Read More...

Loja në Gjykatën Kushtetuese dhe koha e kryetares Holta Zaçaj dhe anëtares Sonila Bejtja po mbaron. Këtë e verteton shqetësimi i Sali Berishës që mbrojti publikisht dy gratë e Kushtetueses me mandat të skaduar.

“Këtu gjithçka bëhet që të unifikohet, të shuhet përfundimisht një mendim që gjithnjë është pakicë aty, por që është në favor të Kushtetutës, dhe që nuk arrin të mposhtin, ta blejnë, ta intimidojnë zërin e saj, mendimin e saj.”

Për Holta Zaçajn, KED ka rinisur procedurat e zëvendësimin. Si herën e parë, me kandidatë, por nuk dihet nëse Gjykata e Lartë kësaj radhe e ka seriozisht, apo një lojë të dytë. Doktori kuptohet nuk heq dorë. Lojë apo jo, ai duhet të jetë pjesë e saj.

“Konstatimi i militant Sadushit është nul, është antikushtetues, nuk ka asnjë vlerë. Fakti që ai ndërmerr një hap të tillë, ai përbën një puç kundër Gjykatës Kushtetuese, në fakt kundër shtetit.”

Por hallin më të madh, doktori dukej se e kishte jo te kryetarja Zaçaj, por anëtarja Bejtja. Ajo në fakt ka më shumë kohë, pasi Gjykata Kushtetuese ka caktuar seancë interpretimi me kërkesë të Presidencës më 16 tetor. Por megjithëse Kreu i Shtetit ka qenë në rregull me procedurën, kur vjen puna për të mbrojtur gruan e drejtorit editorial të televizionit Syri, Berisha tregohet me Begajn, edhe më i ashpër se me Sadushin.

“Nuk ka aty, ku ekziston ai. Ai ekziston në letër”/abcnews.al

Shqipëria po tërheq gjithnjë e më shumë vëmendjen e pushuesve të huaj, veçanërisht pas periudhës së pandemisë. Turizmi duket se është një ndër sektorët me rritjen më të shpejtë në vend. Një ndër faktorët kryesorë që ka ndikuar në këtë zhvillim është vendosja e linjave ajrore “low-cost”, ashtu si në shumë vende të tjera të Europës, çka ka sjellë një rritje të ndjeshme të numrit të fluturimeve komerciale.

Sipas të dhënave të Agjencisë Evropiane të Statistikave, për muajin qershor të vitit 2025 Shqipëria ka arritur një rezultat shumë pozitiv. Krahasuar me të njëjtin muaj para fillimit të pandemisë, numri i fluturimeve është rritur me plot 166.4% duke kryesuar Europën dhe rajonin. Kjo rritje e ndjeshme e trafikut ajror tregon jo vetëm rritjen e interesit për Shqipërinë si destinacion turistik, por edhe përmirësimin e infrastrukturës dhe ofertës turistike të vendit. Vetëm gjatë muajit qershor, Aeroporti Ndërkombëtar i Tiranës ka mirëpritur rreth 1.15 milionë pasagjerë. Gjatë këtij muaji janë kryer 6,830 fluturime, që kanë lidhur Tiranën me 103 destinacione në 31 shtete, përmes 27 linjave ajrore që operojnë në këtë aeroport.

Po si paraqitet situata në rajon? Pas Shqipërisë, vendi me rritjen më të lartë të fluturimeve komerciale është Bosnja dhe Hercegovina, me një rritje prej 64.7%. Edhe Serbia ka shënuar një trend pozitiv, me një rritje prej 41.4%. Maqedonia e Veriut ka shënuar një rritje më të moderuar prej 21.8%, ndërsa Mali i Zi është i vetmi vend i rajonit që ka regjistruar një rënie në këtë drejtim, me -3.3%.

Çfarë ndodh në pjesën tjetër të Europës? Në rang europian, Shqipëria është vendi me rritjen më të madhe të numrit të fluturimeve, e ndjekur nga Islanda, me një rritje prej 106.9%. Më pas renditen Bosnja dhe Hercegovina, Serbia dhe Polonia.

Megjithatë, jo të gjitha shtetet kanë ruajtur një bilanc pozitiv. Sipas të dhënave, Letonia ka shënuar rënien më të madhe të fluturimeve komerciale, me -30.7%. Situata paraqitet gjithashtu negative për Suedinë (-23.6%), Finlandën (-22.3%) dhe Slloveninë (-21.7%).

Është hedhur sot në Nion të Zvicrës shorti për turin e tretë kualifikues të Conference League, ku Egnatia, Vllaznia dhe Dinamo City janë njohur me rivalët e mundshëm në rast kalimi të turit të dytë.

