Një status i bërë nga deputeti i Partisë Socialiste, Erion Braçe në “Facebook”, i ka dhënë material Prokurorisë së Posaçme për ta bërë pjesë të dosjes hetimore ndaj ish-drejtorit të Autoritetit Rrugor Shqiptar, Ervis Berberi, dhe grupit tjetër, për të cilën prokuroria  kërkon t’i marrë nën akuzë.

Referuar një shkrese zyrtare, që “Ora News” e administron, thuhet se në videon e publikuar nga Erion Braçe prej 59 sekondash shfaq një tabelë me investitor “Autoritetin Rrugor Shqiptar”, me objekt: “Mirëmbajtje me performancë e segmenteve rrugore Fier Shegan – Divjakë, K/Rr. Nacionale – Grabian, Strum – Qafë Marinëz, 56.5 KM”, me vlerë 65,337,825 lekë pa TVSH, me kontraktor BOE “BE-IS” sh.p.k dhe “Ergi” sh.p.k, me mbikëqyrës punimesh “Net Group” sh.p.k”.

Gjatë videos, thotë SPAK-u, shfaqet vetëm tabela e mësipërme, si dhe dëgjohet një zë, në dukje si ai i deputetit të Kuvendit të Republikës së Shqipërisë, shtetasit Erion Braçe, i cili shoqëron videon dhe është transkriptuar si më poshtë:

“Se më në fund gjeta dhe tabelën, që e kanë vënë diku këtu në Krutje të Poshtme, sa kalon kryqëzimin e Pushimit të Shoferit. Ja ku është tabela, kontrata e këtij është 65,337,825 lekë të reja pa tvsh, dhe kompanitë janë BOE “BEIS” sh.p.k “ERGI” sh.p.k, dhe këtij i mbaron kontrata në gusht të 2024. Mbikëqyrësi i punimeve, se më intereson shumë kjo, është “Net Group” sh.p.k. Nuk e di sa leke merr ky Net grupi, por po te m’i jepnin mua mund ta bëj dhe më mirë punën. Adresa e kontraktorit është në lagjen numër 1 të Kukësit, prandaj është rruga në këtë lloj derexheje, dhe prandaj kjo kontrata është në tilla nivele zbatimi”.

The post “Rruga me punime skandaloze”/ Erion Braçe ‘shpërthen’ ndaj firmës së Ervis Berberit appeared first on Sot News | Lajme.

Pastërtia e bregdetit është kthyer në një nga sfidat kryesore përgjatë këtij sezoni turistik ndërsa ka hyrë në fuqi urdhri për pezullimin e punimeve. Ministrja e Turizmit dhe Mjedisit Mirela Kumbaro gjatë inspektimit nnë Kavajë tha se do të ketë zero tolerancë për subjektet që ndotin dhe për zaptimin e plazheve publike.

Në gjithë vijën bregdetare të Kavajës, janë 73 plazhe publike të cilat, ministrja Kumbaro kërkoi të pajisen me sinjalistikën e duhur nga bashkia.

“Kemi plazhe që prej vitit 2021 janë me kontrata 5-vjeçare menaxhimi, të cilat përfundojnë këtë vit. Nga viti tjetër do të kemi një situatë të përmirësuar të plazheve edhe më në favor të hapësirave publike. Do të duhet të jemi gjithë kohën në komunikim për të sinjalizuar njëri-tjetrin qoftë kur kemi raste të zaptimit të plazheve, qoftë të ndotjes së hapësirave publike. Përtej plazheve, është e rëndësishme të pastrohet edhe pjesa e gjelbërimit dhe pyllit, ku shpesh bëhen vendepozitime për mbetjet”, përfundoi ministrja Kumbaro.

The post Çfarë po ndodh në bregdet? Kumbaro: Ndalohen punimet, zero tolerancë për zaptuesit appeared first on Sot News | Lajme.

TIRANË, 15 qershor/ATSH/ Në lotin 7 të aksit Elbasan-Qafë Thanë, pjesë e Korridorit VIII vijon me ritme të larta puna për ndërtimin e tij.

Kryeministri Edi Rama ndau në rrjetet sociale momente nga puna në kantierin e këtij aksi të rëndësishëm rrugor.

“Korridori VIII – Loti 7 i aksit Elbasan – Qafë Thanë ku po punohet për ndërtimin e veprave të artit, bokse dhe nënkalime”, shkruan Rama.

Segmenti i ri i rrugës Elbasan-Qafë Thanë shtrihet përgjatë shtratit të lumit Shkumbin, me një gjerësi 22 metra, me 4 korsi.

Ndërtimi i këtij aksi do të lehtësojë qarkullimin e automjeteve, duke shkurtuar kohën e udhëtimit si dhe duke rritur njëkohësisht parametrat e sigurisë rrugore.

