Ylli ndërkombëtar i futbollit Cristiano Ronaldo është tashmë zyrtarisht I fejuar me partneren e tij prej shumë vitesh, bukuroshen me origjinë nga Argjentina Georgina Rodriguez.

Lajmi u bë i ditur nga 31-vjeçarja e cila publikoi në “Instagram” një foto me unazën e shndritshme prej diamante ku shkroi “Po dua të martohem me ty, në këtë jetë dhe në të gjithë jetët e mia”.

Prej vitesh çifti përflitej se kishin hedhur një tjetër hap në marrëdhënien e tyre për shkak të paraqitjes së Rodriguez me disa unaza të ndryshme, por kësaj here është zyrtare.

Futbollisti 40 vjeçar dhe partnerja e tij prej 9 vitesh do të shkojnë tashmë drejt altarit.

Dashuria e Cristiano Ronaldos dhe Georgina Rodriguez ka mbushur prej vitesh faqet e para të mediave rozë, ndërsa çifti janë kthyer në rrjet një ndër çiftet më të dashura të showbizzit botëror.

Mijëra persona uruan çiftin për këtë hap të ri në marrëdhënien e tyre nëpërmjet komenteve në postimin e bërë nga Georgina Rodriguez.

31-vjeçarja ka ndërtuar një perandori në rrjetet sociale pasi u bë e dashura e futbollistit duke u kthyer kështu në një ndër njerëzit më të ndjekur dhe më me shumë influence në rrjetet sociale ne mbare botën.

/abcnews.al/

Një tjetër ngjarje e rëndë ka ndodhur në Kosovë. Një person ka mbetur i vrarë në Prishtinë.

Policia e Kosovës ka konfirmuar se një shtetas është vrarë me armë zjarri në “Hajvali” në Prishtinë. Autoritetet kanë nisur hetimet për zbardhjen e plotë të krimit dhe kapjet e autorit i cili është identifikuar nga autoritetet.

“Sot rreth orës 22:00, është raportuar për gjuajtje me armë zjarri, në Hajvali, ku është vrarë një person. Policia ka nisë një hetim për zbardhjen e rastit, ndërkohë që është në kërkim të personit të dyshuar i cili tashmë është identifikuar”, tha Policia e Kosovës.

/abcnews.al/

Centrali bërthamor ”Gravelines”, më i madhi në Evropën Perëndimore, është mbyllur plotësisht sot për shkak të një pranie masive të kandilëve të detit në stacionet e pompimit për ujin e përdorur për të ftohur reaktorët e tij, një incident shumë i rrallë ky.

”Njësitë e prodhimit II, III, IV dhe VI u mbyllën automatikisht midis natës së të dielës dhe mëngjesit të së hënës për shkak të kësaj pranie masive dhe të paparashikueshme të kandilëve të detit në fuçitë e filtrit të stacioneve të pompimit”, njoftoi EDF në faqen e saj të internetit.

Sipas Elvire Antajan, një studiuese në Institutin Francez të Kërkimeve për Shfrytëzimin e Detit (IFREMER), disa mijëra kandilë deti hynë në portin e Dunkirkut, ku centrali pompon ujin e tij ftohës.

”Kjo nuk pati ndikim në sigurinë e objekteve, sigurinë e personelit ose mjedisin”, siguroi operatori, duke theksuar se stacionet e pompimit ndodhen në pjesën jobërthamore të centralit.

Prandaj, centrali është mbyllur përkohësisht plotësisht, pasi dy njësitë e tjera të prodhimit, njësitë I dhe V aktualisht janë duke u mirëmbajtur.

”Incidenti ndërpreu prodhimin e energjisë elektrike, por nuk ndikoi në ftohjen e pajisjeve që sigurojnë sigurinë e reaktorit”, theksoi Autoriteti Francez i Sigurisë Bërthamore dhe Mbrojtjes nga Rrezatimi (ASNR).

“Ky rrezik është i njohur dhe centrali ‘Gravelines’ ka procedura në vend për t’u marrë me një fluks të organizmave detarë (kandil deti, alga) që mund të bllokojnë sistemet e tij të filtrimit”, shtoi ASNR.

Presidenti francez, Emmanuel Macron përsëriti propozimin e tij për një “mision stabilizimi të mandatuar nga OKB-ja” për të siguruar Rripin e Gazës, duke denoncuar “një katastrofë që pritet të ndodhë” dhe një ”nxitim të menjëhershëm drejt luftës së përhershme”, pas njoftimeve të një plani izraelit për të pushtuar qytetin e Gazës.

”Njoftimi nga autoritetet izraelite për një zgjerim të operacioneve të tyre në qytetin e Gazës dhe kampet Mawasi dhe për një ripushtim nga ana e Izraelit përbën një katastrofë që pritet të ndodhë me një ashpërsi të paparë dhe një nxitim të menjëhershëm drejt luftës së përhershme”, deklaroi presidenti francez.

