqiptar, I cili përfundimisht do të veshë fanelën e të bardhëve të Splitit në Dalmaci.

Pa shumë zhurmë, por me talentin dhe nuhatjen e tij për golin e kishte shtruar rrugën e tij në futbollin e madh botëror.

Por karriera e Diogo Jota është ndërprerë në mënyrën me tragjike të mundshme pas një sezoni, që ishte më i miri për të brenda dhe jashtë fushe.

Sulmuesi portugez, i cili humbi jetën bashkë me vëllain e vogël futbollist në një aksident rrugor në Spanjë, këtë të enjte, hodhi hapat e para në fushat e blerta në vendlindjen e tij në Portugali.

Skuadra e parë si profesionist ishte Pakos de Ferreira, përpara se të evidentohej dhe të transferohej te gjigandët e Porto në moshën 19 vjeçare.

Pas dy vitesh në “Dragao”, Diogo Jota u ble nga Atletiko Madrid. Në La Liga ishte kalimthi, pasi në të njëjtin sezon u transferua në Premier Lige te Volverhapton.

Kjo do të ishte lëvizja e duhur, ku edhe nisi ngjitja në karrierën e tij.

Sulmuesi tregoi të gjithë kualitetin me “Ujqërit”, duke tërhequr vëmendjen e Jurgen Klopp dhe Liverpool, që në vitin 2020 paguan 44.7 milion euro për të marrë shërbimet e tij.

Me “The Reds” portugezi luajti 182 ndeshje, duke shënuar 65 gola dhe dhënë 26 asiste.

Po ashtu, me skuadrën angleze fitoi 3 tituj kampion në Premier League, përfshirë edhe atë në sezonin e fundit.

I suksesshëm edhe me kombëtaren e Portugalisë, ku vetëm pak javë më parë festoi trofeun e Ligës së Kombeve.

Për fat të keq, ky do të ishte titulli i fundit për Diogo Jota, që një udhëtim i zakonshëm do të kthehej për të dhe familjen e tij në një tragjedi të vërtetë. Për ta thënë në gjuhën e futbollit, që ai i kushtoi gjithçka, Diogo Jota humbi sfidën më të rëndësishme, atë për jetën…

Gjatë punimeve të Asamblesë së Përgjithshme të Zakonshme, Presidenti i FSHF-së, Armand Duka, njoftoi këtë vendim, duke e konsideruar si një hap të rëndësishëm, me të ardhurat që do të vijnë nga komercializimi.

“Do të rrisim me 30% të ardhurat nga komercializimi dhe, në vitin 2026, do të shpërndajmë 3 milionë euro për klubet e Kategorisë Superiore dhe të Parë, si mbështetje direkte financiare për përmirësimin e funksionimit të tyre”, – u shpreh Presidenti Duka gjatë fjalës së tij në Asamble.

Mbështetja financiare do të shpërndahet gjatë periudhës ndërmjet dy asambleve dhe përbën një hap të rëndësishme për rritjen e standardeve në menaxhimin e klubeve, rritjen e cilësisë së garës dhe krijimin e kushteve më të mira për lojtarët, trajnerët dhe stafet teknike./abcnews.al

Ftesa u është bërë, ndonëse sinqerisht shpresa ka gjithnjë më pak.

Dy lojtarë me origjinë shqiptare, që kërkohen nga trajneri kuqezi Sylvinho, ishin protagonistë të mëdhenj për Gjermaninë në finalen e Kampionatit Europian U21.

Nelson Vajper dhe Brajan Gruda shëuan në gjysmëfinalen e fituar 3-0 ndaj Francës dhe tashmë objektivi i vetëm që mbetet është titulli kontinental.

Vajper, sulmues me nënë shqiptare dhe baba gjerman, ishte titullar dhe realizoi për 1-0 që në minutën e 8-të.

Gjermanët dyfishuan shpejt shifrat kur sulmuesi tjetër, Voltemade, realizoi në 14’.

