Në Formula 1 mbetet një emër i respektuar.

Të paktë janë pilotët që kujtohen aq shumë nga tifozët ndër ata që nuk u shpallën kurrë kampionë të botës, dhe Rubens Barrikelo tregoi se meriton gjithçka.

Veterani brazilian arriti një sukses të madh në një moshë tepër të shtyrë për sport, sidomos për ata të shpejtësisë.

Pasi mbushi 53 vjeç në maj të këtij viti, Barrikelo u shpall kampion I garës së shquar NASCAR në Brazil.

Në edicionin debutues ai I la pas të gjithë, me fitoren e raundit të gjashtë të serisë në qytetin e tij të lindjes, Sao Paulo.

Kjo, më shumë se 14 vite pasi I mbiquajturi “Rubinjo” I dha fund karrierës në Formula 1, gjë që ndodhi në Interlagos të Brazilit në 2011 në timonin e një Uilliamsi.

Pasi hoqi kokoren e pilotit në elitën e automobilizmit, ai u shpall dy herë kampion I Stok Kar Pro Series në 2014 e 2022, ndërsa duket se ka ndërmend të vazhdojë derisa t’i afrohet të 60-ve.

Në Formula 1, Barrikelo doli dy herë nënkampion I botës në 2002 e 2004, në pilotimin e një Ferrari, i lënë pas vetëm nga legjenda Mikael Shumaher.

Braziliani fitoi 11 gara në 19 sezone, 14 vende të para në provat zyrtare, 17 xhiro më të shpejta dhe 68 podiume, një rekord ndër pilotët që nuk u shpallën kampionë të botës.

Me sa duket dalë nga dalë po realizohet profecia e Moxartit të këtij sporti. Drazhen Petroviç, ylli i ndjerë i basketbollit jugosllav e kroat, parashikoi në 1992 se vendeve të tjera do t’u duhen 50 vjet për të arritur nivelin e “Skuadrës Ëndërr” të Shteteve të Bashkuara të Amerikës.

Atë verë, kombëtarja e ajkës së NBA-së, me të tillë si Majkëll Xhordan, Mexhik Xhonson, Lerri Bërd, Patrik Juing, Dejvid Robinson, Klajd Dreksler, Çarls Barkli apo Skoti Pipen, sa për të përmendur më të mirët, stërfitoi në Lojrat Olimpike të Barcelonës duke mundur në finale Kroacinë 117-85.

Kanë kaluar më pak se 50 vjet, saktësisht 33, dhe amerikanët po e kanë gjithnjë e më të vështirë, ndërsa kur nuk janë në parket yjet e NBA-së, shpesh munden.

Kjo ndodhi kur seleksioni i tyre luajti në Kupën e Amerikës 2025 ndaj Uruguajit, dhe u mposht me shifrat 86-85.

Në ekipin e drejtuar nga trajneri Stefën Silas nuk ka asnjë profesionist të Ligës më të fortë të Botës, por vetëm basketbollistë që luajnë në Europë si Itali, Greqi, Spanjë apo Turqi, si dhe në kontinente të tjera.

Më të mirët ishin Gallouej që luan në Turqi me 25 pikë me Ramsej që militon në Itali me 19, ndërsa Grant I Panathinaikosit shërbeu 7 asistë.

Uruguaj u udhëhoq nga Veskovi me 24 pikë e Rodrigez me 23, ndërsa kapi 45 topa në tabela ndaj 33 të amerikanëve.

Më herët, Shtetet e Bashkuara, mezi ia dolën ndaj Bahamasit 105-93 pas kohës shtesë, madje ishin në humbje deri në sekondat e fundit të 40 minutave të rregullta.

Të mos harrojmë, se edhe me profesionistët e NBA-së është gjithnjë e më e vështirë, siç u pa në Lojrat Olimpike në Paris vitin e kaluar.

Amerikanët vërtet morën medaljet e arta, por shpëtuan mirë ndaj Serbisë në gjysmëfinale, ndërsa në finalen kundër Francës duhet t’i puthin duart Stefën Kërrit që bëri një paraqitje të mrekullueshme.

Karlo Ançeloti zbuloi listën e tij të dytë si trajner i kombëtares së Brazilit, duke lënë jashtë të gjithë lojtarët e Real Madrid, me të cilët jetoi sezone triumfi në vitet e fundit.

Tekniku italian nuk ftoi asnjë prej Vinucuis Junior, Rodrygo, Eder Militaio apo Hendrik për dy sfidat e radhës në kualifikueset e Botërorit 2026 në zonën e Amerikës së Jugut.

Pesë herë kampionët e botës do të luajnë më 5 shtator në “Marakana” kundër Kilit dhe më 10 shtator në transfertë kundër Bolivisë.

Përveç lënies jashtë të “madrilenëve”, Ançeloti ka zhgënjyer pritshmëritë e mëdha të mediave braziliane për Neymar.

Sulmuesi duhet të presë ende për rikthimin e tij te “Selecao”, ndërsa objektivi i tij për të luajtur në finalet e Kupës së Botës ka marrë një tjetër goditje të rëndë.

Sa I përket lojtarëve të grumbulluar, trajneri italian ka dërguar ftesa për shumë prej futbollistëve që po shkëlqejnë në Europë, përfshirë edhe disa veteranë, si portieri Alison, mbrojtësit Marquinos e Alex Sandro, apo mesfushori Kasemiro.

Nuk mungojnë talentet e reja të futbollit brazilian, përfshirë dy sulmuesit e Chelsea, Estevao dhe Joao Pedro.

Po ashtu, Ançeloti ka kthyer në kombëtaren e Brazilit, mesfushorin e Uest Ham, Lukas Paqueta dhe sulmuesin e Tottenham, Richarlison.

Në dy ndeshjet e para si trajner i “Selecao”, Anceloti ka marrë një fitore dhe një barazim, ndërsa skuadra e tij e ka siguruar kualifikimin për në finalet e “Botërorit 2026”.

Një ndeshje nga ato që do të mbahen mend gjatë. Një shfaqe e vërtetë e futbolli, e mbushur me spektakël, gola, përmbysje rezultati dhe surpriza si ajo e 16 vjeçarit Rio Ngumoha. Një hero I papritur, ai që vendosi në minutën e 100-të fitoren 3-2 të Liverpool në transfertën e Neëcastle.

Sfida e luajtur në “Saint James Park” ishte emocionuese që në nisje të topit të parë.

Të ndihmuar nga atmosfera elektrizuese në tribuna, të zotët e shtëpisë ishin më kërkues, por festimet i nisën kampionët anglezë, që kaluan në epërsi me Gravenbersh në minutën e 35-të.