Kampionia e Shqipërisë, Egnatia nëse do të arrijë të kualifikohet ndaj Dinamo Minsk, do të përballet me fituesin e duelit Olimpija (SVN) – Inter Escaldes (AND).

Vllaznia ka përballë skuadrën Víkingur Reykjavík në raundin e dytë dhe në rast kualifikimi do të luajë në turin e tretë me ekipin fitues të H. Bóltfelag (FRO) – Brøndby (DEN).

Dinamo City në rast se kalon me sukses Atletic Escaldes, do të përballet në raundin e tretë me fituesin e çiftit Zire (AZE) – Hajduk Split (CRO).

Ndeshjet e para në turin e tretë të UEFA Conference League do të luhen më 7 gusht, ndërsa ato të kthimit më 14 gusht.

Njihet si djaloshi i artë i Ballkanit. David Popoviç mund të jetë vetëm 20 vjeç, por prej kohësh është një yll i njohur në të gjithë botën, ndërsa po thyen rekorde të notit njërin pas tjetrit.

Notari i shquar rumun theu rekordin europian në 100 metra stil i lirë, padiskutim gara më e shquar dhe më klasike e këtij sporti, ndonëse mori pjesë thjesht në Kampionatin Europian U23.

Në turneun në pishinën e qytetit Shamorin në Sllovaki, Popoviç dha kohën 46”71.

Rivalët nuk patën asnjë shans, me 20-vjeçarin që arriti rezultatin e dytë më të mirë në histori për të gjitha kohët.

Ai ka qenë më parë rekordmen botëror, ndërsa padyshim që do të synojë ta thyejë rekordin që tani e mban kinezi Pan Çan Le me 46”40, pra 31 të qindat më pak se rumuni.

Popoviç mban rekordin botëror për të rinjë në 100 metra, ndërsa në 2022 doli kampion i botës në 100 e 200 metra stil i lirë, i pari notar që ia del në të njëjtin kampionat që nga viti 1973.

Edhe pse nuk shkëlqeu siç duhet në Lojrat Olimpike në Paris vitin e kaluar, rumuni është tepër i ri dhe prej tij priten rekorde dhe medalje të arta të tjera.

Ishte dita e tyre. Rubin i Kazanit ka disa lojtarë me origjinë shqiptare në përbërje, dhe ata e nderuan në nisje të Premier Ligës së Rusisë.

Skuadra nga Tatarstani fitoi 2-0 në fushën e Ahmatit në Grozni, dhe autorë të golave ishin ata.

Të parin e realizoi Dardan Shabanhaxhaj, lojtar me origjinë nga Kosova e që luan për Austrinë, ndërsa të dytin Veldin Hoxha, I cili ka pranuar të luajë për Kosovën.

Gjithsesi, nuk mund të mungonte Mirlind Daku.

Sulmuesi I kombëtares shqiptare nisi aksionin e rrjetës së parë, dhe shërbeu asist me finte në të dytin.

Një rol I ri për të, të paktën në ndeshjen e parë, ndërsa duhet të justifikojë kontratën e re, që e bën lojtarin e tretë më të paguar në Rusi.

“Rubin e nisi me fitore sezonin, Daku sërish në qendër të vëmendjes, duke u bërë hero I javës së parë të kampionatit”, – shkruajnë mediat ruse.

Besohet se ambiciet e skuadrës së shqiptarëve, në të cilën bën pjesë edhe Marvin Çuni, gjithashtu I kombëtares kuqezi, janë që të hyjë në pesë më të mirat e kampionatit, ndonëse në kontratën e Dakut ekziston një klauzolë, sipas së cilës ai mund të fitojë 500 000 euro nëse ndihmon ekipin për t’u shpallur kampion.

Dyqind mijë euro të tjera I merr nëse fiton Këpucën e Artë, por për momentin po kënaqet duke dhënë asiste.

Një nga arsyet që fiton është edhe skuadra. Tadej Pogaçar është padyshim talenti më i madh i çiklizmit në botë sot për sot, një njeri që mund të guxojë rekordet e Edi Merksit, por gjithsesi ekipi UAE është më shumë se një yll.

Kjo u duk në etapën e 15-të të Turit të Francës, të cilën e fitoi shoku i ekipit i sllovenit, Tim Velens. Çiklisti belg realizoi një shkëputje të guximshme, pasi u lejua që të luftonte për fitoren individuale.

Veterani 34-vjeçar la pas grupin kryesor që 55 km para finishit, dhe në fund u shkëput edhe nga disa çiklistë të tjerë të arratisur si ai. Kjo ishte fitorja e parë e etapës nga Velens në Turin e Francës, pasi më parë e kishte bërë në Xhiron e Italisë dhe Vueltën e Spanjës.