Vajper u zëvendësua më pas, ndërsa Brajan Gruda hyri në fushë në minutën e 72-të duke lënë shenjën e tij.

Djali i ish-futbollistit të Vllaznisë, Bujar Gruda, vulosi rezultatin në minutën e tretë shtesë të gjysmëfinales.

Në të vërtetë, Franca luftoi fort dhe u përpoq shumë, por gjermanët ishin më të saktë në ndeshjen e luajtur në stadiumin e Koshices në Sllovaki.

Në finalen e 28 qershorit në Bratislavë, ata do të kenë punë me kampionen në fuqi të Europës, Anglinë.

Shpresat angleze ishin më mirë sesa Holanda dhe fituan 2-1, ndonëse duhet të falenderojnë yllin e ri të Liverpulit, Harvej Eliot.

Njëzetedyvjeçari që ka 4 rrjeta në këtë Europian, shënoi të dy golat për “tre luanët” në minutat 62 e 85.

“Tulipanët” barazuan përkohësisht në 72’ kur Ohio shfrytëzoi gabimin e mbrojtjes dhe të portierit.

Anglia dhe Gjermania janë nga tri herë kampionë të Europës, pra kush fiton finalen merr titullin e katërt, një më pak sesa Spanja që mban rekordin./abcnews.al

Shenjat janë që të gjitha se ndryshimi do të ndodhë.Jasir Asani besohet se është shumë pranë transferimit te klubi I Jokohamës në Japoni, ndërsa mediat në Lindjen e Largme vazhdojnë të japin lajme për të.

Sipas atyre që shkruhen në Korenë e Jugut, kalimi I tij në Japoni mund të quhet diçka e përfunduar, ndërsa vetë lojtari I kombëtares shqiptare ka bërë komentin e tij.Asani ka deklaruar se atë e kërkojnë disa klube dhe jo vetëm Jokohama nga Japonia.

Edhe trajneri I tij tek skuadra Kuangju, Li Jung-Hjo, u pyet për këtë temë, dhe deklaroi se nuk ka dëgjuar asgjë konkrete, vetëm thashetheme, por nuk harroi të shtonte se “Asani kohet e fundit duket shumë I lumtur, dhe kjo duhet të ketë ndonjë arsye”.

Po sipas mediave, klubi ku ndodhet Asani, Kuangju, nga Koreja e Jugut, është dakord për transferimin, veçse në këmbim të 1 milionë dollarëve amerikanë, afërsisht 145 milionë jen japonezë.

Kuangju shpenzoi 700 000 euro për ta marrë nga Kishvarda e Hungarisë në janar të 2023, ndërsa ndodhet në pozita të vështira edhe sepse kontrata e shqiptarit përfundon në dhjetor të këtij vitit.

Jo vetëm kaq, por klubi koreanojugor është dënuar nga FIFA për shkelje financiare dhe, sipas mediave në vendin e tij, ka humbur deri tani afërsisht 1.7 milionë USD.Besohet se kjo është një tjetër arsye që Kuangju mund të bjerë dakord të humbasë lojtarin e vet më të mirë./abcnews.al

Që ishte e fortë, kjo dihej. Por tani është me e forta në botë. Xhodoka e Kosovës, Distria Krasniqi është ngjitur në krye të renditjes botërore të xhudos, dukë lënë pas këdo, sportiste vajza të të gjitha kategorive, por edhe të gjithë sportistët meshkuj të kësaj disipline.

Me medaljen e argjendit të fituar në Botërorin e Budapestit, Krasniqi mori 1400 pikë, duke u ngjitur në kuotën e 7055 pikëve.

Askush si ajo jo vetëm në kategorinë deri në 52 kilogram ku garon, por edhe në peshat e tjera të xhudos për meshkuj dhe femra.

Në këtë mënyrë, sportisja nga Kosova le pas koleget e saj më të famshme si francezia medaliste olimpike Amandine Buchard, apo kampionen e botës në fuqi, japonezen Uta Abe.