Projekti shtrihet në një gjurmë tërësisht të re buzë lumit Shkumbin, duke i dhënë zgjidhje edhe një problematike që lidhet me mungesën e ndërhyrjeve ndër vite të sistemimit të shtratit të lumit Shkumbin dhe duke ndikuar drejtpërsëdrejti edhe në përmirësimin e kushteve të jetesës së zonave përreth, të cilat do të lidhen me qendrat administrative dhe qendrat administrative kufitare, por edhe do të nxjerrë në pah fushëpamjen panoramike të zonës./k.s/ /a.g/

1 nga 10

The post Loti 7 i aksit Elbasan-Qafë Thanë, Rama: Po punohet për ndërtimin e veprave të artit appeared first on Agjencia Telegrafike Shqiptare.

TIRANË, 29 maj/ATSH/ Punimet për riparimin dhe zgjerimin e autostradës Tiranë-Durrës po vijojnë me ritme të shpejta.

Inxhinierja e Sektorit të Menaxhimit të Projekteve, Adja Sefa në një intervistë në medie bëri të ditur sot se aktualisht janë realizuar rreth 50% e punimeve fizike.

“Është punuar me ndërtimin e dy korsive të reja, në të dy anët e rrugës, ku konkretisht në anën e e majtë, drejtimi Tiranë-Durrës, është punuar edhe me realizimin e shtresave asfaltike. Për këtë qëllim trafiku i mjeteve duke ardhur nga qyteti i Durrësit drejt Tiranë, është devijuar në dy korsitë e reja të ndërtuara me qëllim vijimin e punimeve në korsitë ekzistuese”, theksoi Sefa.

Punimet në këtë arterie të rëndësishme për 6 km e para, nga Qafë Kashari drejt ish-sheshit Shqiponja dhe anasjelltas parashikohet të përfundojnë brenda këtij viti.

“Duke qenë se punimet kanë ecur me ritme të kënaqshme dhe pse afati kontraktual është shtatori 2026, pritet që punimet të përfundojnë brenda këtij viti, konkretisht në dhjetor”, theksoi Sefa.

Shumë shpejt pritet të nisë puna edhe për rikualifikimin e mbikalimit në Qafë Kashar, në mënyrë që të përballojë fluksin e automjeteve në 8 korsitë e autostradës.

Pas përfundimit shpejtësia e lejuar në autostradën e tipit “A” do të jetë deri në 130 km në orë. /j.p/

The post Riparimi i autostradës Tiranë-Qafë Kashar përfundon brenda vitit appeared first on Agjencia Telegrafike Shqiptare.

TIRANË, 28 maj /ATSH/ Modernizimi i infrastrukturës ekzistuese po vijon në një tjetër aks të rëndësishëm, superstradën Tiranë – Durrës, rreth 33 km, e cila do të kthehet në një autostradë të kategorisë A, duke shtuar korsitë e lëvizjes për një lehtësim të ndjeshëm të trafikut.

Kryeministri Edi Rama ndau mëngjesin e të mërkurës pamje nga punimet që po vijojnë me ritme të larta. “Nga kantieri i punës për zgjerimin e superstradës Tiranë-Durrës. Faza II, ku punimet kanë ecur me ritme shumë të mira e tashmë realizimi fizik ka arritur në masën 50%”, shkruan Rama.

Aktualisht është duke u punuar intensivisht për ndërtimin e shtresave asfaltike në krahun e majtë të aksit, në drejtimin Tiranë-Durrës.

Për të garantuar vijimin normal të punimeve, është realizuar devijimi i qarkullimit të mjeteve nëpërmjet zgjerimit të ri pranë mbikalimit të Rinasit.

Devijimi është i pajisur me sinjalistikë të përkohshme, të vendosur në përputhje me standardet e sigurisë rrugore, me qëllim orientimin dhe mbrojtjen e përdoruesve të rrugës.

Në vijim, punimet do të përqendrohen në krahun e djathtë të këtij segmenti, ku do të nisë ndërtimi i shtresave asfaltike, si pjesë e zbatimit të plotë të projektit të zgjerimit të kësaj rruge me rëndësi strategjike për lidhjen ndërmjet dy qyteteve kryesore të vendit.

Punimet për zgjerimin e trupit të rrugës me nga dy korsi në secilën anë, ku njëra korsi do të shërbejë për emergjencat, duke e bërë superstradën, në përfundim të punimeve, me nga katër korsi në secilin drejtim, nisën vitin e shkuar.

Superstrada Tiranë – Durrës (e njohur në vend që prej viteve ’90 si “Autostrada”) fillon nga Mbikalimi i Kamzës deri tek Ura e Dajlanit. Është një nga arteriet kryesore dhe më të rëndësishme të vendit, e cila lidh dy qendrat më të mëdha administrative, industriale, kulturore dhe turistike të Shqipërisë, si dhe korridoret Veri-Jug dhe Lindje-Perëndim.

Punimet në superstradën Tiranë-Durrës

1 nga 5

/r.e/

The post Zgjerimi i superstradës Tiranë-Durrës, Rama: Faza II e përfunduar 50% appeared first on Agjencia Telegrafike Shqiptare.

