Fitorja 2-0 e FC Copenhagen ndaj FC Dritës në ndeshjen e parë të raundit të dytë kualifikues për Ligën e Kampionëve i ka lënë pa fjalë as trajnerin danez Jacob Neestrup, e as yllin norvegjez të ekipit, Mohamed Elyounoussi – por jo vetëm për rezultatet, por edhe për mënyrën sesi Drita u paraqit në “Parken”.

Në një ndeshje ku dy penalltitë e Magnus Mattsson vendosën gjithçka në pjesën e dytë, trajneri Neestrup e përshkroi përballjen si “sfiduese” dhe vlerësoi punën e lojtarëve të tij, por edhe qasjen taktike të kampionëve nga Gjilani, me trajnerin Zekirija Ramadani.

“Në përputhje me pritshmëritë, Drita ishte e vështirë për t’u çarë, ndaj na u desh shumë durim. Ata kanë një mbrojtje solide dhe e kontrolluan lojën me thellësi dhe topa të gjatë. Na vunë në siklet me ritmin që na e ndërprenë përmes këndoreve dhe rivënieve anësore – gjëra që nuk i menaxhuam gjithmonë mirë”, deklaroi Neestrup.

Trajneri i kampionëve danezë pranoi se nuk ishte ndeshje e lehtë dhe se fitorja erdhi falë thellësisë së skuadrës dhe durimit në lojë.

Ai përmendi gjithashtu se hyrja e Mattsson ishte vendimtare dhe theksoi paraqitjen e mirë të Moukoko dhe përballimin e ndryshimeve të papritura në formacion për shkak të lëndimeve.

Por ishte ylli i gjigantëve danez, Mohamed Elyounoussi ai që e vuri në pah më qartë atë që e bëri Dritën “të veçantë” në këtë sfidë.

“Nuk kam përjetuar kurrë diçka të tillë. Më ndiqte një lojtar gjatë gjithë kohës, kudo që shkoja – qoftë në krahun e djathtë apo të majtë. Ishte një mbulim ekstrem, një për një, që më habiti”, u shpreh sulmuesi norvegjez.

Ai tregoi se për të “shkëputur” ndjekjen, u përpoq të ndërronte pozicione në mënyrë të qëllimshme dhe se nga ato lëvizje erdhën dy penalltitë e fituara.

“Drita na testoi durimin dhe disiplinën taktike. Duhej të improvizonim me rotacione për të thyer sistemin e tyre të markimit,” shtoi ai.

Pavarësisht humbjes, Drita doli nga kjo përballje me kokën lart dhe me respekt të madh nga një skuadër elitare evropiane. /Telegrafi/ 

The post Taktika e Dritës i ‘çmend’ danezët – trajneri Neestrup dhe sulmuesi Elyounoussi lavdërojnë skuadrën e Zekirija Ramadanit appeared first on Telegrafi.

Aktori i njohur Zac Efron (37) ka tërhequr vëmendjen e ndjekësve të tij, këtë herë me një paraqitje krejt të çlirët dhe pa bluzë. Ylli i Hollywood-it është fotografuar duke luajtur golf me vëllain e tij Dylan Efron (33), ndërsa tregonte fizikun e tij të tonifikuar dhe lëvizte nëpër fushë me makinë golfi.

Zac dhe Dylan – ky i fundit influencer dhe producent – u treguan të aftë në lojë, dhe videoja që ndanë me ndjekësit u përhap menjëherë në rrjetet sociale, duke gjeneruar një valë të madhe reagimesh pozitive.

Komentet nuk munguan: “Fatmirësisht Instagrami s’ka kufizim për sa herë mund të shikosh një video!”, “Është ky një ëndërr?”, “Ju lutem, kurrë mos harroni sa i pashëm është Zac Efron”, “Unë ofrohem vullnetarisht të ngas makinën e golfit!” – ishin vetëm disa nga reagimet në postim.

 

View this post on Instagram

 

A post shared by Zac Efron (@zacefron)

Shumë fansa e krahasuan këtë paraqitje me një nga skenat më ikonike të filmit High School Musical 2, ku personazhi i Zac-ut, Troy Bolton, këndon me pasion këngën Bet On It ndërsa ecën në një fushë golfi. Sipas tyre, ishte “një mundësi e humbur” që kjo këngë të mos përdorej si sfond për videon e re.

Ndërkohë, vëllai i Zac-ut, Dylan, po tërheq gjithnjë e më shumë vëmendje nga publiku – jo vetëm për ngjashmërinë fizike me të, por edhe për angazhimin e tij në botën televizive. Në muajin maj, ai mori pjesë në festivalin televiziv të Variety së bashku me pjesëmarrësit e tjerë të emisionit The Traitors US, një reality show ku debutoi në fillim të këtij viti dhe ndau një çmim prej 204,300 dollarësh me ekipin e tij.

Edhe pse zakonisht punon si koordinator prodhimi në projekte të mëdha si American Sniper dhe Ready Player One, Dylan ka pranuar se hyrja në një reality nuk ishte një vendim i lehtë: “Nuk thashë menjëherë ‘po’. Më kanë ofruar audicione për emisione të ndryshme si Survivor, por gjithmonë i kam refuzuar. Kjo ishte hera e parë që ndjeva se mund dhe doja të provoja”.

 

View this post on Instagram

 

A post shared by Dylan Efron (@dylanefron)

Ai shtoi se më parë i ishte ofruar edhe pjesëmarrja në Love Island, por formati i atij programi nuk përputhej me preferencat e tij.

Zac, në një intervistë për Entertainment Tonight në qershor, u shpreh i bindur për suksesin e vëllait të tij: “Gjithmonë ka pasur fat në lojëra. Që fëmijë, i dilte menjëherë Yahtzee në hedhjen e parë. Mendoj se do të fitojë”.

Dylan Efron preferon të ruajë privatësinë për jetën e tij personale, por së fundmi ka konfirmuar një lidhje që ishte përfolur prej kohësh.

 

View this post on Instagram

 

A post shared by Dylan Efron (@dylanefron)

Gjatë një interviste në podcastin The Viall Files në mars të këtij viti, ai pranoi: “Jam në një lidhje”, duke shtuar se partnerja e tij nuk është aktive në rrjetet sociale dhe punon një punë të zakonshme me orar të rregullt, nga 9 deri në 5.

Sipas revistës People, bëhet fjalë për Courtney King, dashuria e tij e hershme nga shkolla e mesme, me të cilën është në lidhje prej të paktën vitit 2016. Edhe pse rrallë shfaqen bashkë në publik, burime pranë çiftit thonë se lidhja e tyre është e qëndrueshme dhe e konsoliduar ndër vite. /Telegrafi/

The post Zac Efron tregoi trupin e tij të formësuar në fushën e golfit, vëllai i tij më i vogël tërhoqi vëmendjen appeared first on Telegrafi.

Kryetari i Komunës së Prishtinës, Përparim Rama, ka njoftuar sot se ka nënshkruar një vendim të rëndësishëm që garanton siguri afatgjatë për familjet e dëshmorëve të Republikës së Kosovës.

Banesat komunale, të cilat më herët ishin ndarë për këto familje për periudha të shkurtra kohore, tani do të jepen për shfrytëzim për një periudhë prej 99 vjetësh.