Njukasllëll mori një tjetër goditje në shtesën e pjesës së parë, kur Gordon la fushën me karton të kuq, pas një ndërhyrje të rëndë në dëm të Van Dijk.

Pas pushimit, fati I sfidës u duk se u vendos shpejt.

Ekitike shënoi golin e dytë për Liverpool, duke dhënë përshtypjen se gara do mbyllej para kohe.

Por këto pritshmëri u rrëzuan shpejt.

Me forca më të pakta në fushë, Njukasëll reagoi dhe I shkoi shumë pranë një përmbysje të madhe.

Bruno Guimaraes ngushtoi diferencën në minutën e 57-të, ndërsa vetëm dy minuta nga fundi I kohës së rregullt, Osula barazoi shifrat.

Me entuziazmin në krah, të zotët e shtëpisë provuan të kthenin rezultatin, por shpresat e tyre u shuan në minutën e dhjetë shtesë.

Vetëm pak minuta në fushë, Rio Ngumoha do të jetonte debutimin magjik, duke shënuar golin e fitores për Liverpool, që ruan nisjen perfekte në sezonin e ri të Premier League me pikë të plota pas dy javëve të para.

Pranvera nuk vjen me një lule, dhe këtë film e kemi parë edhe më parë.

Interi e nisi Serinë A me një sukses të madh, 5-0, përballë Torinos në “San Siro”, dhe më shumë se 75 000 tifozët në stadium padyshim që ishin të lumtur.

Trajneri Kristian Kivu hyri në kampionat me këmbën e djathtë, siç thuhet, dhe shpresa është që të harrohet katastrofa në finalen e Championsit, me humbjen 5-0 ndaj PSG-së, por sidomos që të fitohen trofe.

Nga ajo që u pa, objektivat mund të arrihen.

Markus Turam ishte më I miri në fushë, dhe jo vetëm sepse shënoi dy gola, ndërsa kapiteni Lautaro Martinez e tundi një herë rrjetën.

Dyshja e sulmit duket “top”.

Në mesfushë, kroati Suçiç nuk bëri të qahej mungesa e mjeshtrit Çalhanoglu, ndërsa presingu ishte asfiksues që në fillim.

Bastoni shënoi në 18’, Turam dyfishoi që në pjesën e parë, ndërsa pas pushimit, Lautaro realizoi në 51’, Turam në 62’ dhe Boni mbylli spektaklin gati 20 minuta para fundit.

“Dallga Inter, – shkruan “La Gazeta delo Sport”, – super nisje e Kivut, 5 gola Torinos! Spektakël I Turamit, shënojnë Lautaro, Bastoni, Boni, paraqitje e bukur nga Suçiç! Asllani te “granatat”!”

“Një manitë fshin tjetrën, – ngushëllohet “Il Korriere delo Sport”, – Interi provon të harrojë Mynihun dhe asfalton Torinon, 5-0! Spektakël nga Kivu! Çfarë filmi me Turam-Lautaro!”

Kristian Kivu është një trajner pa përvojë, por pjesë e Interit të madh të Murinjos, e ndoshta do ta ketë karakterin që të mos lejojë një dështim si ai i sezonit të kaluar.

Mirlind Daku mesa duket do të ketë shoqëri. Një tjetër yll shqiptar ka nisur të shkëlqejë fort në Rusi, edhe pse ende nuk ka arritur në elitë. Ky është sulmuesi shkodran, Belajdi Pusi, që në moshën 27-vjeçare është bindur të krijojë një karrierë ndërkombëtare.

Pusi realizoi golin e radhës në ndeshjen që ekipi I tij, Fakel i Voronjezhit, e fitoi 1-0 në shtëpi ndaj Njeftehimikut. Shqiptari është shënuesi i dytë më i mirë i ligës së parë ruse, me 4 rrjeta në 6 ndeshje, vetëm një pas dy të parëve, Kalmikov e Karajev.

Futbollisti 27-vjeçar realizoi që në javën e parë, në portën e Spartakut të Kostromës, në fitoren 1-0, pastaj bëri pushim në dy ndeshje. U rikthye tek rrjeta në 11 gusht ndaj Kamazit, ku edhe shërbeu asist, pra ishte protagonist në të dy golat në suksesin 2-1.

Nuk u ndal as në 17 gusht sërish jashtë fushe, në Novorosijsk, duke shënuar golin e vetëm në triumfin 1-0 kundër Çernomoretsit vendas, dhe vazhdoi serinë edhe një ditë më parë.

Fakel I Voronjezhit mban vendin e parë në renditje me 18 pikë, pra me gjashtë fitore të plota, dhe me golaverazhin 7-1. Kjo do të thotë se sulmuesi shkodran ka për momentin më shumë se gjysmën e rrjetave të ekipit të tij.

Dy vendet e para ngjiten direkt në Premier Ligë, ndërsa dy vendet e tjera luajnë në plej of për t’u kualifikuar për më lart./abcnews.al

Më mirë vonë se kurrë.

Kristian Asllani dhe Torino u vonuan disa ditë, pot gjithsesi në prag të duelit të kampionatit italian ndaj Interit, erdhi momenti I prezantimit.

Me mesfushorin kuqezi që nuk mundej të luante ndaj ish-ekipit të tij, e që mbeti në tribunë ashtu si ylli tjetër kuqezi, Ardian Ismajli, klubi piemontez ua paraqiti tifozëve dhe gjithë botës.

Në faqen e tij zyrtare postoi një video, në të cilën futbollisti shqiptar paraqitej me fanelën e tij të re dhe si një mjeshtër I bilardos.

Lojtari kuqezi foli shkurt dhe thjeshtë për tifozët.

“Përshëndetje djema. Shumë i kënaqur që erdha në Torino, dhe mezi pres t’iu shoh të gjithëve në stadium. Shihemi shpejt!”

Asllani kaloi tek Torino në formë huazimi për një sezon, me të drejtë blerje përfundimtare të kartonit verën e ardhshme.

Ai besohet se do të marrë një rrogë prej 2 milionë eurosh në vit, ndërsa kostoja e përgjithshme e operacionit mund të arrijë deri në 15 milionë euro.

Në tre sezone me zikaltërit, lojtari I Shqipërisë luajti 99 ndeshje, duke shënuar 4 gola e shërbyer 5 asistë, por nuk mundi të ishte titullar.