Arritja e Distria Krasniqit bëhet më madhështore, duke parë që në renditjen e përgjithshme të përditësuar nga Federata Botërore e Xhudos, ajo mban me nder rripin e zi, ndërsa le pas emrat më të njohur të xhudos për meshkuj si rusin Inal Tasoev apo japonezin Sanshiro Murao.

Në moshën 29 vjeçare, Krasniqi kap kulmin pas një karriere fantastike, të kurorëzuar me shumë medalje dhe tituj ndërkombëtarë. Ajo ka fituar dy medalje olimpike, një ari në “Tokyo 2020” dhe një argjendi në “Paris 2024”. Po ashtu, Distria është shpallur dy herë kampione e botës dhe tre herë të tjera kampione Europe.

Tani me statusin e xhudokës më të fortë të botës, ajo kërkon të përsërisë triumfin me një tjetër medalje të artë në Lojrat Olimpike “Los Angeles 2028”.

Egnatia do të përballet me Breidablik në raundin e parë kualifikues të UEFA Champions League.

Kampionët e Shqipërisë mësuan sot kundërshtarin e tyre, pas shortit të hedhur në selinë e UEFA-s në Nion të Zvicrës, ku goglat i vendosën përballë kampionëve të Islandës.

Ndeshjet e para të këtij turi do të zhvillohen më 8 dhe 9 korrik, ndërsa takimet e kthimit do të luhen më 15 dhe 16 korrik.

Ndeshja e parë do të luhet në “Egnatia Arena” në Rrogozhinë, ndërsa sfida e kthimit në Islandë.

Nuk do të kthehemi në “vendin e krimit”. Stadiumi i Partizanit, aty ku ndodhi skandali I tetorit të vitit 2014 është hequr nga lista për ndeshjen Serbi-Shqipëri, por gjithsesi, kuqezinjtë do të jenë sërish në Beograd.

Fillimisht, po mendohej që ndaj shqiptarëve dhe Anglisë të luhej në stadiumin e qytetit Leskovac, në Serbinë e Jugut, aty ku serbët fituan 3-0 ndaj Andorrës.

Gjithsesi, vendimi i Federatës Serbe të Futbollit ishte I ndryshëm, ishte që të luhet në 9 shtator kundër Anglisë dhe në 11 tetor përballë Shqipërisë në stadiumin “Rajko Mitiv” të Crvena Zvezdës.

Po flasim për impiantin më të madh të futbollit në vend, me kapacitet mbi 51 000 spektatorë.

Federata sqaron se u zgjodh stadiumi që tifozët e quajnë “Marakana” për arsye organizative dhe të sigurisë, jo vetëm për shkaqe sportive, dhe se gjithçka u bë në këshillim me UEFA-n.

Besimi është se rreth 50 000 spektatorë do t’i japin shumë më tepër mbështetje përfaqësueses serbe sesa 8 000 në Leskovac.

Gjithsesi, dashur pa dashur, gjithçka u politizua sepse për këtë vendim foli nga Praga edhe presidenti I Serbisë, Aleksandar Vucic.

“Dua që t’iu them sesi mundet që Federata jonë e Futbollit dhe të tjerët nuk munden të përballojnë 5 minuta presion nga ambasada angleze dhe nga të tjerët që kërkojnë që ndeshja me anglezët të luhet në Beograd, dhe pas dy ditësh presion e ndryshojnë vendimin që ndeshja të luhet në Beograd. Le të mbetet e shkruar që unë kam qenë që ndeshja të luhej në Leskovac, sepse njerëzit në Leskovac nuk vlejnë më pak sesa ata në Beograd. E mbështetën në mënyrë të jashtëzakonshme kombëtaren ndaj Andorrës, ndaj së cilës do të kishte pasur vetëm 300 tifozë në Beograd. Tani vijnë anglezët dhe na thonë se nuk u pëlqen në Leskovac. Mua nuk më bëhet vonë që atyre nuk u pëlqen të luajnë në Leskovac. Ne kemi marrë 10 kërkesa nga ambasada, por nuk I jam përgjigjur asnjërës”.

