TIRANË, 28 gusht /ATSH/ Ministrja e Shëndetësisë dhe Mbrojtjes Sociale, Albana Koçiu ndau sot pamje nga qendra shëndetësore në Gjirin e Lalëzit, ku pushuesit tashmë marrin shërbim shëndetësor pranë vendit ku pushojnë.

“Qendrat Shëndetësore Verore në shërbim të pushuesve! Në Gjirin e Lalzit dhe 35 qendra të tjera në gjithë vendin, pushuesit vendas dhe të huaj marrin shërbim mjekësor 24/7 gjatë sezonit turistik”, u shpreh ministrja Koçiu në një postim në rrjetet sociale.

“Shëndetësia dhe turizmi ecin bashkë, për pushime të sigurta dhe të qeta në Shqipëri”, theksoi Koçiu.

Disa pacientë që u vizituan në atë qendër shëndetësore shprehen të kënaqur me shërbimin e stafit mjekësor.

“Shërbimi ishte i shkëlqyer, edhe mjekët dhe infermierët ishin shumë të mira”, u shpreh një prej pacientëve.

“Ne i bëjmë një buskopan për dhimbjen që referon dhe japim dhe pak mjekim për tensionin”, u shpreh mjekja e kësaj qendre shëndetësore, duke mjekuar një pacient.

Gjithashtu pas vizitës në këtë qendër, pacientët referohen te mjekët specialistë.

“Jo ndonjë gjë për t’u shqetësuar, kështu që do t’ju referoj për tek mjeku kardiolog për të bërë një ndjekje më të specializuar”, iu drejtua mjekja një tjetër pacienti.

“Erdha te qendra shëndetësore e Gjirit të Lalëzit. Po dëgjova shqetësime dhe bëra një vizitë këtu. Unë jam shumë i kënaqur për rregull, për pastërti, për shërbim nga të gjithë personeli. I falënderoj shumë”, u shpreh një pacient pasi bëri vizitën në këtë qendër shëndetësore.

/gj.m//a.f//r.e/

The post Koçiu: Pushuesit vendas dhe të huaj, shërbim mjekësor në qendrën shëndetësore verore në Gjirin e Lalëzit appeared first on Agjencia Telegrafike Shqiptare.

TIRANË, 28 gusht /ATSH/ Kryeministri Edi Rama ndau sot foto nga Kështjella e Rozafës, mbi lumin Buna në Shkodër.

Tashmë e ndriçuar edhe gjatë mbrëmjes dhe e mirëmbajtur, kalaja tërheq vizitorë në çdo stinë.

Kalaja e Shkodrës, e njohur ndryshe si Kalaja e Rozafës, është një prej kështjellave më të rëndësishme të Shqipërisë dhe objekti kryesor turistik në qytetin e Shkodrës. Ngrihet mbi një kodër shkëmbore në perëndim të qytetit, e rrethuar prej ujërave të lumenjve Bunë, Drin dhe Kir. Mbi faqet e pjerrëta të kodrës ngrihen muret rrethuese, të cilat zënë një sipërfaqe rreth 9 hektarë tokë.

Sipërfaqja e brendshme e kalasë ndahet nga muret e tre oborreve, me porta mes tyre. Oborri i tretë, i cili është më i vogël se të tjerët, ndodhet në pjesën më të lartë të kodrës. Në muret dalës të tij, ka të dala drejtkëndëshe që zëvendësojnë kullat, ndërsa në murin e jashtëm, kullat janë më të dendura. Brenda kështjellës ka disa ambiente që lidhen me një kullë rrethore, një depo si dhe një godinë trekatëshe të kohës veneciane. Oborri i dytë zë pjesën qendrore dhe më të madhe të kalasë, duke u ndarë nga oborri i parë me një mur tërthor pa kulla.

Kalaja e Shkodrës është një nga destinacionet më të rëndësishme turistike, e cila është vlerësuar jo vetëm nga historianët e kohës, por dhe nga udhëtarët e shumtë, jo vetëm për historinë që mbart, por dhe si një monument i rëndësishëm i promovimit të vlerave të një populli, i cili ka një histori të hershme.

/gj.m//r.e//a.f/

The post Rama ndan foto nga Kështjella e Rozafës, mbi lumin Buna appeared first on Agjencia Telegrafike Shqiptare.

TIRANË, 28 gusht /ATSH/ Në Ditën Ndërkombëtare të Personave të Zhdukur u mbajt në Universitetin “Luigj Gurakuqi” Shkodër, simpoziumi shkencor “Kufiri i shpresës dhe i vdekjes 1944-1991 – Shkodra përballë të kaluarës”, organizuar nga Autoriteti i Dosjeve.

Ambasadori i Bashkimit Evropian, Silvio Gonzato, mori pjesë në këtë simpozium, që u mbajt në kujtim të mijëra jetëve shqiptare të humbura në përpjekje për të gjetur lirinë duke kaluar kufirin dhe të atyre që u zhdukën nën regjimin brutal komunist.

Që nga viti 2017, Bashkimi Evropian ka mbështetur Shqipërinë në identifikimin e personave që u zhdukën gjatë regjimit komunist. Së bashku me ICMP-në, Autoritetin e Dosjeve dhe shoqërinë civile, BE ka punuar për të forcuar koordinimin dhe për të rritur ndërgjegjësimin publik.

“Kjo ditë na kujton shumë jetë të humbura, si dhe familjet që ende kërkojnë të vërtetën dhe drejtësinë. Për Shqipërinë, përballja me trashëgiminë e vrasjeve në kufi dhe zhdukjeve gjatë regjimit komunist është një çështje dinjiteti, drejtësie dhe ndërtimi besimi midis qytetarëve dhe institucioneve”, tha Gonzato.

“Përballja me të kaluarën kërkon vullnet politik, një kuadër ligjor funksional dhe, mbi të gjitha, veprime konkrete nga institucionet shqiptare përkatëse për të siguruar zbatimin e ligjit. Ne kemi nevojë urgjente që Këshilli i Ministrave të miratojë një mekanizëm koordinues midis aktorëve përkatës që të mundësojë kërkimin dhe zhvarrosjen e personave të vrarë gjatë regjimit komunist”, shtoi ai.

“Përballja me të kaluarën është një përgjegjësi kolektive, ku secili ka një rol për të kryer”, tha ambasadori i BE-së, Silvio Gonzato në fjalën e tij.

