TIRANË, 29 gusht /ATSH/ Kryeministri Edi Rama reagoi sot ndaj deklaratës së Këshillit të Lartë Gjyqësor.

Rama shkruan në rrjetin social “X” se, “lexova reagimin e KLGJ, organi më i lartë i vetëqeverisjes së gjyqësorit, lidhur me çka unë kam ndarë me publikun për disa vendime skandalozisht brutale në mbrojtje të zaptuesve të hapësirës publike dhe në dëm të rendit ligjor, interesit publik si edhe komuniteteve të cënuara drejtëpërdrejt nga këto vendime.

KLGJ i ka rënë shumë gjatë, duke harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë.

KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cenuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik.

KLGJ ka harruar edhe të tjera gjëra më shumë rëndësi, por të paktën ka thënë një të vërtetë që më gjen shumë dakord, duke nënvizuar se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”.

Duke e mbyllur me kaq për sot, u them anëtarëve të KLGJ të mos harxhojnë kohën e tyre për të gjykuar se si e bëj unë punën për të cilën më ka votuar populli shqiptar – gjykatësi im i përditshëm të cilit unë nuk kam se si të mos ia shpjegoj hapur pse nuk largohen njësoj si të tjerat ca ngrehina të paligjshme në mes të rrugës, që marrin mbrojtjen e pajustifikueshme të ca gjykatësve të pandjeshëm ndaj interesit publik – po të përqendrohet tek puna e vet, që gjermësot le shumë për të dëshiruar në funksion të Shqipërisë 2030 në BE”.

/gj.m//a.f//r.e/

The post Rama: KLGJ të shqetësohet për cilësinë e drejtësisë, vendimet qorre të gjykatësve cenojnë interesin publik appeared first on Agjencia Telegrafike Shqiptare.

TIRANË, 29 gusht /ATSH/ Kryetarja e Kuvendit, Elisa Spiropali njofton se Kuvendi përfundoi shqyrtimin e pozicioneve negociuese për gjashtë grup-kapituj.

Në një postim në rrjetet sociale, Spiropali shkruan se, “Me mbledhjen e sotme të Komisionit për Çështjet Europiane, Kuvendi shqyrtoi draftpozicionin negociues për Grup-kapitullin V “Burimet, bujqësia dhe kohezioni”.

Me këtë mbledhje përfunduam shqyrtimin e pozicioneve negociuese për gjashtë grup-kapitujt:

I “Themelorët”,

II “Tregu i brendshëm”,

III “Konkurrueshmëria dhe rritja gjithëpërfshirëse”,

IV “Agjenda e gjelbër dhe ndërlidhja e qëndrueshme”,

V “Burimet, bujqësia dhe kohezioni”,

VI “Marrëdhëniet me jashtë”, të cilat i janë paraqitur për miratim Këshillit të Ministrave”, shprehet Spiropali.

“Presim shumë shpejt mbajtjen e dy konferencave ndërqeveritare BE-Shqipëri, të cilat, me hapjen e negociatave për grup-kapitujt IV dhe V, do të shënojnë hapjen e negociatave për të gjithë grup-kapitujt”, thekson Spiropali.

Kryetarja e Kuvendit nënvizon se, “anëtarësimi i Shqipërisë në BE është kryefjala e Legjislaturës XI dhe e Kuvendit të ri”.

/gj.m//r.e//a.f/

The post Spiropali: Kuvendi përfundoi shqyrtimin e pozicioneve negociuese për gjashtë grup-kapituj appeared first on Agjencia Telegrafike Shqiptare.

TIRANË, 29 gusht /ATSH/ Ministri i Ekonomisë, Kulturës dhe Inovacionit, Blendi Gonxhja mori pjesë sot në ceremoninë e rihapjes për publikun të kalasë së Bashtovës, pas restaurimit.

Gonxhja e cilësoi si një ditë të veçantë, dhe simbolike për trashëgiminë tonë kulturore.

“Jemi mbledhur për të inauguruar kalanë e Bashtovës, një ndër monumentet më të çmuara të historisë sonë, e cila nga sot merr një jetë të re. Ajo nuk është më vetëm një dëshmi e gurëzuar e së kaluarës, por shndërrohet në një hapësirë të gjallë për kulturën, artin, turizmin dhe zhvillimin e qëndrueshëm të komunitetit”, tha Gonxhja në fjalën e tij.

“E ndërtuar në shekullin XV, kjo kala përfaqëson një pikë strategjike të lidhjes së Shqipërisë me Mesdheun. Dikur ishte një portë e rëndësishme e venecianëve për shkëmbime tregtare dhe pjesë e një harte më të gjerë komunikimesh ndërkulturore që bashkonte Lindjen me Perëndimin. Sot, falë mbështetjes së Bashkimit Europian dhe programit EU4Culture, zbatuar nga UNOPS, ajo vjen para nesh e restauruar plot kujdes, duke na kujtuar se historia nuk është vetëm për t’u mbajtur mend, por për t’u rijetësuar dhe për t’u bërë pjesë e së ardhmes sonë”, u shpreh ministri.

Për herë të parë, shtoi Gonxhja, “kalaja e Bashtovës jo vetëm që është rikthyer në identitetin e saj historik, por është pajisur edhe me një qendër moderne vizitorësh, e cila ofron informacion, shërbime bashkëkohore dhe kushte për aktivitete kulturore, edukative e turistike. Qendra e vizitorëve është konceptuar si një hapësirë mikpritëse që i hap dyert çdo vizitori vendas apo të huaj, duke e shndërruar vizitën në Bashtovë në një përvojë të plotë”.

