TIRANË, 30 gusht /ATSH/ Vllaznia e vajzave arriti një fitore të rëndësishme ndaj Racing Union në UEFA Women’s Champions League, duke triumfuar 3-1 në ndeshjen e zhvilluar sot në “Loro Boriçi” në Shkodër.

Me këtë sukses, Vllaznia siguroi vendin e tretë në mini-turneun e saj dhe kualifikohet automatikisht në raundin e parë të UEFA Women’s Europa Cup për sezonin 2025/26, duke vazhduar rrugëtimin në garat europiane.

Skuadra shkodrane dominoi takimin dhe në pjesën e parë realizoi tre gola me Arbiona Bajraktarit, Megi Doçin dhe Teresa Dedan.

Racing Union arriti të shënojë vetëm një gol në fund të takimit me Coraline Corplet, dhe ndeshja u mbyll 3-1 në favor të Vllaznisë.

Në raundin e parë kualifikues të UEFA Women’s Europa Cup do të marrë pjesë edhe Partizani i vajzave. Shorti për këtë raund është planifikuar nesër, më 31 gusht.

/gj.m/j.p/

The post Vllaznia e vajzave fiton 3-1 ndaj Racing Union, vijon rrugëtimin në UEFA Women’s Europa Cup appeared first on Agjencia Telegrafike Shqiptare.

TIRANË, 30 gusht /ATSH/ Ambasada e Shteteve të Bashkuara në Tiranë, ka shpërndarë një mesazh të rëndësishme për qytetarët në lidhje me politikën e vizave amerikane.

Në një postim në rrjetet sociale, ambasada thekson angazhimin e saj në mbrojtjen e sigurisë kombëtare të Amerikës dhe ruajtjen e standardeve të larta në procesin e dhënies së vizave.

Në mesazh theksohet se SHBA mirëpret dhe mbështet udhëtarët e ligjshëm që duan të vizitojnë SHBA-në.

“Ne po mbrojmë Amerikën dhe mirëpresim udhëtarët e ligjshëm. Ne ruajmë standardet më të larta të kontrollit në procesin e vizave amerikane dhe përshtatemi ndaj kërcënimeve të reja përmes një bashkëpunimi të ngushtë ndërmjet agjencive së qeverisë së Shteteve të Bashkuara”, thuhet në mesazhin e tyre.

/gj.m/j.p/

The post Ambasada e SHBA në Tiranë mesazh për qytetarët: Standarde të larta kontrolli mbi vizat appeared first on Agjencia Telegrafike Shqiptare.

TIRANË, 30 gusht /ATSH/ Kalaja e Bashtovës, një nga stolitë e trashëgimisë kulturore të Shqipërisë, është restauruar dhe rikthyer në jetë me mbështetjen e BE-së përmes EU4Culture.

Kalaja e shekullit të 16-të është tashmë një hapësirë e gjallë për kulturën, turizmin dhe zhvillimin e komunitetit.

Ceremonia e Inaugurimit të Kalasë së Bashtovës mbrëmë ishte gjithashtu një mundësi për të theksuar rëndësinë e turizmit të qëndrueshëm dhe menaxhimit të trashëgimisë kulturore.

“Me restaurimin e kalasë duam të nderojmë trashëgiminë e pasur kulturore të Shqipërisë, por gjithashtu të krijojmë mundësi për turizëm të qëndrueshëm”, tha ambasadori i BE në Shqipëri, Silvio Gonzato.

“Përmes programit EU4Culture, ne jo vetëm që po restaurojmë ndërtesa, por po krijojmë edhe mundësi për artistët, zejtarët dhe për angazhimin e komunitetit”, theksoi Gonzato.

“Ne duam të krijojmë hapësira për të diskutuar, për t’u lidhur dhe për të qënë të hapur. Fantastike që një kala e cila u ndërtua për mbrojtje dhe për izolim, kthehet në një hapësirë për angazhim, për takime dhe për zbulime kulturore. Ne kemi nevojë për më pak mure dhe më shumë hapësira të tilla për komunitetet tona”, tha ambasadori Gonzato.

/gj.m/j.p/

The post Restaurimi i Kalasë së Bashtovës, Gonzato: Nderojmë trashëgiminë e pasur kulturore të Shqipërisë appeared first on Agjencia Telegrafike Shqiptare.

TIRANË, 30 gusht /ATSH/ Trajneri i Kombëtares U-21, Alban Bushi, doli në konferencën për mediet nga “Shtëpia e Futbollit”, pas publikimit të listës me 23 lojtarët e grumbulluar për dy ndeshjet miqësore ndaj Gjermanisë dhe Zvicrës.

Tekniku kuqezi i konsideroi këto dy miqësore shumë të vlefshme dhe të rëndësishme, teksa foli edhe për listën e lojtarëve të grumbulluar, si dhe dy risitë e ardhura zinxhir nga ekipet Kombëtare të moshave, Adi Kurti dhe Alain Taho.

Në fund, Alban Bushi ftoi të gjithë tifozët për të mbështetur Kombëtaren U-21 në stadiumin “Elbasan Arena” për ndeshjen ndaj Gjermanisë, që do të luhet më 5 shtator, në orën 18:00.

