TIRANË, 8 gusht /ATSH/ Shkolla e bashkuar “Muhamet Gjollesha” në Lazarat do të mirëpresë këtë shtator nxënësit dhe mësuesit në ambiente të rikonstruktuara dhe kushte moderne.
Ministrja e Arsimit dhe Sportit, Ogerta Manastirliu ndau sot foto nga ambientet e rikonstruktuara të kësaj shkolle, e cila është një tjetër institucion arsimor me standarde bashkëkohore për mësuesit dhe nxënësit që i shtohet “zinxhirit” të shkollave të reja që po transformohen në të gjithë vendin.
Manastirliu tha se po investohet për transformimin e shkollave nga veriu në jug, me të njëjtin standard, për të garantuar kushte dinjitoze për mësim dhe zhvillim për nxënësit dhe stafet mësimore.
Shkolla do të jetë e pajisur me ambiente të standardeve të larta, që përfshijnë laboratorë, hapësira për aktivitete kulturore dhe sportive, si dhe ambiente të gjelbra për qëndrim dhe rekreacion.
Ministria e Arsimit dhe Sportit synon të garantojë kushte bashkëkohore mësimore për nxënësit dhe mësuesit në të gjithë vendin.
Nga viti 2025 e në vijim, fokusi mbetet te cilësia në arsim përmes investimeve të qëndrueshme në shkolla, objekte sportive dhe ambiente ndihmëse, duke rritur aksesin, sigurinë dhe funksionalitetin e institucioneve arsimore.
Nga ambientet e shkollës së Bashkuar “Muhamet Gjollesha” në Lazarat
TIRANË, 7 gusht /ATSH/ Universiteti Bujqësor i Tiranës ka një ofertë të re akademike të përafruar me programet e BOKU (University of Natural Resources and Life Sciences) të Vjenës falë marrëveshjes mes dy universiteteve.
UBT ka nisur tashmë një proces transformues, me standardet më të mira evropiane duke ofruar edhe nëntë programe akademike studimi për të gjithë maturantët që zgjedhin të studiojnë në UBT.
Ministrja e Arsimit dhe Sportit, Ogerta Manastirliu u shpreh se “Universiteti Bujqësor i Tiranës është kthyer në zgjedhjen e parë për shumë maturantë që kërkojnë cilësi, perspektivë dhe mundësi konkrete për të ardhmen e tyre akademike dhe profesionale”.
“Me ofertën e re akademike që përfshin 9 programe studimi në bashkëpunim me Universitetin prestigjioz BOKU të Vjenës, UBT u ofron studentëve njohuri bashkëkohore, praktika evropiane dhe një diplomë me vlerë ndërkombëtare, e njohur brenda dhe jashtë vendit”, tha Manastirliu në një postim në rrjetet sociale.
Sipas Manastirliut, “ky model i ri studimi sjell në Shqipëri standardet më të larta të universiteteve prestigjioze evropiane dhe e pozicionon UBT-në si një qendër ekselence në rajon dhe më gjerë, ku arsimi lidhet ngushtë me zhvillimin, inovacionin dhe tregun e punës”.
Në mesazhet e maturantëve që flasin në videon e përcjellë në rrjetet sociale, një prej tyre shprehet se gjatë viteve të studimit në gjimnazin “Ismail Qemali” ka studiuar me përkushtim dhe pasion për të ndërtuar të ardhmen e saj. Ajo thotë se do të vazhdoj studimet në Universitetin Bujqësor të Tiranës, pasi ky universitet e tërheq jo vetëm për cilësinë e mësimdhënies, stafin akademik, por edhe për mundësinë që ofron për të rinjtë, siç është diploma që njihet ndërkombëtarisht.
“Universiteti Bujqësor i Tiranës është vendi ku pasioni për natyrën, bujqësinë dhe zhvillimet rurale kthehet në mundësi reale. Sot, sfidat globale si ndryshimet klimatike apo siguria ushqimore na e bëjnë më të domosdoshme shkencën bujqësore”, shprehet një tjetër.
“Universiteti Bujqësor i Tiranës është kthyer në një kampus të vërtetë studentor në një ambient bashkëkohor me laboratorë modern dhe pjesë që lidhen me tregun e punës. Të gjitha këto e bëjnë këtë Universitet vendin e duhur për të nisur rrugëtimin tim profesional”, tha një tjetër.
Maturantja tjetër shprehet se pas marrëveshjes së UBT-së me universitetin BOKU të Vjenës, do të jetë një mundësi për diplomë evropiane, duke studiuar në Shqipëri.
“Përmes marrëveshjes me Universitetin Boku në Vjenë, studentët kanë mundësi të zgjerojnë njohuritë e tyre dhe të përfitojnë nga eksperiencat ndërkombëtare. Ne mund të studiojmë në Boku për disa cikle studimi dhe të na njihen kreditet nga UBT dhe kjo mundësi pozitive vjen vetëm nëse studion në UBT”, u shpreh një maturante tjetër.
TIRANË, 4 gusht/ATSH/ Ministria e Arsimit dhe Sportit ka shpërndarë mbi 27 mijë e 200 tekste mësimore “Gjuha shqipe dhe Kultura shqiptare” për nxënësit e shkollave dhe klasave të mësimit të gjuhës shqipe në diasporë, si pjesë e angazhimit të vazhdueshëm për forcimin e identitetit kombëtar dhe gjuhësor të fëmijëve shqiptarë që jetojnë jashtë vendit.
Ministrja e Arsimit dhe Sportit, Ogerta Manastirliu, theksoi rëndësinë e kësaj nisme si një hap konkret drejt standardizimit të mësimdhënies së gjuhës dhe kulturës shqiptare në diasporë.
Manastirliu tha se këtë vit janë shpërndarë 70% më shumë se një vit më parë.
“Po bëhen gati paketat e librave për të shkuar në të gjitha shtetet ku ne jemi duke mbështetur dhe nxitur mësimin e gjuhës shqipe. Kemi bërë të mundur që të rrisim me rreth 70% numrin e teksteve që po dërgojmë, ku janë rreth 27 mijë e 200 tekste. Këtë vit bëjmë dhe një tjetër hap drejt standardizimit të teksteve të mësimit të gjuhës shqipe dhe kulturës shqiptare, pra vijmë me nivelin e dytë të tekstit të përbashkët. Kemi përfunduar gjithashtu edhe nivelin e tretë për klasat 7-8-9 dhe duke filluar nga viti tjetër shkollor do e kemi dhe këtë tekst të nivelit të tretë”, tha Manastirliu.
Duke iu referuar shtrirjes gjeografike të mësimit të gjuhës shqipe, ministrja theksoi se aktualisht janë rreth 400 shkolla dhe klasa në vende të ndryshme të botës ku zhvillohet mësim në gjuhën amtare, ndërsa po zgjerohet edhe rrjeti i mësuesve të trajnuar dhe të kualifikuar.
“Kemi bërë të mundur që të rrisim numrin e mësuesve të cilët janë të trajnuar dhe të kualifikuar përmes seminareve të përvitshme që ne realizojmë së bashku me Ministrinë e Arsimit të Kosovës, dhe për të garantuar që më shumë mësues të jenë pjesë e këtij rrjeti”, tha Manastirliu.
Tekstet “Gjuha shqipe dhe Kultura shqiptare” janë gjithashtu të aksesueshme në versionin digjital përmes faqes zyrtare të Qendrës së Botimeve për Diasporën, duke lehtësuar përdorimin e tyre nga nxënësit, mësuesit dhe prindërit kudo që ndodhen.
