I dyshuari për “Krime lufte kundër popullsisë civile”, me inicialet R.M sot ka dalë sot para Gjykatës Themelore në Prishtinë.

Ai u arrestua ditë më parë në Prishtinë nga Policia e Kosovës.

Ai dyshohet për pjesëmarrje në masakrimin e 34 civilëve shqiptarë në fshatin Burim të Malishevës, më 1999.

“R.M., dyshohet se gjatë luftës në Kosovë, në periudhën 29-31 mars 1999, në bashkëkryerje me pjesëtarë të forcave policore dhe ushtarake serbe, ka marrë pjesë në masakrën e 34 civilëve shqiptarë në fshatin Burim, Komuna e Malishevës”, tha Prokuroria më herët, ndërsa theksoi se gjatë fazës së hetimeve janë siguruar prova materiale, përfshirë dëshmi të dëshmitarëve okularë dhe të mbijetuarve.

Seanca mbahet e mbyllur për media./KP/

The post I dyshuari për krime lufte del para Gjykatës Themelore në Prishtinë appeared first on Telegrafi.

Skënderbegas i Gramshit po përballet me një situatë të vështirë zjarri, ku çdo minutë është me rëndësi.

Për t’u ardhur në ndihmë emergjencave lokale dhe Forcave të Armatosura të dislokuara në zonë, janë angazhuar edhe zjarrfikës nga Korça dhe Pusteci.

Kështu ka bërë të ditur ministri i Mbrojtjes, Pirro Vengu përmes një postimi në Facebook.

Vengu tha se zjarrfikësit po punojnë për të mbyllur përfundimisht një front të rrezikshëm të zjarrit dhe për të eliminuar çdo mundësi të riaktivizimit të flakëve.

“Në Skënderbegas të Gramshit, çdo minutë ka rëndësi. Në ndihmë të emergjencave lokale dhe Forcave të Armatosura në zonë, janë dislokuar edhe zjarrfikës nga Korça dhe Pusteci , për të mbyllur përfundimisht një front të vështirë dhe për të eliminuar çdo mundësi riaktivizimi të zjarrit”, ka shkruar Vengu. /Telegrafi/

The post Zjarri në Skënderbegas të Gramshit, shtohen forcat në terren për të vënë nën kontroll situatën appeared first on Telegrafi.

Policia e Kosovës në Ferizaj gjatë të mërkurës ka ndërhyrë në dy raste ku ka sekuestruar dy armë zjarri.

Sipas njoftimit në ora 11:00 një grua ka raportuar se ishte sulmuar fizikisht dhe kërcënuar nga bashkëshorti i saj mashkull, kosovar, i moshës 43 vjeç.

Nga i dyshuari është  konfiskuar një pushkë gjysmëautomatike dhe 9 fishekë. Me vendim të prokurorit të shtetit, pas intervistimit nga policia është ndaluar për 48 orë.

Ndërsa në ora 22:30 gjatë një ahengu familjar në Ferizaj, i dyshuari mashkull, kosovar, i moshës 61 vjeç, kishte shtënë disa herë në ajër me armë zjarri.

Në këtë rast është konfiskuar një armë dhe 6 gëzhoja. Pas intervistimit nga policia, me vendim të prokurorit të shtetit është liruar në procedurë të rregullt.

Në të dy rastet janë iniciuar veprat penale për “Mbajtje në pronësi, kontroll ose posedim të paautorizuar të armëve”, dhe “Lëndim i lehtë trupor “, ndërsa në rastin e dytë edhe për “Përdorim të armës apo mjetit të rrezikshëm”. /Telegrafi/

The post Policia në Ferizaj sekuestron dy armë – një rast dhunë në familje, tjetri gjuajtje në ajër appeared first on Telegrafi.

Gazeta Insajderi ka siguruar pamje që tregojnë që pos tre personave që humbën jetën në Gjilan, edhe i dyshuari për fajde, Mefail Shkodra me dy të bijët që janë ende në arrati kanë pësuar nga përleshja.

Derisa babai nuk ka ndonjë pasojë, i biri i tij, Engjell Shkodra është i plagosur me armë zjarri.

Ai ka plagën ne njërin krah, por ende nuk dihet kush e shkaktoi këtë plagë.

I biri i tij tjetër, gjatë përleshjes që përfundoi me tre viktima e një në gjendje të rëndë, në QKUK ende, Edonis Shkodra është në gjendje të rëndë. Pamjet tregojnë që ai ka goditje në pjesën e prapme të kokës, dhe jo vetëm.

Si shpërtheu konflikti?

Më 21 korrik 2025, Mefail Shkodra është marrë në pyetje në lidhje me një rast të iniciuar nga Bujar Hoxha.

Dhjetë ditë më vonë më 31 korrik, ai dorëzon një kallëzim penal për deklarim të rrejshëm ndaj të njëjtit person.

Por gjithçka merr një kthesë të errët në një takim.

Takimi ishte thirrur nga Edmond Hasani, i cili kishte ftuar Mefail Shkodrën për një bisedë “miqësore”.

Gazeta Insajderi ka siguruar edhe një audio-incizim nga nisja e konfliktit e deri tek vrasja.

Aty dëgjohet Mefail Shkodra që thotë se e ka të ndaluar të takohet me Bujar Hoxhën sepse janë në proces gjyqësor.

“Unë e ti Bujari ulemi në tavolinë folim dhe e gjajmë vërtetën se për ketë punë jemi ardh këtu”, thotë dikush nga viktimat.

“Bujari është këtu”, dëgjohet një zë në video.

“Nuk guxon me ma pru Bujarin këtu, s’guxon. Unë jam proces me Bujarin e kam ndalune Të zatetem me të”, iu kthye Mefail Shkodra.

“Na ju kemi thirr disa herë mu zatet me Bujarin, tash e keni ndalune mu zatet me ta”, dëgjohet duke thënë pala tjetër.