“Ne kemi vlerësuar se është koha që këto familje të kenë jo vetëm strehë, por siguri të plotë e afatgjatë”, theksoi Rama, duke shtuar se ky veprim nuk është një akt favori, por një hap institucional drejt drejtësisë dhe kujtesës kolektive.

Ai vuri në dukje se ky vendim është një vazhdimësi e një politike të nisur vite më parë dhe e miratuar në Kuvendin Komunal të Prishtinës, por tani përforcohet me një afat që garanton stabilitet dhe trajtim të qëndrueshëm për familjet që kanë sakrifikuar më shumë se gjithçka për lirinë e vendit.

“Prishtina u detyrohet familjeve të dëshmorëve jo vetëm nderim moral, por edhe trajtim dinjitoz dhe të qëndrueshëm”, tha ai, duke shprehur mirënjohjen e thellë për kontributin e tyre.

The post Rama nënshkruan vendimin: Banesat komunale për familjet e dëshmorëve, në shfrytëzim për 99 vjet appeared first on Telegrafi.

Mbajtja e një marrëdhënieje cilësore dhe të qëndrueshme nuk bazohet në përsosmëri, por në zakonet e përditshme që partnerët përvetësojnë për të pranuar më lehtë ndryshimet midis tyre dhe për të krijuar një ndjenjë afërsie.

Çiftet që qëndrojnë bashkë për një kohë të gjatë nuk i shmangin problemet, por mësojnë t’i zgjidhin ato në një mënyrë të qetë dhe të menduar mirë.

Një marrëdhënie e suksesshme kërkon përpjekje, por kur disa zakone të shëndetshme bëhen pjesë e rutinës suaj të përditshme, jeta së bashku bëhet më e këndshme dhe më rezistente ndaj krizave. Këto janë llojet e zakoneve që, sipas këshilltares Mitzi Bockmann, shpesh praktikohen nga çiftet që nuk kanë gjasa të divorcohen ndonjëherë

Ata bëjnë një pushim kur gjërat tensionohen

Kur sjellja e partnerit tuaj fillon të ndihet shumë irrituese, është e dobishme të distancoheni përkohësisht, thotë këshilluesja. “Në vend që të reagoni me zemërim, çiftet e lumtura e dinë kur kanë nevojë për hapësirë. Qoftë duke shkuar në një dhomë tjetër, duke bërë një shëtitje apo duke dëgjuar muzikë (me kufje), krijimi i distancës fizike shpesh zvogëlon tensionin dhe parandalon konfliktin e panevojshëm”, shpjegoi ajo për YourTango.

Ata nuk i shtypin frustrimet

Në vend që të heshtin dhe të ushqejnë pakënaqësi, çiftet e suksesshme flasin hapur për atë që i shqetëson, por vetëm pasi të jenë qetësuar. “Në vend që të bëjnë akuza, ata përshkruajnë se si një sjellje e caktuar i prek emocionalisht, gjë që i lejon partnerit të tyre të përgjigjet pa u mbrojtur. Kjo qasje inkurajon mirëkuptimin dhe zgjidhjen e problemeve në vend që të grinden”, thotë Bockmann.

Ata tregojnë mirëkuptim të ndërsjellë

Çiftet e lumtura e dinë se askush nuk është perfekt. “Në vend që ta shohin njëri-tjetrin si burim frustrimi, ata i kujtojnë vetes se shumica e zakoneve nuk drejtohen qëllimisht kundër partnerit të tyre. Ata e pranojnë se kanë të metat dhe gabimet e tyre dhe janë të gatshëm të tregojnë tolerancë dhe t’i japin palës tjetër pak hapësirë”, përfundon këshilltari.

The post Çiftet që ka gjasa të mos divorcohen kurrë praktikojnë tre zakone appeared first on Telegrafi.

Rreth 500 persona janë paraqitur për përfshirje në ekipet zjarrfikëse nëpër njësitë komunale në nivel shteti, ndërkohë që sipas planit do të angazhohen 400. Më së paku interesim kishte në Shkup, ku janë paraqitur vetëm 50 persona. Numri një i Drejtorisë për Mbrojtje dhe Shpëtim, Stojançe Angellov, sqaroi se tani fillon afati dyditor i stërvitjeve, ku njëkohësisht do të bëhet edhe përzgjedhja e atyre që do të zhvillohen në drejtim të zjarrfikësve.

“Kemi pak më pak se 500 persona të paraqitur në të gjithë territorin e shtetit. Neve na nevojiteshin 400. Për fat të keq numri në Shkup është pak më i vogël, ndër 50, ndërsa ne kemi pritur 80 persona. Këta persona, meqë sot përfundon afati formal, në dy tre ditët e ardhshme do të kontaktohen, të njëjtit do të thirren në njësitë lokale të zjarrfikësve, por disa prej tyre, ata në Shkup, në DMSH. Do të fillojnë me së paku dy ditë stërvitje, në këtë periudhë do të bëhet përzgjedhje i atyre që më tej mund të vazhdojnë të zhvillohen në drejtim të zjarrfikësve”, deklaroi Stojançe Angellov, Drejtoria për Mbrojtje dhe Shpëtim.

Lidhur me reagimet për pagesën prej vetëm 24 mijë denarësh, Angellov e cilësoi angazhimin e qytetarëve si vullnetar, duke nënvizuar se ata që do të punësohen, do të paguhen më së paku 40 mijë denarë.

“Këta persona nuk paguhen 24 mijë denarë, këtë më shumë e konsideroj si vullnetarizëm, vlerësoj se është në korniza të kyçjes vullnetare në një masë qeveritare, me qëllim që të njëjtit të përzgjidhen për punësim në njësitë zjarrfikëse lokale territoriale, ku paga është shumë më e lartë. Siç kam informacione sidomos në njësitë territoriale më të forta, prej 40 mijë denarë e më lartë, varësisht nga pozicione”, shtoi Stojançe Angellov, Drejtoria për Mbrojtje dhe Shpëtim.

Angellov, paralajmëroi formimin e një njësie speciale për mbrojtje dhe shpëtim, ku pjesëtarët do të jenë më të paktë në numër, por do të paguhen më shumë se zjarrfikësit. Këta persona do të jenë shumë më të përgatitur fizikisht, dhe do të përdoren në terrenet më të vështira, aty ku një zjarrfikës mesatar nuk do të mund të depërtojë. /Alsat/

The post Rreth 500 persona janë paraqitur për përfshirje në ekipet zjarrfikëse në RMV appeared first on Telegrafi.

Temperaturat përvëluese që kanë përfshirë Kosovën këto ditë kanë detyruar autoritetet të marrin masa të jashtëzakonshme për mbrojtjen e infrastrukturës rrugore.

Ministria e Mjedisit, Planifikimit Hapësinor dhe Infrastrukturës ka ndaluar qarkullimin e automjeteve me peshë mbi 15 tonë në rrugët kryesore të vendit – përfshirë autostradat dhe rrugët nacionale e rajonale – në orarin prej orës 11:00 deri në 17:00, nga data 23 korrik deri më 28 korrik 2025.

