Subjektet politike kanë nisur tashmë përgatitjet për zgjedhjet lokale të vitit 2025, duke zyrtarizuar disa prej kandidatëve për kryetarë komunash.

Gara pritet të jetë veçanërisht interesante në komunë e Ferizajt dhe Gjilanit, ku kryetarët aktualë synojnë të sigurojnë një mandat të ri. Ndërkohë, kandidatët e rinj janë të vendosur të sfidojnë pushtetin aktual dhe të arrijnë fitoren në zgjedhjet që do të mbahen në vjeshtë, transmeton Telegrafi.

Në Gjilan, kryetari aktual Alban Hyseni, nga radhët e Lëvizjes Vetëvendosje (LVV), do të garojë për një mandat të dytë. Lidhja Demokratike e Kosovës (LDK) me Arbër Ismailin si kandidat, ndërsa Partia Demokratike e Kosovës (PDK) do të përfaqësohet nga Riad Rashiti. Aleanca për Ardhmërinë e Kosovës (AAK) ka vendosur që në këtë garë të hyjë me kandidatin Nazim Gagica.

Kush ka udhëhequr deri tani me komunën e Gjilanit?

Komuna e Gjilanit ka qenë nën drejtimin e Lidhjes Demokratike të Kosovës që nga viti 2014 deri në vitin 2021 me Lutfi Hazirin kryetar. Ndërsa, në vitin 2021, udhëheqjen e komunës e mori LVV, me Alban Hysenin, i cili aktualisht është në fund të mandatit të tij të parë, dhe po ashtu synon mandatin e dytë.

Gara për Ferizaj;

Ndërkohë, në Ferizaj, kryetari aktual Agim Aliu do të kërkojë një tjetër mandat, duke garuar sërish si kandidat i PDK-së. LDK do ta konfirmojë Visar Azemin si kandidatin e saj për zgjedhjet që do të mbahen më 12 tetor, ndërsa AAK do të përfaqësohet nga kandidatja Xhemile Murati.

Kush ka udhëhequr deri tani me komunën e Ferizajt?

Në 10 vitet e fundit, Ferizajn e kanë drejtuar dy kryetarë: Muharrem Svarqa (LDK) deri më 2017, dhe Agim Aliu (PDK) prej 2017 e deri më sot (2025), aktualisht në fund të mandatit të dytë dhe në garë për të tretin.

Përgatitjet për zgjedhjet nga KQZ;

Ndryshe, Komisioni Qendror i Zgjedhjeve ka hapur procesin e aplikimit për certifikimin e subjekteve politike për Zgjedhjet Lokale 2025.

Subjektet politike mund të aplikojnë deri më 13 gusht.

“Duke filluar nga dita e sotme, 26 qershor dhe deri më 13 gusht 2025, subjektet politike mund të aplikojnë në Komisionin Qendror të Zgjedhjeve për t’u certifikuar për pjesëmarrje në Zgjedhjet Lokale, të cilat do të mbahen më 12 tetor 2025. Gjithashtu, gjatë kësaj periudhe subjektet politike (partitë politike, koalicionet, nismat qytetare dhe kandidatët e pavarur) duhet të dorëzojnë edhe listën me emrat e kandidatëve për Kryetarë të Komunave dhe për Kuvende Komunale”, ka deklaruar për Telegrafin, Valmir Elezi, zëdhënës i KQZ-së.

Zgjedhjet Lokale të vitit 2025 do të mbahen më 12 tetor dhe do të përcaktojnë përbërjen e re të Kuvendeve Komunale si dhe Kryetarët e rinj të Komunave në të gjithë vendin. /Telegrafi/

The post Zyrtarizimi i kandidatëve për Ferizaj dhe Gjilan – nga kush do të sfidohen kryetarët aktualë Agim Aliu dhe Alban Hyseni appeared first on Telegrafi.

Kryetari i Komunës së Gjilanit,  Alban Hyseni, tha se është nënshkruar Memorandumi i Mirëkuptimit për ndërtimin e Qarkores së jashtme të qytetit të Gjilanit dhe tashmë po vazhdohet edhe me procesin e shpronësimit të pronave të paluajtshme të prekura nga projekti.

“Për dallim nga e kaluara, ku rrugët janë ndërtuar pa shpronësim dhe pa respektuar të gjitha procedurat, tani po i bëjmë punët me rend e në mënyrë ligjore: njëherë shpronësimi i pronave dhe pastaj fillimi i punimeve. Kjo është mënyra e duhur për të garantuar drejtësi dhe zhvillim të qëndrueshëm për qytetin tonë”, tha Hyseni.

I pari i Gjilanit, falënderoi ministrin e Mjedisit, Liburn Aliun dhe kryeministrin  e Kosovës Albin Kurtin për mbështetjen e vazhdueshme.

Ndryshe, Qeveria e Kosovës ka miratuar këtë propozim-vendim preliminar për shpronësim shpronësim të interesit publik të pronave të paluajtshme të pronarëve dhe zotëruesve të interesit, të cilët preken nga realizimi i projektit: Ndërtimi i qarkores së jashtme të qytetit të Gjilanit dhe lidhja e rrugës nacionale M25. II dhe M25. III deri te autoudha R7.1 (Velekincë- Livoçi i Ulët dhe i Epërm). /Telegrafi/

The post Miratohet vendimi për shpronësim – nis hapi i parë për Qarkoren e Jashtme të Gjilanit appeared first on Telegrafi.