As kombëtarja shqiptare dhe as skuadrat tona të klubeve nuk kanë luajtur ndonjëherë në stadiumin “Rajko Mitiç”, por thuajse ekskluzivisht në stadimin e Partizanit.

Kështu në 12 nëntor 1967, kur Jugosllavia fitoi 4-0 në eliminatorët e Europianit, dhe në tribuna duken qartë shqiptarë nga Kosova me qeleshet e tyre.

Po aty në 14 tetor 2014, kur shpërtheu dhuna ndaj kuqezinjve, dhe ai është stadiumi ku Sokol Kushta shënoi golin e madh në 1987, që kualifikoi Flamurtarin ndaj Partizanit të Beogradit.

Nuk është se bëri ndonjë prapakthehu.

Trajneri i Serbisë, Dragan Stojkoviç u pyet përsëri nga gazetarët e vendit të tij, tashmë në prag të ndeshjes në Leskovac ndaj Andorrës sërish për eliminatoret e Kupës së Botës.

Stojkoviç natyrisht që u vendos në linjë me komunikatën zyrtare të Federatës Serbe të Futbollit, duke dënuar ndërprerjen e ndeshjes, hedhjen e objekteve në fushë dhe thirrjeve nacionaliste, por sidoqoftë përsëriti fuqishëm vlerësimin për atmosferën sportive në “Arenën Air Albania”.

Fjalët e tij mund të cilësohen sipërore.

“Përsa i përket aspektit të futbollit, ai ishte një ambient i vërtetë si në Amerikën Latine. Të gjithë ata që ishin aty e kuptojnë atë. Ju nuk ishit atje, e ndoqët ndeshjen në televizor, dhe tani më pyesni sesi është përshtypja ime. Gjithkush do të donte të ishte në një ambient të tillë. Ai nivel emocional dhe ai nivel përkrahjeje për kombëtaren e tyre ishin të pabesueshëm. Ndodhi për herë të parë, ndërsa e kam drejtuar kombëtaren tonë 51 herë, hera e parë ndodhi që nuk dëgjova dot himnin”.

Përballja në Tiranë përfundoi pa gola, ndërsa Shqipëria ishte më pranë fitores sepse pati në dispozicion penalltinë, që e humbi Rej Manaj në minutën e fundit të pjesës së parë.

Pritet të jetë titullar, edhe pse nuk ka luajtur shumë këtë vit. Tomas Strakosha është gardiani zyrtar i kombëtares shqiptare, dhe atij I takoi të dilte përpara gazetarëvr për të folur për ndeshjen ndaj Serbisë në eliminatoret e Botërorit, së bashku me Arbër Hoxhën.

“Nuk e shikoj veten personalisht, duhet të punojmë të gjithë si grup. Ata janë një grup i mirë, por edhe ne kemi kualitet, e përballojmë mirë Serbinë dhe jemi gati për atë ndeshje. Deri tani po shikoj djemtë që janë të përgatitur, të emocionuar si për çdo ndeshje, e di që për tifozët është diçka më shumë. Por ne dimë që vlen për 3 pikët dhe jo më shumë, duhet të bëjmë të lumtur tifozët tanë dhe te festojmë me të. Tifozët e kanë treguar se nuk është një ndeshje si ato që kemi luajtur tani, por ne shikojmë nga ana sportive. Duhet të tregojmë që e meritojmë Botërorin dhe e shtuna është ndeshja më e rëndësishme që kemi tani për të vazhduar ëndrrën tonë, e kemi përgatitur shumë mirë deri tani, çunat janë pozitivë dhe besoj mund t’ia dalim.

Strakosha vlerëson Serbinë, por besimi nuk mungon.