”Pengjet izraelitë dhe popullsia e Gazës nuk do të vazhdojnë të jenë viktimat e para të kësaj strategjie”, shtoi ai.

Presidenti francez reagoi ndaj planit të qeverisë së Benjamin Netanyahut për të marrë kontrollin e qytetit të Gazës dhe për të goditur bastionet e fundit të Hamasit, një plan që ka tërhequr kritika të forta në të gjithë botën.

Arben Kingji do të jetë për një mandat të dytë në krye të Ushtrisë Shqiptare. Presidenti Bajram Begaj ka dekretuar këtë të hënë në një ceremoni të posaçme, Kingjin si shef i shtabit të përgjithshëm të forcave të Armatosura.

Kjo është hera e dytë që Kingji dekretohet në të njëjtën detyrë.

Herën e parë ai u dekretua po nga Presidenti Begaj në vitin 2022, me propozim të kryeministrit Edi Rama.

Ne fakt, Kingji pasoi ne detyre pikërisht Bajram Begajn, përpara se ky i fundit te linte detyrën si shef i shtabit të përgjithshëm për tu mandatuar si president.

Në ceremoninë e betimit të Shefit të Shtabit të Përgjithshëm mori pjesë Ministri i Mbrojtjes Pirro Vengu, Zëvendësshefi i Shtabit të Përgjithshëm, si dhe komandantët e forcave dhe strukturave të tjera të Forcave të Armatosura.

Kingji vjen nga një karrierë e gjatë dhe profesionale në ushtrinë shqiptare, me grada e pozicione te larta, por edhe dekoratat me te larta nga Presidenti i Republikës.

/abcnews.al/

Katër zyrtarë të policisë në Kosovë janë pezulluar lidhur me vrasjen e trefishtë të ndodhur në Gjilan.

Përmes një njoftimi zyrtar është bërë e ditur nga Inspektorati Policor i Kosovës se ka nisur një hetim paraprak për të parë nëse ka ndonjë përfshirje të mundshme të ndonjë pjesëtari të Policisë në këtë veprimtari kriminale të të dyshuarit që tashmë është i shpallur në kërkim për vrasje.

“Bazuar në autorizimet ligjore dhe në rëndësinë e ruajtjes së integritetit të hetimit dhe shmangien e çdo ndikimi mbi dëshmitarë apo prova, Inspektorati Policor i Kosovës i ka rekomanduar sot Policisë së Kosovës suspendimin për katër zyrtarë policorë të Drejtorisë Rajonale të Policisë në Gjilan”, thuhet në njoftim.

/abcnews.al/

Një aksident me pasojë vdekjen është regjistruar në Kosovë. Aksidenti ka ndodhur në rrugën Prishtinë-Pejë, në Komoran.

Nga aksidenti 10 persona raportohet se kanë mbetur të plagosur, dy prej të cilëve ndodhen në gjendje të rëndë shëndetësore.

Në aksident mësohet se janë përfshirë gjashtë automjete.

Ndërkohë policia e Kosovës ka nisur hetimet për zbardhjen e plotë të shkaqeve të aksidentit tragjik.

/abcnews.al/

Qindra persona u mblodhën këtë të hënë  në qytetin e Gazës për t’i dhënë lamtumirën e fundit gazetarit 28 vjeçar të Al Jazera Anas al Sharif, dhe 5 kolegëve të tij punonjës të medias të cilët u vranë nga sulmet ajrore izraelit të dielën

Trupat e tyre, të mbështjellë me çarçafë të bardhë, u vendosën në oborrin e spitalit Al Shifa, ku dhjetëra gazetarë dhe qytetarë u bashkuan në homazhe. Mes lotëve dhe dhimbjes, familjarët dhe miqtë përcollën të dashurit e tyre drejt banesës së tyre të fundit.

Sulmi qe vrau punonjësit e Medias goditi edhe hyrjen e një spitali Al Shifa sipas asaj qe tha drejtori i kësaj qendre Shëndetësore per Associated press.

Ushtria Izraelite deklaroi se punonjësit e medias qe mbeten te vrare nga sulmi i tyre përfshirë edhe Gazetarin 28-vjeçar Anas al Sharif, ishin militant të grupit palestinez Hamas, pretendim ky i mohuar nga Al Jazera qe tha se këto janë vetëm justifikime pas vrasjes se qëllimshme te gazetareve.

Gazetari 28 vjeçar i Al Jazera kishte paralajmëruar më herët se mund të vritej nga Izraeli pas kërcënimeve që kishte marre nga ushtria e këtij shteti.