Pogaçar pati një itinerar të qetë në terrenin kodrinor nga Myre në Karkasone, me gjatësi 169 kilometra. Kampioni në fuqi ruajti diferencën prej 4’13” nga ndjekësi dhe rivali I tij kryesor, Jonas Vingegard.

Danezi do të ketë mundësi të sulmojë që nga kjo e martë, kur nisin etapat malore në Alpet franceze, ndonëse përmbysja duket e vështirë. Mbeten edhe 6 etapa dhe Pogaçar duket se po shkon drejt titullit të tij të katërt në Tur, një më pak se legjendat Merks, Ankëtil, Ino e Indurain./abcnews.al

Ishte njëri nga ata që njiheshin si “Vëllezërit Splesh”.

Klej Tompson, së bashku me binjakun e tij të parketit, Stef Kërri, kanë shkruar historinë e basketbollit amerikan, duke u shpallur katër herë kampionë të NBA-së, e po ashtu duke qenë të shquar si bombardues nga distanca.

Njëri nga lojtarët me gjuajtjet më të sakta tripikëshe për të gjitha kohët, realizoi një tjetër heroizëm të jashtëzakonshëm.

Në një video të hedhur në rrjet, Tompson shihet duke shënuar 72 kosha për tri pikë radhazi.

Kjo, gjatë një stërvitjeje tek skuadra e tij, Dallas Maveriks.

Forma e veteranit 35-vjeçar duket e shkëlqyer, madje shumë kohë përpara nisjes së sezonit, që pritet të fillojë si zakonisht në tetor.

Po flasim për një basketbollist që mban rekordin për më shumë kosha tripikësh në një ndeshje në NBA, 14 të tillë, dhe si rekordmeni I tripikëshave gjatë plej ofit, 98, baraz me Stef Kërrin.

Gjatë karrierës së gjatë te Golden Stejt Uorriërs, “vëllezërit” Splesh fituan 4 tituj kampion, po aq sa ka mbreti Lebron Xhejms, dhe dy më pak se Majkëll Xhordan.

Gjithsesi, 72 kosha tripikësh radhazi nuk janë një rekord, dhe këtë e mban pikërisht Stef Kërri.

Në dhjetor të vitit 2020, ai shënoi për pesë minuta radhazi nga distanca, duke arritur në 105 kosha tripikësh radhazi, pa asnjë gabim.

Zyrtarët iranianë pritet të takohen me homologë të tyre nga Britania, Franca dhe Gjermania më 25 korrik në Stamboll, për të diskutuar programin bërthamor të Iranit, teksa vendet perëndimore e rrisin presionin ndaj Teheranit për të arritur marrëveshje, pasi në të kundërtën rrezikon të përballet me sanksione.

Zëdhënësi i Ministrisë së Jashtme të Iranit, Esmail Baghaei, ka thënë më 20 korrik se bisedimet do të mbahen në nivel të zëvendësministrave të Jashtëm.

“Si përgjigje ndaj kërkesave të kombeve evropiane, Irani është pajtuar për të mbajtur rundin e ri të negociatave”, ka thënë Baghaei për televizionin shtetëror.

Edhe ministri i Jashtëm Iranian, Abbas Aragchi ka konfirmuar se po punohet në mbajtje të takimit.

Këto tri vende evropiane kanë paralajmëruar që nëse nuk arrihet marrëveshje me Iranin deri në fund të gushtit, ato do t’i rikthejnë të gjitha sanksionet e Organizatës së Kombeve të Bashkuara (OKB) kundër Iranit, përmes të ashtuquajturit “mekanizëm rikthimi”. Më 18 korrik, Aragchi u ka bërë thirrje fuqive evropiane që t’i ndalin kërcënimet ndaj Teheranit, përfshirë paralajmërimet për rikthim sanksionesh.

Nën marrëveshjen e arritur më 2015 mes Teheranit dhe fuqive botërore, këto të fundit i kanë hequr kufizimet në shitje armësh, sektorin bankar dhe teknologjinë e lidhur me çështje bërthamore.

Qeveritë evropiane mund të shfrytëzojnë mekanizmin e OKB-së deri më 15 tetor.

Irani e ka pezulluar bashkëpunimin me Agjencinë Ndërkombëtare për Energji Atomike pas bombardimeve amerikane dhe izraelite në qendrat e tij bërthamore një muaj më parë. Evropianët janë duke iu bërë presion inspektorëve bërthamorë të OKB-së që të rikthejnë bashkëpunimin me Iranin, për të parandaluar Teheranin që të riorganizojë programin bërthamor, pas dëmit që i është shkaktuar nga sulmet.