Në këtë simpozium mori pjesë edhe Kryetarja e Kuvendit, Elisa Spiropali, e cila mbajti një fjalë përshëndetëse.

Në këtë veprimtari merrnin pjesë ish-të përndjekur nga regjimi komunist dhe familjarë e përfaqësues të tyre, ambasadori i OSBE, Michel Tarran, deputetja Greta Bardeli, rektori i Universitetit “Luigj Gurakuqi”, prof. Tonin Gjuraj, studiues, përfaqësues të qeverisjes vendore, komuniteteve fetare, shoqërisë civile, etj.

1 nga 4

/gj.m/r.e//a.f/

The post Dita Ndërkombëtare e Personave të Zhdukur, Gonzato: Përballja me të kaluarën kërkon vullnet politik appeared first on Agjencia Telegrafike Shqiptare.

TIRANË, 28 gusht /ATSH/ Vatra e zjarrit në zonën pyjore me bimësi të dendur mbi fshatin Miras, me bimësi të përzier (dushk, pishë etj.) vijon aktive prej ditës së djeshme.

Prefekti i Korçës, Nertil Jole u shpreh sot se, që prej orës 05:00 të mëngjesit, forcat zjarrfikëse, shërbimi pyjor, strukturat vendore dhe banorë të zonës po punojnë intensivisht për shuarjen e flakëve. Në total janë angazhuar rreth 75 forca nga kapacitetet e deklaruara të bashkisë.

Për shkak të terrenit të thyer dhe mungesës së infrastrukturës rrugore, ndërhyrja në brendësi të pyllit është e vështirë, duke kërkuar ecje në këmbë për të mbërritur pranë vatrave, theksoi Jole, duke shtuar se, zjarri si pasojë e erës ka marrë shtrirje dhe ka përfshirë sipërfaqe me pisha, çka e bën situatën komplekse.

Në këto kushte, theksoi Jole, “kemi koordinuar me Agjencinë Kombëtare të Mbrojtjes Civile, dhe gjatë ditës së sotme kemi siguruar edhe mbështetje nga ajri për të neutralizuar intensitetin e flakëve”.

“Gatishmëria e strukturave të emergjencave civile është maksimale! Puna po vijon në terren dhe nga ekipet është organizuar ndërhyrja edhe ditën e nesërme që në orën 5 tē mëngjesit”, shkroi Jole në një postim në rrjetet sociale.

Jole gjithashtu ripërsëriti apelin për kujdes të shtuar nga të gjithë, për të shmangur situata të tilla që kërkojnë shumë energji njerëzore e shpenzime buxhetore për t’u neutralizuar.

/gj.m/r.e//a.f/

The post Jole: Vijon aktive vatra e zjarrit në zonën pyjore mbi fshatin Miras appeared first on Agjencia Telegrafike Shqiptare.

TIRANË, 28 gusht /ATSH/ Kryetarja e Kuvendit, Elisa Spiropali zhvilloi sot një vizitë në Shkodër, ku pati një takim me kryetarin e bashkisë, Benet Beci.

Spiropali u shpreh se me Becin diskutuan për projektet e reja për Shkodrën.

“Shkodër, së bashku me kryetarin e bashkisë dhe mikun, Benet Beci. Gjithmonë bukur të shohësh nga afër, të dëgjosh e diskutosh për projektet e reja për Shkodrën kryezonjë, qytetin dhe njerëzit që i kanë dhe i meritojnë të gjitha të mirat”, shkroi Spiropali në një postim në rrjetet sociale.

Më pas kryeparlamentarja zhvilloi një vizitë edhe në Malësinë e Madhe, ku pati një takim me kryetarin e bashkisë, Tonin Marinaj, me të cilin diskutuan projektet e shumta të përfunduara, si dhe nevojën për të vijuar mbështetjen e investimeve, fuqizimin e komuniteteve lokale dhe modernizimin e shërbimeve publike e infrastrukturës, për përmirësimin e cilësisë së jetës së qytetarëve.

“Gjithmonë kënaqësi vizitat në Malësi të Madhe. Me kryetarin e bashkisë, Tonin Marinaj diskutuam për projektet e shumta të përfunduara, si dhe nevojën për të vijuar mbështetjen e investimeve, fuqizimin e komuniteteve lokale dhe modernizimin e shërbimeve publike e infrastrukturës, për përmirësimin e cilësisë së jetës së qytetarëve”, shkroi Spiropali në një postim në rrjetet sociale.

1 nga 9

/gj.m/r.e//a.f/

The post Spiropali vizitë në Shkodër dhe Malësi të Madhe, diskutime për projektet me kryebashkiakët appeared first on Agjencia Telegrafike Shqiptare.

TIRANË, 28 gusht /ATSH/ Ditën e sotme u zhvillua takimi i parë të konsultimit publik, online, për Strategjinë Kombëtare të Inteligjencës Artificiale.

Drejtoresha e Agjencisë Kombëtare të Shoqërisë së Informacionit (AKSHI), Linda Karçanaj u shpreh sot se kjo strategji është hartuar me mbështetjen e Bankës Botërore dhe partnerëve të tjerë ndërkombëtarë, duke siguruar ekspertizë dhe përvojë globale.

“Shqipëria ka hyrë tashmë në një fazë shumë të rëndësishme të zhvillimeve teknologjike. Vitet që vijnë do të shënojnë një shkallë tjetër të rritjes së standardeve, falë integrimit të IA në sektorët kyç si shëndetësia, arsimi, bujqësia, energjia, transporti, turizmi dhe mjedisi”, theksoi Karҫanaj në një postim në rrjetet sociale.

“Ndamë me grupet e interesit parimet themelore mbi të cilat është ngritur kjo strategji: Etikë dhe transparencë. Siguri dhe mbrojtje e të dhënave. Gjithëpërfshirje. Përafrim me kornizën europiane”, shtoi Karҫanaj.