“Kemi dy sfida shumë të rëndësishme, i konsideroj tepër të mëdha dhe me përgjegjësi, siç është Gjermania dhe Zvicra. Duhet të luajmë një futboll të bukur dhe rezultativ përpara publikut tonë në “Elbasan Arena”, gjithashtu edhe në ndeshjen me Zvicrën. Gjermania është nënkampione e Europës. E dimë forcën e tyre dhe emrin e madh që ata kanë. Por ne, si gjithmonë, do të futemi për fitore. Kemi pasur dy teste miqësore të kaluara, si me Hungarinë dhe Turqinë, që jam i kënaqur nga të dyja ndeshjet. Me Hungarinë fituam dhe me Turqinë humbëm, por ekipi tregoi shumë karakter në fushë dhe shumë shpresa për të ardhmen. Është një grup i ri, kemi bërë pak ndeshje miqësore me njëri-tjetrin, por dukemi shumë të fortë. Nga dita në ditë po rriten”, tha Bushi.

Për sa i përket Kurtit dhe Tahos, kanë qenë pjesë e moshave të ekipeve kombëtare. Ne kemi nevojë për mbrojtës dhe portier. Mendoj që të dy janë lojtarë që do të jenë pjesë edhe e Kombëtares A mbase në të ardhmen, sepse kanë shumë potencial. Për momentin i kemi afruar për t’i parë më nga afër, meqë janë edhe miqësore. Ta dimë edhe më mirë potencialin e tyre. Mendoj se janë dy lojtarë shumë premtues”, shtoi ai.

“Mendoj që kemi bërë maksimumin përsa i përket lojtarëve nga kampionati shqiptar. Nuk është se ka shumë. Këta të 6, mendoj, janë cilësorë dhe janë në formë, kanë minuta në këmbë, janë titullarë në ekipet e tyre. Mendoj se do të na ndihmojnë në këto dy ndeshje. Lojtarë që kanë qenë edhe më përpara, siç është Gudjufi. Ka qenë vjet, por nuk ka pasur shumë minuta. Tani ka filluar të luajë te Partizani, kam shumë besim te ai. Ndeshjen e fundit me Vorën e pashë live dhe m’u duk shumë në formë”, u shpreh Bushi.

“Me Gjermaninë është një sfidë e rëndësishme, që është me përgjegjësi të madhe. Kam besim te ekipi dhe që do të fitojmë këtë ndeshje, sepse luajmë në shtëpinë tonë. Duhet ta kënaqim ekipin me lojë dhe rezultat. Jemi ekip i ri, por kemi shumë besim. Kemi krijuar një grup shumë të fortë. Gjermania është ekip i fortë, por mund të themi që është e fortë në letër. Në fushë nuk kemi zbritur akoma. Do të luftojmë shumë deri në fund të të dyja ndeshjeve. Me Zvicrën na ka lënë një shije të mirë fitorja e fundit. Nuk e kemi frikë aspak. I kemi mundur. Duhet të bëjmë maksimumin në të dyja ndeshjet, përsa i përket strategjisë dhe lojës taktike që ne kemi vendosur të bëjmë me lojtarët. Grupi ka lojtarë që janë për ekipin, sakrifikojnë, që luajnë me pasion dhe dëshirë, luajnë për fanellën. Kjo është më e rëndësishme se talenti individual që mund të kemi”, theksoi Bushi.

“Kemi dy – tre lojtarë që po i presim akoma. Janë shqiptarë të Kosovës dhe të Maqedonisë, gjithashtu jemi në pritje të lojtarëve që janë cilësorë dhe kanë potencial. Po presim akoma për t’i marrë. Përsa i përket lojtarëve këtu, kemi lënë disa jashtë sepse nuk kanë qenë në formën optimale. Kevin Dodaj është i dëmtuar, ndërsa Daka i Vorës nuk ka marrë shumë minuta te Vora dhe për momentin nuk është i grumbulluar. Por, patjetër që është një lojtar që mund të na ndihmojë në të ardhmen”  tha ai.

“Këto ndeshje janë shumë të rëndësishme. Është një privilegj i madh të luash me këto lloj ekipesh, sidomos në ndeshje miqësore. Për ne nuk ka miqësore, sepse miqësoret bëhen në kuadër të Kampionatit Europian, por edhe emra si Gjermania dhe Zvicra të bëjnë t’i vlerësosh maksimalisht, pavarësisht se e njëjta gjë do të vlente edhe nëse do të luanim ndaj San Marinos. Por janë ekipe me të cilat mund të tregosh veten ku je dhe unë kam besim që do ta tregojmë veten shumë mirë në këto dy ndeshje. Janë ekipe të nivelit me të cilat do të ndeshemi gjatë Kampionatit Europian dhe na bëjnë mirë, pasi mësohesh duke u ndeshur me këta kundërshtarë. Të bëhet rutinë të përballesh me ekipe të forta. Shqipëria nuk ka pasur gjithmonë miqësore të forta, zakonisht kanë qenë të nivelit mesatar. Mendoj që këto dy miqësore na bëjnë mirë nga çdo aspekt”, u shpreh ai.

