TIRANË, 25 korrik /ATSH/ Autoriteti Rrugor Shqiptar njoftoi sot se, ura auto-hekurudhore e Milotit, me një gjatësi prej 788 metrash, paraqet një rrezik serioz për qëndrueshmërinë dhe sigurinë e kalimit, si pasojë e dëmtimeve të konsiderueshme në themelet mbështetëse, erozionit të theksuar në bazament, për shkak të shfrytëzimit të pakontrolluar të zhavorrit të lumit, dhe gërryerjeve në të gjithë shtratin lumor.

Bazuar në ekspertizën teknike dhe duke marrë parasysh trafikun e rënduar, veçanërisht gjatë sezonit veror, ARRSH bën të ditur se, është marrë vendimi për mbylljen e plotë të urës dhe ndërprerjen e qarkullimit, deri në përfundim të projektndërhyrjes emergjente që po hartohet nga Autoriteti Rrugor Shqiptar, në bashkëpunim me Universitetin Politeknik të Tiranës. Kjo ndërhyrje do të zbatohet menjëherë në ditët në vijim.

Ndërkohë, ndërtimi i urës krejtësisht të re është parashikuar nga ARRSH si pjesë e programit “100 Ura”, i cili realizohet me mbështetjen e Bankës Botërore.

Gjatë periudhës së ndërhyrjes, ARRSH rekomandon përdorimin e rrugëve alternative: Rruga kryesore Lezhë – Milot dhe Rruga e Kombit.

ARRSH thekson se, kjo ndërhyrje është thelbësore për të garantuar sigurinë e të gjithë komunitetit.

Duke u ndërgjegjësuar për vështirësitë dhe shqetësimet që mund të shkaktojë mbyllja e përkohshme e urës, ARRSH shton se, kjo masë është e domosdoshme për të shmangur rreziqe më të mëdha dhe për të siguruar një infrastrukturë të qëndrueshme dhe të sigurt në të ardhmen.

/gj.m//r.e/

The post ARRSH ndërhyrje në urën e Milotit, ndërpritet qarkullimi appeared first on Agjencia Telegrafike Shqiptare.

TIRANË, 25 korrik /ATSH/ Këtë javë, 12 specialistë nga SPAK dhe Policia e Shtetit morën pjesë në kursin “Praktikat më të Mira Mjekoligjore në Macintosh”, njoftoi sot Ambasada e Shteteve të Bashkuara të Amerikës në Shqipëri.

Trajnimi u zhvillua nga Zyra e Ndihmës për Antiterrorizmin të Departamentit të Shtetit përmes Zyrës Rajonale të Sigurisë së Ambasadës.

Specialistët mësuan hollësitë e sistemit operues Mac dhe praktikuan aftësi praktike për të gjetur dhe analizuar të dhëna kritike në mbështetje të hetimeve kibernetike.

Ekspertiza dhe udhëheqja amerikane në teknologji është thelbësore për mbrojtjen e Shteteve të Bashkuara dhe aleatëve tanë nga kërcënimet kibernetike.

1 nga 6

/gj.m//r.e/

The post Ambasada e SHBA: 12 specialistë nga SPAK dhe Policia e Shtetit marrin pjesë në kursin e DASH appeared first on Agjencia Telegrafike Shqiptare.

TIRANË, 25 korrik /ATSH/ Kryeministri Edi Rama ndau sot pamje nga lirimi i plazheve publike në Kepin e Rodonit përgjatë bregdetit të Durrësit.

“Rikthejmë hapësirat publike për qytetarët dhe pushuesit, duke garantuar akses të barabartë dhe kushte dinjitoze për të gjithë”, shkroi Rama.

Prej datës 15 qershor ka nisur operacioni “Plazhe të pastra”, përmes të cilit Agjencia Kombëtare e Bregdetit mbështet 8 bashki bregdetare në pastrimin e plazheve, midis të cilave edhe Durrësin.

Nisur nga fakti se Durrësi ka një vijë bregdetare mjaft të gjatë këtë vit plazhet publike janë konceptuar të ndërprera me ato private, me qëllim që pushuesit të kenë mundësi t’i aksesojnë në segmente të ndryshme.

Po ashtu Bashkia ka pajisur të gjitha këto hapësira me sinjalistikën e duhur në terren.

Kepi i Rodonit është një tjetër perlë e Adriatikut që fton të gjithë pushuesit për të shijuar jo vetëm plazhin e mrekullueshëm, por edhe historinë që mbart ky vend.

Kepi i Rodonit ka formën e një trekëndëshi midis gjirit të Rodonit e atij të Lalëzit, formon një rrip toke në formë gadishulli që futet në brendësi të Detit Adriatik.

Ky xhevahir i natyrës është një vend jashtëzakonisht interesant mbi të gjitha për vendndodhjen e tij piktoreske: një kep shkëmbor që shtrihet drejt detit, formuar nga shkëmbinjtë e rrethuar me bimësi mesdhetare dhe lule aromatike.

Në këtë vend çdo vizitor gjen të ndërthurur më së miri historinë, me natyrën dhe detin. Në pjesën verilindore të Kepit ndodhet një ndër objektet më të rëndësishme të trashëgimisë kulturore, Kalaja e Skënderbeut.

/gj.m//r.e/

The post Lirimi i plazheve publike në Kepin e Rodonit, Rama: Rikthejmë hapësirat publike për qytetarët dhe pushuesit appeared first on Agjencia Telegrafike Shqiptare.

TIRANË, 25 korrik /ATSH/ Ministria e Mbrojtjes njoftoi sot se vijon ndërhyrja për shuarjen e flakëve në zonën e fshatit Vergo në Delvinë, një nga tre fshatrat e përfshirë nga zjarri në bashkinë Delvinë.

Në terren ndodhen katër mjete zjarrfikëse, 60 efektivë të Forcave të Armatosura dhe dy helikopterë “Cougar” që po punojnë për izolimin e flakëve dhe mbrojtjen e banesave.

Banorëve të fshatrave Vergo, Palavli dhe Kopaçëz u bëhet thirrje të ndjekin udhëzimet e emergjencave civile dhe të bashkëpunojnë me autoritetet lokale dhe forcat e sigurisë.

Gjithashtu 62 efektivë të Repartit Gjirokastër, pjesë e Regjimentit të Këmbësorisë së Jugut, Forca Tokësore, janë angazhuar në operacionet për emergjencat civile për shuarjen e zjarreve në fshatin Palavli, Bashkia Delvinë.

1 nga 6

/gj.m//r.e/

The post MM: Vijon ndërhyrja për shuarjen e flakëve në zonën e fshatit Vergo në Delvinë appeared first on Agjencia Telegrafike Shqiptare.

TIRANË, 25 korrik /ATSH/ Edicioni i nëntë i Zâ Fest nisi midis artit, historisë dhe muzikës.

Zâ Fest është një festival që prej vitesh bashkon zërat më të veçantë të rajonit në një dialog të gjallë mes traditës dhe modernes.

Me mbështetjen e Bashkimit Evropian, për të nëntin vit radhazi, ky festival mbetet një shembull i diplomacisë kulturore, ku kultura bëhet ura që lidh komunitetet, nxit përfshirjen dhe forcon identitetin evropian të Shqipërisë.