Ky vendim, megjithëse i motivuar nga arsye sigurie dhe ruajtje e rrugëve, ka sjellë pasoja të menjëhershme në pikën kufitare Kosovë–Shqipëri, konkretisht në Vërmicë.

Prej ditës së parë të hyrjes në fuqi të masës, janë krijuar radhë kilometrike kamionësh në anën shqiptare të kufirit, duke nisur nga fshati Morinë i Kukësit dhe duke u shtrirë deri në hyrje të territorit të Kosovës.

Kolonat e gjata kanë bllokuar një pjesë të konsiderueshme të qarkullimit, duke krijuar jo vetëm vështirësi logjistike, por edhe rrezikshmëri të shtuar.

Shumë nga kamionët e ndalur janë të ngarkuar me karburant dhe gaz, duke qëndruar për orë të tëra nën diellin përvëlues, çka rrit rrezikun për incidente të mundshme si shpërthime apo zjarre.

Situata është bërë edhe më e vështirë për shkak të fluksit të madh të mërgimtarëve kosovarë që po kthehen për pushime në vendlindje, si dhe pushuesve që kthehen nga bregdeti shqiptar.

Kjo ka shtuar më tej ngarkesën në këtë segment kufitar dhe ka shkaktuar kaos e vonesa të shumta, kryesisht në anën kosovare.

Zyrtarë të Ministrisë së Mjedisit kanë sqaruar se vendimi është i përkohshëm dhe se do të rivlerësohet në bazë të zhvillimeve klimatike në ditët në vijim.

Ata bëjnë thirrje për mirëkuptim dhe bashkëpunim nga të gjithë pjesëmarrësit në trafik, duke theksuar se masa synon ruajtjen e sigurisë dhe infrastrukturës publike në kushte të jashtëzakonshme moti.

The post Radhë kilometërshe në kufirin Shqipëri–Kosovë appeared first on Telegrafi.

Bashkimi Evropian kërcënon me tarifa ndëshkuese ndaj SHBA-së nëse nuk arrihet marrëveshja tregtare

Bashkimi Evropian po përgatit vendosjen e tarifave ndëshkuese ndaj produkteve amerikane, me vlerë gati 100 miliardë euro – nga uiski e deri te avionët Boeing – nëse presidenti amerikan, Donald Trump nuk arrin një marrëveshje tregtare me BE-në deri në fund të javës së ardhshme.

Komisioni Evropian njoftoi të mërkurën se do të bashkojë dy lista me produkte amerikane të përgatitura më parë, duke përfshirë mallra me vlerë 21 miliardë euro (përfshirë produkte shpendësh dhe alkool) dhe 72 miliardë euro të tjera (makina dhe aeroplanë). Nëse shtetet anëtare miratojnë propozimin në një votim që pritet së shpejti, tarifat do të hyjnë në fuqi më 7 gusht.

Olof Gill, përfaqësuesi tregtar i Komisionit Evropian, deklaroi se BE-ja synon ende të arrijë një marrëveshje, por po përgatitet për çdo skenar. Ai shtoi se bashkimi i dy listave do t’i bëjë kundërmasat më të qarta dhe më të forta.

Pas kërcënimeve të Trumpit për tarifa prej 30 për qind mbi të gjitha importet nga BE-ja, Brukseli po forcon qëndrimin e tij. Gjermania, që më parë favorizonte një marrëveshje të shpejtë për të hequr tarifat ekzistuese, tani mbështet përdorimin e “Instrumentit Kundër Detyrimit” (ACI), i cili lejon BE-në të përgjigjet me tarifa dhe ndalim të shërbimeve, një goditje e rëndë për sektorin amerikan të teknologjisë.

Industria evropiane e makinave është goditur rëndë nga tarifat, me kompanitë Stellantis dhe Volvo që raportojnë humbje të mëdha. Presidenti francez Macron dhe kancelari gjerman Merz kanë kërkuar prej kohësh një reagim më të fortë të BE-së ndaj presionit amerikan.

Megjithatë, disa ekspertë kritikojnë vonesën e BE-së në përgjigje dhe sugjerojnë se situata mund të zgjidhet vetëm përmes një takimi personal midis Trump dhe liderëve evropianë.

Kërcënimi i tarifave evropiane vjen para një samiti të rëndësishëm me Kinën, ku BE-ja do të përpiqet të balancojë marrëdhëniet tregtare, ndërsa eksportet kineze drejt Evropës vazhdojnë të rriten dhe sfidat për industrinë gjermane përkeqësohen nga ndalimet e eksportit të metaleve të rralla nga Kina. /Telegrafi/

The post BE kërcënon SHBA-në me tarifa ndëshkuese prej 100 miliardë euroshe appeared first on Telegrafi.

Atletico Madridi po përgatitet për një epokë të re në repartin ofensiv, teksa largimi i Angel Correas duket i pashmangshëm. Raportet sugjerojnë se sulmuesi argjentinas është shumë pranë një transferimi në Meksikë, me marrëveshjen që thuhet se është në fazat përfundimtare.

Largimi i Correës do të hapte hapësira në sulm dhe klubi madrilen nuk ka humbur kohë në kërkim të një zëvendësuesi të denjë. Një nga emrat në listën e ngushtë është Darwin Nunez. Sulmuesi uruguaian është i hapur për një largim nga Liverpooli, dhe Atletico ka shprehur interes serioz. Megjithatë, klubi anglez pritet të kërkojë një shumë të konsiderueshme për kartonin e tij.

Ndërsa 26-vjeçari mbetet një opsion interesant, drejtuesit e Atleticos po shqyrtojnë alternativa më të arsyeshme financiarisht. Me çmimet e transferimeve që po rriten ndjeshëm, klubi po vepron me kujdes, sidomos duke pasur parasysh angazhimet që po ndjek aktualisht për Cristian Romeron dhe Alex Baena.

Sipas “Diario AS”, emri më i fundit që ka hyrë në radarin e Atleticos është Federico Chiesa. Edhe pse Liverpooli e transferoi italianin vetëm verën e kaluar, paraqitjet e tij të pakta kanë bërë që klubi të jetë i hapur për largimin e tij – qoftë edhe përmes një huazimi.

Një marrëveshje e tillë do t’i lejonte Atleticos të përforcohej pa tejkaluar buxhetin, ndërsa Napoli është gjithashtu në garë për të rikthyer Chiesan në Serie A. Megjithatë, madrilenët raportohen të jenë favoritë për momentin.

Nëse transferimi realizohet, ai do të shënonte një kapitull të ri për Chiesan, i cili ka regjistruar 235 paraqitje, 47 gola dhe 43 asistime në Serie A. Që nga transferimi i tij te Liverpooli, 27-vjeçari ka luajtur vetëm 6 ndeshje në Premier League, pa shënuar apo asistuar, çka tregon se nuk është pjesë e planeve të trajnerit të ri Arne Slot.

Nga ana tjetër, Liverpooli është i gatshëm të negociojë, pasi ka nevojë për fonde për të financuar një tjetër transferim të madh: Rodrygo-n nga Real Madridi. /Telegrafi/

The post Atletico Madrid synon një transferim tronditës për yllin e Liverpoolit appeared first on Telegrafi.

