Nëse je nga ata persona që nuk kursen fjalë në mesazhe dhe përdor emoji për të shprehur çdo nuancë emocioni, kemi një lajm të mirë për ty. Sipas një studimi të botuar në Journal of Communication Psychology, personat që shkruajnë mesazhe të gjata rezultojnë të kenë nivele më të larta të inteligjencës emocionale dhe empatisë.

Të quajtur shpesh “tekstrovërtë”, këta individë priren të komunikojnë në mënyrë të detajuar në platforma digjitale dhe zakonisht e teprojnë me shpjegimet për të shmangur çdo keqkuptim. Kjo sjellje, sipas studiuesve, është një tregues i ndjeshmërisë së tyre emocionale dhe aftësisë për të kuptuar të tjerët.

Studimi thekson se jo vetëm gjatësia e mesazheve, por edhe përmbajtja e tyre emocionale lidhet drejtpërdrejt me pikët më të larta në testet e inteligjencës emocionale.

Pra, herën tjetër kur dikush të thotë “po shkruan romane në chat”, mund t’i thuash me bindje: “Jo, thjesht kam zemër të madhe.”

The post Studim: Njerëzit që shkruajnë mesazhe të gjata janë më empatikë dhe emocionalisht inteligjentë appeared first on iconstyle.al.

Të gjithë kemi nga një mik që kur i shkruan, e sheh “seen”-in për orë të tëra… por ZOTRU i telefonit është i pari që ofendohet kur nuk i përgjigjesh menjëherë.
Për çudi, janë gjithmonë të njëjtat shenja:

Ujori – jeton në botën e vet. S’është personale, thjesht e harron që ekzistojnë mesazhet.

Virgjëresha – të lexon, analizon, e pastaj thotë: “po i kthehem më vonë me përgjigje të saktë”. Dhe pastaj… nuk kthehet.

Binjakët – e shohin, e hapin, e harrojnë. Në mendjen e tyre: “po e mendova përgjigjen, a s’është njësoj si me ta dërguar?”

Akrepi – jo vetëm që nuk të kthen, por kur i thua “pse s’ma ktheve?”, përgjigjet: “ti s’ma ke kthyer para 3 javësh”.

The post Shenjat e horoskopit që nuk kthejnë kurrë mesazhin por zemërohen kur i injoron appeared first on iconstyle.al.

Një paralajmërim urgjent është lëshuar nga FBI për përdoruesit e telefonave celularë, pas një vale të re mashtrimesh që po qarkullon përmes mesazheve SMS, duke vënë në shënjestër si përdoruesit e iPhone ashtu edhe ata të Android. Këto mesazhe, që pretendojnë të vijnë nga Departamenti i Transportit (DMV), përmbajnë fraza alarmante si “shumë e papaguar” apo kërcënime për pezullimin e lejes së drejtimit.

Rritja e këtij lloj mashtrimi është përshkruar si “alarmante”, me një rritje prej mbi 700% vetëm në muajin e fundit. Përdoruesve u kërkohet të klikojnë në një lidhje që të çon në faqe që duken zyrtare, por në fakt janë të krijuara për të vjedhur të dhëna personale dhe financiare.

Qendra për Ankesat për Krimet Kibernetike e FBI-së (IC3) ka konfirmuar se termi “shumë e papaguar” është i zakonshëm në raportimet që ka marrë kohët e fundit, çka tregon për një rrjet mashtruesish të mirëorganizuar që vepron në disa shtete amerikane, përfshirë Nju Jorkun, Kaliforninë, Floridën, Teksasin dhe Xhorxhian.

Komisioni i Automjeteve Motorike në Nju Xhersi ka reaguar gjithashtu, duke kujtuar qytetarët se nuk dërgon kurrë SMS apo email për gjoba apo shërbime të tjera të lidhura me automjetet. Komunikimet zyrtare kufizohen vetëm në përkujtesa për takime.

Autoritetet rekomandojnë që publiku të mos hapë asnjë lidhje nga mesazhe të pakërkuara dhe të fshijë menjëherë çdo komunikim të dyshimtë që:

Kërkon pagesa urgjente apo gjoba,

Pretendon të vijë nga institucione shtetërore,

Përmban linke të dyshimta që imitojnë faqet qeveritare,

Përdor tone kërcënuese apo urgjencë të rreme.

Nëse dyshoni për ndonjë mesazh të tillë, mos veproni menjëherë. Verifikoni përmes kanaleve zyrtare dhe mos ndani asnjë informacion personal apo bankar.

The post FBI paralajmëron 1 miliard përdorues të iPhone të fshijnë menjëherë këtë SMS appeared first on iconstyle.al.

Irani i ka kërkuar Qipros t’i përcjellë “disa mesazhe” për Izraelin, tha të dielën presidenti qipriot, Nikos Christodoulides. Christodoulides theksoi se do të bisedojë me kryeministrin e Izraelit, Benjamin Netanyahu, më vonë gjatë ditës.

Ai nuk sqaroi se nga kush saktësisht vinin mesazhet apo çfarë përmbanin ato. Paraprakisht, ministri i Jashtëm qipriot dhe homologu i tij iranian, zhvilluan një bisedë të premten në mbrëmje.

Christodoulides tha gjithashtu se është i pakënaqur me reagimin, siç e përshkroi ai, të ngadaltë të Bashkimit Evropian ndaj krizës që po zhvillohet në Lindjen e Mesme.

Qiproja, si shteti anëtar i BE-së që ndodhet më së afërmi Lindjes së Mesme, kishte kërkuar një mbledhje të jashtëzakonshme të Këshillit të Punëve të Jashtme të BE-së, tha ai.

Raketa të lëshuara nga Irani drejt Izraelit ishin të dukshme nga vende të ndryshme të Qipros të premten dhe të shtunën në mbrëmje.

“Nuk është e mundur që BE-ja të pretendojë rol gjeopolitik, t’i shohë të gjitha këto zhvillime dhe të mos ketë të paktën një mbledhje të Këshillit të Ministrave të Jashtëm”, tha Christodoulides për gazetarët.

Qiproja ka ofruar ndihmë për evakuimin e shtetasve të palëve të treta nga rajoni dhe u ka bërë thirrje të gjitha palëve të përmbahen nga veprime që mund të përshkallëzojnë konfliktin. REL/

The post Qiproja thotë se Irani i ka kërkuar t’ia përcjellë Izraelit “disa mesazhe” appeared first on Sot News | Lajme.

Ish fituesi i ‘Big Brother VIP Albania’, Gjesti, është tejet aktiv në rrjete sociale, duke lënë pas vetes diskutime të forta dhe spekulime për shprehjet e tij të sinqerta.

Pak minuta më parë, ai ka publikuar një foto në llogarinë e tij, duke lënë të kuptohet se ka një mesazh të rëndësishëm për ndjekësit e tij.

Gjesti shprehet: “Mos m’printi knej ma mirë”, duke ofruar një paralajmërim të drejtpërdrejtë. Kjo frazë ka tërhequr vëmendjen e fansave të tij, të cilët filluan menjëherë të spekulojnë për personin e caktuar që po i drejtohen këto fjalë. Fjalët e Gjesti, si gjithmonë, të shpërndara në një kontekst të gjerë e cila përfshin jetën e tij personale dhe sfidat me të cilat ai mund të përballet.

Ai ka krijuar një imazh publik të një personi të fortë, të gatshëm për të bërë zgjedhje të guximshme dhe të papritura. Çfarëdo që të jetë mesazhi, një gjë është e sigurt: ai ka arritur të kapë vëmendjen e masave.

The post Gjesti paralajmëron me një postim intrigues, për kë është ky mesazh? appeared first on Sot News | Lajme.

TIRANË, 4 qershor/ATSH/ Posta Shqiptare ka paralajmëruar qytetarët që të tregohen të kujdesshëm ndaj mesazheve të paidentifikuara që shpërndahen në emër të saj dhe që synojnë të mashtrojnë përdoruesit përmes linqeve të dyshimta.