Bushi dha edhe një mesazh për tifozët për ndeshjen ndaj Gjermanisë në “Elbasan Arena”,  “sa herë luajmë në Elbasan, tifozë kemi pasur shumë. Unë e kuptoj që janë ndeshje miqësore dhe është ekipi U-21, por duhet përkrahur akoma më shumë. Elbasani na ka përkrahur gjithmonë. Mendoj se me Gjermaninë stadiumi do të jetë plot, sepse është një kundërshtar i fortë, por edhe ne jemi të fortë dhe do të jetë një ndeshje e bukur. Ne duam t’i kënaqim ata, si me lojë, ashtu edhe me rezultat”.

/gj.m/j.p/

The post Miqësoret ndaj Gjermanisë dhe Zvicrës, Bushi: Presim mbështetjen e madhe të tifozëve appeared first on Agjencia Telegrafike Shqiptare.

TIRANË, 30 gusht /ATSH/ Zëvendëskryeministrja dhe ministrja e Infrastrukturës dhe Energjisë, Belinda Balluku bëri të ditur sot se ekipet e mirëmbajtjes së Autoritetit Rrugor Shqiptar (ARRSH) po pastrojnë çdo ditë akset rrugore nga mbetjet e hedhura në mënyrë të papërgjegjshme nga drejtues dhe pasagjerë automjetesh.

“Ekipet e mirëmbajtjes së ARRSH kanë pastruar në bazë ditore akset rrugore, të tejmbushura nga mbetjettë hedhura në vendpushime, në mënyrë të papërgjegjshme nga drejtuesit  dhe pasagjerët e automjeteve”, shkroi Balluku në një postim në rrjetet sociale.

Sipas saj, pavarësisht ndërhyrjeve të vijueshme të punonjësve të mirëmbajtjes, problemi i ndotjes mbetet shqetësues.

“Punonjësit tanë kanë ndërhyrë në vijimësi, por kjo nuk mjafton”, vijoi zv/kryeministrja.

Për këtë arsye, Balluku paralajmëroi se kamerat e Qendrës së Monitorimit të Trafikut do të përdoren edhe për identifikimin dhe gjobitjen e ndotësve, deri në arritjen e ndërgjegjësimit të plotë.

Qartësisht, shtoi Balluku, “kamerat e Qendrës së Monitorimit të Trafikut do të përdoren edhe për të gjobitur ndotësit  të akseve tona kombëtare, deri në ndërgjegjësimin e plotë. Kërkohet angazhimi i të gjithëve për një mjedis më të pastër”.

1 nga 3

/gj.m/j.p/

The post Balluku: Gjoba ndotësve në akset kombëtare, do përdoren kamerat appeared first on Agjencia Telegrafike Shqiptare.

TIRANË, 30 gusht /ATSH/ Trajneri i Kombëtares U-21, Alban Bushi, ka shpallur listën me 23 lojtarët e ftuar për dy ndeshjet miqësore që do të zhvillohen në muajin shtator ndaj Gjermanisë dhe Zvicrës.

The post Kombëtarja U-21, trajneri Bushi publikon listën e lojtarëve për miqësoret ndaj Gjermanisë & Zvicrës appeared first on Agjencia Telegrafike Shqiptare.

TIRANË, 30 gusht /ATSH/ Ministri i Ekonomisë, Kulturës dhe Inovacionit, Blendi Gonxhja dhe kryetari i bashkisë Shkodër, Benet Beci, inspektuan përfundimin e punimeve në zonën e njohur si “Fermentimi”, një ndërhyrje e parë e këtij lloji në kuadër të programit kombëtar për përmirësimin e infrastrukturës në zonat informale në proces legalizimi.

Gonxhja së bashku me kryetarin e Bashkisë, Benet Beci, inspektuan përfundimin e punimeve në zonën “Fermentimi”, një ndërhyrje e parë e këtij lloji në kuadër të programit kombëtar për përmirësimin e infrastrukturës në zonat informale në proces legalizimi.

Projekti parashikon rikonstruksionin e 6 rrugëve: “Besa”, “Ardian Kodra”, “Dëshmorët”, “Çlirimi”, “12 Vjetori” dhe “Ora e Maleve”, me një gjatësi totale prej 3.1 kilometrash. I nvestimi përfshin gjithashtu sistemin e kanalizimeve të ujërave të bardha dhe të zeza, rrjetin e ujësjellësit, ndriçimin publik si edhe linja të dedikuara për fibra optike. Sipërfaqja totale e ndërhyrjes arrin në 10,500 m².

Nga ky projekt përfitojnë mbi 1000 banorë dhe 115 familje, shumica prej tyre në nevojë. Investimi total kap vlerën e 76.6 milionë lekëve.

“Rikonstruksion i 6 rrugëve: “Besa”, “Ardian Kodra”, “Dëshmorët”, “Çlirimi”, “12 Vjetori”, “Ora e Maleve” 3.1 km rrugë të reja Kanalizime (ujëra të bardha dhe të zeza), rrjet ujësjellësi, ndriçim publik dhe linja për fibra optike, sipërfaqe totale ndërhyrjeje: 10,500 m². Mbi 1000 banorë përfitues, 115 familje, shumica në nevojë. Investim total: 76.6 milionë lekë”, shkruan më tej Gonxhja.

Ministri Gonxhja theksoi se ky projekt përfaqëson një hap domethënës drejt përmirësimit të kushteve të jetesës në një zonë që për shumë vite ka vuajtur mungesën e infrastrukturës bazë.