“Kjo është një detyrë që ne e bëjmë me kaq shumë dashuri dhe do të vijojmë që të investojmë akoma më shumë në drejtim të fuqizimit, ruajtjes, promovimit dhe të mësimit të gjuhës shqipe në diasporë”, përfundoi Manastirliu.
Mësimi i gjuhës shqipe në diasporë është një prioritet strategjik i Ministrisë së Arsimit dhe Sportit në bashkëpunim me Ministrinë e Arsimit, Shkencës, Teknologjisë dhe Inovacionit të Kosovës. Tekstet e reja të standardizuara janë produkt i një pune të përbashkët me ekspertë të gjuhësisë dhe arsimit dhe kanë për qëllim të rrisin cilësinë e mësimdhënies të fëmijëve shqiptarë që jetojnë në vende të ndryshme të botës si një kontribut për ruajtjen e gjuhës, kulturës dhe identitetit kombëtar në komunitetet shqiptare jashtë kufijve të Shqipërisë.
TIRANË, 3 gusht /ATSH/ Të gjithë maturantët, të cilët duan të vijojnë studimet e larta në universitete, sot, 3 gushti është afati i fundit që të aplikojnë për programet që dëshirojnë të ndjekin përmes portalit “U-Albania”.
Ministrja e Arsimit dhe Sportit, Ogerta Manastirliu u ka kujtuar të gjithë maturantëve në një postim në rrjetet sociale se “sot është dita e fundit për të përzgjedhur 10 programet e studimit në raundin e parë të aplikimit në universitetet tona”.
Më herët, ministrja Manastirliu bëri me dije se procesi i aplikimit dhe regjistrimit realizohet online në portalin universitar “U-Albania”.
Kandidatët, përpara aplikimit për zgjedhjen e preferencave në portalin e aplikimit universitar, kryejnë pagesën e tarifës së aplikimit në vlerën 2000 lekë, në zyrat e Postës Shqiptare apo në bankat e nivelit të dytë, nëpërmjet faturës për arkëtim, të cilën e shkarkojnë në portalin “U-Albania”.
Pagesa kryhet deri në datën 28 korrik 2025. Pas dorëzimit të mandatit të pagesës, sekretaritë e shkollave konfirmojnë pagesën e kryer brenda datës 28 korrik, në portalin “U-Albania”.
Më tej, realizohet aplikimi online dhe për këtë periudha e përcaktuar është 29 korrik deri në 3 gusht. Në këtë periudhë, maturantët zgjedhin 10 programe studimi.
Më 29 gusht deri në 11 shtator është faza e regjistrimit në Institucionet e Arsimit të Lartë, ndërsa do të ketë publikim real të renditjes, që do të bëhet në 7 faza 48-orëshe përgjatë 14 ditëve.
Në fund është faza e çregjistrimit, për të cilën është caktuar një kohëzgjatje dyditore, nga 12-13 shtator.
TIRANË, 31 korrik /ATSH/ Drejtuesja politike e Partisë Socialiste për Tiranën, Ogerta Manastirliu prezantoi ditën e sotme, katër nënkryetarët e rinj të Bashkisë Tiranë.
Sipas medieve, katër nënkryetarët e rinj të bashkisë janë Ilir Mengra, Blendi Sula, Gentian Keri dhe Vasilika Vjero.
Ata zëvendësojnë katër nënkryetarët e mëparshëm, Frida Pashakon, Andi Seferin, Keti Luarasin dhe Jonida Halilin, të cilët dhanë dorëheqjen pas kërkesës së kreut të ekzekutivit, Edi Rama.
Mësohet se detyrat që ata do të mbajnë në Bashkinë e kryeqytetit janë: Ilir Mengra për punët publike, Vasilika Vjero për financat e zhvillimin ekonomik, Blendi Sula për territorin dhe menaxhimin dhe zhvillimin rural dhe Gentian Keri në administratën e Bashkisë Tiranë.
TIRANË, 31 korrik /ATSH/ Shkolla 9-vjeçare “Gaqi Karakashi” në Kuçovë është një tjetër institucion arsimor me standarde bashkëkohore për mësuesit dhe nxënësit që i shtohet “zinxhirit” të shkollave të reja që po transformohen në të gjithë vendin, përmes investimeve nga Ministria e Arsimit dhe Sportit.
Ministrja e Arsimit dhe Sportit, Ogerta Manastirliu ndau sot foto nga ambientet e reja të kësaj shkolle, e cila do të hapë dyert në shtator me kushte bashkëkohore falë investimit të Ministrisë së Arsimit dhe Sportit dhe Bashkisë së Kuçovës.
Manastirliu nënvizoi faktin se po investohet për transformimin e shkollave nga veriu në jug, me të njëjtin standard, për të garantuar kushte dinjitoze për mësim dhe zhvillim për nxënësit dhe stafet mësimore.
Më herët, ministrja Manastirliu është shprehur se sezoni i verës është vënë në funksion të përmirësimit të infrastrukturës arsimore.
“Kemi të gjithë fokusin te mirëmbajtja e rrjetit të shkollave ekzistuese dhe te investimet e reja që duam t’i finalizojmë. Vetëm për ciklin 2025-2026, janë mbi 4 miliardë lekë të planifikuara në buxhetin e Ministrisë së Arsimit dhe Sportit për kantiere të reja të shkollave dhe objekteve sportive. Janë 22 objekte arsimore në të gjithë vendin dhe 18 objekte për sportin, pra 40 objekte në total në të cilat po investohet duke filluar nga ky vit, ndërkohë që përmbyllim edhe 40 të tjera të nisura vitin e shkuar, për të bërë të mundur që të kemi një infrastrukturë dinjitoze për më shumë cilësi në arsim”, u shpreh Manastirliu.
Nëpërmjet një programi të integruar ndërtimi dhe rehabilitimi, Ministria e Arsimit dhe Sportit synon të garantojë kushte bashkëkohore mësimore për nxënësit dhe mësuesit në të gjithë vendin.
Nga viti 2025 e në vijim, fokusi mbetet te cilësia në arsim përmes investimeve të qëndrueshme në shkolla, objekte sportive dhe ambiente ndihmëse, duke rritur aksesin, sigurinë dhe funksionalitetin e institucioneve arsimore.
Shkolla 9-vjeçare “Gaqi Karakashi” në Kuçovë e rikonstruktuar
TIRANË, 30 korrik /ATSH/ Ministrja e Arsimit dhe Sportit, Ogerta Manastirliu zhvilloi sot një diskutim në EduLab, me rektorin e Universitetit “Aleksandër Moisiu” në Durrës, prof. dr. Shkëlqim Fortuzi dhe tri studente të ciklit master.
Ministrja Manastirliu tha se Universiteti “Aleksandër Moisiu” i Durrësit po kthehet në një pikë referimi për arsimin e lartë, duke u fokusuar në përgatitjen e të rinjve për tregun e punës dhe në ndërtimin e urave të qëndrueshme të bashkëpunimit mes studentëve dhe sipërmarrjes”.
Manastirliu u ndal edhe te një prej programeve të hapura në bashkëpunim me Universitetin “La Sapienza” të Romës, ndërsa foli edhe për risitë që sjell ky vit akademik me hapjen e programeve të reja bachelor dhe master në fushat e biznesit, turizmit dhe teknologjisë digjitale, në bashkëpunim me universitete prestigjioze evropiane.