Në 30-vjetorin e marrëveshjes që i dha fund konfliktit në Bosnjë dhe Hercegovinë, Presidenti i Republikës, Bajram Begaj, po merr pjesë në Sesionin Pranveror të Asamblesë Parlamentare të NATO-s, që këtë vit po mbahet në Dayton të Shteteve të Bashkuara .

Gjatë fjalës në forumin me temë “Renewing focus on peace and prosperity in the Balkans”, Presidenti Begaj rikonfirmoi mbështetjen e Shqipërisë ndaj Marrëveshjes së Dayton-it dhe integrimin Euroatlantik të Bosnjë dhe Hercegovinës.

Duke nxjerrë në pah përpjekjet ndërkombëtare për shuarjen e konflikteve në rajoni tonë, Presidenti i Republikës theksoi se “Marrëveshja e Paqes e Dayton-it i dha fund një lufte brutale në Ballkan, duke mbetur një gur themeli i paqes, stabilitetit dhe shpresës’.

Kreu i Shtetit vlerësoi partneritetin strategjik me Shtetet e Bashkuara të Amerikës, duke u shprehur se “Shqipëria riafirmon angazhimin e saj të fortë ndaj vlerave thelbësore të demokracisë, duke promovuar paqen, sigurinë, stabilitetin, zhvillimin e qëndrueshëm ekonomik dhe marrëdhëniet e fqinjësisë së mirë. Ne shqiptarët e nderojmë dhe e vlerësojmë thellësisht miqësinë tonë me Shtetet e Bashkuara dhe jemi të përkushtuar ta forcojmë atë për brezat që do të vijnë”.

Presidenti Begaj nënvizoi rëndësinë e ndërhyrjes në kohë në Kosovë, që ndihmoi në parandalimin e një katastrofe: “Shtetet e Bashkuara të Amerikës luajtën një rol historik në sigurimin e paqes tre dekada më parë. Pa udhëheqjen amerikane, Marrëveshja e Dayton-it nuk do të kishte qenë e mundur. Pa udhëheqjen amerikane, nuk do të kishim një Kosovë të pavarur. Për më tepër, rajoni ynë nuk do të kishte arritur stabilitetin e tij aktual pa angazhimin e qëndrueshëm të SHBA-së”.

Presidenti Republikës vlerësoi angazhimin e vazhdueshëm të SHBA-së, NATO-s dhe BE-së në rajonin e Ballkanit, ndërsa shprehu përkushtimin si anëtare e Aleancës Euroatlantike për të forcuar solidaritetin, unitetin dhe kohezionin e NATO-s.

Përballë sfidave të reja më të cilat përballet Ballkani pas luftës në Ukrainë, Presidenti Begaj bëri thirrje për bashkëpunim mes aleatëve për transformimin e tyre në mundësi, shpresë dhe unitet.

“Le të riafirmojmë angazhimin tonë ndaj Ballkanit Perëndimor, një rajon që nuk mbetet në hijen e së kaluarës së tij, por qëndron në dritën e të ardhmes së vet. 30 vjet më parë paqja u bë e mundur këtu. Tani është detyra jonë të sigurohemi që ajo të bëhet e përhershme”, deklaroi Begaj.

The post “Paqja në Ballkan mbetet prioritet”/ Presidenti Begaj në Asamblenë Parlamentare të NATO-s: 30 vjet pas marrëveshjes… appeared first on Sot News | Lajme.

Me 93% të punimeve të kryera, muzeu pritet të hapet më në fund për vizitorët brenda pak muajsh. Zhurma e çekanëve dhe pirgjet me zhavorr që rrethojnë godinën e Muzeut Arkeologjik të Durrësit janë dëshmi e përpjekjeve të fundit për përfundimin e një prej projekteve më ambicioze të restaurimit në vend.

Dëmet e shkaktuara nga tërmeti ishin të mëdha. Muzeu u bë pjesë e programit të Bashkimit europian EU4Culture, duke përfituar një financim prej 3.5 milionë eurosh, për resturimin e tij. Punimet e rikonstruksionit nisën në nëntor të vitit 2022, nën drejtimin e UNOPS (Zyra e Kombeve të Bashkuara për Shërbimet e Projekteve) por jo gjithmonë paratë zgjidhin gjithçka.

Regjistrimi rezultoi një sagë e vërtetë dhe për një godinë në pronësi të vetë shtetit shqiptar aq sa në tabelën e punimeve për datën e përfundimit nuk kishte më një afat.

Edhe UNOPS pranon se “procesi i regjistrimit të pronës zgjati” dhe se “përfundimi i tij i suksesshëm zgjidhi të gjitha çështjet e mungesës së dokumentacionit për muzeun, që ishte një hap i domosdoshëm për të ardhmen e tij”.

Ndërhyrjet përfshijnë jo vetëm restaurimin e godinës por edhe ndërtimin e një hapësire të re magazinimi për ruajtjen e artefakteve, instalimin e një tende për skulpturat në oborr, pajisjen e ambienteve të brendshme me ekspozitorë modernë, zgjerimin e ekspozitës në dy kate të reja.

