TIRANË, 24 qershor /ATSH/ Zëvendësministri i Mbrojtjes, Enkelejd Joti prezantoi sot në Komisionin për Sigurinë Kombëtare projektligjin “Për disa shtesa dhe ndryshime në ligjin “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë””.
Në fjalën e tij, Joti u shpreh se, “ky projektligj ka për qëllim përmirësimin e kuadrit ligjor në fuqi për disa aspekte dhe problematika të evidentuara në praktikë gjatë zbatimit të tij të lidhura me menaxhimin e personelit ushtarak me grada të ulëta ushtarake, që kanë të bëjnë me emërime dhe komandime në detyrë, pasi në të gjitha dokumentet e tjera strategjike mënyra e përdorimit të personelit me grada të ulëta janë fushë e përgjegjësisë operacionale e drejtuesve ushtarakë”.
Joti shtoi se ky pr.ligj synon gjithashtu “zbatimin në praktikë të ligjit mbi mënyrën e hartimit, procedurën e miratimit, rishikimit dhe elementet e nevojshëm për planin e vendosjes dhe përhapjes të Forcave të Armatosura pasi në ligjin aktual mungon një përkufizim i qartë ligjor apo rregulla të mirëpërcaktuara”.
Joti nënvizoi se, “nëpërmjet këtë pr.ligji do të rregullohet procedura e emërimit, lirimit, komandimit ose shkarkimi nga detyra e oficerëve aktivë ne Ministrinë e Mbrojtjes dhe strukturave të varësisë së drejtpërdrejt të Ministrisë së Mbrojtjes dhe oficerët me grada nën/kolonel kapiten i rangut të dytë dhe kolonel kapiten i rangut të parë në Forcat e Armatosura, ku parashikohet të jetë kompetencë e ministrit të Mbrojtjes”.
Gjithashtu, shtoi Joti, parashikohet “e drejta për të emëruar, komanduar, liruar ose shkarkuar nga detyra oficerët aktivë të Forcat të Armatosura me gradën nëntoger, nënlejtnant, toger/lejtnant, kapiten/lejtnant dhe major/kapiten i rangut të tretë me propozim të komandave të forcave, strukturave mbështetëse dhe strukturave të varësisë së drejtpërdrejtë të Shtabit të Përgjithshëm, me përjashtim të personelit të oficerëve të strukturave të varësisë së drejtpërdrejtë të ministrit të Mbrojtjes”.
Zv.ministri nënvizoi se, “këto ndryshime do të përbëjnë një harmonizim sa më të mirë të përgjegjësive të autoriteteve në fushën e menaxhimit të personelit ushtarak dhe civil që shërbejnë në Forcat e Armatosura”.
“Saktësimi i kuadrit ligjor mbi të dhënat minimale që duhet të sigurojë në mënyrën e hartimit të planit të vendosjes dhe përhapjes të Forcave të Armatosura duhet përcaktuar për herë të parë një përkufizim për mënyrën e hartimit të rishikimit të planit të vendosjes. Lidhur me përkufizimin e planit të vendosjes dhe përhapjes do të shtohet një kre ku përcaktohen disa elementë kryesorë të lidhur me autoritetin hartues, i cili është Shtabi i Përgjithshëm i Forcave të Armatosura”, tha Joti.
Joti shtoi se, do të ndiqen edhe procedurat për hartimin dhe rishikimin e planit të vendosjes së përhapjes, si dhe modeli i tij dhe parashikohen të miratohen me urdhër të ministrit të Mbrojtjes, me propozim të Shefit të Shtabit të Përgjithshëm të FA.
Ai theksoi gjithashtu se, “në pr.ligjin e ri janë parashikuar edhe kriteret e rishikimit të këtij planet ku përfshihet dhe rishikimi periodik dhe rast pas rasti”.
Joti nënvizoi se, “pr.ligji parashikon edhe mënyrën e menaxhimit të pronave në menaxhim të Ministrisë së Mbrojtjes që janë brenda apo edhe ato që janë prona jashtë planit të përhapjes, por që mund të kërkohet apo lind nevoja në të ardhmen për t’u bërë pjesë e këtij plani të përhapjes, por që mund të kërkohet apo lind nevoja në të ardhmen për t’u bërë pjesë e këtij plani të përhapjes”.
Alibeaj: Ky projektligj ka lidhje me pronat e ushtrisë
Deputeti i opozitës, Enkelejd Alibeaj u shpreh se, “ky është një nga ligjet më të rëndësishme që rregullon raportet e pushtetit ekzekutiv me një trupë e cila do të duhet të jetë politikisht neutrale, Forcat e Armatosura”.
Alibeaj pyeti “nëse është pyetur dhe është marrë mendim nga Presidenti i Republikës lidhur me ndryshimet në këtë ligj dhe nëse po, a ka dhënë një opinion?”.
“Shoh që ka një ndërfutje përtej caqeve dhe sipas traditës deri tani të pushtetit ekzekutiv në piramidën e Forcave të Armatosura lidhur me emërimet, lirimet, shkarkimet e me radhë. A është i vërtetë ky konstatim? Dhe nëse po, pse ka ardhur kjo nevojë që pushteti ekzekutiv të shkojë deri edhe tek emërimi, lirimi apo i niveleve të ulëta të piramidës së FA?”, tha Alibeaj.
Deputeti opozitar shtoi se, “më duket se ky ligj nuk ka lidhje fare me Forcat e Armatosura, ato janë vendosur vetëm për makijazh, sepse ka lidhje me pronat, dhe pronat e ushtrisë kanë qenë gjithmonë një nga problemet më të mëdha. Shpesh kanë përfunduar edhe në dyert e drejtësisë. Shoh disa ndryshime të cilat nuk kanë ndonjë sqarim as në relacion, as në pr.ligj. Çfarë kuptimi ka për ju që një pronë e FA që ndodhet në planin e përhapjes pasi del nga plani i përhapjes të ngelet përsëri në administrim të Ministrisë së Mbrojtjes? A keni marrë parasysh ju si qeveri që këto prona mund të kenë edhe pretendentë të tjerë, ish-pronarët? A keni imagjinuar ndonjëherë që këto prona do të duhet të shkonin në fondin e kthimit dhe kompensimit të pronave, siç është dhe legjislacioni aktual në fakt?”.
/gj.m//a.f//r.e/
The post Joti: Rregullim i procedurave të emërimit të oficerëve aktivë në MM dhe FA appeared first on Agjencia Telegrafike Shqiptare.
Login