Në adrese të disa qytetarëve kanë mbërritur mesazhe të tilla si: Paketa juaj ka mbërritur në magazinën tonë lokale, por nuk është dorëzuar për shkak të një adrese të gabuar të dorëzimit ose informacionit të paplotë. Ju lutem konfirmoni adresën e saktë nëpërmjet lidhjes më poshtë, përndryshe paketa do të kthehet pas 24 orësh.

Përmes një njoftimi zyrtar, Posta Shqiptare u bën thirrje klientëve të saj që të mos bien pre e këtyre skemave të rrezikshme.

“Nëse haseni me mesazhe të tilla, ju lutem mos klikoni asnjë link dhe mos jepni asnjë informacion personal, pasi ekziston rreziku që të dhënat tuaja të vidhen,” thuhet në njoftimin e Postës, e cila distancohet plotësisht nga çdo komunikim i tillë mashtrues.

Posta Shqiptare thekson se komunikimet zyrtare me klientët kryhen vetëm përmes kanaleve të saj të verifikuara dhe u kërkon qytetarëve që të raportojnë çdo rast të dyshimtë pranë institucioneve përkatëse.

/a.f/

The post Posta Shqiptare apel qytetarëve: Mos klikoni linqet e dyshimta appeared first on Agjencia Telegrafike Shqiptare.

Dy vjet nga rokada e kompanive, rrjeti “X” do të eliminojë mundësinë që përdoruesit me gjurmën blu të shkëmbejnë mesazhe të kriptuara, të sigurta dhe të mbrojtura.

Përmes një postimi në profilin e programuesve të saj, kompania shkruan se do të ndërpresë funksionimin e mesazheve direkte të kodifikuara për të sjellë disa përmirësime.

Megjithatë, përdoruesit do të mund të shohin mesazhet e vjetra, por jo të dërgojnë të reja në formën e sipërpërmendur.

Në fund të majit 2023, rrjeti social prezantoi mesazhet e mbrojtura vetëm për të regjistruarit me një plan në abonim, për të nxitur abonimet me argumentin e sigurisë.

Sipas disa burimeve, lëvizja i paraprin ardhjes së XChat, një aplikacion i lidhur me rrjetin dhe që do të ketë ekskluzivisht vetëm mesazhe, duke konkurruar kështu Messenger dhe WhatsApp.

Ideja e pronarit Elon Musk është ai që ta kthejë rrjetin social në një aplikacion për gjithçka, edhe për të kryer pagesa digjitale.

Në orët e fundit, online janë publikuar një seri shembujsh të programuar, që, me një akses në versionet eksperimentale të “X”, kanë treguar ardhjen e opsionit të ri në menu, me diciturën XChat.

Nëse e klikon opsionin në fjalë nuk ndodh asgjë, por vetëm prania e tij të bën të mendosh se bërja funksional është vetëm çështje kohe.

LEXONI GJITHASHTU:

• Hamasi paraqet përgjigjen ndaj planit të SHBA-së për armëpushimin në Gaza
• 10 vite në verbëri, Neimi rrëfen historinë e jetës: Gruas së vdekur i recitoj poezi

The post “X” heq mesazhet e sigurta, rrjeti social përgatitet për aplikacionin e ri appeared first on Euronews Albania.

KALIFORNI, 30 maj /ATSH-ANSA/ – Dy vjet pas prezantimit të tij, X-i po eliminon mundësinë që përdoruesit me shenjën blu të shkëmbejnë mesazhe të koduara, të sigurta dhe të mbrojtura.

Në një postim nga llogaria e zhvilluesit, kompania shkroi se “po e ndalojmë funksionin e mesazheve të drejtpërdrejta të koduara për të bërë disa përmirësime. Do të jeni ende në gjendje të hyni në mesazhet tuaja të mëparshme, por nuk do të jeni në gjendje të dërgoni të reja”.

Në fund të majit 2023, X-i prezantoi mesazhe të sigurta vetëm për pajtimtarët me një plan abonimi, për të nxitur abonimet duke u përqendruar në siguri.

Sipas disa burimeve, siç është faqja e internetit Engadget, ky veprim parashikon mbërritjen e XChat, një aplikacion i lidhur me X-in dhe i dedikuar ekskluzivisht për mesazhet, një lloj konkurrenti për Messenger dhe WhatsApp.

Ideja e Elon Musk, që nga blerja e X-it në vitin 2022, është në fakt ta bëjë rrjetin social një aplikacion “për gjithçka”, madje edhe për kryerjen e pagesave digjitale.

Në orët e fundit, disa shembuj të zhvilluesve që, me qasje në versionet eksperimentale të X-it, janë shfaqur në internet, duke treguar mbërritjen e një artikulli të ri në menutë anësore të aplikacionit, me formulimin XChat.

Kur klikoni, nuk ndodh asgjë, por vetëm prania e tij sugjeron një prezantim të afërt. Fundjavën e kaluar, rrjeti social X u bë i paarritshëm për disa orë.

Sipas Wired, zjarrfikësit ndërhynë për të shuar një zjarr në një qendër të dhënash të marrë me qira nga X-i pranë Portland, Oregon, i cili do të kishte shkaktuar një pjesë të ndërprerjes globale./  /os/

 

The post FOKUS – X-i fshin mesazhet e sigurta dhe përgatit një aplikacion të ri për biseda appeared first on Agjencia Telegrafike Shqiptare.

Zbardhen 5 mesazhet zanore që Alma Arrazi, i ka dërguar me telefon motrës së saj Gentjana. Z, duke i shprehur gjendjen e mjerueshme që kishte pësuar lidhja martesore saj dhe bashkëshortit, Erdgys Arrazi.

Këto mesazhe zanore janë cilësuar në dosjen e gjykatës si provat kryesore, për dënimin me 4 vjet burgim të Arrazit për akuzën e “Shkaktimit të vetëvrasjes” përmes presionit psikologjik dhe dhunës fizike.

Gazetari, Elton Qyno ka mësuar se para se të merrte aktin ekstrem të vetëflijimit në ujërat e lumit Buna në Shkodër, Alma Arrazi, ishte larguar nga banesa dhe 3 fëmijët e saj, duke punuar si pastruese në një kuzhinë restoranti.

Ajo i tregonte të motrës se ndihej mirë dhe paguhej 1 mijë euro në muaj, por e merrte malli për fëmijët dhe se njëra nga vajzat e saj qante shpesh për të ëmën. Edhe pse vajza qante pasi ndjente mall për nënën e saj ajo urdhërohej nga babai i saj, të pushonte menjëherë dhe mos ja dëgjonte më zërin për të ëmën.

Rasti i Alma Arrazit tregon një grua të sfilitur nga fati i saj i dhimbshëm dhe një gjë e tillë konstatohet qartazi tek audio-mesazhet që Alma i dërgon motrës së saj, Gentjana.

Alma informon motrën për situatat e fëmijëve, marrëdhënien bashkëshortore të krisur për shkak të një lidhje paralele dhe bisedat që bënte në telefon me kunatën e saj, Valin, gruan e Edison Arrazit, që në atë kohë ndodhej në burg, si i dyshuar për vrasjen e Endri Mustafës dhe “Prodhim e shitje të lëndëve narkotike” në Shkodër.

Sipas audio-mesazheve, Edisoni ka folur nga burgu me të vëllanë që të kthente Almën në shtëpi tek fëmijët e saj, por Eri siç e thërriste ajo burrin, gënjente dhe vëllanë e vetë. Alma i tregon të motrës së ka kapur burrin në tradhti bashkëshortore dhe i ka kërkuar atij një nder që atë vajzën me të cilën ishte lidhur mos e linte shtatzanë.