“Universiteti “Aleksandër Moisiu” është një universitet ku studentët kanë ardhur në rritje, ndërsa interesi është shtuar. Edhe ju jeni adaptuar duke riorganizuar me programet e reja falë një bashkëpunimi me Universitetin “La Sapienza” në Romë”, u shpreh Manastirliu.
Gjithashtu, rektori i këtij universiteti, prof. dr. Shkëlqim Fortuzi tha se institucioni arsimor që ai drejton është fokusuar që studentët t’i afrojë sa më shumë me tregun e punës.
“Një mundësi e shkëlqyer për studentët, jo vetëm që një pjesë të studimeve të tyre të ciklit master ta zhvillojnë në “La Sapienza”, por çdo ditë e më shumë ne kemi programe të përbashkëta studimi me universitete evropiane. Po punojmë fort që të nxisim mobilitetet nëpërmjet programeve Erasmus+, për të motivuar stafin akademik, kërkuesit shkencorë, studentët tanë për të qenë pjesë e programeve Horizont Evropa”, vijoi Manastirliu.
Tri studentet e ciklit master pranë këtij universiteti, ndanë gjithashtu vlerësimet e tyre duke e konsideruar një risi qasjen e diplomave të dyfishta në Universitetin “Aleksandër Moisiu”, ndërsa thanë se një pjesë të studimeve të tyre i kanë zhvilluar në “La Sapienza” në Romë.
TIRANË, 29 korrik/ATSH/ Investimet e Ministrisë së Arsimit dhe Sportit në laboratorët e teknologjisë së avancuar në Universitetin Politeknik të Tiranës, kanë krijuar kushte të reja për kërkimin shkencor për studentët dhe stafet akademike të këtij universiteti.
Ministrja e Arsimit dhe Sportit, Ogerta Manastirliu gjatë një vizite në një nga laboratorët e teknologjisë, e shoqëruar edhe nga rektori i UPT-së, Akli Fundo, stafi akademik si edhe përfaqësues të industrisë së teknologjisë së informacionit, panë nga afër laboratorët e teknologjisë në këtë universitet.
Ministrja Manastirliu tha se ky investim është një tjetër qasje për të “fuqizuar urat e bashkëpunimit akademi-biznes”.
“Ky është një hap drejt zgjerimit të bashkëpunimit, me qëllim krijimin e zgjidhjeve të reja SMART për industrinë, duke krijuar partneritete të qëndrueshme për të rritur kapacitetet në pjesëmarrjen e projekteve për inovacionin të Bashkimit Evropian”, tha Manastirliu.
Më herët, Manastirliu nënvizoi rëndësinë e laboratorëve për zhvillimin akademik dhe ndërkombëtarizimin e universiteteve.
“Ne duhet të kemi mundësi që të zhvillohemi edhe për sa i përket aspekteve akademike dhe kërkimit shkencor duke krijuar mundësinë e ndërkombëtarizmit. Shqipëria ka mundësi që të zhvillohet në fushën e inovacionit dhe këtu rol të rëndësishëm luajnë universitetet si dhe bashkëpunimi që universitet kanë më institucionet ndërkombëtare partnere”, u shpreh Manastirliu.
Ministrja e Arsimit dhe Sportit, Ogerta Manastirliu gjatë një vizite në një nga laboratorët e t...
TIRANË, 29 korrik/ATSH/- Ministrja e Arsimit dhe Sportit, Ogerta Manastirliu deklaron se sot hapen aplikimet online në UAlbania për përzgjedhjen e programeve të studimit në universitete.
Manastirliu sqaron se “sistemi do të jetë i hapur deri më 3 gusht, për t’iu dhënë mundësi të gjithë maturantëve për përzgjedhjen deri në 10 programe studimi në universitetet shqiptare”.
Ministrja ka publikuar në rrjetet sociale edhe linkun përkatës https://ualbania.al/ ku të gjithë maturantët mund të aplikojnë për të përzgjedhur programet e studimit.
Portali UALBANIA është vitrina kryesore e Universiteteve për të prezantuar ofertën e tyre akademike.
Që nga viti 2016, UALBANIA numëron 38 universitete publike dhe private, dhe informacione të detajuara për 561 programe studimi të ciklit të parë të studimeve në Shqipëri.
Portali UALBANIA është ura lidhëse mes maturantëve dhe botës akademike. Nëpërmjet portalit, maturantët njihen me kriteret, programet, aplikimin universitar dhe regjistrimin në programin ku janë shpallur fitues.
Shembja e Teatrit Kombëtar simbolizon humbjen e hapësirave publike në Tiranë dhe zëvendësimin e tyre me kulla. Por kujtesa kolektive, zëri qytetar dhe sheshet nuk mund të zëvendësohen me beton.
Nga Teatri te trotuari – Kronika e një qyteti të shembur me ligj
Në fillimin e verës së 2018-ës Tirana pa, edhe pse ende e pandërgjegjshme për atë që po dëshmonte, të vendosej një mikrofon në një nga hapësirat publike të saj, në sheshin e Teatrit Kombëtar.
E dizajnuar në vitin 1938 nga arkitekti Giulio Berté, godina kishte shërbyer gjatë jetës së vetë kryesisht në tre funksione kryesore: si hapësirë socializimi të spektatorëve në pushimin para dhe mes akteve; si shesh vallëzimi për hapësirën e jashtme të restorantit kur nuk kishte shfaqje; si fushë ping-pongu duke shoqëruar fushën e tenisit dhe pishinën e kompleksit kulturor dhe sportiv “Skanderbeg”.
Tetëdhjetë vite më pas, ai shesh do të përdorej edhe si një hapësirë ku do të zhvillohej një protestë për ta mbrojtur atë.
Teatri i kishte mbyllur dyert dhe përveç punëtorëve, që herë pas here dilnin nga salla e kuqërremtë me kuti materialesh në duar, që nga 2 korriku i 2018, kur u vu shfaqja e fundit në skenë, nuk shiheshin më spektatorë në mjediset tij.
Tre ditë më pas, më 5 korrik, Kuvendi do të miratonte me 75 vota, “Ligjin për Teatrin”*, apo siç njihet ndryshe, “Ligji Special”, i cili e transferonte hapësirën publike, si sheshin ashtu edhe teatrin, tek shoqëria private, “Fusha shpk”, që kjo e fundit të mund të ndërtonte.
Pas atij votimi, protesta për mbrojtjen e Teatrit Kombëtar mori përmasa të tjera dhe hyri në një rrugëtim ku dorëzimi nuk ishte opsion.
Në sheshin e teatrit u krijua një kuvend i qytetit. Një hapësirë e paindoktrinuar, e pakapur nga interesa të ngushta private apo motive antiligjore. Ndërsa ndërtesa që u mor nën kontroll nga qytetarët më 24 korrik 2019, të cilët filluan ta rijetëzonin edhe pse pa përvojë, mësuan ta menaxhonin dhe kujdeseshin për të.
Ndërsa salla zhvillonte aktivitete artistike dhe kulturore – rreth 65 shfaqje u vunë në skenë në më pak se 8 muaj – në sheshin e tij protesta zhvillohej 24 orë, 7 ditë në javë, në dukje si gardiane e teatrit, dhe njerëzit rojtarët e tij.
Teatri Kombëtar duke u shembur 17 maj 2020/Aleanca për Mbrojtjen e Teatrit, Flicr.
Nga një shesh proteste, tek një rrugë kalimi për kullën.
Ato 75 vota që miratuan ligjin Fusha, ishin edhe goditja e parë që iu dha Teatrit Kombëtar, 682 ditë përpara se Erion Veliaj të çonte fadromat për të shembur ndërtesat e tij, në orën 04:30 të mëngjesit të datës 17 maj 2020.