Policia e Kosovës ka realizuar një operacion të suksesshëm në kuadër të luftës kundër krimit të organizuar, duke arrestuar katër persona të dyshuar për përfshirje në veprën penale “detyrim”.

Sipas njoftimit zyrtar, operacioni është zhvilluar nga Drejtoria Kundër Krimit të Organizuar dhe Krimeve të Rënda në bashkëpunim me hetimet rajonale në Pejë dhe njësi të tjera relevante, nën koordinimin e Prokurorisë Themelore në Pejë.

Hetimet kanë zbuluar se të dyshuarit, përmes formave të ndryshme të kanosjes, i kanë pamundësuar viktimës posedimin dhe shfrytëzimin e pronës së tij, të blerë në mënyrë të ligjshme. Madje, për ta lejuar të njëjtin të përdorë pronën, viktima ishte detyruar të paguajë një shumë prej 30.000 eurosh.

Të katër personat janë arrestuar në flagrancë dhe pas intervistimit nga organet kompetente, me vendim të prokurorit të rastit, janë ndaluar për 48 orë.

Policia e Kosovës ka theksuar se mbetet e përkushtuar në luftimin e krimeve të rënda dhe sjelljen e personave të dyshuar para drejtësisë, duke garantuar siguri dhe mbrojtje për qytetarët.

The post Arrestohen katër persona në Pejë – kërkuan 30 mijë euro për pronën e viktimës appeared first on Telegrafi.

Komisioni Qendror i Zgjedhjeve, ka bërë të ditur se tashmë ka filluar periudha për regjistrimin e votuesve jashtë Kosovës, për votim me postë në Zgjedhjet Lokale për Kryetar të Komunave dhe për Kuvende Komunale.

Gjatë periudhës 38-ditore (23 korrik 2025 – 29 gusht 2025), të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës.

Aplikimi për regjistrim duhet të jetë individualë dhe mund të bëhet:

1) përmes platformës elektronike të KQZ-së https://diaspora.kqz-ks.org ose

2) përmes postës duke dërguar aplikimin në kutinë postare të KQZ-së në Kosovë.

“Për dallim nga zgjedhjet për Kuvendin e Kosovës, në Zgjedhjet Lokale votimi jashtë vendit realizohet vetëm përmes postës, pasi në Ligjin për Zgjedhjet e Përgjithshme përcaktohet se votimi në përfaqësi diplomatike nuk aplikohet në këtë lloj zgjedhjesh”. thuhet në njoftimin e KQZ-së.

Periudha e votimit përmes postës do të fillojë më 17 shtator dhe do të përfundojë më 11 tetor 2025.

Kjo periudhë do të vlejë vetëm për shtetasit që do të arrijnë të regjistrohen suksesshëm si votues jashtë Kosovës gjatë periudhës së regjistrimit (23 korrik – 29 gusht 2025).

Zgjedhjet Lokale në Kosovë do të mbahen më 12 tetor.

The post Nis regjistrimi i votuesve nga jashtë për votim me postë në Zgjedhjet Lokale 2025 appeared first on Telegrafi.

Mesfushori turk, Hakan Calhanoglu ka thënë se është “një lojtar i Interit” që “dëshiron të vazhdojë këtu”, teksa iu bashkua klubit për fillimin e stërvitjeve parasezonale.

Duke folur për Gazzetta dello Sport, ish-lojtari i Leverkusenit reflektoi gjithashtu mbi tensionin e nxehtë brenda skuadrës në fillim të verës, kur u grind me Lautaro Martinezin, duke zbuluar se “folëm – jemi profesionistë, nuk ka problem. Kur të kthehet kapiteni, do ta përqafoj dhe kaq”.

Calhanoglu u përfol shumë gjatë javëve të fundit me një transferim në Superligën Turke. Fillimisht, Galatasaray u cilësua si favorit për të nënshkruar me turkun. Megjithatë, negociatat e vazhdueshme të klubit me Napolin për Victor Osimhen duket se po i mbajnë duart shumë të zëna në këtë pikë.

Lexo po ashtu Mourinho dëshiron yllin e Interit te Fenerbahce, kjo do të ishte një ‘goditje’ e madhe ndaj Galatasarayt

Pastaj, në fund të javës së kaluar, Fenerbahce i Jose Mourinhos doli si pretendentë i mundshëm për Calhanoglu, me raportet në Itali që pretendonin se klubi ishte gati t’i ofronte yllit të Interit shiritin e kapitenit nëse ai do të largohej nga Italia për në Turqi.

Duke folur për temën e spekulimeve, Calhanoglu tha se “çdo vit ka thashetheme për transferime, në këtë rast ndoshta disa të tjera, por unë nuk thashë asgjë sepse doja që tifozët tanë ta shihnin vetë se jam kthyer – nuk është gjithmonë e drejtë të bësh deklarata”.

Kur u pyet për rinovimin e kontratës, ai u përgjigj: “Le të presim dhe të shohim se çfarë do të ndodhë me kalimin e viteve. Por qëllimi im është të fitoj këtu.”

Calhanoglu, 31 vjeç, ka qenë një shtyllë e skuadrës Nerazzurri që kur erdhi falas nga rivalët e urryer të Milanit në vitin 2021. Sezonin e kaluar, mesfushori me përvojë ishte gjithmonë i pranishëm, duke luajtur 47 ndeshje në të gjitha garat – duke shënuar 11 gola dhe duke asistuar tetë të tjerë. /Telegrafi/

The post Calhanoglu flet për thashethemet rreth Galatasarayt dhe Fenerbahces, si dhe pajtimin me Lautaron appeared first on Telegrafi.

Presidenti i Serbisë, Aleksandar Vuçiq, mori pjesë të martën në një festë në Pozhegë, me rastin e hapjes së segmentit të ri të autostradës Pakovraqe – Pozhegë, organizuar nga tabloidi proqeveritar Informer.

Festa me trumbetarë, këngë dhe shpërndarje parash shkaktoi shumë reagime – jo vetëm për shkak të cilësisë së dyshimtë të autostradës, por edhe për përmbajtjen e këngëve që u interpretuan gjatë këtij rasti.

Segmenti i autostradës u hap edhe pse, sipas informacioneve nga qarqe profesionale, inxhinierët dhe shërbimet përkatëse refuzuan të nënshkruanin lejen e përdorimit për shkak të mangësive serioze në siguri, veçanërisht në tunele.

Ne može da ne ukrade, pa to ti je.

– Ime, daj neki dinar da platim muziku.
* Koliko!?
– Ma daj sve što imaš.

Drhtavom rukom dao muzici 2000 din, ostalo u džep. Antić u čudu, ali jbg. mora da ćuti šefu, ober lopovu.

A ker DJV, tras 200 evrića, da pokaže i on koliki je lopov. pic.twitter.com/FAs0fKbOiV

— 𝙁𝙀𝙍𝙈𝘼𝙉 ︎ (@FermanTwitt) July 22, 2025

Gjatë ceremonisë, në afërsi ishin të pranishme ekipe policie, zjarrfikësish dhe ndihme të shpejtë, gjë që tregon më tej për rrezikshmërinë e pjesës së sapohapur të rrugës. Ndërkohë, qytetarët e Çaçakut mbetën pa një mjek në spitalin lokal – pikërisht për shkak të angazhimit të shërbimeve mjekësore në këtë ngjarje.