Karҫanaj theksoi se, “Strategjia Kombëtare e IA sjell për Shqipërinë, shërbime publike më të shpejta, më të thjeshta dhe më transparente, duke rritur cilësinë e ndërveprimit mes qytetarëve dhe institucioneve. Rritje e besimit dhe transparencës, falë vendimmarrjes së bazuar në të dhëna dhe llogaridhënie. Rritje të investimeve dhe zhvillim ekonomik, duke tërhequr kapital vendas dhe të huaj, hapur vende të reja pune dhe rritur konkurrencën. Nxitje e inovacionit në arsim, shkencë dhe industry, me kapacitete njerëzore të fuqizuara, përdorim të të dhënave të hapura dhe mbështetje për kërkimin shkencor. Përshtatje e plotë me standardet e BE-së, përmes transpozimit të EU AI Act dhe udhëzimeve përkatëse, Shqipëria bëhet një partner i besueshëm për integrimin digjital me tregun europian”.

Karҫanaj nënvizoi se, “kjo strategji është një hap i madh përpara drejt një ekonomie digjitale të qëndrueshme, të besueshme dhe në shërbim të qytetarëve”.

1 nga 8

/gj.m//a.f//r.e/

The post Zhvillohet takimi i parë i konsultimit publik për Strategjinë Kombëtare të Inteligjencës Artificiale appeared first on Agjencia Telegrafike Shqiptare.

TIRANË, 28 gusht /ATSH/ Ambasada e Shteteve të Bashkuara të Amerikës falënderoi sot Policinë e Shtetit për shërbimin në sigurinë e Ambasadës.

E Ngarkuara me Punë, Nancy VanHorn dhe Zyra Rajonale e Sigurisë i nderuan sot në një ceremoni vlerësimi për shërbimin e tyre, disa prej tyre për më shumë se 15 vjet.

Ambasada e Shteteve të Bashkuara e vlerëson thellësisht partneritetin me forcat e rendit në Shqipëri për të penguar kërcënimet dhe për të mbrojtur qytetarët tanë.

“Një falënderim për Policinë e Shtetit që e bën ambasadën tonë më të sigurt çdo ditë! Sot, e Ngarkuara me Punë Nancy VanHorn dhe Zyra Rajonale e Sigurisë i nderuan në një ceremoni vlerësimi për shërbimin e tyre – disa prej tyre për më shumë se 15 vjet! Ambasada e Shteteve të Bashkuara e vlerëson thellësisht partneritetin tonë me forcat e rendit në Shqipëri për të penguar kërcënimet dhe për të mbrojtur qytetarët tanë”, shkruan Ambasada amerikane në një postim në rrjetet sociale.

1 nga 5

/gj.m//a.f//r.e/

The post Ambasada e SHBA, ceremoni vlerësimi për shërbimin e Policisë së Shtetit appeared first on Agjencia Telegrafike Shqiptare.

TIRANË, 28 gusht /ATSH/ Në muajin korrik 2025 numërohen 131 aksidente rrugore, nga të cilët 194 persona janë të aksidentuar (të vrarë dhe të plagosur), sipas të dhënave të Institutit të Statistikave (INSTAT).

Gjatë periudhës janar – korrik 2025, numri i aksidenteve rrugore është ulur me 16,0%, krahasuar kjo me të njëjtën periudhë të një viti më parë.

Aksidentet rrugore, në 89,3% të rasteve, kanë ndodhur si pasojë e sjelljes së drejtuesit të mjetit.

Numri më i lartë i aksidenteve, në këtë periudhë, është kryer nga grup-moshat 25-34 vjeç, duke zënë 28,2% të numrit të aksidenteve gjithsej.

Në muajin korrik 2025, numri më i lartë i aksidenteve rrugore ka ndodhur përgjatë ditës së martë me 19,8%, ndërsa numri më i ulët i aksidenteve ka ndodhur përgjatë ditës së premte, me 9,2%.

Numri më i lartë i aksidenteve rrugore ka ndodhur përgjatë harkut kohor 08:00 – 12:00, duke zënë 28,2% të numrit të aksidenteve rrugore gjithsej.

/gj.m/r.e//a.f/

The post INSTAT: Në janar-korrik 2025 pati 16% më pak aksidente rrugore se një vit më parë appeared first on Agjencia Telegrafike Shqiptare.

TIRANË, 28 gusht /ATSH/ Që prej vitit 2019, Programi i Delegatëve Rinorë, i zhvilluar nga UNAA me mbështetjen e qeverisë shqiptare, u ka dhënë të rinjve shqiptarë mundësinë të jenë pjesë e zërit të rinisë shqiptare në Kombet e Bashkuara.

Ministrja e Shtetit për Rininë dhe Fëmijët, Bora Muzhaqi mori pjesë sot në “Europe House”, ku u zhvillua debati final mes katër kandidatëve: Martina Qepa, studente e Shkencave Politike e angazhuar në diplomaci dhe vullnetarizëm; Ema Meçaj, studente e Mjekësisë dhe aktiviste në advokimin rinor e politikën ndërkombëtare; Edmirjano Preçi, sipërmarrës në fushën e teknologjisë dhe promovues i përfshirjes digjitale; dhe Alesia Dodaj, studente e Drejtësisë e përkushtuar ndaj fuqizimit të rinisë dhe përfshirjes sociale.

Finalistët ndanë vizionet e tyre mbi multilateralizmin, paqen e sigurinë, barazinë, ndryshimet klimatike, teknologjitë e reja dhe rolin e rinisë në arritjen e Objektivave të Zhvillimit të Qëndrueshëm.

Në përfundim, u përzgjodhën dy të rinjtë që do të përfaqësojnë Shqipërinë në OKB për vitet 2025–2026, Ema Meçaj dhe Alesia Dodaj.

1 nga 7

/gj.m/r.e//a.f/

The post Muzhaqi: Përzgjidhen delegatët rinorë të Shqipërisë në OKB appeared first on Agjencia Telegrafike Shqiptare.

TIRANË, 28 gusht /ATSH/ Shkolla 9-vjeçare “Besëlidhja e Malësisë” në Bajram Curri (Tropojë) do të hapë dyert këtë vit të ri shkollor.

Shkolla do të ketë kushte dinjitoze, me klasa të reja, laboratorë, terrene sportive e mjedise bashkëkohore për mbi 250 nxënës dhe mësues, falë investimit të Ministrisë së Arsimit dhe Sportit dhe bashkisë së Tropojës.