Numërimi mbrapsht ka nisur. Kombëtarja e Shqipërisë do të kthehet në fushën e lojës në fillim të shtatorit, me kuqezinjtë që kanë në program dy sfida, atë miqësore kundër Gjibraltarit në datën 4 dhe pesë ditë më pas kundër Letonisë në eliminatoret e Botërorit 2026.

Edhe koha e Silvinjos për të plotësuar listën e lojtarëve që do të grumbullojë për këto sfida po përfundon. Me sezonin që sapo ka nisur dhe shumë futbollistë që kanë bërë lëvizje në merkato, për teknikun kuqezi, ashtu si edhe për të gjithë kolegët e tij, kjo nuk është periudha më e mirë për të zgjedhur.

Por ky është kalendari dhe për sfidat e shtatorit Silvinjo duhet të ketë në dispozicion lojtarët më në formë dhe më gati. Për këtë arsye, lista e ardhshme e kombëtares pritet të ketë risi.

Një prej tyre mban emrin e Cristian Shpendit. Pasi ka kaluar të gjithë zinxhirin e skuadrave kuqezi të moshave, sulmuesi që luan me Cesena në Serie B italiane pritet të debutojë edhe me përfaqësuesen e madhe. Emri i tij është përmendur edhe më parë, por tashmë grumbullimi i tij gjen konfirmim edhe në mediat përtej Adriatikut, që zbulojnë ftesën që tashmë ka mbërritur në klubin e tij.

Shpendi është vetëm një nga risitë e mundshme, ndërsa Silvinjo pritet të kalojë në sitë formën dhe situatën e shumë prej lojtarëve që e kanë patur të sigurtë grumbullimin. Armndo Broja ende nuk e ka bërë debutimin me Burnley, Jasir Asani zgjodhi të transferohej në Iran, Ernest Muçi sapo është rikuperuar nga dëmtimi te Beshikash, ndërsa Nedim Bajrami duhet të gjejë një skuadër tjetër në ditët e fundit të merkatos së verës.

Në mbrojtje, dyshimet lidhen me Ismajlin që vazhdon rikuperimin pas dëmtimit me Torinon. Me të njëjtën skuadër, Kristjan Asllani duhet ende të debutojë pas largimit nga Inter. Në një analizë në vija të trasha, situata e lojtarëve shqiptarë nuk është nga më të mirat në këtë moment. Të gjitha këto dyshime do të marrin përgjigje të premten, kur Silvinjo pritet të publikojë listën dhe të shpjegojë zgjedhjet e tij në konferencën për mediat.

Deri atëherë e sigurtë është, që tekniku duhet të gjejë zgjidhje, sidomos për sfidën e 9 shtatorit kundër Letonisë, e cila është shumë e rëndësishme në fushatën eliminatore të Kupës së Botës./abcnews.al

Kryeministri i Francës, François Bayrou, i merr parasysh të gjitha duke vënë në dispozicion të ardhmen e tij politike. Në një konferencë shtypi ai deklaroi, se më 8 shtator do t’i paraqesë parlamentit kërkesën për votëbesim. Me këtë synon të krijojë qartësi, tha Bayrou. Ai i ka kërkuar pesidentit, që të thërrasë seancën e jashtëzakonshme parlamentare. “Pas deklaratës qeveritare do të kërkojë votëbesimin”, tha Bayrou. “Me këtë synohet çështja thelbësore, nëse ka rrezik për kombin – nëse duhet vepruar urgjentisht – dhe për të gjetur një rrugë, për t’i shpëtuar së keqes, në mënyrë që ne t’i kemi nën kontroll financat tona.

Barra e interesave pjesa më e madhe në buxhet
Gjatë gjithë verës Bayrou ka paralajmëruar, se Franca duhet të kursejë masivisht. Shumë shpejt qysh në korrik për këtë arsye kryeministri prezantoi shtyllat kryesore të buxhetit për vitin e ardhshëm. Në të rreth 44 miliard euro duhet të kursehen. Në rast të kundërt kërcënon super borxhi, gjë që mund ta paralizojë vendin ekonomikisht dhe politikisht. Këtë vit barra e interesave do të jetë pjesa më e madhe në buxhet, theksoi Bayrou gjatë konferencës së shtypit. Kryeministri Bayrou pati propozuar gjithashtu që të hiqen nga lista e ditëve të pushimeve datat 8 maj si dhe e diela e Pashkës. Por ka rezistencë kundër planeve të tij për buxhetin – jo vetëm në nivelin politik, por edhe në radhët e shoqërisë civile. Prej javësh po formësohet nën emërtimin Bloquons Tout (blloko të gjitha) një lëvizje, që më 10 shtator do të paralizojë vendin.

“Bayrou e ka zgjedhur vet datën e lamtumirës”
Partia e majtë LFI i është bashkuar kësaj lëvizjeje duke bërë thirrje për grevë të përgjithshme. E natyrisht ajo do t’ia heqë votëbesimin qeverisë, thotë kryetarja e grupit parlamentar të LFI-së, Mathilde Panot. Bayrou në një farë mënyre po ia jep vet vehtes votën e mosbesimit, thotë politikania. “Ai e ka kuptuar shumë mirë, që pas pushimeve parlamentare të verës gjithësesi do të humbasë postin.” Në sfondin e rezistencës, që ka deklaruar edhe shoqëria civile, Bayrou duket se e ka zgjedhur vet datën e lamtumirës. “Ne gëzohemi për këtë fitore të parë të protestës dhe do ta miratojmë rrëzimin e kryeministrit dhe të qeverisë”, thotë Panot.

Shënjestra e opozitës është në fakt Macron
Edhe kryetarët e grupeve parlamentare të ekologjistëve dhe komunistëve, që me LFI bëjnë pjesë në të ashtuquajturin Fronti i ri Popullor, një aleancë e majtë në parlament, kanë deklauar se nuk do t’ia japin votëbesimin kryeministrit. Po kështu do të veprojë edhe partia radikale e djathtë Rassemblement National (RN).Thomas Ménagé është zëdhënës i grupit parlamentar të RN-së në Asamblenë Kombëtare dhe i tha televizionit France Info, se: “E di, që çështja e votëbesimit shtrohet për të siguruar shumicën. Këtë shumicë François Bayrou nuk e ka as në Asamblenë Kombëtare dhe as në vend. Do të ishte një tradhëti ndaj zgjedhësve tanë, nëse i jepet votëbesimi kësaj qeverie.” Ndaj me gjasë Bayrou do të largohet. Por në fakt qëllimi si i RN ashtu edhe i LFI-së nuk është François Bayrou, por Emmanuel Macron. Duke rrëzuar qeverinë, të dyja këto parti duan, që të detyrojnë presidentin të japë dorëheqjen dhe të imponojnë zgjedhje të parakohshme parlamentare.