Ndër të pranishmit në festë ishin edhe ish-kryeministri serb, Milosh Vuçeviq, lider i Partisë Progresive Serbe dhe këshilltar i Vuçiqit, si dhe drejtori i policisë Dragan Vasiljeviq.

Momenti kryesor i festës ishte përpjekja e Vuçiqit për të shpërblyer trumbetarët – me një kartëmonedhë prej 2000 dinarësh, të cilën ua zgjaste gjatë dhe me ngathtësi. E gjithë skena u bë e pakëndshme edhe për vetë Vuçiqin, gjë që shihej qartë në shprehjen e tij të fytyrës, dhe u regjistrua në një video që po qarkullon në rrjetet sociale.

Vëmendje të veçantë tërhoqi edhe kënga që u dëgjua në atë rast – “Një varkë e vogël lundron në det”, e interpretuar me mbështetjen e publikut. Bëhet fjalë për një këngë të Bajës, Mali Knindzha, i njohur për këngët e tij nacionaliste, me vargje që lavdërojnë hapur lëvizjen çetnike dhe kriminelin e luftës nga Lufta e Dytë Botërore, Drazha Mihailoviq. /Telegrafi/

The post Vuçiç festoi me këngë çetnike hapjen e një autostrade appeared first on Telegrafi.

MPB njofton se dje pasdite në orën 14:15, Shërbimi i Kujdesit Shëndetësor Shkup ka marrë njoftim se i ndjeri S.K. (50) nga Shkupi është gjetur në parkun përballë ndërtesës së ish-“Nova Makedonija”.

Ekipi i Shërbimit të Mjekësisë së Shpejtë ka konfirmuar vdekjen pa gjurmë të dukshme dhune, dhe me urdhër të Prokurorit Publik, trupi është dërguar për autopsi./Telegrafi/

The post Gjendet një person i vdekur në Shkup, trupi dorëzohet për autopsi appeared first on Telegrafi.

Keqpërdorim i mundësive dhe i serbëve në Kosovë.

Kështu e komentojnë Dushan Janjiq nga Forumi i Beogradit për Marrëdhënie Etnike dhe Ehat Miftaraj nga Instituti i Kosovës për Drejtësi deklaratën e zyrtarit serb, Igor Popoviq, i cili Ushtrinë Çlirimtare të Kosovës e quajti organizatë terroriste.

Popoviq u dërgua në paraburgim për 30 ditë në Kosovë, për veprën penale “nxitje e urrejtjes dhe mosdurimit”.

Sipas Kodit Penal të Kosovës, kjo vepër dënohet me burgim prej një deri në tetë vjet.

Drejtori i Zyrës për Kosovën në Qeverinë e Serbisë, Petar Petkoviq, tha më 21 korrik se ky ishte një “vendim politik” dhe se “nuk do të ketë vazhdim të dialogut për normalizimin e marrëdhënieve me Kosovën, derisa Popoviq të lirohet”.

Lexo po ashtu Kurti: Beogradi po nxit tensione, qytetarët të shmangin udhëtimet drejt Serbisë

Janjiq, duke folur për Radion Evropa e Lirë, thotë se bëhet fjalë për “një lojë të pakuptimtë të pushtetit në Serbi”.

“Një qasje e tillë ndaj dialogut [me Kosovën], një qasje e tillë ndaj realitetit, tregon vetëm se Serbia me qëllim – e kam fjalën për Zyrën për Kosovën – nuk dëshiron ta bëjë punën e saj… Ky është keqpërdorim i situatës së serbëve në Kosovë, për të mbetur në pushtet në Serbi”, thotë Janjiq.

Miftaraj ndan të njëjtin qëndrim. Sipas tij, Popoviq ishte “shumë i vetëdijshëm për veprimet e tij dhe pasojat ligjore që mund t’i kishte”.

“Megjithatë, në këtë rast, ai bëri një vetësakrificë, si dëm kolateral ndaj presidentit serb, Aleksandar Vuçiq, i cili përdor [drejtorin e Zyrës për Kosovën, Petar] Petkoviq dhe zyrtarët e tjerë shtetërorë serbë, apo edhe vetë serbët e Kosovës, si mjet për të larguar vëmendjen nga trazirat dhe protestat aktuale kundër Qeverisë së tij në të gjithë Serbinë”, thotë Miftaraj për Radion Evropa e Lirë.

Çfarë tha Popoviq dhe ku?

Ndihmësdrejtori i Zyrës për Kosovën në Qeverinë e Serbisë, Igor Popoviq, qëndroi më 18 korrik në Hoqë të Madhe, për të shënuar përvjetorin e vrasjes së disa serbëve në territorin e komunës së Rahovecit, dhe në fjalimin e tij Ushtrinë Çlirimtare të Kosovës e quajti organizatë terroriste.

“Vëllezërit tanë [serbët e Kosovës] kanë pësuar, sepse terroristët e UÇK-së nuk i donin serbët në këto troje, dhe me ekzekutimin e tyre, donin t’i frikësonin banorët e tjerë serbë, që të largoheshin nga ky vend. Gjithashtu, është e dhimbshme që terroristët dhe organizatorët, autorët e krimit, nuk janë gjetur dhe ndëshkuar gjatë gjithë këtyre viteve, edhe pse shohim se i gjithë Rripi i Gazës po shkatërrohet për një krim të ngjashëm të rrëmbimit të civilëve izraelitë”, tha Popoviq.

Për shkak të këtyre fjalëve, ai u ndalua në vendkalimin kufitar në Jarinjë dhe, më vonë, iu shqiptua masa e paraburgimit prej një muaji, sipas nenit 141 të Kodit Penal për nxitje të urrejtjes dhe mosdurimit.

Për veprën penale të nxitjes së urrejtjes, përçarjes dhe mosdurimit midis grupeve kombëtare, racore, fetare, etnike ose grupeve të tjera, në një mënyrë që mund të rrezikojë rendin publik, dënimi mund të jetë me gjobë ose deri në pesë vjet burgim.

Kushdo që në mënyrë sistematike ose duke abuzuar me pozicionin ose autoritetin e tij kryen këtë vepër penale, i nënshtrohet dënimit me burgim nga një deri në tetë vjet.

Avokati Lubomir Pantoviq tha më herët se do t’i drejtohet Gjykatës së Apelit kundër vendimit për caktimin e paraburgimit për Popoviqin.

“Fjalor i caktuar fjalësh”

Janjiq thotë se autoritetet aktuale në Serbi kanë një “fjalor të caktuar fjalësh”, por se ato nuk mund t’i anulojnë dokumentet ndërkombëtare.

“Ekziston Marrëveshja e Kumanovës, në të cilën është përcaktuar qartë demilitarizimi dhe transformimi i UÇK-së, jo si organizatë terroriste. Politikanët në Serbi i keqpërdorin mundësitë në Kosovë dhe gjatë vizitave të rralla atje përhapin retorikë të re”, thotë Janjiq.