Miratimi i ligjit për teatrin ishte një goditje që iu bë jo vetëm protestës – si akt demokratik, – apo ndërtesës – si dëshmi e historisë së brezave para nesh – por edhe vetë hapësirës, sheshit si vendkrijim i fjalës së lirë dhe lirisë së shprehjes, nga vetë përfaqësuesit e pushtetit të popullit në kuvend.
Ato 75 kartonë jeshil, rrëzuan jo thjesht një ndërtesë, por hapësirën e përbashkët ku njerëzit shkonin për të qenë bashkë – jo thjesht për të kaluar, por për të mbetur. Ishte goditje ndaj asaj nyje urbane që mblidhte këdo, nga të katër anët, dhe nga të gjithë dhe më pas krijonte diçka.
Sot ajo hapësirë nuk ekziston më në qytet.
Shembja e “17 Majit”, i hapi rrugë lejeve të njëpasnjëshme nga “Rama & Veliaj”, të cilët vunë në zbatim planin e Bjarke Ingels, të kullës me teatër.
Sot pas më shumë se dy vjetësh nga fillimi i punimeve në atë shesh, hapësira publike nuk ekziston më. Në vend të saj, është një kalim i zgavruar në tunelin e betonuar, i cili qëndron i hijezuar nën ndërtesën si flutur e Bjarke Ingels, e cila sot të ngjan si porta hyrëse për në kullën e Fushës.
Të dyja kantieret sot janë bashkuar në një të vetëm dhe kanë lidhur mes tyresh hekurin i cili më pas mbulohet në beton, duke zhdukur krejtësisht atë çfarë ka mbetur nga dikur hapësira publike e teatrit.
Tashmë ato dy projekte po shpalosin në shkallë reale se si grabitet dhe më pas zaptohet me ligj hapësira publike.
Grabitje nga e cila do të përfitonte kushdo biznesmen apo politikan që ka investuar para në dy gropat tashmë të hapura dhe betonizuara në truallin e Teatrit Kombëtar.
Ndërsa ky i fundit, ashtu siç i ka ngritur kryet si karabina, të ngjan më shumë me një roje të kullës, e cila shkeli interesin publik, mori dhe përvetësoi tokën publike dhe grabiti përveç tokës edhe 33 kate ajër.
Teatri ishte vetëm fillimi
Ai shesh, ai mikrofon i hapur, ai mur ku shkruhej “Monument Kulture, mbrohet nga populli”, dhe nuk lejonte që qyteti të shembej me turp, duhej zhdukur.
Duhej vrarë ideja që hapësira publike është e jona. Sepse aty ku publiku mbledh zërin dhe kujtesën, aty nuk ndërtohen kulla, aty nuk qarkullon paraja e zezë.
Që ajo të rrjedhë pa pengesë, duhej zhdukur sheshi, duhej shembur gjithçka që kujtonte se qyteti është i njerëzve.
Kantieri i Pixel Tower/Doriana Musai, Citizens.al
Dhe ashtu ndodhi edhe me “Pazarin e Ri” – një tjetër hapësirë publike e zaptuar, e shndërruar në “pronë private” me çati xhami dhe çmime që përjashtojnë të përditshmit dhe larguan tregtarët.
Me Sheshin “Skënderbej”, që nga vendtakim për të gjithë, u bë një shesh që eskpozon vetëm kullat.
Me Liqenin Artificial apo atë të Farkës që është rrethuar me ndërtim dhe kulla biznesi.
Me vilat historike të qytetit, zonën historike të tij, e cila u flijua për një imazh që ka për fasadë hipokrizinë.
Në çdo goditje ndaj qytetit fshihet një gënjeshtër që ka emër: integrimi evropian. Sepse çdo kullë ndërtohet me emrin e zhvillimit, çdo shembje justifikohet me progresin, çdo përvetësim me modernizimin.
Por qyteti nuk matet me lartësinë e ndërtesave, por me lartësinë e qytetarëve që guxojnë të flasin. Dhe nëse zërat e tyre janë shtypur me beton, kjo nuk është rruga drejt Evropës. Është rruga drejt një talljeje publike me ëndrrën evropiane.
Ndërkohë që BE predikon pjesëmarrjen, decentralizimin, transparencën dhe mbrojtjen e trashëgimisë, qeveria jonë betonon, centralizon përjashton dhe zhduk kujtesën.
“Në BE vetëm me Edin!” slogani që Edi Rama shpalli si lokomotivë fushate elektorale, ishte më shumë se sa propagandë; ishte privatizimi simbolik i ëndrrës evropiane të të gjithë shqiptarëve. Një fjalë e thjeshtë që i vuri drynin qytetit ku çelësat e tij i ka një njeri i vetëm.
Por historia nuk mbyllet me shembjen e teatrit.
Në vend të ndërtesës së teatrit, ngrihet rrëfimi. Në vend të sheshit, mbetet kujtesa. Në vend të mikrofonit, jemi ne – sepse ne jemi Teatri. Qyteti është ende aty ku janë njerëzit që nuk harrojnë.
Dhe po, ajo hapësirë nuk është më fizike. Por ajo ekziston në çdo rrëfim, në çdo kujtim, në çdo artist që nuk u shit, në çdo qytetar që s’u tërhoq.
Në çdo deputet që nuk votoi “pro”, në çdo anëtar këshilli, punonjës administrate, që rezistoi dhe nuk pranoi të bëhej pjesë e krimit mbi qytetin.
Në çdo të ri që sot pyet: “Po kush e dha këtë vendim? Kush e firmosi këtë turp? Kush e heshti këtë vjedhje?”
Ata që firmosën, janë ende aty. Por edhe ne jemi ende këtu. Dhe sa kohë jemi, historia nuk mbyllet.
Ajo fillon aty ku kujtesa bëhet revoltë. Dhe hapësira publike rifillon aty ku qytetari e ndjen veten pronar jo të truallit, por të së drejtës për të thënë: Ky është qyteti im. Nuk jepet me koncesion.
Hipokrizia e “pastrimit” të hapësirave publike
Për të kompletuar farsën, po i kthehen qytetit me një tjetër maskë: atë të pastërtisë morale. Po shembin mbulesat e hijezuesve, po heqin çadrat, po dëbojnë kafenetë nga trotuaret si të kishin zbritur nga ndonjë Olimp i etikës urbane.
Por kush ua lejoi? Kush ua dha lejet të zgjeroheshin me platforma druri në trotuare? Kush i mbylli sytë për vite me radhë?
Ishte e njëjta administratë, e njëjta bashki, e njëjta qeveri që sot bën sikur është e tronditur nga “shpërdorimi i hapësirës publike”.
E njëjta dorë që i hapi rrugën, sot vjen dhe thotë: “Çfarë keni bërë kështu?” E njëjta dorë që firmosi lejet, sot vendos shiritin e verdhë për moral publik.
I toleruan, i ushqyen, i kthyen në normalitet – sepse për vite me radhë edhe trotuari ishte pronë për t’u shitur. Dhe kur erdhi momenti i “Rilindjes 2.0”, në vend që të godasin veten, godasin të vegjlit. Jo ata që ndërtojnë kulla, e zaptojnë hapësira publike duke i shkatërruar dhe vjedhur, por ata që vendosin një karrige plastike mbi pllakat e betonit të trotuareve.