Sipas UNOPS-it në katin e sipërm do ketë hapësira për qëllime ekonomike e tregtare, që synojnë gjenerimin e të ardhurave për mirëmbajtjen e muzeut. Pas hapjes, muzeu do të ofrojë një përvojë të re për turistët, duke ekspozuar mbi 3000 artefakte që dëshmojnë zhvillimin e historik e kulturor të Durrësit nga periudha e Antikitetit deri në Mesjetë.

“Një problem i rëndësishëm ka qenë nevoja për të regjistruar pronën ku ndodhet objekti i muzeut në emër të Qeverisë së Shqipërisë, në mënyrë që të mund të merrej leja e ndërtimit. Konkretisht, që prej përfundimit të ndërtimit të objektit të muzeut në fillim të viteve 2000, prona nuk ishte regjistruar kurrë në emër të ministrisë përkatëse të Qeverisë së Shqipërisë”.

The post Zvarritet restaurimi/ Muzeu Arkeologjik në Durrës pa hipotekë, punimet duhet të mbaronin në vitin 2023 appeared first on Sot News | Lajme.

Komuna e Gjilanit tash e disa muaj ka nisur realizimin e një sërë projekteve infrastrukturore në disa zona të qytetit, me theks të veçantë në përmirësimin e rrugëve, zgjerimin e infrastrukturës dhe përfundimin e projekteve të kanalizimit dhe ujësjellësit.

Një nga projektet më të rëndësishme është ai për zgjerimin e rrugës “Hamdi Kurteshi” (e njohur si rruga e Malishevës).

Ndërsa, disa nga qytetarët kanë kërkuar që kjo rrugë të mos mbyllet për qarkullim, pasi sipas tyre, mbyllja po rëndon qarkullimin në pjesë të tjera të qytetit.

Punimet në këtë segment kanë filluar kohë më parë dhe ndonëse kontrata ka një afat prej 37 muajsh, siç deklaroi për Telegrafin drejtori i Drejtorisë së Shërbimeve Publike, Kushtrim Ibrahimi, ato pritet të përfundojnë këtë vit.

“Afati i kontratës është 37 muaj, mirëpo sipas planit dinamik me operatorin ekonomik, pritet të përfundohet këtë vit”, ka bërë të ditur  Ibrahimi.

Në zonën përreth qendrave tregtare po realizohet një tjetër projekt, ku shumë qytetarë kanë adresuar ankesat e tyre për shkak se punimet po e vështirësojnë qarkullimin e veturave dhe mbi të gjitha edhe po i dëmtojnë ato.

Qytetarët kanë kërkuar që të shtohet intesiteti i punës në mënyrë që punimet të përfundojnë sa më parë.

Ndërsa, Ibrahimi shtoi se në atë pjesë po punohet në kanalizimin atmosferik për ujërat e shiut.

 “Gypi kryesor është përfunduar, vetëm edhe ujëmbledhësit kanë mbetur dhe po shpresojmë të asfaltohet këtë muaj”, tha Ibrahimi.

Ndërkaq, në lagjen Dardania, konkretisht te shkolla fillore “Selami Hallaqi”, Ibrahimi thotë se është duke u zhvilluar një projekt i “Hidromoravës”, që përfshinë ndërrimin e gypit kryesor dhe kyçjen e banorëve.

“Nuk kemi informatë të saktë se kur përfundon, edhe pse është duke u punuar në atë pjesë”, shtoi ai. /Telegrafi/

The post Qytetarët ankohen për vonesat në rrugë kyçe – Komuna e Gjilanit jep sqarime appeared first on Telegrafi.

TIRANË, 17 maj/ATSH/ Në qytetin e Shkodrës po vijon puna për rikualifikimin e zonës në sheshin e xhamisë Parrucë.

Kryetari i bashkisë së Shkodrës, Benet Beci ndau në rrjetet sociale momente nga kryerja e punimeve.

“Pranë trotuarit në sheshin e xhamisë Parrucë, po vijon puna për rikualifikimin e zonës. Ky shesh, punimet për të cilin kanë nisur prej disa ditësh, do të jetë në të njëjtën linjë me investimin e realizuar në zonën e Zdrales”, tha Beci.

Në Shkodër vijon puna për transformimin e infrastrukturës në qytet dhe zonat rurale.

1 nga 4

/k.s/r.e/

The post Shkodër, rikualifikohet zona në sheshin e xhamisë Parrucë appeared first on Agjencia Telegrafike Shqiptare.

TIRANË, 9 maj/ATSH/ Nxënësit e shkollave të vendit sot në Ditën e Europës kanë shprehur përmes ngjyrave se çfarë është Europa për ta.

Ministrja e Arsimit dhe Sportit, Ogerta Manastirliu ndau në rrjetet sociale fotografi nga punimet e nxënësve.

“Dita e Europës vjen përmes pikturave të realizuara prej nxënësve tanë me plot ngjyra dhe imagjinatë. Disa shohin ura që bashkojnë njerëzit, e të tjerë kanë vizatuar flamurin tonë kombëtar krah flamurit të BE-së që valëviten bashkë”, shkruan Manastirliu.