“Ja thirri policinë”, dëgjohet teksa thotë dikush.

Pas kësaj, fillojnë edhe të shtënat me armë ku humbin jetën tre persona.

Insajderi ka siguruar edhe biseda të realizuara para takimit. Edhe aty Mefail Shkodra kërkon që në takim të mos jetë Bujar Hoxha.

Dyshohet që përleshjen e kanë filluar viktimat.

Takimi ndodhi në kafenenë ku Mefail Shkodra pinte rregullisht kafen e tij.

Në lokal ishin vetëm Edmond Hasani dhe Naim Hoxha, vëllai i Bujarit.

Gjithçka ndryshoi për pak sekonda. Në kafene, shfaqet Bujar Hoxha, i shoqëruar nga dy persona të tjerë.

Nga babai i tij Abedin Hoxha dhe nga vjehrri i tij Selami Hasani. Mefail Shkodra, i lutet me ngulm Edmond Hasanit që t’i ndalojë të hyjnë në lokal, duke theksuar se ndodhen në mes të një procesi penal.

Ai çohet për të kontaktuar policinë. Sipas burimeve, Mefail Shkodra nuk kishte asnjë raport me personat tjerë, përveç Bujar Hoxhës.

Takimi ishte thirrur me kërkesën e Edmond Hasanit, pasi përmbaruesi kishte bllokuar llogaritë bankare të Bujar Hoxhës –për një borxh të papaguar për veturën Audi Q5, të blerë nga vetë Mefaili.

Përmbarues në këtë rast ka qenë Përparim Xhelili. I njëjti ka konfirmuar për Insajderin se llogaritë i ishib bllokuar para dy jave Bujar Hoxhës.

Inspektorati Policor i Kosovës ka ndërmarrë masa drastike, duke suspenduar katër zyrtarë policorë, mes tyre: Bekim Sabedini, Metush Arifi, Ardian Demiri dhe Shaban Hajdaraj. Bekim Sabedini dhe Metush Arifi janë parë në shoqërinë e Albert Rexhepit i njohur si Albert Malisheva, i cili në vitin 2024 ishte burgosur pastaj ishte lene në arrest shtëpiak për fajde, e Mefail Shkodra bashkë me djalin e tij Edonisin ishin në paraburgim për këtë rast.

Kush janë viktimat?

Sipas informacioneve të siguruara nga Gazeta Insajderi, Bujar Hoxha është një nga personat kyç të përfshirë në këtë ngjarje. Burime të afërta bëjnë të ditur se thelbi i konfliktit që çoi në vrasjen e trefishtë ka nisur pikërisht nga Bujar Hoxha.

Në prill të këtij viti, Bujar Hoxha kishte denoncuar në polici Mefail Shkodrën për fajde. Prokuroria Speciale konfirmoi se Hoxha kishte dorëzuar edhe një kallëzim penal ndaj Shkodrës.

Fajdexhiu nga Gjilani, pasi ishte marrë në pyetje nga Prokuroria, ishte lënë i lirë në procedurë të rregullt.

Konflikti që përfundoi tragjikisht nisi pas denoncimit që Hoxha i bëri në polici Shkodrës.

Aktualisht, Bujar Hoxha po trajtohet në QKUK, gjendja e tij është e stabile.

Viktimat janë babë e bir, Selami Hasani dhe Edmond Hasani, të njohur si argjendarë në Gjilan, dhe dyshohet se u vranë nga njerëz të përfshirë në fajde.

I dyshuari për vrasjen është Mefail Shkodra dhe dy djemt e tij që aktualisht ndodhen në arrati./Insajderi/

The post Njëri i lënduar, tjetri i plagosur – çka ndodhi me Mefail Shkodrën dhe djemtë e tij pas rastit tragjik në Gjilan appeared first on Telegrafi.

Departamenti i Përgjithshëm, ka refuzuar si të pabazuara ankesat e mbrojtësve të të pandehurve Liman Sallauka, Xhevat Sallauka, Nexhmi Krasniqi dhe Ramadan Paçarizi, duke vërtetuar aktvendimin e Gjykatës Themelore në Prizren të datës 6 gusht 2025, me të cilin të njëjtëve u është caktuar masa e paraburgimit prej një muaji, nga data 4 gusht deri më 4 shtator 2025.

Aksionin e arrestimit dhe hetimet i ka udhëhequr kryeprokurori i Prokurorisë Themelore të Prizrenit, Petrit Kryeziu.

Gjykata Themelore në Prizren, përmes vendimit të 6 gushtit 2025, kishte caktuar masën e paraburgimit ndaj Liman Sallaukës, Xhevat Sallaukës, Nexhmi Krasniqit dhe Ramadan Paçarizit, të arrestuar nën dyshimin për detyrim, armëmbajtje pa leje dhe shmangie nga tatimi, raporton “Betimi për Drejtësi”.

Për arrestimin e katër të dyshuarve, Betimi për Drejtësi kishte raportuar me 4 gusht 2025.

Sipas Apelit, vendimi i Themelores është i drejtë dhe nuk përmban shkelje të dispozitave ligjore, ndërsa ekziston dyshimi i bazuar se të pandehurit kanë kryer veprat penale për të cilat dyshohen, në bazë të provave materiale dhe shkresave të lëndës.

Lexo po ashtu Caktohet 30 ditë paraburgim për kolonelin e Policisë, Nexhmi Krasniqi

Gjykata ka vlerësuar se lënia e tyre në liri do të rrezikonte asgjësimin, fshehjen, falsifikimin apo ndryshimin e provave, si dhe do të ndikonte në dëshmitarë dhe të dëmtuar. Duke marrë parasysh peshën e veprave penale, mënyrën dhe rrethanat e kryerjes, si dhe karakteristikat personale të të pandehurve, Apeli ka konstatuar se masa e paraburgimit është e domosdoshme dhe e arsyeshme në këtë fazë të procedurës.