Irani dhe SHBA-ja ishte planifikuar që të takoheshin në Oslo më herët gjatë këtij muaji, mirëpo takimi është shtyrë, pa caktuar një datë të re.

Ndonëse të dyja palët pretendojnë se mbështesin diplomacinë, Irani kërkon garanci se nuk do të ketë sulme tjera në të ardhmen.

Presidenti amerikan, Donald Trump ka sinjalizuar se është i interesuar në një marrëveshje më të gjerë, mirëpo ka paralajmëruar për sulme të reja, nëse Irani rinis pasurimin e uraniumit në nivele të larta.

Një pikëpyetje e madhe ekziston për vendndodhjen e uraniumit të pasuruar të Iranit – mbi 60 për qind – shifër mbi nivelet e nevojshme për përdorim civil dhe nën nivelin e kërkuar për prodhim armësh.

Irani besohet se i ka rreth 400 kilogramë të uraniumit të pasuruar në atë shkallë./rel

Qeveria e Ekuadorit e ka ekstraduar të dielën trafikantin më të madh të drogës, Adolfo Macias, të njohur me nofkën “Fito” në Shtetet e Bashkuara, një muaji pasi ka rënë në duart e autoriteteve.

Më 2024, ai pati ikur nga një burg i sigurisë së lartë.

Zyra e Prokurorit në Shtetet e Bashkuara e ka publikuar aktakuzën kundër tij në prill.

I përshkruar si kreu i bandës “Los Choneros”, Macias akuzohet për shpërndarje të kokainës, për komplot dhe dhunë me armë, përfshirë kontrabandë të armëve.

Në një letër të lëshuar nga Departamenti amerikan i Drejtësisë është thënë se Macias do të paraqitet në gjykatën federale të hënën.

Ky shtetas ekuadorian, dikur një shofer taksie, por i shndërruar në bos krimi, është pajtuar në gjykatë një javë më parë që të ekstradohet në Shtetet e Bashkuara për t’u përballur me akuzat.

Ai është shtetasi i parë i Ekuadorit që ekstradohet nga vendi i tij prej hyrjes në fuqi të ligjit të ri një vit më parë.

Ligji është miratuar pas një referendumi të mbajtur nga presidenti Daniel Noboa me qëllim të sigurimit të mbështetjes për t’i luftuar bandat kriminale./rel

Një aksident me pasojë vdekje është regjistruar pak para mesnate në kryeqytet.

Një 54 vjecar raportohet të ketë humbur jetën, pasi u aksidentua nga një makinë. Ngjarja u shënua në rrugën ‘Jordan Misja’ ndërsa policia ka nisur hetimet për shkaqet.

Tiranë/Informacion paraprak

Me datë 18.07.2025, në rrugën “Jordan Misja” automjeti me drejtues shtetasin H. M., rreth 27 vjeç, ka aksidentuar biçikletën me të cilën lëvizte shtetasi S. Xh., rreth 54 vjeç.

Si pasojë e aksidentit është dëmtuar 54-vjeçari, i cili ka humbur jetën në spital. Ndërsa drejtuesi i automjetit është shoqëruar në Komisariat për veprime të metejshme hetimore.

Grupi hetimor po punon për sqarimin e rrethanave të aksidentit.

“Po ju jap një lajm. Do ketë vendimmarje të forta politike që prekin SHBA, rajonin dhe  Shqipërinë. Shqipëria ka peshën e vet.”

As 24 orë nga deklarata e Këlliçit, lajmi erdhi. Administrata e Donald Tramp ka udhëzuar të gjithë diplomatët amerikanë të mos komentojnë më zgjedhjet në asnjë vend të botës.

Nëpërmjet Sekretarit të Shtetit, Marko Rubio, mesazhi është i qartë, urime të shkurtra, përgëzuese dhe pa opinione.

“Kur është e përshtatshme të komentojmë mbi zgjedhjet e huaja, mesazhi ynë duhet të jetë i shkurtër, i përqendruar në përgëzimin e kandidatit fitues dhe, kur është e përshtatshme, në shënimin e interesave të përbashkëta të politikës së jashtme. Mesazhet duhet të shmangin shprehjen e opinioneve mbi drejtësinë ose integritetin e një procesi zgjedhor, legjitimitetin e tij ose vlerat demokratike të vendit në fjalë”

Por çfarë tha, Këlliçi vetëm 24 orë më parë. Lajmin e dha, por nxori bllof veten dhe doktorin.