Gonxhja theksoi se, “rijetësimi i kalave shqiptare është një politikë strategjike që shkon përtej ruajtjes së thjeshtë të mureve dhe gurëve. Çdo kala e rikthyer në jetë bëhet një katalizator për zhvillimin ekonomik dhe social të zonës: krijon mundësi të reja punësimi për të rinjtë, nxit turizmin kulturor e natyror, gjallëron gastronominë tradicionale, artizanatin dhe mikpritjen lokale. Ky investim kthehet në një motor të qëndrueshëm të zhvillimit që i jep frymë komunitetit dhe gjeneron të ardhura të reja”.

Vetëm këtë vit, u shpreh ai, numri i turistëve që kanë vizituar kalatë janë rritur me 95% krahasuar me vitin 2024, ndërsa turizmi në sitet kulturore është rritur me 64%.

“Shembujt ndërkombëtarë na tregojnë se rijetëzimi i trashëgimisë është një investim me përfitime të shumta: kështjellat e Dalmacisë në Kroaci, ato të Pulias në Itali, apo të Greqisë fqinje janë shndërruar në atraksione që vizitohen çdo vit nga miliona turistë. Edhe Shqipëria duhet të jetë pjesë e kësaj harte, duke krijuar një itinerar të kalave shqiptare si një nga rrugët kulturore më të bukura të Ballkanit”, tha Gonxhja.

Ndaj, shtoi ai, “Ministria e Ekonomisë, Kulturës dhe Inovacionit, në strategjinë e saj parashikon rijetëzimin e kalave si pjesë të një procesi gjithëpërfshirës mirëmenaxhimi. Ky proces nuk ndalet vetëm te restaurimi fizik i monumenteve, por përfshin edhe planifikimin e përdorimit të tyre si qendra kulturore, edukative dhe turistike. Me këtë vizion, kalatë tona nuk do të jenë më thjesht objekte muzeale, por hapësira dinamike ku zhvillohen aktivitete, ku forcohet identiteti kombëtar dhe ku krijohen mundësi konkrete për punësim dhe zhvillim lokal”.

Gonxhja nënvizoi se, “kalaja e Bashtovës, me hapësirën e saj prej mijëra metrash katrorë, është e destinuar të kthehet në një qendër multifunksionale: këtu do të zhvillohen koncerte, festivale, ekspozita, shfaqje teatrale, aktivitete edukative për fëmijët e të rinjtë, si dhe evente tematike ndërkombëtare”.

“Ky moment është një shembull i shkëlqyer i bashkëpunimit mes Shqipërisë dhe Bashkimit Europian, një model që duhet të frymëzojë edhe projekte të tjera të ngjashme. Kjo është mënyra më e mirë për të treguar se integrimi europian nuk është vetëm një proces politik, por edhe një realitet konkret që sjell rezultate të prekshme për qytetarët tanë”, përfundoi fjalën e tij ministri Gonxhja.

Kalaja e Bashtovës, Foto: Andrin Hoxha

1 nga 21

/gj.m//r.e//a.f/

The post Rihapja për publikun pas restaurimit e kalasë së Bashtovës, Gonxhja: Një ndër monumentet më të çmuara të historisë sonë appeared first on Agjencia Telegrafike Shqiptare.

TIRANË, 29 gusht /ATSH/ Kryeministri Edi Rama ndau sot pamje nga parku i liqenit të Paskuqanit.

Parku i liqenit të Paskuqanit ka tashmë pedonalen e re, ndërsa infrastruktura e parkut përfshin sheshpushime dhe korsi biçikletash.

Në liqenin e Paskuqanit janë mbjellë mbi 10 mijë pemë, duke e kthyer këtë park nga një vend ferrash e plehrash, në një mushkëri të gjelbër.

Parku i Liqenit të Paskuqanit i vlen krejt kryeqytetit, edhe pse ndodhet në bashkinë e Kamzës.

Parkut mirëpret, jo vetëm banorët e bashkisë Kamëz, por të gjithë ata që duan të shijojnë ajrin e pastër, peizazhin fantastik, zogjtë e shumtë, hapësirën ku fëmijët mund të luajnë.

/gj.m/r.e//a.f/

The post Rama ndan pamje nga parku i liqenit të Paskuqanit appeared first on Agjencia Telegrafike Shqiptare.

TIRANË, 29 gusht /ATSH/ Pas finalizimit të projektit të zbatimit, kanë nisur punimet e para për nivelimin e sheshit të Auto Moto Park Elbasan.

Drejtoria e Përgjithshme e Shërbimeve të Transportit Rrugor bëri të ditur sot se, kjo është një fazë themelore e këtij projekti.

Gjithashtu, DPSHTRR thekson se është në hapat e parë të ndërtimit të Qendrës Multifunksionale të Automotorizimit në Elbasan, e dyta pas asaj në Fushë-Prezë.

Kjo qendër e re do të ofrojë mbi 245.000 shërbime në vit, duke iu shërbyer 105.000 drejtuesve të mjeteve dhe 70.000 mjeteve aktive në 6 bashkitë e qarkut Elbasan.