Sipas vendimit të Themelores, ekziston dyshimi i bazuar se Liman Sallauka, Xhevat Sallauka, Nexhmi Krasniqi dhe Ramadan Paçarizi, gjatë muajve nëntor–dhjetor 2024, kanë vepruar si anëtarë të një grupi për të detyruar të dëmtuarin E.M. të tërhiqej nga një marrëveshje shitjeje toke, duke i shkaktuar atij dëm pasuror dhe duke përfituar në mënyrë të kundërligjshme. Gjithashtu, ndaj Ramadan Paçarizit rëndon edhe dyshimi për shmangie nga tatimi, pasi dyshohet se nuk ka deklaruar qarkullimin real të një transaksioni prej 250 mijë eurosh, duke iu shmangur detyrimeve tatimore për 130 mijë euro.

“Betimi për Drejtësi” kishte raportuar mbi përmbajtjen e dosje së prokurorisë për caktim të masës së paraburgimit ndaj katër të dyshuarve përfshirë këtu edhe Krasniqin i cili kishte shërbyer si drejtor i Policisë në Prizrenit.

Po ashtu, “Betimi për Drejtësi” ka raportuar lidhur me atë se çka u sekuestrua gjatë kontrollit të shtëpive në rastin ndaj Nexhmi Krasniqi dhe të tjerëve.

Ndryshe në njoftimin e Prokurorisë thuhet se gjatë kontrollit u sekuestruan përveç armëve edhe telefona mobil e elektroshok./BetimipërDrejtësi/

The post Apeli lë në fuqi paraburgimin për Nexhmi Krasniqin dhe të tjerët në rastin e detyrimit dhe shmangies nga tatimi appeared first on Telegrafi.

Shqipëria po përballet me një situatë të rënduar nga zjarret në disa zona të vendit, ku përpjekjet për shuarjen e flakëve vijojnë pandërprerë.

Kryeministri Edi Rama ka deklaruar se kjo është një ditë “sakrifice dhe krenarie” për të gjitha strukturat shtetërore që janë angazhuar në operacionet e emergjencës.

Sipas të dhënave të përditësuara nga qeveria, gjatë 24 orëve të fundit janë evidentuar 34 vatra aktive, ndërsa 13 prej tyre janë izoluar dhe shuar.

“Një ditë sakrifice dhe krenarie për të gjitha strukturat shtetërore, që vijojnë pa ndërprerje përpjekjet në terren për shuarjen e flakëve në të gjithë vendin”, shkroi Rama në një postim në Facebook.

Në terren janë angazhuar mbi 600 forca të Forcave të Armatosura, zjarrfikës, punonjës bashkiakë dhe vullnetarë.

Rama gjithashtu ka njoftuar se dhjetëra mjete zjarrfikëse dhe automjete transporti janë në terren përfshirë: 5 helikopterë dhe 1 avion zjarrfikës Canadair, i ofruar nga Italia

Qindra autoambulanca dhe mjete për evakuimin e banorëve.

Ndër zonat që kërkojnë vëmendje të veçantë janë: Delvina, Poliçani, Gramshi, Dropulli, Finiqi, Berati, Tepelena dhe Bulqiza, ku operacionet ajrore dhe tokësore janë në vijim.

Kryeministri nënvizoi gatishmërinë maksimale të strukturave shtetërore, ndërsa theksoi rëndësinë e bashkëpunimit me partnerët evropianë dhe Emiratet, që po mbështesin përballimin e kësaj situate të vështirë. /Telegrafi/

The post Shqipëria në luftë me flakët, Rama: Mbi 600 forca në terren – kemi ndihmë edhe nga Italia appeared first on Telegrafi.

Kryetari i Partisë Demokratike të Kosovës, Memli Krasniqi, ka zhvilluar një vizitë në Hagë, ku është takuar me ish-Presidentin Hashim Thaçi dhe ish-Kryetarin e Kuvendit, Kadri Veseli, të cilët prej afër pesë vitesh po mbahen në paraburgim nga Dhomat e Specializuara të Kosovës.

Krasniqi tha se takimi ishte i ngrohtë dhe emocionues, duke theksuar se “në çdo fjalë të tyre, e ndjeva të gjallë bindjen e palëkundur se drejtësia për çlirimtarët tanë po afrohet.”

Ai theksoi se Thaçi dhe Veseli vazhdojnë të jenë në gjendje të mirë shëndetësore dhe mbajnë moral të lartë, përkundër sfidave të një procesi që ai e cilëson si të tejzgjatur dhe të padrejtë.

“Liria, askund e asnjëherë, nuk është as mëkat e as faj. Ata janë mirë, optimistë dhe, si gjithmonë, dërgojnë përshëndetjet më të ngrohta për secilin prej jush,” shkroi Krasniqi.

Sipas Krasniqit, dy liderët historikë janë të lidhur përditë me zhvillimet në Kosovë, gëzohen për lajmet e mira dhe ndajnë dhimbjen me popullin në momente të vështira.

“Por, mbi të gjitha, besojnë fuqimisht në një të ardhme më të ndritur për vendin tonë, një të ardhme që ndërtohet me punë, me vizion dhe me vullnet të pathyeshëm,” shtoi ai.

Krasniqi përmbylli postimin me fjalët e Hashim Thaçit:“Dielli do të lind përsëri!”. /Telegrafi/

The post Krasniqi viziton Thaçin e Veselin në Hagë: Ata mbeten të fortë, drejtësia po afrohet appeared first on Telegrafi.

Emiratet e Bashkuara Arabe (UAE) i vijnë në ndihmë Shqipërisë për situatën e paprecedentë të zjarreve këtë vit.

Ata dërguan helikopterë Black Hawk të Forcës Ajrore, që janë dislokuar në bazën ajrore të Kuçovës dhe po operojnë efektivisht në zjarret në të gjithë territorin e vendit, duke qenë një ndihmë shumë e madhe në mbështetje të strukturës nga toka për fikjen e zjarreve.