Ai thekson se që nga fundi i viteve 1970, vendet perëndimore kanë mbështetur ndryshimet në organizimin e UÇK-së, duke mos e konsideruar më si një organizatë terroriste, por si një forcë politike-ushtarake që ka luftuar për çlirim nga forcat serbe.

Janjiq thotë, po ashtu, se deklarata e Popoviqit nuk ishte “e mençur”, veçanërisht për shkak të proceseve gjyqësore ndaj ish-pjesëtarëve të UÇK-së.

Dhomat e Specializuara të Kosovës në Hagë janë duke hetuar krimet e luftës që dyshohet se janë kryer nga pjesëtarë të UÇK-së kundër pakicave etnike dhe rivalëve politikë, nga janari i vitit 1998 deri në dhjetor të vitit 2000.

“Një deklaratë e tillë është shkatërruese, veçanërisht kur ekzistojnë procese të papërfunduara gjyqësore për krime lufte, të kryera nga ushtria dhe paraushtarakët serbë. Kjo arrogancë dhe ky primitivizëm i diskursit të ri, që përkrahet në Serbi, nuk mund t’i fshijnë faktet. Përkundrazi, kontribuojnë në propagandën politike se serbët nuk mund të integrohen”, thotë Janjiq.

Lexo po ashtu Igor Popoviqit i caktohet një muaj paraburgim pas deklaratave fyese ndaj UÇK-së

“Në vend të mesazheve të paqes, gjuhë e urrejtjes”

Miftaraj thekson se ligjet aktuale në Kosovë, por edhe në shoqëritë e tjera demokratike, nuk e lejojnë gjuhën e urrejtjes.

“Igor Popoviq, në vend që ta përdorte vizitën e tij për të promovuar paqen dhe harmoninë midis popullsisë serbe në Kosovë, e keqpërdori atë, duke përdorur gjuhë urrejtjeje dhe duke dërguar mesazhe politike, që kontribuojnë më tej në përçarje dhe në përkeqësimin e marrëdhënieve etnike në Kosovë”, thotë Miftaraj.

Ai beson se të gjitha veprimet e Zyrës për Kosovën janë të organizuara dhe të orkestruara mirë nga presidenti serb, Aleksandar Vuçiq, dhe Qeveria serbe.

Në vitin 2022, Ivan Todosijeviq, zyrtar i Listës Serbe, u dënua me një vit burg për “nxitje të urrejtjes dhe mosdurimit”.

Deklarata e tij lidhej me masakrën e Reçakut, të cilën e cilësoi si “trillim”.

Por, në korrik të vitit 2023, Gjykata Supreme e Kosovës e liroi atë nga të gjitha akuzat, duke konstatuar se mendimi i shprehur nuk përbënte vepër penale, pavarësisht nga ngjarja që kishte ndodhur.

Reagimet nga Kosova dhe Serbia

Pas arrestimit të Popoviqit, ministri në detyrë i Punëve të Brendshme të Kosovës, Xhelal Sveçla, tha se Kosova nuk do të tolerojë fyerjen dhe përdhosjen e historisë, e aq më pak të luftës së zhvilluar nga UÇK-ja.

Pastaj erdhën edhe reagimet e drejtorit të Zyrës për Kosovën në Qeverinë e Serbisë, Petar Petkoviq, ministrit të Jashtëm serb, Marko Gjuriq, dhe zyrtarëve të tjerë, të cilët vlerësuan se deklarata e Popoviqit “u kërkonte llogari atyre që kryen krime” dhe bënë thirrje për lirimin e tij të menjëhershëm.

Presidenti serb, Vuçiq tha se Beogradi zyrtar i ka informuar të gjithë partnerët për arrestimin e Popoviqit, duke shtuar se kjo ngjarje “mund të ketë pasoja të paparashikueshme”.

“Arrestimi i Igor Popoviq tregon se [kryeministri në detyrë i Kosovës] Albin Kurti e ka humbur arsyen dhe dëshiron të provokojë incidente dhe konflikte në Ballkanin Perëndimor”, tha Vuçiq gjatë një paraqitjeje si i ftuar në Televizionin Pink të Beogradit.

Lexo po ashtu Vuçiq reagon pas paraburgimit të Igor Popoviqit: Kjo mund të ketë pasoja të paparashikueshme

Kurti tha se e sheh këtë deklaratë të presidentit serb si kërcënim, sepse vjen nga komandanti suprem i ushtrisë së një shteti.

“Me tone nxitëse të konfliktit, [deklarata] nuk mund të konsiderohet më si qëndrim individual, por si politikë shtetërore”, tha Kurti në një konferencë me gazetarët.

Më 21 korrik, Prokuroria e Lartë Publike në Beograd i kërkoi Drejtorisë së Policisë Kriminale (UKP) dhe Agjencisë së Sigurisë dhe Informacionit (BIA) të Serbisë të mbledhin informacionet e nevojshme për “identifikimin e personave” që arrestuan Popoviqin, me qëllim “vërtetimin e elementeve thelbësore të veprës penale: rrëmbim”./REL/

The post Rasti Popoviq, lojë e Serbisë apo vetësakrificë politike appeared first on Telegrafi.

Andy Byron, ish-drejtori ekzekutiv i “Astronomer”, i cili u shkarkua pas një incidenti me ish-kolegen Kristin Cabot në një koncert të “Coldplay”, teknikisht mund të përpiqet të padisë grupin, por çdo çështje ligjore do të ishte “e pavlerë”, sipas shumë ekspertëve ligjorë.

Polemika shpërtheu gjatë shfaqjes së Coldplay pranë Bostonit, kur këngëtari kryesor Chris Martin vuri re Byron dhe Cabot në kamerën e puthjeve të stadiumit dhe tha me shaka në mikrofon: “Ose kanë një aferë ose janë thjesht të turpshëm”.

Ajo replikë e vetme, e kapur në video dhe e shpërndarë gjerësisht në internet, ndihmoi në ndezjen e spekulimeve rreth natyrës së marrëdhënies së tyre, spekulime që që atëherë janë përforcuar nga raportet se si Byron ashtu edhe Cabot janë të martuar.

Coldplay accidentally exposed an alleged affair between Astronomer CEO Andy Byron and his colleague Kristin Cabot at one of their recent concerts. pic.twitter.com/hsJHV2u5UM

— Pop Base (@PopBase) July 17, 2025

Me Byronin që tani përballet si me shqyrtim publik ashtu edhe me pasoja profesionale, pasi dha dorëheqjen si drejtor ekzekutiv vetëm disa ditë pas momentit viral, disa kanë spekuluar nëse ai mund të ndiqte veprime ligjore kundër “Coldplay”.

Por avokatët thonë se ka pak shanse për sukses, edhe me strategjitë më “kreative” ligjore.

Lexo po ashtu Grupi “Oasis” u thotë fansave se janë të sigurt pas skandalit në koncertin e “Coldplay”

Padia për shpifje nuk ka gjasa të qëndrojë në gjykatë

Avokati Camron Dowlatshahi i ‘MSD Lawyers’ shpjegoi se e vetmja rrugë e mundshme ligjore për Byron do të ishte shpifja, por është e tepruar.

“Nëse po bëhemi kreativë, një padi e mundshme do të ishte për shpifje, konkretisht për sa i përket karakterizimit të të dyve nga Chris Martin si të lidhur ngushtë me njëri-tjetrin”, tha Dowlatshahi për Page Six.