“Mos harroni, vijon DASH, të jetë refuzues në dhënien qoftë të një deklarate formale, përshëndetje formale, i vetmi vend në botë. Ka patur një urim nga ambasada.”

Dhe urimi i ambasadës amerikane për zgjedhjet e 11 majit në Shqipëri, ishte ky, fiks sipas udhëzimit të Marko Rubios.  Por edhe doktori nuk ndryshon shumë nga Këlliçi.

“Lexoni pak disa nga deklarata e sekretarit Rubio për zgjedhjet në vende të ndryshme të botës. Direkt të sekretarit, dhe do kuptoni mirë se ç’përfaqëson ajo që ju e quani urim për Edi Ramë, dmth jo zgjedhjet,  uron shqiptarët, kaq. Aty urohen shqiptarët.”

Kështu doktorit, I mbyllet edhe një derë, jo vetëm për non-gratën dhe vizën, por edhe për farsën.

Berisha nëpërmjet një shoqate patriotësh në SHBA kontraktoi një firmë lobimi 6 milionë dollarë, e cila deri më tani rezulton se ska bërë asnjë punë. Më 21 maj, pasi nuk siguroi dot as vizën e as heqjen e non gratës para zgjedhjeve, kërkoi nëpërmjet kompanisë një hetim ndërkombëtar dhe qeveri teknike. Por me udhëzimin e ri të SHBA, duhet ta kthejë mbrapsht.

Për ti marrë një koment për këtë lajm, Berisha vendosi të mos dalë këtë të premte në konferencën e përjavshme. Iku në këtë korrik të nxehtë, me mendjen përtej oqeanit, por fizikisht tek Gjiri i Lalzit.

Lajmi erdhi, tani mos prisni më lajm, sidomos nga Amerika./abcnews.al

Liverpul është mbreti i merkatos së verës dhe duket e pamundur që deri në fund të këtij sesioni në tregun e transferimeve, ndonjë klub tjetër të mund ta zbresë nga froni.

Kampionët e Premier Ligës kanë shpenzuar deri tani 300 milion euro për blerjen e katër futbollistëve. I fundit është Hugo Ekitike, sulmuesi francez që transferohet nga Eintracht Frankfurt.
Pasi nuk arriti të merrte Alexander Isak, Liverpul ka paguar 81 milion euro për 23 vjeçarin.

Kësaj shifre i shtohet ajo rekord e Florian Virtz, si blerja më e shtrenjtë në historinë e Premier Ligës. Për ta marrë talentin gjerman nga Bajer Leverkusen, “The Reds” shpenzuan më shumë se 134 milion euro. Po ashtu, nga “Aspirinat”, kampionët anglezë blenë edhe Jeremi Frimpong.

Për shërbimet e holandezit u paguan 34.7 milion euro. Shpenzimeve të çmendura të Liverpul deri tani në tregun e verës iu shtohen edhe ato për Milos Kerkez. Për mbrojtësin hungarez u paguan te Bournemouth, 46.2 milion euro. Por nuk mbyllet me kaq.

Deri në fund të këtij sesioni të merkatos, kampionët anglezë kanë lënë të hapur mundësinë për të tjera transferime në mënyrë që të vendosin në dispozicion të trajnerit Arne Slot një skuadër me mision mbrojtjen e titullit në Premier Ligë dhe dominuese në Europë./abcnews.al

Donald Trump thotë se i ka urdhëruar departamentit të drejtësisë të prodhojë dokumente shtesë në lidhje me abuzuesin seksual Jeffrey Epstein.

“Bazuar në sasinë qesharake të publicitetit që i është dhënë Jeffrey Epstein, i kam kërkuar Prokurores së Përgjithshme Pam Bondi të paraqesë çdo dëshmi përkatëse të Jurisë së Madhe, në varësi të miratimit të Gjykatës”, tha ai.

Nuk është e qartë nëse Trump po autorizon publikimin e këtyre dokumenteve. Një veprim i tillë zakonisht do të kërkonte miratimin e një gjykate.

Kjo ndodhi menjëherë pasi Trump tha se do të padiste The Ëall Street Journal për një artikull që pretendonte se një urim “i pahijshëm” për ditëlindje që mbante emrin e Trump iu dërgua Epstein në vitin 2003, përpara se financieri i ndjerë të akuzohej për krime seksuale. Letra, të cilën gazeta pretendon se është dërguar në 50-vjetorin e lindjes së Epstein, është cilësuar nga Trump si “e rreme”.

Në një postim, Trump tha se gazeta dhe pronari Rupert Murdoch “ishin paralajmëruar drejtpërdrejt” se do të paditeshin nëse do ta botonin historinë, duke e përshkruar atë si “të rreme, keqdashëse dhe shpifëse”.