“Ky investim përfaqëson një hap domethënës drejt përmirësimit të kushteve të jetesës në një zonë që për shumë vite ka pasur mungesë të infrastrukturës bazë, dhe një shembull i qartë i bashkëpunimit efektiv mes qeverisjes qendrore dhe asaj vendore”, u shpreh Gonxhja.

/gj.m/j.p/

The post Gonxhja: Zona “Fermentimi” në Shkodër, ndërhyrja e parë në zonat informale në proces legalizimi appeared first on Agjencia Telegrafike Shqiptare.

TIRANË, 29 gusht /ATSH/ Kryetarja e komanduar e bashkisë së Tiranës, Anuela Ristani ka bërë një thirrje për qytetarët që të tregojnë kujdes për shkak të motit të përkeqësuar që pritet në ditët në vijim.

Sipas buletinit të Shërbimit Meteorologjik Ushtarak, nga data 29 gusht deri më 2 shtator vendi do të përballet me situata të vështira atmosferike, me reshje shiu me intensitet të lartë.

“Të dashur qytetarë. Sipas Buletinit Meteorologjik të Shërbimit Meteorologjik Ushtarak, për periudhën 29 Gusht 2 Shtator priten situata të vështira atmosferike me reshje shiu me intensitet të lartë.

Ju këshillojmë të tregoni kujdes gjatë këtyre ditëve, të shmangni lëvizjet e panevojshme në zonat me rrezik përmbytjeje dhe të merrni masat e nevojshme për sigurinë tuaj dhe të familjeve tuaja”, shprehet Ristani.

Ajo garantoi se strukturat e bashkisë së Tiranës dhe emergjencat civile janë në gatishmëri të shtuar për menaxhimin e situatës.

“Strukturat e Bashkisë dhe Emergjencat Civile janë në gatishmëri të shtuar për menaxhimin e situatës.

Për çdo rast emergjent, mund të kontaktoni në numrat:

112 – Emergjencat Civile

127 – Urgjenca Mjekësore

128 – Policia

Bashkia është pranë jush dhe në shërbimin tuaj 24/7”, nënvizon Ristani.

/gj.m//a.f//r.e/

The post Reshjet e shiut, Ristani thirrje qytetarëve: Shmangni lëvizjet e panevojshme, bashkëpunim me emergjencat civile appeared first on Agjencia Telegrafike Shqiptare.

TIRANË, 29 gusht /ATSH/ Kapiteneria e Portit Sarandë ka njoftuar se për shkak të përkeqësimit të kushteve atmosferike dhe detare, është ndaluar dalja në det e mjeteve lundruese.

Sipas një njoftimi për mediet, ky ndalim hyn në fuqi nga data 30.08.2025, ora 06:00, dhe do të qëndrojë aktiv deri në një përmirësim të kushteve detare dhe një njoftim të dytë zyrtar nga Kapiteneria e Portit Sarandë.

Po ashtu, Kapiteneria paralajmëron të gjithë përdoruesit e mjeteve lundruese, se mosrespektimi i këtij urdhri përbën shkelje ligjore dhe do të penalizohet sipas legjislacionit në fuqi.

“Për shkak të përkeqësimit të kushteve atmosferike dhe detare, përfshirë erërat me intensitet të lartë dhe dallgëzimin përtej normave të lejuara për lundrim të sigurt, ndalohet çdo dalje në det e mjeteve lundruese, përfshirë mjetet turistike, peshkarexhat dhe skafet e vogla, në të gjithë gjirin dhe zonën bregdetare të Sarandës, Ksamilit dhe Borshit.

Ky ndalim hyn në fuqi nga data 30.08.2025, ora 06:00, dhe do të qëndrojë aktiv deri në një përmirësim të kushteve detare dhe një njoftim të dytë zyrtar nga Kapiteneria e Portit Sarandë.

Kujtojmë të gjithë përdoruesit e mjeteve lundruese se mosrespektimi i këtij urdhri përbën shkelje ligjore dhe do të penalizohet sipas legjislacionit në fuqi”, thuhet në njoftim.

/gj.m//r.e//a.f/

The post Përkeqësimi i kushteve atmosferike, Kapiteneria e Portit Sarandë ndalon daljen në det të mjeteve lundruese appeared first on Agjencia Telegrafike Shqiptare.

TIRANË, 29 gusht /ATSH/ Kryeministri Edi Rama reagoi sot ndaj deklaratës së Këshillit të Lartë Gjyqësor.

Rama shkruan në rrjetin social “X” se, “lexova reagimin e KLGJ, organi më i lartë i vetëqeverisjes së gjyqësorit, lidhur me çka unë kam ndarë me publikun për disa vendime skandalozisht brutale në mbrojtje të zaptuesve të hapësirës publike dhe në dëm të rendit ligjor, interesit publik si edhe komuniteteve të cënuara drejtëpërdrejt nga këto vendime.

KLGJ i ka rënë shumë gjatë, duke harruar se roli i saj themelor është të shqetësohet për cilësinë e drejtësisë, si edhe të garantojë publikun se vendimet që merren nga gjykatësit në dëm të tij, nuk kalojnë pa u analizuar dhe gjykatësit nuk janë maliqër që bëjnë ç’të duan me ligjin në emër të pavarësisë.