Sipas DPSHTRR, me këtë projekt, çdo shërbim do të jetë më cilësor, më i shpejtë dhe në përputhje me standardet më të larta evropiane.

Bashkia Elbasan dhe Fondi Shqiptar i Zhvillimit po ecin me ritme të shpejta me infrastrukturën përreth, gjithashtu në funksion të Auto Moto Park.

Shumë shpejt pritet të nisë rruga “Gjergj Arianiti”, një aks i rëndësishëm që lidh lagjen “Emin Matraxhiu” me Menglin, Korridorin VIII dhe urën e Byshekut, duke lehtësuar ndjeshëm trafikun. Me trotuare, ndriçim, korsi biçikletash dhe një pamje magjepsëse përgjatë Shkumbinit do të shndërrohet në një shëtitore fantastike për të gjithë qytetarët.

Investimi strategjik i Auto Moto Parkut do të sjellë: cirkuitin e parë shqiptar sipas standardeve të FIA, FIM dhe CIK; Muzeun Retro dhe DRSHTRR Elbasan; Kontrollin fizik dhe teknik të mjeteve; Infrastrukturë moderne për shërbime më të shpejta dhe më cilësore dhe një projekt që transformon infrastrukturën automobilistike të Shqipërisë.

1 nga 20

/gj.m//r.e//a.f/

The post DPSHTRR: Nisin punimet e para për nivelimin e sheshit të Auto Moto Park Elbasan appeared first on Agjencia Telegrafike Shqiptare.

AMSTERDAM, 29 gusht /ATSH-AA/ – Kampionati Botëror në Formula 1 do të vazhdojë me fazën e 15-të të sezonit, me Çmimin e Madh (Grand Prix) të Holandës.

Gara do të zhvillohet me 72 xhiro në pistën me një gjatësi prej 4.2 kilometrash në qytetin Zandvoort të Holandës. Xhirot e renditjes do të mbahen të shtunën në orën 15:00 ndërsa gara të dielën më 31 gusht në orën 15:00.

Deri më tani në sezon, piloti i McLaren-it, Oscar Piastri ka 6 fitore ndërsa shoku i skuadrës Lando Norris 5, kampioni i fundit piloti i Red Bull-it, Max Verstappen 2 dhe piloti i Mercedesit, George Russell një fitore.

Pesë vendet e para të klasifikimit të pilotëve dhe skuadrave janë si në vijim:

– Pilotët:

1. Oscar Piastri (Australi): 284

2. Lando Norris (Britani e Madhe): 275

3. Max Verstappen (Holandë): 187

4. George Russell (Britani e Madhe): 172

5. Charles Leclerc (Monako): 151

– Ekipet:

1. McLaren: 559

2. Ferrari: 260

3. Mercedes: 236

4. Red Bull Racing: 194

5. Williams: 70     /os/

The post F1 – Holanda, stacioni i radhës appeared first on Agjencia Telegrafike Shqiptare.

GAZA, 29 gusht /ATSH-ANSA/ – “Nuk do presim. Kemi filluar fazat fillestare të sulmit në Qytetin e Gazës”,deklaroi zëdhënësi i IDF-së, Avichay Adraee, për X.

“Po operojmë me forcë të madhe në periferi të qytetit”, shtoi ai.

Gazetarët e Al Jazeera raportuan mijëra njerëz të zhvendosur që po iknin “nën një qiell të errësuar nga tymi i bombardimeve”.

Forcat Mbrojtëse të Izraelit gjetën trupin e pengut të vrarë Ilan Weiss në Gaza dhe mbetjet e një të burgosuri tjetër në Gaza, të cilat po identifikohen, raporton The Times of Israel.

Ilan Weiss, 56 vjeç, u vra në mëngjesin e 7 tetorit 2023, ndërsa mbronte Kibbutz Be’eri si anëtar i ekipit të reagimit të shpejtë.

Trupi i tij i pajetë u dërgua më vonë në Gaza. Mbetjet e një pengu të dytë u gjetën gjithashtu dhe po identifikohen në Institutin Ligjor Abu Kabir.

Grupet terroriste në Gaza besohet se ende mbajnë 48 pengje izraelite, 20 prej të cilëve janë ende gjallë. /os/

The post GAZA – IDF nis operacionet ushtarake në qytetin e Gazës appeared first on Agjencia Telegrafike Shqiptare.

TIRANË, 29 gusht /ATSH/ Këshilli i Lartë Gjyqësor reagoi sot për deklaratat e fundit të subjekteve publike apo private ndaj gjyqtarëve, duke theksuar se minojnë pavarësinë e pushtetit gjyqësor.

“Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cenojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor”, thuhet në një deklaratë të KLGJ.

“Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm”, thekson KLGJ.

Këshilli u bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës.

“E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, nënvizon KLGJ.

KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu, i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.

“Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut”, përfundon deklarata e KLGJ.

/gj.m//r.e//a.f/

The post KLGJ: Deklaratat ndaj gjyqtarëve minojnë pavarësinë e pushtetit gjyqësor appeared first on Agjencia Telegrafike Shqiptare.

TIRANË, 29 gusht /ATSH/ Shoqëria “Ujësjellës Kanalizime Tiranë” sh.a. bëri me dije sot se, në zbatim të ligjit  “Për metrologjinë”, vendimeve përkatëse dhe kontratës së shërbimit të miratuar nga Enti Rregullator i Ujit (ERRU), të gjitha subjektet ndërtuese që do të aplikojnë për lidhje të kontratave të reja të furnizimit me ujë, do të duhet të vendosin matësa inteligjentë (smart).