Ministrja Manastirliu u shpreh se “në 80-vjetorin e Ditës së Fitores në Europë, fëmijët na treguan se Europa për ta është një vend ku njerëzit janë bashkë, ku respektohen dallimet, ku ka paqe dhe miqësi”.

9 maji, shënon përvjetorin e deklaratës historike të Shumanit. Gjatë një fjalimi në Paris në vitin 1950, Robert Shuman, ministri i atëhershëm i Punëve të Jashtme i Francës, prezantoi idenë e tij për një formë të re të bashkëpunimit politik në Europë, e cila luftërat mes popujve të Europës do t’i bënte të paimagjinueshme.

Më 9 maj 1950 u bë lëvizja e parë drejt krijimit të asaj, që sot njihet me emrin Bashkimi Europian.

1 nga 9

/k.s/j.p/

The post Dita e Europës përmes pikturave të realizuara prej nxënësve appeared first on Agjencia Telegrafike Shqiptare.

Punimet në parkun e ri të Vushtrrisë janë afër përfundimit.

Tashmë në këtë park ka filluar mbjellja e luleve dhe drunjve dekorativë, shkruan Telegrafi.

Kryetari i Komunës së Vushtrrisë, Ferit Idrizi, ka thënë se kjo hapësirë do të kthehet në një vend relaksues për qytetarët.

“Pas fazës së parë të punimeve intensive në zonën afër oborrit të xhamisë dhe ish-parkingut të taksistëve, tashmë ka nisur mbjellja e luleve dhe drunjve dekorativë, që do ta kthejnë këtë hapësirë në një vend relaksues për të gjithë qytetarët”, ka thënë Idrizi.

Idrizi është shprehur se ky park po pasurohet çdo ditë me elemente që do ta bëjnë një vend të dashur për të kaluar kohë cilësore. /Telegrafi/

The post Punimet në parkun e ri të Vushtrrisë afër përfundimit, nis mbjellja e luleve dhe drunjve dekorativë appeared first on Telegrafi.

Kjo vizitë e Kryeministri spanjoll Pedro Sánchez shënon udhëtimin e tij të tretë në Kinë brenda tre viteve. Gjatë vizitës, Presidenti Xi Jinping dhe Kryeministri Li Qiang do të zhvillojë bisedime me të, sipas zëdhënësit të Ministrisë së Jashtme Lin Jian. Vizita e bën Sanches kreun e parë të qeverive evropiane që takohet me Presidentin Xi që kur qeveria amerikane njoftoi tarifat e reja javën e kaluar, raportoi Bloomberg të mërkurën. Ky vit shënon 20-vjetorin e partneritetit strategjik gjithëpërfshirës Kinë-Spanjë.

Spanja është një partner i rëndësishëm bashkëpunues për Kinën brenda BE-së. Të dy palët gjithmonë i janë përmbajtur parimeve të respektit dhe përfitimit të ndërsjellë. Kina shpreson ta shfrytëzojë këtë vizitë si një mundësi për të zgjeruar bashkëpunimin e hapur, për t’iu përgjigjur së bashku sfidave globale dhe për të arritur përparim të ri për partneritetin strategjik gjithëpërfshirës Kinë-Spanjë nga një pikënisje e re, sipas Lin. Raundi i fundit i masave tarifore të SHBA-së ndikon si në Kinë ashtu edhe në Evropë, deri në një farë mase, duke i afruar të dyja palët në çështjet që lidhen me tregtinë, “Është e domosdoshme që Kina dhe BE-ja të përballen së bashku me këtë sfidë, pasi politikat unilaterale të SHBA-së do të dëmtonin rëndë globalizimin dhe sistemin tregtar shumëpalësh që mbështet bashkëpunimin Kinë-BE”, thonë burimet diplomatike.

Një ditë përpara vizitës së Sánchez, ministri spanjoll i bujqësisë Luis Planas u citua të thoshte në një raport nga Reuters të mërkurën se Spanja do të ndjekë lidhje më të ngushta tregtare me Kinën në interes të qytetarëve të saj dhe të BE-së, duke hedhur poshtë një paralajmërim të SHBA-së se afrimi me vendin aziatik do të ishte si “të të presësh fytin”.Ajo që presidenti i SHBA-së po bën me tregtinë globale duhet ta shtyjë Evropën të rishikojë gatishmërinë e saj për të gjetur partnerë të tjerë të rinj dhe për të hapur tregje të reja, tha Sanchez në një bisedë me gazetarët pas mbërritjes në Vietnam për një vizitë tre-ditore, sipas Bloomberg.

Situata me SHBA-në do të thotë që të gjithë duhet të përshtaten, dhe kjo përfshin ndryshimin e qëndrimit të Evropës ndaj Kinës, por edhe Kinës ndaj Evropës, u citua të thoshte Sanchez në raportin e medias. “Strategjia e administratës amerikane mbështetet kryesisht në presionin maksimal dhe rritjen e tarifave për të detyruar vendet e tjera të hyjnë në negociata dypalëshe me SHBA-në”, tha Cui, duke vënë në dukje se kjo qasje jo vetëm që minon themelet e sistemit tregtar shumëpalësh, por gjithashtu kërkon të riformësojë rregullat e tregtisë globale nën dominimin e SHBA-së, duke siguruar kështu pozicionin qendror të Amerikës në peizazhin tregtar global.