KLGJ ka harruar gjithashtu se si instanca më e lartë e vetëqeverisjes së gjyqësorit, ka jo vetëm të drejtën po edhe detyrën të marrë seriozisht shqetësimet e palëve të cenuara nga vendime qorre të gjykatësve, të cilat në këtë rast janë të ububushme për nga mungesa e ndjeshmërisë ndaj interesit publik.

KLGJ ka harruar edhe të tjera gjëra më shumë rëndësi, por të paktën ka thënë një të vërtetë që më gjen shumë dakord, duke nënvizuar se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, gjë për të cilën e kam informuar në çdonjërin nga rastet publikun, se do të bëjmë duke iu drejtuar pikërisht KLGJ dhe ILD si “institucionet përkatëse”.

Duke e mbyllur me kaq për sot, u them anëtarëve të KLGJ të mos harxhojnë kohën e tyre për të gjykuar se si e bëj unë punën për të cilën më ka votuar populli shqiptar – gjykatësi im i përditshëm të cilit unë nuk kam se si të mos ia shpjegoj hapur pse nuk largohen njësoj si të tjerat ca ngrehina të paligjshme në mes të rrugës, që marrin mbrojtjen e pajustifikueshme të ca gjykatësve të pandjeshëm ndaj interesit publik – po të përqendrohet tek puna e vet, që gjermësot le shumë për të dëshiruar në funksion të Shqipërisë 2030 në BE”.

/gj.m//a.f//r.e/

The post Rama: KLGJ të shqetësohet për cilësinë e drejtësisë, vendimet qorre të gjykatësve cenojnë interesin publik appeared first on Agjencia Telegrafike Shqiptare.

TIRANË, 29 gusht /ATSH/ Kryetarja e Kuvendit, Elisa Spiropali njofton se Kuvendi përfundoi shqyrtimin e pozicioneve negociuese për gjashtë grup-kapituj.

Në një postim në rrjetet sociale, Spiropali shkruan se, “Me mbledhjen e sotme të Komisionit për Çështjet Europiane, Kuvendi shqyrtoi draftpozicionin negociues për Grup-kapitullin V “Burimet, bujqësia dhe kohezioni”.

Me këtë mbledhje përfunduam shqyrtimin e pozicioneve negociuese për gjashtë grup-kapitujt:

I “Themelorët”,

II “Tregu i brendshëm”,

III “Konkurrueshmëria dhe rritja gjithëpërfshirëse”,

IV “Agjenda e gjelbër dhe ndërlidhja e qëndrueshme”,

V “Burimet, bujqësia dhe kohezioni”,

VI “Marrëdhëniet me jashtë”, të cilat i janë paraqitur për miratim Këshillit të Ministrave”, shprehet Spiropali.

“Presim shumë shpejt mbajtjen e dy konferencave ndërqeveritare BE-Shqipëri, të cilat, me hapjen e negociatave për grup-kapitujt IV dhe V, do të shënojnë hapjen e negociatave për të gjithë grup-kapitujt”, thekson Spiropali.

Kryetarja e Kuvendit nënvizon se, “anëtarësimi i Shqipërisë në BE është kryefjala e Legjislaturës XI dhe e Kuvendit të ri”.

/gj.m//r.e//a.f/

The post Spiropali: Kuvendi përfundoi shqyrtimin e pozicioneve negociuese për gjashtë grup-kapituj appeared first on Agjencia Telegrafike Shqiptare.

TIRANË, 29 gusht /ATSH/ Ministri i Ekonomisë, Kulturës dhe Inovacionit, Blendi Gonxhja mori pjesë sot në ceremoninë e rihapjes për publikun të kalasë së Bashtovës, pas restaurimit.

Gonxhja e cilësoi si një ditë të veçantë, dhe simbolike për trashëgiminë tonë kulturore.

“Jemi mbledhur për të inauguruar kalanë e Bashtovës, një ndër monumentet më të çmuara të historisë sonë, e cila nga sot merr një jetë të re. Ajo nuk është më vetëm një dëshmi e gurëzuar e së kaluarës, por shndërrohet në një hapësirë të gjallë për kulturën, artin, turizmin dhe zhvillimin e qëndrueshëm të komunitetit”, tha Gonxhja në fjalën e tij.

“E ndërtuar në shekullin XV, kjo kala përfaqëson një pikë strategjike të lidhjes së Shqipërisë me Mesdheun. Dikur ishte një portë e rëndësishme e venecianëve për shkëmbime tregtare dhe pjesë e një harte më të gjerë komunikimesh ndërkulturore që bashkonte Lindjen me Perëndimin. Sot, falë mbështetjes së Bashkimit Europian dhe programit EU4Culture, zbatuar nga UNOPS, ajo vjen para nesh e restauruar plot kujdes, duke na kujtuar se historia nuk është vetëm për t’u mbajtur mend, por për t’u rijetësuar dhe për t’u bërë pjesë e së ardhmes sonë”, u shpreh ministri.

Për herë të parë, shtoi Gonxhja, “kalaja e Bashtovës jo vetëm që është rikthyer në identitetin e saj historik, por është pajisur edhe me një qendër moderne vizitorësh, e cila ofron informacion, shërbime bashkëkohore dhe kushte për aktivitete kulturore, edukative e turistike. Qendra e vizitorëve është konceptuar si një hapësirë mikpritëse që i hap dyert çdo vizitori vendas apo të huaj, duke e shndërruar vizitën në Bashtovë në një përvojë të plotë”.