“Di që në goditjet standarte janë shumë mirë, e kemi treguar që kemi një grup që mund të mbrojë mirë, por i dimë dhe gabimet tona që bëmë në Europian. Një lojtar veçmas nuk kam, por si ekip po. E kemi përgatitur ndeshjen si ekip dhe jo individualisht. Nuk kam një thirrje të veçantë, tifozët kuqezinj na kanë mbështetur si gjithmonë. Kam respekt për çdo tifoz që na ka mbështetur që nga fundi botës. Kam pasur momente edhe që nuk kam luajtur fare, jam i përqëndruar, gati dhe ndjehem mirë. Ne jemi profesionistë dhe përqëndrohemi për çdo ndeshje, do të jetë ndeshje e rëndësishme, por jo vendimtare për vendin e dytë ose të tretë, e shohim si ndeshje të vështirë që do të japim maksimumin, por që nuk do të mbarojë asgjë tani”

Arbër Hoxha ngacmohet se ai është shqiptar i Kosovës, pra si e ndjen ndeshjen ndaj serbëve?

“Do të jetë një ndeshje e vështirë, e dimë që kundërshtari ka shumë cilësi, por po punojmë shumë mirë, po përgatitemi dhe shpresojmë e besojmë që do ta fitojmë ndeshjen. Ne jemi profesionistë, do bëjmë tonën në fushë, bëjmë më të mirën. Kjo ndeshje është e vështirë dhe vendos për një vend “play off” për në Botëror, shpresojmë të fitojmë dhe të kemi shpresë në Botëror.”

Në Paris mbërriti me ëndrra të mëdha. Një vajzë me origjinë shqiptare nga Kosova, e quajtur Linea Bajraliu, hyri në historinë e Grand Slemit të “Roland Garosit”, sepse për herë të parë konkurroi në dyshe me një vajzë serbe.

Bajraliu mori pjesë në turneun e dysheve për të reja, duke ndarë fushën me serben nga Nishi, Anastasija Cvetkoviç.

Dy tenistet e reja kaluan me sukses raundin e parë të turneut të të rinjve për vajza duke mundur dyshen çeke, Pastikova/Stushek.

Rezultati ishte 6-3, 5-7, 10-2.

Në raundin e dytë, udhëtimi I tyre u ndërpre nga dyshja e binjakeve amerikane, Kristina e Anika Peçnikova, me shifrat 7-5, 6-4.

Mediat serbe treguan interesim të madh për këtë ngjarje.

“B92” pati titull: Pamje e bukur nga Parisi, serbja me shqiptaren në dyshen historike, në “Rolan Garos”.

E njëjta frymë edhe nga “Telegraf” I Beogradit që tregon sesi lindi dyshja historike e serbes me shqiptaren në “Rolan Garos”.

Cvetkoviç sqaron se Bajraliu propozoi që të luanin së bashku në Paris, dhe se ajo pranoi, duke shtuar se njihen prej një viti.

Linea Bajraliu mori një përshëndetje edhe nga ish-sekretari I përgjithshëm I Federatës së Tenisit të Kosovës, Osman Reçica, I cili e uroi për pjesëmarrjen në Grand Slemin e shquar francez.

Ka qenë një edicion i mirë. Gjermania po gjen veten dalë nga dalë nën drejtimin e trajnerit në moshë të re, Julian Nagelsman, dhe fakti se ka arritur gjysmëfinalen e Ligës së Kombeve është një provë për këtë.

Të pathyer në 17 ndeshjet e fundit, që janë luajtur nga 90 minuta, “teutonët” janë me besim edhe pse kjo është hera e parë që arrijnë kaq larg në këtë konkurrim.

Për më tepër, ndeshja luhet në “Alianc Arenë” të Mynihut, pra në Gjermani, dhe ky është një favor, por edhe një detyrim.

Gjithsesi, probleme ka plot, pasi mungojnë për shkak dëmtimi Musiala, Bisek, Sholterbek, Haverc, Amiri, Burkhart dhe Shtiler.

Portieri Ter Shtegen kthehet, ndërsa Nagelsman është në humor të mirë.