Ky nuk është pastrim. Është amnezi e planifikuar, është rigrabitur dhe mbuluar me moral. Është një narrativë e prodhuar nga vetë shkaktarët e kaosit, që tani luajnë rolin e shpëtimtarit. Por qyteti nuk harroi. Sepse trotuaret nuk i zaptuan qytetarët – i zaptuan ata që shesin edhe ajrin midis hapave në rrugë.
Sot, hapësira publike në Shqipëri nuk grabitet më natën – ajo miratohet me ligj, zbatohet me fadromë dhe justifikohet me moral të rremë.
Në emër të rendit, pastrohet kaosi që vetë kanë krijuar. Në emër të qytetarisë, përjashtohet qytetari. Në emër të zhvillimit, fshihet çdo gjurmë kujtese.
Por qyteti ka memorie. Dhe për sa kohë kujtojmë si u shemb Teatri, si u grabit sheshi, si u mbyt fjala dhe si u zëvendësua me beton – për aq kohë kjo histori nuk është e mbyllur.
Ata e duan qytetin pa njerëz, pa pyetje, pa rezistencë. Por qyteti nuk është kartolinë. Nuk është planimetria e një kompanie ndërtimi. Është ai vend ku dikush mund të ulet, të flasë, të protestojë, të kujtojë dhe të mos harrojë.
Për aq kohë sa nuk harrojmë, hapësira publike nuk është plotësisht e humbur. Ajo jeton në kujtesën tonë, derisa të kemi forcë ta rikthejmë.
Me mikrofonin e hapur. Me sheshin e mbushur. Dhe me qytetin si pronë të përbashkët, jo si çmim ndërtimi, jo si mall shumice për tu shitur tek kushdo kalimtar i rastit.
Shënim: Lista e deputetëve që votuan “pro” duke miratuar ligjin special, është marrë nga dokumentat e Kuvendit. Një numër i konsiderueshëm i atyre që votuan, 25% e tyre, sot janë në burg, nën hetim penal ose në kërkim nga SPAK.
*Projektligji për Teatrin 37/2018, formuluar “Për përcaktimin e procedurës së veçantë të për negocimin dhe lidhje ne kontratës me objekt: ‘Projektimin dhe realizimin e projektit urban dhe godinës së re të Teatrit Kombëtar’,” u botua online për konsultim më 8 qershor 2018. U shqyrtua dhe votua me procedurë të përshpejtuar 20 ditë më vonë dhe u rimiratua dy muaj më tutje pasi Presidenti e pati kthyer për rishqyrtim.
TIRANË, 28 korrik/ATSH/ Të gjithë maturantët, të cilët duan të vijojnë studimet e larta në universitete, do të kenë mundësi nga nesër (29 korrik) deri më datë 3 gusht që të aplikojnë për programet që dëshirojnë të ndjekin përmes portalit “U-Albania”.
Ministrja e Arsimit dhe Sportit, Ogerta Manastirliu përcolli sot mesazhet e një grupi maturantësh ekselentë të gjimnazeve të Tiranës, të cilët kanë dhënë mesazhe për bashkëmoshatarët e tyre, duke i ftuar ata që të studiojnë në universitetet publike në Shqipëri.
Ata shprehen se kanë zgjedhur të studiojnë në Shqipëri dhe në universitetet publike për të dhënë kontributin profesional në vendin e tyre.
“Unë do të studioj për Inxhinieri Informatike në Universitetin Politeknik të Tiranës”, thotë një maturant, ndërsa një tjetër shprehet se mezi pret që të realizojë ëndrrën e tij në Universitetin e Tiranës.
“Jo çdo rrugë që shkon larg të çon përpara, ndaj unë zgjedh të studioj në vendin tim”, shprehet një tjetër i ri.
“Mjekësia nuk është një degë që kam zgjedhur, por një mision që dua ta shërbej për popullin tim”, tha një tjetër maturante.
Më herët, ministrja Manastirliu bëri me dije se procesi i aplikimit dhe regjistrimit realizohet online në portalin universitar “U-Albania”.
Sipas kalendarit të publikuar, faza e parë ka nisur më 8 korrik dhe mbaron më 28 korrik dhe është faza e pagesave të tarifave.
Kandidatët, përpara aplikimit për zgjedhjen e preferencave në portalin e aplikimit universitar, kryejnë pagesën e tarifës së aplikimit në vlerën 2000 lekë, në zyrat e Postës Shqiptare apo në bankat e nivelit të dytë, nëpërmjet faturës për arkëtim, të cilën e shkarkojnë në portalin “U-Albania”. Pagesa kryhet deri në datën 28 korrik 2025. Pas dorëzimit të mandatit të pagesës, sekretaritë e shkollave konfirmojnë pagesën e kryer brenda datës 28 korrik, në portalin “U-Albania”.
Më tej, realizohet aplikimi online dhe për këtë periudha e përcaktuar është 29 korrik deri në 3 gusht. Në këtë periudhë, maturantët zgjedhin 10 programe studimi.
Më 29 gusht deri në 11 shtator është faza e regjistrimit në Institucionet e Arsimit të Lartë, ndërsa do të ketë publikim real të renditjes, që do të bëhet në 7 faza 48-orëshe përgjatë 14 ditëve.
Në fund është faza e çregjistrimit, për të cilën është caktuar një kohëzgjatje dyditore, nga 12-13 shtator.
TIRANË, 24 korrik/ATSH/ Ministria e Arsimit dhe Sportit, në bashkëpunim me Universitetin e Mjekësisë në Tiranë, do të financojë një laborator kombëtar reference në fushën e farmaceutikës, në kuadër të mbështetjes për kërkimin shkencor në universitetet tona.
Gjatë prezantimit të projektit, ministrja e Arsimit dhe Sportit, Ogerta Manastirliu, e cilësoi këtë investim si një hap të rëndësishëm për zhvillimin e kërkimit shkencor në fushën e mjekësisë dhe theksoi rëndësinë strategjike të këtij investimi për sistemin shëndetësor, akademik dhe për industrinë farmaceutike.
“Vijmë në një moment pikë kthese sepse sot ne jemi duke bërë një investim i cili do të shënojë një tjetër hap në drejtim të fuqizimit të infrastrukturës së kërkimit shkencor në një prej degëve të mjekësisë që është e lidhur horizontalisht me të gjithë specialistët dhe mbi të gjitha është e lidhur me trajtimin e sëmundshmërisë e gjithashtu në parandalimin e sëmundjeve që pikërisht lidhen me farmaceutikën. Ky projekt i ri i cili tashmë do të nisë në këtë universitet do të jetë një projekt që do të ngrejë për herë të parë një laborator të mirëfilltë të farmaceutikës i cili do të jetë dhe një laborator reference në nivel kombëtar duke realizuar në këtë laborator më shumë se 70 % të analizave që sot Farmakopea europiane kërkon”, theksoi Manastirliu.
Ministrja Manastirliu u ndal dhe te ndikimi që ky projekt madhor do të ketë në zhvillimin e kërkimit shkencor, programet e doktoraturës dhe të ardhurat e vetëqëndrueshme për universitetin përmes akreditimeve dhe standardeve ndërkombëtare.