Gonxhja theksoi se, “rijetësimi i kalave shqiptare është një politikë strategjike që shkon përtej ruajtjes së thjeshtë të mureve dhe gurëve. Çdo kala e rikthyer në jetë bëhet një katalizator për zhvillimin ekonomik dhe social të zonës: krijon mundësi të reja punësimi për të rinjtë, nxit turizmin kulturor e natyror, gjallëron gastronominë tradicionale, artizanatin dhe mikpritjen lokale. Ky investim kthehet në një motor të qëndrueshëm të zhvillimit që i jep frymë komunitetit dhe gjeneron të ardhura të reja”.

Vetëm këtë vit, u shpreh ai, numri i turistëve që kanë vizituar kalatë janë rritur me 95% krahasuar me vitin 2024, ndërsa turizmi në sitet kulturore është rritur me 64%.

“Shembujt ndërkombëtarë na tregojnë se rijetëzimi i trashëgimisë është një investim me përfitime të shumta: kështjellat e Dalmacisë në Kroaci, ato të Pulias në Itali, apo të Greqisë fqinje janë shndërruar në atraksione që vizitohen çdo vit nga miliona turistë. Edhe Shqipëria duhet të jetë pjesë e kësaj harte, duke krijuar një itinerar të kalave shqiptare si një nga rrugët kulturore më të bukura të Ballkanit”, tha Gonxhja.

Ndaj, shtoi ai, “Ministria e Ekonomisë, Kulturës dhe Inovacionit, në strategjinë e saj parashikon rijetëzimin e kalave si pjesë të një procesi gjithëpërfshirës mirëmenaxhimi. Ky proces nuk ndalet vetëm te restaurimi fizik i monumenteve, por përfshin edhe planifikimin e përdorimit të tyre si qendra kulturore, edukative dhe turistike. Me këtë vizion, kalatë tona nuk do të jenë më thjesht objekte muzeale, por hapësira dinamike ku zhvillohen aktivitete, ku forcohet identiteti kombëtar dhe ku krijohen mundësi konkrete për punësim dhe zhvillim lokal”.

Gonxhja nënvizoi se, “kalaja e Bashtovës, me hapësirën e saj prej mijëra metrash katrorë, është e destinuar të kthehet në një qendër multifunksionale: këtu do të zhvillohen koncerte, festivale, ekspozita, shfaqje teatrale, aktivitete edukative për fëmijët e të rinjtë, si dhe evente tematike ndërkombëtare”.

“Ky moment është një shembull i shkëlqyer i bashkëpunimit mes Shqipërisë dhe Bashkimit Europian, një model që duhet të frymëzojë edhe projekte të tjera të ngjashme. Kjo është mënyra më e mirë për të treguar se integrimi europian nuk është vetëm një proces politik, por edhe një realitet konkret që sjell rezultate të prekshme për qytetarët tanë”, përfundoi fjalën e tij ministri Gonxhja.

Kalaja e Bashtovës, Foto: Andrin Hoxha

1 nga 39

/gj.m//r.e//a.f/

The post Rihapet pas restaurimit kalaja e Bashtovës, Gonxhja: Ndër monumentet më të çmuara të historisë sonë appeared first on Agjencia Telegrafike Shqiptare.

TIRANË, 29 gusht /ATSH/ Kryeministri Edi Rama ndau sot pamje nga parku i liqenit të Paskuqanit.

Parku i liqenit të Paskuqanit ka tashmë pedonalen e re, ndërsa infrastruktura e parkut përfshin sheshpushime dhe korsi biçikletash.

Në liqenin e Paskuqanit janë mbjellë mbi 10 mijë pemë, duke e kthyer këtë park nga një vend ferrash e plehrash, në një mushkëri të gjelbër.

Parku i Liqenit të Paskuqanit i vlen krejt kryeqytetit, edhe pse ndodhet në bashkinë e Kamzës.

Parkut mirëpret, jo vetëm banorët e bashkisë Kamëz, por të gjithë ata që duan të shijojnë ajrin e pastër, peizazhin fantastik, zogjtë e shumtë, hapësirën ku fëmijët mund të luajnë.

/gj.m/r.e//a.f/

The post Rama ndan pamje nga parku i liqenit të Paskuqanit appeared first on Agjencia Telegrafike Shqiptare.

TIRANË, 29 gusht /ATSH/ Pas finalizimit të projektit të zbatimit, kanë nisur punimet e para për nivelimin e sheshit të Auto Moto Park Elbasan.

Drejtoria e Përgjithshme e Shërbimeve të Transportit Rrugor bëri të ditur sot se, kjo është një fazë themelore e këtij projekti.

Gjithashtu, DPSHTRR thekson se është në hapat e parë të ndërtimit të Qendrës Multifunksionale të Automotorizimit në Elbasan, e dyta pas asaj në Fushë-Prezë.

Kjo qendër e re do të ofrojë mbi 245.000 shërbime në vit, duke iu shërbyer 105.000 drejtuesve të mjeteve dhe 70.000 mjeteve aktive në 6 bashkitë e qarkut Elbasan.

Sipas DPSHTRR, me këtë projekt, çdo shërbim do të jetë më cilësor, më i shpejtë dhe në përputhje me standardet më të larta evropiane.

