Qindra besimtarë Mysliman në Elbasan falën mëngjesin e sotëm Kurban Bajramin. E cilësuar si një ndër festat më të rëndësishme të kalendarit islam, bashkë me Fiter Bajramin edhe këtë herë falja e Kurban Bajramit është kryer në sheshin “Gensher”.
Myftiu i Elbasanit, Agim Duka përcolli ceremoninë e faljes duke uruar besimtarët por edhe duke bërë thirrje për më shumë mirësi dhe ndihmesë ndaj njëri tjetrit.
“Sot, Elbasani është i gjallë me dritën e besimit. Familjet tona janë zgjuar me dëshirën për ta nderuar këtë ditë, për të vizituar të afërmit, për të ndihmuar të varfrit dhe për të falënderuar Zotin për paqen dhe sigurinë. Është një ditë që i fton njerëzit të falin, të përqafojnë dhe të afrohen, që të mos harrojnë as veten, as të tjerët, dhe mbi të gjitha – të mos harrojnë Zotin e tyre.
Mirëpo, ndërsa gëzimi është në mesin tonë, ndërgjegjia jonë nuk është e shurdhër ndaj realitetit të vështirë që përjetojnë vëllezër tanë në pjesë të tjera të botës, e veçanërisht në Rripin e Gazës. Aty, njerëzit janë të privuar nga gëzimi i Bajramit, nga siguria, nga ushqimi dhe nga shpresa. Komisioneri i Lartë i OKB-së për të Drejtat e Njeriut, z. Volker Türk, në një deklaratë të fortë, tha: “Palestinezët në Gaza përballen me një zgjidhje të pamundshme: ose të vdesin nga uria, ose të rrezikojnë të vriten duke u përpjekur për të gjetur ushqim në qendrat ku ai shpërndahet. Ndërgjegjia humane e botës është e shkatërruar, e fyer, e poshtëruar. Një pikë kaq të ulët nuk dihet kur e ka pasur bota.” Ne si qytetarë shqiptarë, si një popull që ka kaluar nëpër sprova historike, që ka përjetuar luftëra, varfëri dhe padrejtësi, nuk mund të jemi të ftohtë përballë këtij realiteti.
Ne nuk gjykojmë, nuk përçajmë dhe nuk bëjmë politikë. Ne lutemi. Ne ngremë duart e zemrat tona, që Zoti i gjithëmëshirshëm të sjellë drejtësi, siguri dhe dinjitet për çdo njeri të pambrojtur. Feja jonë na mëson se mëshira është bazë e fesë dhe themel i çdo bashkësie të qëndrueshme. Profeti a.s. ka thënë: “Mëshironi ata që janë në tokë, që t’ju mëshirojë Ai që është në qiell.”
Prandaj në këtë Bajram, le të jemi më të qetë, më të urtë dhe më falës. Le ta ruajmë bashkimin tonë familjar, fqinjësor dhe qytetar. Le të jemi të vetëdijshëm se çdo ditë paqeje është një dhuratë, dhe çdo mundësi për të ndihmuar është një amanet. Le të ruajmë besimin tonë si dritë, jo si barrë, si udhëzim, jo si ndarje”, u shpreh Myftiu i Elbasanit, Agim Duka.
Besimtarët në shesh përcollën urime për këtë ditë të shenjtë ndërsa folën dhe për simbolikën e saj atë të bërjes kurban. Festa e Kurban Bajramit simbolizon për besimtarët e fesë islame sakrificën e bërë nga njeriu për të fituar faljen, mëshirën dhe shpërblimin e zotit.
LEXONI GJITHASHTU:
The post “Çdo ditë paqeje është një dhuratë”, Myftiu i Elbasanit përcjell ceremoninë e faljes appeared first on Euronews Albania.
Login