Komiteti për Mbrojtjen e Gazetarëve tha se ishte i tmerruar dhe se Izraeli nuk kishte arritur të ofronte prova për të mbështetur akuzat e tij kundër al-Sharif.

Që nga fillimi i luftës në Gaza në tetor të vitit 2023, janë konfirmuar 186 gazetarë të vrarë.

Qeveria izraelite nuk lejon organizatat ndërkombëtare të lajmeve të hyjnë në Gaza për të raportuar, kështu që shumë media mbështeten te gazetarët me bazë në Gaza për të mbuluar ngjarjen.

/abcnews.al/

Gjykata Kushtetuese ka urdhëruar përsëri deputetët e Kuvendit të Kosovës ta konstituojnë përbërjen e re parlamentare – e dalë nga zgjedhjet e 9 shkurtit – por këtë herë me udhëzime më të qarta.

Ata urdhërohen ta konstituojnë Kuvendin brenda një afati 30-ditor dhe ta zgjedhin kryeparlamentarin përmes votimit të hapur, duke e hedhur në votim të njëjtin kandidat jo më shumë se tri herë. Nuk dihet saktësisht. Mund të jetë gjatë kësaj jave, apo më së largu javën e ardhshme, varësisht se kur publikohet aktgjykimi i plotë nga Kushtetuesja.

Seanca konstituive nuk mund të mbahet derisa Kushtetuesja ta publikojë aktgjykimin e plotë.

Sipas Eugen Cakollit nga Instituti Demokratik i Kosovës, bazuar në praktikat e mëparshme, Kushtetueses i nevojiten një deri në dy javë më së shumti për ta publikuar të plotë aktgjykimin.

“Ta zëmë nëse aktgjykimi publikohet të mërkurën, atëherë seanca mund të thirret menjëherë të enjten dhe pastaj të vazhdojë cikli 48-orësh”, tha Cakolli në KTV më 8 gusht.

Seanca konstituive e Kuvendit u thirr për herë të parë më 15 prill nga presidentja e vendit, Vjosa Osmani. Që atëherë, deputetët kanë mbajtur 54 vazhdime të kësaj seance, të cilat janë udhëhequr nga kryesuesi Avni Dehari, si deputeti më i vjetër i legjislaturës së re.

Kushtetuesja tha se kryesuesi Dehari nuk ka vepruar në bazë të aktgjykimit të mëhershëm të kësaj gjykate të 26 qershorit, duke shtuar se të gjitha seancat e mbajtura nga 27 qershori deri më 26 korrik “të shpallen të pavlefshme”.

Sipas Rregullores së Kuvendit, për mbarëvajtjen e seancës kujdeset kryesuesi i seancës konstituive dhe Dehari pritet ta thërrasë seancën sapo Kushtetuesja ta publikojë aktgjykimin e plotë në Gazetën Zyrtare.

Vendimi është mirëpritur nga partitë që mandatin e kaluar ishin në opozitë, por është kritikuar nga partia fituese e zgjedhjeve, Lëvizja Vetëvendosje (LVV).

LVV-ja e quajti vendimin arbitrar, Partia Demokratike e Kosovës (PDK), dhe Lidhja Demokratike e Kosovës (LDK), e cilësuan fitore kushtetuese e demokratike, ndërsa Aleanca për Ardhmërinë e Kosovës (AAK) foli për rrëzimin e diktatit.

Sipas LVV-së, njoftimi i Kushtetueses “përbën devijim të rrezikshëm nga roli kushtetues” dhe se është “në kundërshtim me parimet themelore të shtetit të së drejtës dhe ndarjes së pushteteve”.

Deputetja e LVV-së dhe ministrja në detyrë e Drejtësisë, Albulena Haxhiu, thanë një konferencë për media më 10 gusht se “njoftimi i Gjykatës Kushtetuese përbën shqetësim serioz, sepse është tejkalim flagrant i kompetencave që ka Gjykata Kushtetuese”.

E pyetur nëse partia e saj do ta respektojë vendimin, Haxhiu tha: “Se cili do të jetë veprimi jonë pas këtij njoftimi, pas aktvendimit, do ta kuptoni kur të vijë koha”.

Kreu i PDK-së, Memli Krasniqi, tha se me këtë vendim të Kushtetueses, u vërtetuan qëndrimet e partisë së tij, që LVV-ja “e ka mbajtur peng Kuvendin e Republikës së Kosovës, duke e bllokuar qëllimisht dhe në mënyrë të planifikuar funksionalizimin e tij për interesa të ngushta pushteti, me veprime tërësisht jashtë Kushtetutës”.

Kryetari i LDK-së, Lumir Abdixhiku, e mirëpriti vendimin e Gjykatës Kushtetuese duke e cilësuar si “fitore të madhe për demokracinë”.