The post Kryeministri spanjoll vizitë në Kinë/ Partneriteti strategjik gjithëpërfshirës, Sánchez: Përballimi i sfidave së bashku appeared first on Sot News | Lajme.

Punimet për rregullimin dhe modernizimin e sheshit kryesor të qytetit të Pejës po vazhdojnë pa ndërprerje, me qëllim të përfundimit të projektit në afatin e paraparë.

Ky projekt i rëndësishëm për qytetin ka për qëllim përmirësimin e infrastrukturës urbane, krijimin e hapësirave më funksionale për qytetarët, si dhe shtimin e elementeve arkitektonike bashkëkohore që do t’i japin Pejës një pamje më moderne dhe atraktive.

Lexo po ashtu Projekti 2.3 milionë euro për sheshin “Skënderbeu” në Pejë vazhdon – ende pa afat përfundimi

Autoritetet komunale kanë bërë të ditur se kontraktori është duke punuar me ritëm të shtuar dhe janë duke u ndërmarrë të gjitha masat për të siguruar cilësi të lartë të punimeve.

Qytetarët janë ftuar që të kenë mirëkuptim për kufizimet e përkohshme në qarkullim dhe lëvizje, derisa projekti të përfundojë.

The post Punimet në sheshin e qytetit të Pejës po vazhdojnë me intensitet appeared first on Telegrafi.

Qytetarë të Kamzës sollën dëshmi të ndërhyrjeve brutale të bashkisë së Kamzës që me pretekstin e zgjerimit të rrugës, ka shembur mure të shtëpive dhe tualeteve të banorëve, duke bërë që Valiasi të ngjajë me një zonë lufte. Në pamjet e dërguara shihen shembjet e pjesës së jashtme të banesave të qytetarëve disa prej të […]

The post Punimet e Rakip Sulit “zhveshin” shtëpitë dhe tualetet e banorëve në Kamëz appeared first on BoldNews.al.

TIRANË, 7 mars/ATSH/ Në kuadër të fazës përfundimtare të punimeve të ndërtimit të rrugës sheshi “Shqiponja”-Lumi i Tiranës, pjesë e Unazës së Madhe të Tiranës, në datat 08-09.03.2025 është planifikuar të realizohet shtresa e asfaltobetonit në aksin kryesor të këtij segmenti, konkretisht nga ish-sheshi “Shqiponja” deri tek ura e Lumit të Tiranës.

Autoriteti Rrugor Shqiptar (ARRSH) bën të ditur se gjatë orëve të natës, nga ora 20:00 – 06:00 është i nevojshëm bllokimi i këtij aksi.

ARRSH po ashtu informon se trafiku do të devijojë.

Në datën 8 mars, ora 20:00-06:00 do të kryhen punimet në krahun e djathtë të aksit kryesor dhe për pasojë do të bllokohet lëvizja e automjeteve në tunelet nr. 2 (rryma e trafikut që vjen nga autostrada Tiranë-Durrës me drejtim Unazën Veriore) dhe tunelin nr. 1 (rryma e trafikut që vjen në aksin kryesor nga “Teodor Keko” me destinacion Unazën Veriore).

Në datën 9 mars, ora 20:00 – 06:00 do të ketë punime në krahun e majtë dhe trafiku duhet të devijohet për në nënkalimin e Paskuqanit duke i drejtuar automjetet në rrugët që lidhen me këtë nyje.

Kontraktori i punimeve në bashkëpunim me Autoritetin Rrugor Shqiptar kanë marrë të gjitha masat e nevojshme për menaxhimin e trafikut.

/r.e//a.f/

The post Punime në segmentin ish-sheshi “Shqiponja”-Lumi i Lanës, devijohet trafiku appeared first on Agjencia Telegrafike Shqiptare.

Gjatë ditës së nesërme do të nisin punimet për shenjëzimin horizontal dhe vertikal i rrugëve në Mitrovicën Veriore.

Kjo do të bëhet për të përmirësuar sigurinë dhe rregullimin e qarkullimit rrugor, shkruan Telegrafi.

“Nga nesër, në Mitrovicën Veriore do të fillojnë punimet për shenjëzimin horizontal dhe vertikal të rrugëve, me qëllim përmirësimin e sigurisë dhe rregullimit të qarkullimit rrugor”, thuhet në njoftim.

Komuna e Mitrovicës Veriore ka kërkuar mirëkuptimin dhe bashkëpunimin e qytetarëve gjatë periudhës kohore kur zhvillohen këto punime.

“Ju lutemi për mirëkuptim dhe bashkëpunim gjatë kohës së punimeve. Respektimi i shenjëzimit është i domosdoshëm për sigurinë e të gjithëve. Faleminderit për durimin dhe kontributin tuaj për një mjedis më të sigurt rrugor!”, thuhet tutje në njoftim. /Telegrafi/

The post Nesër në Mitrovicën Veriore do të fillojnë punimet për shenjëzimin horizontal dhe vertikal të rrugëve appeared first on Telegrafi.