Kush do ta qeverisë Francën?
Qeveria dhe kryeministri i saj do ta kenë shumë të vështirë. Përgjegjësinë e kanë tani deputetët, thotë Bayrou. Më 8 shtator parlamenti e ka në dorë të vendosë – dhe secili është përgjegjës përpara francezëve, tha në konferencën e shtypit Bayrou. Rreziku më i madh është që të mos ndërmarrësh asgjë. Nëse ai dhe qeveria e tij bien, shtrohet pyetja, se kush do ta qeverisë Francën në konstelacionin aktual të parlamentit – ose nëse është vërtetë e mundur qeverisja. Po ashtu është e paqartë nëse presidenti Macron sërish do të shpërndajë Asamblenë Kombëtare./DW

Plazhe mahnitëse, natyrë e paprekur, vende historike të pazakonta dhe çmime të ulëta e kanë kthyer këtë ish-shtet eremit në një nga destinacionet më të reja të Evropës, shkruan Valeriya Safronova për prestigjiozen amerikane ”New York Times”.

Në jug të Shqipërisë, praktikisht shumë afër nga ishulli grek i Korfuzit, qyteti i Butrintit ka qëndruar për mijëra vjet. Rrënojat e tij janë një ëndërr për dashamirët e historisë. Një teatër në natyrë, një pagëzimore bizantine dhe një ujësjellës romak. Dhelpra, skifterë dhe shqiponja enden në parkun kombëtar prej 93 kilometrash katrorë që përfshin thesaret arkeologjike të Butrintit.

Dhjetë minuta me autobus larg Butrintit, në resortin modern bregdetar të Ksamilit, turistët shtrihen mbi shezlongë, vallëzojnë me muzikë elektronike dhe lëvizin me jet ski rreth një gjiri piktoresk, të bërë të famshëm nga influencerët e rrjeteve sociale, të cilët e krahasojnë pamjen e tij të harlisur me Maldivet.

Shqipëria është lloj destinacioni, ku një udhëtar mund ta nisë ditën me një shëtitje nëpër antikitet dhe ta mbyllë me një kërcim mbi rërë.

Kjo mund të jetë një arsye madhore pse kaq shumë njerëz po vijnë këtu.

Vitin e kaluar, 11,7 milionë vizitorë hynë në vend nga 10 milionë një vit më parë dhe ata jo vetëm që shkuan në plazhe dhe vende historike, por gjithashtu eksploruan malet dhe liqenet në veri, si dhe Parkun Kombëtar të Lumit të Egër Vjosë, një nga 52 vendet për t’u vizituar në vitin 2023.

”Shqipëria është ende një vend ekzotik për shumë njerëz”, tha Frenkli Prengaj, i cili merret me ture turistike për “Discover Albania” dhe kaloi dy ditë duke më shëtitur.

Vendi, që shtrihet mes Greqisë dhe Malit të Zi përgjatë deteve Adriatik dhe Jon, shpalli pavarësinë nga sundimi osman në vitin 1912 dhe duke filluar nga vitet 1940, kaloi dekada nën një diktaturë staliniste, i izoluar nga pjesa tjetër e botës deri në vitin 1990.

Në fund të viteve ’90, Shqipëria përjetoi një krizë ekonomike të ndjekur nga një periudhë trazirash, por vitet e fundit situata politike është përmirësuar dhe turizmi, i nxitur pjesërisht nga çmimet e ulëta, ka lulëzuar.

Shqipëria e re

Resorti i gjallë i Ksamilit është një shembull i qartë i Shqipërisë së re.

”Gjatë dekadave të diktaturës, një numër i vogël vullnetarësh dërgoheshin në Ksamil për të ngritur komunitete bujqësore”, shpjegon Dorina Dhima, një guidë e pavarur.

”Zona, megjithatë, mbetej e kufizuar, sepse njerëzit mund të arratiseshin duke notuar deri në Korfuz. S’kishte më shumë se katër pallate”, shton ajo.

Ajo epokë ka marrë fund prej kohësh. Unë shijova një drekë të qetë me oktapod (1 800 lekë, rreth 22 dollarë) me pamje nga uji kristal dhe ishujt e gjelbër në një ”beach bar” të quajtur “Freskia e Jonit”.

Por, vizitorët që preferojnë një pushim më të qetë mund të zgjedhin destinacionet bregdetare si Jala, Borshi apo Dhërmiu, një deri në dy orë më në veri.

Kur udhëtova në vitin 2023 në Dhërmi për festivalin e muzikës dhe mirëqenies “Kala”, mbeta e mahnitur nga bukuria natyrore e peizazhit dhe mikpritja lokale.

Rreth 20 minuta larg Ksamilit ose 30 minuta me traget nga Korfuzi (bileta një drejtim nga 14 deri në 33 dollarë), qyteti bregdetar i Sarandës ofron një atmosferë të ngjashme të qetë, plazhe publike, një shëtitore të gjallë që mbushet në mbrëmje me vendas të veshur bukur në xhiro, si dhe shumë mundësi për të ngrënë e pirë me fruta deti të shkëlqyera, si te ”Haxhi” dhe ”Marini”.

Qëndrova në “LaFe Boutique Hotel” në qendër të qytetit dhe kalova një mbrëmje të bukur duke parë familje dhe miq.

Çatitë e kuqe dhe domatet gjithë lëng

Shqipëria ka qenë prej kohësh një urë mes Lindjes dhe Perëndimit, Ballkanit dhe botës mesdhetare. Për shkak të shekujve të sundimit osman dhe pavarësisht dekadave të ateizmit zyrtar gati gjysma e popullsisë identifikohet si myslimane. Vendet historike të vendit pasqyrojnë këtë heterogjenitet historik.

Berati, një sit i Trashëgimisë Botërore të UNESCO-s rreth dy orë në jug të Tiranës, shtrihet përgjatë brigjeve të lumit Osum, me çatitë me tjegulla të kuqe të shtëpive që ngjiten në shpatet e buta të luginës, me qindra dritare që shohin jashtë si sy vigjilentë.

Kalaja e Beratit (hyrja falas), një kompleks i hapur mbi qytet, përfshin një kishë bizantine, rrënojat e një prej xhamive të para në Shqipëri dhe një lagje me shtëpi ende të banuara nga shekulli XVIII-XIX, disa prej të cilave janë bujtina.

Po ashtu, aty ndodhet muzeu ikonografik ”Onufri”, i cili ekspozon objekte fetare që datojnë që nga vitet 1300, përfshirë një ikonostas të gdhendur në dru të stolisur (biletë me audioudhëzues 500 lekë).