“Ky është një laborator reference i cili do të mundësojë jo vetëm aspektet e kërkimit shkencor, do të mundësojë më shumë doktoratura të kryera në këtë universitet me mjete dhe infrastrukturë të kërkimit shkencor moderne, do të mundësojë një tjetër hap cilësor drejt inovacionit në farmaceutikë, që shpresojmë të marrë një akreditim të shpejtë të standardeve ISO 17025 që të realizohet ai që quhet misioni i tretë i universitetit, pra shërbimi ndaj shoqërisë, por nga ana tjetër krijon mundësinë që universiteti të mundet të përfitojë të ardhura nga të tretët. Ky laborator i cili ngrihet me fondet e Ministrisë së Arsimit dhe Sportit përmes Agjencisë Kombëtare të Kërkimit Shkencor dhe Inovacionit, por edhe si një bashkëfinancim me Universitetin e Mjekësisë së Tiranës, vjen në një moment të rëndësishëm edhe për reformat që ne si qeveri do të ndërmarrim sa i përket furnizimit me barna, por nga ana tjetër dhe garancisë që ne duhet të shtojmë për standardet e tregtimit të barnave dhe mbi të gjitha cilësisë së tyre”, nënvizoi Manastirliu.
Në përfundim, ministrja Manastirliu u ndal te rëndësia e kontrollit cilësor të barnave, ndikimi në formimin profesional të studentëve dhe te roli i laboratorit në zhvillimin e kërkimit të avancuar në farmaceutikë.
“Ky projekt lidhet me sigurinë, me kërkimin shkencor, me garancinë që ne u japim qytetarëve për më shumë standarde në shërbimin farmaceutik, por më shumë mbi të gjitha lidhet me aspekte të kërkimit shkencor, që do të thotë do të kemi staf akademik më të përgatitur, studentë më të përgatitur, por mbi të gjitha profesionistë që i përgjigjen nevojave të tregut. Është një nga projektet më të mëdha që ne financojmë në këtë vit nga projektet e kërkimit shkencor dhe inovacionit në programin e infrastrukturës së kërkimit shkencor. Kemi investuar në funksion të kërkimit shkencor fonde që i kanë shkuar universiteteve me qëllimin për të zgjeruar bazën e infrastrukturës së kërkimit shkencor, por edhe të projekteve të kërkim-zhvillimit dhe projekteve të lidhura me akademinë dhe biznesin”, theksoi Manastirliu.
Sipas saj, janë 181 projekte të financuara për këto programe.
“55 projekte ndër to janë me bashkëfinancim, duke përfshirë diasporën akademike. Ne përgjatë mbështetjes që kemi dhënë sa i përket projekteve në Fakultetin e Mjekësisë, kemi angazhuar më shumë se 60 kërkues shkencorë në programet dhe projektet e kërkimit dhe zhvillimit dhe të infrastrukturës së kërkimit shkencor. Ligji i Kërkimit Shkencor gjithashtu hap një tjetër dritare për sa i përket shkencës së hapur dhe mbështetjes së kërkimit shkencor në Shqipëri”, tha Manastirliu.
Ky investim do të sjellë përfitime të drejtpërdrejta për Departamentin e Farmacisë të UMT-së, si dhe për institucione si QSUT, Agjencia Kombëtare e Barnave dhe Pajisjeve Mjekësore, Instituti i Shëndetit Publik, Agjencia Kombëtare e Kontrollit të Kanabisit dhe industria farmaceutike shqiptare.
Laboratori do të ofrojë një gamë të gjerë shërbimesh, duke përfshirë: Analiza të cilësisë së barnave, kozmetikës dhe suplementeve, për certifikim dhe regjistrim pranë autoriteteve përkatëse; Analiza të bimëve mjekësore dhe produkteve bimore, duke ndihmuar kompanitë eksportuese shqiptare të rrisin besueshmërinë dhe vlerën në tregun ndërkombëtar; Analiza për kanabisin mjekësor dhe industrial në përputhje me ligjin nr. 61/2023 dhe standardet evropiane, në bashkëpunim me Agjencinë Kombëtare të Kontrollit të Kanabisit.
Këto shërbime do të mbështesin sektorin farmaceutik, do të përmirësojnë cilësinë e produkteve dhe do të gjenerojnë të ardhura të qëndrueshme për universitetin, duke forcuar njëkohësisht lidhjen midis arsimit të lartë, kërkimit shkencor dhe industrisë.
TIRANË, 22 korrik/ATSH/ Nëntë programe studimi sipas modelit BOKU në nivelin bachelor ofrohen nga ky vit në Universitetin Bujqësor të Tiranës, ndërsa ka nisur puna për akreditimin e UBT-së për nivelin bachelor.
Koordinatori i projektit, Prof. Dr. Dr.h.c Hubert Hasenauer tha sot gjatë akitivitetit ku i pranishëm ishte edhe Kryeministri Edi Rama se është arritur të ndërtohet një frymë bashkëpunimi, me shumë të rinj të angazhuar që duan të përmirësojnë cilësinë e arsimit në Shqipëri.
“Këtë nuk e bëjmë për të rritur si unë, por e bëjmë për brezat e ardhshëm, brezat e rinj dhe të ardhmen e vendit, ndërsa shoh realisht ambicien që keni drejt BE-së. Proceset e ndryshimit që po ndërmarrim këtu janë shumë të rëndësishme që do të thotë se vijnë nga universitetet e mësimdhënies dhe kërkimit. Niveli i lartë i mësimdhënies është po aq i rëndësishëm për të gjithë”, tha ai.
Profesor Hasenauer tha se këto procese ndryshimi ndjekin tre parime: vlerësimin e situatës, zhvillimin e misionit të përbashkët për universitetin, si edhe angazhimin e stafit akademik dhe studentëve.
“Ne bëmë një anketë të përzier me palët kryesore të interesit dhe i pyetëm se si e shihni universitetin tuaj, çfarë doni të arrini dhe si doni të ndryshoni. Gjithçka bëjmë në procesin e arsimit duhet të mbështesë kompetencat kyçe, kjo është baza intelektuale për universitetin. Një universitet ka nevojë për një lidership intelektual. Ndaj duhet të shfrytëzohet potenciali intelektual i stafit akademik”, vijoi ai, ndërsa shtoi se proceset akademike duhet të jenë të organizuara ndryshe nga ato të menaxhimit sepse pjesa akademike duhet të jetë hierarki dinamike, ndërsa menaxhimi ka nevojë për hierarki më të ngurtë.
“Ne krijuam komisionin e kurrikulave të studimit që studioi dhe vlerësoi të gjitha kurrikulat dhe ky është ndryshimi i parë kryesor se si programet e studimit zhvillohen. Kemi nëntë programe bachelor, nuk prisja të arrinim kaq shumë programe. Po punojmë për programet e masterit, teksa kemi nisur akreditimin e UBT-së për nivelin bachelor”, shtoi Hasenauer.
Koordinatori i projektit mes UBT-së dhe universitetit BOKU të Vjenës, nënvizoi se në këtë projekt janë angazhuar 20 profesorë nga BOKU që kanë punuar me UBT për programe studimore.
“Po bëjmë një ndryshim të paradigmës, nga një qasje mësimdhënieje, në kërkim dhe kemi ende shumë punë për të bërë. Duhet të ndërtojmë një strukturë që nxit këtë ndryshim, për mënyrën si organizohen universitetet që të lejohet shfrytëzimi i kapaciteteve akademike plotësisht”, pohoi ai.
TIRANË, 22 korrik/ATSH/ Universiteti Bujqësor i Tiranës ka prezantuar sot ofertën e re akademike, të përafruara me programet e BOKU (University of Natural Resources and Life Sciences) të Vjenës, duke nisur një proces transformues të UBT, me standardet më të mira europiane.
Në këtë aktivitet merrnin pjesë Kryeministri Edi Rama, Ministrja e Arsimit dhe Sportit Ogerta Manastirliu, Ministrja e Bujqësisë dhe Zhvillit Rural Anila Denaj, Rektori i UBT Fatbardh Sallaku, maturantë, pedagogë e prindër.