Sipas UKT, në çdo objekt të ri që do të ndërtohet dhe për të cilin kërkohet lidhja e kontratës së re të furnizimit me ujë, do të vendosen matësa inteligjentë individualë (mekanikë me modul transmetimi, ultrasonikë ose elektromagnetikë), për çdo njësi banimi apo shërbimi.

Matësit duhet të jenë të certifikuar dhe në përputhje me standardet kombëtare dhe ndërkombëtare, ndërsa projektet teknike që parashikojnë ujëmatës konvencionalë (jo-smart) nuk do të pranohen nga UKT.

Gjithashtu, vendosja e matësve inteligjentë sigurohet nga subjekti ndërtues, ndërsa vulosja e tyre do të kryhet nga UKT pas depozitimit të kërkesës përkatëse.

Udhëzimi i plotë në këtë link

/a.f//r.e/

The post UKT kërkesë ndërtuesve: Matësa inteligjentë në kontratat e reja të furnizimit me ujë appeared first on Agjencia Telegrafike Shqiptare.

TEL AVIV, 29 gusht /ATSH-AA/ – Ushtria izraelite njoftoi se i ka dhënë fund të ashtuquajturës “pauzë humanitare” në Gaza, të cilën planifikon ta pushtojë dhe ku gati 1 milion palestinezë janë strehuar, dhe e ka shpallur atë një “zonë të rrezikshme lufte”.

Ushtria izraelite po intensifikon sulmet e saj në Gazën veriore në ndjekje të pushtimit dhe zhvendosjes me forcë të palestinezëve. Izraeli i cili ka intensifikuar sulmet në Gazën lindore, të cilën planifikon ta pushtojë, synon të zhvendosë me forcë afërsisht 1 milion palestinezë nga zona.

Në një deklaratë me shkrim, ushtria izraelite deklaroi se Gaza është hequr nga e ashtuquajtura “pauzë humanitare”, të cilën e ka shpallur qeveria e Tel Avivit. Në deklaratë Gaza e cila planifikohet të pushtohet, përshkruhet se si “zonë e rrezikshme lufte”.

Pas këtij vendimi, ushtria izraelite pritet të intensifikojë më tej sulmet e saj në Gazën veriore, veçanërisht në qytetin e Gazës.

– Izraeli ka vendosur të pushtojë qytetin e Gazës

Kabineti izraelit i Sigurisë miratoi një plan më 8 gusht për të pushtuar qytetin e Gazës. Kryeministri izraelit, Benjamin Netanyahu tha në një intervistë para mbledhjes së kabinetit se ata synojnë të pushtojnë të gjithë Rripin e Gazës.

Lajmet në mediat izraelite treguan se ushtria kishte marrë urdhra për të pushtuar pjesën tjetër të Gazës, por se ky hap nuk pritej të kryhej para shtatorit. Sipas planit, në fazën e parë, afërsisht 1 milion palestinezë do të zhvendoseshin në jug, qyteti do të rrethohet dhe pas sulmeve intensive, ai do të pushtohet.

Faza e dytë parashikon pushtimin e kampeve të refugjatëve në Gazën qendrore, të cilat janë shndërruar kryesisht në rrënoja.

Izraeli e pushtoi Rripin e Gazës për 38 vjet, nga viti 1967 deri në vitin 2005. Sot, Rripi i Gazës, ku jetojnë afërsisht 2.3 milionë palestinezë, ka qenë nën bllokadë të rëndë për 18 vjet.   /os/

The post TEL AVIV – Ushtria izraelite e shpalli Gazën “zonë të rrezikshme lufte” appeared first on Agjencia Telegrafike Shqiptare.

TIRANË, 29 gusht /ATSH/ Resorti i ndërtuar pa leje në Kepin e Rodonit nga ish-drejtori i Inspektoratit të Mbrojtjes së Territorit Durrës, Ardian Halili, u shemb këtë të premte me shpërthim të kontrolluar.

Godina dykatëshe, së bashku me objektet shoqëruese që shtriheshin në një sipërfaqe prej rreth 5 600 m², ishte ndërtuar në periudhën 2018–2021, pikërisht në kohën kur Halili drejtonte IMT Durrës.

Një ditë para prishjes së resortit, Halili u arrestua nga autoritetet, nën akuzën për shkelje të ligjit dhe abuzim me detyrën.

“Shtetasi A. H. e ka ndërtuar këtë objekt, i cili përbëhet nga 11 kabina tip garsoniere, një godinë 2-katëshe, një fushë minifutbolli dhe një pishinë, në një sipërfaqe toke prej 5,600 m², gjatë kohës kur ai ka ushtruar funksionin e Kryeinspektorit të IMT-së në Bashkinë Durrës dhe konkretisht gjatë viteve 2018-2021. Nga verifikimet e kryera rezultoi se ndërtimi i këtij objekti pa leje ka filluar prej vitit 2018 e në vijim”, ka deklaruar më herët policia për rastin.

Çështja në ngarkim të Ardian Halilit, është referuar nga policia në SPAK.

IKMT bëri të ditur sot se, vijon aksioni për shembjen e objekteve pa leje në zonën e mbrojtur.