Ardian Gjini nga AAK-ja tha se me vendimin e Kushtetueses, “fitoi demokracia, u rrëzua diktati”. Aktgjykimi i plotë i Kushtetueses, përveç se hap rrugën për mbajtjen e seancës konstituive në ditën pasuese, pritet të sqarojë më shumë gjëra.

Ajo ka mundësi t’i përgjigjet edhe një kërkese tashmë të tërhequr të presidentes së Kosovës, Vjosa Osmani, se çfarë do të ndodhte nëse Kuvendi i Kosovës nuk do të konstituohej deri më 26 korrik – afati i përcaktuar më herët nga gjykata përmes një aktgjykimi.

Në aktgjykimin e saj të mëparshëm, të cilin deputetët e shpërfillën, Kushtetuesja nuk kishte treguar pasojat juridike të një shpërfilljeje të tillë.

Kushtetuesja mund të tregojë tani se cilat do të jenë pasojat, nëse deputetët e shpërfillin sërish urdhrin 30-ditor për bërjen e Kuvendit të ri.

“Ndonëse presidentja e ka tërhequr kërkesën, Kushtetuesja ka të drejtë ligjore ta shqyrtojë atë, sepse duhet qartazi se kjo është çështje me interes publik dhe kushtetues”, tha Cakolli.

Cakolli tha se afate të tilla do të jenë të destinuara për të mos u respektuar nga aktorët politikë, pasi atyre “u mungon vullneti politik për të gjetur zgjidhje, jo sepse nuk i dinë procedurat”.

“Partitë do të vazhdojnë t’i shkelin afatet për sa kohë që gjykata nuk e shkruan në mënyrë të qartë se cilat do të jenë pasojat që deputetët dhe Kuvendi do t’i bartin, në rast të dështimeve të mëtejme”, tha ai.

E gjithë kjo krizë disamujore vjen si pasojë e mungesës së një marrëveshje politike mes partive parlamentare, pasi asnjëra parti nuk e fitoi shumicën për të qeverisur e vetme.

LVV-ja e kryeministrit në detyrë, Albin Kurti, i fitoi 48 ulëse dhe partitë e tjera parlamentare nuk kanë pranuar ta votojnë kandidaten e saj për kryetare të Kuvendit, për emërimin e së cilës nevojiten të paktën 61 vota.

Derisa LVV-ja ngul këmbë se Albulena Haxhiu është kandidate meritore, disa prej partive më të mëdha parlamentare, si PDK, LDK dhe AAK, e përjashtojnë atë si “përçarëse”. PDK-ja doli e dyta me 24 ulëse, LDK-ja e treta me 20, pasuar nga Lista Serbe – partia më e madhe e serbëve në Kosovë me 9, dhe koalicioni mes AAK-së dhe Nismës Socialdemokrate, me 8 të tilla. Edhe 11 ulëse tjera janë të pakicave./REL/

Zjarret nuk kane kursyer as Ballkanin. Agjencia e Menaxhimit Emergjent në Kosovë ka bërë të ditur të hënën se në vend janë të regjistruara 38 vatra zjarri dhe prej tyre 24 vazhdojnë të jenë aktive, ndërsa 14 të tjera janë lokalizuar.

Sipas raportimeve në media lokale, situatë e rënduar është në fshatin Kçiq të Mitrovicës, pasi aty janë djegur edhe shtëpi banimi. Kosova dhe gjithë rajoni i Ballkanit po përballen me temperatura mbi 30 gradë Celsius këtë javë.

Ministria e Shëndetësisë në Kosovë u ka rekomanduar institucioneve publike dhe private që t’i zbatojnë masat për mbrojtjen e punëtorëve nga i nxehti i madh.

Në Maqedoninë e Veriut vijojnë operacionet për shuarjen e zjarreve.
Sipas Qendrës për Menaxhim me Kriza në mbarë vendin janë  3 zjarre prej të cilave 2 janë aktive ndërsa 1 është vënë nën kontroll.
Aktive janë zjarret në Komunën e Makedonski Brodit dhe komunën e Strumicës, ndërsa nën kontroll është vënë zjarri në Komunën e Resnjës. Ndërkaq në mbarë vendin vazhdon gjendja e emergjencës në mënyrë që të lehtësohet menaxhimi i zjarreve.

Zjarre masive kanë përfshirë edhe Greqinë. Zjarri që shpërtheu pak pas orës 12:00 këtë fillim jave në një zonë pyjore bujqësore në Petralona, Messinia, në periferi të Athinës, mbetet ende aktiv.
Drejt vendngjarjes kane shkuar 92 zjarrfikës, vullnetarë dhe automjete të qeverisjes vendore, si dhe gjashtë avionë dhe katër helikopterë po operojnë nga ajri.

Siç raportohet nga Departamenti i Zjarrfikësve, zona është e vështirë për t’u aksesuar, gjë që po e vështirëson punën për forcat tokësore.