Universiteti Bujqësor i Tiranës hap këtë vit akademik 9 programe të reja studimi që janë arritur falë një analize të thelluar dhe bashkëpunimi intensiv me një nga universitetet më prestigjioze të Europës në fushën e shkencave të jetës, BOKU i Vjenës.
Ministrja e Arsimit dhe Sportit Ogerta Manastirliu, në fjalën e saj tha se kjo është faza e parë e reformimit të UBT, e cila përfshin ristrukturimin e ofertës akademike, riorganizimin e programeve dhe rritjen e kapaciteteve kërkimore dhe mësimore në këtë universitet.
“Në një vit është punuar ngushtësisht mes UBT dhe BOKU të Vjenës, për të transformuar rrënjësisht ofertën akademike dhe sot ofron 9 programe të reja, në përputhje me standardet e BOKU, një universitet lider në fushën e shkencave të jetës në Europë”, tha Manastirliu.
Ministrja e Arsimit dhe Sportit nënvizoi se duke filluar nga ky vit akademik, procesi akademik në këto degë do të zhvillohet së bashku me profesorët e BOKU, duke ftuar maturantët të zgjedhin UBT.
“Pedagogët e BOKU do të jenë pjesë e procesit akademik në UBT, duke filluar nga ky vit. Nga ana tjetër, studentet do të jenë pjesë e mobilitetit mes dy universiteteve, pra mund të shkojnë të zhvillojnë një cikël studimi në Vjenë. Në UBT nuk do të gjeni thjesht kurrikulën e standardizuar dhe laboratorët moderne, por do të keni mundësi të keni një kampus të vërtetë studentor. Në fund, çfarë do të fitoni? Do të keni një diplomë, e cila do të jetë pasaporta juaj akademike dhe profesionale europiane. Ndaj ju si maturantë duhet të ndiqni UBT”, tha Manastirliu, teksa vuri theksin edhe tek rritja e kapaciteteve dhe investimeve për zhvillimin e kërkimit shkencor në këtë universitet.
Programet e reja bachelor që do të ofrohen për vitin e ri akademik nga UBT janë: Menaxhim Biznesi; Ekonomiks; Teknologji Informacioni në Bujqësi dhe Mjedis; Shkenca Bujqësore dhe Siguri Ushqimi; Inxhinieri Mjedisi dhe Uji; Dizajn i Interierit dhe Inxhinieri Druri; Inxhinieri Pyjore; Ushqim dhe Shkencat e të Ushqyerit; Teknologji Ushqimore.
UBT do të shndërrohet në një qendër ekselence jo vetëm për arsimin, por edhe për kërkimin shkencor, me synim tërheqjen jo vetëm të studentëve shqiptarë, por edhe atyre ndërkombëtarë.
Kjo reformë, e mbështetur nga MAS dhe qeveria shqiptare, është modeli për modernizimin e arsimit të lartë publik në Shqipëri.
Edi Rama, zhvilloi këtë pasdite një mbledhje të gjatë me dyer të mbyllura me ministrat dhe drejtuesit e Bashkisë Tiranë, ku takimi zgjati disa orë. Duket se Edi Rama po përgatitet për zgjedhje të reja në Bashkinë e Tiranës, ku referuar burimeve mediatike, drejtimin e organizimit të ri të strukturave të Bashkisë ia ka lënë […]
TIRANË, 21 korrik /ATSH/ Kryeministri Edi Rama ishte i pranishëm sot në prezantimin e raportit të Bordit të Akreditimit të Institucioneve të Arsimit të Lartë.
Me fokus të veçantë në transformimin e Arsimit të Lartë për t’iu përgjigjur sfidave të epokës digjitale, Rama tha se ky është një takim që u kërkua për të parë një bilanc të domosdoshëm të punës intensive në një katërvjeçar kohor të bordit të Akreditimit, i cili meriton respekt dhe falënderime për angazhimin.
Rama tha se ky bord ka mbledhur një tërësi të konsiderueshme të dhënash dhe një volum eksperience për t’ia vënë në shërbim komunitetit akademik, institucioneve të Arsimit të lartë, institucioneve që administrojnë Arsimin e Lartë dhe institucioneve përkatëse të Qeverisë Shqiptare.
“Dua t’i falënderoj me shumë mirënjohje anëtarët e bordit që janë personalitete shqiptare dhe të huaja të angazhuar në botën akademike evropiane dhe i kanë vënë në dispozicion vendit tonë dijen e tyre, përkushtimin e tyre dhe sigurisht dhe integritetin e tyre profesional. Nga ana tjetër, dua të them që nga një paraqitje e përmbledhur del shumë qartë qoftë progresi i bërë në këto vite, qoftë edhe volumi jo i vogël i gjërave që mbeten për t’u bërë”, tha Rama.
Kryeministri tha se ndërkohë që ecet përpara, bota fluturon dhe për të kapur ritmin duhet që vajzave dhe djemve të këtij vendi t’i jepet një ofertë akademike serioze dhe konkurruese, në kushtet kur së shpejti Shqipëria do të bëhet anëtare e BE-së.
“Kemi nevojë të shtyjmë me shumë forcë përpara dhe të adresojmë pa ngurrim ato që janë të domosdoshme për t’u adresuar. Duke filluar edhe nga një rishikim i ligjit të Arsimit të Lartë, të cilit i janë bërë vitet për t’u riparë, por dhe shumë të rejave që kanë ndodhur në botën akademike”, u shpreh Kryeministri. /e.i/j.p/
TIRANË, 21 korrik /ATSH/ U prezantua sot Raporti i Bordit të Akreditimit të Institucioneve të Arsimit të Lartë: “Arritjet dhe sfidat drejt Universitetit 4.0”, me pjesëmarrjen e Kryeministrit Edi Rama, Ministres së Arsimit dhe Sportit Ogerta Manastirliu, drejtuesve të Bordit të Akreditimit të Institucioneve të Arsimit të Lartë, si dhe Rektorët e universiteteve publike dhe jopublike.
Ministrja Manastirliu në fjalën e saj foli për rëndësinë e procesit të akreditimit të institucioneve të arsimit të lartë, duke theksuar se synimi i Ministrisë së Arsimit dhe Sportit dhe universiteteve është të rrisë cilësinë e institucioneve të arsimit të lartë dhe të programeve të studimit të lidhura drejtpërdrejt me tregun e punës.
Duke folur për arritjet e deritanishme, Manastirliu tha: “Kemi bërë të mundur që në këto vite të kemi një rritje të financimit në institucionet e arsimit të lartë me 40%, kemi 5-fishuar fondet për kërkimin shkencor në universitetet tona përmes programeve, të cilat çdo vit zgjerohen në funksion të rritjes së cilësisë së arsimit të lartë dhe programeve të kërkimit shkencor, dhe gjithashtu lidhjeve me industrinë dhe biznesin, që është edhe në fokus të punës tonë në raport me programet e reja të studimit e gjithashtu edhe me fushat prioritare, stratgjike të zhvillimit të vendit”.