Pikërisht në këtë frymë, një nga pikat kulmore të mbrëmjes së parë ishte hapja e ekspozitës “Me rrojt pa ik?” një koleksion nomad me 15 piktura nga artistë të rinj të rajonit adriatiko-jonian, që trajtojnë sfidat dhe ëndrrat e rinisë sot.

Një prej tyre, Ema Bregu nga Shqipëria, solli një qasje të guximshme mbi trashëgiminë kulturore shqiptare.

Pas një nate të mbushur me tregime, dokumentarë dhe muzikë, festa vazhdon.

Dy netë të bukura presin qytetarët sot dhe nesër në Kalanë e Shkodrës, me muzikë e atmosferë që vetëm Zâ Fest mund t’i sjellë.

Edhe kryeparlamentarja, Elisa Spiropali ftoi qytetarët që ta ndjekin këtë festival.

“Mos e humbisni Zâ Fest sot dhe nesër, në Kalanë e mrekullueshme të Shkodrës”, shkroi Spiropali në rrjetet sociale.

1 nga 15

/gj.m//r.e/

The post Zâ Fest, një natë magjike në zemër të Shkodrës appeared first on Agjencia Telegrafike Shqiptare.

TIRANË, 25 korrik /ATSH/ Prokuroria e Posaçme Kundër Korrupsionit dhe Krimit të Organizuar përfundoi hetimet dhe ka dërguar pranë Gjykatës së Posaçme të Shkallës së Parë kërkesën për gjykimin e procedimit penal Nr. 60/1 të vitit 2024, në ngarkim të:

Adulla Hoxhajt, i akuzuar për kryerjen e elementëve të veprave penale të “Trafikim i armëve dhe i municionit”, e mbetur në tentativë, kryer në formën e veçantë të bashkëpunimit, atë të grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal”; “Grup i strukturuar kriminal”, në formën e drejtimit; “Mbajtje pa leje dhe prodhimi i armëve, armëve shpërthyese dhe i municionit” në banesë dhe në sasi të mëdha, të cilat i janë sekuestruar në banesë gjatë momentit të ekzekutimit të masës së sigurimit personal më datë 1.8.2024; “Prodhim, mbajtje, blerje apo shitje pa leje e armëve të ftohta”, e parashikuar nga neni 279/1 të Kodit Penal, të cilat i janë sekuestruar në banesë gjatë momentit të ekzekutimit të masës së sigurimit personal më datë 1.8.2024;

Almir Gjidiajt, i akuzuar për kryerjen e elementëve të veprave penale të “Trafikim i armëve dhe i municionit”, mbetur në tentativë kryer në formën e veçantë të bashkëpunimit, atë të grupit të strukturuar kriminal, “Kryerje e veprave penale nga organizata kriminale ose grupi i strukturuar kriminal”; “Grup i strukturuar kriminal”, në formën e drejtimit;

Admir Tutajt, i akuzuar për kryerjen e elementëve të veprave penale të “Trafikim i armëve dhe i municionit”, mbetur në tentativë kryer në formën e veçantë të bashkëpunimit, atë të grupit të strukturuar kriminal, “Kryerje e veprave penale nga organizata kriminale ose grup i strukturuar kriminal”; “Grup i strukturuar kriminal”, në formën e pjesëmarrjes;

Alban Gjidiajt, i akuzuar për kryerjen e elementëve të veprave penale të “Trafikim i armëve dhe i municionit”, mbetur në tentativë kryer në formën e veçantë të bashkëpunimit, atë të grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal”; “Grup i strukturuar kriminal”, në formën e pjesëmarrjes;

Rifat Avdiajt, i akuzuar për kryerjen e elementëve të veprave penale të “Trafikim i armëve dhe i municionit”, mbetur në tentativë kryer në formën e veçantë të bashkëpunimit, atë të grupit të strukturuar kriminal, “Kryerje e veprave penale nga organizata kriminale ose grupi i strukturuar kriminal”; “Grup i strukturuar kriminal”, në formën e pjesëmarrjes;

Bojken Turtullit, i akuzuar për kryerjen e elementëve të veprave penale të “Trafikim i armëve dhe i municionit”, mbetur në tentativë kryer në formën e veçantë të bashkëpunimit, atë të grupit të strukturuar kriminal, “Kryerja e veprave penale nga organizata kriminale ose grupi i strukturuar kriminal”; “Grup i strukturuar kriminal”, në formën e pjesëmarrjes, parashikuar nga neni 333/a/2 i Kodit Penal.

Për kryerjen e veprimeve hetimore është bashkëpunuar ngushtësisht me autoritetet e drejtësisë britanike, Policinë e Shtetit dhe Byronë Kombëtare të Hetimit (BKH).

Nga aktet e administruara për këtë procedimi penal, ka rezultuar se më datë 10.4.2023, gjatë procesit të skanimit të një mjeti tip furgon me targa britanike, KS 15 MZN janë konstatuar anomali dhe është vendosur të bëhet kontrolli fizik i tij, pranë pikës së kontrollit.

Prej këtij kontrolli rezultoi se, në brendësi të një tavoline druri që ndodhej në këtë furgon u gjet e fshehur një sasi prej 8 armësh zjarri të llojit pistoleta, 4 krehëra pistoletë dhe 201 copë fishekë të kalibrit 9 mm.

Duke iu referuar zbulimit të sasisë së armëve dhe municionit luftarak të sekuestruar, me destinacion përfundimtar, Mbretërinë e Bashkuar, si dhe mënyrës se si organizatorët kanë siguruar dhe fshirë numrat e serisë në 6 prej armëve të zjarrit, është vlerësuar se ato nuk do të përdoreshin për vetëmbrojtje.

Nga tërësia e veprimeve hetimore të kryera për këtë procedim penal, është identifikuar fillimisht vetëm njëri prej personave të implikuar në kryerjen e kësaj vepre penale dhe më datë 15.6.2023, është bërë identifikimi i shtetasit, Franko Gjalpi. Në përfundim të hetimeve, dosja në ngarkim të tij është dërguar për gjykim dhe me vendimin Nr. 67, date 6.11.2024, ky i pandehur është deklaruar fajtor nga Gjykata e Shkallës së Parë për Korrupsionin dhe Krimin e Organizuar, vendim i cili është lënë në fuqi dhe nga Gjykata e Apelit për Korrupsionin dhe Krimin e Organizuar me vendimin Nr. 8, datë 11.3.2025.

Organizatorët kishin gjetur një ambient të përshtatshëm dhe specialistë të fushës së mobilierisë në periferi të Tiranës, të cilët do të mundësonin fshehjen e armëve në brendësi të produkteve të drurit (për të mos u kapur nga kontrolli i strukturave të policisë dhe doganës). Ata kishin siguruar personat që do të bënin zhvendosjen e “porosive” tek kompania e transportit në Tiranë, përdorimin e gjeneraliteteve të rreme si nga dorëzuesit e porosive tek kompania e transportit, ashtu edhe nga pritësit e tyre në Mbretërinë e Bashkuar.