“…të lutem a ke mundësi i thashë, kur të shkosh me të, ruju mos ta lesh shtatzanë se kam hallin e fëmijve. I thashë, se nesër-masnesër fëmijët e mi, nuk dua me pas nji motër a një vëlla, bash prej babe. A ke mundësi me ma ba ketë nder për njata fëmijë, jo për mu. Se për mu i thash, unë e ti kena kry punë, s’kena ma punë kurrë….”

Të pesta audio-mesazhet kanë dalë nga këqyrje e një USB me foto, video, mesazhe zanore të nxjerra nga aparati celular, i markës “Samsung”, A14, në pronësi të motrës së viktimës, Gentjana Z….

Nga këqyrja rezultoi se në USB janë pesë mesazhe zanore që janë komunikime të të ndjerës Alma Arrazi me motrën e saj Gentjana Z.

Në audion e parë Alma i shprehet motrës si më poshtë vijon: “…po moj, po se njashtu ashtë, edhe se s’më dan, me pa dasht m’kishte kërku, ishte shpreh… po tu ba edhe p…. ……..Jo moj se s’jam tu ik…itu jam..”

Ndërkohë në audion e dytë Alma i shprehet sërish motrës së saj me këtë audio mesazh:

“…s’kam ça baj motra..po duroj kështu. Jam shumë mirë ec…se edhe në punë me kenë, po na bijn brinjët nëpër kuzhina e masanej maron vera s’kam ku shkoj, s’kam ku mytem…..sa të jetë ai nuk kthehem ma te Eri…jam shumë mirë motra i’tu… keq a mirë, 1000 euro i fus i’tu në xhep…”.

Në audion e tretë, Alma i shprehet të motrës për interesin që ka pasur për fëmijët dhe një situatë jo normale me njërën nga vajzat që qante pasi kërkonte nënën e saj, Almën, e cila ishte larguar duke punuar pastruese në një kuzhinë.

Njëra nga vajzat ka filluar të qajë, por sipas saj ka ndërhyrë në telefon burri i saj, Erdgys Arrazi, i cili i ka folur në mënyrë ultimative vajzës që të pushonte dhe mos qante më për nënën e saj.

Madje për situatën e fëmijëve dhe largimin e Almës nga shtëpia, e kunata e saj Vali kishte folur në telefon dhe me burrin e saj, Edison Arrazi, që në atë periudhë ndodhej në burg, i cili sipas mesazhit zanor të lëshuar nga Alma, i kishte thënë gruas së tij se:

“…Po a menon ai (Eri) ndonjëherë, se unë kam me dal prej burgut. Unë kam me kenë ai si kam me e pru Almën në shpi, te fëmijët e vet, e ky (Eri) të shkojnë e të jetojë më kë të dojnë….”

Ndër të tjera Alma, i dërgon këtë mesazh zanor të motrës si më poshtë:

“…hiq motra, ça kam me than.. tu e pyt për fëmijët jam, mirë thotë janë (kunata Vali)…ka qajt Ergesa sot për mu edhe kjo (Kunata) e ka marrë Erin në telefon edhe i ka thanë “…merru me Ergesen i fije sa a shumë e mërzitun vajza, a tu qa për Almën. Ky (Eri) i ka thanë ma jep telefonin këtu edhe i ka thanë vajzës, Ergesës, mos ta nixhoj zanin ma me qa për i kyt punë,me qa për të ma, e ka trem vajzën, s’ma ka lan as me qa. Ndërsa “Coli” (Edison Arrazi) kishte ba namin sot. E kishte marë Erin në telefon dhe i kishte ba nanin namin, namin tha (kunata Vali). Tu qa “Coli”, tu i than Erit ma merr Almën ma bjerë në shpi…mos i len fëmijët me vujt…se ban shumë mas fëmijëve ajo motra… Mir, mir i ka than Eri, se ta po e rregulloj nesër kytë punë. E ka majtë me rrena vllan e vet. I ka thanë Vali, është tu të majt me rrena se ky (Eri) i ka shkëput punët me Almën. Po a menon ai (Eri) ndonjëherë, se kam me dal prej burgut. Unë kam me kenë ai si kam me e pru Almën në shpi, te fëmijët e vet, e ky të shkojnë e të jetojë më kë të dojn…”.

Në audion e katërt Alma shprehet:

“…Se ky a tu majt shpresë se ta po pajtohet me mu, pa e shikon se e kam staku trunin, e kam staku keq, e nuk pajtohem ma me të, e ka hall tashi… Për ça, ke kërku me ta hek bllokun? Si menon ti? Me fol me mu, kur ndërkohë unë pardje ti kam hek letrat e lagta prej makinës, që ti ke shku me atë femër thashë. Ça don tash ma nga unë…?. Edhe më shkruajti: A e ke me taman a..?. Masanej më mori e më tha: A e ke me taman a…? Po… i thashë me taman e kam, nuk jam tu tall. Mirë a ke munsi me më ba bllok se ka hall motra se e shef se jam e vendosun, se kujton se po i ulem e po i flas, e po pajtohem……edhe nji gja të fundit desha me të thanë. Të lutem a ke mundësi i thashë, kur të shkosh me të, ruju mos ta lesh shtatzanë se kam hallin e fëmijve. I thashë se nesër-masnesër fëmijët e mi nuk dua me pas nji motër a një vëlla, bash prej babe. A ke mundësi me ma ba ketë nnder për njata fëmijë, jo për mu, se për mu i thash, unë e ti kena kry punë, s’kena ma punë kurrë….”

Ndërkohë në audio mesazhin e pestë dërguar motrës së saj Alma shprehet, se dhe kunata e saj Vali, mund të jetë bërë shkaktare për ndarjen e saj me burrin, Erdgysin. Ndër të tjera ajo i thotë motrës:

“…edhe i ka thanë Eri, (Valit Kunatës), bani Almës bllok, mas fol ma me të edhe Vali më bani bllok, m’tha: “…ça me ba, më ka thanë Eri…”. Kjo na ka dashtë ndarjen, kjo e poshtme, mezi ka prit mu nda unë, prej Erit….”.

Ndërkohë nga këqyrja e mëtejshme zbulon se në USB, ka dhe 2 video ku vërehet që i pandehuri Erdgys Arrazi, është duke ecur me makinë bashkë me të është edhe një vajzë, pamja e të cilës nuk duket, por duket vetëm dora e saj që prek fytyrën e Erdgysit.

Ishte pikërisht kjo lidhje e jashtëligjshme që Erdgys Arrazi kishte krijuar paralelisht me një vajzë të re, e cila u bë shkak që 1 vit më parë gruaja e tij, Alma Arrazi, të mbytej së bashku me 3 fëmijët e saj në lumin Buna, duke krijuar një nga tragjeditë më të dhimbshme që përjetoi qyteti i Shkodrës.

The post “S’kam ku mytem, sa të jetë ai nuk kthehem ma”/ Zbulohen mesazhet që Alma Arrazi i dërgoi të motrës para tragjedisë appeared first on Sot News | Lajme.

Një vit pas tragjedisë së rëndë që tronditi Shkodrën dhe mbarë vendin, drejtësia ka vendosur dënimin me 4 vite burg për Erdgys Arrazin, bashkëshortin e Alma Arrazit, e cila më 3 maj 2024 u hodh në lumin Buna bashkë me tre fëmijët e saj.

Arrazi u shpall fajtor për akuzën “Shkaktim i vetëvrasjes”, pasi gjykata konstatoi se ushtronte dhunë fizike dhe psikologjike ndaj bashkëshortes së ndjerë, duke e shtyrë drejt aktit ekstrem.

Fillimisht u dha një dënim prej 6 vitesh, por u ul në 4 vite për shkak të gjykimit të shkurtuar.

Trupi i Almës u gjet dy ditë pas ngjarjes, pasi një peshkatar konstatoi trupin e vajzës së saj 9-vjeçare.

Ndërkohë, gjatë hetimeve, janë administruar si prova kyçe pesë audio-mesazhe zanore që Alma i kishte dërguar motrës së saj, Gentjana Z., pak para se të ndërmerrte aktin fatal.