Vatra zjarri aktive ka edhe ne një zonë pyjore bujqësore në zonën e Megali Volvit të Selanikut. Në vend nuk raportohet ende për viktima.

/abcnews.al/

Organizatat ndërkombëtare të medias dhe liderët botërorë kanë dënuar vrasjen e dy gazetarëve dhe tre kameramanëve të Al Jazeera dhe një gazetari të pavarur në sulmet në Gaza.

Kombet e Bashkuara se vrasja e gazetarëve është një shkelje e rëndë e ligjit ndërkombëtar humanitar dhe I bënë thirrje Izraelit të respektojë dhe mbrojë të gjithë civilët.

OKB kërkoi akses të menjëhershëm, të sigurt dhe të papenguar në Gaza për të gjithë gazetarët.

Reporterët pa kufij thanë se gazetari i Al Jazeera Anas al Sharif ishte një nga më të njohurit nga Rripi I Gazës dhe zëri I vuajtjeve të palestinezëve në enklavë.

Ministri Italian I mbrojtjes Guido Crosetto tha se veprimet e Izraelit në Gaza janë të papranueshme dhe tregojnë se qeveria izraelite e ka humbur arsyen dhe humanitetin.

Ai theksoi se nuk kemi të bëjmë me një operacion ushtarak me dëme anësore, por me mohimin e pastër të ligjit dhe vlerave themelore të qytetërimit.

Qeveria e Mbretërisë së Bashkuar u shpreh tejet e shqetësuar nga vrasja e gazetarëve të Al Jazeera.

Zëdhënësi zyrtar i Kryeministrit Sir Keir Starmer tha se Izraeli duhet të sigurojë që gazetarët të mund të punojnë në mënyrë të sigurt dhe të raportojnë pa frikë dhe bëri thirrje për një hetim të pavarur për vrasjen e Anas al-Sharif dhe kolegëve të tij.

Katari zyrtar, vendndodhja e selisë kryesore të rrjetit mediatik Al Jazeera, tha se vrasja e gazetareve është e qëllimshme dhe e cilësoi diçka të tillë, një krim përtej imagjinatës.

Vetë Al Jazeera dënoi me ashpërsinë më të madhe vrasjen e ekipit të saj mediatik nga forcat izraelite, në atë që e quajti një tjetër sulm të hapur dhe të paramenduar ndaj lirisë së shtypit.

Në një mesazh të fundit të Anas al Sharif, për të cilin Al Jazeera tha se ishte shkruar më 6 prill dhe i cili u postua në rrjetin X pas vdekjes së tij, gazetari shkruante se ai kishte përjetuar dhimbjen në të gjitha detajet e saj, kishte parë vuajtjet dhe humbjet shumë herë, megjithatë asnjëherë nuk hezitoi ta përcillte të vërtetën ashtu siç është.

“Ky është testamenti im dhe mesazhi im i fundit. Nëse këto fjalë ju arrijnë, dijeni se Izraeli ka arritur të më vrasë dhe të më heshtë”, kishte shkruajtur al Sharif, disa muaj para se të vritej.

/abcnews.al/

Kryeministri britanik Keir Starmer, presidenti francez Emmanuel Macron si edhe kancelari gjerman Friedrich Merz paralajmërojnë një takim online për të diskutuar për situatën në Ukrainë. Ky takim do të zhvillohet para Samitit të paralajmëruar më 15 gusht mes Vladimir Putin dhe Donald Trump.

Sipas raportimeve në mediat ndërkombëtare, udhëheqësit evropian do të diskutojnë për rritur presionin ndaj Rusisë që t’i japë fund luftës në Ukrainë.

Nga ana tjetër kancelari gjerman Friedrich Merz ka ftuar Donald Trump  t’i bashkohet konferencës me udhëheqësit e BE-së dhe Volodymyr Zelensky të mërkurën.

Më herët janë bërë deklarata të ndryshme lidhur me një marrëveshje për të përfunduar luftës, që duket se do të jenë të vështira për t’u pranuar nga Ukraina.

Takimi mes Trump dhe Putin sipas ekspertëve është një shans për të negociuar për një armëpushim përpara vendosjes së sanksioneve më të ashpra.

Nga ana tjetër Ministrat e jashtëm evropianë kanë bërë thirrje për “unitet transatlantik” për të ndihmuar në përfundimin e luftës në Ukrainë.

Në qëndrimet e tij presidenti Volodymir Zelensky është shprehur kritik ndaj Putin duke akuzuar se Rusinë se qëllimi i saj i vetëm është të përfitojë kohë dhe jo t’i japë fund luftës.