Sipas The Ëall Street Journal, një letër që mbante emrin e Trump “përmbante disa rreshta teksti të shkruar me makinë shkrimi të përshtatur nga skica e një gruaje të zhveshur, e cila duket se është vizatuar me dorë me një shënues të rëndë”.

“Brenda skicës së gruas së zhveshur ishte një shënim i shkruar me makinë shkrimi i stiluar si një bisedë imagjinare midis Trump dhe Epstein, e shkruar në vetën e tretë”, raportoi gazeta.

Letra, sipas The Ëall Street Journal, thuhet se përfundon me fjalët: “Një mik është një gjë e mrekullueshme. Gëzuar ditëlindjen – dhe çdo ditë qoftë një tjetër sekret i mrekullueshëm”.

“Këto nuk janë fjalët e mia. Gjithashtu, unë nuk vizatoj”, tha Trump në mediat sociale në përgjigje të historisë.

Sipas gazetës, letra ishte pjesë e një përmbledhjeje urimesh për ditëlindje që u përgatit nga bashkëpunëtorja e Epstein, Ghislaine Maxëell. Maxëell u dënua në vitin 2021 për ndihmën e Epstein për trafikimin seksual të fëmijëve dhe u dënua me 20 vjet burg.

Direktiva e Trump për të publikuar më shumë dokumente vjen pas ditësh presioni të vazhdueshëm nga disa prej mbështetësve më besnikë të Trump që kërkonin zbulime të mëtejshme në rastin Epstein.

Prokurorja e Përgjithshme Pam Bondi postoi disa minuta pas presidentit: “Jemi gati t’i drejtohemi gjykatës për të hapur transkriptet e jurisë së madhe.”

Një juri e madhe është një grup qytetarësh i ngritur nga një prokuror për të përcaktuar nëse ka prova të mjaftueshme për të ngritur akuza. Në terma ligjorë, ajo përcakton nëse ekziston shkak i mundshëm për të besuar se është kryer një krim.

Vendimet e jurisë së madhe duhet të testohen para një jurie normale në gjykatë, në mënyrë që një i dyshuar të dënohet për një krim.

Nuk është e qartë nëse postimi i presidentit kishte të bënte me dëshminë e jurisë së madhe nga grupi i parë i çështjeve që kishin të bënin me Epstein në fillim të viteve 2000, apo nëse buronte nga akuzat federale të ngritura në vitin 2019. BBC ka pyetur Shtëpinë e Bardhë.

Disa dokumente të jurisë së madhe janë publikuar tashmë në lidhje me çështjen në Florida në vitin 2006 që çoi në akuzimin e tij për nxitje të një prostitute. Çështja u kritikua ashpër për mungesën e akuzave serioze dhe ashpërsinë e dëshmisë së dhënë nga viktimat, të cilat përfshinin shumë të mitur.

Ndërsa bënte fushatë vitin e kaluar, Trump premtoi të publikonte dosjet që lidhen me financierin Epstein.

Megjithatë, Bondi javën e kaluar njoftoi se departamenti i drejtësisë i SHBA-së nuk besonte se Epstein kishte një të ashtuquajtur listë klientësh që mund të implikonte bashkëpunëtorë të profilit të lartë dhe se ai i mori jetën vetes – pavarësisht komploteve për vdekjen e tij.

Kjo ndodhi pasi Bondi kishte deklaruar se ishte gati të njoftonte zbulime të mëdha rreth çështjes, duke përfshirë “shumë emra” dhe “shumë regjistra fluturimi” – një përshëndetje për ata që udhëtuan me financierin ose që vizituan ishujt e tij privatë ku thuhet se kanë ndodhur shumë nga krimet e tij të supozuara.

Kthimi i saj shkaktoi reagim të furishëm nga shumë mbështetës të zjarrtë të Trump, të cilët kanë bërë thirrje që Bondi të japë dorëheqjen pasi nuk arriti të paraqiste listën, të cilën zyrtarët e Trump kishin pretenduar më parë se e kishin në zotërim.

Komentatori konservator Charlie Kirk, i cili ishte kritik ndaj trajtimit të dosjeve nga administrata në ditët e fundit, vlerësoi veprimin e Trump.

“Kjo është masive, kjo është diçka për të cilën kemi folur për një kohë të gjatë dhe me të vërtetë një fuqi për bazën,” tha ai.

Epstein vdiq në një qeli burgu në Nju Jork në vitin 2019, ndërsa priste gjyqin për akuzat e trafikimit seksual. Vdekja e tij ndërsa ishte në burg ndodhi më shumë se një dekadë pas dënimit të tij për nxitje prostitucioni nga një i mitur, për të cilin ai ishte regjistruar si shkelës seksual.