TIRANË, 5 mars/ATSH/ Kryeministri Edi Rama dhe kryetarja e deleguar e bashkisë së Tiranës, Anuela Ristani, kanë ndjekur sot nga afër punimet në kantierin e shkollës “Pjetër Budi”, e cila po ndërtohet nga e para me standardet më të mira të mësimdhënies për afro një mijë nxënës.

Sipas Ristanit, shkolla do të ketë një holl të brendshëm dhe një tarracë të gjelbër, e cila do të jetë e shfrytëzueshme dhe do të ketë dalje nga holli nëpër klasa dhe korridore.

“Si pjesë e shkollave që ne i kemi të rindërtuara, edhe kjo shkollë është rindërtuar e plotë dhe një nga gjërat që do të bëjmë më mirë  është të shmangim komplet turnin e dytë sepse po shtojmë klasat. Deri tani ishte me 938 nxënës dhe 4 klasa ishin me turn të dytë. I kemi shtuar ato, duke ekonomizuar më mirë hapësirën me projektin dhe nuk do të ketë më turn të dytë, po përveç asaj që do të ofrojë gjelbërim edhe hapësira të ndriçimit shumë të mira, ka një shtesë të bukur të faktit që do të ketë një holl të brendshëm dhe tarracë të gjelbër.

Tarraca sipër do të jetë e shfrytëzueshme dhe do të ketë dalje nga holli nëpër klasa e nëpër korridore. Tipar tjetër është që palestra është multifunksionale dhe ka një sallë tjetër multifuknsionale, me akses të jashtëm që mund të përdoret dhe për pjesën jashtë shkollës. Do të ketë bibliotekë, laboratorë dhe ajo që ne po shtojmë është edhe klasat e parashkollorit që nuk kanë ekzistuar më përpara. Mendojmë që të jetë gati brenda fundit të vitit kalendarik”, tha Ristani.

Ndërsa, një prej drejtueseve teknike të projektit u shpreh se fushat do të jenë aty ku kanë qenë më përpara, përpos shtimit të një palestre të brendshme.

“Përballë do të kemi edhe hyrjen dytësore që të përdoret nga komuniteti jo vetëm palestra, por edhe salla multifunksionale. Ka një holl gjigant që arrin në dy kate lartësi, dhe kati i tretë që realizohet me një holl të hapur, ku do të jetë biblioteka dhe salla multifunksionale”, tha ajo.

Rama theksoi se “me shkollat në Tiranë është bërë revolucion, falë edhe ndërtimit me standardet më të mira evropiane”.

“Shkollat e Tiranës janë si në çdo qytet të Evropës ku ka shkolla të vjetra, ka shkolla “çka” dhe shumë të mira. Dhe këto janë shumë të mira, revolucion i madh”, u shpreh Rama.

Kryeministri Rama në shkollën “Pjetër Budi”

1 nga 6

/r.e/a.f/

The post Rama: Revolucion me shkollat në Tiranë, janë si në çdo qytet të Evropës appeared first on Agjencia Telegrafike Shqiptare.

TIRANË, 5 mars/ATSH/ Kryeministri Edi Rama dhe ministrja e Arsimit dhe Sportit, Ogerta Manastirliu kanë inspektuar sot punimet në Universitetin Politeknik të Tiranës, ku falë investimit për rikonstruksionin e dy ndërtesave ekzistuese, ndërtimin e Muzeut të ri të Gjeologjisë, laboratorë modernë, salla leksionesh dhe studimesh do të krijohen kushte më të mira për studentët dhe pedagogët për zhvillimin akademik.

Ministrja Manastirliu tha se punimet kanë filluar prej një viti dhe pritet të mbarojnë në dhjetor të 2025-ës. “Prej një viti e pak ka filluar puna për rehabilitimin dhe ndërtimin e kampusit të Gjeologji-Minierave. Korpusi është një godinë historike dhe si e tillë punimet po ecin me ritmin e duhur edhe për arsye të problematikave të tërmetit, ka pasur nevojë për rishikim të projektit dhe përforcimeve përkatëse.

Është një investim prej gjashtë milionë euro nga buxheti i shtetit dhe kontributi që vetë Universiteti Politeknik jep. Është një projekt i realizuar nga vetë profesorët dhe kjo godinë përfundon në dhjetor të këtij viti”, tha ministrja Manastirliu.

Një prej pedagogëve të këtij universiteti, njëherësh edhe një prej hartuesve të këtij projekti, tha se bëhet fjalë për një ndërtesë të trashëguar dhe Monument i Kategorisë III.

“Na u desh kohë të rilevonim, të gjenim problemin, tërmeti krijoi probleme të jashtëzakonshme për ndërtesën nga pikëpamja strukturale. Projekti iu dedikua një ruajtjeje dhe rivlerësimi të ndërtesës. Në pjesën e pasme ka qenë një element shtesë, që prishte integritetin e ndërtesës dhe u mendua që të shkëputej nga ndërtesa historike.