Gjatë ditës së sotme janë prishur 13 ndërtime të paligjshme, duke çuar totalin në 54 objekte të shembura, thekson IKMT.

Sipas IKMT, puna në terren vijon në bashkëpunim me Policinë e Shtetit, me synim pastrimin e plotë të territorit dhe mbrojtjen e vijës bregdetare.

/gj.m//r.e//a.f/

The post Shembet me shpërthim resorti pa leje i ish-kreut të IMT Durrës appeared first on Agjencia Telegrafike Shqiptare.

TIRANË, 29 gusht /ATSH/ Kalaja e Bashtovës ka rihapur sot dyert për publikun pas restaurimit me mbështetjen e Bashkimit Evropian nëpërmjet programit “EU4Culture”.

Nga panairi, te koncertet dita e sotme është e mbushur plot aktivitete në kalanë e Bashtovës. Të pranishmit mund të vizitojnë panairin me produktet e zonës. Gjithashtu do të ketë aktivitete dhe lojëra për fëmijë e të rinj.

Në hapjen e kalasë së Bashtovës nuk mungon edhe ekspozita e makinave nga “Retro Albania” dhe e motorëve ikonikë nga “Steel Wings Albania”.

Gjithashtu të pranishmit kanë mundësinë të eksplorojnë kalanë nëpërmjet realitetit të shtuar (AR).

Mbrëmja vazhdon me koncertin e Rona Nishliut dhe Gent Rushit dhe me pjesëmarrjen e DJ Rossa.

E dëmtuar nga tërmeti i vitit 2019, kalaja e Bashtovës rikthehet në jetë falë mbështetjes së Bashkimit Evropian, përmes programit EU4Culture. Restaurimi ka ruajtur elementët autentikë, ka sjellë hapësira të reja për vizitorët dhe ka zbuluar shtresa të reja historike, duke hapur një kapitull të ri për këtë monument.

Rihapet sot për publikun pas restaurimit Kalaja e Bashtovës Foto: Andrin Hoxha

1 nga 18

/gj.m//r.e//a.f/

The post Rihapet për publikun pas restaurimit kalaja e Bashtovës appeared first on Agjencia Telegrafike Shqiptare.

BORME LES MIMOSAS (Francë), 29 gusht /ATSH-DPA/ – Presidenti francez Emmanuel Macron përshëndeti rikthimin e marrëdhënieve të ngushta mes Parisit dhe Berlinit, teksa priti kancelarin gjerman Friedrich Merz në rezidencën e tij verore, përpara bisedimeve të nivelit të lartë mes ministrave të të dyja shteteve.

Pas viteve me marrëdhënie të tensionuara me paraardhësin e Merzit, Olaf Scholz, lideri francez tha se rifillimi i suksesshëm i bashkëpunimit mund të shërbejë si një forcë shtytëse për forcimin e Evropës.

Pas ndryshimit të qeverisë në Berlin më herët këtë vit, të dy udhëheqësit kanë “hapur një kapitull të ri në marrëdhëniet franko-gjermane”, tha Macron, pasi mirëpriti homologun e tij gjerman në Fort de Bregançon, në Cote d’Azur.

“Besoj se tandemi franko-gjerman tani është plotësisht i koordinuar për të krijuar një Evropë më të fortë në fushën e ekonomisë, tregtisë dhe monedhës”, deklaroi ai.

Merz gjithashtu theksoi rëndësinë e “boshtit” të lidhjeve mes dy vendeve, duke thënë se “Gjermania dhe Franca luajnë një rol qendror në këtë Bashkim Evropian, në këtë kontinent evropian”.

Ai nënvizoi gjithashtu rolin vendimtar të unitetit midis të 27 vendeve anëtare të BE-së. Nëse arrihet ky unitet, “atëherë jemi vërtet të fortë dhe Evropa bëhet një faktor në botë”, tha Merz.

“Zhvillimet në botë tregojnë sa e rëndësishme është për ne të bëhemi një faktor i fuqishëm në botë — ekonomikisht, politikisht dhe gjithashtu në aspektin e sigurisë,” shtoi ai.

Macron theksoi se marrëdhënia do të jetë kyçe për të ndërtuar “një Evropë që përcakton pozicionin e saj gjeopolitik në konfliktin në Ukrainë përballë agresionit rus dhe një Evropë që ka vendosur të riarmatoset për të siguruar mbrojtjen e saj”.

Marrëdhënia mes Macron dhe Merz shihet ndjeshëm më e mirë se ajo me paraardhësin Olaf Scholz. /Ad.Ab./

The post FRANCË – Macron e Merz rivendosin boshtin franko-gjerman për një Evropë më të fortë appeared first on Agjencia Telegrafike Shqiptare.

TIRANË, 29 gusht/ATSH/ Policia e Shtetit bëri thirrje sot për më shumë kujdes nga drejtuesit e automjeteve dhe motomjeteve gjatë fundjavës, për shkak të shkeljeve të shumta të konstatuara, si dhe të parashikimit të reshjeve të shiut që mund të ndikojnë në sigurinë rrugore.

Policia Rrugore u kërkon drejtuesve të mjeteve që të tregojnë kujdes në akset ku mund të ketë prezencë uji, të respektojnë normat e shpejtësisë, të mos drejtojnë automjetet nën efektin e alkoolit dhe të përdorin transportin publik kur ndodhen në gjendje të dehur. Gjithashtu, theksohet rëndësia e vendosjes së rripit të sigurimit për drejtuesit dhe pasagjerët, si dhe shmangia e parakalimeve të gabuara dhe përdorimit të celularit gjatë drejtimit.