Read More...

Emocionet kanë qenë të forta, por kjo që vjen nuk ka krahasim. Turi i Francës hyn në momentet e tij vendimtare, dhe kjo që në ditën e sotme me etapën e 12-të që nis ngjitjet në Malet e Pirenejve.

Plot 180 km me dy të përpjeta të ashpra, sidomos me mbërritjen në maloren në Otakam, e gjatë 13.5 kilometra dhe me pjerrësi 7.8 për qind.

Pikërisht në malet jugore të Europës do të konsumohet beteja mes dy prendentetëve kryesorë për të fituar Turin, sllovenit Tadej Pogaçar dhe danezit Jonas Vingegard.

I pari kampion në fuqi dhe tri herë fitues i Klasikes së madhe, dhe I dyti dy herë fitues.

Pogaçar është në vendin e dytë, duke humbur tre ditë më parë Fanelën e Verdhë, por vetëm për 29” vonesë ndaj irlandezit luftarak, Ben Hili.

Edhe pse ka probleme në skuadrën e tij, UAE, me dëmtimin e tërheqjen e ndihmësit Almeida, dhe me dëmtimin e rusit Sivakov, sërish 26-vjeçari e ka kontrolluar mirë garën deri tani.

Kulmi I betejës do të jetë pas dy ditësh, të shtunën e 19 korrikut, në etapën e 14-të, që cilësohet “Etapa Mbretëreshë” e këtij edicioni të Turit të Francës.

Në fundjavë, itinerari do të jetë prej 182.7 kilometrash, gjithnjë në Pirenej, me katër ngjitje të forta, ku mbi të gjitha është mitikja “Kol dy Turmaje”, plot 19 km malore me pjerrësi 7.9 për qind.

Ndoshta vetëm pas të shtunës do ta kuptojmë më mirë se cili do të jetë favoriti për të fituar këtë Tur të Francës, ndonëse do të ketë edhe katër etapa malore, nga 22 deri në 25 korrik, përpara finishit në Shamps Elize të Parisit në 27 korrik./abcnews.al

Goli i Xhuliano Skukës na jep padyshim mjaft mundësi. Natyrisht, futbolli në kupat e Europës luhet për 180 minuta, ndonjëherë edhe për 210 bashkë me shtesat e ndodh që gjuhen penallti, por sidoqoftë, Partizani ka shanse të mira për të kaluar në turin e dytë të Ligës së Konferencës.

Të kuqtë barazuan 1-1 ndeshjen e parë të raundit të parë, në Estoni, ndaj rivalit Nome Kalju, dhe e presin me më shumë besim duelin e dytë, këtë të enjte në orën 20:00 në “Arenën Air Albania” në kryeqytet.

Të besuarit e trajnerit Skënder Gega janë në humor të mirë, edhe pse ekipi në përgjithësi është i ri. Vetëm një sulmues si Skuka mund të cilësohet përforcim I rëndësishëm, por gjithsesi Gega ka ditur të largojë pasigurinë e të krijojë atmosferë të qetë e të bashkuar në skuadër.

Partizani, ndërkaq, pavarësisht nga dështimet e shumta në Europë, është ndër të paktat emra të futbollit shqiptar që I është afruar sukseseve në kontinentin e vjetër.

Në 2023-2024, vetëm dy sezone më parë, të kuqtë arritën plej ofin e Ligës së Konferencës, pasi u eliminuan në Champions nga BATE Borisov, e pastaj kaluan ekipin nga Andorra Atletik klub d’Eskaldes dhe Valmierën nga Letonia, për t’u eliminuar vetëm për një gol nga Astana e Kazakistanit.

Në 2016-2017, nuk harrohet ecuria në Champions me eliminimin e Ferencvaroshit të fortë të Hungarisë, dhe dueleve dinjitoze ndaj kampiones së Austrisë, Salcburg. Në plej ofin e Ligës së Europës, të kuqtë u ndalën nga Krasnodari i fortë i Rusisë./abcnews.al

Objektivat janë vërtet të larta.

Rubin e ka provuar edhe më parë të fitojë titullin në Rusi, me kulmet në vitet 2008 e 2009, ndërsa dëshira absolute e klubit është që kjo lavdi të përsëritet.

Rubin jo më kot bëri një sakrificë të vërtetë për të mbajtur Mirlind Dakun, dhe sipas mediave në Rusi, po mendohet edhe përfshirja në garën për Premier Ligën.

Sipas të përditshmeve pranë klubit nga Tatarstani, në kontratën e rinovuar të sulmuesit kuqezi ekziston një klauzolë sipas së cilës ai do të fitojë plot 500 000 euro nëse ndihmon ekipin të shpallet kampion.