Ministrja e Arsimit dhe Sportit, Ogerta Manastirliu ndau sot foto nga kjo shkollë, duke theksuar se “shkolla 9-vjeçare “Besëlidhja e Malësisë” në Bajram Curri, Tropojë, do të hapë dyert këtë vit të ri shkollor me kushte dinjitoze, me klasa të reja, laboratorë, terrene sportive e mjedise bashkëkohore për mbi 250 nxënës dhe mësues, falë investimit të Ministrisë së Arsimit dhe Sportit dhe Bashkisë së Tropojës”.

Ky projekt shënon një hap të rëndësishëm drejt modernizimit të infrastrukturës shkollore dhe përmirësimit të kushteve të të mësuarit për nxënësit dhe mësuesit. Punimet kanë përfunduar sipas afateve të parashikuara, duke garantuar që shkolla të jetë gati për vitin e ri shkollor 2025 – 2026.

Investimi erdhi vetëm dy vite pas kremtimit të 100-vjetorit të themelimit të shkollës, një moment historik që dëshmon rolin e saj të pazëvendësueshëm në edukimin e brezave të rinj.

Cilësia në arsim përmes investimeve të qëndrueshme në shkolla, objekte sportive dhe ambiente ndihmëse, duke rritur aksesin, sigurinë dhe funksionalitetin e institucioneve arsimore, mbetet prioritet i qeverisë.

1 nga 14

/gj.m/r.e//a.f/

The post Manastirliu: Hap dyert në shtator shkolla 9-vjeçare “Besëlidhja e Malësisë” në Bajram Curri appeared first on Agjencia Telegrafike Shqiptare.

TIRANË, 28 gusht /ATSH/ Sekuestrohet pasuria me vlerë 26 milionë e 500 mijë euro, në pronësi të një 45-vjeçari, i dënuar nga autoritetet italiane për vrasje dhe për pjesëmarrje në grup kriminal për trafikim të lëndëve narkotike.

Specialistët e Seksionit për Hetimin e Pastrimit të Parave, në bashkëpunim me specialistët e Agjencisë së Administrimit të Pasurive të Sekuestruara dhe të Konfiskuara, në kuadër të një procedimi penal të drejtuar nga Prokuroria e Tiranës, ekzekutuan vendimin e Gjykatës së Tiranës, për sekuestrimin e pasurive në pronësi të shtetasit K. K., alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike”, kryer në kuadër të grupit të strukturuar kriminal.

Pasuritë e sekuestruara janë konkretisht: 19 prona, 2 automjete dhe 20 llogari bankare, të regjistruara në emër të 45-vjeçarit ose të familjarëve të tij, me vlerë tregu rreth 26 milionë e 500 mijë euro.

Vijon puna për gjurmimin dhe sekuestrimin e pasurive të tjera që dyshohet se kanë burim nga veprimtaritë kriminale të këtij shtetasi.

Materialet procedurale iu referuan Prokurorisë së Tiranës, për veprime të mëtejshme.

1 nga 2

/gj.m//a.f//r.e/

The post Sekuestrohet pasuria me vlerë 26,5 milionë euro e një 45-vjeçari të dënuar për vrasje në Itali appeared first on Agjencia Telegrafike Shqiptare.

TIRANË, 27 gusht /ATSH/ Ministri i Shtetit për Marrëdhëniet me Parlamentin, Taulant Balla mirëpriti sot Marko Çekajn, një i ri shqiptar që ka lindur në Nju-Jork (SHBA), ku është arsimuar për ekonomi.

Me një përvojë ndërkombëtare në fushën e ekonomisë, Marko ka vendosur të kthehet në atdheun e tij për të vazhduar studimet dhe për të dhënë kontributin e tij në zhvillimin e vendit.

Gjatë takimit, Balla u shpreh se kthimi i të rinjve me eksperiencë ndërkombëtare për të investuar njohuritë dhe aftësitë e tyre në Shqipëri është një mesazh i fortë për fuqizimin e potencialit të vendit dhe një model frymëzimi për brezat e rinj.

Marko shprehu dëshirën për të qenë pjesë aktive e proceseve zhvillimore dhe ekonomike në Shqipëri, duke kontribuar me idetë e tij dhe duke ndihmuar në projekte që synojnë përparimin e vendit.

Ministri Balla theksoi se, angazhimi i të rinjve të edukuar jashtë vendit është një vlerë e shtuar për Shqipërinë dhe një shembull që tregon se diaspora mund të japë një kontribut të rëndësishëm në Shqipërinë që synon të anëtarësohet në BE deri më 2030.

/gj.m/j.p/r.e/

The post Balla takon të riun shqiptar: I lindur në Nju-Jork, është kthyer të kontribuojë në atdhe appeared first on Agjencia Telegrafike Shqiptare.

TIRANË, 27 gusht /ATSH/ 3,314 të rinj kanë aplikuar në programin e praktikave të punës që përbën numrin më të lartë në 10 vite.

Lajmi u dha sot nga ministrja e Shtetit për Rininë dhe Fëmijët, Bora Muzhaqi, e cila u shpreh se, ky është një sinjal i fortë se rikonceptimi i programit ka funksionuar.

“Këtë vit kemi arritur një rekord të ri. 3.314 të rinj kanë aplikuar në Programin Kombëtar të Praktikave të Punës. Numri më i lartë në 10 vite. Ky është një sinjal i fortë, se rikonceptimi i programit ka funksionuar. Aplikimet janë më të shumta, më cilësore dhe konkurrenca është më e fortë se çdo vit”, tha Muzhaqi.

“Tani, të gjitha institucionet po bëjnë vlerësimet dhe brenda 10 ditësh do të njoftohen të gjithë kandidatët e suksesshëm. Suksese të gjithë të rinjve që kanë aplikuar. Dhe faleminderit për besimin që na keni treguar tek ky program”, u shpreh ministrja Muzhaqi.

/gj.m/j.p/

The post 3,314 të rinj aplikuan në programin e praktikave të punës, numri më i lartë në 10 vite appeared first on Agjencia Telegrafike Shqiptare.

TIRANË, 27 gusht /ATSH/ Ditën e sotme u zhvillua ceremonia e Mirënjohjes Kombëtare për të gjitha forcat e angazhuara në operacionet e shpëtimit ndaj zjarreve.

Kryeministri Edi Rama dekoroi me Medaljen e Mirënjohjes Publike dhe Vlerësimit Profesional disa prej heronjve në betejën ndaj zjarreve.