Sipas hetimeve të siguruara nga gazetari Elton Qyno për “Ora News”, pak kohë para se të ndërmerrte aktin tragjik, Alma ishte larguar nga banesa dhe punonte si pastruese në një restorant, ku, sipas saj, paguhej 1 mijë euro në muaj.

Ajo shprehej se e merrte malli për fëmijët, veçanërisht për njërën nga vajzat që shpesh qante për të.

Por, sipas rrëfimit të saj, fëmijët përballeshin me një realitet të ashpër:

“…edhe kjo (kunata) e ka marrë Erin në telefon edhe i ka thanë: ‘Merru me Ergesën i fije, sa a shumë e mërzitun vajza, a tu qa për Almën.’ Ky (Eri) i ka thanë: ‘Ma jep telefonin këtu’ edhe i ka thanë vajzës, Ergesës: ‘Mos ta nixhoj zanin ma me qa për i kyt punë, me qa për të ma’, e ka trem vajzën, s’ma ka lan as me qa.”

Alma rrëfente gjithashtu për një marrëdhënie të thyer për shkak të një lidhjeje jashtëmartesore të burrit.

Ajo e kishte zbuluar tradhtinë dhe i kishte kërkuar bashkëshortit një “nder” për hir të fëmijëve:

“…të lutem a ke mundësi, i thashë, kur të shkosh me të, ruju mos ta lesh shtatzanë se kam hallin e fëmijëve. I thashë, se nesër-masnesër fëmijët e mi, nuk dua me pas nji motër a një vëlla, bash prej babe. A ke mundësi me ma ba ketë nder për njata fëmijë, jo për mu. Se për mu i thashë, unë e ti kena kry punë, s’kena ma punë kurrë…”

Në një tjetër audio, ajo përmend ndërhyrjen e kunatës, Vali, e cila kishte folur me bashkëshortin e saj, Edison Arrazi, i arrestuar për vrasjen e Endri Mustafës dhe për trafik droge për të bindur Erdgysin të kthente Almën në shtëpi.

“…Po a menon ai (Eri) ndonjëherë, se unë kam me dal prej burgut. Unë kam me kenë ai si kam me e pru Almën në shpi, te fëmijët e vet, e ky (Eri) të shkojnë e të jetojë më kë të dojnë…”

Alma gjithashtu aludonte se kunata Vali kishte ndikuar në prishjen e martesës.

“…edhe i ka thanë Eri (Valit), ‘bani Almës bllok, mas fol ma me të’ edhe Vali më bani bllok. M’tha: ‘…ça me ba, më ka thanë Eri…’ Kjo na ka dashtë ndarjen, kjo e poshtme, mezi ka prit mu nda unë, prej Erit…”

Në dosjen hetimore janë përfshirë edhe dy video të gjetura në një USB, ku shfaqet Erdgys Arrazi duke udhëtuar me makinë me një vajzë tjetër, pamja e së cilës nuk identifikohet, por duket qartë dora që i përkëdhel fytyrën.

Kjo lidhje e jashtëligjshme, sipas prokurorisë, ishte pikënisja e rrënimit psikologjik të Almës, që përfundoi në mbytjen e saj dhe tre fëmijëve në lumin Buna, duke tronditur qytetin e Shkodrës dhe mbarë opinionin publik./ REFORMA

The post “S’kam ku mbytem”, zbulohen 5 audio-mesazhet që Alma Arrazi i dërgoi të motrës para tragjedisë appeared first on iconstyle.al.

TIRANË, 22 maj/ATSH/ Me trishtim ka reaguar kryetarja e Kuvendit të Shqipërisë, Elisa Spiropali, pas lajmit për ndarjen nga jeta të Artan Lames.

“Humbëm Artan Lamen, drejtuesin dhe studjuesin e pasionuar, që kuriozitetin, dijet dhe talentin e tij i vuri në shërbim të ndryshimit, por edhe të rrëfimit bukur të thelbit e tharmit të pandryshueshëm të Shqipërisë. Ngushëllime familjes, të afërmve dhe miqve të shumtë! Paç Paqen e pasosur, Tan”, shkroi Spiropali në rrjetet sociale.

Institucioni i Kadastrës ka ndarë online, një mesazh ngushëllimi pas lajmit të ndarjes nga jeta të Artan Lames, ish-drejtues i Kadastrës Shqiptare dhe një figurë me kontribut të pazëvendësueshëm në reformimin e sistemit kadastral në Shqipëri.

“Për kolegët dhe bashkëpunëtorët, Artan Lame nuk ishte vetëm një drejtues, por një njeri që dinte të dëgjonte, të frymëzonte dhe të krijonte një frymë bashkëpunimi dhe respekti të ndërsjellë. Ngushëllimet më të sinqerta familjes, miqve dhe të gjithë atyre që e njohën dhe e vlerësuan”, shkruhet në mesazhin e Kadastrës.

Gjatë viteve të drejtimit të Agjencisë Shtetërore të Kadastrës, Lame u dallua për përkushtimin, vizionin dhe përpjekjet e vazhdueshme për t’i shërbyer qytetarëve dhe interesit publik.

E tronditur për lajmin e ndarjes nga jeta të Artan Lames, ka reaguar edhe drejtoresha e Autoritet të Dosjeve, Gentiana Sula. Përmes një postimi në rrjetet sociale, Autoriteti i Dosjeve ngushëlloi edhe bashkëshorten e të ndjerit, Mirela Dhono Lame, e cila është njëkohësisht punonjëse e këtij institucioni.

“Humbja është e madhe dhe dhimbja e thellë si për familjen, por edhe për të gjithë ata që e njohën dhe vlerësuan si njeri me integritet, vizion e humanizëm”, shkruan Autoriteti i Dosjeve.

Ngushëllime për familjen dhe miqtë e Artan Lames, ka shprehur edhe ministrja e Arsimit dhe Sportit, Ogerta Manastirliu.

“E hidhëruar nga ndarja e parakohëshme nga jeta e Artan Lames. Ngushëllime familjes, Mirelës dhe fëmijëve, miqve e shokëve në këtë moment kaq të dhimbshëm për të gjithë!
Qoftë i paharruar kujtimi i tij”, shkroi ministrja Manastirliu në rrjetet sociale.

Po ashtu, ngushëllime ka artikuluar dhe ministri i Shtetit për Marrëdhëniet me Parlamentin, Taulant Balla, i cili shkruan: “Lamtumirë miku dhe shoku im i mirë Artan Lame. Do na mungosh shumë.”

Ministrja e Shtetit për Rininë dhe Fëmijët shkroi në faqen e saj online: “Shumë i trishtë lajmi për ndarjen nga jeta të Artanit. Ngushëllime bashkëshortes, Mirelës, fëmijëve dhe gjithë të afërmit. I paharruar kujtimi i tij”.

…Vijon

/a.f/

The post Mesazhe ngushëllimi për ndarjen nga jeta të Artan Lames appeared first on Agjencia Telegrafike Shqiptare.

Pretendimi: Presidentja e Komisionit Europian Ursula von der Leyen u shpall fajtore për rryshfet sepse fshehu mesazhet e që shkëmbeu me drejtorin e Pfizer Albert Bourla.

Verdikti: Mungon konteksti

——————————————————

Një artikull i botuar më 15 maj në portalin Mast.al pretendon se presidentja e Komisionit Europian Ursula von der Leyen është shpallur “fajtore për rryshfet” sepse fshehu mesazhet që shkëmbeu me drejtorin e Pfizer, Albert Bourla.

Në brendinë e tij, artikulli vijon:

Gjykata Europiane e Drejtësisë e shpalli fajtore Presidenten e Komisionit Ursula von der Leyen për refuzimin e zbulimit të mesazheve SMS që ajo shkëmbeu me drejtorin ekzekutiv të Pfizer, Albert Bourla, gjatë pandemisë Covid-19!