Por ai theksoi gjithashtu se sa e vështirë do të ishte të provohej një pohim i tillë.

“Asnjë nga këto elementë nuk do të përmbushet”, tha Dowlatshahi . “Pra, çdo pretendim kundër Coldplay do të ishte i pavlerë. Dyshoj shumë se Byron do të donte shqyrtim të mëtejshëm publik duke ngritur një padi pothuajse të pavlerë”.

Avokati Ray Seilie i ‘Kinsella Holley Iser Kump Steinsapir LLP’ u pajtua.

“Komentet e Martinit… nuk e arrijnë pragun për shpifje”, tha Seilie . “E vetmja gjë që do të arrinte një padi nga Byron është se do ta mbante mungesën e tij të maturisë në lajme për një kohë shumë më të gjatë”.

Pretendimet për privatësi nuk do të qëndrojnë gjithashtu

“Nuk ka asnjë pritje për privatësi në një arenë publike”, tha Seilie.

Jules Polonetsky, Drejtor Ekzekutiv i Forumit të së Ardhmes së Privatësisë, u pajtua, duke thënë, “Byron nuk kishte asnjë pritje të arsyeshme për privatësi në një vend publik”.

Edhe nëse dikush do të përpiqej të ngrejë një kërkesë sipas ligjeve të përgjimit, ato do të zbatoheshin vetëm për audion, dhe koncerti i “Coldplay” ka të ngjarë të përfshinte terma dhe kushte standarde gjatë blerjes së biletave.

Këto kushte zakonisht u japin organizatorëve të eventeve leje për të përdorur imazhe dhe video të kapura në event. /Telegrafi/

The post Andy Byron mund të përgatitë një padi prej një milion dollarësh kundër “Coldplay” për videon që i shkatërroi jetën? appeared first on Telegrafi.

Të dhënat nga tregtia e jashtme e mallrave në Kosovë tregojnë për një deficit tregtar prej 17. 1 për qind në muajin qershor 2025, në raport me periudhën e njëjtët të vitit 2024, gjegjësisht në vlerë prej 498,3 milionë euro, krahasuar me deficitin prej 425. 4 milionë euro në vitin 2024.

Eksporti mbulon importin me 13. 9 për qind.

Sipas Agjencisë së Statistikave të Kosovës, eksporti i mallrave në muajin qershor 2025 kishte vlerën 80. 4 milionë euro, ndërsa importi 578. 7 milionë euro, që është një rritje prej 9.5 për qind për eksport, si dhe një rritje prej 16.0 për qind për import, duke krahasuar me periudhën e njëjtë të vitit 2024.

Sipas të dhënave të grupeve kryesore të eksportit: 21,4% e përbëjnë metalet bazë dhe artikujt prej tyre; 13,0% e përbëjnë ushqimet e përgatitura, 12,5% e përbëjnë plastika, goma dhe artikujt prej tyre; 9,8% e përbëjnë artikujt e ndryshëm të prodhuar; pijet dhe duhani; 6,7% e produktet minerale, etj.

Ndërsa sipas të dhënave të grupeve kryesore të importit: 14,0% e përbëjnë produktet minerale; 13,2% e përbëjnë makineritë, pajisjet mekanike dhe elektrike; 13,0% e përbëjnë ushqimet e përgatitura, pijet dhe duhani; 12,3% e përbëjnë mjetet e transportit; 8,6% e përbëjnë metalet bazë dhe artikujt prej tyre; etj.

Eksportet e Kosovës në vendet e BE-së arritën në 27,6 milionë ëuro, ose rreth 34,4% e eksporteve të përgjithshme, me një rritje prej 10,7%. Partnerët kryesorë për eksportin e mallrave në BE ishin: Gjermania 9,4%, Italia 3,3, Holanda 3,2%, etj.

“Importet e Kosovës nga vendet e BE-së ishin rreth 249,6 milionë euro, ose 43,1 për qind e importeve të përgjithshme, me një rritje prej 9,2 për qind. Importet me pjesëmarrje me të lartë ishin nga: Gjermania (14,2%), Polonia (5,2%), Italia (4,7%), etj.

Ndërkaq, eksportet e Kosovës me vendet e CEFTA-s arritën në 36,9 milion Euro, ose 45,9% të eksporteve të përgjithshme, me një rritje prej 12,2%2. Partnerë kryesorë për eksport nga vendet e CEFTA-s ishin: Shqipëria (16,9%), Maqedonia e Veriut (15,5%), Mali i Zi (6,3%), Serbia (5,7%).

“Importet nga vendet e CEFTA-s arritën në 82,7 milion Euro, ose 14,3% të importeve të përgjithshme, me një rritje prej 28,1%. Vendet me pjesëmarrje më të lartë për import ishin: Maqedonia e Veriut (5,1%), Shqipëria (4,8%), Serbia (3,4%)”, thuhet në raportin e ASK-së.

Ndërsa, eksportet e Kosovës me vendet e tjera të botës arritën në 15,9 milion Euro, ose 19,8%. Si partnerë më të rëndësishëm nga këto vende për eksport ishin: Zvicra (11,3%) dhe Turqia (2,9%).

Importet e Kosovës me vendet e tjera të botës arritën në 246,4 milion Euro, ose 42,6%. Vendet me pjesëmarrje më të lartë për import në këtë grup ishin: Kina (13,1%) dhe Turqia (12,6%)./KP/

The post Bilanci tregtar, importi shënon rritje 16 për qind në qershor appeared first on Telegrafi.

Shtëpia evropiane e futbollit, UEFA nuk mbështet ndryshimet e mundshme në rregullat e futbollit, për t’i dhënë më shumë fuqi VAR-it.

Më parë, u raportua se Bordi i Federatës Ndërkombëtare të Futbollit (IFAB) mund të lejojë që VAR të ndërhyjë në rastet që përfshijnë kartonë të dytë të verdhë dhe goditje nga këndi të dhëna gabimisht.

Rikuperimet apo goditjet e dyta pas pritjeve të penalltive nga portierët gjithashtu mund të ndalohen.

Megjithatë, sipas The Times, drejtuesit e UEFA-s do të kundërshtojë zgjerimin e kompetencave të VAR-it, pasi organizata beson se më shumë vonesa do të anulonin çdo përfitim nga ndërhyrjet shtesë të VAR-it.

Lexo po ashtu IFAB shqyrton disa ndryshime drastike në VAR, pritet t'i shtojë kompetenca në ndërhyrje

UEFA është gjithashtu kundër ndryshimit të propozuar në rregullat e ekzekutimit të penalltive.

Vërehet se zyrtarët e UEFA-s janë të pakënaqur që në mars të këtij viti IFAB prezantoi një numër ndryshimesh në rregulla pa u konsultuar me ta.

Një ndryshim i tillë është se një goditje nga këndi tani do të jepet nëse një portier mban topin në duar për më shumë se tetë sekonda. /Telegrafi/

The post UEFA kundërshton zgjerimin e fuqive të VAR për shkak të rritjes së mundshme të vonesave appeared first on Telegrafi.