Në stadiumin e Gjilanit së shpejti pritet të fillojnë punimet për vazhdimin e rindërtimit.

Organi Shqyrtues i Prokurimit ka marrë vendim lidhur me ankesat e paraqitura për tenderin e stadiumit në Gjilan, duke refuzuar njërën dhe miratuar pjesërisht tjetrën.

E tanimë nuk do të ketë pengesa, pasi kontrata është nënshkruar dhe së shpejti pritet të nisin punimet.

Ka qenë i pari i Komunës së Gjilanit, Alban Hyseni që ka konfirmuar se kontrata është nënshkruar dhe së shpejti do të shihemi në stadiumin e ri.

Njoftimi i plotë nga Alban Hyseni (pa ndërhyrje):

U NËNSHKRUA KONTRATA për Stadiumin e Gjilanit!

Shumë shpejt nisin punimet dhe nis edhe një epokë e re për sportin në Gjilan.

Urime të gjithë sportdashësve dhe sportistëve, ky është stadiumi që e kemi meritu prej kohësh!

Shpejt, shumë shpejt… shihemi në stadiumin e ri! /Telegrafi/

The post “Shumë shpejt, shihemi në stadiumin e ri” – Alban Hyseni i jep lajmin e madh gjilanasve për stadiumin e qytetit appeared first on Telegrafi.

Tri mësuese – një ëndërr të përbashkët që sot bën realitet, përmes promovimit të librave “Sjellja dhe komunikimi” për tri nivelet e para shkollore. Vlora Jakupi ka botuar librin për nxënësit e klasës së parë, Gëzime Bllaca-Sahiti për klasën e dytë dhe Yllka Behluli për klasën e tretë.

Gjatë promovimit të librave, në një fjalë rasti, drejtuesi i shtëpisë botuese “Magjia e Librit”, Besir Zyberi, tha se ka qenë një punë mjaft e vështirë deri në realizimin e këtij projekti.

Ai shtoi se librat janë punuar me përkushtim të veçantë nga autoret, të cilat, sipas tij, janë mësimdhënëse të vyera.

Lexo po ashtu Notat e lojtarëve: Man City 3-1 Man United, shkëlqeu Foden, dështim nga ylli i Djajve të Kuq

“Gjatë punës kemi vërejtur se ka mungesë të materialeve të tilla, prandaj kjo ka qenë arsyeja kryesore që kemi punuar në këtë drejtim”, u shpreh Zyberi.

Ndërkohë, kryetari i Komunës së Gjilanit, Alban Hyseni, tha se këto nuk janë vetëm tekste shkollore, por edhe dritare për të punuar me nxënësit dhe mësimdhënësit.

Në përmbyllje të fjalës së tij, kryetari Hyseni ilustroi rëndësinë e dijes me një fjali të thellë:
“Liria është gjithmonë qëllim final, por në të njëjtën kohë mund të shërbejë si mjet dhe zhvillim final”.

Një nga autoret e librit “Sjellja dhe komunikimi 1”, Vlora Jakupi, u shpreh shumë e lumtur për këtë sukses, një projekt që i qëndroi afër zemrës.

Ajo theksoi se ideja për këtë libër erdhi nga përvoja dhe vëzhgimi i përditshëm në klasë, si ndihmesë për nxënësit dhe mësimdhënësit.

“Në këtë moshë, fëmijët janë si një faqe e bardhë, prandaj ky libër është artikuluar me shumë përkushtim. Ai është menduar si një mjet praktik për mësuesit dhe si një udhërrëfyes për jetën”, tha Jakupi.

Gëzime Bllaca-Sahiti, autore e librit “Sjellja dhe komunikimi 2”, theksoi se këta libra janë krijuar me shumë kujdes për të qenë në shërbim të nxënësve dhe mësimdhënësve, duke kontribuar në ndërtimin e një arsimi sa më cilësor.

“Librat që po promovojmë i përkasin mësimit zgjedhor, një hapësirë gjithnjë e më e rëndësishme në sistemin tonë arsimor. Përmbajtjet janë të strukturuara me aktivitete të menduara mirë për të stimuluar pjesëmarrjen aktive”, shtoi ajo.

Ndërsa, autorja e librit “Sjellja dhe komunikimi 3”, Yllka Behluli, tha se këta libra përfaqësojnë një hap drejt rritjes së fëmijëve si njerëz më të mirë, më të sjellshëm dhe më të përgjegjshëm.

Ajo theksoi se libri është hartuar me dashuri, profesionalizëm dhe një vëmendje të veçantë ndaj moshës dhe botës së fëmijëve të klasës së tretë.

“Libra të tillë edukimi janë më se të nevojshëm, sidomos në këtë kohë kur ndryshimet shoqërore dhe teknologjike janë të shpejta dhe të mëdha”, u shpreh Behluli.

Sipas saj, “Sjellja dhe komunikimi 3” është një burim i vlefshëm për zhvillimin e aftësive ndërpersonale dhe komunikimit efektiv, të cilat janë thelbësore për suksesin në çdo fushë të jetës.

“Në një kohë kur ka kaq shumë ndikime dhe stimuj nga çdo anë, ndihma në zhvillimin e këtyre aftësive është një hap shumë i rëndësishëm drejt përmirësimit të shoqërisë dhe individëve”, shtoi ajo.