Kur e vizitova Beratin në fund të qershorit, qyteti ishte i heshtur deri në perëndim, kur rrugët papritur u mbushën me fëmijë me biçikleta, burra që luanin domino dhe shitës që ofronin kupa plastike të mbushura me rrush e qershi për rreth 100 lekë.

Bollëku i përbërësve të freskët e bënte ushqimin në Shqipëri një kënaqësi.

Në “Amalia Homemade Food” në Berat, bëra një duzinë fotosh të tryezës, e thjeshtë dhe e bukur. Sallata me domate ishte aq e lëngshme dhe e gjallë, sa ndjeva sikur kisha zbuluar një dije të humbur prej kohësh mbi shijen e vërtetë të domates.

Pjesa tjetër e menusë përfshinte djathë dhe perime të pjekura në enë balte; speca të mbushur me oriz e barishte; patëllxhan me hudhër, spec dhe domate; byrek me spinaq dhe djathë; dhe biftek vjenez, mish i mbushur me djathë (menu me 11 pjata për dy persona, 28 euro ose 32 dollarë).

Siç është tipike në Shqipëri, vakti u mbyll me një gotë raki, një pije e fortë alkoolike e bërë nga frutat e fermentuara, versione të së cilës janë të zakonshme në gjithë Ballkanin.

“Ata që janë mbi 40 vjeç e pinë pothuajse çdo ditë”, tha Andi Kallanxhi, punonjës i “Pupa Winery”, 20 minuta me makinë në juglindje të Beratit.

”Dy gota të mëdha në 5 ose 6 të mëngjesit, të shoqëruara me një cigare dhe kafe turke, dy teke rreth orës 10 ose 11, një tjetër pas punës me kafe, dhe pastaj edhe tre a katër të tjera pas punës me salcë kosi e hudhër”, shton ai.

Rakia “te Amalia”, e zbutur me kanellë, ishte një përzierje ngrohtë dhe e fortë për fytin dhe një fund i përsosur i darkës sime.

Do ta pija për mëngjes? Më pyesni kur të kem mbushur 40 vjeçe.

Vizita në një bunker të Luftës së Ftohtë

Ismail Kadare, fitues i çmimit ”Booker International”, e përshkruan qytetin e Gjirokastrës, rreth dy orë e gjysmë në jug të Beratit, si një “krijesë parahistorike që ngjitet si me grep në shpatin e malit”.

Gjirokastra më dukej më shumë si diçka nga një libër me përralla, shtëpitë e saj prej guri të zbukuruara me gdhendje të hollësishme druri dhe të grumbulluara rreth rrugëve me kalldrëm. Por, ai është një libër me figura me një anë të errët pasi, në qendër të qytetit ndodhet një tunel i Luftës së Ftohtë, një nga mijëra bunkerët që diktatori Enver Hoxha ndërtoi në të gjithë vendin gjatë mbretërimit të tij, nga viti 1944 deri në vitin 1985, nga frika e një sulmi të huaj.

Për t’u bashkuar me një tur prej 200 lekësh, shkoni në agjencinë turistike ”Experience Gjirokastra” në sheshin ”Çerçiz Topulli”.

Nëse ngjiteni përtej qendrës historike të Gjirokastrës, mund të vizitoni një kështjellë shekullore (hyrja 400 lekë), pjesë të së cilës u përdorën si burg, së fundmi gjatë regjimit të Hoxhës.

Qelitë e burgut dhe dhomat e torturave janë lënë kryesisht të paprekura dhe janë një muze magjepsës (200 lekë).

Tarifa shtesë e hyrjes përfshin hyrjen në Muzeun e Armëve si dhe në Muzeun e Gjirokastrës, i cili ofron një histori kompakte, por të plotë të rajonit.

Disa nga muzetë më të papritura dhe interesante në Gjirokastër janë shtëpi të epokës osmane.

Në shtëpinë e Skendulajve, Edlira Skenduli, një pasardhëse e familjes së pasur tregtare që ndërtoi shtëpinë më shumë se 300 vjet më parë, na udhëhoqi në një tur (300 lekë).

“Ka 64 dritare, 44 dyer, gjashtë banjo dhe katër hamame”, shpjegon ajo.

”Dhoma e sigurt e shtëpisë”, tha ajo, ”funksiononte si strehë për 70 persona gjatë Luftërave të Parë dhe të Dytë Botërore. Pikat kryesore të tjera përfshinin një frigorifer natyror, një hapësirë ​​nëntokësore të ftohur nga një cisternë ngjitur, dhe dhomën e dasmës, të dekoruar me dru shege, të pikturuara dhe të gdhendura, me një ballkon të mbrojtur të caktuar për gratë beqare që donin të shikonin ceremoninë”.

Ndërsa zbrisja shpatin nga kështjella drejt hotelit ”Rose Garden”, ku po qëndroja, mund ta shihja diellin duke filluar të perëndonte ngadalë pas maleve, duke lënë vija portokalli dhe rozë të pluhurosura mbi qytetin prej guri.

Një thirrje melodike për lutje mbushi luginën, duke më kujtuar edhe një herë pasurin kulturore të Shqipërisë.

Vendpushimet e zhurmshme të plazhit, në anën tjetër të maleve, dukeshin shekuj larg.

Qytetarët e huaj nuk e preferojnë Shqipërinë vetëm për të pushuar por edhe për të punuar dhe jetuar.Të dhënat e instat konfirmojnë se vetëm gjatë vitit 2024 rezulton se janë rreth 22 mijë persona të cilët kanë marë leje qëndrimi për të qëndruar në Shqipëri.Arsyet kryerore të marjes së lejeve të qëndrimit rezulton për arsye punësimi.Sipas të dhënave të INSTAT gjatë vitit 2024 në më shumë se gjysma ose mbi 54 % kanë ardhur në Shqipëri për arsye punësimi ose rreth 12 mijë shtetas.Shumë biznese kohët e fundit kanë marë staf të huaj për të punësuar .

Në vend të dytë renditet bashkimi familjar por nuk mungojnë edhe lejet e qëndrimit të mara për të studiuar në Shqipëri.Sipas Instat grupmosha 30–39 vjeç mban peshën kryesore ndërsa sipas gjinisë mbizotërojnë meshkujt.

Gjatë vitit të kaluar ka pasur gjithashtu rritje edhe të numrit të aplikimeve për leje qëndrimi me rreth 6 %, krahasuar me vitin paraardhës. Shtetasit nga India dhe Italia përbëjnë një përqindje të konsiderueshme të aplikimeve, me 28,8 % të totalit.