/abcnews.al/

Situata me zjarret mbetet kritike në Syrin e Kaltër. Prej orësh sipërfaqe toke janë përfshirë nga flakët të cilat janë përhapur me shpejtësi edhe për shkak të favorizimit nga erërat e forta dhe temperaturat e lartë. Ndërkohë mësohet se zjarri ka hyrë në zonën e mbrojtur.

Më herët u raportua se flakët janë zhvendosur drejt fshatit Pecë, duke rrezikuar në këtë mënyrë edhe banesat.

Terreni i thyer dhe malor e bën edhe më të vështirë ndërhyrjen e zjarrfikësve në këtë zonë, ndërsa helikopterët vijojnë të punojë për shuarjen e flakëve si në rrethinat e Syrit të Kaltër po ashtu edhe në fshatin Pecë dhe përreth.

/abcnews.al/

Një shtetas është ndaluar nga policia e Vlorës dhe dy të tjerë janë proceduar penalisht për tre raste të zjarrvënies. Sipas policisë në Lukovë është ndaluar një 43-vjeçar që shkaktoi zjarr nga pakujdesia, duke hedhur cigaren në tokë.

Në Bolenë është proceduar një  34-vjeçar, i dyshuar për djegien e një sipërfaqeje toke me shkurre, bimësi dhe pisha.

Ndërsa në Tragjas është proceduar penalisht një 58-vjeçar, i dyshuar për djegien e një sipërfaqeje toke me bimësi.

Drejtoria Vendore e Policisë Vlorë apelon për të gjithë qytetarët të mos ndezin zjarre për asnjë arsye, përfshirë edhe nga pakujdesia, pasi do të përballen me ligjin.

/abcnews.al/

Zjarri në Syrin e Kaltër është zbehur disi, por flakët janë zhvendosur drejt fshatit Pecë, duke rrezikuar banesat.

Era e fortë e ka shtyrë vatrën drejt zonës së banuar, ndërsa aktualisht zjarri ka “rrethuar” fshatin.

Terreni i thyer dhe malor e bën të vështirë ndërhyrjen e shërbimeve zjarrfikëse edhe në këtë zonë, ndërsa helikopterët vijojnë të punojnë për shuarjen e flakëve si në rrethinat e Syrit të Kaltër, ashtu edhe në Pecë.

/abcnews.al/

Situata me zjarret në vend vijon të mbetet problematike. Gjatë orëve të fundit janë evidentuar 30 vatra zjarri aktive.

Vatrat aktive janë evidentuar kryesisht në Qarku Vlorë:

Bashkia Finiq – Zjarri ka kaluar në fshatin Krane, njësia administrative Mesopotam. Kjo vatër është përballë Syrit të Kaltër. Në këtë zonë janë problematikë fshatrat Krane, Krongj dhe Leshnicë e poshtme.

Në terren po operojnë 3 mjete zjarrfikëse me 12 efektivë të MZSH Finiq, të ndihmuar nga FA me 4 mjete zjarrfikëse dhe 30 efektivë të FA, 1 grup FNSH. Në këtë zonë ka operuar edhe Helikopteri i Forcës Ajrore të FA si dhe 2 avionë grekë PZL, 1 helikopter çek dhe 1 sllovak.

Parku “Rëzom” – maja e “Lucës”, njësia Vergo – Terren i thyer, e pamundur ndërhyrja me mjete tokësore. Në vendngjarje punonjës të AdZM.

Bashkia Himarë – fshatrat Bolenë dhe Tërbaç – Zjarri në pyll me pisha. Në terren: 3 mjete zjarrfikëse, 10 efektivë MZSH Himarë e Vlorë, forca vullnetare dhe 20 efektivë të FA.

Fshati Lukovë – Të angazhuar në operacion 3 mjete zjarrfikëse me 11 efektivë MZSH Himarë e Sarandë, avioni Canadair kroat, 1 mjet zjarrfikës me 3 efektivë MZSH Fier.

Fshati Ninat, Bashkia Konispol – Zjarri me drejtim nga fshati Bistricë. Në terren 2 mjete dhe 19 punonjës.

Qarku Lezhë

Fshati Malaj i Epërm, Bashkia Mirditë – Zjarri izoluar, në monitorim nga 6 efektivë MZSH, 6 forca pyjore, 17 forca bashkiake, 2 vullnetarë.

Fshati Kolsh, Bashkia Lezhë – Zjarr në sipërfaqe pyjore, 2 mjete zjarrfikëse Lezhë dhe 1 nga Mirdita.

Qarku Dibër

Mali i Allushit, Bashkia Klos – Zjarri është sën kontroll, digjen trungje brenda vatrës. Po punohet nga 6 efektivë MZSH dhe 1 mjet zjarrfikës.

Mali i Kovashicës, Bashkia Bulqizë – Vatra në monitorim nga 2 mjete zjarrfikëse me 7 efektivë MZSH.