Bashkia Elbasan dhe Fondi Shqiptar i Zhvillimit po ecin me ritme të shpejta me infrastrukturën përreth, gjithashtu në funksion të Auto Moto Park.

Shumë shpejt pritet të nisë rruga “Gjergj Arianiti”, një aks i rëndësishëm që lidh lagjen “Emin Matraxhiu” me Menglin, Korridorin VIII dhe urën e Byshekut, duke lehtësuar ndjeshëm trafikun. Me trotuare, ndriçim, korsi biçikletash dhe një pamje magjepsëse përgjatë Shkumbinit do të shndërrohet në një shëtitore fantastike për të gjithë qytetarët.

Investimi strategjik i Auto Moto Parkut do të sjellë: cirkuitin e parë shqiptar sipas standardeve të FIA, FIM dhe CIK; Muzeun Retro dhe DRSHTRR Elbasan; Kontrollin fizik dhe teknik të mjeteve; Infrastrukturë moderne për shërbime më të shpejta dhe më cilësore dhe një projekt që transformon infrastrukturën automobilistike të Shqipërisë.

1 nga 20

/gj.m//r.e//a.f/

The post DPSHTRR: Nisin punimet e para për nivelimin e sheshit të Auto Moto Park Elbasan appeared first on Agjencia Telegrafike Shqiptare.

TIRANË, 29 gusht /ATSH/ Këshilli i Lartë Gjyqësor reagoi sot për deklaratat e fundit të subjekteve publike apo private ndaj gjyqtarëve, duke theksuar se minojnë pavarësinë e pushtetit gjyqësor.

“Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cenojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor”, thuhet në një deklaratë të KLGJ.

“Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm”, thekson KLGJ.

Këshilli u bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës.

“E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”, nënvizon KLGJ.

KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu, i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.

“Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut”, përfundon deklarata e KLGJ.

/gj.m//r.e//a.f/

The post KLGJ: Deklaratat ndaj gjyqtarëve minojnë pavarësinë e pushtetit gjyqësor appeared first on Agjencia Telegrafike Shqiptare.

TIRANË, 29 gusht /ATSH/ Resorti i ndërtuar pa leje në Kepin e Rodonit nga ish-drejtori i Inspektoratit të Mbrojtjes së Territorit Durrës, Ardian Halili, u shemb këtë të premte me shpërthim të kontrolluar.

Godina dykatëshe, së bashku me objektet shoqëruese që shtriheshin në një sipërfaqe prej rreth 5 600 m², ishte ndërtuar në periudhën 2018–2021, pikërisht në kohën kur Halili drejtonte IMT Durrës.

Një ditë para prishjes së resortit, Halili u arrestua nga autoritetet, nën akuzën për shkelje të ligjit dhe abuzim me detyrën.

“Shtetasi A. H. e ka ndërtuar këtë objekt, i cili përbëhet nga 11 kabina tip garsoniere, një godinë 2-katëshe, një fushë minifutbolli dhe një pishinë, në një sipërfaqe toke prej 5,600 m², gjatë kohës kur ai ka ushtruar funksionin e Kryeinspektorit të IMT-së në Bashkinë Durrës dhe konkretisht gjatë viteve 2018-2021. Nga verifikimet e kryera rezultoi se ndërtimi i këtij objekti pa leje ka filluar prej vitit 2018 e në vijim”, ka deklaruar më herët policia për rastin.

Çështja në ngarkim të Ardian Halilit, është referuar nga policia në SPAK.

IKMT bëri të ditur sot se, vijon aksioni për shembjen e objekteve pa leje në zonën e mbrojtur.

Gjatë ditës së sotme janë prishur 13 ndërtime të paligjshme, duke çuar totalin në 54 objekte të shembura, thekson IKMT.

Sipas IKMT, puna në terren vijon në bashkëpunim me Policinë e Shtetit, me synim pastrimin e plotë të territorit dhe mbrojtjen e vijës bregdetare.

/gj.m//r.e//a.f/

The post Shembet me shpërthim resorti pa leje i ish-kreut të IMT Durrës appeared first on Agjencia Telegrafike Shqiptare.

TIRANË, 29 gusht /ATSH/ Kalaja e Bashtovës ka rihapur sot dyert për publikun pas restaurimit me mbështetjen e Bashkimit Evropian nëpërmjet programit “EU4Culture”.

Nga panairi, te koncertet dita e sotme është e mbushur plot aktivitete në kalanë e Bashtovës. Të pranishmit mund të vizitojnë panairin me produktet e zonës. Gjithashtu do të ketë aktivitete dhe lojëra për fëmijë e të rinj.

Në hapjen e kalasë së Bashtovës nuk mungon edhe ekspozita e makinave nga “Retro Albania” dhe e motorëve ikonikë nga “Steel Wings Albania”.

Gjithashtu të pranishmit kanë mundësinë të eksplorojnë kalanë nëpërmjet realitetit të shtuar (AR).

Mbrëmja vazhdon me koncertin e Rona Nishliut dhe Gent Rushit dhe me pjesëmarrjen e DJ Rossa.

E dëmtuar nga tërmeti i vitit 2019, kalaja e Bashtovës rikthehet në jetë falë mbështetjes së Bashkimit Evropian, përmes programit EU4Culture. Restaurimi ka ruajtur elementët autentikë, ka sjellë hapësira të reja për vizitorët dhe ka zbuluar shtresa të reja historike, duke hapur një kapitull të ri për këtë monument.