Një e dhënë interesante është edhe ulja e ndjeshme e numrit të të huajve të parregullt në territorin shqiptar. Gjatë vitit 2024 u identifikuan 1,540 raste të tilla, shumë më pak se në vitin 2023.

Ndërkohë që shtetasit e huaj që jetojnë aktualisht në Shqipëri, numrin më të madh e përbëjnë ata nga Kosova, Italia dhe Turqia./abcnews.al

Ishte kthyer në Shqipëri për të pushuar nga Vjena e Austrisë, Liridon Rata, mori dy plumba për një vend parkimi në Hamallaj të Durrësit.

Babai i 28 vjeçarit, Besnik Rata ka reaguar për Abc Neës, duke kërkuar drejtësi për të birin, që autorët e ngjarjes të marrin dënimin maksimal.

“Quhem Besnik Rata nga Kukësi në fshatin Kolesjan. Kam djalin të shtruar këtu te spitali. E kam të plagosur me 2-3 plumba. Djali ka ardhur nga Austria, me dokumenta të plota. Sa ka shkuar në plazh të Durrësit, është përballur me plumbat e kriminelëve. Unë e kam marr vesh nga televizionet ngjarjen, prandaj kërkoj drejtësi të ndiqet hap pas hapi, sipas ligjit të merituar për këtë krim. Ju bëj thirrje shtetit, policisë, dhe medias.”

28 vjeçari, prej 4 ditësh ndodhet në gjendje stabël në Spitalin e Truamës, me plagë në brinjë e kraharor.

“Djali ka reagu, ka dëmtime shumë. Plumbin e ka në trup. E ka përshkru nga mushkria, në brinjtë dhe ka përfunduar te krahu. Plumbi kuptohet që ka bërë dëmet e veta.”

Ngjarja u shënua pasditen e të mërkurës në fshatin Hamallaj, në zonën e bregut të detit, dhe shkak i sherrit ka qenë parkimi i automjetit të 28 vjeçarit përpara zonës së plazhit.

“Si sherr, kanë lënë makinë. Dhe janë larguar. Kur kanë tentuar me ik, u kanë thënë me largu makinën. Ata kanë dal vetë i treti me hunjë. Djali ka qenë me një kushëri dhe familjen e tij. Djali ka pranuar, ata kanë lokalet, shazlonet aty.”

I plagosuri dhe autori ishin përfshirë në konfliktin banal prej disa ditësh, pasi 28 vjeçari parkonte automjetin e tij përpara lokalit të 44 vjeçarit Altin Lekgegaj. Fillimisht ata kanë debatuar me fjalë, dhe më pas sherri agravoi në përdorimin e armës së zjarrit. Altin Lekgegaj qëlloi ndaj të riut, duke e lënë të plagosur.

Pas krimit, ai u largua menjëherë për t’i shpëtuar prangave, por arratia nuk zgjati më shumë se pesë orë, pasi u arrestua nga efektivët e policisë së Durrësit.

Altin Lekgegaj nuk rezulton me precedent të mëparshëm penal. Familja e tij është vendosur në Hamallaj të Durrësit pas viteve ’90 pasi u larguan nga Mirdita. Ata ushtronin aktivitetin e tyre në biznes me parkim dhe shezlongë pranë plazhit.

Edhe 28 vjeçari i plagosur nuk rezulton i skeduar. Liridon Rata nga Kolesjani i Kukesit ndodhej në Hamallaj për të pushuar me familjen e tij.

Altin Lekgega akuzohet per vrasje me dashje mbetur ne tentative dhe armëmbajtje pa leje. Ndërkohë, në lidhje më këtë ngjarje policia e Durrësit ka shpallur në kërkim vëllain dhe nipin e autorit Alfons dhe Serxhio Lekgegaj./abcnews.al

Kishte nevojë vetëm për pak kohë. Por tani që Real Madrid ka hyrë në mekanizmat e reja të Xabi Alonso është bërë me të vërtetë I frikshëm.

Pas nisjes me fitore në sezonin e ri të La Liga, “los blamcos” u konfirmuan me një tjetër sukses, këtë herë 3-0 në fushën e Real Oviedo.

Edhe një herë protagonist ishte Kylian Mbappe, i cili duket se është kthyer në liderin e skuadrës madrilene.

Dy gola për sulmuesin francez, duke nisur nga ai që I dha epërsinë Real në minutën e 37-të dhe vendosi fatin e pjesës së parë.

Pas pushimit, ekipi drejtuar nga Xabi Alonso vijoi dominimin e tij me lojë dhe raste. Por goli i dytë dhe i qetësisë do të vinte vonë.Vetëm në minutën e 83-të, Kilian Mbappe gjeti sërish rrugën e rrjetës, duke dyfishuar avantazhin e miqve.

Edhe Vinicius Junior kurorëzoi mbrëmjen e tij pozitive. Sulmuesi brazilian shënoi golin e tretë në shtesë, duke vulosur përfundimisht fitoren e Real Madrid, që nga distanca I përgjigjet rivalëve të përjetshëm të Barcelonës në atë që pritet të jetë sërish një garë dyshe për titullin kampion në La Liga./abcnews.al

Sukses shumë i mirë, por qetësi të plotë nuk ka. Juventusi e nisi siç duhet vitin e ri të Serisë A, duke mundur Parmën 2-0, veçse njëri nga heronjtë edhe mund të largohet.

Sulmuesi i ri, Zhonatan David i ardhur nga Lila e Francës, debutoi me gol, ashtu si yjet e dikurshëm ofensivë si Vieri, Inzagi, Ibrahimoviç, Dibala apo Higuain. Madje, ashtu si dy sulmuesit që janë sot në ekip, Kolo Muani e Dushan Vlahoviç, por që njëri prej tyre mund të largohet.

Francezi nuk ishte as në stol, ndërsa futbollisti i Serbisë u detyrua ta niste nga stoli. David shënoi për 1-0 në minutën e 59-të, pasi Parma rezistoi gati një orë me mbrojtjen e betonuar në stadiumin “Alianc”.

Vlahoviçit iu deshën vetëm 4 minuta në fushë për të tundur rrjetën, madje e bëri në një moment shumë të vështirë.

“Zonja e Vjetër” kishte mbetur me 10 lojtarë pasi Kambiazo mori të kuq direkt në 83’, veçse pa kaluar 60 sekonda Dushani shënoi.