Ai u shpreh se dekorimi është një “shenjë simbolike mirënjohjeje dhe mesazh për të gjithë këtë trupë që meriton nderimin më të posaçëm”.

Mes të dekoruarve me Yllin e Mirënjohjes Publike ishte edhe Komisar Agim Troci, i cili u plagos vetë pasi shpëtoi disa banorë të bllokuar nga zjarret.

Yllin e Mirënjohjes publike e morën edhe koloneli Gëzim Marku dhe nënkoloneli Ervin Buzi.

Mirënjohje Publike, Vlerësim Profesional dhe Medalje Ari, morën: Inspektor Klajdi Mustaj, Nënkolonel Euklid Jemini, Nënkolonel Vladimir Nasufi, Ilirjan Hasanaj, Zjarrfikës Klodian Fishta, Zjarrfikës Ahmet Beqo, Zjarrfikës Besnik Hasani, Kryeinspektor Ilir Llapushi, Zjarrfikës Ilir Sinani.

Medalje Argjendi morën: nënkomisar Eridion Lame, inspektore Laura Leka, nënkolonel Aleksander Sine, major Ermal Radomi, toger Saimir Shemi, rreshter Indrit Shehi, tetar Vasil Leno.

Medalje Bronzi: Oficer Andi Gjura, Nëntoger Denis Gaba, Rreshter Granita Hasanaj, Ushtar Brisild Xhaçka

/gj.m/j.p/

The post Dekorohen heronjtë në luftën ndaj zjarreve appeared first on Agjencia Telegrafike Shqiptare.

TIRANË, 27 gusht /ATSH/ Kryeministri Edi Rama deklaroi sot se, “qëndresa e njerëzve tanë ka ndaluar atë që mund të kishte qenë një asgjësim masiv mjedisor, ekonomik, moral dhe largqoftë një asgjësim njerëzor me përmasa dramatike”.

Në fjalën e tij në ceremoninë e Mirënjohjes Kombëtare të dhënies së medaljeve dhe shpërblimeve për të gjithë forcat e angazhuara në operacionet e shpëtimit ndaj zjarreve, Rama u shpreh se, “edhe pse përballë një sfide të jashtëzakonshme në Delvinë, në Finiq, në Gramsh dhe në Poliçan, në Kaninë, Borsh, Piqeras, në Fushë-Arrëz dhe në Dibër dhe deri në orët e fundit në Skrapar dhe në Vlorë, qëndresa e njerëzve tanë ka ndaluar atë që mund të kishte qenë një asgjësim masiv mjedisor, ekonomik, moral dhe largqoftë një asgjësim njerëzor me përmasa dramatike”.

“Qindra mjete zjarrfikëse, helikopterë dhe edhe avionë. Pothuajse 100 misione nga ajri, qindra ndërhyrje në tokë dhe ky shtet i sfiduar si asnjë vit më parë nga zjarret nuk u thye, përkundrazi tregoi se Mekanizmi i mbrojtjes Civile nga fshati më i largët deri tek qendra e Tiranës ose anasjelltas, mundi dhe diti të jepte më të mirën edhe pse shumë ka ende për të bërë”, tha Rama.

“Sigurisht që nuk munguan edhe ekspertët online të fikjes së zjarrit, as zjarrvënësit e zakonshëm të mexhelisit tonë publik dhe dixhital, por Shqipërinë nuk e mbrojtën ata, Shqipërinë e mbrojti djersa, guximi dhe sakrifica e atyre 10 mijë e kusur njerëzve në vijën e zjarrit, pjesë e të cilëve përfaqësuese jeni edhe ju këtu”, theksoi Rama.

Kjo, shtoi ai, “është e vërteta e thjeshtë dhe e vërteta e vetme që ia vlen të thuhet me zë të lartë, ndërkohë që nga Spanja tek Franca, nga Turqia tek Portugalia, Italia e Greqia, i gjithë Mesdheu ishte në flakë si asnjëherë më parë këtë verë”.

Ram solli edhe bilancin tragjik të kësaj vere në shtetet e Mesdheut.

“Në Spanjë u zhbën totalisht afro 400 mijë hektarë. Në Portugali mbi 235 mijë hektarë, pesëfish më shumë sesa mesatarja e viteve të fundit. Në Itali afro 60 mijë hektarë. Ndërkohë që Turqia numëroi edhe 17 viktima dhe dhjetëra mijëra njerëz të evakuuar, përveçse humbi qindra mijëra hektarë tokë të mbjellë, të gjelbëruar. Ndërsa Greqia nga Kreta në Patra pa përsëri tmerr me sy. Parafytyroni që BE del nga kjo verë me mbi 1 milionë hektarë tokë të bërë shkrumb e hi”, tha Rama.

Ndaj, shtoi kreu i qeverisë, “kur dëgjojmë zëra që shajnë Shqipërinë pse nuk ka avionë zjarrfikës në pronësi duhet ta mbajmë parasysh një të vërtetë shumë të thjeshtë. Avionët nuk janë magjistarë. Ata janë ndihmës të fuqishëm, të cilët nuk na kanë munguar falë Mekanizmit Evropian të Mbrojtjes Civile, pjesë e të cilit jemi ne Shqipëria me të drejta të barabarta, por nuk janë asesi të plotfuqishëm”.

“22 avionë të gjeneratës së fundit, nuk e penguan dot përbindëshin e flakëve ta digjte dhe ta përcëllonte gjerësisht zonën e Izmirit duke hapur një plagë të dhimbshme mbi tokën e Turqisë mike dhe duke bërë të evakuohen dhjetëra mijëra njerëz”, u shpreh Rama.

“Ashtu sikundër forca më e madhe ajrore e planetit nuk mundi dot ta shmangte shkrumbimin tragjik të një vendbanimi të madh sa Tirana, në Los Angelos”, nënvizoi Rama.