Gjeneral Brigade, Mudhafar Al Amri, Drejtor në Detyrë i Shpëtimit dhe Zjarrfikës, Autoriteti i Mbrojtjes Civile në Abu Dabi, ishte sot në terren për të ndjekur nga afër operacionet për fikjen e zjarreve në zonën e Gramshit, ku theksoi edhe një herë gatishmërinë e vendit të tij për të ofruar ndihmë për Shqipërinë në këtë situatë të rënduar me zjarret, shkruan A2 CNN.

Drejtori i Përgjithshëm i Agjencisë Kombëtare të Mbrojtjes Civile (AKMC), Haki Ҫako e falënderoi për ndihmën konkrete, që po jep rezultat në terren.

The post Dy “Black Hawk” nga Emiratet zbarkojnë në Shqipëri për betejën kundër flakëve appeared first on Telegrafi.

Ish-deputeti i AAK-së, Besnik Tahiri ka kritikuar ashpër Qeverinë e Kosovës për mungesë reagimi dhe mbështetje ndaj Shqipërisë, e cila po përballet prej ditësh me zjarre të mëdha në disa rajone.

“Flamuri s’fik zjarrin! Shqipëria po digjet qe disa ditë, e qeveria jonë veç hesht, një fjalë e as një veprim të vetëm mbështetës”, ka shkruar Tahiri në një postim në Facebook.

Ai akuzoi ekzekutivin për qasje selektive ndaj çështjeve kombëtare, duke shtuar se: “Kur ju duhen votat, e vendosin flamurin kombëtar në çdo cep. E kur shteti amë ka nevojë për ndihmë, asnjë lëvizje.”

Tahiri bëri thirrje për veprim konkret.

“Patriotizmi matet me vepra, jo me fjalime e përralla”, ka shkruar ai.

Deri tani, nga institucionet zyrtare të Kosovës nuk ka pasur ndonjë njoftim publik për mbështetje ndaj Shqipërisë lidhur me situatën e emergjencës nga zjarret. /Telegrafi/

The post “Flamuri s’fik zjarrin!”, Tahiri kritikon qeverinë për mungesë reagimi ndaj zjarreve në Shqipëri appeared first on Telegrafi.

Pas vendimit të Gjykatës Komerciale dhe njoftimit të pranuar nga Zyra e Rregullatorit për Energji (ZRrE), KESCO ka njoftuar bizneset në tregun e hapur të energjisë elektrike se procesi i zgjedhjes së furnizuesit vazhdon sipas afateve të përcaktuara në njoftim.

Në mënyrë që të sigurohet furnizimi i pandërprerë me energji elektrike gjatë fundjavës, KESCO ka marrë vendimin që “të punojë me kapacitete të shtuar për pranimin e konsumatorëve që nuk kanë nënshkruar ende kontratë, deri më 15 gusht 2025 (e premte), ora 12:00 në mesditë”.

“Nga e hëna, procesi i nënshkrimit të kontratave do të vijojë rregullisht, në përputhje me afatet kohore të përcaktuara në rregullat e tregut”, njofton KESCO.

Ky veprim është në përputhje me rregullat e tregut dhe synon të shmangë ndërprerjet e mundshme të furnizimit për bizneset që janë pjesë e tregut të hapur të energjisë elektrike.

KESCO fton të gjithë konsumatorët biznesorë që të mos vonohen në procedurat për nënshkrimin e kontratave.

“Ju ftojmë të veproni pa vonesë për të siguruar vazhdimësinë e furnizimit tuaj me energji elektrike”, thuhet në njoftim. /Telegrafi/

The post Vendimi i Gjykatës Komerciale, KESCO fton bizeneset të nënshkruajnë kontratat e furnizimit me energji deri më 15 gusht appeared first on Telegrafi.

Gjykata Kushtetuese ka shpallur aktgjykimin në rastin KO141/24, duke vlerësuar se paragrafi 1 i nenit 11 të Statutit nr. 01/2023 të Shërbimit Spitalor dhe Klinik Universitar të Kosovës është në kundërshtim me Kushtetutën.

Kushtetuesja ka konstatuar se ky paragraf i Statutit të ShSKUK-së i miratuar përmes Vendimit të Qeverisë së Kosovës, nuk është në pajtueshmëri me paragrafin 1 të nenit 51 [Mbrojtja Shëndetësore dhe Sociale] në lidhje me paragrafin 1 të nenit 7 [Vlerat] dhe paragrafin 4 të nenit 92 [Parimet e Përgjithshme] të Kushtetutës.

Ky paragraf përcakton shërbimet shëndetësore që ofrohen në spitalet e përgjithshme, por nuk përfshin kujdesin mendor si shërbim dytësor.

Avokati i Popullit kishte kontestuar këtë dispozitë, duke theksuar se përjashtimi i kujdesit mendor kufizon të drejtat shëndetësore të qytetarëve dhe nuk është në përputhje me ligjet në fuqi për shëndetësinë dhe shëndetin mendor.

Në aktgjykim, Gjykata thekson se Ligji për Shëndetin Mendor përcakton qartë se “shërbimet e kujdesit mendor ofrohen në nivel të kujdesit dytësor shëndetësor përmes Departamenteve të Psikiatrisë në spitalet e përgjithshme”, ndërsa Akti i kontestuar “nuk ka përfshirë shërbimet e kujdesit mendor në këtë listë të ofrimit të shërbimeve, ashtu siç përcaktohet me ligj”.

Gjykata urdhëroi Qeverinë e Kosovës që ta ndryshojë këtë dispozitë për t’u përputhur me Kushtetutën dhe legjislacionin aktual, duke kërkuar që spitalet e përgjithshme të ofrojnë kujdes mendor deri në ndryshimet e nevojshme.