Vlora, Gëzimja dhe Yllka – tri mësimdhënëse që i sollën fëmijëve këto libra për ta bërë më të kuptueshëm konceptin e sjelljes dhe komunikimit – synojnë të vazhdojnë punën e tyre me botime të reja që trajtojnë tema të ndryshme në të mirë të gjithë shoqërisë. /Telegrafi/

The post Kur ëndrra bëhet libër – promovohen librat “Sjellja dhe Komunikimi” për tri nivelet e para shkollore appeared first on Telegrafi.

Në kuadër të javës së sigurisë, është diskutuar lidhur me temën “Organizimi-funksionimi i Qendrës Operative lokale dhe procesi i vendimmarrjes në nivelin komunal”, organizuar nga Komuna e Gjilanit në bashkëpunim me shoqatën e pensionistëve të TMK- së, FSK- së dhe simpatizantëve Elita.

Në këtë aktivitet ishin prezent kryetari i Komunës së Gjilanit Alban Hyseni, nënkryetarja Leonora Morina Bunjaku, zv. ministri i Mbrojtjes Shemsi Syla, drejtori për Mbrojte dhe Shpëtim Bejtullah Osmani, si dhe përfaqësues të institucioneve të sigurisë dhe agjencioneve tjera në kuadër të komunës.

Kryetari i Komunës së Gjilanit, Alban Hyseni, tha se po diskutojnë për organizimin dhe funksionimin e Qendrës Operative lokale dhe procesin i vendimmarrjes në nivelin komunal, për të qenë të përgatitur me kapacitete dhe aftësi për situata emergjente.

“Duhet të jemi të gatshëm për situata të papritura edhe nga kërcënimet që mund të vijnë nga jashtë, pasi që komuna jonë është në brezin kufitar me Serbinë dhe Maqedoninë e Veriut”, tha Hyseni.

Hyseni, theksoi se Qendra Operative lokale duhet të funksionoi sa më mirë dhe mbështetja e komunës nuk do të mungoi ndaj çdo kërkese.

Zv. ministri i Mbrojtjes, Shemsi Syla, tha se ky takim është tejet i rëndësishëm. Qendra operative duhet mbështetur.

“E keni mbështetjen e Ministrisë së Mbrojtjes për çdo gjë. Urojmë që të mos ketë situata emergjente, por Qendra Operative duhet të jetë vigjilente”, tha Shemsi Syla.

Edhe drejtori për Mbrojtje dhe Shpëtim, Bejtullah Osmani, tha se qëllimi i këtij takimi është ngritja e kapaciteteve dhe aftësive në zbatimin e procedurave dhe protokolleve në situate emergjente të stafit të komunës dhe mekanizmave që veprojnë në Komunën e Gjilanit.

Nga pjesëmarrësit u kërkua që të përforcohen njohurit dhe aftësimin e duhur të institucioneve komunale në menaxhimin e rreziqeve, mënyra e veprimit të ngritjes së Qendrës Operacionale në rast fatkeqësie dhe rruga e duhur e procesit të vendim marrjes. /Telegrafi/

The post Diskutim mbi sigurinë, Hyseni: Gjilani duhet të jetë gati për çdo kërcënim – jemi komunë kufitare appeared first on Telegrafi.

Sot është vënë gurthemeli i objektit për banimin e përballueshëm dhe social në Gjilan, ku të pranishëm ishin kryeministri në detyrë, Albin Kurti, si dhe zëvendësministri i Ministrisë së Mjedisit, Planifikimit Hapësinor dhe Infrastrukturës, Jeton Raka.

Me këtë rast, kryeministri Kurti bëri të ditur se Komuna e Gjilanit është njëra ndër pesë komunat për të cilat janë hartuar projektet ideore dhe kryesore për banimin e përballueshëm dhe social.

“Qysh në fillim të mandatit patëm filluar me përgatitjet për banimin e përballueshëm social për komunat dhe këtu në Gjilan po e kurorëzojmë themelin,” deklaroi Kurti.

Ai shtoi se do të ndërtohen gjithsej 71 njësi banimi, prej të cilave 57 do të jenë për banim të përballueshëm dhe 14 për banim social. Sipas tij, sipërfaqja e përgjithshme ndërtimore do të jetë 12 mijë metra katrorë, dhe objekti do të përfshijë katër tipe të ndryshme banesash, ndërsa kohëzgjatja e kontratës së ndërtimit është paraparë të jetë 3 vjet.

Kurti theksoi gjithashtu se përfitues nga ky projekt do të jenë çiftet e reja që ende nuk e kanë të zgjidhur problemin e banesës – me kusht që njëri nga partnerët të jetë nën moshën 37 vjeç – si dhe prindërit vetushqyes.

Ai përmendi se ky është një projekt i bashkëfinancuar mes komunës dhe ministrisë, ku Komuna e Gjilanit kontribuon me lokacionin dhe ndërtimin e infrastrukturës përcjellëse.

Ndërkohë, kryetari i Komunës së Gjilanit, Alban Hyseni, deklaroi se Gjilani është një nga komunat që ka arritur të plotësojë kërkesat për këtë projekt jetik për qytetarët.

Nga ana tjetër, zëvendësministri Jeton Raka tha se ky projekt ka për synim të mundësojë një jetë më të denjë dhe më të përballueshme për të gjithë qytetarët.