Për drejtuesit e motomjeteve, biçikletave dhe monopatinave, kërkohet që gjatë natës të përdorin jelekë fosforeshentë për t’u bërë të dukshëm në trafik dhe të vendosin kaskë mbrojtëse.

Policia bën të ditur se shërbimet e saj do të jenë të pranishme në akset rrugore nacionale, urbane dhe rurale, duke përdorur mjete inteligjente për matjen e shpejtësisë, dronë dhe alkooltestues.

Në rast nevoje, qytetarët mund të telefonojnë pa pagesë në numrin 112 për të kërkuar ndihmën e Policisë së Shtetit.

1 nga 3

/a.f//r.e/

The post Fundjavë me reshje shiu, Policia thirrje për respektim të rregullave të qarkullimit appeared first on Agjencia Telegrafike Shqiptare.

TIRANË, 29 gusht /ATSH/ Lirimi i hapësirave publike, një nismë që i paraprin vizionit të qeverisë për Rilindjen Urbane 2.0, po vijon në të gjitha bashkitë e vendit.

Kryeministri Edi Rama ndau sot pamje nga lirimi i hapësirave publike në kryeqytet, ndërhyrje që synojnë të rrisin cilësinë e jetës komunitare dhe përmasën e gjelbër të qyteteve.

”Nuk është aksion, është kthesë deri në fund”, shkruan Rama, krahas pamjeve të çmontimit të strukturave të vendosura në shkelje nga subjektet private.

Lirimi i hapësirave publike nga subjektet që kanë zaptuar trotuaret dhe ambientet e dedikuara për komunitetin dhe qytetarët, vazhdon në të gjithë vendin prej muajit korrik.

Në këtë kuadër, Rama ka paralajmëruar se po hartohet edhe Rregullorja Kombëtare në të cilën do të përcaktohen me ligj hapësirat që mund të shfrytëzojë biznesi.

Lirimi i hapësirave publike është i domosdoshëm për rritjen e cilësisë së shërbimeve, por edhe funksionalitetit të çdo biznesi dhe sipërmarrjeje në përputhje me standardet kombëtare të mikpritjes dhe shërbimit jo vetëm në zonat turistike, por në çdo cep të Shqipërisë.

Ky aksion ka nisur në fillim të muajit korrik dhe do të vijojë të jetë në fokus të angazhimit të pushtetit vendor dhe qendror në mbrojtje të cilësisë së jetës në komunitet.

/m.m/j.p/

The post Lirimi i hapësirave publike, Rama: Nuk është aksion, është kthesë deri në fund appeared first on Agjencia Telegrafike Shqiptare.

MILANO, 29 gusht /ATSH/ – Google përballet me një shkelje të të dhënave dhe ishte vetë gjiganti i teknologjisë që njoftoi lajmin duke përshkruar një sulm sigurie që rezultoi në akses dhe zbulim të paautorizuar të të dhënave personale të përdoruesve, sipas skytg24.it.

”Gjiganti i teknologjisë me seli në Mountain View paralajmëroi gjithashtu së fundmi për një tjetër mashtrim të ri, në të cilin individë keqdashës imitojnë mbështetjen e IT-së së Google për të hakuar llogaritë e përdoruesve dhe për të aksesuar informacionin personal ose financiar”, sipas Columbus Dispatch.

Për këtë arsye, kompania me seli në Kaliforni ka këshilluar 2,5 miliardë përdoruesit e saj të Gmail të përditësojnë fjalëkalimet e tyre dhe të forcojnë sigurinë e tyre.

Si të mbroheni?

Siç raportohet nga blogu i sigurisë kibernetike Malwarebytes Labs, mashtruesit zakonisht u dërgojnë një email përdoruesve duke i informuar ata se “llogaria e tyre nuk është e sigurt” dhe duke i nxitur ata të rivendosin fjalëkalimin e tyre.

Pasi të futin kredencialet e tyre të hyrjes duke përdorur lidhjen mashtruese, viktimat pa e ditur u japin hakerëve qasje në llogarinë e tyre.

Pra, si mund ta mbroni veten? Google ka deklaruar se Gmail nuk dërgon kurrë mesazhe ose email-e që kërkojnë fjalëkalimet e përdoruesve ose informacione të tjera personale. Kompania e madhe e teknologjisë ka përpiluar gjithashtu një listë këshillash për të shmangur mashtrimet e phishing:

• Raportoni email-et e phishing te Ndihma e Google
• Edhe pse Google lëshon paralajmërime për phishing nëse zbulon email-e të dyshimta, ai nuk dërgon kurrë email-e të padëshiruara që kërkojnë informacione personale
• Mos u përgjigjeni kërkesave për informacione private përmes email-it, mesazhit me tekst ose telefonatës
• Mos e futni fjalëkalimin tuaj pasi të klikoni një lidhje në një mesazh. Email-et e Google nuk kërkojnë kurrë fjalëkalimin e llogarisë suaj
• Kini kujdes me mesazhet që duken urgjente
• Mos klikoni kurrë në lidhje nga burime të panjohura ose të pabesueshme./  a.jor.

The post FOKUS – Si të mbroheni nga mashtrimi i ri që synon përdoruesit e Gmail në Google? appeared first on Agjencia Telegrafike Shqiptare.