Shkurt, gjykata e akuzon atë për shkatërrimin e provave që e inkriminonin atë dhe A. Bourlas për transaksione financiare, pra për “ryshfete”.

Megjithatë, Gjykata Europiane e Drejtësisë nuk ka shpallur fajtore Ursula von der Leyen për refuzim provash, e aq më pak për rryshfet, diçka që nuk ishte fare në diskutim në këtë çështje.

Në të vërtetë, më 14 maj, Gjykata Europiane e Drejtësisë anuloi vendimin e Komisionit Europian për t’i mohuar gazetës New York Times qasje në mesazhet e shkëmbyera midis von der Leyen dhe drejtorit ekzekutiv të Pfizer, Albert Bourla, duke konstatuar se institucioni nuk arriti të shpjegonte në mënyrë të besueshme pse nuk i zotëronte mesazhet.

Gjykata vendosi se Komisioni “nuk ka dhënë një shpjegim të besueshëm për të justifikuar mospatjen e dokumenteve të kërkuara.”

Sipas Gjykatës, Komisioni nuk mund thjesht të pretendojë se nuk i ka dokumentet e kërkuara. Ai duhet të ofrojë shpjegime të besueshme që i mundësojnë si publikut ashtu edhe Gjykatës të kuptojnë pse këto dokumente nuk mund të gjenden.

Gjykata gjeti se New York Times kishte paraqitur prova relevante dhe të qëndrueshme që tregonin ekzistencën e mesazheve midis Presidentes të Komisionit dhe Drejtorit Ekzekutiv të Pfizer në lidhje me prokurimin e vaksinave kundër Covid-19.

NYT zbuloi ekzistencën e mesazheve në vitin 2021 gjatë intervistave me Bourla, por hasi pengesa kur kërkoi akses në to. Komisioni pretendoi se nuk mund t’i jepte tekstet. Pas përpjekjeve të përsëritura të pasuksesshme për të marrë mesazhet, New York Times e çoi çështjen para gjykatës më të lartë të BE në janar 2023.

Sipas rregullores së BE-së të vitit 2001 mbi aksesin publik në dokumente, mesazhet me tekst kualifikohen si “dokumente” dhe duhet të ruhen dhe të vihen në dispozicion sipas kërkesës, argumentoi New York Times.

Rregullorja e përcakton një dokument si “çdo përmbajtje, pavarësisht mediumit të tij (i shkruar në letër, i ruajtur në formë elektronike ose si një regjistrim zanor, vizual ose audiovizual), që lidhet me një çështje që lidhet me politikat, aktivitetet dhe vendimet brenda sferës së përgjegjësisë së institucionit.”

Komisioni kishte pretenduar gjatë një seance paraprake vitin e kaluar se mesazhet ishin dërguar vetëm për të koordinuar takime dhe se përmbajtja e tyre nuk ishte mjaftueshëm e rëndësishme që ato të klasifikoheshin si dokumente. Si rrjedhim, ato nuk ishin të regjistruara dhe të disponueshme për t’u lëshuar gazetarëve. Megjithatë, avokatët e KE pranuan se nuk i kishin parë mesazhet dhe nuk mund të thoshin nëse ato ekzistonin ende.

Për gjyqtarët e BE, Komisioni nuk ka shpjeguar në detaje llojin e kërkimeve që ka kryer për të gjetur ato dokumente ose identitetin e vendeve ku janë kryer këto kërkime. Prandaj, nuk ka dhënë një shpjegim të besueshëm për të justifikuar mospasjen e dokumenteve të kërkuara.

Për më tepër, Komisioni nuk ka sqaruar në mënyrë të mjaftueshme nëse mesazhet e kërkuara janë fshirë dhe, nëse po, nëse fshirja ka qenë e qëllimshme, automatike apo për shkak të zëvendësimit të telefonit celular të Presidentes ndërkohë.

Komisioni Europian reagoi me ​​një deklaratë ndaj vendimit sipas së cilës tani do ta studiojnë nga afër vendimin e gjykatës dhe do të vendosin për hapat e mëtejshëm. Institucioni ekzekutiv gjithashtu do të “miratojë një vendim të ri që ofron një shpjegim më të detajuar” pas kërkesës fillestare të New York Times.

Komisioni Europian ka dy muaj kohë për të apeluar vendimin e Gjykatës Europiane së Drejtësisë, ose duhet ta zbatojë atë duke i botuar mesazhet, nëse ato ekzistojnë ende, ose duke dhënë një shpjegim të detajuar për mungesën e tyre, duke përfshirë informacion nëse ato janë fshirë dhe, nëse po, në çfarë rrethanash.

Kështu, pretendimi se Gjykata Europiane e Drejtësisë ka shpallur Ursula von der Leyen fajtore për rryshfet është i pavërtetë.

The post Ursula von der Leyen nuk u shpall fajtore për ryshfet për vaksinat appeared first on Faktoje.al.

Ish-Presidenti Joe Biden u diagnostikua me kancer të prostatës javën e kaluar, tha zyra e tij në një deklaratë të dielën. Lajmi erdhi pasi u zbulua se gjatë një “ekzaminimi klinik rutinë”, ai vuante nga kjo sëmundje e rëndë. Ai u diagnostikua me kancer të prostatës me një rezultat Gleason prej 9 (Grupi i Gradës 5) dhe metastazë në kocka”, tha zyra e tij të dielën.

Ndërsa Biden dhe familja e tij po shqyrtojnë opsionet e trajtimit, ish-Presidenti Barack Obama, Presidenti Donald Trump dhe udhëheqës të tjerë politikë kanë filluar të kontaktojnë për të shprehur mbështetjen e tyre për ish-presidentin e Shteteve të Bashkuara.

Obama postoi një mesazh të përzemërt në X dje, të dielën (18/5), duke thënë: “Michelle dhe unë po mendojmë për të gjithë familjen Biden. Askush nuk ka bërë më shumë për të gjetur trajtime inovative për kancerin në të gjitha format e tij sesa Joe, dhe jam i bindur se ai do t’i përballet kësaj sfide me vendosmërinë dhe hirin e tij karakteristik . Ne lutemi për një shërim të shpejtë dhe të plotë.”

Trump postoi në Truth Social, duke shkruar: “Unë dhe Melania jemi të trishtuar të dëgjojmë për diagnozën e fundit mjekësore të Joe Biden. I shprehim mbështetjen tonë dhe më të mirat Jill dhe familjes, dhe i urojmë Joe-t një shërim të shpejtë dhe të suksesshëm.”

Ish-zëvendëspresidentja e SHBA-së, Kamala Harris, postoi gjithashtu në X të dielën, duke thënë se ajo dhe bashkëshorti i saj luten për Joe Biden dhe familjens e tij.

” Joe është një luftëtar – dhe e di që ai do të përballet me këtë sfidë me të njëjtën forcë, qëndrueshmëri dhe optimizëm që gjithmonë kanë përcaktuar jetën dhe udhëheqjen e tij”, shkroi ajo.

Burri i saj, Doug Emhoff, ish-zëvendëskomandanti nën udhëheqjen e Bidenin, postoi veçmas mesazhin e tij.

Ish-Sekretarja e Shtetit Hillary Clinton gjithashtu dërgoi mbështetjen e saj: “Po mendoj për familjen Biden ndërsa përballen me kancerin, një sëmundje nga e cila ata kanë bërë kaq shumë për të shpëtuar familje të tjera. Ju uroj shërim të shpejtë dhe të plotë.”

Ish-Presidenti Bill Clinton shtoi gjithashtu një shënim në llogarinë e tij personale, duke thënë: “ Miku im Joe Biden ka qenë gjithmonë një luftëtar. Unë dhe Hillary e mbështesim atë, Jill dhe të gjithë familjen.”

Sekretari i Shtetit Marco Rubio shkroi në X: “Unë dhe Janet po lutemi për familjen Biden në këtë kohë të vështirë.”