Rama theksoi se, “avionët janë një krah i fuqishëm në betejë padyshim. Edhe ne do të kemi së shpejti flotën e avionëve tanë e cila do të nisë të ndërtohet me dy avionë zjarrfikës, por magjia, nëse mund ta quajmë kështu, është bashkërendimi dhe sakrifica në tokë. Sot ne jemi këtu pikërisht për sakrificën në tokë dhe patjetër po përgatitemi për çfarë duhet dhe padyshim mund të bëjmë më shumë dhe mund të bëjmë më mirë. Parandalim më të mençur, pastrim pyjesh, krijim korridoresh natyrore, futje në përdorim të më shumë dronëve për monitorim me kamera termike dhe futjen në përdorim gjerësisht të dronëve për mbjelljet e reja në sipërfaqet e djegura. Teknologji dhe inteligjencë me sisteme alarmi të hershëm dhe një funksionim më i mirë, falë edhe investimeve që do të bëjmë më tej, i qendrave të integruara të kontrollit për të pasur një reagim më të shpejtë me mjete tokësore”.

Por, shtoi kryeministri, “të gjitha këto nuk na çojnë larg pa edukimin dhe ndërgjegjësimin, gjë që kërkon që çdo shkollë dhe çdo institucion, por duke filluar nga shkolla të bëhet pjesë e vëmendjes, e mbrojtjes dhe e ripërtëritjes kombëtare për pyjet, ku nxënësit jo vetëm mësojnë, por marrin pjesë në mbjellje, në përkujdesje dhe një solidaritet akoma më të madh ndërkombëtar”.

Rama falënderoi përfaqësuesit e BE-së dhe të vendeve mike, pasi theksoi ai, “falë rrjetit të solidariteti dhe falë integrimit të Shqipërisë në Mekanizmin e Mbrojtjes Civile Evropiane ne ia kemi dalë më së miri të evitojmë më të keqen. Dhe Kroacia, Greqia, Hungaria, Çekia, Sllovakia, Suedia dhe si gjithmonë Italia, meritojnë një falënderim të posaçëm sepse në zinxhirin e Mekanizimit dërguan në vazhdimësi mjete ajrore për fikjen e zjarreve”.

/gj.m/j.p/

The post Rama: Së shpejti do të kemi flotën e avionëve tanë zjarrfikës appeared first on Agjencia Telegrafike Shqiptare.

TIRANË, 27 gusht /ATSH/ Sulmuesi i Kombëtares shqiptare, Myrto Uzuni  në një intervistë për faqen zyrtare të FIFA-s foli për shanset e Shqipërisë në Kupën e Botës dhe çfarë do të nënkuptonte kualifikimi në Botëorin që mbahet vitin e ardhshëm në SHBA.

Uzuni shpreson për një ndryshim fati për ekipin kombëtar të Shqipërisë. Shqipëria ka një ndeshje vendimtare kualifikuese në shtator kundër Letonisë

Sulmuesi i Austin FC foli gjithashtu për eksperiencën e tij në SHBA dhe ëndrrën e tij për Kupën e Botës.

Myrto Uzuni ka qenë një golashënues i shkëlqyer në çdo ndalesë të karrierës së tij, duke filluar në vendin e tij të lindjes, Shqipërinë, plus Kroacinë, Hungarinë, Spanjën dhe tani në SHBA me ekipin e Major League Soccer (MLS), Austin FC.

Me fillime modeste, të cilat përfshinin emigracionin e familjes së tij në Greqi në ndjekje të mundësive më të mëdha kur ai ishte dhjetë vjeç, sulmuesi 30-vjeçar gjithmonë e ka përdorur futbollin për të siguruar jetesën për veten dhe të dashurit e tij. Është e njëjta ambicie që e ka bërë atë një lojtar kyç të ekipit kombëtar të Shqipërisë në përpjekjen e tyre për një kualifikim për herë të parë në Kupën e Botës FIFA.

Kuqezinjtë aktualisht renditen të dytët në Grupin K të kualifikimeve të UEFA-s, katër pikë pas Anglisë kryesuese dhe vetëm një pikë përpara skuadrës serbe me dy ndeshje më pak të zhvilluara. Një përballje me Letoninë afrohet në shtator, që është fillimi i një periudhe vendimtare prej katër ndeshjesh gjatë tre muajve të ardhshëm. Uzuni u shpreh për faqen e FIFA-s në një intervistë se Shqipëria do të bëjë gjithçka që mundet për ta bërë popullin e saj krenar.

FIFA: Cilat janë mendimet tuaja të përgjithshme për fushatën kualifikuese të Shqipërisë për Kupën e Botës deri më tani?

Myrto Uzuni: Ne jemi në vendin e dytë në grup, por Serbia ka dy ndeshje më pak. Çdo ndeshje tani është si një finale. Duhet të japësh maksimumin. Nga ky shtator, tetor dhe nëntor, çdo ndeshje është një finale, por më e rëndësishmja është ndeshja e shtatorit.

FIFA: Ju startuat në ndeshjen e parë kualifikuese kundër Anglisë, një humbje e luftuar 2-0. Pavarësisht humbjes, a ju dha ajo performancë të gjithëve besim?

Myrto Uzuni: Mendoj se patëm një performancë të shkëlqyer sepse është e vështirë kur luan kundër një skuadre që është gjithmonë sulmuese dhe ka lojtarë me cilësi të lartë si Phil Foden, Jude Bellingham dhe Harry Kane. Por mendoj se Shqipëria po përmirësohet shumë. Ne kemi lojtarë të mrekullueshëm dhe një staf të mrekullueshëm, kështu që mendoj se mund të rivalizojmë me çdo ekip, dhe ky besim vjen nga loja kundër Anglisë. Nëse mund ta sfidosh Anglinë, mund ta sfidosh çdo ekip.

FIFA: Edhe pse nuk ishe pjesë e skuadrës, sa shumë nxitje ishte të shihje Shqipërinë të përballej me ekipe të mëdha si Italia, Kroacia dhe Spanja në EURO 2024?

Myrto Uzuni: Për mua të isha jashtë dhe të shikoja ndeshjet ishte e pabesueshme. Të shihja Shqipërinë në atë nivel, duke luajtur kundër Spanjës, Italisë dhe duke garuar vërtet mirë ishte fantastike.

FIFA: Ti shënove në fitoren kundër Andorrës. Si ndihesh të shënosh për vendin tënd në një kualifikuese?

Myrto Uzuni: Kisha luajtur 90 minuta në Angli dhe patëm vetëm dy ditë pushim. Vrapova rreth 13 kilometra atë ndeshje dhe pastaj fluturova për në shtëpi, kështu që ishte një ndeshje e lodhshme. Trajneri më futi në lojë për pjesën e dytë kundër Andorrës dhe shënova. Ai moment ishte shumë i lumtur, sepse luan për vendin tënd dhe luan për familjen tënde.