TIRANË, 29 gusht/ATSH/ Procesi i ristrukturimit të Forcave Tokësore shënon sot çerekshekulli. Në aktivitetin e organizuar me këtë rast, ministri i Mbrojtjes, Pirro Vengu u shpreh se ky përvjetor, është kujtesa se ringritja e ushtrisë dhe shtetit shqiptar kanë qenë dhe mbeten procese të pandashme

Vengu tha se “çerekshekulli më parë, Shqipëria nisi të ringrejë nga themelet një nga shtyllat e saj më të brishta, pas trazirave të viteve ’90”.

“Këtu qëndron një e vërtetë që mbetet postulat në çdo kohë: fati i uniformës është i pandarë nga fati i shtetit. Gjatë tranzicionit këto fate u shkëputën dhunshëm, ndërsa në vitin 2000 ato nisën të ringjizen përsëri. Ristrukturimi i Forcës Tokësore nuk ishte një akt formal, ishte një nisje nga e para. Një domosdoshmëri pa të cilën Shqipëria nuk do të ishte ajo që është sot. Sepse uniforma nuk është një shenjë dalluese, por një mburojë për vendin dhe një shërbim i përditshëm ndaj shoqërisë”, tha Vengu.

Ministri i Mbrojtjes theksoi se Forcat Tokësore kanë kaluar nëpër sfida të shumta, në misione ndërkombëtare, nga Afganistani në Evropën Juglindore, apo atë Baltike dhe në operacione brenda vendit për të mbrojtur jetën , territorin dhe pasurinë tonë mjedisore.

“Ky përvjetor është kujtesa se ringritja e ushtrisë dhe shtetit shqiptar kanë qenë dhe mbeten procese të pandashme dhe kjo është arsyeja pse modernizimi, investimi në pajisje dhe kapacitete njerëzore nuk janë një luks, por një detyrë për ne. Një detyrë përmes të cilës ripërtërihet pakti për lirinë dhe prosperitetin e këtij kombi”, vijoi ai.

Në mbyllje të fjalës së tij, ministri Vengu tha se “detyra jonë është që vijojmë të sigurojmë që uniforma dhe shteti të mos shkëputen më kurrë, po të ecin bashkë si një trup i vetëm në çdo kohë”.

/e.i/j.p/

The post Përvjetori i Forcave Tokësore, Vengu: Konsolidimi i ushtrisë dhe shtetit, procese të pandashme appeared first on Agjencia Telegrafike Shqiptare.

TIRANË, 29 gusht/ATSH-Maela Marini/ Ministria e Bujqësisë dhe Zhvillimit Rural ka nisur fazë e dytë të rivlerësimit të burimeve njerëzore të Autoritetit Kombëtar të Ushqimit, në bashkëpunim me Universitetin Bujqësor të Tiranës.

275 inspektorë të AKU-së po i nënshtrohen testimit dhe intervistave individuale që do të vijojnë deri më 5 shtator.

Ministrja e Bujqësisë dhe Zhvillimit Rural, Anila Denaj u shpreh sot se “kjo pjesë e reformimit institucional në rrugën e ngritjes së Inspektoratit Qendror, do të ndajë në mënyrë të arsyeshme kush i plotëson e kush jo kriteret e qëndrimit në detyrë, në rrugën e sfidës madhore për Shqipërinë 2030 në BE”.

“Në kuadër të porosisë së drejtpërdrejtë të Kryeministrit Edi Rama për të rivlerësuar burimet njerëzore të AKU-së jemi sot në UBT, së bashku me kryetarin e komisionit të posaçëm dhe rektorin për të vlerësuar një fazë të dytë shumë të rëndësishme të këtij procesi, fazën e testimit, e cila do të shoqërohet gjatë javës që vjen me intervista individuale”, u shpreh Denaj.

Ministrja theksoi se ky proces i rivlerësimit të personelit ka nisur menjëherë me krijimin e komisionit të posaçëm në përbërje të së cilit janë 3 profesorë të UBT-së dhe dy përfaqësues të ministrisë.

“Ky është një proces i rëndësishëm ku cilësia e personelit, përshtatshmëria me profilin, vlerësimi i punës së tyre në vite, por njëkohësisht edhe përgatitja e tyre akademike të jetë në themel të një rritje cilësore të profilit të punës së inspektorit”, shtoi Denaj.

Ministrja siguroi se ky është një proces që do të vijojë edhe me reformën institucionale të nisur tashmë me ligjin e ‘Inspektoratit’, i cili ka hyrë në fuqi në muajin maj të këtij viti dhe që parashikon përgatitjen e një institucioni qendror që do të përthithë 3 institucione brenda MBZHR. Me një staf të kualifikuar ku jo vetëm përgatitja akademike, por edhe cilësia e personelit të jetë konform kërkesës për të garantuar sigurinë ushqimore dhe një bashkëbisedimi të drejtë me bizneset”, shtoi ministrja.

Denaj theksoi se “ky është një proces i rëndësishëm pjesë e procesit të integrimit në BE”.

Pedagogu i UBT-së, Ilir Kristo u shpreh se “jemi përpjekur që maksimalisht të arrijmë një vlerësim sa më të pavarur dhe sa më të thellë të gjithë trupës”. “Kemi analizuar shumë probleme, është një indikator i performancës. Ligji bazë i Inspektoratit, ligji i Ushqimit dhe ligji i Mbrojtjes së bimëve janë në themel të këtij testimi”, tha ai.