Po ashtu, vënia në dispozicion e mjetit të transportit dhe të komunikimit, si dhe shpërblimet respektive për çdo transport që kryej, kemi vlerësuar se numri i personave të përfshirë në këtë veprimtari kriminale është më i lartë se dy, duke konkluduar se ndodhemi para kryerjes së veprës penale objekt hetimi, jo në kuadër të bashkëpunimit të thjeshtë, por në formën e veçantë të bashkëpunimit, atë të grupit të strukturuar kriminal.

Nga tërësia e hetimeve të kryera është bërë e mundur të identifikohen bashkëpunëtorët e tjerë të të pandehurit Franko Gjalpi, të përfshirë në këtë veprimtari të paligjshme kriminale,  më konkretisht i të pandehurve: Adulla Hoxhaj, Rifat Avdiaj, Admir Tutaj, Almir Gjidiaj, Alban Gjidiaj dhe Bojken Turtulli, të cilët kanë pasur role të përcaktuara qartë në organizimin, drejtimin dhe financimin e këtij grupi të strukturuar kriminal, me qëllim trafikimin e sigurt të armëve të zjarrit dhe municionit luftarak në Mbretërinë e Bashkuar.

Hetimet e kryera, kanë evidentuar një grup të strukturuar kriminal, i ndarë në dy nëngrupe që vepronin përkatësisht në Shqipëri dhe Mbretërinë e Bashkuar dhe është arritur identifikimi i anëtarëve dhe përgjegjësisë së tyre.

1. Grupi kriminal në Shqipëri

Drejtues: Adulla Hoxhaj

Pjesëmarrës: Rifat Hoxhaj, Bojken Turtulli, Franko Gjalpi

2. Grupi kriminal në Mbretërinë e Bashkuar

Drejtues: Almir Gjidiaj.

Pjesëmarrës: Admir Tutaj dhe Alban Gjidiaj

Nga analizimi i të gjitha fakteve dhe rrethanave ka rezultuar e provuar se i pandehuri, Adulla Hoxhaj është drejtues i nëngrupit, i cili  ka vepruar në territorin e Republikës së Shqipërisë. Ai ka koordinuar veprimet me anëtarët e tjerë të grupit në Shqipëri dhe Mbretërinë e Bashkuar. Ndërsa, të pandehurit: Bojken Turtulli dhe Rifat Avdija, si dhe bashkëipandehuri Franko Gjalpi, kanë luajtur rolin e ndihmësit në këtë aktivitet të paligjshëm kriminal.

Gjithashtu, ka rezultuar e provuar se i pandehuri tjetër Almir Gjidiaj, është drejtues i nëngrupit, i cili  ka vepruar në Mbretërinë e Bashkuar. Ai ka koordinuar veprimet e anëtarëve të tjerë të grupit në Mbretërinë e Bashkuar dhe Shqipëri. I pandehuri Admir Tutaj, është njëri prej pritësve të porosive në Mbretërinë e Bashkuar si edhe person i besuar i të pandehurit tjetër Alban Gjidiaj, të cilët kanë patur rolin e ndihmësve në këtë veprimtari të paligjshme kriminale.

Si rezultat i kontrolleve të ushtruara në Shqipëri, më datat 10.4.2023 në P.K.K Port Durrës, dhe 16.06.2023 në Tiranë, janë sekuestruar sendet e mëposhtme:

6 (gjashtë) armë zjarri të llojit pistoletë, marka “GLOCK”, me numra të fshirë me mbishkrim “Glock Austria 9 x 19”.

1 (një) armë zjarri të llojit pistoletë, marka “HERSTAL”, me numër 1534 P.

1 (një) armë zjarri të llojit pistoletë, marka “BROËNING”, me numër 2205.

4 (katër) krehra pistolete ngjyrë e zezë

201 (dyqind e një) copë fishekë kalibër 9 mm.

1 650 (njëmijë e gjashtë qind e pesëdhjetë) euro

31 700 (tridhjetë e një mijë e shtatëqind) lekë

8 (tetë) aparate telefonash celularë etj.

Si rezultat i kontrolleve të ushtruara në Shqipëri, më datë 1.8.2024, kryesisht në banesën e të pandehurit Adulla Hoxhaj, si dhe në banesat e të pandehurve të tjerë, janë sekuestruar sendet e mëposhtme:

24 armë zjarri pistoletë

1 automatik kallashnikov

pjesë të ndryshme të armëve të zjarrit (gjilpëra, susta, shul, qyt etj.,)

49 krehra (karikator) të llojeve të ndryshme,

2 thika

409 fishekë të kalibrit të ndryshëm,

1 palë pranga

10 pajisje speciale optike dhe lazeri

4 automjete

1 motor

1 palë veshje ushtarake

1 helmetë e forcave speciale

4 aparate celularë

2 laptop

1 njësi qendrore

290 euro

13,000 lekë

kartë Sim Vala (kosovare).

Struktura e Posaçme kundër Korrupsionit dhe Krimit të Organizuar falenderon autoritetet e drejtësisë britanike, Atasheun e Sigurisë së Brendshme të Ambasadës Britanike në Shqipëri si dhe agjencitë ligjzbatuese shqiptare, të cilët na kanë mbështetur dhe ndihmuar.

/gj.m//r.e/

The post SPAK dërgon për gjykim grupin e strukturuar kriminal për trafik armësh drejt Mbretërisë së Bashkuar appeared first on Agjencia Telegrafike Shqiptare.

TIRANË, 25 korrik /ATSH/ Ministrja e Shëndetësisë dhe Mbrojtjes Sociale, Albana Koçiu u bëri thirrje sot qytetarëve që të kenë kujdes nga temperaturat e larta që kanë përfshirë vendin tonë.

Në një postim në rrjetet sociale, Koçiu thotë se, “sot shënohet dita më e nxehtë e këtij sezoni veror, me temperatura mbi normën dhe rrezik të shtuar për shëndetin”.

“Ndiqni këshillat e mjekëve dhe për çdo nevojë, drejtohuni te mjeku i familjes apo qendra shëndetësore më e afërt”, është thirrja e Koçiut.

Në këto ditë me temperaturë ekstreme qytetarët duhet të pinë shumë ujë, të qëndrojnë në ambiente të freskëta, të shmangin diellin në orët e pikut.

Gjithashtu fëmijët, të moshuarit dhe personat me sëmundje kronike duhet të bëjnë kujdes.

Edhe Instituti Kombëtar i Shëndetit Publik u bëri sot thirrje qytetarëve që të kenë kujdes nga temperaturat e larta që kanë përfshirë vendin tonë.

Në një postim në rrjetet sociale, ISHP theksoi se temperaturat e larta nuk janë vetëm bezdisëse, por edhe të rrezikshme për shëndetin.

Sipas ISHP-së, kur nxehtësia është e fortë dhe zgjat në kohë, rritet rreziku për: Dehidratim, rëndim të sëmundjeve kronike (tension i lartë, zemra, diabeti, etj.), infeksione dhe intoksikacione nga ushqimi – sidomos kur nuk ruhet në temperatura të sigurta, goditje nga i nxehti, ngërçe muskulare dhe dhimbje, të fikët, skuqje të lëkurës, ënjtje.