Kërkesa për masë të përkohshme u refuzua, ndërsa aktgjykimi nënvizon rëndësinë e garantimit të të drejtave shëndetësore për të gjithë qytetarët.

Njoftimi i plotë:

Gjykata Kushtetuese e Republikës së Kosovës ka publikuar aktgjykimin në rastin KO141/24, të parashtruar nga Avokati i Popullit, të dorëzuar në Gjykatë bazuar në autorizimet e përcaktuara në nënparagrafin 1 të paragrafit 2 të nenit 113 [Juridiksioni dhe Palët e Autorizuara] të Kushtetutës së Republikës së Kosovës, lidhur me vlerësimin e kushtetutshmërisë së paragrafit 1 të nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 të Shërbimit Spitalor dhe Klinik Universitar të Kosovës, të miratuar përmes Vendimit [Nr. 29/180] të Qeverisë së Republikës së Kosovës, të 27 dhjetorit 2023, i cili statut ka hyrë në fuqi më 8 janar 2024.

Gjykata, njëzëri, ka vendosur që (i) kërkesa është e pranueshme; (ii) të konstatojë se paragrafi 1 i nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 për Shërbimin Spitalor dhe Klinik Universitar, i miratuar përmes Vendimit [Nr. 29/180] të Qeverisë së Republikës së Kosovës, të 27 dhjetorit 2023, nuk është në pajtueshmëri me paragrafin 1 të nenit 51 [Mbrojtja Shëndetësore dhe Sociale] në lidhje me paragrafin 1 të nenit 7 [Vlerat] dhe paragrafin 4 të nenit 92 [Parimet e Përgjithshme] të Kushtetutës së Republikës së Kosovës; (iii) të urdhërojë Qeverinë e Republikës së Kosovës, që në pajtim me paragrafin 1 të nenit 116 [Efekti Juridik i Vendimeve] të Kushtetutës, të ndërmarrë veprimet e nevojshme për plotësimin dhe ndryshimin e paragrafit 1 të nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 për Shërbimin Spitalor dhe Klinik Universitar, i miratuar përmes Vendimit [Nr. 29/180] të Qeverisë së Republikës së Kosovës, të 27 dhjetorit 2023, në pajtim me Kushtetutën, legjislacionin në fuqi dhe këtë Aktgjykim; (iv) të konstatojë se deri në plotësimin dhe ndryshimin e paragrafit 1 të nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 për Shërbimin Spitalor dhe Klinik Universitar, i miratuar përmes Vendimit [Nr. 29/180] të Qeverisë së Republikës së Kosovës, të 27 dhjetorit 2023, spitalet e përgjithshme të ofrojnë shërbimet shëndetësore siç janë të përcaktuara në nënparagrafin 1.1 të paragrafit 1 të nenit 12 (Shërbimi i kujdesit shëndetësor dytësor) të Ligjit Nr. 05/L-025 për Shëndetin Mendor; si dhe (v) të refuzojë kërkesën për masë të përkohshme.

Avokati i Popullit kontestoi kushtetutshmërinë e paragrafit 1 të nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 të Shërbimit Spitalor dhe Klinik Universitar të Kosovës, i cili përcakton që spitalet e përgjithshme ofrojnë shërbimet shëndetësore si në vijim: (i) kirurgji e përgjithshme; (ii) interno; (iii) pediatri; (iv) gjinekologji dhe obstetrikë; dhe (v) emergjenca mjekësore. Avokati i Popullit pretendoi se kjo dispozitë e Aktit të kontestuar, pasi që nuk përcakton “kujdesin mendor” si shërbim dytësor shëndetësor që ofrohet nga spitalet e përgjithshme, “redukton” (i) shërbimet shëndetësore për kujdes mendor për qytetarët; dhe (ii) stafin shëndetësor dhe administrativ në këto spitale, në kundërshtim me frymën e Ligjit Nr. 04/L-125 për Shëndetësi, i ndryshuar dhe plotësuar me Ligjet Nr. 08/L-043 dhe Nr. 08/L-176 dhe Ligjin Nr. 05/L-025 për Shëndet Mendor; dhe se rrjedhimisht (iii) si akt i miratuar nga Qeveria kufizon të drejtat kushtetuese të përcaktuara në nenet 7 [Vlerat], 24 [Barazia para Ligjit], 51 [Mbrojtja Shëndetësore dhe Sociale] dhe 55 [Kufizimi i të Drejtave dhe Lirive Themelore] të Kushtetutës, respektivisht. Pretendimet e Avokatit të Popullit u mbështetën nga: (i) deputeti i Kuvendit, z. Armend Zemaj; (ii) Kryetarja e Federatës së Sindikatave të Shëndetësisë së Kosovës; dhe (iii) Kryetari i Odës së Mjekëve të Kosovës, ndërsa u kundërargumentuan nga Kryeministri i Republikës së Kosovës.

Aktgjykimi i Gjykatës fillimisht sqaron që bazuar në nënparagrafin 1 të paragrafit 2 të nenit 113 [Jurisdiksioni dhe Palët e Autorizuara] të Kushtetutës, Avokati i Popullit është i autorizuar të kontestojë kushtetutshmërinë e ligjeve, të dekreteve të Presidentit e të Kryeministrit dhe të rregulloreve të Qeverisë.