Gjithë projekti përfshin nga objekti historik ku do të strehohen dy departamente të rëndësishme të universitetit, ka edhe një ndërtesë tjetër katërkatëshe që ishte totalisht e amortizuar nga tërmeti. U mendua që të mos e rrafshonim atë, se ishte në gjendje të keqe, u rikonstruktua duke ruajtur të gjithë parametrat. Sipër ka edhe një bibliotekë dhe një aula që duhej me tarracë të gjelbër, që nuk ndikon në mjedis. Krahas muzeut, do shtojmë edhe gurët e çmuar një muze të hapur që është pjesa më e bukur nëse keni parë edhe në muzetë në botë, Uashington, etj.”, u shpreh pedagogu i Universitetit Politeknik të Tiranës.

Kryeministri Rama inspekton punimet në Fakultetin e Gjeologjisë

1 nga 9

/r.e/a.f/

The post Rama dhe Manastirliu ndjekin punimet në Universitetin Politeknik të Tiranës: Ambiente moderne, përfundon në dhjetor appeared first on Agjencia Telegrafike Shqiptare.

TIRANË, 28 shkurt /ATSH/ Një përfaqësi të banorëve të Hotolishtit kanë dorëzuar sot një peticion me 511 firma në bashkinë e Librazhdit, përmes të cilit ata kërkojnë që rruga të devijohet në luginën e Shkumbinit.

Këta banorë, kërkojnë nga Autoriteti Rrugor Shqiptar që të ndryshohet gjurma e autostradës Elbasan – Qafë Thanë, e cila sipas projektit kalon mes për mes fshatit të tyre.

“Ne banorët e njësisë administrative Hotolisht kërkojmë ndryshimin e projektit aktual të rrugës Elbasan-Qafë Thanë pasi ai dëmton rëndë jetët tona dhe shpërfill interesat e komunitetit. E theksoj ne nuk jemi kundër ndërtimit të rrugës, ne jemi kundër që kjo rrugë të kalojë mes përmes fshatit tonë ku nuk ka asnjë shenjë rruge të mëparshme. Ndarja e fshatit do ta shkatërronte atë përfundimisht. Kërkesa jonë është të ndryshojë traseja, rruga të kalojë anës lumit Shkumbin, siç ishte projekti i parë i ARRSH”, thonë ata për mediet.

Banorët e këtij fshati, paralajmërojnë se në rast se nuk merret asnjë masë nga ana e autoriteteve dhe institucioneve përkatëse, do të ketë përshkallëzim të qëndrimit të tyre, deri në protesta dhe bojkot të zgjedhjeve të 11 majit.

“Në rast se nuk na dëgjojnë do të ndjekim të gjitha hapat ligjore do të protestojmë duke bllokuar dhe rrugën aktuale. Nuk do dalim në zgjedhje, sepse bllokon komplet fshatin, nuk ka hyrje-dalje, është një dëm i madh për të gjithë banorët. Kërkesa i drejtohet ARRSH-së dhe zv/kryeministres Balluku”, thonë ata.

Aktualisht makineritë dhe punëtorët e kompanisë ndërtuese po punojnë për hapjen e trasesë në segmentin Elbasan-Papër-Ura e Grykshit dhe më pas do të vazhdohet drejt Hotolishtit. Autostrada që lidh Shqipërinë me Maqedoninë e Veriut pritet të përfundojë në 2027-ën dhe do t’i kushtoje buxhetit të shtetit rreth 10 miliardë lekë.

/r.e/

The post Banorët e Hotolishtit kërkojnë ndryshimin e projektit të rrugës Elbasan-Qafë Thanë appeared first on Agjencia Telegrafike Shqiptare.

TIRANË, 24 shkurt/ATSH/ Në kantierin e bajpasit të Ksamilit në Sarandë puna po përparon me ritme të shpejta, duke sjellë një zhvillim të rëndësishëm infrastrukturor dhe turistik.

Kryetari i bashkisë së Sarandës, Oltion Çaçi ndau në rrjetet sociale pamje nga puna për ndërtimin e bajpasit.

“Ky bajpas optimizon lëvizjen e automjeteve dhe rrit efikasitetin e qarkullimit për banorët dhe vizitorët”, tha Çaçi.

Projekti përfshin zgjerim të rrugës ekzistuese me korsi emergjence dhe korsi pedolanesh biçikletash.

Ky bajpas do të lehtësojë ndjeshëm trafikun gjatë sezonit veror, duke e bërë lëvizjen më të shpejtë dhe më të sigurt.

Përfundimi sa më shpejtë i projektit tregon përkushtimin për të përmirësuar cilësinë e jetës dhe shërbimeve në këtë zonë të rëndësishme bregdetare.

1 nga 6

/k.s/j.p/

The post Punimet për bajpasin e Ksamilit, Çaçi: Do të optimizojë qarkullimin appeared first on Agjencia Telegrafike Shqiptare.