“Si trajner I kombëtares unë ende nuk e kam mundur Portugalinë. Në fund të fundit, ne duhet të shënojmë më shumë gola këtë herë. Statistikat nuk luajnë asnjë rol. Ky është si një mini Europian. Mezi po pres që ta luajmë këtë ndeshje përpara tifozëve tanë, në një stadium të bukur. Shpresoj që të luajmë dy ndeshje këtu. Do të ishte e përsosur. Jemi të lumtur që ky turne mbahet në Gjermani’.

Portugalia do të ketë sërish në radhët e veta legjendën e vjetër, Kristiano Ronaldo.

Edhe pse 40 vjeç, edhe pse e ardhmja mbetet e paqartë, CR7 nuk ka ndërmend të dorëzohet pa luftuar.

Ai do të jetë kapiten në ndeshjen e tij të 220-të për kombëtaren.

Treshja e Paris SG Nevesh-Vitinja-Nunjo Mendesh mund të lihet pushim pas finales së Championsit.

Problemi I Ronaldos është se nuk ka fituar kurrë ndaj Gjermanisë në karrierën e tij të madhe, ndërsa Portugalia ka humbur 5 ndeshjet e fundit radhazi./abcnews.al

Kombëtarja shqiptare ka zhvilluar pasditen e sotme seancën e dytë stërvitore në kuadër të përgatitjeve për ndeshjet kualifikuese të Kupës së Botës 2026 ndaj Serbisë dhe Letonisë.

Të gjithë lojtarët i janë bashkuar ekipit në grumbullim. Në stërvitjen e sotme nuk mori pjesë vetëm Rey Manaj, i cili po kalon një gjendje gripale dhe po mbahet në monitorim nga stafi mjekësor i Kombëtares.

Stafi teknik i drejtuar nga trajneri Silvinjo zhvilloi stërvitje tekniko-taktike me lojtarët.

Ditën e nesërme, ekipi do të zhvillojë stërvitjen e radhës, e cila do të jetë e hapur për mediat në 15 minutat e para.

Nuk e mendon aspak diçka të tillë. Një trajner serb, që e njeh mirë Shqipërinë, ka komentuar ndeshjen e 7 qershorit, dhe ky është ish-njeriu I stolit I Partizanit, Aleksandar Veselinovic.

Në një intervistë për median tabloide të Beogradit, “Alo”, ai hedh poshtë zhurmën që është ngritur se kombëtaren e Serbisë e pret ferri në Tiranë.

Tekniku 55-vjeçar beson se masat e marra në kryeqytetin shqiptar do të bëjnë punën e tyre.

“Jo! Do të bëjnë gjithçka që ndeshja të organizohet maksimalisht siç duhet. Presidenti I tyre Duka është në raport të shkëlyqer me UEFA-n, është krah më krah me presidentin Çeferin. Kur flet me presidentin Infantino, janë si vëllezër. Bashkë me Shqipërinë, do të organizojmë Europianin për të rinj. Nuk kanë interes që të ndodhë ndonjë gjë që t’i njollosë. Edhe vetë UEFA nuk mendon se do të ndodhë ndonjë gjë e keqe”.

Natyrisht, Veselinovic pyetet se cili është niveli I kombëtares shqiptare, që do të luajë ndaj Serbisë.

“Është një kombëtare që mbrohet fort, është e bashkuar dhe e sakrificës. Me këtë merret ndihmës trajneri Zabaleta. Shqiptarët luajnë gjithmonë me përgjegjësi maksimale, ndërsa minusi më I madh është që nuk kanë krijimtari në sulm. Gjithsesi, mbahen fort. Është e pabesueshme sesa shumë lojtarët I besojnë trajnerit. Braziliani ka bërë punë të madhe dhe ka sjellë ndryshim pas disa viteve me trajnerë italianë”.

Veselinovic vlerëson “Arenën Kombëtare” në Tiranë, si stadium modern dhe sidomos tepër akustik, ku ndihet fort jehona e brohoritjes së tifozëve.