Rihapet sot për publikun pas restaurimit Kalaja e Bashtovës Foto: Andrin Hoxha

1 nga 18

/gj.m//r.e//a.f/

The post Rihapet për publikun pas restaurimit kalaja e Bashtovës appeared first on Agjencia Telegrafike Shqiptare.

TIRANË, 28 gusht /ATSH/  Dinamo është eliminuar në fazën play-off të Conference League.

Pas humbjes 3-0 në ndeshjen e parë, dinamovitët nuk kanë shkuar më shumë se një barazim 1-1 ndaj Jagiellionas në ‘Arenën Kombëtare’.

Pavarësisht rasteve, pjesa e parë nuk pati gol.

Në pjesën e dytë, Dejvi Bregu ndezi shpresat e ekipit të Ilir Dajës, por vetëm përkohësisht, pasi Rallis i dha fund një herë e mirë dilemave sado të vogla për kualifikimin. Dinamo, pas një rrugëtimi pozitiv, nuk i mbetet gjë tjetër veçse të provojë sërish vitin tjetër.

Gjithashtu sonte edhe, Shkëndija e Tetovës u eliminua nga bullgarët e Ludogorets në Europa League, por gjithsesi do të luajë në grupet e Conference League.

Conference League/ Dinamo City - Jagellonia

1 nga 6

/gj.m//a.f//r.e/

The post Conference League, Dinamo barazon 1-1 me Jagellonian dhe eliminohet në play-off appeared first on Agjencia Telegrafike Shqiptare.

TIRANË, 28 gusht /ATSH/ “Drita” ka arritur të fitojë edhe ndeshjen e dytë kundër “Differdange” në “play-off”, duke u kualifikuar kështu për herë të parë në Conference League.

Pas fitores së parë në Prishtinë me rezultatin 2-1, skuadra e Zekerija Ramadanit bëri detyrën edhe në Luksemburg.

Vendasit u ndëshkuan që në minutën e 3’ me një karton të kuq, duke ia bërë gjërat më të lehta kampionëve të Kosovës.

Në minutën e 62’, ishte Besnik Krasniqi, i cili arriti në mënyrë të shkëlqyer të kthente në gol një 11-metërsh dhe duke hedhur hapin e sigurt drejt fazës së ligës.

Minutat e mbetura u menaxhuan mjaft mirë nga Drita, i cili mori fitoren me rezultatin e përgjithshëm që shënonte 3-1 për të besuarit e Ramadanit.

Drita arrin për herë të parë një kualifikim historik në fazën e grupeve të një kompeticoni europian, teksa të premten e 29 gushtit do të mësojë dhe 6 kundërshtarët me të cilët do të ndeshet në Conference League.

Differdange 0-1 Drita

Krasniqi (P) 62’

/gj.m//a.f//r.e/

The post Conference League, Drita kualifikohet për herë të parë në fazën e grupeve në një kompeticion europian appeared first on Agjencia Telegrafike Shqiptare.

TIRANË, 28 gusht /ATSH/ Ministrja e Shëndetësisë dhe Mbrojtjes Sociale, Albana Koçiu ndau sot pamje nga qendra shëndetësore në Gjirin e Lalëzit, ku pushuesit tashmë marrin shërbim shëndetësor pranë vendit ku pushojnë.

“Qendrat Shëndetësore Verore në shërbim të pushuesve! Në Gjirin e Lalzit dhe 35 qendra të tjera në gjithë vendin, pushuesit vendas dhe të huaj marrin shërbim mjekësor 24/7 gjatë sezonit turistik”, u shpreh ministrja Koçiu në një postim në rrjetet sociale.

“Shëndetësia dhe turizmi ecin bashkë, për pushime të sigurta dhe të qeta në Shqipëri”, theksoi Koçiu.

Disa pacientë që u vizituan në atë qendër shëndetësore shprehen të kënaqur me shërbimin e stafit mjekësor.

“Shërbimi ishte i shkëlqyer, edhe mjekët dhe infermierët ishin shumë të mira”, u shpreh një prej pacientëve.

“Ne i bëjmë një buskopan për dhimbjen që referon dhe japim dhe pak mjekim për tensionin”, u shpreh mjekja e kësaj qendre shëndetësore, duke mjekuar një pacient.

Gjithashtu pas vizitës në këtë qendër, pacientët referohen te mjekët specialistë.

“Jo ndonjë gjë për t’u shqetësuar, kështu që do t’ju referoj për tek mjeku kardiolog për të bërë një ndjekje më të specializuar”, iu drejtua mjekja një tjetër pacienti.

“Erdha te qendra shëndetësore e Gjirit të Lalëzit. Po dëgjova shqetësime dhe bëra një vizitë këtu. Unë jam shumë i kënaqur për rregull, për pastërti, për shërbim nga të gjithë personeli. I falënderoj shumë”, u shpreh një pacient pasi bëri vizitën në këtë qendër shëndetësore.

/gj.m//a.f//r.e/

The post Koçiu: Pushuesit vendas dhe të huaj, shërbim mjekësor në qendrën shëndetësore verore në Gjirin e Lalëzit appeared first on Agjencia Telegrafike Shqiptare.