Për gazetën e Torinos, “Tutosport”, kjo ishte dita “D”: Jildiz krijon, David godet, Dushan mbyll gjithçka! Juventusin e kemi! Vlahoviç nga vërshëllimat te brohoritjet!”

“Goditje prej Juventusi, – shkruan “La Gazeta delo Sport”, – Vendosin David e I rigjeturi Vlahovic! Tudor: I kënaqur nga Dushani, por vendos klubi!”

Trajneri Tudor ishte I kënaqur, por edhe hermetik.

“Jam i kënaqur për fitoren, edhe sepse ishte ndeshja e parë dhe mund të kishte të papritura. Nuk e njihnim mirë kundërshtarin, dhe patëm tension mes lojtarëve para ndeshjes. Kjo është normale. Parma e luajti ndeshjen me “katenaçon” e kohëve të vjetra dhe me kundërsulm. Patëm durim, ndaj fituam. Jam I lumtur me sulmuesit e mi. David e ka golin në gjak, dhe lëviz shumë mirë në zonën e rreptësisë. Koló është rritur. Vlahoviç luajti mirë, ka mentalitetin e duhur, dhe shënoi një gol të madh. Nuk dua t’iu them se cili prej tyre duhet të rrijë apo të largohet. Mendimin tim ia kam thënë klubit”.

Nisje e mirë për Juventusin, duke iu përgjigjur Napolit, e duke mos bërë figurë të keqe si Milani, që mund të jetë destinacioni për Vlahoviçin.  Të shohim nëse rekordmenët e titujve mund të pretendojnë për “skudeton”./abcnews.al

Nuk ka nevojë të tregojë se cili është. Jasir Asani njihet mirë në kontinentin më të madh të botës për heroizmat e tij me skuadrën koreanojugore, Kuangju, dhe trajneri I ekipit të tij të ri, Esteglal, ka vendosur ta përfshijë menjëherë në skuadër.

Siç njoftojnë mediat në Iran, tekniku portugez Sa Pinto, do ta ketë shqiptarin në listën prej 18 lojtarësh për ndeshjen e kësaj të marte ndaj rivalit Zob Ahan në Ligën Profesioniste iraniane të futbollit.

Bashkë me të, në listë do të jetë edhe lojtari tjetër I prezantuar të shtunën, Musa Genpo, ndonëse mes të dyve ekziston një dallim.

Pas seancës së parë stërvitore, Sa Pinto kuptoi se Asani e Genpo janë në formën e duhur, veçse vetëm për yllin kuqezi ai duket se ka vendosur që ta ketë titullar.

Asani u bashkua me skuadrën më të njohur të Iranit dhe nënshkroi një kontratë dyvjeçare.

Besohet se për të u paguan 1 milionë euro, padyshim më pak sesa vlera reale e kartonit, dhe kjo sepse kontrata e tij në Kuangju përfundonte në dhjetor të këtij viti.

Lojtari I kombëtares shqiptare shpreson që të ketë sukses në një skuadër me kaq shumë emër, që ka fituar 9 tituj kampion, dy Champions të Azisë dhe që fitoi pak ditë më parë Kupën e Iranit.

Asani shkëlqeu fort në Korenë e Jugut, duke shënuar 9 gola në 10 ndeshje në Championsin e Azisë këtë sezon, duke qenë Këpucë e Argjendit e duke arritur çerekfinalen, ndërsa në ligën koreanojugore këtë edicion pati 8 gola e 2 asistë në 22 ndeshje./abcnews.al

Franca ka thirrur për sqarime ambasadorin amerikan në Paris,  Charles Kushner, pasi ky i fundit publikoi një letër të hapur drejtuar presidentit Emmanuel Macron ku akuzon qeverinë franceze se nuk ka bërë mjaftueshëm për të frenuar dhunën kundër hebrenjëve. Në letrën e botuar në Wall Street Journal, Kushner, i cili është hebre dhe babai i Jared Kushnerit – bashkëshorti i Ivanka Trump, vajza e presidentit amerikan Donald Trump – shkruan se antisemitizmi në Francë është rritur ndjeshëm që nga sulmi i Hamasit ndaj Izraelit më 7 tetor 2023.

“Çdo ditë në Francë ndodhin sulme ndaj hebrenjve në rrugë, shkollat dhe sinagogat dhunohen, ndërsa bizneset e hebrenjeve vandalizohen,” shkruan ai, duke i kërkuar Macronit zbatim më të ashpër të ligjeve kundër krimeve të urrejtjes dhe ndalimin e deklaratave që, sipas tij, nxisin antisemitizëm.

Kushner kritikoi gjithashtu qëndrimin e Parisit për njohjen e një shteti palestinez, duke thënë se deklaratat e tilla “i japin zemër ekstremistëve, ushqejnë dhunën dhe rrezikojnë jetën e hebrenjve në Francë”.

Ministria e Jashtme franceze reagoi menjëherë, duke i cilësuar akuzat si “të papranueshme” dhe theksoi se ambasadori do të paraqitet për të dhënë sqarime mbi komentetet e tij. “Franca i refuzon me vendosmëri këto pretendime. Ambasadorët nuk lejohen të ndërhyjnë në çështjet e brendshme të një vendi pritës, siç përcakton Konventa e Vjenës e vitit 1961,” thuhet në deklaratën e Parisit zyrtar.

Letra e Kushner vjen disa ditë pas një komunikimi të ngjashëm të kryeministrit izraelit Benjamin Netanyahu drejtuar Macronit, ku Kreu I Qeverise Izraelite  akuzonte presidentin francez se po ushqente antisemitizmin me mbështetjen për njohjen e Palestinës.

Franca, që ka komunitetin më të madh hebre në Europën Perëndimore – rreth gjysmë milioni persona – por edhe një komunitet të madh mysliman, ka raportuar rritje të ndjeshme të incidenteve të urrejtjes që nga fillimi i luftës Izrael–Hamas.

Macron, i cili ka dënuar hapur antisemitizmin, ka paralajmëruar se Franca do të njohë zyrtarisht shtetin palestinez gjatë një mbledhjeje të OKB-së në shtator, duke iu bashkuar mbi 147 vendeve që e kanë ndërmarrë ose shpallur një hap të tillë./abcnews.al

Shefi i Shtabit të Ushtrisë Izraelite, gjenerali Eyal Zamir ka deklaruar këtë të hënë  se ekziston një marrëveshje konkrete për lirimin e pengjeve që mbahen ende në Gaza, marrëveshje kjo që duhet të shqyrtohet nga Kabineti i Sigurisë Izraelite. Zamir është shprehur sipas asaj që shkruajnë mediat Izraelite se ushtria e vendit ka krijuar të gjitha kushtet e nevojshme për zbatimin e kësaj marrëveshje, por vendimi final mbetet në dorën e Kryeministrit Benjamin Netanyahu.