“Zemrat tona janë me Presidentin Biden dhe të gjithë familjen e tij në këtë kohë”, shkroi Guvernatori i Kalifornisë, Gavin Neësom.

“Presidenti Biden e di që kur rrëzohesh, ngrihesh përsëri dhe lufton”, shkroi Guvernatori i Illinois-it J.B. Pritzker.

Anëtarët e Kongresit nga të dyja partitë përdorën gjithashtu mediat sociale për të ndarë mbështetjen e tyre për familjen Biden.

Midis senatorëve demokratë që shprehën mbështetjen e tyre ishin Peter Welch i Vermontit, Ruben Gallego i Neë Mexico-s, Tim Kaine i Virxhinias dhe John Fetterman i Pensilvanisë.

Midis senatorëve republikanë ishin Tom Tillis i Karolinës së Veriut, Susan Collins e Maine dhe Roger Marshall i Kansasit.

Përfaqësuesja demokrate Ro Canna e Kalifornisë shkroi: “Ai dhe Jill kanë qenë gjithmonë luftëtarë dhe jam e bindur se do ta përballojnë këtë sfidë me forcë.”

“Ndërsa përballeni me këtë sfidë shëndetësore, lutjet e mia janë me ju, për guxim të vazhdueshëm në këtë kohë të vështirë dhe një shërim të plotë”, shkroi përfaqësuesja demokrate Joyce Beatty nga Ohio në X.

Përfaqësuesit republikanë Anna Paulina Luna nga Florida dhe Mike Lawler nga Nju Jorku shprehën gjithashtu mesazhet e tyre për një shërim të shpejtë.

Udhëheqësi i pakicës në Dhomën e Përfaqësuesve, Hakeem Jeffries, lëshoi ​​një deklaratë të dielën në mbrëmje, duke thënë: “Gjatë viteve, familja Biden është përballur me vështirësi të paimagjinueshme me mirësjellje dhe këmbëngulje të palëkundur. Ne qëndrojmë me Presidentin Biden ndërsa ai përballet me këtë moment me të njëjtën guxim dhe qëndrueshmëri që ka treguar gjatë gjithë jetës së tij.”

The post “Ai është luftëtar!”/ Sëmundja e rëndë e Biden bën bashkë republikanë e demokratë, ‘lumë’ mesazhesh mbështetëse appeared first on Sot News | Lajme.

Nëse dikur njiheshe në shkollë, në punë, ose në ndonjë lokal, sot gjithçka nis nga… një emoji. Ndoshta një koment në story. Ndoshta ai “më doli në explore” që tani është fjalia më e përdorur në Shqipëri për të çelur bisedë.

Ka nga ata që nga DM kanë përfunduar në pushime, në bashkëjetesë, në dasmë. Ka dhe nga ata që s’kanë shkuar kurrë përtej një “Seen-i” pas një mesazhi 3 rreshta. Dhe natyrisht… ka edhe histori që kanë përfunduar në faqe rozë, me screen të publikuara, thumbime dhe unfollow publik.

Në 2025, lidhjet nuk janë më sekrete – janë një “screenshot larg” nga trending page-i.

Fakti është: rrjetet sociale kanë ndryshuar gjithçka. Të bëjnë të ndihesh i zgjedhur, i veçantë, derisa të kuptosh që e njëjta frazë i është dërguar dhe pesë të tjerëve.

Por prapë… të gjithë i hapim DM-të me pak kuriozitet dhe pak shpresë, apo jo?

The post Dashuritë që nisin në DM: romantizëm modern apo thjesht për konsum? appeared first on iconstyle.al.

Në një botë ku ritmi i jetës po bëhet gjithnjë e më i vrullshëm, mënyrat tona të komunikimit kanë ndryshuar ndjeshëm. Sot, gjithnjë e më shumë njerëz preferojnë të komunikojnë përmes mesazheve, duke lënë pas dore telefonatat tradicionale. Por pse ndodh kjo?

Ekspertët thonë se mesazhet ofrojnë një ndjesi më të madhe kontrolli dhe komoditeti. Njerëzit mund t’i lexojnë dhe t’u përgjigjen kur të jenë gati, pa u ndier të detyruar të ndërpresin çfarëdo aktiviteti që po kryejnë. Nga ana tjetër, telefonatat kërkojnë vëmendje të plotë dhe shpesh konsiderohen “invazive”, sidomos në momente të papërshtatshme.

Një tjetër arsye është ankthi social. Disa individë ndihen më rehat duke shprehur mendimet e tyre me shkrim, pa pasur frikën e ndonjë pauze të sikletshme apo keqkuptimi në tonin e zërit. Ndërkohë, mesazhet i japin mundësi përdoruesit të mendojë përpara se të përgjigjet – një luks që një bisedë telefonike nuk e ofron.

Sigurisht, teknologjia ka luajtur rolin e saj. Aplikacione si WhatsApp, Instagram apo iMessage e kanë bërë komunikimin me tekst më të shpejtë, më të lehtë dhe më kreativ, me emoji, voice message dhe imazhe që zëvendësojnë fjalët.

Megjithatë, ndonëse komunikimi me mesazhe po dominon, shumë ekspertë paralajmërojnë se kjo mund të ndikojë në thellësinë e marrëdhënieve njerëzore, duke reduktuar kontaktin e drejtpërdrejtë dhe ndjeshmërinë emocionale që një bisedë “live” mund të ofrojë.

Pra, a po humbim artin e të folurit apo thjesht po evoluojmë drejt një forme të re komunikimi? Kjo mbetet për t’u parë.

The post Pse njerëzit zgjedhin të komunikojnë më shumë me mesazhe sesa me telefonata? appeared first on iconstyle.al.

Kulla Eiffel e ndriçuar me fjalën “PAQE” është një gjest simbolik që përdoret shpesh për të promovuar unitetin, solidaritetin dhe jo dhunës gjatë kohërave të tensioneve apo tragjedive globale. Fjala “PAQE” në gjuhën frënge, angleze, arabe dhe hebreje është projektuar në Kullën Eiffel të Parisit, me qëllim për të tërhequr vëmendjen e botës ndaj palestinezëve të cilët po humbin jetën në Rripin e Gazës si pasojë e sulmeve izraelite.

Gjithashtu një grup aktivistësh u tubuan poshtë Kullës Eiffel, duke mbajtur pankarta me fjalët paqe në gjuhën angleze ‘Peace’ dhe arabe ‘Salam’, të cilët bënë thirrje për solidaritet global me Gazën. Në këtë mënyrë, kulla bëhet një shfaqje e fuqishme vizuale, e dukshme për miliona, duke përcjellë mbështetjen e Francës për paqen dhe një thirrje për harmoni në mbarë botën. Që nga 7 tetori i vitit 2023, ushtria izraelite në sulmet e saj brutale ka vrarë të paktën 51 mijë palestinezë, shumica prej tyre gra dhe fëmijë.

Nëntorin e vitit të kaluar, Gjykata Ndërkombëtare Penale lëshoi urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza. Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë.

The post PAQE/ Kulla Eifel ndriçohet nga mesazhet solidarizuese për Gazën appeared first on Sot News | Lajme.

Gjatë seancës konstituive të Kuvendit të Kosovës, kamerat kanë kapur një bisedë të shkruar nga deputeti i Partisë Demokratike Turke të Kosovës (KDTP), Fikrim Damka, ku zbulohet një mesazh për ndarjen e posteve me kryeministrin Albin Kurti.

Në mesazhin e shkruar nga Damka, përmendet propozimi i Kurtit që Emilja Rexhepi të emërohet nënkryetare e Kuvendit, ndërsa një përfaqësues tjetër të marrë një post zëvendësministror.