ISHP këshillon qytetarët dhe grupet e riskut si të moshuarit, fëmijët apo personat me sëmundje kronike që të mbrohen duke pirë më shpesh ujë, të qëndrojnë në vende të freskëta, të ruajnë ushqimet në frigorifer, si edhe të shmangin ekspozimin në diell gjatë orëve të pikut (11:00 – 18:00).

/r.e/

The post Sot dita më e nxehtë e këtij sezoni veror, Koçiu: Ndiqni këshillat e mjekëve appeared first on Agjencia Telegrafike Shqiptare.

TIRANË, 25 korrik /ATSH/ Zëvendësministrja për Evropën dhe Punët e Jashtme, Megi Fino u takua me sekretarin e shtetit për Bashkimin Evropian në Spanjë, Fernando Sampedro.

Ministria për Evropën dhe Punët e Jashtme njoftoi sot se, të dy palët patën një diskutim të frytshëm mbi forcimin e bashkëpunimit mes vendeve tona.

Gjithashtu në takim u riafirmua mbështetja e Spanjës për procesin e anëtarësimit të Shqipërisë në Bashkimin Evropian.

/gj.m//r.e/

The post Spanja, mbështetje për procesin e anëtarësimit të Shqipërisë në BE appeared first on Agjencia Telegrafike Shqiptare.

TIRANË, 24 korrik /ATSH/ Ambasadori i Gjermanisë në Shqipëri, Karl Bergner vizitoi sot kompaninë DHL dhe u njoh nga afër me aktivitetet e ofruesit gjerman të shërbimeve logjistike në Shqipëri, njoftoi sot ambasada gjermane në Tiranë.

Ai u shpreh i impresionuar nga performanca e ekipit të përgatitur të DHL-së në Shqipëri.

Bergner falënderoi veçanërisht DHL-në për kontributin e rëndësishëm dhe profesional në realizimin e zgjedhjeve të diasporës me porosi të Komisionit Qendror të Zgjedhjeve.

DHL është një nga ofruesit kryesorë globalë të shërbimeve logjistike dhe operon në mbi 220 vende dhe territore, duke dërguar rreth 1,8 miliardë dërgesa çdo ditë.

/gj.m/j.p/

The post Ambasadori gjerman viziton DHL: Kontribut profesional në realizimin e zgjedhjeve të diasporës appeared first on Agjencia Telegrafike Shqiptare.

TIRANË, 24 korrik /ATSH/ Shërbimet e Komisariatit të Policisë Kavajë, në bashkëpunim me Policinë Bashkiake, në zbatim të planit operacional “Plazhi i lirë”, kanë ushtruar kontrolle në territorin e Kavajës.

Nga kontrollet u konstatuan disa hapësira në rrugë, të cilat ishin përshtatur për ambiente me qëllim përfitimin, pa leje nga organet kompetente.

Qytetarët që i kishin zënë këto hapësira, i liruan ato, me mirëkuptim.

Drejtoria Vendore e Policisë Durrës do të vijojë kontrollet për të ndaluar çdo shkelje që cenon hapësirat publike dhe sigurinë e pushuesve.

1 nga 4

/gj.m/j.p/

The post Kavajë, lirohen disa hapësira në rrugë të përshtatura për qëllime fitimi appeared first on Agjencia Telegrafike Shqiptare.

TIRANË, 24 korrik /ATSH/ Kryetari i Partisë Demokratike, Sali Berisha deklaroi sot në një konferencë për shtyp se, “degradimi i zgjedhjeve në farsë elektorale më 11 maj ishte një nga aktet më të shëmtuara, më kriminale, më antikushtetuese”.

Sipas tij, kryeministri Edi Rama përdori të gjithë fuqinë ekzekutive për të ndikuar në të gjitha mënyrat për denatyrimin, shkatërrimin, shndërrimin në farsë të procesit zgjedhor.

Berisha u shpreh se Edi Rama bleu vota me 450 leje për bandat e narkotrafikut në periudhën që këto ndaloheshin me ligj.

“Nga prilli 2024 deri në maj 2025 janë dhënë mbi 1 mijë leje ndërtimi. 450 prej tyre gjatë periudhës zgjedhore. Këtu nuk përfshihen mijëra e mijëra leje të dhëna për shtesa, rikonstruksione, etj, në mbarë Shqipërinë nga bashkitë e vendit”, u shpreh Berisha.

Berisha u ndal në disa raste, ku sipas tij, janë dhënë leje të tilla.

Sipas tij, në qoftë se bëhet analiza e 450 lejeve të firmosura nga Edi Rama, ato bëjnë tonelata droge dhe të paktën 10 milionë metër katrorë ndërtime dhe territore përreth.

“Ato bëjnë pra, de facto narkotizimin e plotë të ekonomisë shqiptare”, u shpreh Berisha.

/gj.m/j.p/

The post Berisha: Në 11 maj, u blenë vota me 450 leje ndërtimi appeared first on Agjencia Telegrafike Shqiptare.

TIRANË, 24 korrik /ATSH/ Kolegji Zgjedhor ka rrëzuar sot padinë e Partisë Demokratike në qarqet e Elbasanit, Fierit dhe Durrësit.

Partia Demokratike kishte kërkuar pavlefshmërinë e zgjedhjeve dhe përsëritjen e tyre në këto qarqe.

Kolegji Zgjedhor, me këtë vendim, mbylli procesin e ankimimeve të PD për zgjedhjet e 11 majit.

Tashmë i takon Komisionerit Shtetëror të Zgjedhjeve, Ilirjan Celibashi të vijojë me ndarjen e mandateve në këto tre qarqe.

Në zgjedhjet parlamentare të 11 majit, në Elbasan PS mori 10 mandate, PD 4 mandate. Në Durrës mandatet u ndanë 8 me 6 për PS, ndërsa në Fier PS mori 14 mandate dhe PD vetëm 4. /j.p/

The post Ankimimet e PD-së për 11 majin, Kolegji Zgjedhor rrëzon PD-në appeared first on Agjencia Telegrafike Shqiptare.

TIRANË, 24 korrik /ATSH/ Kryetari i Komisionit të Posaçëm Parlamentar për Mirëqeverisjen, Antikorrupsionin dhe Sundimin e Ligjit, Fatmir Xhafaj, bëri sot në një konferencë për mediet një bilanc të punës në përmbyllje të mandatit të veprimtarisë së këtij komisioni.

Xhafaj theksoi se ky Komision i Posaçëm Antikorrupsion e ka përmbushur qëllimin e ngritjes së tij ndonëse pati një mandat të kufizuar me vetëm 14 muaj dhe me periudhën elektorale në mes.

Xhafaj u shpreh se janë hartuar dy dokumente të rëndësishme kombëtare gjatë kohës së punës së komisionit.

I pari është dokumenti analitik me 700 faqe dhe i dyti plani kombëtar i veprimit që do i shërbejnë dhe qëllimit për negociatat e Shqipërisë me BE dhe integrimin e vendit, ku përfshihet përmirësimi i mëtejshëm i punës në luftën antikorrupsion.