Kabineti I Sigurisë Izraelite pritet të mblidhet të martën për të marrë një vendim final mbi një marrëveshje armëpushimi që u pranua nga Hamas javën e Shkuar.

Marrëveshja është hartuar nga ndërmjetësuesit e Egjipit dhe Katarit bazuar në një draft të të dërguarit amerikan për Lindjen e Mesme Steve  Witkoff. Ajo parashikon një armëpushim 60 ditor, lirimin në dy faza të rreth gjysmës së pengjeve dhe vazhdimin e negociatave për ti dhënë fund luftës përfundimisht në Lindjen e Mesme. Hamas mban aktualisht 50 pengje ende në gaza, por sipas inteligjencës së Tel Avivit vetëm 20 prej tyre besohet se janë gjallë ende.

Mediat Izraelite shkruajnë se Kryeministri Benjamin Netanyahu vijon të jetë kundër një marrëveshje të ndarë në disa faza, pasi kreu I qeverisë kërkon që të ketë lirim të të gjitha pengjeve njëherazi nga Hamas. Dicka e tillë ka sjellë përplasje brenda qeverisë izraelite. Shefi i Shtabit të Ushtrisë Izraelite, gjenerali Eyal Zamir ka paralajmëruar më herët se pushtimi i plotë I qytetit të Gazës, një vendim i miratuar nga qeveria Izraelite mund të rrezijojë seriozisht jetën e pengjeve të mbetura Gjallë si dhe mund të sjellë një katastrofë për forcat ushtarake të vendit për shkak se lufta do të zgjaste.

Familjarët e pengjeve të cilat kanë protestuar kundër Netanyahut dhe kërkojnë marrëveshje të menjëhershme  ka mbështetur planoin e Shefit të Shtabit të Ushtrisë izraelite, duke e konsideruar atë si një shpresë për rikthimin e familjarëve të tyre./abcnews.al

Adriatik Lapaj përfundimisht mbetet jashtë Kuvendit, në legjislaturën e re që pritet të nisë në shtator. Kolegji Zgjedhor i mbledhur këtë të hënë, i dha fund sagës së Lapajt për të marrë mandatin e deputetit.

Kolegji Zgjedhor la në fuqi vendimin e KAS, sipas të cilit mandatin e merr Ana Dajko, e renditur e para në listën e mbyllur të “Shqipëria Behet”.

Në argumentin e kësaj trupe edhe nëse bëhet transferimi i mandatit, në të gjitha rastet duhet të kalojë në dorën e një zonje, pasi Kodi Elektoral përcakton qartë se një grua nuk mund të zëvendësohet me një burrë.

Ana Dajko, 60-vjeçarja nga Saranda u kandidua nga djali i saj, anëtar i kryesisë së “Shqipëria Bëhet”, ndërsa njihet edhe si tezja e Lapajt. Nëse ajo nuk e pranon mandatin e dyta në listë është partnerja e Endri Shabanit.

Në zgjedhjet e 11 majit, Adriatik Lapaj dhe Endri Shabani, për të shmangur listat e mbyllura vendosën në to familjarë dhe të afërm, të cilët do të jepnin dorëheqjen dhe mandati do t’i kalonte me të votuarit mes tyre./abcnews.al

Trump dhe Putin folën krah për krah në konferencë për rreth 10 minuta. Të dy treguan se ishte bërë përparim gjatë bisedimeve të tyre private, por ato përfunduan pa një marrëveshje të fortë.

Ja pikat kryesore të deklaratave të tyre sipas BBC:

Putin thotë se është “sinqerisht i interesuar” për t’i dhënë fund konfliktit, të cilin e përshkroi si një “tragjedi”.

Por ai thotë se Rusia duhet të eliminojë “shkaqet kryesore” të konfliktit – dhe paralajmëron Ukrainën dhe Evropën se nuk duhet të “sabotojnë” bisedimet.
Putin e përshkruan takimin si një “pikënisje për zgjidhjen” e konfliktit.

Ai e përshkruan marrëdhënien e tij me Trump si “të ngjashme me biznesin” – dhe pajtohet me pretendimin e përsëritur të presidentit amerikan se lufta nuk do të kishte filluar nëse ai do të kishte mbetur në detyrë pas zgjedhjeve të vitit 2020.

Trump thotë se ka ende pika mosmarrëveshjeje dhe “nuk ka marrëveshje derisa të ketë një marrëveshje” – duke shtuar “nuk arritëm atje” pavarësisht progresit.

Ai thotë se “u ra dakord për shumë pika”, por “disa” mbeten, duke shtuar se “një është më e rëndësishmja” pa specifikuar se si.

Ai thotë se do t’i njoftojë Zelesnky dhe udhëheqësit evropianë së shpejti – dhe “në fund të fundit varet prej tyre”.

Trump përfundon duke thënë se “ndoshta” do ta shohë përsëri udhëheqësin rus së shpejti

Putin përgjigjet: “Herën tjetër në Moskë”.

Presidenti Donald Trump tha se ai dhe Presidenti rus Vladimir Putin “bënë disa përparime” dhe “përparim të madh” në takimin e tyre dypalësh.

Megjithatë, shtoi ai, “nuk ka marrëveshje derisa të ketë një marrëveshje”.

“Do të telefonoj NATO-n pas pak. Do të telefonoj njerëzit e ndryshëm që mendoj se janë të përshtatshëm. Dhe, sigurisht, do të telefonoj Presidentin Zelensky dhe do t’i tregoj për takimin e sotëm. Në fund të fundit, varet prej tyre”, tha Trump.

“Patëm një takim jashtëzakonisht produktiv dhe u ra dakord për shumë pika”, por Trump tha, “Nuk arritëm atje, por kemi një shans shumë të mirë për të arritur atje.

“Gjithmonë kam pasur një marrëdhënie fantastike me Presidentin Putin.”, thotë Trump.

Ai e quan takimin e tyre “jashtëzakonisht produktiv”, por shton se disa gjëra ende nuk janë vendosur.
Por ne kemi një “shans shumë të mirë” për përparim të mëtejshëm, thotë ai.

Trump dhe Putin nuk pranuan pyetje në konferencën për shtyp pas deklaratave të tyre.

Presidenti Putin nuk dha komente dhe foli për rreth tetë minuta. Në krahasim, Trump, i cili nuk është zakonisht i shkurtër në fjalime, foli vetëm për rreth tre minuta.