“Qeveria në vitin 2021 ka miratuar Agjendën Qeveritare për Banim të Përballueshëm dhe Social, ku kemi bërë edhe thirrje publike për komunat,” tha ai, duke shtuar se kësaj thirrjeje i janë përgjigjur vetëm 13 nga gjithsej 38 komuna të vendit. /Telegrafi/

The post Kurti vendos gurthemelin për banimin e përballueshëm në Gjilan: Jetë më të denjë për qytetarët appeared first on Telegrafi.

Për shkak të moskonstituimit të Kuvendit të Kosovës tri komunave ende nuk u është ndarë buxheti i këtij viti. Si rrjedhojë, thuhet se realizimi i projekteve të parapara për sivjet po rrezikohet, njëkohësisht edhe pagat e komunarëve.

Komunës së Prishtinës, asaj të Gjilanit dhe të Zubin Potokut nuk u është alokuar ende buxheti i këtij viti. Kjo pasi këto tri komuna kishin votuar me vonesë buxhetet komunale, tek pasi Kuvendi kishte miratuar buxhetin e Republikës për sivjet.

Në mungesë të buxhetit, asnjë nga këto komuna nuk po mund të nisin realizimin e projekteve të parapara për sivjet.

Për këtë, kryetari i Prishtinës, Përparim Rama, i është drejtuar me një letër Ministrisë së Financave.

Ai ka kërkuar një zgjidhje të shpejtë në mënyrë që të parandalohet një krizë e thellë financiare e ekonomike.

Për mosalokimin e buxhetit, kryetari i Gjilanit, Alban Hyseni, ia ka lënë fajin kuvendit komunal.

Kjo pasi, sipas Hysenit, në kuvendin komunal buxheti ka kaluar me vonesë.

“Nuk ka qenë rastësi që buxheti i komunës tonë për vitin 2025 është votuar pas zgjedhjeve nacionale. Sepse ata që kanë përvojë në institucionet tona e dinë një gjë, se kur votohet një ligj në kuvendin e Republikës të Kosovës siç është ligji i buxhetit, ai është i barazvlefshëm me të gjitha ligjet tjera, praktikisht është i vlefshëm për një periudhë të caktuar. Për shkak të mos votimit të buxhetit në Gjilan, në tetor apo nëntor kur është votuar buxheti i Republikës së Kosovës, në ligjin e buxhetit komuna ynë figuron me buxhetin e vitit 2024. Edhe kodet, projektet tona janë të gjitha të vitit 2024. Ne e kemi votuar buxhetin në vitin 2025, që i bie për plotësim dhe ndryshim të ligjeve, duhet procedura e njëjtë sikur e aprovimit”, ka theksuar Hyseni, raporton RTK.

E në rast se nuk u alokohet buxheti sa më shpejt, kryetari i Komunës së Zubin Potokut, Izmir Zeqiri, thotë se zyrtarët komunalë rrezikojnë të mbesin pa paga.

Ai deklaroi se janë duke funksionuar me 1/12-ën e buxhetit të vitit 2024.

RTK ka kërkuar informacione edhe nga Ministria e Financave, por nga e njëjta nuk janë përgjigjur.

Ndërkaq pas dështimit të konstituimit të Kuvendit, ministri në detyrë i Financave, Hekuran Murati, tha se Qeveria e ka të pamundur të dorëzojë kornizën afatmesme të shpenzimeve, e cila parashihet që t’i dorëzohet Kuvendit jo më larg se data 30 prill.

Po ashtu, Murati u shpreh se mungesa e një kuvendi funksional e vonon edhe ndarjen e granteve komunale.

The post Moskonstituimi i Kuvendit të Kosovës lë tri komuna pa buxhet – rrezikohen disa projekte dhe pagat appeared first on Telegrafi.

Partia Demokratike e Kosovës-dega në Gjilan, ka bërë të ditur se do t’a denoncoj kryetarin e Komunës së Gjilanit, Alban Hyseni, për shkak se i njëjti ka lejuar që të uzurpohet hyrja e banorëve të një banese në qendër të Gjilanit.

Përkundër ankesave të qytetarëve të cilët kanë reaguar për uzurpimin e pronës publike, ashtu sic shkruan PDK në Gjilan, ndërtimi në këtë hapësirë u nis dhe përfundoi brenda tre dite.

Nga PDK theksojnë se pronari i këtij lokali është Murtez Hyseni, familjar i kryetarit të Komunës së Gjilanit, Alban Hyseni.

“Alban Hyseni e bënë axhën me lokal afarist, e lejon të uzurpoj hyrjen e banorëve të një banese në qendër të Gjilanit. Murtez Hyseni gjatë këtij vikendi u bë me lokal afarist në qendër të Gjilanit, qytetarët reaguan por inspeksioni ka heshtur me urdhër të kryetarit të komunës Alban Hyseni. Uzurpimi dhe ndërtimi u nis dhe u përfundua për tri ditë”, shkruan PDK.

Tutje, PDK këtë e cilëson si kulmin e të keqës, dhe se sipas tyre, korrupsioni është në kulm për shkak të lejimit të ndërtimeve pa leje kudo nëpër qytet.

“Korrupsioni është në kulm përshkak lejimit të ndërtimeve pa leje kudo nëpër qytetin e Gjilanit. Prokuroria Themelore duhet të veprojë menjëherë për këtë uzurpim të pronës publie por edhe për të gjitha ndërtimet pa leje”, shkruan tutje PDK. /Telegrafi/

The post PDK në Gjilan akuzon kryetarin e Gjilanit për lejim të uzurpimit të hyrjes së një banese – paralajmëron denoncim appeared first on Telegrafi.