“Komisioni me dokumentat e hartuara dhe të miratuara adresoi një sërë problematikash dhe vendosi piketa të qarta aq të domosdoshme për përballjen me 3 sfida kyç të zhvillimit, Mirëqeverisjen, Antikorrupsionin dhe Sundimin e ligjit, thelbësore për konsolidimin e shtetit të së drejtës. Ashtu si dhe nga ana tjetër përmes këtyre dokumenteve qartësoi përgjegjësitë për një rol më aktiv të Kuvendit në procesin e negociatave për Shqipërinë 2030 në BE dhe reformimin e vetë Kuvendit, nisur kjo edhe nga konteksti i zhvillimeve të integrimit europian të Shqipërisë dhe reflektimet ligjore dhe institucionale me sfidat në kuadër të këtij procesi”, tha Xhafaj, duke theksuar gjithashtu se metodologjia e veprimtarisë së Komisionit të Posaçëm, është një ndër më të plotat dhe më të qartat për të garantuar transparencën, gjithëpërfshirjen dhe profesionalizmin.

Kuvendi tha ai, këtë përvojë të krijuar, këtë model tashmë të realizuar, mund ta aplikojë në të gjitha proceset e tjera të ngjashme, në përmbushje edhe të rekomandimeve të vazhdueshme për këtë aspekt në raportet e Progresit të KE-së.

“Gjithë ky proces i ndërtuar është mbështetur dhe ka garantuar 4 parime themelore që janë gjithëpërfshirja, transparenca, profesionalizmi dhe standardet më të mira ndërkombëtare. Synimi kryesor i komisionit ka qenë dhe besoj se ia kemi arritur përmes metodologjisë së zbatuar që i gjithë ky proces në vetvete dhe veçanërisht dokumentet që janë hartuar së bashku me propozimet përkatëse të garantojnë standarde evropiane si dhe reflektimin në praktikat më të mira të vendeve të BE-së si dhe të jenë në përputhje të plotë me rekomandimet e BE dhe kriteret për pozicionet negociuese”, tha Xhafaj.

Duke folur për ndikimin e punës së bërë në këtë komision nga rreth 119 ekspertë kombëtarë dhe ndërkombëtarë, ai përmendi disa nga arritjet, të cilat i çmon si vlera dhe risi të këtij procesi kompleks.

“Për herë të dytë në këto 10 vite, Kuvendi i Shqipërisë u shndërrua në hapësirën kushtetuese e institucionale për realizimin e një tjetër reforme shtetndërtuese që synon konsolidimin e shtetit të së drejtës por që i shërben edhe procesit të anëtarësimit për Shqipërinë 2030 në BE. Vështirë të gjeni një shembull të dytë, në rajon dhe më gjerë, të ndërmarrjes me iniciativë nga vende kandidate për BE, të projekteve të tilla kaq komplekse, përfshirëse dhe me ambicien e fortë për ndryshim”, tha Xhafaj.

“Përfshirje e gjerë e të gjithë faktorëve kyç të shoqërisë. Kjo e bën këtë një projekt kompleks për nga koordinimi dhe realizimi, por që përbën njëherësh edhe një model se si duhet të ndërtohen reforma të tilla duke shkuar nga analiza e situatës, te identifikimi i gjetjeve dhe adresimin e masave për zgjidhje, te procesi ligjvënës, dhe pastaj te zbatimi e monitorimi”, shtoi ai.

Xhafaj nënvizoi se, “ky proces ishte një kontribut tjetër me vlerë edhe në një aspekt tjetër me rëndësi lidhur me integrimin dhe imazhin e vendit. Një dëshmi e rritjes së vendit e institucioneve të tij edhe në një këndvështrim tjetër duke provuar se tashmë ne kemi kapacitetet për të ndërmarrë hapa të tilla, që vende të ngjashme me ne nuk kanë pasur kurajën t’i ndërmarrin”.

“Ne hartuam dhe miratuam një analizë, një Dokument Analitik prej rreth 700 faqesh, i pari dokument i këtij lloji që mban autorësinë e ekspertizës shqiptare. Analiza bën një skanim të situatës aktuale në 3 fushat, mbështetur në raportet përkatëse zyrtare të viteve të fundit, vendase dhe ndërkombëtare dhe kryesisht në gjetjet, vlerësimet, problematikat dhe rekomandimet e Raporteve të BE dhe dokumenteve ku shteti shqiptar ka shprehur angazhimet e tij në kuadër të procesit të integrimit”, shtoi Xhafaj.

“Plani Kombëtar i Veprimit përbën një tjetër vlerë dhe risi të këtij procesi. Ai është një dokument unik i këtij lloji në veprimtarinë e Kuvendit të Shqipërisë gjatë këtyre dekadave të demokracisë parlamentare në vendin tonë”, theksoi ai.

“Ky proces nuk mund të konsiderohej i plotë, pa realizimin e një procesi intensiv të konsultimit publik për të gjitha fazat e hartimit të dy dokumenteve”, tha Xhafaj, teksa përmendi 11 tryeza debati dhe diskutimi, 8 forume dialogu qytetar; 2 konferenca të nivelit të lartë për prezantimin e Analizës dhe Planit Kombëtar të Veprimit etj.

Përgjatë këtyre 14 muajve, tha më tej Xhafaj, komisioni ka përmbyllur dy fazat e para të tij dhe i ka dorëzuar Kuvendit dy dokumente parlamentare bazë: Dokumenti Analitik dhe Plani Kombëtar i Veprimit. Ai shpjegoi përmbajtjen e këtyre dokumenteve.

“Dokumenti Analitik për të tre fushat; Mirëqeverisja, Antikorrupsioni dhe Sundimi i Ligjit, është një dokument me 709 faqe dhe trajton të gjitha aspektet në 18 kapituj. Struktura e analizës është e organizuar në mënyrë të tillë që për çdo çështje të ofrohet një pasqyrë e situatës aktuale, duke shqyrtuar masat ligjore dhe institucionale të zbatuara. Për përgatitjen e kësaj analize, Ekspertët e Nivelit të Lartë kanë skanuar dhe analizuar mbi 15.000 faqe dokumente, analiza e raporte të ndryshme. Plani Kombëtar i Veprimit është një dokument që përcakton masa konkrete, horizontale dhe sektoriale, të cilat synojnë përmbushjen e detyrave dhe përgjegjësive të Kuvendit, në kuadër të procesit të negociatave të anëtarësimit të Shqipërisë BE. Plani kombëtar i veprimit përmban 56 fusha tematike të cilat adresojnë çështjet kryesore me 238 masa konkrete, nga të cilat 78 janë nisma ligjore dhe 160 masa institucionale. Këto janë dy dokumente të rëndësishëm parlamentar, produkt i punës së komisionit. Ndërkohë që kemi hapur rrugën edhe për zbatimin e masave ligjore dhe institucionale të parashikuara në Planin Kombëtar të Veprimit. Ashtu siç bëmë jo më larg se dje në diskutimin dhe konsultimin publik të dy projektligjeve si masa institucionale të propozuara në Planin Kombëtar të veprimit të shtyllës antikorrupsion dhe siç do bëjmë me procesin që pason. Dokumenti Analitik dhe Plani Kombëtar i Veprimit të miratuar e të publikuar në faqen e komisionit, përbëjnë dokumente parlamentare me rëndësi dhe janë pjesë e përgjegjësive dhe angazhimit të strukturave të Kuvendit në fushat respektive”, tha Xhafaj.