Gjykata, në vlerësimin e pretendimeve të Avokatit të Popullit, iu referua parimeve të përgjithshme kushtetuese dhe atyre të Komisionit të Venecias për parimin e sundimit të ligjit dhe kufizimit të të drejtave dhe përcaktimit të detyrimeve me “ligj”, të përcaktuara ndër të tjera në nenin 3 [Barazia para ligjit], nenin 4 [Forma e Qeverisjes dhe Ndarja e Pushtetit], nenin 7 [Vlerat], paragrafin 1 të nenit 51 [Mbrojtja Shëndetësore dhe Sociale] dhe nenin 55 [Kufizimi i të Drejtave dhe Lirive Themelore] të Kushtetutës. Në kontekst të kompetencave të Qeverisë, si organ që ushtron pushtetin ekzekutiv, Aktgjykimi sqaron se kompetenca e saj për “nxjerrjen e akteve juridike ose rregulloreve” kufizohet në përcaktimet kushtetuese si në vijim: a) “pajtueshmërinë me Kushtetutën dhe ligjet”, të përcaktuar në paragrafin 4 të nenit 92 të Kushtetutës; dhe b) “të nevojshme për zbatimin e ligjeve”, të përcaktuar në paragrafin 4 të nenit 93 të Kushtetutës.

Në dritën e parimeve të lartcekura, Aktgjykimi konstaton se Akti i kontestuar është nxjerrë për “zbatimin e ndonjë ligji”, siç kërkohet në paragrafin 4 të nenit 93 të Kushtetutës, pasi që bazohet në nenin 23 (Shërbimet profesionale shëndetësore), si dhe paragrafët 2 dhe 3 të nenit 63 (Themelimi i Shërbimit Spitalor dhe Klinik Universitar i Kosovës) të Ligjit të lartcekur për Shëndetësi.

Në kontekst të vlerësimit nëse Akti i kontestuar është nxjerrë në “pajtueshmëri me Kushtetutën dhe ligjet”, Gjykata sqaron se nënparagrafi 1.1 i paragrafit 1 të nenit 12 të Ligjit Nr. 05/L-025 për Shëndetin Mendor, përcakton shprehimisht që shërbimet e kujdesit mendor ofrohen në nivel të kujdesit dytësor shëndetësor përmes Departamenteve të Psikiatrisë në spitalet e përgjithshme, ndërsa paragrafi 1 i nenit 11 të Aktit të kontestuar ka përcaktuar llojet e shërbimeve shëndetësore që ofrohen në spitalet e përgjithshme sipas një liste shteruese, e ku bëjnë pjesë vetëm: (i) Kirurgjia e përgjithshme; (ii) Interno; (ii) Pediatria; (iii) Gjinekologjia dhe Obstetrika; (iv) Emergjenca mjekësore. Duke qenë se Akti i kontestuar nuk ka përfshirë shërbimet e kujdesit mendor në këtë listë të ofrimit të shërbimeve, ashtu siç përcaktohet me “ligj”, Gjykata vlerësoi se e drejta e qytetarëve për kujdes shëndetësor, e garantuar me nenin 51 [Mbrojtja Shëndetësore dhe Sociale] të Kushtetutës, e cila dispozitë garanton se kjo e drejtë rregullohet me ligj, është kufizuar përmes paragrafit 1 të nenit 11 të Aktit të kontestuar.

Rrjedhimisht, Gjykata konstatoi se paragrafi 1 i nenit 11 (Organizimi i shërbimeve shëndetësore në spitalet e përgjithshme) të Aktit të kontestuar është në kundërshtim me paragrafin 1 të nenit 51 [Mbrojtja Shëndetësore dhe Sociale] në lidhje me paragrafin 1 të nenit 7 [Vlerat] dhe paragrafin 4 të nenit 92 [Parimet e Përgjithshme] të Kushtetutës së Republikës së Kosovës. /Telegrafi/

The post Kushtetuesja rrëzon vendimin e Qeverisë që përjashton kujdesin mendor nga shërbimet spitalore appeared first on Telegrafi.

Lëvizja Vetëvendosje ka shpallur zyrtarisht kandidaturën e Ardian Golës për kryetar të Komunës së Gjakovës.

Në prani të kryeministrit në detyrë Albin Kurti, deputetit Glauk Konjufca dhe qindra qytetarëve e aktivistëve, Vetëvendosje tha se Gjakova është gati për hapin e madh përpara.

“Me profesor Ardian Golën dhe Lëvizjen VETËVENDOSJE!, do ta ngremë Gjakovën më lart se kurrë më parë,” thuhet në njoftim.

Gola, profesor universitar me përvojë të gjatë akademike, u vlerësua për “mendjen e ndritur, zemrën e madhe dhe vizionin e qartë për Gjakovën”.

Ai pritet të fokusohet në forcimin e arsimit, zhvillimin e kulturës dhe ekonomisë lokale, përmirësimin e infrastrukturës dhe krijimin e mundësive për të rinjtë.

“Gjakova meriton udhëheqje që jo vetëm administron, por frymëzon. Që e kthen besimin dhe krenarinë qytetare,” u tha gjatë prezantimit të kandidaturës.

Sipas Vetëvendosje-s, Ardian Gola është kandidati i duhur për ta kthyer Gjakovën në një model zhvillimi e frymëzimi kulturor.

“Ky është momenti ynë. Ky është kryetari ynë. Ky është ndryshimi që Gjakova e meriton,” thuhet në njoftim. /Telegrafi/

The post Ardian Gola, kandidati i Vetëvendosjes për kryetar të Gjakovës appeared first on Telegrafi.

Lëvizja Vetëvendosje ka shpallur zyrtarisht kandidaturën e Faton Selmanajt për kryetar të Komunës së Deçanit në zgjedhjet lokale të 12 tetorit.

Në një tubim me aktivistët e Qendrës në Deçan, ku të pranishëm ishin edhe kryeministri në detyrë Albin Kurti dhe sekretari organizativ Alim Rama, u zyrtarizua përkrahja për Selmanajn si përfaqësues të gjeneratës së re të udhëheqjes.

“Nga tokat pjellore te majat e bjeshkëve, Faton Selmanaj e njeh çdo cep të Deçanit dhe ka vendosur ta kthejë këtë pasuri në zhvillim e mirëqenie për të gjithë”, thuhet në njoftimin e Lëvizjes.