Fshati Kabe, Bashkia Dibër.Vatra e zjarrit po zhvillohet në sipërfaqe me shkurre, ferra, barishte dhe bimësi të ulët, në kah të fshatit. Në terren janë angazhuar 1 mjet zjarrfikës dhe 6 efektivë zjarrfikës.

Qarku Berat

Vijon zjarri në bashkinë Poliçan, jashtë territorit të Uzinës Mekanike.

Zjarri ka kaluar mbi ujësjellësin, pranë një grupi banesash dhe pranë qytetit tek Azili i të Moshuarve.  Situata është përkeqësuar në fshatin Plirëz, Poliçan dhe po evakuohen banorët. Në vendngjarje po punojnë MZSH Poliçan 3 mjete, 15 efektivë dhe 2 mjete, 10 efektivë Berat, 60 forca të ushtrisë si dhe forcat e ndërhyrjes së shpejtë të policisë.   Në mbështetje të situatës është edhe Helikopteri i Forcës Ajrore.

Fshati Rehovë, Bashkia Poliçan – Zjarr pranë banesave, një banesë 2-katëshe ka marrë flakë. Po kryhet evakuim.

Fshati Backë, Bashkia Skrapar –Po punohet për shmangiene rrezikut për banesat.

Qarku Tiranë

Mali i Bërzhitës, Bashkia Tiranë, po punohet për shuarjen e zjarrit.

Fshati Stërbeg, Bashkia Rrogozhinë –Forcave zjarrfikëse vendore u janë bashkuar edhe përforcime nga Peqini.

Fshati Okshtun, Bashkia Rrogozhinë –Zjarri në sipërfaqe me shkurre e ferra është vënë nën kontroll. Po punohet për shuarjen e plotë të vatrës.

Fshati Peqinaj, Bashkia Kavajë – Avioni Canadair kroat në operim.

Fshati Hajdaraj, Bashkia Kavajë – Drejt shuarjes, angazhuar 1 mjet dhe 7 forca.

Zona Arbanë, Bashkia Tiranë. Zjarri ka marrë përmasa, por aktualisht, në terren po veprojnë 20 forca zjarrfikëse me 6 mjete, të mbështetura nga 8 forca të APR-së, 8 forca të Policisë Bashkiake si dhe 5 forca të Policisë së Shtetit. Në këtë vatër zjarri ka shkuar edhe një helikopter Canadair kroat.

Qarku Durrës

Mali i Krujës, Bashkia Krujë, ku pati riaktivizim të zjarrit në pyll pishe, 15 forca operacionale dhe  mbështetje nga policia gjatë aksionit për shuarjen e vatrës.

Fshati Barkanesh, Bashkia Krujë. Terreni vështirëson punën.

Qarku Gjirokastër

Rreziku nga zjarri ka kaluar në fshatin Lekël të Tepelenës, pa shkaktuar pasoja për banorët apo banesat e tyre.

Zjarri vijon të jetë aktiv në dy drejtime: poshtë fshatit, në drejtim të fshatit Hormovë, si dhe lart, në faqen e malit të Golikut.

Forcat zjarrfikëse dhe Forcat e Armatosura janë të angazhuara në terren dhe po punojnë me intensitet për izolimin e vatrës së zjarrit.

Qarku Elbasan

Në fshatrat Mukaj dhe Sojnik, Bashkia Gramsh. Në terren MZSH Gramsh dhe 25 efektivë të FA.

Qyteti Cërrik – Është arritur të izolohet zjarri në shkurre. Po mbahet në monitorim nga 20 efektivë e 2 mjete zjarrfikëse.

Fshati Hotolisht, Bashkia Librazhd. Forcat po punojnë me intensitet për të shmangur  rrezikun për banesat.

Qarku Shkodër

Zona Koderboks, Bashkia Shkodër. Monitorim nga forcat e pyjores dhe zjarrfikësit.

Fshati Stajkë, Bashkia Vau Dejës. Era favorizon flakët, 1 mjet zjarrfikës në terren.

Qyteti Pukë – Situata në kontroll. Në terren janë 2 mjete zjarrfikëse dhe forca policore.

Fshati Xath, Bashkia Fushë Arrëz. sore. Situata është e vështirë dhe zjarri ka marrë përmasa. Po evakuohen banorët.

Qarku Kukës

Fshati Gegaj, Bashkia Tropojë – Pa rrezik për banesat. Të angazhuara janë 7 forca MZSH, 15 pyjore, 1 emergjenca civile, 18 forca bashkiake, policë dhe 20 vullnetarë.

 

Mjete ajrore që kanë operuar sot:

1 Canadair (Kroacia)

2 avionë PZL (Greqi)

1 Black Haëk (Republika Çeke)

1 Black Haëk (Sllovakia)

2 Black Haëk (Forcat e Armatosura të Shqipërisë)

Pritet të operojnë:

2 Black Haëk (Emiratet e Bashkuara Arabe)

Tre shtetas mes te cilëve një italian janë aksidentuar me automjetin e tyre ene aksin rrugor Levan -Ferras.