Sa i përket të ardhmes së veprimtarisë së Komisionit të Posaçëm, Fatmir Xhafaj tha se, bazuar edhe në diskutimet e deritanishme, mbështetur në Rezolutën e Kuvendit, por edhe në masat e propozuara në Planin Kombëtar të Veprimit, është e nevojshme që një Komision ose një nënkomision parlamentar i përhershëm ose një strukturë në nivel institucional që do gjykohet nga Parlamenti, të vijojë veprimtarinë e tij.

“Kjo për të vijuar me fazën e tretë të hartimit dhe miratimit të projektligjeve të identifikuara si masa nga Plani Kombëtar i Veprimit si pjesë e listës prioritare të ligjeve ashtu si dhe me vijimin e punës për realizimin e detyrës për kapitullin “III.3 – Konsolidimi i reformës në drejtësi”.  Dokumenti analitik e veçanërisht Plani Kombëtar i Veprimit bashkëngjitur janë dokumente parlamentare me vlera të shumanshme, efekti shumë pozitiv i të cilave do të përcaktohet nga shkalla e angazhimit për zbatimin e tij nga Kuvendi dhe strukturat e tij në legjislaturën e ardhshme 2025 – 2029 në funksion të ambicies sonë legjitime, Shqipëria 2030 në BE”, tha Xhafaj teksa në përfundim falënderoi kolegët deputetë pjesëmarrës në këtë komision, Grupin e Ekspertëve të Nivelit të Lartë, Sekretariatin Teknik, stafin e Kuvendit dhe të gjithë aktorët që kanë marrë pjesë aktivisht në proceset e konsultimit dhe diskutimit, vendas dhe ndërkombëtar, përfaqësues të institucioneve publike, institucioneve të pavarura, shoqërisë civile, botën akademike, komuniteti i biznesit, qytetarë, që janë angazhuar në këtë proces dhe natyrisht gazetarët e lirë të medias që kanë përcjellë mbledhjet dhe janë përpjekur të pasqyrojnë me realizëm punën që është bërë”.

/gj.m/j.p/

The post Xhafaj dorëzon në Kuvend dy dokumentet e Komisionit Antikorrupsion: Plan kombëtar veprimi që i shërben dhe negociatave appeared first on Agjencia Telegrafike Shqiptare.

TIRANË, 24 korrik /ATSH/ Autoriteti i Aviacionit Civil i Shqipërisë është njohur nga NATO për vlefshmërinë ajrore.

Lajmin e bëri të ditur Kryeministri Edi Rama, i cili u shpreh se Autoriteti i Aviacionit Civil përmbush plotësisht standardet e përcaktuara nga Aleanca e Atlantikut.

Rama e cilësoi një lajm të mirë për vendin dhe një dëshmi të përparimit të Shqipërisë në përmbushjen e kritereve ndërkombëtare në sektorin e aviacionit.

“Autoriteti i Aviacionit Civil i Shqipërisë është njohur nga NATO për Vlefshmërinë Ajrore, duke përmbushur plotësisht standardet e përcaktuara nga Aleanca e Atlantikut”, shkroi Rama në rrjetet sociale.

“NATO arrin në përfundimin se Autoriteti i Aviacionit Civil i Shqipërisë është plotësisht në përputhje me kërkesat për t’u bërë një autoritet i vlefshmërisë ajrore i njohur nga NATO, siç përcaktohet nga NAWP dhe sipas procesit të njohjes së NATO-s (NRP)”, thuhet në videon e ndarë nga kryeministri Rama.

/gj.m/j.p/

The post Rama: Autoriteti i Aviacionit Civil njihet nga NATO, përmbush plotësisht standardet appeared first on Agjencia Telegrafike Shqiptare.

TIRANË, 24 korrik /ATSH/ Seksioni për Hetimin e Krimeve Ekonomiko-Financiare të DVP Fier në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Fier, pas një pune hetimore disamujore, në kuadër të një procedimi penal të vitit 2025, ka finalizuar operacionin policor “Parking”.

Në kuadër të tij u ekzekutuan masat e sigurisë “Arrest në shtëpi” për shtetasen A. H., 34 vjeçe, banuese në Fier, ish-drejtoreshë e Përgjithshme e Taksave dhe Urbanistikës së Bashkisë Fier dhe ish-zëvendëskryetare e bashkisë Fier, për veprat penale “Shpërdorimi i detyrës” dhe “Ushtrim i ndikimit të paligjshëm ndaj personave që ushtrojnë funksione publike.

“Arrest në shtëpi” dhe “Pezullim i ushtrimit të një detyre a shërbimi publik” për shtetasin V. C., 41 vjeç, banues në Fier, drejtor në Drejtorinë e Verifikimit dhe Koordinimit në Terren për rajonin jugor në Drejtorinë Rajonale Tatimore Fier, për veprën penale “Shpërdorimi i detyrës”.

“Pezullim i ushtrimit të një detyre a shërbimi publik”, për shtetasen A. C., 38 vjeçe, banuese në Fier, Drejtoreshë në Drejtorinë e Taksave dhe Tarifave Vendore në Bashkinë Fier, për veprën penale “Shpërdorimi i detyrës”.

“Pezullim i ushtrimit të një detyre a shërbimi publik” dhe “Ndalimi i daljes jashtë shtetit”, për shtetasin M. D, 57 vjeç, banues në Fier, sekretar i Përgjithshëm i Bashkisë Fier, për veprën penale “Ushtrimi i ndikimit të paligjshëm ndaj personave që ushtrojnë funksione publike”.

Këta shtetas, duke mos vepruar sipas kuadrit ligjor për vendosjen e kasës së fiskalizimit për parkimin nëntokësor që administron bashkia Fier, nuk kanë arkëtuar shumën prej rreth 40 milionë lekë në arkat e bashkisë Fier.

Gjithashtu, këta shtetas nëpërmjet shpërdorimit të detyrës kanë ulur taksat e subjekteve të ndryshme tregtare në Fier kundrejt përfitimit.

Materialet i kaluan Prokurorisë Fier, për veprime të mëtejshme.

/gj.m/j.p/

The post Nuk arkëtuan 40 milionë lekë nga taksat e parkingut, arrest shtëpie për ish-nënkryetaren e bashkisë Fier dhe 3 zyrtarë appeared first on Agjencia Telegrafike Shqiptare.

TIRANË, 17 korrik /ATSH/ 4 shtetas janë proceduar penalisht në Durrës pasi ndotën mjedisin duke hedhur mbeturina në trotuar

Shërbimet e Komisariatit të Policisë Durrës, nga kontrollet e vazhdueshme në terren, për evidentimin dhe goditjen e paligjshmërive, bazuar dhe në ankesat e qytetarëve, kanë konstatuar se në lagjen nr. 1, Durrës, ishin hedhur mbeturina të ndryshme në rrugë, që kishin shkaktuar ndotje të mjedisit.