“Fidani le ta propozojë zv.ministrin në Ministri të Mbrojtjes ose Shëndetësisë. Nënkryetare me marrë Emilija”, thuhet në mesazhin që i referohet një marrëveshjeje të propozuar nga Kurti. Në përgjigje, Damka shpreh se propozimi nuk është pranuar dhe se negociatat nuk po japin rezultat. “Jo kryeministër nuk e pranon, nuk po bi…”, shkruan Damka në mesazh gjatë seancës. 

The post Dalin SMS-të mes Albin Kurtit dhe deputetit: “Zv.ministër në Mbrojtje ose Shëndetësi” appeared first on Lapsi.al.

“La Repubblica” ka publikuar edhe mesazhet që Mark Samson dërgoi nga telefoni i Ilaria Sulës pas vdekjes së saj. “Nuk e di nëse do të bëj ndonjë budallallëk. Por do të shkoj në shtëpinë e një djali që takova në rrugë. Unë isha keq”. Është data 26 mars kur Maria Sofia u kontaktua nga celulari i Ilaria Sulës, mikes së saj më të mirë. 22-vjeçarja një natë më parë kishte qenë në shtëpinë e ish-të dashurit të saj Mark Samson dhe pasi e vrau, i mori celularin dhe nisi t’i dërgonte mesazhe në emër të saj për të hedhur menjëherë hetimin nga binarët.

Bisedat janë tashmë pjesë e hetimit. 23-vjeçari tentoi që pas vrasjes të mashtronte miqtë e vajzës për zhdukjen e saj. “Ne e pamë njëri-tjetrin këtë mëngjes jashtë La Sapienza dhe ai më pyeti nëse doja të dilja sot”, – shkroi Samson, duke u shtirur si ish-e dashura e tij: “Unë po fle këtu”, shtonte ai.

Për ta bërë skenën më të besueshme, në orën 19:42, Samson postoi gjithashtu një foto të një të riu muskuloz duke ndezur kureshtjen e mikes së saj: “O Zot, kështu? A e bëre?” Në vend të Ilarias ai konfirmonte: “Po, kam qenë keq”, më pas kur e pyesin se ku është ajo bëhet evazive: “Nuk më pëlqen Sofi, dua të ndihem e lirë në çdo kuptim, pa e parë askush se ku jam”.

Kur i kërkohet të dërgojë vendndodhjen, Samson shkruan në vend të Ilarias: “Nuk mundem, zemër, më fal. Unë jam praktikisht në Napoli”. Maria Sofia ishte e shqetësuar: “Mirë, bëj si të duash, unë nuk do të të gjykoj nëse shkove në Napoli, sigurisht që nuk do t’ia tregoj Markut. Por meqenëse shkove në shtëpinë e dikujt dhe nëse ka ndodhur diçka, sepse askush nuk e di se ku ishe.” Ilaria, megjithatë, ndryshon tonin e saj: “Nëse jam në mut mund të dal vetë”.

Orët kalojnë dhe ndërkohë nuk ka më asnjë lajm për Ilarian. Maria Sofia e telefonon disa herë, por vajza nuk i përgjigjet: “Ilaria, më thirri nëna jote, po thërret policinë”. Në orën 12, Samsoni përgjigjet në emër të së resë: “Të lutem, harrova se duhej të shkoja në Terni. Nuk jam në Romë”, shkruan ai në vend të Ilarias. Përgjigja nuk e bind Maria Sofian e cila kërkon konfirmimin: “Nuk të besoj. Duhet të të dëgjoj, duhet të të shoh. Tani”. Ilaria e rreme, megjithatë, nxjerr justifikime: “Nuk më punon mikrofoni, telefoni mori ujë”.

Në atë moment është e qartë se diçka nuk është në rregull. “Mamaja e Ilarias tashmë është larguar për të shkuar në Romë. Unë do të jap 4 minuta. Të përshëndes kushdo që je” – shkroi Maria Sofia të premten në mëngjes. Dhe Samsoni nuk u përgjigj më në emër të Ilaria Sulës të paktën privatisht. Më 31 mars, kur u bë publik lajmi për zhdukjen e saj, ai hyri në profilin e saj në Facebook dhe shkroi. “Faleminderit të gjithëve, jam mirë.” Ishte përpjekja e fundit për të çorientuar hetimet, përpara zbulimit të trupit dhe rrëfimit, që daton natën mes 1 dhe 2 prillit.

Rrëfimi i Samson

Samson ka rrëfyer ftohtë dhe me kthjelltësi vrasjen e ish-të dashurës së tij, Ilarias, e cila ndodhi, sipas versionit të tij, mëngjesin e 26 marsit. Gjatë marrjes në pyetje me gjyqtaren e hetimeve paraprake dhe prokurorin publik, siç raporton La Repubblica, i riu rindërtoi me detaje çdo fazë të krimit. Ai shpjegoi se e kishte goditur Ilarinë nga pas me një thikë kuzhine, të njëjtën që kishin përdorur për të prerë mortadelën.

“Unë e godita dy herë me thikë nga pas. Ajo nuk vuri re asgjë, nuk bërtiti shumë” – ka thënë ai. Një dinamikë brutale, e rrëfyer pa hezitim. Kur gjyqtarja e pyeti nëse vajza kishte vdekur menjëherë, ajo u përgjigj po.

Pasi e goditi, Mark Samson tha se u përkul mbi Ilarian për të parë nëse ajo ishte ende gjallë. Kur e kuptoi se ajo nuk po merrte më frymë, tha se mbeti i palëvizur për disa minuta, “I vura një çantë mbi kokë. Pastaj mbeta atje, i palëvizur dhe i traumatizuar nga ajo që kisha bërë”. Në atë moment, tha ai, u ndje i pushtuar nga një ndjenjë zbrazëtie, por megjithatë vendosi ta fshihte trupin.

Samson tha se ai kërkoi diçka për të fshehur trupin dhe gjeti një valixhe në dhomën e gjumit të prindërve të tij. Me këtë filloi operacionin makabër të zhdukjes së gjurmëve. Ai e mbështolli Ilarinë me dy qese plastike shtesë: njëra mbulonte pjesën e sipërme të valixhes, tjetra këmbët. Në atë moment ai la karrocën në korridor, jashtë dhomës së tij. Aty do të qëndronte derisa të gjente momentin e duhur për ta hequr qafe.

Sipas Samsonit , vrasja ka ndodhur rreth orës 11 të mëngjesit. Megjithatë, detektivët nuk janë plotësisht të bindur për kohën. Analiza e celularit të Ilarias, të cilin Marku thuhet se e mori me vete tregon se telefoni i saj u largua nga shtëpia në Via Homs në orën 10:36. Kjo sugjeron se shumë nga veprimet që ai përshkroi: mëngjesi, debati, leximi i mesazheve, vrasja dhe zhvendosja e trupit kishin ndodhur në një hark kohor shumë të shkurtër.

Një tjetër element që vë në pikëpyetje historinë është prania e plagëve mbrojtëse në krahët e Ilaria Sulës, shenja që tregojnë se ajo mund të jetë përpjekur të mbrohet, ndryshe nga versioni sipas të cilit ajo kishte vdekur në çast, pa kuptuar asgjë. Për më tepër, vajza ishte ende e veshur me të njëjtat rroba si një ditë më parë, duke nxitur dyshimet se vrasja ka ndodhur mbrëmjen e 25 marsit dhe jo mëngjesin e nesërm. Hetuesit besojnë se trupi ka qëndruar në shtëpi për disa orë para se të zhvendosej.

Elemente shqetësuese shfaqen edhe në lidhje me rolin e nënës së Mark Samson -it , e cila është nën hetim për bashkëpunim në fshehjen e një kufome pasi thuhet se ajo ka ndihmuar djalin e saj të pastrojë vendin e krimit. Vetëm pasditen e 26 marsit, Marku e kishte ngarkuar karrocën në makinë dhe u nis drejt malit Guadagnolo, në periferi të Romës. Aty, në një zonë të izoluar, ai ka braktisur valixhen me trupin e Ilarias në një kanal. ©LAPSI.al

The post Publikohen mesazhet që Mark Samson dërgoi nga celulari i Ilaria Sulës appeared first on Lapsi.al.