Automjeti me të cilin po udhëtonin ka dalë nga rruga duke u përmbysur në kanalin vaditës. Drejtuesi i mjetit shtetasi italian, mundi te dale nga automjeti kurse bashkëshortja e tij shqiptare dhe nena e saj, u nxorën nga me ndërhyrjen e disa banore të Ferrasit.

Këta te fundit ndodheshin në një lokal pranë vendit të ngjarjes. Të tre të lënduarit u dërguan ne spitalin  e Fierit nga ku mësohet se gjendja e tyre shëndetësore është e qëndrueshme. Policia po heton shkaqet e aksidentit.

Pak minuta me pas, një tjetër aksident ndodhi ne aksin Levan-Tepelene në afërsi të fshatit Varibop. Dy automjete janë përplasur dhe si pasoje janë lenduar dy persona. Ata jane dërguar në spitalin e Fierit por ende nuk dihet gjendja e tyre shëndetësore

Kryeqyteti ynë është pushtuar nga bandat e dhunshme dhe kriminelët e etur për gjakderdhje.

Kjo ishte fjalia që Donald Trump përdori në fjalimin e tij nga Shtëpia e Bardhë ku njoftoi se ka shpallur Emergjencën e Sigurisë Publike në Washington dhe për këtë arsye atje do të vendosen Trupat e Gardës Kombëtare për të pastruar kryeqytetin Amerikan nga personat e pastrehë dhe kriminelët.

Kreu i Shtëpisë së Bardhë u shpreh se imazhi dhe dukja e Washingtonit është po kaq e rëndësishme sa çështja e kriminalitetit dhe për këtë arsye do të ketë jo vetëm dëbim të kriminelëve, por gjithashtu edhe zhvendosje të personave të pastrehë drejt Shteteve të tjera Amerikane atje ku mund të gjejnë një punë dhe të jetojnë një jetë normale. Trump njoftoi gjithashtu se Polica e Washingtonit do të jetë tashmë nën kontroll federal.

“Po njoftoj një veprim historik për të shpëtuar kryeqytetin e kombin tonë nga krimi, gjakderdhja, rrëmuja, mjerimi dhe më keq akoma. Kjo është dita e çlirimit të Washington DC.  Me autoritetin që kam si President i Shteteve të Bashkuara të Amerikës po aktivizoj Seksionin 740 të Aktit të Sundimit Vendor ku Departamenti I Policisë metropolitan do të jetë nën kontrollin federal. Garda Kombëtare do të zbresë në rrugët e kryeqytetit tone për të rivendosur ligjin dhe sigurinë publike në Washington DC.”, ka thënë Trump.

Në vitin 2023, Washingtoni renditej shteti I tretë në Shtetet e Bashkuara të Amerikës me numrin më të lartë të sulmeve me armë. Në 7 muajt e parë të këtij viti krimet e dhunshme në Washington pësuan një rënie me 26% sipas asaj që ka deklaruar Departamenti i Policisë në këtë qytet. Kjo nuk është hera e parë që Donald Trump zgjedh të përdor trupat e Gardës Kombëtare për të luftuar kundrejt atyre që ai i quan banda Kriminale që kanë dëmtuar Shtetet e Bashkuara.

Në muajin Qershor 5 mijë trupa u vendosën në Los Angeles për t’iu përgjigjur protestave kundër bastisje dhe dëbimit të emigrantëve të paligjshëm duke sjellë kështu përplasje të dhunshme me qytetarët. E njëjta gjë pritet të ndodh edhe në Washington ku përveç Kriminelëve, Trupat e Gardës Kombëtare do të zhvendosin edhe personat e pastrehë për të përmirësuar imazhin Kryeqytetit Amerikan. Sipas të dhënave të qeverisë Amerikane, në qytetin Washington DC jeton aktualisht 5138 persona të pastrehë.

/abcnews.al/

Situata me zjarret që ka përfshirë Syrin e Kaltër vijon të mbetet kritike. Flakët janë përhapur me shpejtësi të favorizuara edhe nga era.

Zjarrfikësit kanë ndërhyrë dhe kanë bërë të mundur që deri tani zjarri të mos depërtojë në brendësi të parkut. Dy helikopterë janë angazhuar dhe po punojnë për shuarjen e zjarrit.

Ndërsa përveç sipërfaqes së djegur, një rritës bletësh është shprehur i shqetësuar për situatën dhe deri tani janë djegur 40 koshere dhe rrezikojnë edhe rreth 100 koshere të tjera.

/abcnews.al/

[...]

Read More...