Kryetari i Komunës së Gjilanit, Alban Hyseni së bashku me drejtorët kanë bërë homazhe për të nderuar figurën e heroit kombëtar, Agim Ramadani në 26 vjetorin e rënies së tij.

Hyseni bën të ditur së bënë homazhe para figurës së tij, duke e nderuar kështu sakrificën dhe guximin e jashtëzakonshëm që heroi Agim Ramadani dha për lirinë e Kosovës.

“Komandant Katana, me vizionin dhe vendosmërinë e tij të hekurt, ishte një udhëheqës që i dha gjithçka atdheut, duke u bërë një figurë që do të mbetet përherë në zemrat dhe mendjet e shqiptarëve”, shkruan Hyseni.

Kryetari Hyseni thekson se liria dhe pavarësia që qytetarët e gëzojnë sot janë rezultat i sakrificës së heroit kombëtar, Agim Ramadani.

Tutje, Hyseni vë në pah rëndësinë e emrit të heroit, i cili sipas tij, simbolizon luftën dhe flijimin për atdheun. /Telegrafi/

The post “Figurë e përjetshme në zemrat e shqiptarëve” – homazhe në 26 vjetorin e rënies së heroit Agim Ramadani appeared first on Telegrafi.

Presidenti i Shqipërisë, Bajram Begaj ka arritur në Gjilan ku u prit nga i pari i komunës, Alban Hyseni.

Ai pritet të takohet me shefat e grupeve parlamentare politike

P ashtu Begajt sot do t’i jepet një titull i veçantë, ai do të shpallet “Qytetar Nderi” nga Komuna e Gjilanit.

Kjo ngjarje do të zhvillohet me fillim nga ora 14:00 në objektin e Komunës së Gjilanit. /Telegrafi/

The post Arrin në Gjilan presidenti i Shqipërisë, Bajram Begaj – pritet të shpallet “Qytetar Nderi” appeared first on Telegrafi.

Komuna e Gjilanit së bashku me Ministrinë e Mjedisit, Planifikimit Hapësinor dhe Infrastrukturës kanë nënshkruar marrëveshje në vlerë prej 3 milionë euro.

Këtë e ka bërë të ditur kryetari i Komunës së Gjilanit, Alban Hyseni i cili tha se marrëveshja përfshinë ndërtimin e rrugëve kryesore.

Ai ka listuar edhe rrugët në të cilat do të realizohen projektet infrastrukturore.

“Rrethrrotullimi në udhëkryqin e qarkores dhe rrugës së Prishtinës, Lagjen Arbëria, Lagjen e Zabelit të Sahit Agës, Rruga “Haki Myderizi” (ish posta e vogël deri në dalje të rrugës qarkore), Rruga “Avdullah Presheva” (nga xhamia e medresës deri në dalje të rrugës qarkore), Rruga “Pajazit Ahmeti” (rikonstruimi i rrugës aktuale), “Vëllezërit Frashëri dhe Fatmir Ibishi” (në lagjen Dheu i Bardhë), Zona urbane po merr formë e frymë”, ka shkruar Hyseni. /Telegrafi/

The post Marrëveshje në vlerë prej 3 milionë euro mes Komunës së Gjilanit dhe Ministrisë së Infrastrukturës për rrugët kryesore të qytetit appeared first on Telegrafi.

Kryetari i Komunës së Gjilanit, Alban Hyseni, ka prit në takim zëvendës komandantin e përgjithshëm të KFOR-it, gjeneral brigade Cahit Irican, drejtorin e përgjithshëm të Policisë së Kosovës, Gazmend Hoxhën dhe zëvendëskomandantin e Komandës Regjionale – Lindje, nënkolonelin Evan Hessel.

Gjatë këtij takimi, është nënshkruar marrëveshja për pranim donacionin për dhomat mike për dhunën në familje dhe të mitur në mes zëvendëskomandantit të Komandës Regjionale – Lindje,
nënkolonelin Evan Hessel dhe drejtorit të Drejtorisë Rajonale të Policisë në Gjilan, kolonel Agron Rukiqi.

Kryetari Hyseni shprehu mirënjohjen për donacionin e KFOR-it në krijimin e dhomave të posaçme për fëmijët në Stacionin e Policisë në Gjilan, një kontribut i rëndësishëm për mbështetjen e tyre.

Pas takimit janë përuruar edhe dhomat mike, investim nga KFOR-i për akomodimin e përkohshëm të viktimave të dhunës në familje.

“Falënderoj KFOR-in dhe Policinë e Kosovës për bashkëpunimin dhe përkushtimin e tyre”, tha kryetari Hyseni.

Gjithashtu, në këtë takim është diskutuar lidhur me situatën e sigurisë dhe për rritjen e bashkëpunimit. /Telegrafi/

The post Përmirësimi i kushteve për viktimat e dhunës – KFOR-i dhuron dhoma të posaçme në Stacionin e Policisë në Gjilan appeared first on Telegrafi.

Sipërmarrësit e rinj gjilanas, të cilët kanë përfituar grante nga komuna për të dytën herë, janë vizituar nga kryetari i Komunës së Gjilanit Alban Hyseni, për të parë nga afër punën që bëjnë.