Duke folur për zhvillimet e fundit dhe standardet e reja europiane të universiteteve, për të shkuar drejt Universitetit 4.0, Ministrja Manastirliu tha: “Ekonomia 4.0 kërkon aftësi 4.0, që do të thotë që dalin përtej mureve të universiteteve tona, për të ndërtuar jo vetëm kampuse fizike, por kampuse online me universitetet në botë dhe për të krijuar mundësinë që të jemi të orjentuar drejt teknologjisë, inovacionit, kërkimit shkencor dhe shkencës së hapur, gjë e cila po ndodh me hapa të qëndrueshëm. Sot më shumë se kurrë ne jemi afër zhvillimit të inovacionit brenda institucioneve të arsimit të lartë dhe zhvillimit të programeve të studimit, në mënyrë që diplomat tona të mos jenë vetëm ato 4-vjeçaret. Pra Universiteti 4.0 kërkon që universiteti ti shërbejë të mësuarit përgjatë gjithë jetës, ndaj transfromimi i universiteteve tona duhet të fillojë pikërisht nga këto mësime të mësuara në këto vite, në zbatim të ligjit për arsimin e lartë, por edhe të instrumentave dhe institucioneve që janë krijuar, sikurse është edhe Bordi i Akreditimit”.
Raporti i prezantuar nga Bordi i Akreditimit dha një analizë të sistemit të arsimit të lartë në Shqipëri, që evidenton zhvillimet dhe sfidat kryesore në sektorin e arsimit të lartë, përfshirë ndryshimet në numrin e studentëve, cilësinë e kurrikulave, kualifikimin e stafit akademik, kërkimin shkencor dhe lidhjen me tregun e punës.
TIRANË, 21 korrik /ATSH/ Rektori i Universitetit të Tiranës, Artan Hoxha u shpreh sot se sfidat që po përballon shoqëria shqiptare, që lidhen me integrimin janë sfida që prekin edhe Arsimin e Lartë, por në shoqëritë që zhvillohen në një shpejtësi të ndryshme nga ato që janë bërë më herët, këto sfida janë edhe më të mëdha.
Në tryezën e organizuar, mbi arritjet dhe sfidat e Universitetit 4.0, ku të pranishëm ishin edhe Kryeministri Edi Rama, ministrja e Arsimit dhe Sportit, Ogerta Manastirliu dhe përfaqësues të institucioneve të Arsimit të Lartë në vend, rektori Hoxha tha se integrimi i Shqipërisë dhe hapja e kapitujve janë një portë që hapet për rininë shqiptare në BE, ndaj sfidat dhe përgjegjësitë bëhen edhe më të mëdha.
“Ne e kemi diskutuar edhe në komitetin e politikave me kabinetin, e kryesuar nga Kryeministri Rama për nevojat e vazhdimit të reformimit të Arsimit të Lartë, për ristrukturimin e vetë institucioneve të Arsimit të Lartë dhe një nga ato pikat që bie dakord me RASH-in (Rrjetin Akademik Shqiptar) dhe që janë sfidat dhe puna jonë e përditshme. Përpara se ne të presim që këto të ndodhin, ne punojmë përditë dhe reformohemi përditë. E thënë kjo, ajo që shoh në këtë raport është pothuajse raporti i tetorit 2024 me disa përmirësime dhe me rekomandime të njëjta”, tha Hoxha.
Rektori Hoxha shtoi se ky raport nxjerr disa konkluzione si kualifikimi i ulët i personelit akademik, mbingarkesat e këtij personeli në zhvillimin e programeve, numri i madh i personelit të jashtëm, kërkimi shkencor i ulët dhe plagjiaturë, biblioteka dhe laboratorë, financa të ulëta, etj.
“Ne kemi bërë shumë diskutime dhe kemi pritur që raporti sot të ketë reflektim të shqetësimeve që ne kishim në raportin e parë. Kemi parë disa reflektime, por e kemi thënë që në fillim ai bazohet në metodologji të gabuara dhe me një lloj subjektivizmi. Kjo bazohet në dy plane, në gjetjet e vetë bordit të administrimit, ku pranohet që është akredituar vetëm 40% e programit të studimit dhe e dyta ky na jep krahasimin e hershëm të vitit 2016 -2017, e deri në vitin 2023, sikur nga 2023 deri tani Arsimi i Lartë nuk ka avancuar, por ka qëndruar në vend. Mund të them me bindje që në këtë një vit e ca, Universiteti i Tiranës ka shumë diferenca nga viti i 2020, 2022, 2023 apo 2024 edhe tani që flasim”, u shpreh Hoxha.
“Ne kemi hyrë në akreditim në vitin 2022 si universitet dhe akreditimi shkon në linjën e ndihmës dhe konsolidimit të programeve dhe institucionit. Ne mund t’i drejtohemi organizmave të tjerë të akreditimit dhe kjo është në varësi të standardeve që përdoren për të arritur në konkluzione të sakta dhe për të ndihmuar institucionet e Arsimit të Lartë”, vijoi ai.
Rektori i UT-së tha se e sheh të paarsyeshme që dokumenti që prezantohet sot në tryezën e diskutimeve nuk ka të plotësuar konkluzionet e Bordit të Akreditimit, që përfshijnë një periudhë kohe shumë të rëndësishme të Arsimit të Lartë.
TIRANË, 20 korrik/ATSH/ Në Ditën Botërore të Shahut, ministrja e Arsimit dhe Sportit, Ogerta Manastirliu, vlerësoi rolin në rritje që ky sport po luan në jetën shkollore të fëmijëve dhe të rinjve.
Manastirliu u shpreh se sporti i shahut po kthehet në një traditë të bukur për nxënësit në shkolla, duke u bërë një mjet i rëndësishëm edukimi dhe zhvillimi personal.
“Zgjerimi i ekipeve sportive në shkolla në disiplina të ndryshme, përfshirë edhe shahun, po krijon më shumë mundësi për nxënësit që të angazhohen, të rriten dhe të zhvillojnë aftësi të vlefshme për jetën”, tha ministrja.
Nisma për integrimin e sporteve të ndryshme në sistemin arsimor është pjesë e reformës më të gjerë që synon edukimin e fëmijëve përmes aktivitetit fizik dhe zhvillimit të mendimit logjik e kritik.
Shahut, si një sport që nxit përqendrimin, durimin dhe strategjinë, po i jepet vëmendje e veçantë në këtë kontekst.
TIRANË, 17 korrik/ATSH/ Ministrja e Arsimit dhe Sportit, Ogerta Manastirliu, bëri të ditur sot se gjimnazi “Dhaskal Todhri” në Elbasan do t’i nënshtrohet së shpejti një rikonstruksioni të plotë, duke sjellë standarde më të mira infrastrukturore për nxënësit dhe mësuesit.
Gjatë një takimi me mësuesit e kësaj shkolle, Manastirliu theksoi se investimi në arsimin cilësor mbetet prioritet, ndërsa nënvizoi se janë duke u ndërmarrë hapa të rëndësishëm për të përmirësuar cilësinë e mësimdhënies dhe për të mbështetur më tej mësuesit.
“Me mësuesit e shkollës ‘Dhaskal Todhri’ në Elbasan ndamë lajmin e mirë se ky gjimnaz shumë shpejt do t’i nënshtrohet rikonstruksionit të plotë, ndërsa diskutuam për hapat që po hedhim për të rritur cilësinë e mësimdhënies dhe për të mbështetur më shumë mësuesit tanë, që janë shtylla e sistemit arsimor”, shkruan ministrja Manastirliu në një postim në rrjetet sociale, teksa ndau pamje dhe të projektit për rikonstruksionin e gjimnazit “Dhaskal Todhri”.
Ky investim vjen si pjesë e programit të qeverisë për përmirësimin e infrastrukturës shkollore dhe krijimin e kushteve më të mira për zhvillimin e procesit mësimor.
Login