Denaj falënderoj rektorin e UBT-së, Fatbardh Sallaku për bashkëpunimin, i cili sipas saj duhet zgjeruar më tej.

Nga ana e tij, rektori Sallaku theksoi se “ky proces që po ndodh sot është konsideruar si përgjegjësi nga UBT dhe vlerësim”.

“Jam këtu për të garantuar se UBT është përpjekur që ditën e parë, kemi vendosur njerëzit më me integritet dhe profesionalizëm të njohur në fushat e veta të ekspertizës. Ajo që ne po kryejmë është në vazhdën e asaj që kemi edhe me Universitetin BOKU të Vjenës, ku krahas procesit të mësimdhënies jemi fokusuar në këto lloj ushtrimesh”, shtoi ai.

The post Nis faza e dytë e rivlerësimit të punonjësve të AKU, Denaj: Procesi do të vijojë me reformën institucionale appeared first on Agjencia Telegrafike Shqiptare.

TIRANË, 29 gusht /ATSH / Në një atmosferë të veçantë mes natyrës mahnitëse të bjeshkëve të Dobërdolit, Bashkia e Tropojës organizoi një takim të hapur me qytetarë dhe të interesuar për të aplikuar në nismën qeveritare “Paketa e Maleve”.

Ky bashkëbisedim synoi informimin e drejtpërdrejtë dhe inkurajimin e investimeve në zonat malore të Tropojës.

Kryetari i Bashkisë, Rexhë Byberi, u shpreh se interesi ka qenë i lartë, me rreth 205 aplikime të regjistruara deri më tani, shumica prej të cilëve janë qytetarë që jetojnë jashtë vendit, por duan të investojnë në pronat e tyre në atdhe.

“Deri tani kemi rreth 205 aplikues që kanë shprehur dëshirën për të investuar në pronat e tyre, në përputhje me ligjin e ri të qeverisë shqiptare. Shumica janë emigrantë, dhe kjo tregon se ‘Paketa e Maleve’ po zgjon besim dhe interes konkret. Bashkia e Tropojës është angazhuar të mbështesë këtë proces në çdo hap”, tha Byberi.

I pranishëm në takim ishte edhe deputeti i qarkut, Eduart Shalsi, i cili e vlerësoi nismën si një nga më premtueset për zhvillimin ekonomik të zonave malore:

“Kjo është një mundësi e artë për banorët dhe pronarët e këtyre zonave. ‘Paketa e Maleve’ do të kthejë Tropojën, dhe zona të tjera alpine, në destinacione të vërteta turistike që ndikojnë pozitivisht jo vetëm në ekonominë lokale, por edhe në atë kombëtare”, tha ai.

Aktualisht, “Paketa e Maleve” ndodhet në fazën e parë të implementimit, që përfshin shprehjen e interesit nga qytetarët dhe pronarët e tokave në zonat malore.

Nisma synon të krijojë kushte më të mira për zhvillimin e turizmit, agroturizmit dhe investimeve të qëndrueshme në pronat private në male, përmes mbështetjes së drejtpërdrejtë nga qeveria. /j.p/

The post Bashkëbisedim në Dobërdol për “Paketën e Maleve”, Byberi: 205 aplikime deri tani appeared first on Agjencia Telegrafike Shqiptare.

BANGKOK, 29 gusht /ATSH–DPA/ – Kryeministrja tajlandeze, Paetongtarn Shinawatra është detyruar të largohet nga qeverisja e vendit vetëm një vit pasi mori detyrën.

Gjykata Kushtetuese vendosi që 39-vjeçarja, e cila ishte pezulluar në fillim të korrikut, shkeli parimet etike në një bisedë telefonike të publikuar dhe duhet të heqë dorë nga pozicioni i saj.

Vendimi i gjykatës u transmetua drejtpërdrejt sot në faqen e saj të internetit.

I gjithë kabineti duhet të japë dorëheqjen gjithashtu, megjithëse do të mbetet në detyrë derisa të formohet një qeveri e re.

Kryeministri i përkohshëm, Phumtham Wechayachai do të vazhdojë të mbikëqyrë punët e qeverisë derisa parlamenti të zgjedhë një kryetar të ri qeverie.

Mbetet e paqartë nëse kryeministri i ri do të vijë përsëri nga partia ”Pheu Thai” e Paetongtarn.

Çështja gjyqësore u përqendrua në një regjistrim audio të publikuar të një telefonate midis Paetongtarn, nga dinastia e fuqishme Shinawatra e Tajlandës, dhe ish-sundimtarit të Kamboxhias për një kohë të gjatë dhe presidentit aktual të Senatit, Hun Sen.

Në bisedë, e cila kishte të bënte me një konflikt kufitar që ziente dhe u përshkallëzua pak më vonë, ajo iu referua një oficeri të lartë ushtarak në rajonin kufitar si “kundërshtari” i saj dhe iu drejtua Hun Sen, i cili është i afërt me familjen e saj, si “xhaxha”.

Vërejtjet shkaktuan trazira në Tajlandë dhe shkaktuan protesta./  /Ad.Ab./

The post TAJLANDË – Kryeministrja Shinawatra shkarkohet nga gjykata pas një viti në detyrë appeared first on Agjencia Telegrafike Shqiptare.