Faton Selmanaj pritet të fokusohet në zhvillimin e bujqësisë si motor të ekonomisë lokale, turizmit malor e kulturor, si dhe në ofrimin e shërbimeve publike efikase dhe të barabarta për qytetarët e Deçanit.

“Me Faton Selmanajn në krye, kjo komunë do të bëhet partner i fortë i qeverisë qendrore aty ku fjala dhe puna ecin bashkë për të mirën e secilit qytetar”, thekson më tej Lëvizja Vetëvendosje.

Sipas LVV-së, Deçani me Selmanajn në krye do të jetë “shembull i qeverisjes lokale që ecën në hap me zhvillimin shtetëror”. /Telegrafi/

The post Faton Selmanaj shpallet kandidat për kryetar të Deçanit nga Lëvizja Vetëvendosje appeared first on Telegrafi.

Vijon të jetë shumë serioze situata me zjarrin në Gramsh, ku tashmë flakët janë përhapur në një tjetër fshat.

Korrespondentja e Top Channel Bruna Kërçyku raporton se edhe fshati i Kodovjat është përfshirë nga zjarri, i gjashti fshat nën pushtetin e flakëve.

Ndërkohë, teksa forcat zjarrfikëse po punojnë për shuarjen e flakëve, ka nisur evakuimi i banorëve.

Lexo po ashtu 30 vatra zjarri aktive në disa zona në Shqipëri - 5 helikopterë “Black Hawk” në ndihmë nga ajri

Konkretisht në qarkun e Elbasanit:

Kullollas – Gramsh – Situatë e rënduar, është raportuar një humbje jete. Banorët janë evakuuar. Për shkak të flakëve janë bllokuar edhe disa rrugë që lidhin fshatrat. Në bashkinë Gramsh janë marrë masa për strehimin e banorëve të evakuuar.

Mukaj dhe Sojnik – Gramsh – Situatë problematike. Mbi 150 forca po punojnë për izolimin e zjarrit në sipërfaqe me shkurre dhe ferra. Është kërkuar ndërhyrja me 50 forca operacionale FA.

Në terren janë edhe forcat zjarrfikëse të Elbasanit dhe Gramshit afër fshatit Snosëm e Sojnik, të shoqëruara edhe nga punonjës bashkiak e banorë të zonës./TCH/

The post Zjarri përfshinë një tjetër fshat në Gramsh, nis evakuimi i banorëve appeared first on Telegrafi.

13 vjeçarja nga Gjilani,  cila ishte viktimë e një dhune fizike nga një grup i bashkëmoshatareve të saja, ka rrëfyer për “Piranjat” momentet e tmerrit që përjetoi.

Ajo së bashku me  dëshmitare treguan detaje tronditëse të asaj që ndodhi.

Sipas rrëfimit të viktimës, ajo ishte ftuar nga disa vajza që i njihte si shoqe për një takim, por përfundoi duke u përballur me dhunë dhe kërcënime serioze për jetën.

“Rrugës ma kanë ba që në mahall të vet janë tum prit mem rreh, veç sa mem shti me shku te shtëpia e braktistë. Njërën nuk e kam njoft, njërën e kam pasur si motër, dy i kam pas shoqe shumë të mira. Njëra ka bërë video, katër kanë shpreh dhunë, njëra veç ka nejt”, tha ajo.

Lexo po ashtu Video e keqtrajtimit të vajzës në Gjilan nga bashkëmoshataret, me rastin po merren policia dhe prokuroria

Ngjarja ka ndodhur në një ambient të izoluar ku vajza u mbajt përreth 50 minuta. Ajo u godit me shpulla e shqelma dhe nuk kishte mundësi të kërkonte ndihmë. Më pas, për shkak të frikës, nuk e tregoi rastin menjëherë as tek familjarët.

“S’ka pas shanse mem pa askush. Të nesërmen kur më kanë pa iu kam thënë se jam rrëzu me trotinet, se më kanë shtanazhu që nëse i tregoj dikujt, ma bëjnë hala ma zi herën tjetër”, shprehet viktima.

Një dëshmitare tjetër që ndodhej në vendin e ngjarjes konfirmoi dhunën dhe kërcënimet që kishte dëgjuar dhe përjetuar.

“Më kanë kërcënuar edhe mua, më kanë thanë që kanë mem ther, mem mbyt. Ma kanë ba që nëse një njeri i gjallë e merr vesh, nuk ka mem ra mu mirë. Ka pas shpulla, shqelma. Nuk kam guxua me shku sepse jam frikësuar që pom therin”, rrëfen dëshmitarja.

Ky rast ka ngjallur reagime të shumta në opinionin publik, duke nxitur thirrje për veprim të shpejtë të institucioneve ndaj dhunës mes të rinjve. /Telegrafi/

The post “Njërën e kam pasur si motër, dy i kam pas shoqe shumë të mira” – rrëfimi tronditës i 13-vjeçares nga Gjilani që u rrah nga bashkëmoshataret appeared first on Telegrafi.

Pas disa muajsh bllokadë në Kuvendin e Kosovës, aktgjykimi i Gjykatës Kushtetuese për votimin e fshehtë ka ndezur një debat të ashpër politik.

Deputeti i PDK-së, Përparim Gruda, në emisionin “RTK Prime” theksoi se Gjykata ka vendosur qartë se votimi i fshehtë nuk lejohet.

“Gjykata Kushtetuese ka vendosur qartë se nuk lejohet votimi i fshehtë. Unë mendoj se arsyeja pse Gjykata po sulmohet nga pushteti është se ‘pse nuk po na lejoni ende me blloku Kuvendin e Kosovës’”, tha Gruda.

Ai shtoi se aktgjykimi u ka hequr pushtetarëve një “mjet të rëndësishëm, mjetin e bllokadës”.

“Ka vetëm një lexim profesional që duhet t’i bëhet aktgjykimit të Gjykatës Kushtetuese. Ne e kemi pjesën urdhëruese dhe ajo nuk do të ndryshojë në asnjë pikë”, u shpreh deputeti i PDK-së.