FIFA: Cilat janë mendimet e tua për ndeshjen tënde të radhës kundër Letonisë?

Myrto Uzuni: Kemi një ndeshje miqësore në Gjibraltar para se të luajmë me Letoninë, kështu që do të përgatitemi për ndeshjen me Letoninë në Gjibraltar. Kundër Letonisë, sigurisht, duhet të fitojmë. Jemi jashtë nëse nuk e fitojmë atë ndeshje. Kaq është. Presioni është aty, por ky presion në futboll është i mirë. Pra, për ne, janë vetëm tre pikë, asgjë tjetër.

FIFA: Cilat janë çelësat për kualifikimin e Shqipërisë?

Myrto Uzuni: Në futboll, nuk i dihet kurrë. Merr një karton të kuq dhe mund ta shkatërrojë ekipin, kështu që nëse bëjmë një gabim kundër Letonisë dhe barazojmë 1-1, kjo mund të jetë e gjitha për ne, vetëm ai gabim i vetëm. Nuk mund të bëjmë gabime të tjera që tani e tutje. Duhet të fitojmë çdo ndeshje për të kaluar në Kupën e Botës. Nëse nuk fitojmë në shtator, jemi jashtë Kupës së Botës.

FIFA: Shqipëria është kualifikuar për dy EURO, por nuk ka arritur ende në një Kupë Bote, kështu që çfarë do të thotë të ky kualifikim?

Myrto Uzuni: Për mua, si të gjithë njerëzit e tjerë, kjo është një ëndërr. Të luaj në Kupën e Botës me Shqipërinë është ëndrra ime. Do të isha shumë krenar dhe do të ishte momenti më i lartë i karrierës sime.

FIFA: Si do të ishte vendi nëse do të ndodhte?

Myrto Uzuni: Vendi do të digjej [qesh]… Është e mrekullueshme, tifozët, njerëzit, ata jetojnë për vendin. Shihni shqiptarë që jetojnë në Greqi ose kudo dhe të gjithë kanë një flamur në shtëpinë e tyre sepse e ndiejnë kaq shumë. Jemi kaq të lidhur me vendin.

FIFA: Çfarë ndikimi ka pasur Sylvinho në këtë ekip?

Myrto Uzuni: Sylvinho erdhi dhe ka krijuar një grup të mrekullueshëm. Sylvinho luajti kudo dhe ka shumë cilësi. Ai stërvitet me ne dhe nuk mund t’ia marrësh topin! Ai dhe [ndihmës trajneri] Pablo Zabaleta po bëjnë një punë të shkëlqyer. Mendoj se janë trajnerë të shkëlqyer, me të vërtetë. Pablo është agresiv gjatë gjithë kohës. Edhe kur luajmë në stërvitje Pablo bën ndërhyrje agresive ndaj nesh, duke treguar urinë argjentinase. Është e mrekullueshme të punosh me ta.

FIFA: Je një admirues i madh i Cristiano Ronaldos, kështu që a mund ta imagjinosh veten duke luajtur në një ndeshje të Kupës së Botës kundër tij?

Myrto Uzuni: Për mua, gjëja më e rëndësishme është që të shkoj me Shqipërinë në një Kupë Bote. Dhe nëse e gjej Ronaldon në grupin tim, kjo do të ishte e mrekullueshme. Do të ishte një tjetër ëndërr. Por siç thashë, për mua, më e rëndësishmja është që vendi të jetë i lumtur.

FIFA: Çfarë ndodh kur je në fushë dhe dëgjon himnin kombëtar të Shqipërisë?

Myrto Uzuni: Të dridhura. E ndjen drejtpërdrejt në atë moment. I gjithë stadiumi këndon në këtë moment. Kjo është ajo që shoh këtu në SHBA. Ata janë gjithashtu krenarë për vendin e tyre në SHBA. Këtu njerëzit janë shumë të lidhur me vendin dhe e dua këtë sepse është e njëjta gjë në Shqipëri.

FIFA: Si po shkon për ty në Austin FC?

Myrto Uzuni: Ndihem më mirë sepse ekipi po përmirësohet. Kur merr rezultatet, gjithçka është më mirë, kështu që mendoj se duhet të vazhdojmë të punojmë në atë mënyrë për të arritur qëllimet tona.

FIFA: Çfarë mendon për nivelin e MLS?

Myrto Uzuni: Sigurisht, kur luan në një ligë si në Spanjë, cilësia është më e lartë sepse ka ekipe që luajnë në Ligën e Kampionëve dhe ka lojtarë me cilësi të lartë. Por edhe këtu në MLS ka cilësi. Tani e shihni që të gjithë po vijnë në MLS dhe po përmirësohet shumë.

FIFA: A ju zuri në befasi entuziazmi për sportin këtu në SHBA?

Myrto Uzuni: Jo tamam. E shoh këtu në Austin FC sepse kur jemi në shtëpi, tifozët janë të mrekullueshëm. Ata nuk ndalen së kënduari gjatë gjithë kohës, kështu që ky është një motivim shtesë për ne, për të pasur mbështetje nga minuta e parë deri në 90 minuta.

FIFA: A ju pyesin shokët e ekipit të Shqipërisë se si është të luash në SHBA, veçanërisht me Kupën e Botës që vjen këtu vitin tjetër?

Myrto Uzuni:  Kemi bërë këtë bisedë, po. Herën e fundit që isha në Shqipëri me ekipin kombëtar, ata më pyetën për fushat stërvitore, mjediset dhe gjithçka. U shpjegova se gjithçka është perfekte dhe se njerëzit atje e duan futbollin. /gj.m/j.p/

The post Kualifikimi në Botëror, Uzuni: Shqipëria nuk ka më vend për gabime appeared first on Agjencia Telegrafike Shqiptare.

TIRANË, 27 gusht /ATSH/ Konferenca e Ambasadorëve “Diplo 2025” do të mbahet në Tiranë në datat 8-10 shtator.

Lajmin e ka dhënë ministri për Evropën dhe Punët e Jashtme, igli Hasani, i cili shprehet se po bëhen përgatitjet e fundit për këtë konferencë.