Kryetari, Alban Hyseni, tha se rinia jonë po na bën krenarë me përkushtimin e tyre në biznes, andaj, ne si komunë jemi pranë tyre duke iu ndihmuar që këtë rrugë t’ua bëjmë më të lehtë.

“Kënaqësi vizita te bizneset që kanë përfituar nga grantet e komunës, derisa, bashkë me ta diskutuam për punën e tyre dhe investimet që i kanë bërë. Komuna e Gjilanit do të vazhdojë të jetë pranë tyre, njëjtë siç edhe kemi premtuar”, tha Hyseni.

I pari i Gjilanit, theksoi se me fondin për ndërmarrësit e rinj për dy vjet kanë ndarë 248 mijë euro.

“Do të vazhdojmë të punojmë bashkë me bizneset dhe rininë tonë, që të rrisim kapacitetet e ndërmarrjeve, e të ndihmojmë në hapjen e vendeve të reja të punës dhe zhvillimin e mëtejshëm të tyre”, tha ai. /Telegrafi/

The post Hyseni: Rinia jonë gjilanase po na bën krenarë me përkushtimin e tyre në biznes appeared first on Telegrafi.

Kryetari i Komunës së Gjilanit Alban Hyseni, bashkë me nënkryetaren Leonora Morina Bunjakun dhe drejtorin për Kulturë, Rini dhe Sport Kushtrim Zeqirin, kanë priti në takim ambasadoren jo rezidente të Kanadasë për Kosovë, e cila është ambasadore rezidente në Kroaci, Jessica Blitt me bashkëpunëtorë.

I pari i Gjilanit e njoftoi për zhvillimet, projektet dhe sfidat nëpër të cilat po kalon Komuna e Gjilanit.

“Shpresojmë që ky bashkëpunim i mirë dhe mbështetja të vazhdoj të thellohet edhe më tej”, tha kryetari Hyseni.

I pari i Gjilanit e falënderoi ambasadoren për mbështetjen e vazhdueshme të Kanadasë për vendin tonë.

Nga ana tjetër ambasadorja Jessica Blitt, falënderoi kryetarin Hyseni për pritjen, duke premtuar përkushtimin e vazhdueshëm të vendit të saj për Komunën e Gjilanit dhe Kosovës.

Sipas ambasadores Blitt, marrëdhëniet miqësore janë të mira dhe të cilat duhet zgjeruar edhe më tej  bashkëpunimin dhe mundësinë e bashkëpunimit e ndonjërës nga komunat në Kanada me Komunën e Gjilanit. /Telegrafi/

The post Kryetari Hyseni pret ambasadoren e Kanadasë – diskutojnë për projektet dhe sfidat e Komunës së Gjilanit appeared first on Telegrafi.

Pas dorëheqjës së drejtoreshës për Buxhet dhe Financa Herolinda Murat Leka, është deklaruar edhe kryetari i Komunës së Gjilanit Alban Hyseni.

Ai theksoi se siç është bërë tashmë e ditur, ka pranuar të hënën dorëheqjen e drejtoreshës për Financa dhe Buxhet.

“Jam i vetëdijshëm për shqetësimet e ngritura dhe i kam ndjekur me vëmendje të gjitha akuzat e bëra publike. Meqenëse organet e rendit janë të njoftuara dhe po trajtojnë këtë çështje, presim që e vërteta të përcaktohet përmes proceseve ligjore dhe vendimeve përkatëse”, tha Hyseni.

I pari i komunës thekson se beson te faktet dhe te e vërteta të cilën e kanë parasysh të gjitha palët, pavarësisht se si e proklamojnë.

“Si kryetar i komunës, siguroj qytetarët se institucioni ka funksionuar dhe do të vazhdojë të funksionojë me transparencë dhe profesionalizëm. Askush nuk ka pasur qasje të paautorizuar në një zyrë kaq të ndjeshme, e aq më pak ndonjë aktivist i Lëvizjes”, tha ai.

Kryetari i Komunës së Gjilanit, thekson se përgjatë javëve të fundit, fokusi i tij kryesor ka qenë siguria e një menaxhimi të drejtë dhe të përgjegjshëm të buxhetit komunal, i cili tashmë është votuar dhe do të shërbejë për të përmbushur nevojat dhe prioritetet e qytetarëve tanë.

“Komuna e Gjilanit, mbetet e përkushtuar për të vepruar me integritet, duke garantuar llogaridhënie dhe qeverisje të mirë për të gjithë qytetarët”, tha Hyseni.

Ndryshe, ndaj kësaj situate ka reaguar edhe Lëvizja Vetëvendosje në Gjilan, duke thënë se asnjë akvitistë i Lëvizjes nuk ka kryer një vepër të tillë, ashtu siç kanë deklaruar nga partitë opozitare.

“Pretendimi për hapjen e zyrës do të vërtetohet së shpejti. Drejtoresha pretendon se zyra e saj është hapur pa leje, ndonëse ajo ishte e mbyllur. Ne nuk besojmë se ndonjë zyrtar i administratës komunale do të kryente një veprim të tillë. E vërteta do të dalë shpejt në pah”, thuhet në komunikatën e tyre.

Ndër të tjera, nga VV në Gjilan shtojnë se asnjë aktivistë nuk ka qenë i punësuar në këtë drejtori dhe sipas tyre, kjo është tendencë për të sulmuar Lëvizjen. /Telegrafi/

The post Dorëheqja e drejtoreshës së Financave, Hyseni: Askush nuk ka pasur qasje të paautorizuar në një zyrë kaq të ndjeshme appeared first on Telegrafi.