Në vijim të veprimeve për këtë rast, u referuan materialet në Prokurori ku nisi procedimi penal për shtetasit K. K., 42 vjeç, M. Ç., 50 vjeç, P. M., 45 vjeç dhe R. U., 35 vjeç, banues në Tiranë dhe në Durrës, pasi dyshohet se kanë hedhur vazhdimisht në rrugë, jashtë koshave, mbeturina të ndryshme të lokaleve të tyre.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës.

1 nga 2

/gj.m/j.p/

The post Hodhën mbeturina në trotuar, procedohen penalisht 4 shtetas në Durrës appeared first on Agjencia Telegrafike Shqiptare.

TIRANË, 17 korrik /ATSH/ Çdo qytetar ka të drejtën për akses të barabartë në drejtësi, pavarësisht gjendjes ekonomike, sepse drejtësia është një e drejtë, jo një privilegj.

Prezenca e OSBE në Shqipëri, në vijim të nismës për fuqizimin e bashkëpunimit ndërmjet Drejtorisë së Ndihmës Juridike Falas dhe pushtetit vendor, këtë javë, zhvilloi takime informuese dhe bashkëpunuese në bashkitë Fushë-Arrëz, Malësi e Madhe dhe Vau i Dejës.

Këto takime shërbyen për të ndërtuar ura bashkëpunimi, jo vetëm me përfaqësues vendorë, por edhe me organizata të shoqërisë civile që veprojnë në fushën e të drejtave të njeriut dhe mbështesin qytetarët për të pasur akses më të mirë në sistemin e drejtësisë.

“Përmes bashkëbisedimeve me qytetarët në terren dhe me përfshirjen në media lokale, përhapëm më gjerësisht informacionin mbi të drejtën për ndihmë juridike falas për ata që kanë më shumë nevojë”, theksoi Prezenca e OSBE në një postim në rrjetet sociale.

Sipas prezencës së OSBE, kjo qasje gjithëpërfshirëse synon të forcojë ndërgjegjësimin dhe të sigurojë që askush të mos mbetet pa zë për shkak të pamundësisë ekonomike.

1 nga 19

/gj.m/j.p/

The post Prezenca e OSBE, takime informuese në disa bashki për ndihmën juridike falas appeared first on Agjencia Telegrafike Shqiptare.

TIRANË, 17 korrik /ATSH/ Kryetarja e Kuvendit, Elisa Spiropali po zhvillon sot një vizitë zyrtare në Turqi.

Spiropali u prit në një takim nga kryetari i Parlamentit të Turqisë, Numan Kurtulmuş.

Në një konferencë të përbashkët për shtyp, pas takimit Spiropali u shpreh se, “përgjatë vitit 2023 u shënua 100-vjetori i marrëdhënieve diplomatike mes dy vendeve tona”.

“Ne kemi dëshmuar sesi në më shumë se një shekull kjo marrëdhënie, jo thjesht është forcuar, por veçanërisht gjatë viteve të fundit është institucionalizuar në forma konkrete bashkëpunimi, në fusha si ekonomia, shëndetësia, siguria dhe mbrojtja, turizmi, arsimi, ku shtrihet dhe potenciali i përbashkët i këtij partneriteti strategjik”, deklaroi ajo.

Spiropali theksoi se, nuk ndodh shpesh që marrëdhëniet mes shteteve të kenë si garanci këto kolona të fuqishme.

“Marrëdhëniet tona i përkasin atij rasti fatlum dhe me presidentin Kurtulmuş dhe asamblenë e madhe kombëtare po i fuqizojmë ato. Prej atyre askush nuk humbet, por të gjithë fitojnë. Fiton në radhë të parë zhvillimi, bashkëpunimi dhe paqja e siguria në rajon dhe më gjerë”, tha Spiropali.

“Shqipëria dhe Turqia prodhojnë dhe i japin botës siguri e paqe, të cilat janë të nevojshme në çdo kohë, por janë të një rëndësie kritike në kohën që jetojmë ku retë e luftës nuk janë më në horizont, por rrotull vendeve tona”, tha Spiropali.

“Ne ramë dakord ta intensifikojmë bashkëpunimin e shkëlqyer mes Kuvendit dhe Asamblesë së madhe Kombëtare si në nivelet më të larta ashtu edhe mes komisioneve parlamentare e grupeve të miqësisë dhe deputetëve si dhe mbështetjen e kandidaturave respektive në organizatat parlamentare shumëpalëshe “, theksoi Kryetarja e Kuvendit.

“Shqipëria po përgatitet e do të bashkëpunojë ngushtë me Turqinë dhe aleatët e tjerë për suksesin e Samitit të NATO-s 2027 në Tiranë, duke pasur parasysh dhe faktin që Turqia do të mirëpresë samitin në vitin 2026”, tha Spiropali

Duke folur për marrëdhëniet ekonomike, Spiropali u shpreh se, “Turqia është partneri i katërt tregtar i Shqipërisë. Investimet turke në një vlerë prej rreth 3.7 miliardë dollarë, kanë krijuar përveç zhvillimit, edhe punësim dhe vende të reja pune. Rreth 15 mijë shqiptarë punojnë në kompanitë turke që operojnë në Shqipëri”.

“Ne do të vijojmë bashkëpunimin në marrëdhëniet ekonomiko-tregtare, të shfrytëzojmë të gjithë potencialin tonë të përbashkët, duke shfrytëzuar potencialet posaçërisht në sektorët e sigurisë, mbrojtjes, energjisë së rinovueshme, infrastrukturës, zhvillimit të qëndrueshëm, turizmit e mjedisit, bashkëpunimit universitar, bujqësisë, agro-përpunimit, etj”, deklaroi Spiropali.

Kryetarja e Kuvendit falënderoi Turqinë, Presidentin Erdogan dhe Presidentin e Asamblesë së Madhe Kombëtare Kurtulmuş, për mbështetjen e Kosovës për lobimin për njohjen ndërkombëtare dhe ndalimin e fushatës agresive të disa shteteve për anulimin e njohjeve, institucionalizimin e marrëdhënieve me NATO-n, anëtarësimin në Këshillin e Europës dhe pjesëmarrjen në veprimtaritë rajonale e shumëpalëshe.

“Ne i jemi mirënjohës 18 anëtarëve të delegacionit të Turqisë në Asamblenë Parlamentare të Këshillit të Europës që mbështetën Rezolutën për pranimin e Kosovës, në prill 2024”, tha Spiropali.

“Shqipëria do të vijojë qëndrimin e palëkundur në mbrojtje të integritetit territorial, sovranitetit dhe pavarësisë së Ukrainës, në përputhje me qëndrimin e BE-së, SHBA-së dhe partnerëve të tjerë”, tha Spiropali.

“Në këtë pikë, dëshiroj të shpreh vlerësimin tim edhe për përpjekjet e vazhdueshme dhe rolin aktiv të udhëheqësis turke, Presidentit Erdogan, në ndërmjetësimin e bisedimeve dhe negociatave për paqe. Edhe një herë tjetër, Turqia po tregon se diplomacia është dhe duhet të mbetet mekanizmi më i mirë për paqe e stabilitet në rajon, kontinent dhe më gjerë”, tha Spiropali.