Hasani nënvizon se, edhe këtë vjeshtë, ambasadorët e Shqipërisë nga e gjithë bota bashkohen në Tiranë për një tjetër konferencë të suksesshme.

“Përgatitjet e fundit për Diplo 2025. Edhe këtë vjeshtë, bashkojmë ambasadorët tanë nga e gjithë bota për një tjetër konferencë të suksesshme në Tiranë. 8–10 shtator 2025. Shqipëria 2030: në Evropë, e ndërlidhur me botën”, shkruan Hasani në një postim në rrjetet sociale.

Vitin e shkuar Konferenca e Ambasadorëve të Republikës së Shqipërisë “Diplo 2024”, e organizuar nga Ministria për Evropën dhe Punët e Jashtme u mbajt në datat 26 -28 gusht 2024.

Në atë konferencë u nënvizua rëndësia e integrimit të aftësive dhe përvojave të ndryshme në shërbimin tonë diplomatik.

Në fokus të diskutimeve ishin edhe dhënia e ideve dhe ndarja e mendimeve për prioritetet e MEPJ: avancimi i procesit të integrimit evropian, forcimi i diplomacisë ekonomike dhe rolit të Diasporës, modernizimi i shërbimeve konsullore etj.

Diskutimet nxorën në pah nevojën për përmirësimin e bashkëpunimit me ministritë e linjës, për të çuar përpara axhendën e reformave, sikundër edhe përgatitjet për Samitin e NATO-s dhe Samitin e Komunitetit Politik Evropian.

/gj.m/j.p/

The post Hasani: Konferenca e Ambasadorëve “Diplo 2025” mbahet në Tiranë në 8-10 shtator appeared first on Agjencia Telegrafike Shqiptare.

TIRANË, 27 gusht /ATSH/ Ministria e Mbrojtjes informoi sot lidhur me situatën e zjarreve në rang vendi.

Ministria vuri në dukje se strukturat e Mbrojtjes Civile, të ndihmuar edhe nga Forcat e Armatosura po vijojnë intensivisht punën në terren për përballimin e situatës së zjarreve në disa qarqe të vendit.

Gjatë orëve të fundit janë evidentuar 14 vatra zjarri, nga të cilat 11 vatra janë shuar plotësisht, 2 vatra janë ende aktive dhe 1 vatër është nën monitorim të vazhdueshëm

Vatrat aktive janë në zonën e Akërnisë (Delisuf, Novoselë), bashkia Vlorë, ku aktualisht, situata në zonën e Akërnisë është nën kontroll dhe e qetë. Operacionet në terren po vijojnë që në orët e para të mëngjesit me angazhimin e 2 automjete zjarrfikëse me 10 efektivë nga MZSH Vlorë, 21 forca bashkiake, 3 punonjës të Shërbimit Pyjor, 4 përfaqësues nga AdZM, 3 automjete zjarrfikëse me 20 efektivë dhe 40 trupa nga FA. Gjithashtu edhe helikopteri i Emirateve të Bashkuara Arabe është aktualisht në operim.

Momentalisht nuk vlerësohet i nevojshëm ndërhyrja me skrepa apo avionë Canadair. Vatra është përqendruar në zonën e kënetës Godull dhe pjesërisht në zonën e ish- fazanerisë. Vatra ka tym të shtuar për shkak të djegies së trungjeve dhe pishave në terren.

Në zonën e Bogovës, bashkia Skrapar, edhe pse intensiteti i zjarrit ka qenë më i ulët, nuk është arritur izolimi i plotë gjatë natës së kaluar. Sot vatra është në monitorim të punonjësve zjarrfikës Skrapar dhe Shërbimit Pyjor. Deri tani janë djegur rreth 18 hektarë pyll. Nuk ka rrezik për banesa.

Në zonën e Pezë Helmësit, bashkia Tiranë, vatrat janë të izoluara dhe të minimizuara, pa përbërë aktualisht rrezik të shtuar.

MM nënvizon se, të gjitha strukturat e Mbrojtjes Civile mbeten në gatishmëri të plotë për çdo zhvillim.

/gj.m/j.p/

The post MM: 11 vatra të shuara plotësisht, zjarri në Akërni nën kontroll appeared first on Agjencia Telegrafike Shqiptare.

TIRANË, 26 gusht /ATSH/ Ministria e Mbrojtjes, bëri të ditur sot se, vatra e zjarrit e rënë në një objekt biznesi në krahë të segmentit Laç-Lezhë është vënë nën kontroll.

Sipas MM po punohet për fikjen e plotë të saj.

Ministria e Mbrojtjes gjithashtu thekson se, forcat zjarrfikëse mbeten të angazhuara në terren.

Ditën e sotme flakët kanë përfshirë një sipërfaqe të madhe me shkurre dhe ferra pranë një biznesi në afërsi të segmentit Laç-Lezhë. Flakët janë përhapur me shpejtësi teksa dëmet materiale janë të konsiderueshme.

/gj.m/j.p/

The post MM: Vihet nën kontroll vatra e zjarrit në biznesin në krah të segmentit Laç-Lezhë appeared first on Agjencia Telegrafike Shqiptare.

TIRANË, 26 gusht /ATSH/ Prej datës 15 qershor ka nisur operacioni “Plazhe të pastra”, përmes të cilit Agjencia Kombëtare e Bregdetit mbështet tetë bashki bregdetare në pastrimin e plazheve.

Kryeministri Edi Rama ndau sot momente nga ky pastrim, teksa shkroi se, “turistë dhe qytetarë vullnetarë i janë bashkuar ekipeve të bashkive dhe operatorëve të Agjencisë Kombëtare të Bregdetit në nismën e pastrimit të plazheve, duke dhënë kështu shembullin model se si duhen trajtuar hapësirat publike, me qytetari, angazhim të përbashkët e stil të bukur jetese”.

Dyfishimi i hapësirave publike ka shtuar përgjegjësitë e institucioneve vendore për mbarëvajtjen e sezonit turistik.

Po ashtu, bashkitë e qyteteve bregdetare i kanë pajisur të gjitha këto hapësira me sinjalistikën e duhur në terren.

1 nga 15

/gj.m/j.p/

The post Pastrimi i plazheve, Rama: Turistë dhe qytetarë iu bashkuan ekipeve në terren appeared first on Agjencia Telegrafike Shqiptare.