Një vizë e re turistike do të lansohet së shpejti që do ta bëjë udhëtimin midis vendeve në Gjirin më të lehtë.

Viza e Grand Tours e GCC-së – e njohur edhe si Viza e Unifikuar Turistike ose Viza e Unifikuar e GCC-së – u miratua në vitin 2023.

Kjo do të thotë të jesh në gjendje të vizitosh Bahreinin, Kuvajtin, Omanin, Katarin, Arabinë Saudite dhe Emiratet e Bashkuara Arabe me një leje të vetme, shkruajnë mediat e huaja, përcjell Telegrafi.

Qëllimi është të përmirësohet udhëtimi në rajon dhe të bëhet më e lehtë eksplorimi i vendeve të shumta në një udhëtim.

Viza e Unifikuar Turistike do të jetë një leje e vetme që u jep hyrje të gjashtë shteteve anëtare të Këshillit të Bashkëpunimit të Gjirit (GCC).

Për momentin, udhëtarët duhet të aplikojnë për viza të veçanta për secilin vend.

Me sistemin e ri, shtetasit jo-GCC do të jenë në gjendje të zgjedhin të aplikojnë për një opsion për një vend të vetëm ose për shumë vende.

Për të aplikuar, do të krijohet një portal i vetëm, që do të thotë gjithashtu lehtësim i barrës administrative për vizitorët.

Për t’u kualifikuar, qëllimi i vizitës suaj duhet të jetë turizmi, një qëndrim afatshkurtër ose takimi me familjen dhe miqtë.

Viza nuk lejon punësim ose qëndrime afatgjata.

GCC ende nuk e ka konfirmuar periudhën e vlefshmërisë së vizës, por pritet të jetë nga 30 deri në 90 ditë.

Tarifa gjithashtu nuk është njoftuar ende, por autoritetet thonë se opsioni i ri shumëvendësh do të jetë një alternativë me kosto efektive ndaj gjashtë vizave të ndara aktuale për ata që dëshirojnë të vizitojnë të gjitha shtetet anëtare.

Viza e Unifikuar Turistike pritet të lansohet deri në fund të vitit 2025 ose në fillim të vitit 2026. /Telegrafi/

The post Vendet e Gjirit me një vizë të re të tipit Shengen appeared first on Telegrafi.

T’easy’: Sistemi që identifikon spermatozoidet me saktësi maksimale

Studiues nga Brukseli kanë zhvilluar një metodë me inteligjencë artificiale për trajtimin e infertilitetit tek meshkujt.

Spitali Universitar i Brukselit ka krijuar një metodë inovative që mund të përmirësojë ndjeshëm efikasitetin e trajtimeve për infertilitetin mashkullor, duke përdorur inteligjencën artificiale për të identifikuar më shpejt dhe më saktë spermatozoidet tek pacientët me fertilitet të ulët.

Teknologjia, e quajtur “T’easy”, është rezultat i bashkëpunimit mes studiuesve të qendrës për mjekësi riprodhuese “Brussels IVF” dhe kompanisë “Robovision Healthcare”.

Sipas spitalit, ky mjet mund të përfaqësojë një hap të rëndësishëm përpara në fushën e riprodhimit të asistuar, shkruan Radio-Televizioni Flamand (VRT), transmeton Telegrafi.

— Belga News Agency_English (@Belga_English) July 23, 2025

“Në rastet kur spermatozoidet nuk gjenden në ejakulat, aplikohet procedura e ekstraktimit testikular të spermës (TESE), që përfshin marrjen e një mostre nga indi testikular, nga e cila përpiqemi të nxjerrim spermatozoide. Nëse gjenden, ato përdoren për metodën ICSI të fekondimit in vitro, ku një spermatozoid i vetëm injektohet drejtpërdrejt në qelizën vezë”, kanë shpjeguar shkencëtarët.

Kjo procedurë, e përdorur që nga viti 1995, u jep shpresë meshkujve me fertilitet të zvogëluar për të pasur fëmijë biologjikë, por rezultatet shpesh ndryshojnë për shkak të vështirësive në identifikimin e spermatozoideve në mostrat e indeve.

“‘T’easy’ na mundëson të zbulojmë spermatozoidet më saktë dhe më shpejt, duke u dhënë prindërve të mundshëm informacion më të shpejtë për gjasat e suksesit të trajtimit. Gjithashtu, reduktohet ndjeshëm rreziku për të humbur spermatozoidet potencialisht të dobishme,” thuhet në njoftimin e Spitalit Universitar të Brukselit. /Telegrafi/

The post Inteligjenca artificiale trajton infertilitetin tek meshkujt: Në kërkim të spermatozoideve të shëndetshme appeared first on Telegrafi.

Zv.kryeministri për Qeverisje të Mirë, Arben Fetai, sot në konferencë për shtyp tha se nga 1 janari 2026 do të hyjnë në fuqi ligje të reja për administratën publike, me të cilat do të shfuqizohet titulli “bashkëpunëtor i ri” dhe “referent i ri”. Ai tha se këto dy terme kanë poshtëruar shqiptarët në çdo zyrë shtetërore.

“Qeveria VLEN ka marrë një vendim historik në kuadër të reformës së administratës publike. Me ligjet e reja për administratën publike, do të shfuqizohen përfundimisht titujt diskriminues “pomlad sorabotnik” dhe “pomlad referent”, që për dy dekada poshtruan shqiptarët në çdo zyrë shtetërore. Me VLEN, nuk ka më “bashkëpunëtor të ri”! Nuk ka më “referent të ri”!”.

“Duke filluar nga 1 janari 2026, të gjithë të punësuarit me titullin “bashkëpunëtor i ri” do të avancohen automatikisht në gradën “bashkëpunëtor”. Të punësuarit me titullin “bashkëpunëtor” do të bëhen “bashkëpunëtor profesional”. Ata me arsim të mesëm që mbajnë titullin “referent i ri” ose “referent” do të avancohen në gradën “referent i lartë”. Titulli “referent i lartë” do të zëvendësohet me “referent i pavarur”. Të gjitha këto ndodhin automatikisht, me fuqinë e ligjit, pa procedura shtesë. Këto janë vendim i qartë për dinjitetin e nëpunësve administrativ”.

Ai theksoi se BDI kishte gjithë kohën ta bënte këtë gjë, por nuk deshi apo nuk mundi”.

“Kjo nuk është vetëm drejtësi administrative. Është korrigjim i një padrejtësie historike. Është politikë me integritet. Këtu bëhet fjalë për fuqizimin e shqiptarëve në institucione. Kështu japim një mesazh të qartë: se koha e nënçmimit ka përfunduar.
Tash është koha e respektit dhe e barazisë. Sepse për ne, barazia nuk është slogan fushate, por thelbi i pushtetit. Dhe këtë pushtet ne nuk e përdorim për të sunduar, nënshtruar apo kushtëzua. Pushteti për ne përdoret për të çliruar potencialin e shqiptarëve, për t’ua kthyer shqiptarëve dinjitetin e cunguar”, tha mes tjerash Fetai./Telegrafi/

The post Fetai: Nga 1 janari 2026 hiqen termet “bashkëpunëtor i ri” dhe “referent i ri” në administratën shtetërore appeared first on Telegrafi.