“Shqipëria mban një qëndrim të qartë si në raport me bashkëpunimin rajonal që ne kemi, por dhe në organizata ndërkombëtare edhe në partneritete të tjera, ku Shqipëria vërtetë mund konsiderohet një vend i vogël, por është një vend luajal, një vend që gjithmonë ka bërë më shumë përpjekje, ka dhënë më shumë kontribute sesa kapacitetet e tij dhe për këtë besoj se prestigji i saj ndërkombëtar, ashtu edhe ndikimi i saj është rritur. Ju përmendët marrëdhëniet e shkëlqyera mes Presidentit Erdogan dhe Kryeministrit Rama, të cilat po ashtu rrezatojnë nivelin e marrëdhënieve shumëplanëshe dhe uroj që ky bashkëpunimin, edhe pse aktualisht është i shkëlqyer mes dy kuvendeve tona të vijojë të zhvillohet, të intensifikohet dhe të shkëmbejmë përvoja edhe për rrugën tonë të integrimit në BE, të cilën ju e mbështesni pa rezerva si për Shqipërinë, ashtu dhe për vendet e tjera të rajonit tonë dhe Ballkanit Perëndimor”, përfundoi Spiropali.

/gj.m/j.p/

The post Spiropali në Turqi: Marrëdhënie e institucionalizuar në forma konkrete bashkëpunimi appeared first on Agjencia Telegrafike Shqiptare.

TIRANË, 17 korrik /ATSH/ Kryetarja e Kuvendit, Elisa Spiropali po zhvillon sot një vizitë zyrtare në Turqi.

Spiropali u prit në një takim nga kryetari i Parlamentit të Turqisë, Numan Kurtulmuş.

Në një konferencë të përbashkët për shtyp, pas takimit Kurtulmuş u shpreh se, takimi ishte mjaft i frytshëm teksa janë ngritur grupet e miqësisë në të dy parlamentet përkatëse.

“Kontaktet bilaterale vazhdojnë dhe ramë dakord për t’i vazhduar këto kontaktet edhe nëpërmjet komisioneve të specializuara”, u shpreh ai.

Po ashtu, theksoi ai, “në Shqipëri ne vazhdojmë bashkëpunimin tonë në platformat e përbashkëta. Jemi dy vende mike, jemi dy vende aleate që ndajmë mendimet e përbashkëta në struktura të tilla rajonale midis vendeve të Ballkanit”.

Ai theksoi se, marrëdhëniet dypalëshe do të zhvillohen akoma edhe më shumë në të ardhmen.

“Patëm mundësi që të rikonfirmojmë edhe një herë këto qasje të përbashkëta. Ne jemi për paqen dhe stabilitetin në Ballkan sidomos në kohët e sotme kur bota po kalon një turbulencë të madhe. Pothuajse në çdo rajon kemi tensione dhe konflikte të armatosura. Është shumë e rëndësishme. I kushtojmë shumë rëndësi paqes dhe stabilitetit në Ballkan. Divergjencat që ekzistojnë duhet të zgjidhen nëpërmjet dialogut. Këtu kemi qasje të përbashkët si Shqipëria dhe Turqia”, tha Kurtulmuş.

Kryeparlamentari turk u shpreh se, “Turqia dhe Shqipëria janë dy vende dhe dy popuj që kanë marrëdhënie të lashta, të vjetra që prej 6 shekujsh kanë bashkëjetuar. Jemi dy popuj që kemi histori të përbashkët, të kaluar të përbashkët”.

Ai theksoi se edhe interesat janë të përbashkëta dhe duhet të çohen përpara marrëdhëniet.

Kurtulmuş përmendi fushat si trashëgimia kulturore apo tregtia, për të rritur shkëmbimet tregtare.

“800 kompani turke operojnë në Shqipëri dhe këto në aspektin e forcimit të marrëdhënieve mes dy vendeve janë të rëndësishme”, tha ai.

Po ashtu, shtoi Kurtulmuş, “me Shqipërinë, në shumë platforma ndërkombëtare, kryesisht në NATO, kemi çështje ku mbështesim njëri-tjetrin.”

“Po hyjmë në një proces që duhet të kemi shumë kujdes. Bota po riformësohet edhe në aspektin politik, edhe ekonomik. Jemi në pikënisjen e kësaj. Sistemi i vjetër po shkatërrohet. Do kemi krijimin e një ekuacioni global ku kemi një botë shumë polare, shumë qendrore dhe padyshim dhe Ballkani do të bëhet një rajon akoma dhe më i rëndësishëm, jo vetëm në aspektin e avantazheve që i sjell pozicioni gjeografik, por edhe multikulturalizmi që bart në vetëve dhe do të zërë një vend më të rëndësishëm, një vend më me ndikim në arkitekturën botërore globale”, tha ai.

“Do të ndihmojmë në arritjen e kësaj situate, do të intensifikojmë bashkëpunimet, për ta shndërruar Ballkanin në një rajon që ofron paqe dhe stabilitet”, tha Kurtulmuş.

/gj.m/j.p/

The post Kryeparlamentari turk Kurtulmuş: Interesa të përbashkëta me Shqipërinë, me rëndësi stabiliteti në Ballkan appeared first on Agjencia Telegrafike Shqiptare.

TIRANË, 17 korrik /ATSH/ Kryetari i Partisë Demokratike, Sali Berisha deklaroi sot se, asnjë ndërtesë e prishur në Theth nuk është në zonën e mbrojtur, të gjitha janë në zonën urbane.

Në një konferencë për shtyp, Berisha theksoi se, “Thethi përbën në historinë e Shqipërisë një nga krimet shtetërore më të rënda, më të shëmtuara”.

Sipas tij, “Edi Rama e ka shndërruar Thethin në një shesh shkatërrimi, në të cilin ky fshat, kjo zonë nuk është shndërruar kurrë nga asnjë pushtues, qoftë edhe më barbarët”.

Berisha theksoi se, “asnjë ndërtesë nuk ishte në zonën e mbrojtur, të gjitha ndërtimet janë në zonat urbane”.

“Po, Thethi është park kombëtar, por Thethi ka një zonë urbane ku ndërtohet”, theksoi Berisha.

“Asnjë ndërtim në tokë publike, as edhe në tokën e tjetrit, të gjitha në tokën e vet. Ndërtime druri, siç përcakton rregullorja për Thethin, druri ose guri”, tha Berisha më tej.

Berisha shtoi se, në Theth nuk kanë votuar PS-në, por kanë votuar PD-në.

Kreu i PD-së publikoi rezultatin e qendrës së votimit për zonën ku u prishën ndërtimet në Theth.

“PD në këtë qendër ka marrë 95 vota dhe PS 82 vota. Pra, nuk kanë votuar PS-në, kanë votuar PD-në dhe kjo është hakmarrja primitive, kriminale e Edi Ramës ndaj tyre”, tha Berisha.

Ai u bëri thirrje banorëve të Thethit, Shkodrës dhe mbarë Shqipërisë “të ngrihemi për t’u ndarë në mënyrë përfundimtare nga kjo e keqe e madhe që po rrënon çdo ditë shqiptarët dhe qenien e tyre”. /gj.m/j.p/

The post Berisha: Asnjë ndërtesë e prishur në Theth nuk ishte në zonën e mbrojtur appeared first on Agjencia Telegrafike Shqiptare.