Më 11 prill (sot)nis zyrtarisht fushata elektorale për zgjedhjet parlamentare të 11 majit. Çdo forcë politike ka zgjedhur mënyra të ndryshme për të nisur garën, duke premtuar në bllok shpalosje të programeve dhe mesazhe politike.

Partia Socialiste

“Shqipëria 2030 në BE, vetëm me Edin dhe PS”, është slogani i PS-së që përforcon retorikën e vazhdueshme të kësaj force politike se, “vetëm  Edi Rama mund ta përmbushë këtë aspiratë”. Slogani tregon gjithashtu përqendrim të gjithë fushatës rreth një figure të vetme politike.

PS do të çelë zyrtarisht fushatën (nesër) më 12 prill në orën 12:00 në Sheshin “Skënderbej”, duke përdorur si simbolikë 12 yjet e flamurit të Bashkimit Europian, një metaforë për 12 qarqet e Shqipërisë dhe për destinin kryesor të PS-së, anëtarësimin në BE.

Çdo qark do të përfaqësohet nga një ekip delegues ndërsa nga Tirana do të flasë vetë Edi Rama.

Më 11 prill, (sot) PS zhvillon takime virtuale me gratë dhe vajzat në të 12 qarqet, ndërsa vetë ai do të jetë i pranishëm në Teatrin e Operas dhe Baletit në një sallë plot me gra. Fokusi do të jetë roli i grave në strukturat drejtuese, dhe rëndësia e barazisë gjinore në politikë.

PD-ASHM

Partia Demokratike dhe koalicioni Aleanca për Shqipërinë Madhështore drejtuar nga Sali Berisha  do të hapin fushatën sot në orën 19:00 në Sheshin “Nënë Tereza”. Skena është ngritur prej dy ditësh dhe aktiviteti i zhvilluar pasdite paralajmëron një takim me mesazhe politike ku përveç drejtuesve të koalicionit, pjesëmarrës do të jenë edhe figura publike jashtë politikës. Pritet të flasë Chris Lacivita, strategu amerikan që PD e prezanton si njeriun që do të drejtojë fushatën, herë nga SHBA dhe herë në terren.

Programi elektoral i PD do të prezantohet i plotë më 12 prill, ora 17:00, në Pallatin e Kongreseve para anëtarëve të Këshillit Kombëtar

“Nisma- SHB” dhe Lëvizja “Bashkë”

 Koalicioni “Nisma Shqipëria Bëhet” do ta hapë fushatën më 12 prill në Vlorë, në orën 18:00, ndërsa Lëvizja “Bashkë” e Arlind Qorit zgjedh Fierin për nisjen zyrtare të saj më 13 prill, në orën 10:30.

“Mundësia”

Agron Shehaj i partisë “Mundësia” e hap fushatën më 12 prill me një format ndryshe një tur 12-orësh me autobus, që do të përshkojë Shqipërinë nga Shkodra në Sarandë, duke ndaluar në qytetet kryesore për takime me qytetarët. Më 13 prill ai është shprehur se do të prezantojë programin e plotë elektoral.

Koalicioni Euroatlantik

Lulzim Basha do ta hapë fushatën më 12 prill në orën 11:00, te Xibraku. Ai garon në zgjedhje nën logon e Koalicionit Euroatlantik, duke u pozicionuar si alternativë perëndimore dhe pro-integrimit.

Zonat e riskut

11 maji pritet të jetë një betejë vendimtare për secilën prej këtyre forcave. Partitë politike kanë paralajmëruar shumëcka në fushatën e tyre të parakohshme, ndërsa hapin fushatën dikush me performanca artistike, dikush me simbole europiane e me mesazhe politike. Por si është situata në terren?  ISP në një raport të hollësishëm flet mbi zonat me riskun më të lartë për zgjedhjet parlamentare të 11 majit. Harta nuk konfirmon shkelje të standardeve zgjedhore dhe as zona ku do të ketë konflikt/incidente apo devijim të votës, por paralajmëron se ku mund të ketë duke ndihmuar në këtë mënyrë në parandalimin e çdo forme të abuzimit me votën dhe cenimit të standardeve.

Risku i lartë

Sipas raportit të hartuar nga ekspertët e ISP, Bashkia Elbasan dhe Durrës kanë koeficientin më të lartë të riskut, (87%), për shkak të ndërthurjes së shumë elementëve aty (ekzistenca e korrupsionit në nivele të larta, grupeve kriminale  me ndikim, lidhjeve të forta informale, nivelit të trafikimit të votës dhe rolit të individëve të fuqishëm ekonomikisht, si dhe traditës në 2-3 zgjedhjet e fundit parlamentare dhe lokale). Pas tyre dhe për të njëjtat motive vijnë bashkia Dibër, bashkia Lezhë, bashkia Kurbin, bashkia Shkodër, Fier etj.

Risku i ulët

Zonat me riskun më të ulët elektoral janë kryesisht zonat tradicionale të specifikave të njëjta edhe me zgjedhjet e viteve 2015-2025. Të tilla, sipas ISP, janë Përmeti, Maliq, Konispol, Finiq, Dimal, Gramsh, Belsh, etj, zona të cilat sipas ekspertëve nuk kanë krim të organizuar, nuk kanë individë të fuqishëm politikë dhe ekonomikë pas tyre, si dhe nuk kanë peshë të madhe elektorale.

The post Fushata nis me mesazhe dhe simbolika, Elbasani dhe Durrësi nën lupën e riskut zgjedhor appeared first on Faktoje.al.

Biznesmeni Behgjet Pacolli u ka bërë thirrje të gjithë miqve të tij të mos mashtrohen nga mesazhet që iu shkojnë në emër të tij pasi grupe kriminale po përdorin emrin e tij për të kërkuar shuma të mëdha parash.

Ai ka këkruar që menjëherë nëse marrin mesazhe të tilla të kontaktojnë me policinë.

“LAJMËRIM PËR MIQTË E MI – JU LUTEM LEXONI!

Kohët e fundit janë shfaqur grupe kriminale të sofistikuara që po përdorin metoda të ndryshme për të mashtruar njerëzit dhe për të përfituar shuma të mëdha parash.

Fatkeqësisht, një rast i tillë ka ndodhur edhe me identitetin tim, në Shqipëri.

Një person i panjohur ka përdorur fotografinë time dhe, përmes teknologjisë digjitale, ka imituar edhe numrin tim të telefonit. Ka kontaktuar disa nga miqtë e mi përmes ËhatsApp-it, duke kërkuar para me justifikimin se më duheshin urgjentisht në Tiranë, dhe se do t’i ktheja ditën tjetër.

Mesazhet ishin të tipit:

“Tani urgjentisht më nevojiten para në Tiranë. Po e dërgoj dikë t’i marrë, dhe nesër vij e ua kthej.”

Këto kërkesa kanë qenë për shuma të mëdha – nga 10 deri në 95.000 euro.

Fatkeqësisht, disa persona kanë besuar dhe kanë dërguar para.

Vetëm më 1 prill, një mik i vëmendshëm kuptoi se mënyra e të shkruarit nuk ishte e imja dhe më njoftoi menjëherë.

JU LUTEM: MOS U MASHTRONI!

Unë nuk kërkoj para nga askush.

Nëse merrni ndonjë mesazh të dyshimtë në emrin tim, mos reagoni – por njoftoni menjëherë policinë ose më informoni mua direkt.

Të gjithë së bashku mund t’u kundërvihemi këtyre mashtruesve pa skrupuj.

Ju kërkoj ndjesë për shqetësimin dhe ju falënderoj për mirëkuptimin dhe besimin!”, shkruan Pacolli.

The post Kërkuan para në emrin e biznesmenit/ Reagon Behgjet Pacolli: Mos u mashtroni appeared first on Sot News | Lajme.