Komuna e Gjilanit ka bërë homazhe te kompleksi i varrezave të dëshmorëve për nder të Epopesë së UÇK-së.

Kryetari i Komunës së Gjilanit Alban Hyseni, bashkë me nënkryetaren Leonora Morina Bunjakun, drejtorë, këshilltarë e zyrtarë komunalë, pjesëtarë të FSK-së e Policisë, përfaqësues të organizatave të dala nga lufta e UÇK-së dhe familjarë të dëshmorëve, kanë bërë homazhe dhe kanë vendosur kurora lulesh.

Hyseni, tha se janë në vendin më të shenjtë të Komunës së Gjilanit, në kompleksin e varrezave të dëshmorëve, për homazhe në këtë ditë dhe datë të rëndësishme për vendin.

Sipas tij Epopeja e lavdishme e UÇK-së, është një ndër ngjarjet më të rëndësishme të historisë sonë kombëtare si përkujtim i sakrificës sublime të komandantit Adem Jashari, familjes Jashari dhe të gjithë dëshmorëve të UÇK-së të të gjitha luftërave çlirimtare anembanë trojeve tona.

Ai tha se ishte një ngjarje e pashembullt në gjithë botën dhe luftërat çlirimtare.

“Puna dhe angazhimi jonë i përditshëm të jetë konform misionit të angazhimit të dëshmorëve, në mënyrë që të nderojmë vetveten, duke respektuar vullnetin e dëshmorëve”, tha kryetari Hyseni. /Telegrafi/

The post Homazhe te varrezat e dëshmorëve, Hyseni: Epopeja e UÇK-së është një ndër ngjarjet më të rëndësishme të historisë sonë kombëtare appeared first on Telegrafi.

Kuvendi i Komunës së Gjilanit, ka mbajtur seancë solemne për nder të epopesë së UÇK-së, në ngjarjen ku mori pjesë edhe kryetari i Komunës, Alban Hyseni, përfaqësues tjerë institucional, familjarë të dëshmorëve e përfaqësues nga shoqatat e dala nga lufta.

Kryetari i Komunës, Alban Hyseni, theksoi se kjo epope e lavdishme nuk është vetëm histori, por dritë udhërrëfuese për brezat e sotëm dhe të ardhshëm, drejt vlerave të lirisë, unitetit e dinjitetit tonë kombëtar.

“I rrethuar nga forcat serbe, komandanti legjendar Adem Jashari bashkë me familjen e tij, nuk u tremb dhe nuk u dorëzua. Për tri ditë e dy netë, ata luftuan me guxim të pashoq, duke mbrojtur pragun e shtëpisë dhe nderin e atdheut me jetën e tyre. Tingujt e atyre të shtënave në Prekaz zgjuan ndërgjegjën e një kombi të tërë, ndërsa flaka e lirisë u ndez në zemrat e mijëra shqiptarëve”, theksoi Hyseni.

Kryesuesi i Kuvendit Komunal, Kushtrim Kadriu tha se epopeja e Ushtrisë Çlirimtare të Kosovës është njëra nga faqet më të lavidshme të historisë sonë, duke thënë se sakrifica e jasharëve është një thirrje e përhershme për të punuar me ndershmëri për të forcuar shtetin.

“Para 27 vitesh, jasharët nuk u dorëzuan përballë një makinerie kriminale, por qëndruan të pathyeshëm për lirinë që ne sot e gëzojmë. Ata nuk luftuan për vetën e tyre, por për Kosovën, për një të ardhme të lirë e të dinjitetshme për brezat që vijnë”, tha Kadriu.

Në këtë seancë ka adresuar mesazhin edhe shefi i grupit të këshilltarëve të PDK-së, Bujar Nevzati, ndërkaq me një kumtesë është paraqitur prof. Blerim Haziri, i cili është edhe asambleist i VV-së. /Telegrafi/

The post Kuvendi Komunal në Gjilan me seancë solemne kujton sakrificën e Jasharëve: Ata luftuan për Kosovën dhe brezat e ardhshëm appeared first on Telegrafi.

Kryetari i Komunës së Gjilanit, Alban Hyseni ka bërë të ditur se investime jo të pakta janë duke u zhvilluar në qytet.

Sipas tij këto projekte kanë për qëllim krijimin e kushteve më të mira për ofrimin e shërbimeve për qytetarët.

Hyseni tha se afër 10 milionë euro investime brenda një rrezeje prej rreth 500 metrash.

“Po realizohen projekte të rëndësishme që po e transformojnë qytetin”, tha ai.

I pari i komunës, tregoi se bëhet fjalë për Sallën e Sporteve  në vlerë prej 2.7 milionë euro, Stacionin e Autobusëve në vlerë rreth 1 milionë euro, Shkollën e Mjekësisë në vlerë prej 3.3 milionë euro dhe Qendrën për Qëndrim Ditor dhe Përkujdesje për të Moshuarit në vlerë prej 2.5 milionë eurove. /Telegrafi/

The post Hyseni: Po realizohen projekte të rëndësishme që po e transformojnë qytetin appeared first on Telegrafi.

Ka dështuar sërish seanca e thirrur nga kryetari i Komunës së Gjilanit, Alban Hyseni, e cila kishte si pikë të vetme të rendit të ditës miratimin e buxhetit për vitin 2025.