Jo vetëm kaq, por për objektvin personal, që është fitorja e Këpucës së Artë, Dakut do t’i jepen edhe 200 000 euro të tjera.

Futbollisti I kombëtares shqiptare rinovoi kontratën që I vlente deri në 2026, pasi dështoi kalimi tek Zeniti në Shën Peterburg.

Akordi I ri vlen deri në 2029, dhe raportimet janë të ndryshme lidhur me pagën e yllit nga Kosova.

Flitet për shifra nga 2 deri në 2.5 milionë euro në sezon, si dhe për një shumë prej 1.5 milionë eurosh që Daku e ka marrë në momentin e hedhjes së firmës në marrëveshje.

Lojtari I Shqipërisë ka shënuar 25 gola e ka shërbyer 12 asistë në 54 ndeshje të Premier Ligës ruse deri tani./abcnews.al

Mosha madhore vjen edhe me përgjegjësi të mëdha për Lamine Yamal. Pak ditë pasi festoi 18 vjetorin e lindjes, talenti spanjoll mori si dhuratë nga Barcelona një trashëgimi të rëndësishme.

Bashkë me rinovimin e kontratës deri në vitin 2031 me një klauzolë 1 miliard euro të denjë për një kampion, Lamine Yamal iu dorëzua zyrtarisht fanela me numrin 10.

Është e njëjta që kanë mbajtur përpara tij kampionë të mëdhenj të historisë “blaugrana”, si Maradona, Ronaldo “fenomeni”, Ronaldinho dhe i fundit Lionel Messi.

Është ende shpejt për të hyrë në klubin e tyre, por është në rrugën e duhur dhe nëse vazhdon me këtë ritëm, kjo ditë nuk do të jetë e largët. Këtë e di mirë Yamal, që do të ndjekë rrugën e tij për të fituar një vend mes legjendave të Barcelonës.

“Nuk ndiej presion, jam në klubin më të mirë në botë. Mesi ka bërë rrugën e tij, dhe tani unë do të bëj timen. Do të merrja gjithçka nga Mesi. Ai është ende aktiv, gjithçka nga Ronaldinjo dhe gjithçka nga Maradona. Shpresoj të vazhdoj trashëgiminë e tyre. Rinovimi me Barçën deri në vitin 2031 është një hap i madh, fillimi i një udhëtimi që shpresoj të jetë shumë i gjatë”.

Numri 10 që Lamine do të mbajë në shpinë duke nisur nga sezoni i ardhshëm është I merituar dhe I fituar në fushën e lojës. Këtë e tregojnë shifrat, të ekzagjeruara për një lojtar në moshën e tij. Me Barcelonën, Yamal numëron 106 ndeshje, ka shënuar 25 gola dhe ka dhënë 28 asist për shokët e skuadrës.

Dhe meqë jemi te numrat. Sapo fanela me emrin e Yamal me numrin 10 u vendos në dyqanet zyrtare të Barcelonës, menjëherë është shoqëruar me një rekord shitjesh.

Është mirë kur e kupton se të duan.

Kristian Asllani padyshim ndihet më I sigurt dhe me më shumë besim në vetvete, ndërsa lajmet janë që dikush e kërkon me ngulm dhe e quan mjaft të vlefshëm.

Ky dikush që do mesfushorin e kombëtares shqiptare është trajneri I ri I Fiorentinës, Stefano Pioli, ndërsa ish-tekniku i Milanit ka nxitur klubin që të bisedojë seriozisht me Interin.

Lajmet nga Italia janë që klubi fiorentin ka bërë sondazhet e para në Milano, dhe është arritur një lloj kuptimi i dyanshëm.

“Vjollcët” duan që ta marrin fillimisht Asllanin në huazim për një sezon, dhe pastaj të bisedohet për blerje të kartonit.

Nga Interi nuk ka kundërshtim për këtë skenar, pra ylli I Shqipërisë mund të luajë I huazuar në 2025-2026, veçse lombardët kanë një kusht.

Verën që vjen, blerja e kartonit të 23-vjeçarit duhet të jetë e detyrueshme, jo fakultative.

Sipas asaj që informojnë mediat në Apenine, Interi e vlerëson kartonin e Asllanit në 18 milionë euro, e padyshim që kjo është një shifër fillestare në këto bisedime.

Nuk dihet sesi do të përfundojë kjo sagë, por duket se Fiorentina e ka seriozisht dhe e konsideron të rëndësishëm shqiptarin në pretendimet e saj për t’u kualifikuar në Champions sezonin e ardhshëm./abcnews.al