Nga ana tjetër, zëvendësministri në detyrë i Drejtësisë, Vigan Qorolli, u shpreh kritik ndaj vendimit të Kushtetueses.

“Të gjithë deputetët e Kosovës kanë dështuar ta konstituojnë Kuvendin. Në këtë rast, halli im është implementimi i këtij aktgjykimi. Në rast se një aktgjykim do të ketë nevojë për t’u implementuar edhe institucioni i cili e merr për bazë sot ë duhet ta dijë hapin operacional se si do ta implementojë”, tha Qorolli.

Ai theksoi se aktgjykimi ka kontradikta në afatet e implementimit.

“Gjykata Kushtetuese nuk është institucion mbipushtetor, por një organ i pavarur që duhet të tregojë çka nuk duhet të bëjnë institucionet”, u shpreh Qorrolli./Telegrafi/

The post Zbatimi i aktgjykimit të Kushtetueses shkakton përplasje mes Qorrollit e Grudës appeared first on Telegrafi.

Kryeministri në detyrë Albin Kurti ka njoftuar se Kosova po përjeton përfaqësimin më të gjerë dhe rrjetin më të thellë diplomatik në historinë e saj.

Sipas tij  janë arritur hapa të rëndësishëm me hapjen e ambasadave të reja në Kolumbi dhe Malajzi, si dhe themelimin e një misioni në Poloni dhe një misioni special pranë Selisë së Shenjtë.

“Kosova sot gëzon përfaqësimin më të gjerë dhe rrjetin diplomatik më të madh në historinë e saj. Jemi krenarë që gjatë mandatit tonë kemi zgjeruar praninë diplomatike në nivele të papara, duke hapur ambasada të reja në Kolumbi dhe Malajzi, një mision në Poloni dhe një mision special pranë Selisë së Shenjtë”, ka shkruar Kurti në “X”.

Kurti ka shtuar se këto arritje forcojnë zërin e Kosovës në arenën globale dhe thellojnë partneritetet tona në të gjithë botën. /Telegrafi/

Kosova today enjoys the widest representation and diplomatic reach in its history. We are proud that during our term we have expanded our diplomatic presence to unprecedented levels, opening a new embassy in Colombia, a new embassy in Malaysia, a mission in Poland and a special…

— Albin Kurti (@albinkurti) August 12, 2025

The post Kurti thekson suksesin e zgjerimit të rrjetit diplomatik të Kosovës appeared first on Telegrafi.

Janë publikuar pamjet ku tregojnë momentin dramatik të vrasjes së trefishtë në qendër të Gjilanit.

Sipas këtyre pamjeve që janë publikuar nga Portali Magazina dëgjohen të shtëna të shumta armësh, dhe shihen qytetarë të tronditur.

Gjithashtu në videon e publikuar dëgjohet edhe njëri nga të plagosurit teksa fyen para se të humbasë ndjenjat dhe të bie në tokë.

Siç raportohet nga Policia e Kosovës, vrasja ndodhi rreth orës 12:30 të së dielës. Në vendin e ngjarjes u gjet një person pa shenja jete, ndërsa tre të tjerë u dërguan me urgjencë në spital, dy prej të cilëve nuk mbijetuan.

Policia arrestoi një të dyshuar në vendngjarje, por tre të tjerë – të identifikuar si Mefail Shkodra dhe dy djemët e tij  janë ende në arrati.

Në këto zhvillime, Inspektorati Policor i Kosovës ka rekomanduar pezullimin e katër zyrtarëve policorë nga Drejtoria Rajonale e Policisë në Gjilan. /Telegrafi/

The post Të shtëna të shumta – publikohen pamjet nga momenti i vrasjes së trefishtë në Gjilan appeared first on Telegrafi.

Lëvizjes Vetëvendosje përgatitet për zgjedhjet lokale në Istog, ku tashmë ka zyrtarizuar kandidatin e saj për kryetar e  cili është Astrit Bujupaj.

Këtë e bëri të ditur kryetari i LVV-së, Albin Kurti në një postim në Facebook.

Kurti u shpreh se tashmë është koha që drejtimi i komunës të jetë nga radhët e Vetëvendosjes, duke përfaqësuar besimin dhe vullnetin e qytetarëve të Istogut.

“Lëvizja doli e para në Istog në zgjedhjet parlamentare të 9 shkurtit. Tash, me Astrit Bujupajn, kandidat për kryetar, besimin tonë dhe vullnetin e qytetarëve ka ardhur koha që i pari i Istogut të jetë nga radhët e Lëvizjes”, ka shkruar Kurti. /Telegrafi/

The post Astrit Bujupaj, kandidat i LVV-së për kryetar të Istogu appeared first on Telegrafi.

Policia e Kosovës ka njoftuar sot se ka parandaluar një rast të kontrabandës me rreth 910 kilogramë kërpudha të freskëta në zonën kufitare të Karaqevës, në komunën e Kamenicës.

Sipas njoftimit zyrtar, rasti është zbuluar nga Njësitet Patrulluese të Stacionit Policor për Mbikëqyrjen e Kufirit (SPMK) – Muqivercë, rreth orës 11:45 të mëngjesit të së hënës, më 12 gusht 2025.

“Gjatë kontrollit të automjetit, janë gjetur: 910 kg kërpudha të freskëta të llojit shampinion”, thuhet në njoftim.

Automjeti, një kombi (furgon) i bardhë me targa vendore, drejtohej nga një shtetas i Kosovës.

Sipas Policisë, pas konsultimit me prokurorin kujdestar, është urdhëruar inicimi i rastit dhe dorëzimi i mallrave në Doganën e Kosovës për procedura të mëtejme. /Telegrafi/

The post Ndalohet kontrabandë me kërpudha në kufirin lindor – sekestrohen mbi 900 kilogramë appeared first on Telegrafi.