Në mungesë të kryesuesit të Kuvendit Komunal, Kushtrim Kadriu, seancën urgjente e hapi këshilltari më i moshuar i Kuvendit, Ismajl Kurteshi, por pas konstatimit të mungesës së kuorumit, ajo dështoi.

Kurteshi bëri apel për këshilltarët e komunës dhe kryetarin që ta votojnë buxhetin.

“Kanë mbetur vetëm edhe dy ditë për ta votuar buxhetin, i cili është shumë i nevojshëm për qytetarët e Gjilanit. Buxheti ka mundësi të votohet vetëm nëse të dyja palët ngrihen në nivelin e përgjegjësisë që u takon, sepse nuk ka të pafajshëm këtu dhe ekziston mundësia që ai të miratohet. Kërkoj nga kryetari i komunës ta kuptojë se ka të drejtë ta propozojë buxhetin, por duhet të harmonizohet me opozitën dhe kërkoj nga opozita që të vijë dhe ta votojë atë,” tha Kurteshi.

Ndërsa, pas kësaj seance, kryetari Hyseni mbajti një konferencë për media ku tha se ftesën për seancën e jashtëzakonshme e kanë dërguar që dje, por sipas tij, kryesuesi i Kuvendit nuk e ka dërguar thirrjen te asambleja.

“Në shenjë mirësie po ju paralajmëroj që ngadalë këto veprime të opozitës së bashkuar: LDK-PDK, Lëvizja VATRA dhe Lëvizja Srpska për të bojkotuar Kuvendin dhe bllokimin e buxhetit janë një lloj rrëshqitjeje drejt elementeve të së drejtës penale të keqpërdorimit të detyrës. Në këtë rast, kryesuesi i Kuvendit është duke dhënë elemente që përbëjnë veprën penale të keqpërdorimit të detyrës,” tha Hyseni.

Ai gjithashtu theksoi se kanë marrë ftesën për seancën e organizuar nga opozita, por sipas tij, e njëjta nuk ka material për rendin e punës.

Kryetari Hyseni potencoi se janë të interesuar që Komuna e Gjilanit të mos mbetet pa buxhet, duke bërë të ditur se po bëjnë përpjekje të vazhdueshme për të tejkaluar situatën.

“Ne edhe sot kemi bërë thirrje për seancë urgjente nga ora 16:00, sepse kjo mund të kontestohet nga kryesuesi i Kuvendit dhe tash e tutje do të bëjmë vetëm thirrje për opozitën dhe i presim që të vijnë,” përfundoi ai. /Telegrafi/

The post Dështon seanca e Kuvendit e thirrur nga kryetari Hyseni – Buxheti i Gjilanit ende në pritje të miratimit appeared first on Telegrafi.

Kryesuesi i Kuvendit Komunal, Kushtrim Kadriu, ka mbledhur sot në një takim konsultativ kryetarët e partive politike për të diskutuar mbi projekt-buxhetin e vitit 2025.

Të gjitha subjektet politike iu përgjigjën pozitivisht ftesës, duke synuar gjetjen e një zgjidhjeje për tejkalimin e situatës së krijuar.

Pas takimit, kryetari i Komunës së Gjilanit, Alban Hyseni, mbajti një konferencë për media ku theksoi se gjatë diskutimeve u paraqit një listë kërkesash nga subjektet politike.

“Një pjesë e këtyre kërkesave janë të arsyeshme dhe mund të realizohen shpejt dhe lehtë,” deklaroi Hyseni.

Ai e cilësoi takimin si një hap pozitiv dhe në të mirë të qytetarëve të Gjilanit, duke nënvizuar rëndësinë e një qasjeje bashkëpunuese mes palëve politike.

“Ky përafrim i qëndrimeve dhe zbutje e partive opozitare është një sinjal i mirë për qytetarët,” potencoi ai.

Hyseni njoftoi gjithashtu se do të mbajë një takim me kryesinë e Vetëvendosjes në Gjilan për të diskutuar mbi kërkesat e adresuara.

“Pas konsultimeve të brendshme, nesër do t’i njoftojmë palët për vendimet tona dhe do të vazhdojmë me hapat e radhës,” shtoi ai.

Nga ana tjetër, kryetari i LDK-së në Gjilan, Lutfi Haziri, e cilësoi takimin si një hap të rëndësishëm drejt zgjidhjes së situatës.

“Besoj që konsultimet e brendshme mes partive politike i japin oksigjen politik këtij procesi,” deklaroi Haziri.

Edhe kryetari i PDK-së në Gjilan, Riad Rashiti, theksoi se subjekti i tij ka paraqitur kërkesat dhe qëndrimet e veta, duke shprehur vullnetin për tejkalimin e ngërçit politik.

“Ky takim ka shënuar një hap përpara. Ditët në vijim do të ketë takime shtesë, pasi nuk dëshirojmë që Gjilani të mbetet komuna e vetme në Kosovë pa miratim të buxhetit,” tha Rashiti. Ai shtoi se vonesat e kryetarit Hyseni për t’u konsultuar me partinë e tij nuk janë të arsyeshme dhe procesi duhet të ecë më shpejt. /Telegrafi/

The post Projekt-buxheti i vitit 2025 – Kryetarët e partive politike në Gjilan drejt një zgjidhjeje appeared first on Telegrafi.